STƆDI ATIKUL 35
SIŊ 123 Lɛ Wi Nɔ Ɛva Kɔmɔt Ɔnda Gɔd
Aw Ɛlda dɛn Go Ɛp di Wan dɛn we Dɛn Dɔn Pul Kɔmɔt na di Kɔngrigeshɔn?
“Di gladi-at we go de na ɛvin we wan sina ripɛnt, go pas di we aw dɛn kin gladi fɔ 99 pipul dɛn we de du wetin rayt ɛn we nɔ nid fɔ ripɛnt.”—LYUK 15:7.
MEN PƆYNT
Wetin mek ɛlda dɛn kin nid fɔ pul sɔm pipul dɛn kɔmɔt na di kɔngrigeshɔn ɛn aw dɛn go ɛp dɛn wan dɛn de fɔ ripɛnt ɛn gɛt tayt padi biznɛs wit Jiova bak?
1-2. (a) Aw Jiova de si di wan dɛn we de sin bay wilful? (b) Wetin Jiova de op se di wan dɛn we dɔn sin go du?
JIOVA nɔto Gɔd we de alaw pipul dɛn fɔ biev ɛni aw dɛn want; i et sin. (Sam 5:4-6) I de ɛkspɛkt wi fɔ obe in lɔ dɛn we de na in Wɔd di Baybul. As wi ɔl no, Jiova nɔ de ɛkspɛkt wi fɔ obe in lɔ dɛn pafɛkt wan bikɔs i no se wi nɔ pafɛkt. (Sam 130:3, 4) Bɔt i nɔ de gladi fɔ ‘pipul dɛn we nɔ lɛk am, ɛn we de yuz in spɛshal gudnɛs as ɛkskyuz fɔ du tin dɛn we de sho se dɛn nɔ gɛt wan shem ɛn rɛspɛkt.’ (Jud 4) Di Baybul tɔk bɔt di tɛm we “Gɔd [go] dɔnawe wit di pipul dɛn we nɔ lɛk am” insay in wɔ we na Amagɛdɔn.—2 Pit. 3:7; Rɛv. 16:16.
2 Bɔt Jiova nɔ want fɔ dɔnawe wit ɛnibɔdi. As wi bin dɔn tɔk na di atikul dɛn bifo dis wan, di Baybul tɔk klia wan se Jiova “want mek ɔlman ripɛnt.” (2 Pit. 3:9) Ɛlda dɛn de falamakata Jiova bay we dɛn de peshɛnt we dɛn de tray fɔ ɛp pɔsin we dɔn kɔmit siriɔs sin fɔ chenj di we aw i de biev ɛn gɛt tayt padi biznɛs wit Jiova bak. Bɔt nɔto ɔlman we dɔn kɔmit siriɔs sin kin ripɛnt. (Ayz. 6:9) Sɔm kin stil kɔntinyu fɔ du di bad tin we dɛn de du pan ɔl we di ɛlda dɛn kin dɔn tray bɔku tɛm fɔ ɛp dɛn fɔ ripɛnt. Wetin di ɛlda dɛn fɔ du we dis kayn tin apin?
“UNA PUL DI PƆSIN WE WIKƐD KƆMƆT MIDUL UNA”
3. (a) Wetin di Baybul se dɛn fɔ du to di wan dɛn we nɔ gri fɔ ripɛnt? (b) We pɔsin nɔ gri fɔ ripɛnt, wetin mek wi go se i dɔn disayd fɔ mek dɛn pul am kɔmɔt na di kɔngrigeshɔn?
3 We pɔsin we dɔn kɔmit siriɔs sin nɔ gri fɔ ripɛnt, di ɛlda dɛn nid fɔ fala di dayrɛkshɔn we de na 1 Kɔrintians 5:13 we se: “Una pul di pɔsin we wikɛd kɔmɔt midul una.” I go tan lɛk se di pɔsin we dɔn kɔmit siriɔs sin dɔn disayd fɔ mek dɛn pul am kɔmɔt na di kɔngrigeshɔn; so i de avɛst wetin i plant. (Gal. 6:7) Wetin mek wi se so? Na bikɔs i nɔ gri fɔ mek di ɛlda dɛn ɛp am fɔ ripɛnt. (2 Kiŋ 17:12-15) Di tin dɛn we i de du de sho se i dɔn disayd nɔ fɔ fala Jiova in lɔ dɛn.—Dyu. 30:19, 20.
4. Wetin mek di ɛlda dɛn kin mek anawnsmɛnt we dɛn pul pɔsin we nɔ gri fɔ ripɛnt kɔmɔt na di kɔngrigeshɔn?
4 We dɛn pul pɔsin we nɔ gri fɔ ripɛnt kɔmɔt na di kɔngrigeshɔn, di ɛlda dɛn kin mek anawnsmɛnt fɔ mek di wan ol kɔngrigeshɔn no se da pɔsin de nɔto Jiova Witnɛs igen. a Dɛn nɔ de mek da anawnsmɛnt de fɔ mek di pɔsin we dɔn kɔmit siriɔs sin shem. Bifo dat, dɛn de du am so dat di brɔda ɛn sista dɛn na di kɔngrigeshɔn go fala di advays na di Baybul we se “una nɔ kip kɔmpin” wit da pɔsin de ɛn “una nɔ fɔ ivin it wit” am. (1 Kɔr. 5:9-11) Jiova gɛt gud rizin we mek i gi wi dis dayrɛkshɔn. Apɔsul Pɔl bin rayt se: “Smɔl yist de mek flawa we dɛn dɔn miks rayz.” (1 Kɔr. 5:6) If dɛn nɔ pul pɔsin we dɔn kɔmit siriɔs sin ɛn nɔ gri fɔ ripɛnt na di kɔngrigeshɔn, sɔntɛm dat go mek ɔda pipul dɛn fil se dɛn nɔ nid fɔ obe Jiova in lɔ dɛn.—Prɔv. 13:20; 1 Kɔr. 15:33.
5. Aw wi fɔ si pɔsin we dɛn dɔn pul kɔmɔt na di kɔngrigeshɔn? Wetin mek?
5 So aw wi fɔ si wi kɔmpin Kristian we dɛn dɔn pul kɔmɔt na di kɔngrigeshɔn? Pan ɔl we wi nɔ go kip kɔmpin wit am, wi go si am lɛk ship we dɔn lɔs, wi nɔ de si am lɛk pɔsin we nɔ go ɛva kam bak to Jiova. We ship kɔmɔt usay in kɔmpin dɛn de, i kin kam bak. Mɛmba se, da pɔsin de bin dɔn gi in layf to Jiova. Bɔt i sɔri fɔ no se i nɔ de du tin dɛn we de sho se i dɔn gi in layf to Jiova rayt naw, ɛn dat rili bad. (Izi. 18:31) Bɔt wans tɛm stil de ɛn Jiova rɛdi fɔ sɔri fɔ am, wi op se di pɔsin go chenj ɛn kam bak to Jiova. So aw di ɛlda dɛn go ɛp pɔsin we dɔn kɔmit siriɔs sin we dɛn dɔn pul kɔmɔt na di kɔngrigeshɔn fɔ kam bak to Jiova?
AW DI ƐLDA DƐN DE ƐP DI WAN DƐN WE DƐN DƆN PUL KƆMƆT NA DI KƆNGRIGESHƆN?
6. Wetin ɛn wetin di ɛlda dɛn go du fɔ ɛp di pɔsin we dɛn dɔn pul kɔmɔt na di kɔngrigeshɔn?
6 Fɔ se di ɛlda dɛn kin tɔn dɛn bak pan di pɔsin we dɛn dɔn pul kɔmɔt na di kɔngrigeshɔn ɛn lɛf am fɔ lɛ i kam bak to Jiova fɔ insɛf? Nɔ! We dɛn de tɛl pɔsin we nɔ gri fɔ ripɛnt se dɛn go pul am kɔmɔt na di kɔngrigeshɔn, di ɛlda dɛn kin tɛl am wetin ɛn wetin i fɔ du fɔ lɛ i kam bak na di kɔngrigeshɔn. Bɔt nɔto dat nɔmɔ dɛn go du. Bɔku tɛm, ɛlda dɛn kin tɛl di pɔsin we dɔn kɔmit siriɔs sin se dɛn go lɛk fɔ sidɔm wit am bak afta sɔm mɔnt fɔ si if i dɔn chenj di we aw i de tink. If di pɔsin gri fɔ sidɔm wit di ɛlda dɛn bak, dɛn go gladi fɔ ɛp am fɔ mek i ripɛnt ɛn kam bak. Ivin if i nɔ chenj di we aw i de tink da tɛm de, di ɛlda dɛn go stil tray fɔ de go fɛn am wan wan tɛm fɔ ɛnkɔrej am fɔ ripɛnt.
7. Aw di ɛlda dɛn go falamakata Jiova in sɔri-at we dɛn de tray fɔ ɛp pɔsin we dɛn dɔn pul kɔmɔt na di kɔngrigeshɔn? (Jɛrimaya 3:12)
7 Di ɛlda dɛn kin tray tranga wan fɔ falamakata Jiova in sɔri-at we dɛn de ɛp pɔsin we dɛn dɔn pul kɔmɔt na di kɔngrigeshɔn. Fɔ ɛgzampul, Jiova nɔ bin wet te in trangayes pipul dɛn we na di Izrɛlayt dɛn ripɛnt. Bifo dat, na in fɔs du sɔntin fɔ ɛp dɛn ivin bifo dɛn sho se dɛn want fɔ ripɛnt. Lɛk aw wi bin dɔn lan insay di sɛkɔn atikul na dis siriz, Jiova bin sho se i gɛt sɔri-at bay we i tɛl prɔfɛt Osia fɔ fɔgiv in wɛf ɛn tek am bak pan ɔl we i bin stil de sin. (Osia 3:1; Mal. 3:7) Bikɔs ɛlda dɛn de falamakata Jiova, dɛn rili want fɔ mek pɔsin we dɔn kɔmit siriɔs sin ripɛnt ɛn kam bak to Jiova, ɛn dɛn nɔ de mek i at fɔ lɛ di pɔsin du dat.—Rid Jɛrimaya 3:12.
8. Aw Jizɔs in parebul bɔt di bɔypikin we bin lɔs ɛp wi fɔ rili ɔndastand di kayn sɔri-at we Jiova gɛt? (Lyuk 15:7)
8 Mɛmba wetin di papa bin du na Jizɔs in parebul bɔt di bɔypikin we bin lɔs na di sɛkɔn atikul insay dis siriz. As di papa si in bɔypikin de kam, i “rɔn go mit am, i ɔg am, ɛn kis am.” (Lyuk 15:20) Notis se di papa nɔ bin wet te di bɔypikin beg am fɔ lɛ i fɔgiv am. Bifo dat, na in fɔs du sɔntin jɔs lɛk aw ɛni papa we lɛk in pikin go du. Na di sem we di ɛlda dɛn de tray fɔ trit di wan dɛn we dɔn lɛf Jiova. Dɛn want mek dɛn ship dɛn de we dɔn lɔs “kam bak” to Jiova. (Lyuk 15:22-24, 32) Gladi-at kin de na ɛvin ɛn na di kɔngrigeshɔn we pɔsin we bin dɔn lɛf Jiova kam bak to am!—Rid Lyuk 15:7.
9. Wetin Jiova de ɛnkɔrej di wan dɛn we dɔn kɔmit siriɔs sin fɔ du?
9 Frɔm ɔl wetin wi dɔn lan, wi dɔn si klia wan se Jiova nɔ want pɔsin we dɔn kɔmit siriɔs sin ɛn nɔ gri fɔ ripɛnt fɔ kɔntinyu fɔ de na di kɔngrigeshɔn. Bɔt i kin stil tray fɔ ɛp dɛn. I want mek dɛn kam bak to am. Osia 14:4 mek wi no aw Jiova de rili fil bɔt di wan dɛn we dɔn kɔmit siriɔs sin ɛn ripɛnt. Insay da skripchɔ de Jiova bin se: “A go mek dɛn fetful. Na misɛf sɛf go gri fɔ lɛk dɛn, bikɔs mi at nɔ wam pan dɛn igen.” Bikɔs ɛlda dɛn no aw Jiova de fil, dat de mek dɛn pe atɛnshɔn pan ɛnitin we pɔsin du we de sho se i dɔn bigin fɔ ripɛnt. Ɛn dɛn wɔd dɛn ya we Jiova tɔk fɔ mek di wan dɛn we dɔn lɛf am no se i lɛk dɛn ɛn i nɔ want mek dɛn westɛm fɔ kam bak to am.
10-11. Aw di ɛlda dɛn go tray fɔ ɛp di wan dɛn we dɛn bin dɔn pul kɔmɔt na di kɔngrigeshɔn trade?
10 Wetin wi go se bɔt di wan dɛn we dɛn bin dɔn pul kɔmɔt na di kɔngrigeshɔn trade, sɔntɛm lɔng tɛm dɔn pas? I go bi se dɛn dɔn lɛf di bad tin we dɛn bin de du lɔng lɔng tɛm we bin mek dɛn pul dɛn kɔmɔt na di kɔngrigeshɔn. Sɔntɛm, sɔm pan dɛn nɔ ivin mɛmba di bad tin we dɛn bin du we bin mek dɛn pul dɛn kɔmɔt na di kɔngrigeshɔn. Ilɛk i dɔn te we dɛn pul dɛn kɔmɔt na di kɔngrigeshɔn, di ɛlda dɛn fɔ go fɛn dɛn pipul dɛn de. We di ɛlda dɛn go fɛn dɛn, dɛn kin ivin pre wit dɛn ɛn ɛnkɔrej dɛn fɔ kam bak na di kɔngrigeshɔn. As wi ɔl no, if dɛn bin dɔn pul di pɔsin kɔmɔt na di kɔngrigeshɔn fɔ lɔng tɛm, dɛn go nid fɔ tich am bak bɔt Jiova ɛn di tru tin dɛn na di Baybul. So if i sho se i want fɔ kam bak na di kɔngrigeshɔn, sɔntɛm di ɛlda dɛn go arenj fɔ mek pɔsin go de stɔdi di Baybul wit am pan ɔl we i nɔ kam bak yet na di kɔngrigeshɔn. Ilɛk wetin apin, na di ɛlda dɛn nɔmɔ fɔ arenj fɔ mek dɛn stɔdi di Baybul wit pɔsin we dɛn bin dɔn pul kɔmɔt na di kɔngrigeshɔn.
11 Bikɔs di ɛlda dɛn de falamakata Jiova in sɔri-at, dɛn de tray fɔ fɛn ɛn ɛp bɔku bɔku pipul dɛn fɔ no se dɛn kin stil kam bak to Jiova. We pɔsin we dɔn kɔmit siriɔs sin sho se i dɔn ripɛnt ɛn lɛf di bad tin we i bin de du, di ɛlda dɛn nɔ de westɛm fɔ mek i kam bak na di kɔngrigeshɔn.—2 Kɔr. 2:6-8.
12. (a) Us patikyula tin dɛn kin apin we kin mek ɛlda dɛn rili nid fɔ tek tɛm bifo dɛn disayd if pɔsin fɔ kam bak na di kɔngrigeshɔn? (b) Wetin mek wi nɔ fɔ fil se i nɔ pɔsibul fɔ mek Jiova sɔri fɔ sɔm pipul dɛn bikɔs ɔf di kayn sin we dɛn dɔn kɔmit? (Luk bak di futnot.)
12 Sɔm patikyula tin dɛn de we kin apin we go mek ɛlda dɛn rili nid fɔ tek tɛm bifo dɛn disayd if pɔsin fɔ kam bak na di kɔngrigeshɔn. Fɔ ɛgzampul, if pɔsin du mami ɛn dadi biznɛs wit pikin, de tich lay lay tin dɛn, ɔ i plan fɔ du mami ɛn dadi biznɛs wit ɔda pɔsin fɔ mek i go dayvɔs in man ɔ wɛf, di ɛlda dɛn fɔ mek shɔ se i dɔn rili ripɛnt bifo i kam bak na di kɔngrigeshɔn. (Mal. 2:14; 2 Tim. 3:6) Dɛn fɔ protɛkt di brɔda ɛn sista dɛn na di kɔngrigeshɔn. Wi fɔ mɛmba bak se Jiova go gri fɔ tek ɛnibɔdi we dɔn kɔmit siriɔs sin bɔt we sho se i dɔn rili ripɛnt ɛn lɛf fɔ du di bad tin we i bin de du. So pan ɔl we di ɛlda dɛn nid fɔ rili tek tɛm fɔ ɛp di wan dɛn we dɔn du bad bad tin bay wilful to ɔda pipul dɛn, dɛn nɔ fɔ ɛva tink se Jiova nɔ go sɔri fɔ sɔm pipul dɛn bikɔs ɔf di kayn sin we dɛn dɔn kɔmit. b—1 Pit. 2:10.
WETIN DI KƆNGRIGESHƆN GO DU?
13. Wetin na di difrɛns bitwin di we aw wi de trit pɔsin we di ɛlda dɛn dɔn ripruv ɛn pɔsin we dɛn dɔn pul kɔmɔt na di kɔngrigeshɔn?
13 Lɛk aw wi dɔn tɔk na di atikul bifo dis wan, sɔntɛnde dɛn kin anawns se dɛn dɔn ripruv pɔsin. We dat apin, wi kin kɔntinyu fɔ kip kɔmpin wit am bikɔs wi no se i dɔn ripɛnt ɛn lɛf di bad tin we i bin de du. (1 Tim. 5:20) I stil de pat pan di kɔngrigeshɔn ɛn i nid di ɛnkɔrejmɛnt we di brɔda ɛn sista dɛn go gi am fɔ mek i kɔntinyu fɔ du wetin rayt. (Ibru. 10:24, 25) Bɔt nɔto di sem tin kin apin we dɛn pul pɔsin kɔmɔt na di kɔngrigeshɔn. Wi “nɔ [de] kip kɔmpin” wit da pɔsin de, ɛn wi “nɔ fɔ ivin it wit da kayn pɔsin de.”—1 Kɔr. 5:11.
14. Aw Kristian dɛn go yuz dɛn kɔnshɛns we di Baybul dɔn tren fɔ disayd aw dɛn go trit pɔsin we dɛn bin dɔn pul kɔmɔt na di kɔngrigeshɔn? (Luk bak di pikchɔ.)
14 Fɔ se di tin dɛn we wi dɔn tɔk bɔt min se wi nɔ fɔ gɛt ɛnitin fɔ du wit pɔsin we dɛn dɔn pul kɔmɔt na di kɔngrigeshɔn? Nɔ. Na tru se wi nɔ fɔ kip kɔmpin wit am. Bɔt Kristian dɛn kin yuz dɛn kɔnshɛns we di Baybul dɔn tren fɔ disayd if dɛn go invayt pɔsin we dɛn dɔn pul kɔmɔt na di kɔngrigeshɔn, we sɔntɛm na dɛn fambul ɔ na bin dɛn tayt padi fɔ kam mitin. Wetin wi fɔ du if i atɛnd? Trade, wi nɔ go grit da kayn pɔsin de. Bɔt naw we tin lɛk dis apin, ɛni Kristian kin yuz in kɔnshɛns we di Baybul dɔn tren fɔ disayd if i go grit di pɔsin ɔ i nɔ go grit am. Sɔm go disayd fɔ grit di pɔsin ɔ wɛlkɔm am we i kam na mitin. Bɔt wi nɔ go tɔk wit am bɔku ɔ kip kɔmpin wit am.
Kristian dɛn fɔ yuz dɛn kɔnshɛns we di Baybul dɔn tren fɔ disayd if dɛn go invayt pɔsin we dɛn bin dɔn pul kɔmɔt na di kɔngrigeshɔn ɔ dɛn go wɛlkɔm am we i kam na mitin (Luk na paregraf 14)
15. Uskayn sina dɛn 2 Jɔn 9-11 tɔk bɔt? (Luk bak di bɔks we gɛt di taytul, “ Fɔ Se Na di Sem Kayn Sin Pɔl ɛn Jɔn Tɔk Bɔt?”)
15 Sɔntɛm sɔm pipul dɛn go de wɔnda, ‘Di Baybul nɔ se pɔsin we grit da kayn pɔsin de dɔn jɔyn am pan di wikɛd tin dɛn we i de du?’ (Rid 2 Jɔn 9-11.) Di kɔntɛks fɔ dɛn vas dɛn ya sho se na apɔstet dɛn ɛn di wan dɛn we de ɛnkɔrej ɔda pipul dɛn fɔ du bad Jɔn bin de tɔk bɔt. (Rɛv. 2:20) So if pɔsin de tich lay lay tin dɛn ɔ i de ɛnkɔrej ɔda pipul dɛn fɔ du bad, di ɛlda dɛn nɔ go arenj fɔ go fɛn am. As wi ɔl no, i stil pɔsibul se i go ripɛnt. Bɔt te i ripɛnt, wi nɔ fɔ grit da kayn pɔsin de ɔ invayt am fɔ kam na mitin.
FALAMAKATA DI SƆRI-AT WE JIOVA GƐT
16-17. (a) Wetin Jiova want sina dɛn fɔ du? (Izikɛl 18:32) (b) Aw ɛlda dɛn go sho se dɛn de wok wit Jiova we dɛn de tray fɔ ɛp pɔsin we dɔn kɔmit siriɔs sin?
16 Wetin wi dɔn lan na di fayv atikul dɛn insay dis siriz? Jiova nɔ want fɔ dɔnawe wit ɛnibɔdi! (Rid Izikɛl 18:32.) I want mek di wan dɛn we dɔn sin kam bak to am. (2 Kɔr. 5:20) Na dat mek Jiova dɔn de ɛnkɔrej in trangayes savant dɛn ɔltɛm we dɔn lɛf am fɔ ripɛnt ɛn kam bak to am. Di ɛlda dɛn na di kɔngrigeshɔn gɛt di ɔnɔ fɔ bi Jiova in kɔmpin wokman dɛn we dɛn de tray fɔ ɛp di wan dɛn we dɔn kɔmit siriɔs sin fɔ ripɛnt.—Rom. 2:4; 1 Kɔr. 3:9.
17 Imajin di kayn gladi-at we kin de na ɛvin we sina dɛn ripɛnt! Jiova insɛf sɛf we na wi Papa we de na ɛvin kin gladi ɛnitɛm we wan pan in ship dɛn we dɔn lɔs kam bak na di kɔngrigeshɔn. Wi de lɛk Jiova mɔ ɛn mɔ we wi de tink bɔt di kayn sɔri-at we i gɛt ɛn in spɛshal gudnɛs we i de sho wi we wi nɔ fit fɔ gɛt.—Lyuk 1:78.
SIŊ 111 Tin dɛn we De Mek Wi Gladi
a Wi nɔ go kɔl dɛn igen pipul dɛn we dɛn dɔn disfɛloship. Bikɔs ɔf wetin Pɔl tɔk na 1 Kɔrintians 5:13, naw wi go de kɔl dɛn pipul dɛn we dɛn dɔn pul kɔmɔt na di kɔngrigeshɔn.
b Akɔdin to di Baybul, di sin we Gɔd nɔ de fɔgiv nɔto ɛni patikyula sin, bɔt na di kayn sin we pɔsin mek-ɔp in maynd fɔ kɔmit bay wilful we de sho se i de agens Gɔd. Na Jiova ɛn Jizɔs nɔmɔ go disayd if dɛn go fɔgiv di pɔsin ɔ dɛn nɔ go fɔgiv am.—Mak 3:29; Ibru. 10:26, 27.
