STƆDI ATIKUL 33
SIŊ 130 Lɛ Wi De Fɔgiv
Aw Jiova Want di Kɔngrigeshɔn fɔ Trit di Wan dɛn We Kɔmit Siriɔs Sin?
“If ɛnibɔdi sin, wi gɛt pɔsin we de ɛp wi.”—1 JƆN 2:1.
MEN PƆYNT
Impɔtant lɛsin dɛn we wi go lan frɔm wetin bin apin na di kɔngrigeshɔn na Kɔrint we wan brɔda bin kɔmit siriɔs sin.
1. Wetin Jiova want fɔ ɔlman?
JIOVA mek wi ɛn gi wi fridɔm fɔ disayd fɔ wisɛf. Yu kin yuz da gift de we yu de disayd fɔ du tin dɛn. Di tin we pɔsin go disayd fɔ du we impɔtant pas ɔl na we i disayd fɔ gi in layf to Jiova ɛn bi wan pan In savant dɛn. Na dat Jiova want ɔlman fɔ du. Wetin mek? Na bikɔs i lɛk pipul dɛn ɛn i want lɛ bɛtɛ fala dɛn. I want mek dɛn gɛt tayt padi biznɛs wit am ɛn de sote go.—Dyu. 30:19, 20; Gal. 6:7, 8.
2. Aw Jiova de fil bɔt pipul dɛn we dɔn kɔmit siriɔs sin ɛn nɔ gri fɔ ripɛnt? (1 Jɔn 2:1)
2 Bɔt Jiova nɔ de fos ɛnibɔdi fɔ sav am. I de alaw ɔlman fɔ disayd wetin i want fɔ du. Wetin go apin if Kristian we dɔn baptayz kɔmit siriɔs sin? If i nɔ gri fɔ ripɛnt, dɛn fɔ pul am kɔmɔt na di kɔngrigeshɔn. (1 Kɔr. 5:13) Bɔt pan ɔl dat, Jiova kin stil op se di pɔsin we dɔn kɔmit siriɔs sin go kam bak to Am. Infakt, wan men rizin we mek Jizɔs bin pe di prayz fɔ bay wi bak na fɔ mek Gɔd fɔgiv di wan dɛn we kɔmit siriɔs sin ɛn ripɛnt. (Rid 1 Jɔn 2:1.) Wi Gɔd we lɛk wi de ɛnkɔrej di wan dɛn we dɔn kɔmit siriɔs sin fɔ ripɛnt.—Zɛk. 1:3; Rom. 2:4; Jems 4:8.
3. Wetin wi go tɔk bɔt insay dis atikul?
3 Jiova de tɛl wi aw i de fil bɔt sin ɛn di wan dɛn we dɔn kɔmit siriɔs sin, ɛn i want mek wisɛf fil di sem we. Dis atikul go tɔk bɔt aw wi go ebul fɔ du dat. As yu de rid dis atikul, luk fɔ dɛn pɔynt dɛn ya: (1) wetin di kɔngrigeshɔn na Kɔrint bin du we wan brɔda kɔmit siriɔs sin insay di fɔstɛm Kristian dɛn tɛm, (2) wetin apɔsul Pɔl bin tɛl di kɔngrigeshɔn fɔ du we pɔsin we kɔmit siriɔs sin ripɛnt, ɛn (3) wetin dis Baybul akawnt de tɛl wi bɔt aw Jiova de fil bɔt Kristian dɛn we dɔn kɔmit siriɔs sin.
WETIN DI KƆNGRIGESHƆN BIN DU WE WAN BRƆDA KƆMIT SIRIƆS SIN INSAY DI FƆSTƐM KRISTIAN DƐN TƐM?
4. Wetin bin apin na di kɔngrigeshɔn na Kɔrint insay di fɔstɛm Kristian dɛn tɛm? (1 Kɔrintians 5:1, 2)
4 Rid 1 Kɔrintians 5:1, 2. Di tɛm we Pɔl bin de du in tɔd mishɔnari patrol, i bin yɛri bad nyuz bɔt di nyu kɔngrigeshɔn na Kɔrint. Wan brɔda na da kɔngrigeshɔn de bin de du mami ɛn dadi biznɛs wit in stɛp-mama. Da tin de we da brɔda de bin de du bin rili shɔk pipul dɛn ɛn na sɔntin we “ivin ɔda neshɔn dɛn nɔ [bin] de du”! Bɔt di brɔda ɛn sista dɛn bin tink se i nɔ bad fɔ mek di brɔda we de biev da we de kɔntinyu fɔ de na di kɔngrigeshɔn. Sɔntɛm, sɔm brɔda ɛn sista dɛn na di kɔngrigeshɔn bin de tink se dɛn bin de falamakata Jiova fɔ sho sɔri-at fɔ mɔtalman dɛn we nɔ pafɛkt. Bɔt Jiova nɔ de gladi we in pipul dɛn de du bad tin dɛn. Bikɔs ɔf di bad we aw dis brɔda bin de biev, sɔm pipul dɛn we nɔ bin de wɔship Jiova go mɔs dɔn shɔk ɛn tɔk bad tin dɛn bɔt Jiova in pipul dɛn. I go dɔn de mek bak pipul dɛn we bin de kip kɔmpin wit am du di sem tin. So, wetin Pɔl bin tɛl di kɔngrigeshɔn fɔ du?
5. Wetin Pɔl bin tɛl di kɔngrigeshɔn fɔ du? Wetin i bin min? (1 Kɔrintians 5:13) (Luk bak di pikchɔ.)
5 Rid 1 Kɔrintians 5:13. Jiova bin yuz Pɔl fɔ rayt lɛta to di kɔngrigeshɔn ɛn tɛl dɛn fɔ pul di brɔda we kɔmit siriɔs sin ɛn nɔ gri fɔ ripɛnt na di kɔngrigeshɔn. Aw fetful Kristian dɛn fɔ trit am? Pɔl bin tɛl dɛn mek dɛn “nɔ kip kɔmpin wit” am. Wetin dat bin min? Pɔl bin ɛksplen se, dɛn “nɔ fɔ ivin it wit da kayn pɔsin de.” (1 Kɔr. 5:11) We yu sidɔm fɔ it wit pɔsin, i go izi fɔ mek una tɔk ɛn du ɔda tin dɛn. So Pɔl bin de tɔk klia wan se di brɔda ɛn sista dɛn nɔ fɔ spɛn tɛm wit da man de. Dis go protɛkt di kɔngrigeshɔn frɔm di bad we aw i de biev. (1 Kɔr. 5:5-7) Bikɔs dɛn nɔ de kip kɔmpin wit da man de, sɔntɛm dat go mek i no se di tin we i du rili bad ɛn in padi biznɛs wit Jiova dɔn pwɛl, ɛn sɔntɛm dat go mek i shem ɛn disayd fɔ ripɛnt.
Gɔd bin yuz Pɔl fɔ rayt lɛta fɔ tɛl di kɔngrigeshɔn fɔ pul di sina we nɔ gri fɔ ripɛnt kɔmɔt na di kɔngrigeshɔn (Luk na paregraf 5)
6. Aw Pɔl in lɛta bin afɛkt di kɔngrigeshɔn ɛn di man we bin kɔmit siriɔs sin?
6 Afta Pɔl sɛn in lɛta to di Kristian dɛn na Kɔrint, i bigin fɔ tink bɔt wetin di kɔngrigeshɔn go du afta dɛn rid di lɛta. Afta sɔm tɛm, Taytɔs bin briŋ nyuz we bin mek i gladi. Di kɔngrigeshɔn bin du wetin Pɔl bin se insay di lɛta we i bin sɛn to dɛn. Dɛn bin pul di man we sin kɔmɔt na di kɔngrigeshɔn. (2 Kɔr. 7:6, 7) Afta sɔm mɔnt dɔn pas we Pɔl sɛn di lɛta, di man we bin kɔmit sin bin ripɛnt! I bin dɔn chenj di we aw i bin de biev ɛn i bin dɔn bigin fɔ fala Jiova in lɔ dɛn bɔt wetin rayt ɛn rɔng. (2 Kɔr. 7:8-11) Wetin Pɔl go tɛl di kɔngrigeshɔn naw fɔ du?
AW DI KƆNGRIGESHƆN BIN FƆ TRIT DI SINA WE BIN RIPƐNT?
7. Us gud tin bin apin we dɛn pul di man we bin kɔmit sin kɔmɔt na di kɔngrigeshɔn? (2 Kɔrintians 2:5-8)
7 Rid 2 Kɔrintians 2:5-8. Pɔl bin tɔk se “di we aw bɔku pipul dɛn dɔn kɔrɛkt am [bin] du fɔ da kayn man de.” Dat min se afta dɛn dɔn pul di sina kɔmɔt na di kɔngrigeshɔn, i bin no se i nid fɔ ripɛnt, ɛn bikɔs i ripɛnt, nid nɔ bin de igen fɔ mek dɛn kɔntinyu fɔ kɔrɛkt am.—Ibru. 12:11.
8. Wetin bak Pɔl bin tɛl di kɔngrigeshɔn fɔ du?
8 So Pɔl bin tɛl di kɔngrigeshɔn se: “Una fɔ fɔgiv am wit ɔl una at ɛn kɔrej am” ɛn “una fɔ sho se una lɛk am.” Notis se Pɔl nɔ bin jɔs want di brɔda ɛn sista dɛn fɔ alaw di man fɔ kam bak na di kɔngrigeshɔn, bɔt i bin want mek dɛn du pas dat. Pɔl bin want mek dɛn ɛp di man we dɔn ripɛnt fɔ no se dɛn dɔn rili fɔgiv am ɛn dɛn lɛk am bay di tin dɛn we dɛn de tɔk ɛn du. We dɛn du dat, dɛn go mek i no klia wan se dɛn gladi we i dɔn kam bak na di kɔngrigeshɔn.
9. Wetin go dɔn mek i nɔ izi fɔ sɔm brɔda ɛn sista dɛn fɔ fɔgiv di brɔda we bin dɔn ripɛnt?
9 Fɔ se i nɔ bin izi fɔ sɔm brɔda ɛn sista dɛn na da kɔngrigeshɔn de fɔ wɛlkɔm bak di brɔda we bin dɔn ripɛnt? Di Baybul nɔ tɛl wi natin bɔt dat, bɔt i pɔsibul. Afta ɔl, di tin we di brɔda du bin ambɔg di wan ol kɔngrigeshɔn ɛn sɔntɛm i bin mek sɔm brɔda ɛn sista dɛn shem. Sɔntɛm sɔm pan dɛn bin de fil se i nɔ fia fɔ mek dɛn wɛlkɔm di brɔda fayn fayn wan we i bi se na dɛn dɔn de tray tranga wan fɔ kɔntinyu fɔ klin na Jiova in yay. (Luk bak Lyuk 15:28-30.) Bɔt wetin mek i bin impɔtant fɔ mek di kɔngrigeshɔn sho se dɛn rili lɛk dɛn brɔda we dɔn ripɛnt ɛn kam bak?
10-11. Wetin fɔ dɔn apin if di ɛlda dɛn nɔ bin gri fɔ fɔgiv di sina we dɔn ripɛnt?
10 Imajin wetin bin fɔ dɔn apin if di ɛlda dɛn nɔ bin gri fɔ alaw di man we bin dɔn ripɛnt wit ɔl in at fɔ kam bak na di kɔngrigeshɔn, ɔ if afta di man dɔn kam bak na di kɔngrigeshɔn di brɔda ɛn sista dɛn nɔ gri fɔ sho se dɛn lɛk am? In “at . . . go pwɛl pasmak.” I bin fɔ izi fɔ mek i fil se i nɔ go ɛva ebul fɔ sav Jiova igen. Sɔntɛm i bin fɔ ivin stɔp fɔ du tin dɛn we go mek i gɛt tayt padi biznɛs wit Gɔd bak.
11 Di tin we wɔs pas ɔl na dat, if di brɔda ɛn sista dɛn na di kɔngrigeshɔn nɔ bin gri fɔ fɔgiv di sina we dɔn ripɛnt, dɛn yon padi biznɛs wit Jiova bin fɔ pwɛl. Wetin mek? Na bikɔs nɔto Jiova dɛn go de falamakata we de fɔgiv sina dɛn we dɔn ripɛnt, bifo dat, na Setan we ash ɛn we nɔ gɛt wan sɔri-at dɛn go de falamakata. Dat go mek Setan yuz dɛn fɔ mek di man nɔ kɔntinyu fɔ sav Jiova.—2 Kɔr. 2:10, 11; Ɛfi. 4:27.
12. Aw di kɔngrigeshɔn go falamakata Jiova?
12 So aw di kɔngrigeshɔn na Kɔrint go falamakata Jiova ɛn nɔ falamakata Setan? Na we dɛn de falamakata di we aw Jiova de trit sina dɛn we dɔn ripɛnt. Notis wetin sɔm man dɛn we rayt di Baybul tɔk bɔt Jiova. Devid bin se Jiova “gud ɛn [i] rɛdi fɔ fɔgiv.” (Sam 86:5) Mayka bin se: “Us Gɔd we tan lɛk yu, we de fɔgiv . . . pipul dɛn fɔ dɛn mistek ɛn sin?” (Mayk. 7:18) Ɛn Ayzaya bin rayt se: “Lɛ di wan we wikɛd chenj, lɛ di wan we de du wetin bad chenj di we aw i de tink; lɛ i kam bak to Jiova, we go sɔri fɔ am, lɛ i kam to wi Gɔd, bikɔs i go rili fɔgiv am.”—Ayz. 55:7.
13. Wetin mek i bin fayn we di ɛlda dɛn alaw di man we bin dɔn ripɛnt fɔ kam bak na di kɔngrigeshɔn? (Luk di bɔks we gɛt di taytul, “ Ustɛm Dɛn Bin Mek di Man na Kɔrint Kam Bak na di Kɔngrigeshɔn?”)
13 Fɔ mek di kɔngrigeshɔn na Kɔrint falamakata Jiova, dɛn bin nid fɔ wɛlkɔm di man we bin dɔn ripɛnt bak na di kɔngrigeshɔn ɛn mek i no se dɛn lɛk am. We di kɔngrigeshɔn bin du wetin Pɔl tɛl dɛn fɔ wɛlkɔm bak di sina we dɔn ripɛnt, dɛn bin sho se dɛn “de obe pan ɔltin.” (2 Kɔr. 2:9) Pan ɔl we na fɔ sɔm mɔnt nɔmɔ dɛn pul di man kɔmɔt na di kɔngrigeshɔn, i bin tek di kɔrɛkshɔn we dɛn bin gi am ɛn dat bin mek i ripɛnt. So no rizin nɔ bin de fɔ mek di ɛlda dɛn westɛm fɔ mek i kam bak na di kɔngrigeshɔn.
FALAMAKATA DI WE AW JIOVA DE DU TIN FIA WAN ƐN DI SƆRI-AT WE I GƐT
14-15. Us lɛsin dɛn wi lan frɔm wetin bin apin na Kɔrint? (2 Pita 3:9) (Luk bak di pikchɔ.)
14 Dɛn rayt bɔt di tin dɛn we bin apin na di kɔngrigeshɔn na Kɔrint insay di Baybul “fɔ tich wi.” (Rom 15:4) Frɔm da akawnt de, wi lan se Jiova nɔ de alaw di wan dɛn we de kɔmit siriɔs sin ɛn we nɔ gri fɔ ripɛnt fɔ kɔntinyu fɔ de na di kɔngrigeshɔn. Sɔntɛm sɔm pipul dɛn go tink se bikɔs Jiova gɛt sɔri-at, i go alaw pɔsin we nɔ gri fɔ ripɛnt fɔ kɔntinyu fɔ de na di kɔngrigeshɔn, bɔt nɔto da we de Jiova de sho sɔri-at. Jiova gɛt sɔri-at, bɔt i nɔ de alaw pipul dɛn fɔ de du bad tin na di kɔngrigeshɔn ɛn i nɔ de chenj in lɔ dɛn bɔt wetin rayt ɛn rɔng. (Jud 4) If Jiova alaw sina dɛn we nɔ gri fɔ ripɛnt fɔ kɔntinyu fɔ de na di kɔngrigeshɔn, dat nɔ go sho se i gɛt sɔri-at bikɔs dɛn go ambɔg di kɔngrigeshɔn.—Prɔv. 13:20; 1 Kɔr. 15:33.
15 Bɔt stil, wi lan se Jiova nɔ want fɔ dɔnawe wit ɛnibɔdi. I want fɔ sev pipul dɛn ɛnitɛm i pɔsibul fɔ du dat. I de sho sɔri-at to pipul dɛn we dɔn chenj di we aw dɛn de biev ɛn we want fɔ gɛt tayt padi biznɛs wit am bak. (Izi. 33:11; rid 2 Pita 3:9.) So, we di man na Kɔrint bin ripɛnt ɛn lɛf fɔ du di bad tin we i bin de du, Jiova bin yuz Pɔl fɔ tɛl di kɔngrigeshɔn fɔ fɔgiv am ɛn wɛlkɔm am bak.
Di brɔda ɛn sista dɛn de falamakata Jiova in lɔv ɛn sɔri-at we dɛn gladi fɔ wɛlkɔm di wan dɛn we dɔn kam bak na di kɔngrigeshɔn (Luk na paregraf 14 ɛn 15)
16. Aw yu fil bɔt Jiova afta yu dɔn lan bɔt wetin apin na Kɔrint?
16 Di ɛgzampul na di kɔngrigeshɔn na Kɔrint de sho se Jiova rili lɛk wi, i de du wetin rayt, ɛn i de du tin fia wan. (Sam 33:5) Dis nɔ mek yu want fɔ prez Gɔd mɔ ɛn mɔ? Afta ɔl, wi ɔl na sina dɛn ɛn wi nid in fɔgivnɛs. Wi ɔl gɛt rizin fɔ tɛl Jiova tɛnki fɔ we i mek Jizɔs pe di prayz fɔ bay wi bak, we dɔn mek i pɔsibul fɔ mek Jiova fɔgiv wi sin dɛn. I de rili kɔrej wi fɔ no se Jiova rili lɛk in pipul dɛn ɛn i want lɛ bɛtɛ fala dɛn!
17. Wetin wi go tɔk bɔt na di nɛks atikul dɛn?
17 Bɔt wetin di ɛlda dɛn fɔ du if pɔsin kɔmit siriɔs sin insay wi yon tɛm? Aw ɛlda dɛn go falamakata Jiova fɔ ɛp pɔsin we dɔn kɔmit siriɔs sin fɔ ripɛnt? Wetin di kɔngrigeshɔn fɔ du we di ɛlda dɛn disayd fɔ pul pɔsin kɔmɔt na di kɔngrigeshɔn ɔ fɔ alaw pɔsin fɔ kam bak na di kɔngrigeshɔn? Wi go tɔk bɔt dɛn kwɛstyɔn dɛn ya insay di nɛks atikul dɛn.
SIŊ 109 Lɔv Fɔ Rili Kɔmɔt na Wi At
