STƆDI ATIKUL 31
SIŊ 12 Wi Gret Gɔd, Jiova
Wetin Jiova Dɔn Du fɔ Sev Mɔtalman Frɔm Sin ɛn Day?
“Gɔd rili lɛk di wɔl, na dat mek i gi in wangren Pikin we insɛf sɛf mek.”—JƆN 3:16.
MEN PƆYNT
Wi go si aw Jiova dɔn mek i pɔsibul fɔ mek wi gɛt tayt padi biznɛs wit am pan ɔl we wi na sina dɛn, ɛn aw i dɔn mek i pɔsibul fɔ lɛ wi pafɛkt ɛn gɛt chans fɔ de sote go.
1-2. (a) Wetin na sin? Aw wi go win sin? (Luk bak “Wɔd we Dɛn Ɛksplen.”) (b) Wetin wi go tɔk bɔt insay dis atikul ɛn di ɔda atikul dɛn we de insay dis Wachtawa? (Luk bak di not na pej 32 we gɛt di taytul, “To di Wan dɛn We De Rid dis Wachtawa.”)
YU GO lɛk fɔ no aw Jiova Gɔd rili lɛk yu? Yu go fɛn di ansa to dis kwɛstyɔn we yu lan bɔt wetin i dɔn du fɔ sev yu frɔm sin ɛn day. Sin a na bad bad ɛnimi ɛn na ɛnimi we yu wan nɔ go ebul fɔ win. Wi ɔl de sin ɛvride ɛn wi de day bikɔs ɔf sin. (Rom. 5:12) Bɔt, gud nyuz de. Wit Jiova in ɛp, wi go ebul fɔ fɛt agens sin ɛn win. Infakt, wi shɔ se wi go ebul win sin!
2 I dɔn pas 6,000 ia we Jiova Gɔd dɔn de ɛp mɔtalman dɛn fɔ fɛt agens sin. Wetin mek? Na bikɔs i lɛk wi. I dɔn de sho se i lɛk mɔtalman frɔm di tɛm we i mek dɛn, so i dɔn du bɔku tin dɛn fɔ ɛp dɛn fɔ fɛt agens sin. Gɔd no se sin de mek wi day ɛn i nɔ want mek wi day. I want mek wi de sote go. (Rom. 6:23) Na dat i want fɔ yu. Insay dis atikul, wi go tɔk bɔt tri kwɛstyɔn dɛn: (1) Aw Jiova bin gi op to mɔtalman dɛn we de sin? (2) Insay di tɛm we dɛn bin de rayt di Baybul, wetin mɔtalman dɛn we nɔ pafɛkt bin du fɔ mek Jiova gladi fɔ dɛn? (3) Wetin Jizɔs bin du fɔ sev mɔtalman frɔm sin ɛn day?
AW JIOVA BIN GI OP TO MƆTALMAN DƐN WE DE SIN?
3. Wetin bin mek wi fɔs mama ɛn papa sin? (Luk bak di pikchɔ.)
3 We Jiova bin mek di fɔs man ɛn uman, i bin want mek dɛn gladi. I bin gi dɛn fayn ples fɔ de, di gift we na mared, ɛn wok we dɛn go ɛnjɔy fɔ du. Dɛn bin fɔ bɔn pikin dɛn te dɛn ful-ɔp di wɔl ɛn mek di wan ol wɔl bi paradays jɔs lɛk di gadin we bin de na Idɛn. Na wan simpul lɔ nɔmɔ i bin gi dɛn ɛn i bin wɔn dɛn se if dɛn brok da lɔ de ɛn sin agens am bay wilful, dɛn sin go mek dɛn day. Wi no wetin bin apin. Wan spirit we nɔ lɛk Gɔd ɛn we nɔ lɛk dɛn bin tɛmt dɛn fɔ brok da lɔ de. Adam ɛn Iv bin du wetin da wikɛd spirit de we na Setan bin want. Bikɔs dɛn nɔ bin trɔst dɛn Papa we lɛk dɛn, dɛn bin sin. As wi ɔl no, wetin Jiova tɔk bin apin. Frɔm da de de, bad tin dɛn bigin fɔ apin to dɛn. Dɛn bigin fɔ ol, ɛn faynali dɛn day.—Jɛn. 1:28, 29; 2:8, 9, 16-18; 3:1-6, 17-19, 24; 5:5.
4. Wetin mek Jiova et sin? Wetin mek i de ɛp wi fɔ fɛt agens sin? (Romans 8:20, 21)
4 Jiova bin mek dɛn rayt bɔt da sɔri tin de we bin apin fɔ ɛp wi fɔ ɔndastand wan impɔtant tin. Dat na fɔ ɔndastand wetin mek i rili et sin. Sin de push wi fa frɔm wi Papa, ɛn i de mek wi day. (Ayz. 59:2) Na dat mek Setan we na rebɛl ɛn we mek ɔl dis prɔblɛm ya apin, lɛk sin, ɛn i de kɔntinyu fɔ tɛmt pipul dɛn fɔ sin. I go mɔs dɔn tink se bikɔs i bin mek Adam ɛn Iv sin agens Gɔd, i dɔn pwɛl wetin Gɔd want fɔ mɔtalman. Bɔt i nɔ ɔndastand aw Jiova rili lɛk mɔtalman. Gɔd nɔ ɛva chenj wetin i want fɔ Adam ɛn Iv dɛn pikin dɛn. I lɛk mɔtalman, so i nɔ westɛm fɔ gi dɛn op. (Rid Romans 8:20, 21.) Jiova bin no se sɔm pan dɛn pikin dɛn go disayd fɔ lɛk am ɛn dɛn go abop pan am fɔ ɛp dɛn fɔ fɛt agens sin. Ɛn as dɛn Papa ɛn di Wan we mek dɛn, i go mek we fɔ lɛ dɛn fri frɔm sin ɛn gɛt tayt padi biznɛs wit am. Wetin Jiova go du fɔ mek ɔl dat pɔsibul?
5. Ustɛm fɔs Jiova tɔk smɔl tin bɔt di op fɔ mɔtalman dɛn we nɔ pafɛkt? Ɛksplen. (Jɛnɛsis 3:15)
5 Rid Jɛnɛsis 3:15. Di fɔs tɛm we Jiova tɔk smɔl tin fɔ gi op to mɔtalman, na we i tɔk bɔt wetin go apin to Setan. Gɔd bin tɔk se dɛn go bɔn wan “pikin” we go bi di men pɔsin we go gi mɔtalman op. As tɛm de go, dis pikin go nyamanyama Setan ɛn sɔlv ɔl di prɔblɛm dɛn we Setan mek apin na Idɛn. (1 Jɔn 3:8) Bɔt da pikin de go sɔfa we i de du dat. Setan go wund am ɔ mek i day. Dat go mek Jiova in at rili pwɛl. Bɔt Jiova in at nɔ go pwɛl fɔ natin bikɔs bɔku bɔku pipul dɛn go sev frɔm sin ɛn day bikɔs ɔf di “pikin” in day.
WETIN MƆTALMAN DƐN WE NƆ PAFƐKT WE BIN DE INSAY DI TƐM WE DƐN BIN RAYT DI BAYBUL BIN DU FƆ MEK JIOVA GLADI?
6. Wetin fetful man dɛn lɛk Ebɛl ɛn Noa bin du fɔ mek dɛn gɛt tayt padi biznɛs wit Jiova
6 As tɛm de go, smɔl smɔl Jiova dɔn mek wi ɔndastand mɔ ɛn mɔ aw mɔtalman dɛn we nɔ pafɛkt go gɛt tayt padi biznɛs wit am. Ebɛl, we na Adam ɛn Iv dɛn sɛkɔn bɔypikin, na di fɔs pɔsin we bin put fet pan Jiova afta Adam ɛn Iv tɔn dɛn bak pan Jiova na di gadin we bin de na Idɛn. Bikɔs Ebɛl bin lɛk Jiova ɛn i want mek I gladi ɛn gɛt tayt padi biznɛs wit Jiova, i bin mek sakrifays to Am. Ebɛl na bin shɛpad, so i bin tek sɔm pan in yɔŋ ship dɛn, kil dɛn, ɛn sakrifays dɛn to Jiova. Wetin Jiova bin du? I bin “gladi fɔ Ebɛl ɛn fɔ in sakrifays.” (Jɛn. 4:4) Jiova bin sho se i gladi fɔ dɛn kayn sakrifays dɛn de we pipul dɛn lɛk Noa we bin lɛk am ɛn abop pan am bin de mek. (Jɛn. 8:20, 21) We Jiova bin de tek dɛn kayn sakrifays dɛn de, i bin sho se mɔtalman dɛn we nɔ pafɛkt ebul mek i gladi ɛn gɛt tayt padi biznɛs wit am. b
7. Wetin wi lan frɔm di rɛdi we Ebraam bin rɛdi fɔ sakrifays in yon bɔypikin? (Luk bak di pikchɔ.)
7 Jiova bin tɛl Ebraam we na man we bin gɛt strɔng fet fɔ du sɔntin we nɔ bin rili izi, dat na fɔ sakrifays in yon bɔypikin Ayzak. Wan dawt nɔ de se Ebraam go dɔn si dis wok as wok we go rili at fɔ du pas ɛni ɔda wok we i dɔn ɛva du. Bɔt pan ɔl dat, i bin rɛdi fɔ obe Jiova. Bɔt as Ebraam rɛdi fɔ kil in bɔypikin, Gɔd bin stɔp am. Bɔt stil, da ɛgzampul de tich ɔl mɔtalman dɛn we gɛt fet wan tru tin we rili impɔtant, Jiova go rɛdi fɔ gi in yon Bɔypikin we i rili lɛk as sakrifays. Jiova rili lɛk mɔtalman.—Jɛn. 22:1-18.
8. Wetin wi lan frɔm di animal sakrifays dɛn we di Lɔ bin se di Izrɛlayt dɛn fɔ mek? (Livitikɔs 4:27-29; 17:11)
8 We Jiova bin gi di Izrɛlayt dɛn di Lɔ, i bin tɛl dɛn fɔ de sakrifays animal dɛn so dat i go fɔgiv dɛn sin dɛn. (Rid Livitikɔs 4:27-29; 17:11.) Dɛn sakrifays dɛn de bin de sho se Gɔd go mek sakrifays we pas dɛn fa fawe, we go sev ɔl mɔtalman frɔm sin sote go. Gɔd bin yuz in prɔfɛt dɛn fɔ ɛksplen se di pikin we gɛt fɔ kam, we na Gɔd in spɛshal Bɔypikin, go gɛt fɔ sɔfa ɛn dɛn go kil am. Dɛn go kil am lɛk ship we dɛn sakrifays. (Ayz. 53:1-12) Imajin dis: Jiova go arenj fɔ mek in yon Bɔypikin we i rili lɛk sakrifays in layf fɔ sev mɔtalman ɛn ivin yu frɔm sin ɛn day!
WETIN JIZƆS BIN DU FƆ SEV MƆTALMAN?
9. Wetin Jɔn we De Baptayz Pipul Dɛn tɔk bɔt Jizɔs? (Ibruz 9:22; 10:1-4, 12)
9 Insay di ia 29 afta Krays, Gɔd in savant we na Jɔn we De Baptayz Pipul Dɛn bin si Jizɔs we kɔmɔt na Nazarɛt ɛn i bin tɔk se: “Luk Gɔd in Yɔŋ Ship we de pul sin na di wɔl!” (Jɔn 1:29) Dɛn wɔd dɛn ya we Gɔd bin yuz Jɔn fɔ tɔk sho se na Jizɔs na di pikin we Gɔd bin se go kam. Na in go sakrifays in layf fɔ wi. Faynali, Jiova in pikin bin kam na di wɔl fɔ sev mɔtalman frɔm sin sote go.—Rid Ibruz 9:22; 10:1-4, 12.
10. Aw Jizɔs bin sho se i “kam fɔ kɔl” sina dɛn?
10 Jizɔs bin pe atɛnshɔn mɔ pan pipul dɛn we dɛn at pwɛl bikɔs ɔf sin ɛn i bin kɔl dɛn fɔ bi in disaypul dɛn. I bin no se sin na di men rizin we mek mɔtalman de sɔfa. So i bin de ɛp man ɛn uman dɛn we bin de sɔfa bikɔs ɔf sin. Insay wan ɛgzampul i tɔk se: “Pipul dɛn we gɛt wɛlbɔdi nɔ nid dɔktɔ, bɔt di wan dɛn we sik nid dɔktɔ.” I kɔntinyu fɔ tɔk se: “A nɔ kam fɔ kɔl pipul dɛn we de du wetin rayt, a kam fɔ kɔl sina dɛn.” (Mat. 9:12, 13) Ɛn na dat Jizɔs bin du. I bin tɔk fayn to wan uman we bin was in fut wit in kray wata ɛn fɔgiv in sin dɛn. (Lyuk 7:37-50) I bin tich wan Samɛritan uman we i mit na wata wɛl impɔtant tin dɛn bɔt Gɔd pan ɔl we i bin no se di uman de liv fri layf. (Jɔn 4:7, 17-19, 25, 26) Pipul dɛn de day bikɔs ɔf sin. Bɔt Gɔd bin ivin gi Jizɔs pawa fɔ gi layf bak to man, uman, ɛn pikin dɛn we bin dɔn day.—Mat. 11:5.
11. Wetin mek sina dɛn bin lɛk Jizɔs?
11 Wi nɔ sɔprayz we ivin pipul dɛn we bin de du bad tin dɛn bin lɛk Jizɔs. I bin ɔndastand aw dɛn bin de fil ɛn sɔri fɔ dɛn. Dɛn bin de fil fayn we dɛn bin de go to am. (Lyuk 15:1, 2) Ɛn Jizɔs bin prez dɛn kayn pipul dɛn ya ɛn du sɔntin fɔ ɛp dɛn bikɔs dɛn bin sho se dɛn gɛt fet pan am. (Lyuk 19:1-10) Di tin dɛn we i bin de tɔk ɛn du bin ɛp pipul dɛn fɔ no se in Papa rili gɛt sɔri-at. (Jɔn 14:9) Di wɔd dɛn we i bin de tɔk ɛn di tin dɛn we i bin de du sho se in Papa we gɛt sɔri-at lɛk pipul dɛn ɛn i want fɔ ɛp dɛn fɔ win di fɛt agens sin. Jizɔs bin ɛp sina dɛn fɔ want fɔ chenj di we aw dɛn de liv dɛn layf ɛn fala am.—Lyuk 5:27, 28.
12. Wetin Jizɔs bin tɔk bɔt in day?
12 Jizɔs bin no wetin gɛt fɔ apin to am. I bin de tɛl in disaypul dɛn se pɔsin go ɛp pipul dɛn fɔ arɛst am ɛn dɛn go kil am pan tik. (Mat. 17:22; 20:18, 19) I bin no se in sakrifays go pul sin na di wɔl jɔs lɛk aw Jɔn ɛn di prɔfɛt dɛn bin dɔn tɔk. Jizɔs bin tɔk bak se afta i dɔn sakrifays in layf, i go “drɔ ɔlkayn pipul dɛn” to insɛf. (Jɔn 12:32) Mɔtalman dɛn we nɔ pafɛkt go mek Jiova gladi bay we dɛn gri se Jizɔs na dɛn Masta ɛn falamakata in ɛgzampul. If dɛn du dat, Gɔd go “pul [dɛn] pan sin.” (Rom. 6:14, 18, 22; Jɔn 8:32) So Jizɔs bin rɛdi ɛn i bin gɛt maynd fɔ day penful wan fɔ sev wi.—Jɔn 10:17, 18.
13. Aw Jizɔs bin day? Wetin in day tich wi bɔt Jiova Gɔd? (Luk bak di pikchɔ.)
13 Wan pan Jizɔs in tayt padi dɛn bin kɔmɔt biɛn am, dɔn in ɛnimi dɛn arɛst am, tɛl am bad wɔd dɛn, lay pan am, ɛn dɛn bit am bad bad wan. Di sojaman dɛn bin go wit am usay dɛn go kil am ɛn dɛn bin nel am pan tik. As i bin de bia da pen de fetful wan, Pɔsin bin de we bin fil am pas am. Dat na Jiova Gɔd. Jiova bin gɛt di pawa ɛn i bin ebul fɔ mek in Pikin lɛf fɔ sɔfa. Bɔt i nɔ bin du dat. So wetin mek Jiova alaw in Pikin fɔ sɔfa ɛn day pan ɔl we i rili lɛk am? Na bikɔs Jiova lɛk wi. Jizɔs bin tɔk se: “Gɔd rili lɛk di wɔl, na dat mek i gi in wangren Pikin we insɛf sɛf mek, so dat ɛnibɔdi we sho se i gɛt fet pan am Gɔd nɔ go dɔnawe wit am, bɔt i go gɛt layf we go de sote go.”—Jɔn 3:16.
Bikɔs Jiova bin alaw fɔ mek dɛn kil in Bɔypikin, dat bin mek i fil pen we wi nɔ go ebul fɔ imajin jɔs fɔ fri wi frɔm sin ɛn day (Luk na paregraf 13)
14. Wetin Jizɔs in sakrifays tich yu?
14 Jizɔs in sakrifays na di pruf we pas ɔl we de sho aw Jiova rili lɛk Adam ɛn Iv dɛn pikin dɛn. I de sho aw Jiova rili lɛk yu. I bin gi in bɛst ɛn bia di pen we pas ɛni ɔda pen fɔ sev yu frɔm sin ɛn day. (1 Jɔn 4:9, 10) Fɔ tru, i want fɔ ɛp wi ɔl fɔ fɛt agens sin ɛn win!
15. Wetin wi go du fɔ mek wi go bɛnifit frɔm Gɔd in gift we na di prayz we Jizɔs bin pe fɔ bay wi bak?
15 Gɔd in gift we na di prayz we in wangren Bɔypikin we insɛf sɛf mek bin pe fɔ bay wi bak dɔn mek i pɔsibul fɔ lɛ Gɔd fɔgiv wi sin dɛn. Bɔt fɔ mek Gɔd go fɔgiv wi, wi fɔ du sɔntin. Wetin wi fɔ du? Jɔn we De Baptayz Pipul Dɛn ɛn Jizɔs insɛf sɛf bin gi wi di ansa. Dɛn bin se: “Una ripɛnt, bikɔs di Kiŋdɔm we de na ɛvin dɔn nia.” (Mat. 3:1, 2; 4:17) So wi fɔ ripɛnt fɔ wi sin dɛn if wi rili want fɔ fɛt agens sin ɛn gɛt tayt padi biznɛs wit wi Papa we lɛk wi. Bɔt wetin i min fɔ ripɛnt ɛn aw dat de ɛp wi fɔ fɛt agens sin? Di nɛks atikul go ansa da kwɛstyɔn de.
SIŊ 18 Wi Gladi fɔ Jizɔs in Day Wan
a WƆD WE DƐN ƐKSPLEN: Insay di Baybul, di wɔd “sin” kin min we wi du sɔntin we Jiova se bad ɔ we wi nɔ du wetin i se rayt. Bɔt di wɔd “sin” kin min bak di pafɛkt we wi nɔ pafɛkt bikɔs ɔf di sin we wi gɛt frɔm Adam. Di rizin we mek wi ɔl de day na bikɔs ɔf di sin we wi gɛt frɔm Adam.
