STƆDI ATIKUL 41
Kɔntinyu fɔ Fetful We di “Big Big Trɔbul” Kam
“Ɔl udat de wɔship PAPA GƆD [“Jiova,” NW] una lɛk am ɛn du wetin i tɛl una fɔ du! Wans yu fethful to am i nɔ de kɔmɔt biɛn yu.”—SAM 31:23.
SIŊ 129 Wi Go Kɔntinyu fɔ Bia
WETIN WI GO LAN? *
1-2. (a) Wetin di lida dɛn na di neshɔn dɛn go anawns jisnɔ? (b) Us kwɛstyɔn dɛn wi go nid fɔ ansa?
IMAJIN se di lida dɛn na di neshɔn dɛn dɔn jɔs mek di anawnsmɛnt fɔ se “wi dɔn gɛt pis ɛn natin nɔ de fɔ fred!” Dɛn go de bost se di wɔl dɔn rili sef. Di neshɔn dɛn go want wi fɔ tink se dɛn ebul fɔ sɔlv ɔl di prɔblɛm dɛn na di wɔl. Bɔt dɛn nɔ go ebul fɔ stɔp di tin we go apin nɛks! Wetin mek? Frɔm wetin di Baybul bin dɔn tɔk, “na da tɛm de dɛn ɛnd go kam kwik kwik wan, . . . ɛn dɛn nɔ go ebul fɔ ɛskep atɔl.”—1 Tɛs. 5:3, NW.
2 Wi gɛt impɔtant kwɛstyɔn dɛn we wi nid fɔ ansa. Kwɛstyɔn dɛn lɛk: Wetin go apin di tɛm we di “big big trɔbul” go kam? Wetin Jiova go want wi fɔ du da tɛm de? Ɛn aw wi go rɛdi wisɛf naw fɔ de fetful wan di tɛm we da big big trɔbul go kam?—Mat. 24:21.
WETIN GO APIN WE DI “BIG BIG TRƆBUL” GO KAM?
3. Frɔm wetin de na Rɛvɛleshɔn 17:5, 15-18, aw Gɔd go dɔnawe wit “Babilɔn di Gret”?
3 Rid Rɛvɛleshɔn 17:5, 15-18. I nɔ go te igen dɛn go dɔnawe wit “Babilɔn di Gret”! Jɔs lɛk aw wi bin dɔn tɔk, di neshɔn dɛn nɔ go ebul fɔ stɔp di tin dɛn we go apin da tɛm de. Wetin mek? Na bikɔs “Gɔd go mek di kiŋ dɛn want fɔ du wetin in want.” Wetin Gɔd go want lɛ dɛn du? I go want lɛ dɛn dɔnawe wit ɔl dɛn lay lay rilijɔn dɛn, ivin dɛn lay lay chɔch dɛn. * Gɔd go put wetin i want na di “tɛn ɔn” in at. Ɛn di tɛn ɔn de pan di “rɛd wayl bif.” Di tɛn ɔn tinap fɔ ɔl di gɔvmɛnt dɛn we de sɔpɔt di “wayl bif” we na di United Nations. (Rɛv. 17:3, 11-13; 18:8) We dɛn gɔvmɛnt dɛn de atak lay lay rilijɔn, dat go bi di sayn fɔ sho se di big big trɔbul dɔn bigin. Dis na fiaful tin we go apin kwik kwik wan we go afɛkt ɔlman na di wɔl.
4. (a) Us rizin dɛn di neshɔn dɛn go gi fɔ ɛksplen wetin mek dɛn de atak lay lay rilijɔn dɛn? (b) Wetin di pipul dɛn we bin de na dɛn rilijɔn dɛn de go du?
4 Wi nɔ no us rizin di neshɔn dɛn go gi fɔ ɛksplen wetin mek dɛn de atak Babilɔn di Gret. Sɔntɛm dɛn go tɔk se di rilijɔn dɛn na di wɔl de mek pis nɔ de ɛn wetin dɛn de se ɛn du de ambɔg di gɔvmɛnt dɛn. Ɔ sɔntɛm dɛn go tɔk se rilijɔn dɔn gɛda bɔku bɔku mɔni ɛn prɔpati. (Rɛv. 18:3, 7) We di neshɔn dɛn go atak lay lay rilijɔn, sɔntɛm nɔto ɔl dɛn mɛmba dɛn dɛn go dɔnawe wit. Bifo dat, i go tan lɛk se di neshɔn dɛn go dɔnawe wit ɔganayzeshɔn dɛn we gɛt fɔ du wit rilijɔn dɛn. We dɛn go dɔnawe wit dɛn ɔganayzeshɔn dɛn de, ɔl dɛn mɛmba dɛn go kam fɔ no se di bigman dɛn pan rilijɔn dɔn fel dɛn ɛn dɛn go tray tranga wan nɔ fɔ gɛt natin fɔ du wit dɛn rilijɔn dɛn de igen.
5. Wetin Jiova dɔn prɔmis bɔt di big big trɔbul? Wetin mek?
5 Di Baybul nɔ tɛl wi aw lɔng dɛn go tek fɔ dɔnawe wit Babilɔn di Gret, bɔt wi no se i nɔ go tek lɔng tɛm. (Rɛv. 18:10, 21) Jiova dɔn prɔmis se i go “ridyus di tɛm” fɔ da trɔbul so dat “di wan dɛn we i dɔn pik” ɛn di tru rilijɔn go sev. (Mak 13:19, 20, NW) Bɔt wetin Jiova go want wi fɔ du di tɛm we di big big trɔbul go stat te to di tɛm we Amagɛdɔn go kam?
KƆNTINYU FƆ DE NA DI TRU RILIJƆN
6. Wetin mek i nɔ jɔs du fɔ pul an pan lay lay rilijɔn?
6 Jɔs lɛk aw wi bin dɔn tɔk na di atikul bifo dis, Jiova nɔ want di wan dɛn we de wɔship am fɔ gɛt ɛnitin fɔ du wit Babilɔn di Gret. Bɔt i nɔ jɔs du fɔ pul an pan lay lay rilijɔn. Wi fɔ mekɔp wi maynd fɔ kɔntinyu fɔ de na di tru rilijɔn usay wi go sav Jiova di rayt we. Lɛ wi tɔk bɔt tu we dɛn aw wi kin du dis.
Lɛ wi nɔ ɛva stɔp fɔ de mit togɛda, ivin if tin nɔ izi fɔ wi (Luk na paregraf 7) *
7. (a) Aw wi go kɔntinyu fɔ tinap tranga wan fɔ du wetin rayt na Jiova in yay? (b) Wetin mek Di Ibru Pipul Dɛn 10:24, 25 (NW) tɔk se wi fɔ de mit togɛda? Wetin mek na naw dat rili impɔtant?
7 Fɔs, wi fɔ kɔntinyu fɔ tinap tranga wan fɔ du wetin rayt na Jiova in yay. Wi nɔ fɔ ɛva gri wit di we aw di pipul dɛn na di wɔl de biev. Fɔ ɛgzampul, wi nɔ de gri wit ɛnikayn mami ɛn dadi biznɛs di we aw Gɔd nɔ want, lɛk we man ɛn man ɔ uman ɛn uman de mared, ɛn ɔda we dɛn aw omo dɛn de biev. (Mat. 19:4, 5; Rom 1:26, 27) Sɛkɔn, wi fɔ kɔntinyu fɔ wɔship wit wi kɔmpin Kristian dɛn. Wi go du dis ɛnisay we wi de ilɛksɛf na Kiŋdɔm Ɔl ɔ, if nid de, na wan pan wi brɔda ɔ sista in os ɔ ivin sikrit wan. Ilɛk wetin apin, wi nɔ go ɛva stɔp fɔ atɛnd wi mitin dɛn. Infakt wi nid fɔ de mit togɛda “mɔ we [wi] de si se di de de kam nia.”—Rid Di Ibru Pipul Dɛn 10:24, 25, NW.
8. Aw sɔntɛm wi mɛsej go chenj tumara bambay?
8 Sɔntɛm we di big big trɔbul go bigin, di mɛsej we wi de prich go chenj. Rayt naw wi de prich di gud nyuz bɔt di Kiŋdɔm ɛn wi de tray fɔ mek disaypul dɛn. Bɔt da tɛm de, wi go de prich mɛsej we de sho se wi gɛt maynd. Di Baybul kɔmpia di mɛsej to big big ays blɔk dɛn. (Rɛv. 16:21) Wi go de prich se i nɔ go te igen Gɔd de kam dɔnawe wit Setan in wɔl kpatakpata. We di tɛm rich, wi go no us mɛsej wi gɛt fɔ de prich ɛn aw wi go prich am. Fɔ se wi go yuz di sem we dɛn aw wi bin dɔn de du di prichin wok fɔ lɔng tɛm fɔ prich ɛn tich? Ɔ wi go yuz ɔda we dɛn? Wi nɔ no. Bɔt ilɛk us we wi gɛt fɔ prich, i tan lɛk se wi go gɛt di chans fɔ gɛt maynd fɔ tɔk bɔt Jiova in jɔjmɛnt mɛsej.—Izi. 2:3-5.
9. Wetin di neshɔn dɛn go du we dɛn yɛri wi mɛsej? Wetin wi shɔ bɔt?
9 I go mɔs bi se di mɛsej we wi go prich, go mek di neshɔn dɛn tray fɔ fos wi nɔ fɔ prich igen. Jɔs lɛk aw wi de abop pan Jiova fɔ sɔpɔt wi fɔ du di prichin wok rayt naw, na so wi go nid fɔ abop pan am fɔ sɔpɔt wi da tɛm de. Wi shɔ se wi Gɔd go gi wi di pawa fɔ du wetin i want.—Mayk. 3:8.
RƐDI YUSƐF FƆ DI TƐM WE DƐN GO ATAK GƆD IN PIPUL DƐN
10. Frɔm wetin de na Lyuk 21:25-28, aw pipul dɛn go fil bɔt di tin dɛn we go apin di tɛm we da big big trɔbul go kam?
10 Rid Lyuk 21:25-28. We da big big trɔbul go kam, pipul dɛn go sɔprayz fɔ si se ɔl di tin dɛn we dɛn bin tink se go de sote go dɔn bigin fɔ fel dɛn. Dɛn go “fil am insay dɛn bon” ɛn fred se dɛn go kil dɛn insay di wɔs tɛm na mɔtalman istri. (Zɛf. 1:14, 15) Da tɛm de, layf go rili tranga fɔ ivin Jiova in pipul dɛn. Bikɔs wi nɔ tan lɛk di pipul dɛn na di wɔl, tin nɔ go rili izi fɔ wi. Sɔntɛm, wi nɔ go gɛt sɔm tin dɛn we wi nid.
11. (a) Wetin mek dɛn go pe atɛnshɔn mɔ pan Jiova Witnɛs dɛn? (b) Wetin mek wi nɔ nid fɔ fred di big big trɔbul?
11 Tɛm go rich we di pipul dɛn we dɛn yon rilijɔn nɔ go de igen go vɛks bad bad wan bikɔs dɛn nɔ dɔnawe wit Jiova Witnɛs dɛn yon rilijɔn. Wi shɔ se sɔntɛm dɛn go yuz Intanɛt sayt dɛn we de mek ɔda pipul dɛn no mɔ bɔt pɔsin fɔ mek ɔda pipul dɛn no se dɛn rili vɛks. Di neshɔn dɛn ɛn dɛn rula, Setan, go et wi bikɔs na wi yon rilijɔn nɔmɔ dɛn nɔ go dɔnawe wit. Dɛn nɔ go ebul fɔ du wetin dɛn want, dat na fɔ dɔnawe wit ɔl di rilijɔn dɛn na di wɔl. So na pan wi dɛn ɔl go pe atɛnshɔn. Na da tɛm de di neshɔn dɛn go bi Gɔg we de na Megɔg. * Dɛn go kam togɛda ɛn atak Jiova in pipul dɛn wit ɔl dɛn pawa. (Izi. 38:2, 14-16) Wi go stat fɔ wɔri bɔt wetin gɛt fɔ apin di tɛm we da big big trɔbul go kam, mɔ bikɔs wi nɔ no ɔl wetin gɛt fɔ apin. Bɔt wi biliv tranga wan se: Wi nɔ nid fɔ fred di big big trɔbul. Jiova go tɛl wi wetin-ɛn-wetin wi fɔ du we go sev wi layf. (Sam 34:19) Wi go ebul fɔ “es [wi] ed ɛn luk ɔp to Gɔd” bikɔs wi no se “i nɔ go te igen, Gɔd go sev [wi].” *
12. Aw “di slev we fetful ɛn gɛt sɛns” dɔn de ɛp wi fɔ rɛdi wisɛf fɔ di tin dɛn we gɛt fɔ apin tumara bambay?
12 “Di slev we fetful ɛn gɛt sɛns” dɔn de pripia wi fɔ de fetful wan insay di tɛm we di big big trɔbul go kam. (Mat. 24:45, NW) Dɛn dɔn de du dis bɔku we dɛn, bɔt wan ɛgzampul na wi kɔnvɛnshɔn program dɛn frɔm 2016 to 2018. Di tɔk dɛn we dɛn bin gi insay dɛn kɔnvɛnshɔn dɛn ya bin ɛnkɔrej wi fɔ gɛt kwaliti dɛn we wi go nid as Jiova in de de kam nia. Lɛ wi tɔk smɔl bɔt dɛn kwaliti dɛn ya.
KƆNTINYU FƆ DE BIƐN JIOVA, FƆ DE BIA, ƐN GƐT MAYND
Rɛdi yusɛf naw fɔ sev di tɛm we di “big big trɔbul” go kam (Luk na paregraf 13 to 16) *
13. Aw wi go kɔntinyu fɔ du tin dɛn we go mek wi de biɛn Jiova? Wetin mek na naw wi fɔ du dat?
13 De Biɛn Jiova: Di tim fɔ di 2016 kɔnvɛnshɔn program na bin “Kɔntinyu fɔ De Biɛn Jiova!” Di tɔk dɛn we dɛn gi na dis kɔnvɛnshɔn bin tich wi se if wi gɛt tayt padi biznɛs wit Jiova, wi go kɔntinyu fɔ de biɛn am. Dɛn bin mɛmba wi se wi go kam nia Jiova bay we wi de pre wit ɔl wi at ɛn stɔdi Gɔd in Wɔd gud gud wan. We wi de du dat, i de ɛp wi fɔ gɛt di trɛnk fɔ tinap tranga wan ilɛk tin nɔ izi fɔ wi. As di tɛm fɔ lɛ Setan in wɔl dɔn de kam nia, wi no se bɔku bɔku prɔblɛm dɛn go mit wi we go tɛst wi fet pan Gɔd ɛn in Kiŋdɔm. Pipul dɛn go de provok wi mɔ ɛn mɔ. (2 Pit. 3:3, 4) Wan men rizin we go mek dis go apin na bikɔs wi nɔ de sɔpɔt ɛni tin we pipul dɛn de du na Setan in wɔl. Wi fɔ kɔntinyu fɔ du tin dɛn we go mek wi de biɛn Jiova naw, so dat wi go kɔntinyu fɔ de biɛn am insay di tɛm we di big big trɔbul go kam.
14. (a) Aw tin go chenj fɔ di brɔda dɛn we de tek di lid na dis wɔl? (b) Wetin mek wi fɔ kɔntinyu fɔ de biɛn Jiova da tɛm de?
14 Insay di tɛm we di big big trɔbul go kam, tin go chenj fɔ di brɔda dɛn we go tek di lid na dis wɔl. Tɛm go rich we ɔl di anɔyntɛd wan dɛn we go stil de na dis wɔl go go na ɛvin fɔ jɔyn-an fɔ fɛt Jiova in wɔ, Amagɛdɔn. (Mat. 24:31; Rɛv. 2:26, 27) Dis min se wi nɔ go gɛt di Gɔvnin Bɔdi igen wit wi na dis wɔl. Bɔt di bɔku bɔku pipul dɛn go kɔntinyu fɔ de ɔganayz wan. Brɔda dɛn we kwalifay we de na di ɔda ship go de tek di lid. Wi go nid fɔ sho se wi de biɛn Jiova bay we wi go de sɔpɔt dɛn brɔda dɛn ya ɛn fala di advays we dɛn go gɛt frɔm Gɔd. Wi fɔ fala wetin dɛn go tɛl wi if wi want fɔ sev!
15. Wetin wi go du fɔ ɛp wi fɔ kɔntinyu fɔ bia? Wetin mek i impɔtant fɔ lɛ wi du dat naw?
15 Fɔ De Bia: Di tim fɔ di 2017 kɔnvɛnshɔn program na bin “Nɔ Giv-Ɔp!” Di tɔk dɛn we dɛn bin gi bin ɛp wi fɔ kɔntinyu fɔ bia ivin we prɔblɛm dɛn de mit wi. Wi bin lan se nɔto we tin fayn nɔmɔ wi fɔ bia. Wi kin ebul fɔ bia bay we wi de abop pan Jiova. (Rom 12:12) Wi nɔ fɔ ɛva fɔgɛt wetin Jizɔs bin prɔmis we i se: “Gɔd go sev ɛnibɔdi we bia sote i day [“di ɛnd,” NW].” (Mat. 24:13) Dis prɔmis ɛp wi fɔ no se wi fɔ kɔntinyu fɔ de fetful wan ilɛk uskayn prɔblɛm de mit wi. If wi de bia ɛni prɔblɛm we de mit wi rayt naw, wi go gɛt trɛnk fɔ tinap tranga wan bifo di big big trɔbul go bigin.
16. Wetin de mek wi gɛt maynd? Wetin wi fɔ du fɔ lɛ wi gɛt maynd rayt naw?
16 Gɛt Maynd: Di tim fɔ di 2018 kɔnvɛnshɔn program na bin “Sho se Yu Gɛt Maynd!” Di tɔk dɛn we dɛn bin gi bin mɛmba wi se nɔto bikɔs wi sabi du sɔm tin dɛn mek wi gɛt maynd. Jɔs lɛk aw wi nid fɔ abop pan Jiova fɔ lɛ wi go ebul fɔ bia, na so wi fɔ abop pan Jiova fɔ lɛ wi gɛt maynd. Aw wi go lan fɔ abop pan Jiova mɔ ɛn mɔ? Na bay we wi de rid di Baybul ɛvride ɛn tink gud gud wan bɔt aw Jiova bin dɔn sev in pipul dɛn trade. (Sam 68:20; 2 Pit. 2:9, NW) We di neshɔn dɛn go atak wi insay di tɛm we di big big trɔbul go kam, wi go nid fɔ gɛt maynd ɛn abop pan Jiova pas aw wi bin dɔn de du. (Sam 112:7, 8; Ibru 13:6) If wi abop pan Jiova rayt naw, wi go gɛt di maynd we wi nid di tɛm we Gɔg go atak wi. *
WI DE WET FƆ DI TƐM WE JIOVA GO SEV WI
I nɔ go te igen Jizɔs ɛn in amiman dɛn na ɛvin go kam fɔ fɛt Jiova in wɔ, Amagɛdɔn, fɔ dɔnawe wit Gɔd in ɛnimi dɛn! (Luk na paregraf 17)
17. Wetin mek wi nɔ de fred Amagɛdɔn? (Luk di pikchɔ na di frɔnt pej.)
17 Jɔs lɛk aw wi bin dɔn tɔk na di atikul bifo dis, bɔku pan wi dɔn spɛn ɔl wi layf insay dis las dez. Bɔt wi op bak fɔ sev di tɛm we da big big trɔbul go kam. Jiova in wɔ, Amagɛdɔn, na in go dɔnawe wit ɔl di tin dɛn we de na Setan in wɔl. Bɔt wi nɔ gɛt natin fɔ fred. Wetin mek? Na bikɔs na Jiova in wɔ ɛn wi nɔ gɛt fɔ fɛt. (Prɔv. 1:33; Izi. 38:18-20; Zɛk. 14:3) We Jiova go gi di kɔmand, Jizɔs Krays go lid Gɔd in ami fɔ fɛt. In ɛn di anɔyntɛd wan dɛn we bin dɔn gɛt layf bak ɛn bɔku bɔku enjɛl dɛn go fɛt dis wɔ. Dɛn go fɛt Setan, in dɛbul dɛn, ɛn ɔl di wan dɛn we de sɔpɔt dɛn na dis wɔl.—Dan. 12:1; Rɛv. 6:2; 17:14.
18. (a) Us prɔmis Jiova dɔn mek? (b) Aw Rɛvɛleshɔn 7:9, 13-17 ɛp wi fɔ gɛt kɔnfidɛns bɔt di op we wi gɛt fɔ tumara bambay?
18 Jiova dɔn prɔmis se: “Nɔn wɛpɔn we dɛn mek fɔ kil yu, nɔ go wok.” (Ayz. 54:17) “Bɔku bɔku pipul dɛn” we de wɔship Jiova fetful wan go “tinap traŋa wɛn da big trɔbul” go fɔdɔm ɛn dɛn go sev! Dɛn go kɔntinyu fɔ sav am fetful wan. (Rid Rɛvɛleshɔn 7:9, 13-17.) Di Baybul gi wi bɔku rizin dɛn fɔ mek wi biliv tranga wan se wi go sev di tɛm we da big big trɔbul go kam! Wi no se “wans yu fethful” Jiova “nɔ de kɔmɔt biɛn yu.” (Sam 31:23) Ɔl di wan dɛn we lɛk Jiova ɛn we de prez am go gladi fɔ si se badnem nɔ de pan Jiova in nem igen.—Izi. 38:23.
19. Us wɔndaful blɛsin dɛn wi go ɛnjɔy tumara bambay?
19 Tink bɔt wetin Sɛkɛn Lɛta to Timoti 3:2-5 (NW) go se if i de tɔk bɔt aw di pipul dɛn na di nyu wɔl go de biev bikɔs Setan nɔ de fɔ ambɔg dɛn. (Luk di bɔks we gɛt di taytul “ Di We Aw Pipul dɛn Go Tan Da Tɛm De.”) Brɔda Jɔj Gangas, * we bin de sav as Gɔvnin Bɔdi mɛmba bin ɛksplen am dis we: “Di wɔl go bi wɔndaful say fɔ de bikɔs ɔlman go de wɔship Jiova! I nɔ go te igen, yu go gɛt di chans fɔ de na di nyu wɔl. Yu go de sote go jɔs lɛk aw Jiova de sote go.” Dat na wɔndaful op fɔ wi ɔl!
SIŊ 122 Tinap Tranga Wan Fɔ Sav Gɔd!
^ par. 5 Wi no se i nɔ go te igen “big big trɔbul” go kam pan mɔtalman. Wetin dat go min fɔ wi? Wetin Jiova go want wi fɔ du da tɛm de? Us kwaliti dɛn wi nid fɔ gɛt so dat wi go kɔntinyu fɔ de fetful wan di tɛm we da big big trɔbul go kam? Wi go lan bɔt dɛn tin dɛn ya insay dis atikul.
^ par. 3 WƆD WE DƐN ƐKSPLEN: Lay lay chɔch dɛn na rilijɔn dɛn we se dɛn na Kristian dɛn bɔt dɛn nɔ de tich pipul dɛn fɔ wɔship Jiova di we aw i want.
^ par. 11 WƆD WE DƐN ƐKSPLEN: Di wɔd Gɔg we de na Megɔg (we dɛn kin kɔl Gɔg) min di neshɔn dɛn we go kam togɛda fɔ atak Jiova in pipul dɛn insay di tɛm we di big big trɔbul go kam.
^ par. 11 Fɔ no mɔ bɔt ɔl di tin dɛn we go apin te to di tɛm we Amagɛdɔn go kam, luk chapta 21 na di buk we gɛt di taytul God’s Kingdom Rules! Dɔn fɔ no mɔ bɔt di atak we Gɔg we de na Megɔg go atak ɛn aw Jiova go fɛt fɔ in pipul dɛn insay Amagɛdɔn, luk di Julay 1 2015, Wachtawa, pej 14 to pej 19 (I de na Inglish).
^ par. 16 Di 2019 kɔnvɛnshɔn program we gɛt di tim “Lɔv Nɔ De Ɛva Fel!” de ɛp wi fɔ biliv tranga wan se Jiova go kɔntinyu fɔ protɛkt wi wit lɔv sote go.—1 Kɔr. 13:8, NW.
^ par. 19 Luk di atikul we gɛt di taytul “His Deeds Follow Him” na di Disɛmba 1, 1994, Wachtawa.
