1. Wetin pɔsin we dɔn ripɛnt de du?

 WE WI du bad, i impɔtant fɔ lɛ wi ripɛnt. Insay di Baybul, pɔsin we dɔn ripɛnt na pɔsin we dɔn chenj di we aw i de tink bɔt wan patikyula we aw i bin de biev, stɔp fɔ biev da we de, ɛn mek-ɔp in maynd nɔ fɔ biev da we de igen.​—Rid Baybul Wɔd dɛn Minin, “Repentance.”

2. Wetin mek wi ɔl nid fɔ lan bɔt wetin i min fɔ ripɛnt? (Nɛimaya 8:9-11)

² Ɔlman we de alayv nid fɔ lan bɔt wetin i min fɔ ripɛnt. Wetin mek? Na bikɔs wi ɔl de sin ɛvride. Bikɔs wi na Adam ɛn Iv dɛn pikin dɛn, wi ɔl de sin ɛn day. (Rom. 3:23; 5:12) Nɔbɔdi nɔ de we nɔ de sin ɔ day. Ivin man dɛn we bin gɛt strɔng fet lɛk apɔsul Pɔl, bin de fɛt tranga wan agens sin. (Rom. 7:21-24) Fɔ se dis min se wi at fɔ pwɛl ɔltɛm bikɔs ɔf wi sin dɛn? Nɔ, Jiova gɛt sɔri-at ɛn i want fɔ mek wi gladi. Lɛ wi tɔk bɔt wetin bin apin to di Ju dɛn insay Nɛimaya in tɛm. (Rid Nɛimaya 8:9-11.) Jiova nɔ bin want mek dɛn at pwɛl pasmak bikɔs ɔf di sin dɛn we dɛn bin dɔn kɔmit, bɔt i bin want dɛn fɔ gladi we dɛn de wɔship am. Jiova no se we wi ripɛnt, dat de mek wi gladi. So i de tich wi wetin i min fɔ ripɛnt. If wi ripɛnt fɔ di sin dɛn we wi dɔn kɔmit, wi go gɛt kɔnfidɛns se wi Papa we gɛt sɔri-at go fɔgiv wi.

3. Wetin wi go tɔk bɔt insay dis atikul?

³ Lɛ wi lan mɔ bɔt wetin i min fɔ ripɛnt. Insay dis atikul, wi go tɔk bɔt tri tin dɛn we go ɛp wi fɔ ɔndastand wetin i min fɔ ripɛnt. Fɔs, wi go lan bɔt wetin Jiova bin  tich di Izrɛlayt dɛn bɔt fɔ ripɛnt. Dɔn, wi go tɔk bɔt aw Jiova de ɛp sina dɛn fɔ ripɛnt. Faynali, wi go tɔk bɔt wetin Jizɔs in disaypul dɛn bin lan bɔt fɔ ripɛnt.

WETIN JIOVA BIN TICH DI IZRƐLAYT DƐN BƆT FƆ RIPƐNT

4. Wetin Jiova bin tich di Izrɛlayt dɛn bɔt fɔ ripɛnt?

⁴ We Jiova bin ɔganayz di Izrɛlayt dɛn fɔ bi neshɔn, i bin mek agrimɛnt wit dɛn. If dɛn obe in lɔ dɛn, i go protɛkt ɛn blɛs dɛn. We i bin de tɔk bɔt dɛn lɔ dɛn de, i se: “Dis kɔmandmɛnt we a de gi una tide nɔ tu at fɔ una, ɛn i nɔ de fa frɔm una.” (Dyu. 30:11, 16) Bɔt if dɛn tɔn dɛn bak pan am ɛn disayd fɔ wɔship ɔda gɔd dɛn, i go lɛf fɔ blɛs dɛn ɛn dɛn go sɔfa. Bɔt ilɛk dat apin, dɛn go stil ebul fɔ mek Gɔd gladi fɔ dɛn bak. Dɛn go ebul “tɔn bak to Jiova [dɛn] Gɔd ɛn . . . lisin to wetin i dɔn tɛl” dɛn. (Dyu. 30:1-3, 17-20) Dat min se dɛn go ebul fɔ ripɛnt. If dɛn du dat, Jiova go kam nia dɛn bak ɛn blɛs dɛn.

5. Aw Jiova sho se i nɔ bin giv-ɔp pan in pipul dɛn? (2 Kiŋ 17:13, 14)

⁵ Jiova in pipul dɛn we i pik bin de tɔn dɛn bak pan am ɔltɛm. Apat frɔm we dɛn bin de wɔship lay lay gɔd dɛn, dɛn bin de du ɔda bad bad tin dɛn bak. Bikɔs ɔf dat, dɛn bin sɔfa. Bɔt Jiova nɔ bin giv-ɔp pan in trangayes pipul dɛn. I bin de sɛn prɔfɛt dɛn bɔku tɛm fɔ tɛl di pipul dɛn fɔ ripɛnt ɛn kam bak to am.​—Rid 2 Kiŋ 17:13, 14.

6. Aw Jiova bin yuz in prɔfɛt dɛn fɔ tich in pipul dɛn bɔt wetin mek i impɔtant fɔ ripɛnt? (Luk bak di pikchɔ.)

⁶ Jiova bin de yuz in prɔfɛt dɛn bɔku tɛm fɔ wɔn ɛn kɔrɛkt in pipul dɛn. Fɔ ɛgzampul, Gɔd bin tɛl Jɛrimaya fɔ tɛl di Izrɛlayt dɛn se: “E Izrɛl we dɔn tɔn in bak pan Gɔd, kam bak . . . A nɔ go vɛks pan yu, bikɔs a nɔ de kɔmɔt biɛn pɔsin . . . A nɔ go kɔntinyu fɔ vɛks sote go. Jɔs gri se yu gilti, bikɔs yu dɔn tɔn yu bak pan Jiova.” (Jɛr. 3:12, 13) Jiova bin tɛl Joɛl fɔ tɛl di pipul dɛn se: “Una kam bak to mi  wit ɔl una at.” (Joɛl 2:12, 13) I bin tɛl Ayzaya fɔ tɛl di pipul dɛn se: “Una was ɛn klin unasɛf; una pul di bad tin dɛn we una de du bifo mi; una lɛf fɔ du bad.” (Ayz. 1:16-19) Ɛn Jiova bin yuz Izikɛl fɔ aks dɛn kwɛstyɔn dɛn ya: “Fɔ se a de gladi we wikɛd pɔsin de day? . . . Fɔ se a nɔ want fɔ lɛ i lɛf di tin dɛn we i de du ɛn kɔntinyu fɔ liv? A nɔ de gladi we ɛnibɔdi de day, . . . so una lɛf di bad tin dɛn we una de du ɛn kɔntinyu fɔ liv.” (Izi. 18:23, 32) Jiova kin gladi we pipul dɛn de ripɛnt bikɔs i want mek dɛn de sote go! So Jiova nɔ kin jɔs sidɔm de wet te pɔsin ripɛnt bifo i ɛp am. Lɛ wi si ɔda ɛgzampul dɛn we de sho se dis na tru.

7. Wetin Jiova bin tich in pipul dɛn we i yuz prɔfɛt Osia ɛn in wɛf as ɛgzampul?

⁷ Notis wetin Jiova bin tich in pipul dɛn we i yuz Goma we na prɔfɛt Osia in wɛf as ɛgzampul. Afta in wɛf go du mami ɛn dadi biznɛs di we aw Gɔd nɔ want, i bin lɛf Osia fɔ ɔda man dɛn. Fɔ se i nɔ bin pɔsibul fɔ mek i ripɛnt? Jiova we no wetin de insay mɔtalman at tɛl Osia se: “Go bak, lɛk di uman we ɔda man lɛk ɛn we de du mami ɛn dadi biznɛs wit ɔda man, jɔs lɛk aw Jiova lɛk di pipul dɛn na Izrɛl pan ɔl we dɛn de wɔship ɔda gɔd dɛn.” (Osia 3:1; Prɔv. 16:2) Notis se Osia in wɛf bin stil de kɔmit siriɔs sin. Bɔt pan ɔl dat, Jiova bin tɛl Osia fɔ fɔgiv am ɛn tek am bak as in wɛf. a Semweso, Jiova nɔ bin dɔn giv-ɔp yet pan in trangayes pipul dɛn. Pan ɔl we dɛn bin de du bad bad tin dɛn, i bin stil lɛk dɛn ɛn i kɔntinyu fɔ yuz in prɔfɛt dɛn fɔ ɛp dɛn fɔ mek dɛn ripɛnt ɛn chenj di we aw dɛn bin de liv dɛn layf. Fɔ se dis ɛgzampul de sho se Jiova we “de chɛk ɔlman in at” kin tray fɔ ɛp pɔsin we stil de sin siriɔs wan fɔ ripɛnt? (Prɔv. 17:3) Lɛ wi si.

AW JIOVA DE ƐP SINA DƐN FƆ RIPƐNT?

8. Aw Jiova bin tray fɔ ɛp Ken fɔ ripɛnt? (Jɛnɛsis 4:3-7) (Luk bak di pikchɔ.)

⁸ Ken na bin Adam ɛn Iv dɛn fɔs bɔypikin. Ken bin bɔn wit sin, na dat mek i bin de fil fɔ du bad. Pantap dat, di Baybul tɔk bɔt am se: “Na wikɛd tin dɛn i bin de du.” (1 Jɔn 3:12) Sɔntɛm na dat mek Jiova “nɔ bin gladi fɔ Ken ɛn in sakrifays” we i bin mek to am. Bifo Ken chenj di we aw i bin de biev, i “vɛks bad bad wan ɛn in at pwɛl.” Wetin Jiova bin du? I bin tɔk to Ken. (Rid Jɛnɛsis 4:3-7.) Notis se Jiova bin tek tɛm tɔk to Ken ɛn i bin tɛl am se i go blɛs am if i du wetin rayt. Jiova bin wɔn am bak se if i kɔntinyu fɔ vɛks, i go sin. Bɔt i sɔri fɔ no se Ken nɔ bin gri fɔ lisin to Jiova. I nɔ bin alaw Jiova fɔ ɛp am fɔ ripɛnt. Afta da bad we aw Ken biev, fɔ se Jiova bin stɔp fɔ ɛp ɔda pipul dɛn we de sin fɔ ripɛnt? Nɔ, i nɔ bin du dat!

9. Aw Jiova bin ɛp Devid fɔ ripɛnt?

⁹ Jiova bin rili lɛk Kiŋ Devid. I bin ivin se Devid “na man we de mek [in] at gladi.” (Akt 13:22) Bɔt Devid bin kɔmit siriɔs sin dɛn. Fɔ ɛgzampul, i bin du mami ɛn dadi biznɛs wit ɔda man in wɛf ɛn kil di man. Akɔdin to di Lɔ we Gɔd Bin Gi Mozis, Devid bin fit fɔ day fɔ dɛn tin dɛn ya we i bin du. (Liv. 20:10; Nɔm. 35:31)  Bɔt Jiova bin want fɔ ɛp Devid fɔ ripɛnt. b I bin sɛn prɔfɛt Netan to Devid pan ɔl we Devid nɔ bin dɔn du ɛnitin yet fɔ sho se i dɔn ripɛnt. Netan bin yuz ɛgzampul fɔ ɛp Devid fɔ no se i dɔn kɔmit siriɔs sin. Bikɔs Devid kam fɔ no se di tin we i du mek Jiova in at rili pwɛl, i bin ripɛnt. (2 Sam. 12:1-14) I bin rayt wan sam we sho se i rili sɔri fɔ wetin i du. (Sam 51, di ɛdin) Da sam de dɔn kɔrej bɔku sina dɛn ɛn mek dɛn ripɛnt. Wi nɔ gladi fɔ no se Jiova bin lɛk Devid ɛn i bin ɛp am fɔ ripɛnt?

10. Aw yu de fil we yu no se Jiova peshɛnt ɛn i rɛdi fɔ fɔgiv wi?

¹⁰ Jiova et ɔlkayn sin. (Sam 5:4, 5) Bɔt i no se wi ɔl na sina dɛn ɛn bikɔs i lɛk wi, i de ɛp wi fɔ fɛt agens sin. I de tray ɔltɛm fɔ ɛp ivin di wan dɛn we dɔn kɔmit siriɔs sin fɔ ripɛnt ɛn kam nia am. Dis de rili kɔrej wi! As wi de tink bɔt aw Jiova peshɛnt ɛn rɛdi fɔ fɔgiv, dat de ɛp wi fɔ mek-ɔp wi maynd fɔ kɔntinyu fɔ fetful to am ɛn nɔ westɛm fɔ ripɛnt we wi sin. Naw lɛ wi tɔk bɔt wetin Jizɔs bin tich in disaypul dɛn bɔt fɔ ripɛnt.

WETIN JIZƆS IN DISAYPUL DƐN BIN LAN BƆT FƆ RIPƐNT?

11-12. Wetin Jizɔs bin tich di wan dɛn we bin lisin to am bɔt di we aw in Papa de fɔgiv? (Luk di di frɔnt pej.)

¹¹ Na lɛk 2,000 ia dɔn pas so we di tɛm we di Mɛsaya fɔ kam bin rich. Lɛk aw wi bin dɔn tɔk na di atikul bifo dis wan, Jiova bin yuz Jɔn we De Baptayz Pipul Dɛn ɛn Jizɔs Krays fɔ tich pipul dɛn wetin mek i impɔtant fɔ ripɛnt.​—Mat. 3:1, 2; 4:17.

¹² We Jizɔs bin de na dis wɔl, i bin ɛp pipul dɛn fɔ no se in Papa rɛdi fɔ fɔgiv wi we wi sin. Wan fayn we we i du dat na we i pul di parebul bɔt di bɔypikin we bin lɔs. Da yɔŋman de bin disayd fɔ kɔmɔt na os fɔ sɔm tɛm ɛn du bad bad tin dɛn. Bɔt “we i si se i dɔn biev fulish we” i kam bak na os. Wetin di papa bin du? Jizɔs tɔk se  we di pikin “bin stil de fa, in papa si am ɛn sɔri fɔ am, so i rɔn go mit am, i ɔg am, ɛn kis am.” Di pikin bin want fɔ aks if i kin bi slev na in papa in os, bɔt in papa kɔl am “dis mi bɔypikin” ɛn mek i de pat pan di famili bak. Di papa tɔk se: “I bin dɔn lɔs, bɔt i dɔn kam bak.” (Lyuk 15:11-32) We Jizɔs bin de na ɛvin bifo i kam na dis wɔl, wan dawt nɔ de se i go dɔn si we in Papa de sho dis kayn sɔri-at to bɔku sina dɛn we bin ripɛnt. Dis parebul we Jizɔs pul de rili kɔrej wi ɛn i de sho se wi Papa Jiova rili gɛt sɔri-at!

13-14. Wetin apɔsul Pita bin lan bɔt fɔ ripɛnt? Wetin i bin tich ɔda pipul dɛn bɔt fɔ ripɛnt? (Luk bak di pikchɔ.)

¹³ Apɔsul Pita bin lan impɔtant lɛsin dɛn frɔm Jizɔs bɔt aw Jiova de fɔgiv di wan dɛn we dɔn ripɛnt. Pita bin mek bɔku mistek dɛn, bɔt Jizɔs bin rɛdi fɔ fɔgiv am. Fɔ ɛgzampul, afta Pita dinay tri tɛm se i nɔ sabi in Masta, i bin rili fil bad bikɔs ɔf wetin i du. (Mat. 26:34, 35, 69-75) Bɔt afta Jizɔs gɛt layf bak, i bin apia to Pita ɛn i go bi se na Pita in wangren bin de da tɛm de. (Lyuk 24:33, 34; 1 Kɔr. 15:3-5) Wan dawt nɔ de se na da tɛm de Jizɔs bin fɔgiv Pita ɛn mek i no se i dɔn fɔgiv am.​—Luk Mak 16:7 ɛn di stɔdi not fɔ “and Peter.”

¹⁴ Pita bin ɔndastand aw pɔsin de fil we i ripɛnt ɛn we dɛn fɔgiv am, so dat bin mek i ebul tich ɔda pipul dɛn bɔt dɛn tin dɛn ya. Afta sɔm tɛm, we dɛn bin gɛt di Pɛntikɔst fɛstival, Pita bin gi wan tɔk usay bɔku bɔku Ju pipul dɛn we nɔ bin biliv Jizɔs bin de ɛn i ɛksplen to dɛn se na dɛn kil di Mɛsaya. Bɔt i bin ɛnkɔrej dɛn bay we i tɛl dɛn se: “Una ripɛnt ɛn tɔn rawnd so dat una sin dɛn go wep kɔmɔt, ɛn Jiova insɛf sɛf go de mek una fil fayn.” (Akt 3:14, 15, 17, 19) So Pita bin  sho se we sina ripɛnt, i de tɔn rawnd ɔ chenj di rɔng we aw i bin de tink ɛn du tin, ɛn bigin fɔ du tin dɛn we de mek Gɔd gladi. Di apɔsul bin mek dɛn no se Jiova go wep dɛn sin dɛn kɔmɔt ɔ mek dɛn nɔ de igen. Ɛn afta lɔng tɛm dɔn pas, Pita bin mek di Kristian dɛn no se: “Jiova . . . de peshɛnt wit [dɛn] bikɔs i nɔ want fɔ dɔnawe wit ɛnibɔdi, i want mek ɔlman ripɛnt.” (2 Pit. 3:9) Dis na fayn op fɔ Kristian dɛn we dɔn kɔmit sin, ilɛk na siriɔs sin dɛn kɔmit!

15-16. (a) Aw apɔsul Pɔl bin lan bɔt fɔgivnɛs? (1 Timoti 1:12-15) (b) Wetin wi go tɔk bɔt na di nɛks atikul?

¹⁵ Pipul dɛn we dɔn du bad bad tin dɛn pas Sɔl we kɔmɔt na Tasɔs nɔ bɔku, so Sɔl bin rili nid fɔgivnɛs pas bɔku pipul dɛn. I bin de mek Krays in disaypul dɛn we i lɛk sɔfa bad bad wan. I go bi se bɔku Kristian dɛn bin de tink se i nɔ pɔsibul fɔ mek Sɔl chenj. Bɔt Jizɔs we bin dɔn gɛt layf bak nɔ bin de tink da we de. In ɛn in Papa bin si di fayn kwaliti dɛn we Sɔl gɛt. Jizɔs bin tɔk se: “A dɔn pik dis man fɔ tɔk bɔt mi.” (Akt 9:15) Jizɔs bin ivin pafɔm mirekul fɔ ɛp Sɔl fɔ ripɛnt. (Akt 7:58–8:3; 9:1-9, 17-20) Afta Sɔl bi Kristian, dɛn bin de kɔl am apɔsul Pɔl, ɛn bɔku tɛm i bin de tɔk bɔt aw i gladi fɔ di we aw Jiova ɛn Jizɔs sho am sɔri-at ɛn du gud to am. (Rid 1 Timoti 1:12-15.) Bikɔs Pɔl bin gladi fɔ wetin Jiova ɛn Jizɔs du fɔ am, i tɔk se: “Gɔd gud na in mek i de tray fɔ mek yu ripɛnt.”​—Rom. 2:4.

¹⁶ We Pɔl bin yɛri bɔt wan siriɔs prɔblɛm bɔt mami ɛn dadi biznɛs di we aw Gɔd nɔ want na di kɔngrigeshɔn na Kɔrint, wetin i bin du? Frɔm wetin i bin tɔk, wi lan bɔt aw Jiova de sho lɔv we i de kɔrɛkt in savant dɛn ɛn aw i de sho dɛn sɔri-at we dɛn ripɛnt. Wi go lan bɔt aw wi go falamakata am fɔ sho sɔri-at. Wi go tɔk mɔ bɔt wetin bin apin na Kɔrint insay di nɛks atikul.