1. Akɔdin to Ibruz 12:​1, wetin wi nid fɔ du fɔ mek wi go ebul dɔn di res fɔ layf?

 DI Baybul kɔmpia di layf we wi de liv as Kristian dɛn to res. Di wan dɛn we rɔn dis res ɛn dɔn am go gɛt layf we go de sote go. (2 Tim. 4:​7, 8) Wi nid fɔ du ɔl wetin wi ebul fɔ kɔntinyu fɔ rɔn, bikɔs wi de nia fɔ dɔn di res. Apɔsul Pɔl we bin dɔn in res fɔ layf bin tɔk bɔt wetin go ɛp wi fɔ dɔn dis res. I tɛl wi fɔ “trowe ɛnitin we gɛt wet ɛn . . . bia we wi de rɔn di res we de bifo wi.”—Rid Ibruz 12:​1.

2. Wetin i min fɔ “trowe ɛnitin we gɛt wet?”

² We Pɔl bin rayt se wi fɔ “trowe ɛnitin we gɛt wet,” fɔ se i min se pɔsin we na Kristian nɔ fɔ tot ɛni lod? Nɔ, nɔto dat i min. Bɔt, i min se wi fɔ trowe ɛni lod we wi nɔ nid fɔ tot. Dis kayn lod go mek wi slo ɛn taya. Fɔ mek wi ebul fɔ bia, wi nɔ fɔ westɛm fɔ notis ɛn trowe ɛni lod we go mek wi slo we wi de rɔn. Bɔt stil, wi nɔ fɔ trowe ɛni lod we wi nid fɔ tot. Bikɔs if wi stɔp fɔ tot dɛn lod dɛn de, wi go kɔmɔt na di res. (2 Tim. 2:​5) Us lod dɛn wi nid fɔ tot?

3. (a) Akɔdin to Galeshians 6:​5, wetin wi fɔ tot? (b)  Wetin wi go tɔk bɔt insay dis atikul? Wetin mek?

³ Rid Galeshians 6:​5. Pɔl bin sho wi sɔntin we wi ɔl nid fɔ tot. I bin rayt se “ɔlman go tot in yon lod.” Na dis vas, Pɔl bin de tɔk bɔt wetin Gɔd want wi fɔ du as in savant dɛn, ɛn na sɔntin we nɔbɔdi nɔ go ebul du fɔ wi. Insay  dis atikul, wi go tɔk bɔt wetin-ɛn-wetin na wi “yon lod” ɛn aw wi go tot am. Dɔn bak, wi go tɔk bɔt lod dɛn we wi tot we sɔntɛm wi nɔ nid fɔ tot ɛn lan bɔt aw wi go trowe dɛn. We wi tot wi yon lod ɛn trowe lod dɛn we wi nɔ nid fɔ tot, dat go ɛp wi fɔ rɔn di res fɔ layf ɛn dɔn am.

4. Wetin mek di prɔmis we wi mek fɔ se wi go sav Jiova sote go nɔto tin we at fɔ du? (Luk bak di pikchɔ.)

⁴ Di prɔmis we wi mek fɔ sav Jiova sote go. We wi gi wi layf to Jiova, wi bin prɔmis fɔ wɔship am ɛn du wetin i want. Wi nid fɔ kip da prɔmis de. Fɔ du ɔl wetin wi dɔn prɔmis Jiova na tin we rili siriɔs, bɔt nɔto tin we at fɔ du. Afta ɔl, Jiova mek wi fɔ du wetin i want. (Rɛv. 4:​11) I mek wi fɔ want fɔ no am ɛn wɔship am, ɛn i mek wi lɛk aw insɛf tan. Dis dɔn mek wi ebul fɔ kam nia am ɛn fɔ gladi fɔ du wetin i want. (Sam 40:​8) Dɔn bak, we wi de du wetin Gɔd want ɛn de fala in Bɔypikin, wi “go fil fayn.”—Mat. 11:​28-30.

5. Wetin go ɛp yu fɔ ebul du ɔl wetin yu bin dɔn prɔmis Jiova? (1 Jɔn 5:​3)

 ⁵ Aw yu go ebul tot di lod? Tu tin dɛn de we go ɛp yu. Fɔs, na fɔ kɔntinyu fɔ du tin dɛn we go mek yu lɛk Jiova mɔ ɛn mɔ. Yu kin du dat bay we yu de tink gud gud wan bɔt ɔl di gud tin dɛn we i dɔn du fɔ yu ɛn aw i go blɛs yu tumara bambay. Di mɔ we wi lɛk Gɔd, na di mɔ i go izi fɔ obe am. (Rid 1 Jɔn 5:​3.) Sɛkɔn, falamakata Jizɔs. I bin ebul du wetin Gɔd want bikɔs i bin pre to Jiova fɔ ɛp am ɛn i kɔntinyu fɔ pe atɛnshɔn pan di blɛsin we i go gɛt. (Ibru. 5:​7; 12:​2) Jɔs lɛk Jizɔs, pre to Jiova fɔ mek i gi yu trɛnk ɛn kɔntinyu fɔ de tink bɔt di op fɔ gɛt layf we go de sote go. As yu de lɛk Gɔd mɔ ɛn mɔ ɛn falamakata in Bɔypikin, yu go ebul fɔ du ɔl wetin yu bin dɔn prɔmis Jiova.

6. Wetin mek wi nid fɔ du di tin dɛn we wi fɔ du insay di famili? (Luk bak di pikchɔ.)

⁶ Di wok dɛn we wi gɛt insay di famili. Insay wi res fɔ layf, wi nid fɔ lɛk Jiova ɛn Jizɔs pas wi fambul dɛn. (Mat. 10:​37) Bɔt, dis nɔ min se wi fɔ stɔp fɔ du di tin dɛn we wi fɔ du insay di famili. Bifo dat, fɔ lɛ wi mek Gɔd ɛn Krays gladi fɔ wi, wi nid fɔ du di tin dɛn we wi fɔ du insay di famili. (1 Tim. 5:​4, 8) We wi du dat, wi go gladi mɔ ɛn mɔ. Afta ɔl, Jiova no se famili dɛn go gladi we maredman ɛn in wɛf lɛk ɛn rɛspɛkt dɛnsɛf, ɛn we mama ɛn papa dɛn lɛk ɛn tren dɛn pikin dɛn, ɛn we pikin dɛn de obe dɛn mama ɛn papa dɛn.—Ɛfi. 5:​33; 6:​1, 4.

7. Aw yu go ebul fɔ du wetin Jiova ɛkspɛkt yu fɔ du insay yu famili?

⁷ Aw yu go ebul tot di lod? Ilɛk yu na maredman, wɛf, ɔ pikin, na fɔ aplay di fayn advays we de insay di Baybul ɛn nɔ jɔs du wetin yu fil se rayt, ɔ wetin kɔmɔn usay yu de, ɔ wetin masta sabi bukman dɛn se yu fɔ du.(Prɔv. 24:​3, 4) Na fɔ de rid di pɔblikeshɔn dɛn ɔltɛm. Dɛn pɔblikeshɔn dɛn ya gɛt fayn advays dɛn bɔt aw fɔ aplay Baybul prinsipul dɛn. Fɔ ɛgzampul, di atikul siriz we gɛt di taytul “Help for the Family” gɛt infɔmeshɔn dɛn we de tɔk bɔt patikyula prɔblɛm dɛn we maredman ɛn mareduman dɛn, mama ɛn papa dɛn, ɛn tineja dɛn kin gɛt tide. b Mekɔp yu maynd fɔ du di tin dɛn we de insay di Baybul, ivin if ɔda wan dɛn na di famili nɔ de du am. We yu du dat, yu famili go bɛnifit, ɛn yu go ɛnjɔy Jiova in blɛsin.—1 Pit. 3:​1, 2.

8. Aw di tin dɛn we wi kin disayd fɔ du de afɛkt wi?

⁸ Wi fɔ gri wit di tin dɛn we go apin bikɔs ɔf wetin wi disayd fɔ du. Jiova dɔn gi wi di fridɔm fɔ disayd fɔ wisɛf wetin wi want fɔ du, ɛn i want wi fɔ gladi we wi disayd fɔ du di rayt tin dɛn. Bɔt i nɔ de protɛkt wi frɔm di bad tin dɛn we go apin to wi we wi disayd fɔ du tin dɛn we nɔ rayt. (Gal. 6:​7, 8) So wi fɔ gri wit di bad tin dɛn we go apin to wi we wi disayd fɔ du tin dɛn we nɔ rayt, we wi nɔ tink bifo wi tɔk, ɛn we wi rɔsh fɔ du tin dɛn. Di tin dɛn we wi kin disayd fɔ du sɔntɛnde kin mek wi gɛt gilti kɔnshɛns. Bɔt, we wi no se wi gɛt fɔ ansa fɔ di tin dɛn we wi de disayd fɔ du, dat go mek wi kɔnfɛs wi sin dɛn, kɔrɛkt wi mistek dɛn, ɛn avɔyd fɔ ripit di sem mistek dɛn. We wi du dɛn  tin dɛn ya, dat go ɛp wi fɔ kɔntinyu fɔ rɔn di res fɔ layf.

9. Wetin yu go du if yu bin dɔn disayd fɔ du di rɔng tin? (Luk bak di pikchɔ.)

⁹ Aw yu go ebul tot di lod? If yu bin dɔn disayd fɔ du sɔntin we nɔ rayt, wetin yu go du? No se yu nɔ go ebul fɔ chenj di tin dɛn we bin dɔn apin. Nɔ yuz yu tɛm ɛn trɛnk fɔ tray fɔ pruv se yu bin rayt ɔ bigin fɔ blem ɔda pipul dɛn fɔ yu mistek dɛn. Bifo dat, na fɔ gri se yu dɔn mek mistek ɛn du di bɛst tin we yu ebul fɔ du naw. If yu de fil gilti bɔt sɔntin we yu dɔn du we rɔng, na fɔ put yusɛf dɔŋ ɛn pre to Jiova, gri se yu dɔn mek mistek, ɛn aks am fɔ fɔgiv yu. (Sam 25:​11; 51:​3, 4) Beg di wan dɛn we yu dɔn du bad, ɛn if nid de, na fɔ aks di ɛlda dɛn fɔ ɛp. (Jems 5:​14, 15) Lan frɔm yu mistek dɛn, ɛn tray nɔ fɔ ripit dɛn. As yu de du dat, wan dawt nɔ de se Jiova go fɔgiv yu ɛn gi yu di sɔpɔt we yu nid.—Sam 103:​8-13.

10. Wetin mek pɔsin in at go pwɛl if i de fil ɔltɛm se i nid fɔ du mɔ? (Galeshians 6:​4)

¹⁰ We wi de fil ɔltɛm se wi nid fɔ du mɔ. Wi at kin pwɛl we wi de kɔmpia wisɛf wit ɔda pipul dɛn. (Rid Galeshians 6:​4.) If ɔltɛm wi de kɔmpia wisɛf wit ɔda pipul dɛn, dat go mek wi bigin jɛlɔs dɛn ɛn mek kɔmpitishɔn wit dɛn. (Gal. 5:​26) If wi de tray fɔ du tin dɛn we ɔda pipul dɛn de du pan ɔl we wi no se wi nɔ go ebul fɔ du dɛn, dat go mek wi ambɔg wisɛf. Dɔn bak, tink bɔt dis: Di Baybul tɛl wi se wi at kin pwɛl we wi de wet fɔ sɔntin. (Prɔv. 13:​12) So wi at go rili pwɛl if wi de wet fɔ sɔntin we wi nɔ go ɛva gɛt. Dat go mek wi rili slo ɛn taya we wi de rɔn di res fɔ layf.—Prɔv. 24:​10.

11. Wetin go ɛp yu fɔ avɔyd fɔ de fil se yu nid fɔ du mɔ?

¹¹ Aw yu go ebul trowe da lod de? Nɔ ɛkspɛkt fɔ du pas wetin Jiova de ɛkspɛkt yu fɔ du. I nɔ de ɛva ɛkspɛkt yu fɔ gi wetin yu nɔ gɛt. (2 Kɔr. 8:​12) Biliv se Jiova nɔ de kɔmpia wetin yu de du to wetin ɔda pipul dɛn de du. (Mat. 25:​20-23) I valyu di wok we yu ebul fɔ du wit ɔl yu at, di fet we yu gɛt, ɛn we yu de bia. Put yusɛf dɔŋ ɛn gri se yu ej, yu wɛlbɔdi, ɛn di tin dɛn we de apin to yu nɔ go alaw yu fɔ du di tin dɛn we yu want fɔ du naw. Lɛk Bazilay, we yu gɛt wɛlbɔdi prɔblɛm, nɔ gri fɔ tek ɛni wok we yu no se yu nɔ ebul fɔ du. (2 Sam. 19:​35, 36) Ɛn lɛk Mozis, gri fɔ lɛ dɛn ɛp yu ɛn gi ɔda pipul dɛn wok we nid de fɔ du dat. (Ɛks. 18:​21, 22) We yu put yusɛf dɔŋ, dat go mek yu nɔ tink se yu go ebul fɔ du tin dɛn we go mek yu taya bad bad wan we yu de rɔn di res fɔ layf.

12. Na wi gɛt di blem if pɔsin disayd fɔ du bad tin? Ɛksplen.

¹² Fɔ blem yusɛf bikɔs ɔf di bad tin dɛn we ɔda pipul dɛn kin disayd fɔ du. Wi nɔ ebul fɔ disayd fɔ ɔda pipul dɛn ɔ fɔ protɛkt dɛn ɔltɛm frɔm di tin dɛn we go apin to dɛn bikɔs ɔf di bad tin dɛn we dɛn kin disayd fɔ du. Fɔ ɛgzampul, wan bɔypikin ɔ galpikin kin disayd fɔ lɛf fɔ sav Jiova. Dis tin we dɛn disayd fɔ du go mek dɛn mama ɛn papa dɛn at rili pwɛl. Bɔt mama ɛn papa dɛn kin tot ebi lod bay we dɛn kin blem dɛnsɛf fɔ di bad tin we dɛn pikin disayd fɔ du. Jiova nɔ want dɛn fɔ tot da kayn lod de.—Rom. 14:​12.

13. Wetin mama ɔ papa go du we in pikin disayd fɔ du di rɔng tin?

¹³ Aw yu go trowe da lod de? No se  Jiova dɔn gi wi ɔl di fridɔm fɔ disayd fɔ du wetin wi want. I dɔn alaw ɔlman fɔ disayd fɔ insɛf wetin i want fɔ du, ɛn if dɛn go sav am ɔ dɛn nɔ go sav am. Jiova no se yu na mama ɔ papa we nɔ pafɛkt, so i jɔs want mek yu du yu bɛst. Di tin we yu pikin disayd fɔ du na in wok, nɔto yu wok. (Prɔv. 20:​11) Bɔt stil, sɔntɛm yu go de wɔri bɔt di mistek dɛn we yu bin dɔn mek as mama ɔ papa. If na so i bi, tɛl Jiova aw yu de fil ɛn beg am fɔ fɔgiv yu. I no se yu nɔ go ebul fɔ stɔp fɔ tink bɔt di tin dɛn we bin dɔn apin ɛn chenj dɛn. Ɛn i nɔ de tink se yu go ebul mek yu pikin nɔ avɛst wetin i dɔn plant. Yu fɔ mɛmba se if yu pikin want fɔ kam bak to Jiova, I go gladi fɔ am wit ɔl in at.—Lyuk 15:​18-20.

14. Wetin mek fɔ fil gilti ɔltɛm na lod we wi fɔ trowe?

¹⁴ Fɔ fil gilti ɔltɛm. We wi sin, i nɔ bad fɔ fil gilti. Bɔt, Jiova nɔ want mek wi kɔntinyu fɔ de fil gilti ɔltɛm. Na lod we wi nid fɔ trowe. Aw wi go no if wi de fil gilti pasmak? If wi kɔnfɛs wi sin, ripɛnt, ɛn du tin dɛn we go mek wi nɔ ripit wi sin, wan dawt nɔ de se Jiova dɔn fɔgiv wi. (Akt 3:​19) Afta wi dɔn du dɛn tin dɛn ya, Jiova nɔ want mek wi kɔntinyu fɔ de fil gilti. I no se if wi kɔntinyu fɔ de fil gilti, dat go ambɔg wi. (Sam 31:​10) If wi alaw wi at fɔ pwɛl pasmak, sɔntɛm wi go giv-ɔp fɔ rɔn di res fɔ layf.—2 Kɔr. 2:​7.

15. Wetin go ɛp yu we yu de fil gilti ɔltɛm? (1 Jɔn 3:​19, 20) (Luk bak di pikchɔ.)

¹⁵ Aw yu go ebul trowe da lod de? If yu de kɔntinyu fɔ fil gilti ɔltɛm, na fɔ pe atɛnshɔn pan di fɔgiv we Gɔd “rɛdi fɔ fɔgiv wi ɔltɛm.” (Sam 130:​4) We Jiova de fɔgiv di wan dɛn we dɔn ripɛnt wit ɔl dɛn at, i prɔmis dɛn se: “[I] nɔ go mɛmba dɛn sin igen.” (Jɛr. 31:​34) Dis min se Jiova nɔ go ɛva tink bɔt di sin dɛn we i  dɔn fɔgiv yu fɔ. So, nɔ tink se di bad tin dɛn we de apin to yu naw bikɔs ɔf yu sin dɛn min se Jiova nɔ fɔgiv yu yet. Ɛn nɔ vɛks pan yusɛf bikɔs sɔntɛm yu dɔn lɔs sɔm pan di wok dɛn we yu bin de du na di kɔngrigeshɔn. Jiova nɔ de kɔntinyu fɔ tink bɔt yu sin dɛn ɛn yusɛf nɔ fɔ de tink bɔt dɛn.—Rid 1 Jɔn 3:​19, 20.

16. As pipul dɛn we de rɔn res, wetin wi fɔ no?

¹⁶ As wi de rɔn di res fɔ layf, wi fɔ “rɔn di we we go mek [wi] win am.” (1 Kɔr. 9:​24) Wi go ebul du dat if wi no di difrɛns bitwin di lod dɛn we wi nid fɔ tot ɛn lod dɛn we wi nid fɔ trowe. Insay dis atikul, wi dɔn tɔk bɔt ɛgzampul dɛn bɔt lod dɛn we wi fɔ tot ɛn di wan dɛn we wi fɔ trowe. Bɔt wi kin tɔk bɔt ɔda wan dɛn. Jizɔs bin tɔk se wi kin put wi at “pan tumɔs it ɛn tumɔs drink ɛn fɔ de wɔri wɔri.” (Lyuk 21:​34) Dɛn skripchɔ dɛn ya ɛn ɔda wan dɛn go ɛp yu fɔ no eria dɛn we sɔntɛm yu go nid fɔ ajɔst as yu de rɔn yu res fɔ layf.

17. Wetin mek wi shɔ se wi go ebul fɔ win di res fɔ layf?

¹⁷ Wi shɔ se wi go ebul fɔ win di res fɔ layf bikɔs Jiova go gi wi di trɛnk we wi nid. (Ayz. 40:​29-31) So, nɔ taya! Falamakata apɔsul Pɔl we bin du ɔl wetin i ebul fɔ win di prayz we de bifo am. (Fil. 3:​13, 14) Nɔbɔdi nɔ go ebul fɔ rɔn dis res fɔ yu, bɔt wit Jiova in ɛp, yu go ebul fɔ dɔn am. Jiova go ɛp yu fɔ tot yu lod dɛn ɛn trowe di wan dɛn we yu nɔ nid. (Sam 68:​19) Wit Jiova in ɛp, yu go ebul fɔ bia as yu de rɔn di res ɛn win!