1. Wetin mek di Babilonian dɛn bin kɔle prɔfɛt Daniɛl?

 PRƆFƐT Daniɛl bin yɔŋ di tɛm we di Babilonian dɛn bin kɛr am go as prizina na Babilɔn we bin de fa frɔm Jerusɛlɛm. Bɔt pan ɔl we Daniɛl bin yɔŋ, di Babilonian bigman dɛn bin notis am. Dɛn bin si se Daniɛl nɔ gɛt wan bɔt ɛn i kɔmɔt na impɔtant famili. (1 Sam. 16:​7) Na fɔ dɛn rizin dɛn ya mek di Babilonian dɛn bin tren am fɔ mek i go wok na di pales.—Dan. 1:​3, 4, 6.

2. Aw Jiova bin de fil bɔt Daniɛl? (Izikɛl 14:​14)

² Jiova nɔ bin lɛk Daniɛl bikɔs i bin fayn fɔ luk ɔ bikɔs i bin gɛt spɛshal wok fɔ du na di pales, bɔt i bin lɛk am bikɔs ɔf di kayn pɔsin we dis yɔŋman disayd fɔ bi. Infakt, we Jiova se Daniɛl bin tan lɛk Noa ɛn Job, i bin ol lɛk 20 ia. So Jiova bin si yɔŋ Daniɛl as pɔsin we de du wetin rayt lɛk Noa ɛn Job we bin dɔn sav am fetful wan fɔ lɔng tɛm. (Jɛn. 5:​32; 6:​9, 10; Job 42:​16, 17; rid Izikɛl 14:​14.) Ɛn Jiova bin kɔntinyu fɔ lɛk Daniɛl te i day.—Dan. 10:​11, 19.

3. Wetin wi go tɔk bɔt insay dis atikul?

³ Insay dis atikul, wi go tɔk bɔt tu pan Daniɛl in kwaliti dɛn we bin mek i valyu to Jiova. Fɔs, wi go tɔk bɔt dɛn kwaliti dɛn de ɛn di tɛm dɛn we i bin sho dɛn. Dɔn wi go si wetin bin ɛp Daniɛl fɔ gɛt dɛn kwaliti dɛn de. Faynali, wi go tɔk bɔt aw wi go falamakata am. Pan ɔl we na fɔ yɔŋ pipul dɛn dɛn rayt dis atikul, wi ɔl go bɛnifit frɔm Daniɛl in ɛgzampul.

4. Aw Daniɛl bin sho se i gɛt maynd? Gi wan ɛgzampul.

⁴ Tin dɛn kin apin we sɔntɛm kin mek pipul dɛn we gɛt maynd fred, bɔt dɛn nɔ kin alaw dat fɔ stɔp dɛn fɔ mek dɛn nɔ du wetin rayt. Daniɛl na bin yɔŋman we bin rili gɛt maynd. Tink bɔt tu tɛm dɛn we i bin sho se i gɛt maynd. I go bi se di fɔs tɛm we i sho se i gɛt maynd na tu ia afta di Babilonian dɛn bin dɔnawe wit Jerusɛlɛm. Kiŋ Nɛbyukadnɛza na Babilɔn bin gɛt wan bad drim bɔt wan big big imej. I bin trɛtin se i go kil ɔl in sɛnsman dɛn ɛn Daniɛl if dɛn nɔ ebul fɔ tɛl am wetin i dɔn drim ɛn wetin in drim min. (Dan. 2:​3-5) Daniɛl bin nid fɔ du sɔntin kwik kwik wan, bikɔs if i nɔ du sɔntin, bɔku pipul dɛn go day. I “go insay to di kiŋ ɛn beg di kiŋ lɛ i gi am smɔl tɛm, so dat in go ebul fɔ sho di kiŋ wetin in drim min.” (Dan. 2:​16) I bin nid fɔ gɛt maynd ɛn fet fɔ ebul fɔ du dat. Di Baybul nɔ tɔk se Daniɛl bin dɔn intaprit drim dɛn bifo dis tɛm. I bin aks in kɔmpin dɛn we dɛn Babilonian nem dɛn na Shedrak, Mishak, ɛn Abɛdnigo fɔ ‘beg PAPA GƆD na ɛvin lɛ i sɔri fɔ dɛn ɛn tɛl dɛn dis sikrit.’ (Dan. 2:​18) Jiova bin ansa dɛn prea. Gɔd bin ɛp Daniɛl fɔ intaprit Nɛbyukadnɛza in drim. Daniɛl ɛn in padi dɛn nɔ bin day.

5. Us ɔda tɛm Daniɛl bin nid fɔ sho se i gɛt maynd?

⁵ Afta sɔm tɛm we Daniɛl bin intaprit di drim bɔt di big big imej, ɔda tin bak bin apin we i bin nid fɔ sho se i rili gɛt maynd. Nɛbyukadnɛza bin gɛt wan ɔda bad drim. I bin drim wan big big tik. Daniɛl bin gɛt maynd fɔ ɛksplen to di kiŋ wetin di drim min, ɛn i bin ivin tɛl di kiŋ se i go kres ɛn i nɔ go bi kiŋ fɔ sɔm tɛm. (Dan. 4:​25) Di kiŋ fɔ dɔn si Daniɛl as in ɛnimi ɛn mek dɛn kil am. Bɔt Daniɛl bin sho se i gɛt maynd ɛn i bin ɛksplen di drim.

6. Wetin go dɔn ɛp Daniɛl fɔ gɛt maynd?

⁶ Wetin go dɔn ɛp Daniɛl fɔ gɛt maynd te i day? We Daniɛl bin yɔŋ, wan dawt nɔ de se i bin lan frɔm in mama ɛn papa dɛn ɛgzampul. Dɛn bin obe di lɔ dɛn we Jiova bin gi Izrɛlayt mama ɛn papa dɛn, ɛn dɛn bin tich dɛn pikin Gɔd  in lɔ. (Dit. 6:​6-9) Daniɛl bin no di Tɛn Kɔmandmɛnt, ɛn i bin no bak bɔku tin dɛn bɔt di lɔ. Fɔ ɛgzampul, i bin no wetin Izrɛlayt dɛn fɔ it ɛn wetin dɛn nɔ fɔ it. b (Lɛv. 11:​4-8; Dan. 1:​8, 11-13) Daniɛl bin lan bak di istri bɔt Gɔd in pipul dɛn, ɛn i bin no wetin bin apin to dɛn we dɛn nɔ bin obe Jiova in lɔ dɛn. (Dan. 9:​10, 11) Di tin dɛn we bin apin to Daniɛl bin mek i gɛt kɔnfidɛns se ilɛk wetin apin to am, Jiova ɛn In pawaful enjɛl dɛn go ɛp am.—Dan. 2:​19-24; 10:​12, 18, 19.

7. Wetin bak bin ɛp Daniɛl fɔ gɛt maynd? (Luk bak di pikchɔ.)

⁷ Daniɛl bin stɔdi di tin dɛn we Gɔd in prɔfɛt dɛn bin rayt, lɛk di prɔfɛsi dɛn we Jɛrimaya bin rayt. Frɔm da stɔdi de, Daniɛl bin leta ɔndastand se i nɔ go te igen, di Ju dɛn we dɔn de na prizin fɔ lɔng tɛm na Babilɔn go fri. (Dan. 9:​2) Daniɛl bin si se Jiova in wɔd dɛn bin kam tru ɛn dis bin mek i abop pan Jiova mɔ ɛn mɔ, ɛn di wan dɛn we abop pan Gɔd go rili gɛt maynd. (Luk bak Romans 8:​31, 32, 37-39.) Wetin impɔtant pas ɔl na dat Daniɛl bin de pre to in Papa we de na ɛvin ɔltɛm. (Dan. 6:​10) I bin kɔnfɛs in sin dɛn to Jiova ɛn tɛl Am bɔt aw i de fil. Ɛn Daniɛl bin beg am fɔ ɛp. (Dan. 9:​4, 5, 19) Daniɛl na bin mɔtalman lɛk wi, so dɛn nɔ bin bɔn am wit maynd. Bifo dat, i bin tray fɔ gɛt da kwaliti de bay we i bin de stɔdi ɛn pre, ɛn bay we i bin de abop pan Jiova.

8. Aw wi go ebul fɔ gɛt maynd?

⁸ Wetin wi nid fɔ du fɔ gɛt maynd? Sɔntɛm wi mama ɛn papa dɛn go ɛnkɔrej wi fɔ gɛt maynd, bɔt dɛn nɔ go ebul mek wi gɛt maynd ivin if dɛn gɛt maynd. Fɔ gɛt maynd tan lɛk we yu de lan fɔ du nyu tin. Wan we aw yu go sabi fɔ du da tin de gud gud wan na we yu tek tɛm wach di tin dɛn we di pɔsin we de tich yu de du ɛn fala in ɛgzampul. Semweso, wi go ebul fɔ gɛt maynd bay we wi tek tɛm wach aw ɔda pipul dɛn de sho dis kwaliti ɛn fala dɛn ɛgzampul. So wetin wi dɔn lan frɔm Daniɛl? Lɛk Daniɛl, wi nid fɔ no Gɔd in Wɔd gud gud wan. Wi nid fɔ gɛt tayt padi biznɛs wit Jiova bay we wi de tɔk to am ɔltɛm ɛn tɛl am aw wi rili de fil. Ɛn wi nid fɔ rili abop pan Jiova ɛn biliv tranga wan se i go ɛp wi ɔltɛm. Dɔn we sɔntin tɛst wi fet, wi go sho se wi gɛt maynd.

9. Aw wi de bɛnifit we wi gɛt maynd?

⁹ We wi gɛt maynd, wi go bɛnifit bɔku we dɛn. Tink bɔt Bɛn in ɛkspiriɛns. I bin go na wan skul na Jamani usay ɔlman bin biliv se layf kam bay chans ɛn fil se di akawnt na di Baybul fɔ se Pɔsin de we mek ɔltin nɔto tru. Wan de, Bɛn bin gɛt di chans fɔ tinap bifo in klas ɛn ɛksplen wetin mek i biliv se na mek dɛn mek layf. I bin gɛt maynd fɔ tɔk bɔt wetin i biliv. Wetin bin apin? Bɛn tɔk se, “Mi ticha bin tek tɛm lisin, ɛn i bin kɔpi di infɔmeshɔn we a bin yuz fɔ sɔpɔt di tin dɛn we a tɔk, ɛn i bin gi ɔl di studɛnt dɛn na di klas.” Wetin Bɛn in klasmet dɛn bin du? Bɛn tɔk se, “Bɔku pan dɛn bin lisin to wetin a bin tɔk ɛn dɛn tɔk se dɛn bin rili kɔle mi.” Bɛn in ɛkspiriɛns sho se bɔku tɛm, ɔda pipul dɛn kin rɛspɛkt pipul dɛn we gɛt maynd. Dɛn kin ɛp bak sɔm pipul dɛn fɔ no Jiova. Fɔ tru, wi gɛt gud rizin dɛn fɔ gɛt maynd.

10. Wetin i min fɔ bi pɔsin we nɔ de kɔmɔt biɛn in kɔmpin?

¹⁰ Bɔku tɛm, di Baybul tɔk bɔt “we pɔsin nɔ de kɔmɔt biɛn in kɔmpin,” ɔ “lɔv we nɔ de ɛva chenj,” we Gɔd de sho in padi dɛn. Di Baybul tɔk bak bɔt di kɔmɔt we Gɔd in savant dɛn nɔ de kɔmɔt biɛn dɛnsɛf. (2 Sam. 9:​6, 7) Wi go kɔntinyu fɔ bi pɔsin we nɔ de kɔmɔt biɛn in kɔmpin as tɛm de go. Lɛ wi si aw Daniɛl bin sho se in na pɔsin we nɔ de kɔmɔt biɛn in kɔmpin.

11. We Daniɛl bin ol, aw i bin sho se i nɔ de kɔmɔt biɛn Jiova? (Luk di pikchɔ na di frɔnt pej.)

¹¹ Bɔku tin dɛn bin apin na Daniɛl in layf we bin mek i nid fɔ sho se i go kɔntinyu fɔ de biɛn Jiova ɔ i nɔ go kɔntinyu fɔ de biɛn am. Bɔt na we i bin ol 90 ia, nain di tɛst we pas ɔl ɔda tɛst dɛn bin mit am. Da tɛm de, di Mids ɛn Pashian dɛn bin dɔn kapchɔ Babilɔn, ɛn na Kiŋ Darayɔs bin de rul. Di bigman dɛn we bin de wok fɔ Kiŋ Darayɔs bin et Daniɛl ɛn dɛn nɔ bin rɛspɛkt in Gɔd. So dɛn bin plan fɔ mek dɛn kil Daniɛl. Dɛn bin mek di kiŋ sayn wan lɔ we go sho if Daniɛl go de biɛn in Gɔd ɔ di kiŋ. Ɔl wetin Daniɛl bin nid fɔ du na fɔ sho se i nɔ go kɔmɔt biɛn di kiŋ, ɛn fɔ avɔyd fɔ mek dɛn nɔ pɔnish am, i fɔ stɔp fɔ pre to Jiova fɔ 30 dez. Daniɛl nɔ bin gri fɔ kɔmɔt biɛn Jiova. So dat bin mek dɛn trowe am na di ol usay layɔn dɛn de. Bɔt Jiova bin blɛs am bay we i bin lɔk di layɔn dɛn mɔt ɛn sev am bikɔs Daniɛl nɔ bin kɔmɔt biɛn am. (Dan. 6:​12-15, 20-22) Aw wi go kɔntinyu fɔ de biɛn Jiova lɛk Daniɛl?

12. Wetin bin ɛp Daniɛl fɔ mek i nɔ alaw ɛnitin fɔ stɔp am fɔ kɔntinyu fɔ de biɛn Jiova?

¹² Fɔ mek wi kɔntinyu fɔ de biɛn Jiova, wi fɔ rili lɛk am. Daniɛl bin kɔntinyu fɔ de biɛn Jiova bikɔs i bin rili lɛk in Papa we de na ɛvin. Wan dawt nɔ de se Daniɛl bin rili lɛk Jiova bikɔs i bin de spɛn bɔku tɛm fɔ tink bɔt Jiova in kwaliti dɛn ɛn aw I de sho dɛn. (Dan. 9:​4) Daniɛl bin de tink gud wan bak bɔt ɔl di gud tin dɛn we Jiova dɔn du fɔ am ɛn In pipul dɛn, ɛn i bin gladi fɔ dat.—Dan. 2:​20-23; 9:​15, 16.

13. (a) Us tin dɛn kin apin we kin tɛst di de we wi yɔŋ wan dɛn de biɛn Jiova? Gi wan ɛgzampul. (Luk bak di pikchɔ.) (b) Akɔdin to di vidio, wetin yu go du we ɔda pipul dɛn aks if Jiova Witnɛs dɛn de sɔpɔt di wan dɛn we disayd fɔ liv omo layf?

 ¹³ Jɔs lɛk Daniɛl, wi yɔŋ wan dɛn de wit pipul dɛn we nɔ gɛt rɛspɛkt fɔ Jiova ɛn in lɔ dɛn. Sɔntɛm dɛn kayn pipul dɛn de nɔ kin lɛk ɛnibɔdi we lɛk Gɔd. Sɔm kin ivin tray fɔ du bad tin dɛn to wi yɔŋ wan dɛn fɔ mek dɛn nɔ go kɔntinyu fɔ de biɛn Jiova. Fɔ ɛgzampul, notis wetin bin apin to wan yɔŋman we nem Gream we de na Ɔstrelia. Sɔntin bin apin na in skul we nɔ bin rili izi fɔ am. Di ticha bin aks di klas bɔt wetin dɛn go du if wan pan dɛn kɔmpin tɛl dɛn se in na omo. Di ticha bin se ɔl di wan dɛn we go sɔpɔt da pɔsin de we de liv da kayn layf de fɔ tinap na wan say na di klasrum, ɛn di wan dɛn we nɔ go sɔpɔt am fɔ de na di ɔdasay. Gream tɔk se: “Ɔlman na di klas bin tinap na di say fɔ di wan dɛn we de sɔpɔt da kayn layf de, na wi tu nɔmɔ we na Jiova Witnɛs bin tinap na di ɔdasay.” Di tin we bin apin afta dat bin rili tɛst di de we Gream de biɛn Jiova. I tɔk se: “Te di klas dɔn, di ɔda studɛnt dɛn ɛn ivin di ticha bin de provok wi. A bin du mi bɛst fɔ tek tɛm tɔk bɔt wetin a biliv, bɔt dɛn nɔ bin lisin to wetin a bin de se.” Aw Gream bin fil? I tɔk se: “A nɔ bin lɛk we mi klasmet dɛn bin de tɛl mi bad wɔd dɛn, bɔt a bin rili gladi bikɔs a bin kɔntinyu fɔ de biɛn Jiova ɛn tinap tranga wan fɔ wetin a biliv.” c

14. Wetin na wan tin we wi go du we go ɛp wi fɔ kɔntinyu fɔ de biɛn Jiova?

¹⁴ Jɔs lɛk Daniɛl, di mɔ we wi lɛk Jiova na di mɔ wi go mekɔp wi maynd fɔ kɔntinyu fɔ de biɛn Am. Wi go ebul fɔ lɛk Jiova mɔ ɛn mɔ we wi lan bɔt in kwaliti dɛn. Fɔ ɛgzampul, wi kin stɔdi di tin dɛn we i mek. (Rom. 1:​20) If yu want fɔ lɛk ɛn rɛspɛkt Jiova mɔ ɛn mɔ, yu kin rid di shɔt atikul dɛn we de na di siriz we gɛt di taytul “Was It Designed?” ɔ wach di vidio dɛn. Yu kin rid bak di brosho dɛn we gɛt di taytul Was Life Created? ɛn The Origin of Life​—Five Questions Worth Asking. Notis wetin wan yɔŋ sista we nem Ɛsta we de na Dɛnmak bin se bɔt dɛn pɔblikeshɔn dɛn ya. I tɔk se: “Di tin dɛn we rayt de rili fayn. Di brosho dɛn nɔ de tɛl yu wetin fɔ biliv; dɛn jɔs de sho yu di tru tin dɛn ɛn alaw yu fɔ disayd wetin fɔ du.” Bɛn we wi bin dɔn tɔk bɔt tɔk se: “Di tin dɛn we rayt de bin ɛp mi fɔ gɛt fet mɔ ɛn mɔ. I bin pruv to mi se na Gɔd mek layf.” Afta yu stɔdi dis pɔblikeshɔn, sɔntɛm yu go gri wit wetin di Baybul tɔk we i se: “Jiova wi Gɔd, yu fit fɔ gɛt di glori, di ɔnɔ, ɛn di pawa, bikɔs na yu mek ɔltin.”—Rɛv. 4:​11. d

15. Us ɔda tin wi go du we go mek wi gɛt tayt padi biznɛs wit Jiova?

¹⁵ Wan ɔda tin we wi go du we go ɛp wi fɔ lɛk Jiova mɔ ɛn mɔ na we wi tek tɛm stɔdi bɔt in Pikin Jizɔs in layf. Wan yɔŋ sista we nem Samira we de na Jamani bin du dat. I tɔk se: “A bin kam fɔ no Jiova mɔ ɛn mɔ we a stɔdi bɔt Jizɔs in layf.” We Samira na bin pikin, i nɔ bin izi fɔ am fɔ ɔndastand aw Jiova de fil. Bɔt i bin ebul fɔ ɔndastand aw Jizɔs de fil. I bin tɔk bak se: “A lɛk Jizɔs bikɔs i bin de trit pipul dɛn fayn ɛn i bin lɛk pikin dɛn.” Di  mɔ we i bin de lan bɔt Jizɔs, na di mɔ i bin kam fɔ gɛt tayt padi biznɛs wit Jiova. Wetin mek? I tɔk se: “Smɔl smɔl, a kam fɔ ɔndastand se Jizɔs bin de falamakata in Papa pafɛkt wan. Dɛn fiba pan bɔku tin. A bin kam fɔ si se dis na wan pan di rizin dɛn we bin mek Jiova sɛn Jizɔs na di wɔl fɔ mek i pɔsibul fɔ lɛ mɔtalman dɛn no Jiova gud gud wan.” (Jɔn 14:​9) If yu want fɔ gɛt tayt padi biznɛs wit Jiova, yu nɔ tink se i go fayn fɔ mek yu spɛn tɛm fɔ lan ɔl wetin yu ebul fɔ lan bɔt Jizɔs? If yu du dat, yu go lɛk Jiova ɛn want fɔ de biɛn am mɔ ɛn mɔ.

16. Aw wi go bɛnifit we wi bi pɔsin we nɔ de kɔmɔt biɛn in kɔmpin? (Sam 18:​25; Mayka 6:​8)

¹⁶ If wi na pɔsin we nɔ de kɔmɔt biɛn ɔda pipul dɛn, bɔku tɛm wi kin gɛt tayt padi dɛn we nɔ de kɔmɔt biɛn wi. (Rut 1:​14-17) Ɛn if wi na pɔsin we nɔ de kɔmɔt biɛn Jiova, wi go gɛt pis ɛn satisfay maynd. Wetin mek? Na bikɔs Jiova prɔmis fɔ de biɛn di wan dɛn we nɔ de kɔmɔt biɛn am. (Rid Sam 18:​25; Mayka 6:​8.) Tink bɔt dis, pan ɔl we wi rili smɔl we wi kɔmpia wisɛf to di ɔlmayti we mek ɔltin, i prɔmis fɔ lɛk wi ɔltɛm. Ɛn we wi gɛt dis kayn padi biznɛs wit Jiova, natin nɔ go ebul pwɛl am, ilɛk na prɔblɛm, pɔsin de agens wi, ɔ ivin day. (Dan. 12:​13; Lyuk 20:​37, 38; Rom. 8:​38, 39) So i rili impɔtant fɔ lɛ wi falamakata Daniɛl ɛn kɔntinyu fɔ de biɛn Jiova!

17-18. Wetin bak wi kin lan frɔm Daniɛl?

¹⁷ Insay dis atikul, wi dɔn tɔk bɔt tu pan Daniɛl in kwaliti dɛn. Bɔt mɔ tin dɛn de we wi kin lan frɔm am. Fɔ ɛgzampul, Jiova bin sho Daniɛl vishɔn ɛn drim dɛn, ɛn I bin mek Daniɛl ebul fɔ intaprit dɛn mɛsej dɛn de we na prɔfɛsi. Bɔku pan dɛn prɔfɛsi dɛn de dɔn ɔlrɛdi kam tru. Ɔda wan dɛn tɔk bɔt tin dɛn we gɛt fɔ apin tumara bambay we go afɛkt ɔlman na di wɔl.

¹⁸ Insay di nɛks atikul, wi go tɔk bɔt tu prɔfɛsi dɛn we Daniɛl bin rayt bɔt. We wi ɔndastand dɛn prɔfɛsi dɛn de, i go ɛp wi ɔl fɔ disayd fɔ du di rayt tin naw, ilɛk wi yɔŋ ɔ ol. Dɛn prɔfɛsi dɛn de go ɛp wi bak fɔ gɛt maynd ɛn kɔntinyu fɔ de biɛn Jiova so dat wi go rɛdi fɔ di tɛst dɛn we go mit wi tumara bambay.