1. Wetin go ɛp wi fɔ lan fɔ ɛnjɔy fɔ stɔdi Baybul prɔfɛsi?

 WAN yɔŋ brɔda we nem Bɛn tɔk se: “A lɛk fɔ stɔdi Baybul prɔfɛsi.” Yu gri wit am? Ɔ yu de tink se Baybul prɔfɛsi dɛn tu at fɔ ɔndastand? Sɔntɛm yu go ivin fil se yu nɔ go ɛnjɔy fɔ stɔdi Baybul prɔfɛsi dɛn. Bɔt, we yu lan bɔt wetin mek Jiova mek dɛn put dɛn na in Wɔd, sɔntɛm yusɛf go bigin fɔ lɛk dɛn.

2. Wetin wi go tɔk bɔt insay dis atikul?

² Insay dis atikul, wi go tɔk bɔt wetin mek wi fɔ lan bɔt Baybul prɔfɛsi dɛn ɛn aw wi go ebul fɔ stɔdi dɛn. Dɔn wi go tɔk bɔt tu prɔfɛsi dɛn we Daniɛl bin rayt, ɛn wi go si aw wi go bɛnifit we wi ɔndastand dɛn.

3. If wi want fɔ ɔndastand Baybul prɔfɛsi, wetin wi nid fɔ du?

³ If wi want fɔ ɔndastand Baybul prɔfɛsi, wi nid fɔ aks fɔ ɛp. Tink bɔt dis ɛgzampul. Imajin se yu go waka na ples we yu nɔ sabi, bɔt yu padi we go wit yu sabi di ples gud gud wan. I no usay una de ɛn usay una go rich if una pas na ɛni rod. Wan dawt nɔ de se yu go gladi bikɔs yu padi gri fɔ go wit yu! Jiova tan lɛk da padi de. I no gud gud wan wetin go apin to wi tumara bambay. So fɔ lɛ wi ɔndastand Baybul prɔfɛsi, wi nid fɔ put wisɛf dɔŋ ɛn beg Jiova fɔ ɛp wi.—Dan. 2:​28; 2 Pit. 1:​19, 20.

4. Wetin mek Jiova bin mek dɛn rayt prɔfɛsi dɛn na in Wɔd? (Jɛrimaya 29:​11) (Luk bak di pikchɔ.)

⁴ Jɔs lɛk ɛni gud mama ɔ papa, Jiova want in pikin dɛn  fɔ ɛnjɔy tumara bambay. (Rid Jɛrimaya 29:​11.) Bɔt Jiova ebul fɔ du sɔntin we no mama ɔ papa nɔ ebul fɔ du, dat na fɔ tɔk kɔrɛkt wan bɔt wetin gɛt fɔ apin tumara bambay. I mek dɛn rayt prɔfɛsi dɛn na in Wɔd so dat wi go no bɔt impɔtant tin dɛn bifo dɛn apin. (Ayz. 46:​10) Baybul prɔfɛsi dɛn na fayn gift frɔm wi Papa we de na ɛvin. Bɔt wetin go ɛp yu fɔ biliv se di tin dɛn we di Baybul dɔn tɔk go mɔs kam tru?

5. Wetin yɔŋ pɔsin go lan frɔm Maks in ɛkspiriɛns?

⁵ We wi yɔŋ wan dɛn kin go skul, bɔku tɛm dɛn kin de wit pipul dɛn we nɔ rɛspɛkt di Baybul. Di tin dɛn we di pipul dɛn kin tɔk ɛn du kin mek dɛn wi yɔŋ Jiova Witnɛs dɛn ya bigin dawt wetin dɛn biliv. Tink bɔt wan brɔda we nem Maks in ɛkspiriɛns. I se: “We mi na bin tineja, a bigin fɔ dawt if na di tru rilijɔn mi mama ɛn papa bin de tich mi bɔt ɛn if di Baybul rili kɔmɔt frɔm Gɔd.” Wetin in mama ɛn papa bin du? I se: “Pan ɔl we a bin no se dɛn de wɔri, dɛn nɔ bin vɛks.” Maks in mama ɛn papa yuz di Baybul fɔ ansa in kwɛstyɔn dɛn. Maks sɛf bin du sɔntin. I se: “A stɔdi Baybul prɔfɛsi fɔ misɛf ɛn a bin tɔk bɔt wetin a lan wit ɔda yɔŋ wan dɛn.” Wetin bin apin we i du dat? Maks se: “Afta dat, a bin kam fɔ biliv tranga wan se di Baybul kɔmɔt frɔm Gɔd!”

6. Wetin yu nid fɔ du if yu gɛt dawt? Wetin mek?

⁶ If yusɛf bigin fɔ dawt if di tin dɛn we de na di Baybul na tru lɛk Maks, yu nɔ nid fɔ fil bad. Bɔt yu nid fɔ du sɔntin. Dawt tan lɛk rɔsti. If yu nɔ tray fɔ pul am, smɔl smɔl i go pwɛl sɔntin we valyu. Fɔ mek yu go ebul pul ɛni dawt we go ambɔg yu fet, yu go nid fɔ aks yusɛf dis kwɛstyɔn, ‘A biliv wetin di Baybul tɔk bɔt tumara bambay?’ If yu nɔ shɔ, yu go nid fɔ stɔdi Baybul prɔfɛsi dɛn we dɔn ɔlrɛdi kam tru. Aw yu go ebul fɔ du dat?

7. Wetin bin ɛp Daniɛl fɔ stɔdi Baybul prɔfɛsi? (Daniɛl 12:​10) (Luk bak di pikchɔ.)

⁷ Daniɛl sɛt fayn ɛgzampul we i kam to aw fɔ stɔdi prɔfɛsi. I bin de stɔdi prɔfɛsi dɛn fɔ di rayt rizin, dat na fɔ no di tru. Dɔn bak, Daniɛl bin put insɛf dɔŋ, i bin no se Jiova go ɛp am fɔ ɔndastand prɔfɛsi dɛn if i kɔntinyu fɔ de nia am ɛn obe am. (Dan. 2:​27, 28; rid Daniɛl 12:​10.) Daniɛl bin sho se i de put insɛf dɔŋ bay we i abop pan Jiova fɔ ɛp am. (Dan. 2:​18) Dɔn bak, Daniɛl bin de stɔdi gud gud wan. I bin de du risach na di Skripchɔ dɛn we bin de da tɛm de. (Jɛr. 25:​11, 12; Dan. 9:​2) Aw yu go falamakata Daniɛl?

8. Wetin mek sɔm pipul dɛn de stɔdi Baybul prɔfɛsi dɛn? Wetin wi fɔ du?

⁸ Tek tɛm tink bɔt wetin mek yu de stɔdi Baybul prɔfɛsi dɛn. Fɔ se yu de stɔdi Baybul prɔfɛsi bikɔs yu rili want fɔ no di tru? If na so i bi, Jiova go ɛp yu. (Jɔn  4:​23, 24; 14:​16, 17) Us ɔda rizin kin mek sɔm pipul dɛn stɔdi Baybul prɔfɛsi? Sɔm kin du am bikɔs dɛn want fɔ pruv se di Baybul nɔ kɔmɔt frɔm Gɔd. Dɛn de tink se if di Baybul nɔ kɔmɔt frɔm Gɔd, dat min se dɛn go ebul disayd fɔ dɛnsɛf wetin rayt ɛn wetin rɔng. Bɔt wi nid fɔ stɔdi fɔ di rayt rizin. Dɔn bak, fɔ lɛ wi go ɔndastand Baybul prɔfɛsi, wi nid fɔ gɛt wan impɔtant kwaliti.

9. Us kwaliti wi nid fɔ lɛ wi ɔndastand Baybul prɔfɛsi? Ɛksplen.

⁹ Put yusɛf dɔŋ. Jiova dɔn prɔmis se i go ɛp di wan dɛn we de put dɛnsɛf dɔŋ. (Jems 4:​6) So wi nid fɔ pre fɔ lɛ I ɛp wi fɔ ɔndastand Baybul prɔfɛsi. Dɔn bak, wi fɔ gri fɔ tek di ɛp we di slev we fetful de gi wi bikɔs na dɛn Jiova de yuz fɔ gi wi spirichwal it di rayt tɛm. (Lyuk 12:​42) Jiova na Gɔd we ɔganayz, so i mek sɛns fɔ lɛ i yuz jɔs wan we fɔ ɛp wi ɔndastand di tru tin dɛn we de na in Wɔd.—1 Kɔr. 14:​33; Ɛfi. 4:​4-6.

10. Wetin yu lan frɔm Ɛsta in ɛkspiriɛns?

¹⁰ Stɔdi gud gud wan. Stat fɔ stɔdi prɔfɛsi we yu lɛk. Na dat wan sista we nem Ɛsta bin du. I bin lɛk prɔfɛsi dɛn we de tɔk bɔt di Mɛsaya in kam wan. I se: “We a bin ol 15 ia, a bigin du risach fɔ pruv se dɛn bin dɔn rayt dɛn prɔfɛsi dɛn ya bifo Jizɔs in tɛm.” Di tin dɛn we i bin lan we i rid bɔt di Dɛd Si Skrol dɛn bin rili ɛp am fɔ biliv dat. I se: “Dɛn bin dɔn rayt sɔm pan dɛn skrol dɛn ya bifo Krays in tɛm, so dat min se di prɔfɛsi dɛn we de insay de go dɔn kɔmɔt frɔm Gɔd.” Ɛsta tɔk bak se, “A bin gɛt fɔ rid sɔm tin dɛn bɔku tɛm bifo a ɔndastand dɛn.” Bɔt i gladi we i du ɔl dat. Afta i dɔn stɔdi sɔm Baybul prɔfɛsi dɛn gud gud wan, i se, “A ebul fɔ si fɔ misɛf klia wan se di tin dɛn we di Baybul tɔk na tru!”

11. Wetin mek i fayn fɔ lɛ wi mek shɔ se di tin dɛn we di Baybul tɔk na tru?

¹¹ We wi si aw sɔm Baybul prɔfɛsi dɛn na Gɔd in Wɔd dɔn ɔlrɛdi kam tru, dat de ɛp wi fɔ biliv Jiova wit ɔl wi at ɛn biliv di we aw i de gayd wi. Dɔn bak, ilɛk wi gɛt prɔblɛm dɛn naw, Baybul prɔfɛsi dɛn go ɛp wi fɔ kɔntinyu fɔ tink di rayt we bɔt tumara bambay. Lɛ wi tɔk smɔl bɔt tu pan Daniɛl in prɔfɛsi dɛn we de kam tru naw. If wi ɔndastand dɛn prɔfɛsi dɛn ya, dat go ɛp wi fɔ disayd fɔ du di rayt tin dɛn.

12. Wetin di fut we dɛn mek wit “ayɛn [we] miks wit sɔft kle” tinap fɔ? (Daniɛl 2:​41-43)

¹² Rid Daniɛl 2:​41-43, NWT. Insay di drim we Daniɛl bin intaprit fɔ Kiŋ  Nɛbyukadnɛza, dɛn bin mek di fut dɛn na di imej we di kiŋ bin si wit “ayɛn [we] miks wit sɔft kle.” We wi kɔmpia dis prɔfɛsi wit ɔda wan dɛn na di Baybul buk dɛn we nem Daniɛl ɛn Rɛvɛleshɔn, wi dɔn kam fɔ ɔndastand se di fut dɛn tinap fɔ Amɛrika ɛn Briten we de wok togɛda,  ɛn dɛn gɛt pawa pas ɛni ɔda gɔvmɛnt insay wi tɛm. We Daniɛl bin de tɔk bɔt dis wɔl pawa, i bin se “sɔm pat dɛn na di kiŋdɔm go strɔng ɛn sɔm pat go wik.” Wetin mek sɔm pat dɛn go wik? Na bikɔs di kɔmɔn pipul dɛn, we tinap fɔ di sɔft kle, de mek dɛn nɔ ebul fɔ du tin dɛn we de sho se dɛn strɔng lɛk ayɛn.  b

13. Us tru tin dɛn we impɔtant we wi lan frɔm dis prɔfɛsi?

¹³ Wi lan sɔm tru tin dɛn we impɔtant frɔm di imej we Daniɛl bin tɔk bɔt. Wi go lan mɔ frɔm di imej in fut dɛn. Fɔs, di Anglo-Amɛrikan Wɔl Pawa dɔn sho se dɛn gɛt trɛnk we i kam to sɔm tin dɛn. Fɔ ɛgzampul, Amɛrika ɛn Briten bin de pan di neshɔn dɛn we bin win Wɔl Wɔ I ɛn Wɔl Wɔ II. Bɔt dis wɔl pawa dɔn wik ɛn dɛn go kɔntinyu fɔ wik bikɔs dɛn sitizin dɛn de fɛt agens dɛnsɛf ɛn di gɔvmɛnt. Sɛkɔn, dis wɔl pawa go bi di las wɔl pawa we go rul bifo Gɔd in Kiŋdɔm dɔnawe wit ɔl mɔtalman kiŋdɔm dɛn. Pan ɔl we ɔda neshɔn dɛn kin fɛt agens di Anglo-Amɛrikan Wɔl Pawa, dɛn nɔ go ebul fɔ tek in ples. Wi no dat bikɔs “di ston” we tinap fɔ Gɔd in Kiŋdɔm go nyamanyama di fut we na di pat pan di imej we tinap fɔ di Anglo-Amɛrikan Wɔl Pawa.—Dan. 2:​34, 35, 44, 45.

14. We wi ɔndastand di prɔfɛsi bɔt di fut we dɛn mek wit ayɛn ɛn kle, aw dat go ɛp wi fɔ disayd fɔ du di rayt tin dɛn?

¹⁴ Yu biliv tranga wan se Daniɛl in prɔfɛsi bɔt di fut we dɛn mek wit ayɛn ɛn kle na tru? If na so i bi, dat go afɛkt di we aw yu de liv yu layf. Yu nɔ go de tray fɔ gɛda bɔku mɔni ɛn prɔpati na dis wɔl we dɛn go dɔnawe wit jisnɔ. (Lyuk 12:​16-21; 1 Jɔn 2:​15-17) We yu ɔndastand dis prɔfɛsi, i go ɛp yu bak fɔ si se i rili impɔtant fɔ du di prichin ɛn tichin wok. (Mat. 6:​33; 28:​18-20) Afta yu dɔn stɔdi dis prɔfɛsi, i go fayn fɔ mek yu aks yusɛf dis kwɛstyɔn, ‘Fɔ se di tin dɛn we a de disayd fɔ du de sho se a biliv tranga wan se Gɔd in Kiŋdɔm go dɔnawe wit ɔl mɔtalman gɔvmɛnt dɛn jisnɔ?’

15. Udat na “di kiŋ na di nɔt” ɛn “di kiŋ na di sawt” insay wi tɛm? (Daniɛl 11:​40)

¹⁵ Rid Daniɛl 11:​40. Daniɛl chapta 11 tɔk bɔt tu kiŋ dɛn ɔ gɔvmɛnt dɛn we de fɛt agens dɛnsɛf. We wi kɔmpia dis prɔfɛsi wit ɔda wan dɛn na di Baybul, wi dɔn kam fɔ ɔndastand se di “kiŋ na di nɔt” na Rɔshia ɛn di wan dɛn we de sɔpɔt am ɛn “di kiŋ na di sawt” na di Anglo-Amɛrikan Wɔl Pawa. c

16. Us prɔblɛm dɛn de mit wi brɔda ɛn sista dɛn we de usay “di kiŋ na di nɔt” de rul?

¹⁶ Gɔd in pipul dɛn we de usay “di kiŋ na di nɔt” de rul, de bia we dis kiŋ de mek dɛn sɔfa. Dɛn dɔn bit sɔm brɔda ɛn sista dɛn ɛn put dɛn na prizin fɔ dɛn fet. Bɔt dis tin we “di kiŋ na di nɔt” de du nɔ de mek wi brɔda ɛn sista dɛn fred. Bifo dat, i de mek dɛn gɛt mɔ fet. Wetin mek? Bikɔs wi brɔda ɛn sista dɛn no se we pipul dɛn de mek Gɔd in pipul dɛn sɔfa, dat de ɛp fɔ mek Daniɛl in prɔfɛsi dɛn kam tru. d (Dan. 11:​41) We wi no dis, i go  ɛp wi fɔ abop pan Jiova mɔ ɛn mɔ ɛn fɔ kɔntinyu fɔ fetful to am.

17. Us prɔblɛm dɛn dɔn mit Gɔd in pipul dɛn we de usay “di kiŋ na di sawt” de rul?

¹⁷ Trade, “di kiŋ na di sawt” insɛf bin dɔn atak Jiova in pipul dɛn. Fɔ ɛgzampul, we dɛn bin de fɛt Wɔl Wɔ I ɛn Wɔl Wɔ II, dɛn bin put bɔku pan wi brɔda dɛn na prizin bikɔs dɛn nɔ gri fɔ sɔpɔt di wɔ ɛn dɛn bin drɛb sɔm Jiova Witnɛs pikin dɛn na skul bikɔs dɛn nɔ gri fɔ salut di flag. Bɔt dis biɛn tɛm, na ɔda kayn tɛst dɛn kin mit Jiova in pipul dɛn we de usay di kiŋ na di sawt de rul, ɛn dis kin mek i nɔ izi fɔ lɛ dɛn kɔntinyu fɔ de biɛn Gɔd in Kiŋdɔm. Fɔ ɛgzampul, we dɛn kin gɛt ilɛkshɔn kampen, pɔsin we na Kristian kin gɛt di tɛmteshɔn fɔ sɔpɔt wan pati ɔ pɔsin we de pan pɔlitiks. Pan ɔl we i nɔ go vot, sɔntɛm i go gɛt wan pati we i de sɔpɔt insay in maynd ɛn in at. Na dat mek i rili impɔtant fɔ lɛ wi nɔ put an pan pɔlitiks atɔl, ɛn wi go du dis bay we wi tek tɛm wit wetin wi de  du, wetin wi de tink, ɛn aw wi de fil!—Jɔn 15:​18, 19; 18:​36.

18. We “di kiŋ na di nɔt” ɛn “di kiŋ na di sawt” de agens dɛnsɛf, aw dat fɔ afɛkt wi? (Luk bak di pikchɔ.)

¹⁸ Sɔntɛm di wan dɛn we nɔ gɛt fet pan Baybul prɔfɛsi go rili wɔri we dɛn de si “di kiŋ na di sawt” ɛn “di kiŋ na di nɔt” de “push dɛnsɛf.” (Dan. 11:​40, NWT) Dɛn tu kiŋ dɛn ya gɛt bɔku wɛpɔn dɛn we dɛn go ebul yuz fɔ dɔnawe wit ɔltin we gɛt layf na di wɔl. Bɔt wi no se Jiova nɔ go alaw dat fɔ apin. (Ayz. 45:​18) So wi nɔ fɔ fred bikɔs “di kiŋ na di nɔt” ɛn “di kiŋ na di sawt” de agens dɛnsɛf, bifo dat, wi fɔ kɔntinyu fɔ gɛt mɔ fet bikɔs dis de sho se di wɔl go dɔn jisnɔ.

19. Wetin wi fɔ no bɔt Baybul prɔfɛsi?

¹⁹ Wi nɔ no aw sɔm Baybul prɔfɛsi dɛn gɛt fɔ kam tru. Ivin prɔfɛt Daniɛl sɛf nɔ bin ɔndastand wetin ɔl di tin dɛn we i rayt min. (Dan. 12:​8, 9) Bɔt jɔs bikɔs wi nɔ rili ɔndastand aw wan patikyula prɔfɛsi go kam tru nɔ min se di tin we di prɔfɛsi tɔk nɔ go apin. Wi nɔ gɛt wan dawt se Jiova go ɛp wi fɔ ɔndastand wetin wi nid fɔ no di rayt tɛm we wi fɔ no am jɔs lɛk aw i bin du trade.—Emɔs 3:​7.

20. Us fayn Baybul prɔfɛsi dɛn go kam tru jisnɔ? Wetin wi fɔ kɔntinyu fɔ du?

²⁰ Di neshɔn dɛn gɛt fɔ anawns se “wi dɔn gɛt pis ɛn natin nɔ de fɔ fred.” (1 Tɛs. 5:​3) Shɔt tɛm afta dat, di gɔvmɛnt dɛn na di wɔl go atak lay lay rilijɔn ɛn dɔnawe wit am. (Rɛv. 17:​16, 17) Dɔn, dɛn go atak Gɔd in pipul dɛn. (Izi. 38:​18, 19) Na dɛn tin dɛn ya we go apin go mek di las wɔ we na Amagɛdɔn bigin. (Rɛv. 16:​14, 16) Wi nɔ gɛt wan dawt se dɛn tin dɛn ya go apin jisnɔ. Bɔt te da tɛm de rich, lɛ wi kɔntinyu fɔ sho se wi gladi fɔ wetin wi Papa we de na ɛvin dɔn du fɔ wi bay we wi de kɔntinyu fɔ pe atɛnshɔn to Baybul prɔfɛsi ɛn ɛp ɔda pipul dɛn fɔ du di sem tin.