PƆSIN we de stɔdi di wɛda ɛn sho wetin go apin de tek tɛm wach wan pikchɔ we de sho if ren, sno, big big briz, ɔ ren we fiba ays blɔk de kam. I si se big big briz de kam kwik kwik wan na wan eria usay bɔku pipul dɛn de. Bikɔs i want mek di pipul dɛn sev, i de du ɔl wetin i ebul fɔ wɔn dɛn bifo tɛm.

Semweso, Jiova de wɔn pipul dɛn rayt naw na di wɔl bɔt wan “tinada” we pas ɛni ɔda wan we dɛn bin dɔn tɔk bɔt na wɛda ripɔt. Aw i de du dat? Ɛn wetin mek wi shɔ se i de gi pipul dɛn bɔku tɛm fɔ lɛ dɛn du sɔntin bɔt di wɔnin we i de gi dɛn? Fɔ ansa dɛn kwɛstyɔn dɛn ya, lɛ wi fɔs tɔk bɔt sɔm pan di wɔnin dɛn we Jiova bin de gi trade.

Insay di tɛm we dɛn bin de rayt di Baybul, Jiova bin de wɔn pipul dɛn bɔt difrɛn “tinada” dɛn ɔ di jɔjmɛnt we i go briŋ pan di wan dɛn we nɔ bin de gri fɔ obe in lɔ dɛn. (Prɔv. 10:​25; Jɛr. 30:​23) Fɔ ɛni jɔjmɛnt we Jiova bin de briŋ, i bin de wɔn di pipul dɛn we nɔ bin de obe am gud gud wan bifo tɛm ɛn i bin de tɛl dɛn wetin dɛn nid fɔ du fɔ obe am. (2 Kiŋ 17:​12-15; Nɛi. 9:​29, 30) Fɔ ɛp di pipul dɛn fɔ du di rayt tin, bɔku tɛm i bin de yuz in fetful savant dɛn na di wɔl fɔ tɔk bɔt in jɔjmɛnt ɛn fɔ ɛp di pipul dɛn fɔ no se dɛn nid fɔ chenj wantɛm wantɛm.—Emɔs 3:​7.

Noa na wan pan di pipul dɛn we Gɔd bin yuz fɔ tɔk bɔt in jɔjmɛnt mɛsej. Fɔ lɔng tɛm, i bin gɛt maynd fɔ wɔn di pipul dɛn we bin lɛk fɛt fɛt ɛn de du mami ɛn dadi biznɛs di we aw Gɔd nɔ want bɔt di Ebi Ebi Ren we gɛt fɔ kam ɔlsay na di wɔl. (Jɛn. 6:​9-13, 17) I bin tɛl dɛn bak wetin dɛn nid fɔ du fɔ lɛ dɛn go sev we di Ebi Ebi Ren go kam. Noa bin prich te dɛn sabi am as man we de “prich bɔt wetin rayt.”—2 Pit. 2:​5, NW.

Pan ɔl we Noa bin de du ɔl wetin i ebul fɔ prich, di pipul dɛn we bin de na di wɔl bifo di Ebi Ebi Ren kam nɔ bin gri fɔ lisin to di mɛsej we Gɔd bin gi am. Dɛn bin sho se dɛn nɔ gɛt wan fet. So dɛn bin day we di Ebi Ebi Ren bin “kam kɔba ɛn kil dɛn ɔl.” (Mat. 24:​39; Ibru 11:​7) We dɛn go de day, dɛn nɔ go tɔk se Gɔd nɔ bin wɔn dɛn.

Ɔda tɛm dɛn, Jiova bin wɔn pipul dɛn fɔ shɔt tɛm bifo i briŋ di “tinada” we i go yuz fɔ jɔj dɛn. Bɔt pan ɔl dat, i de mek shɔ se i gi di pipul dɛn tɛm fɔ chenj. Fɔ ɛgzampul, i bin wɔn di pipul dɛn na Ijipt bifo tɛm bɔt di tɛn bad bad tin dɛn we gɛt fɔ apin. Wan ɛgzampul na we Jiova bin sɛn Mozis ɛn Erɔn fɔ go wɔn Fɛro ɛn in pipul dɛn bɔt di nɔmba sɛvin bad bad tin we go apin, dat na ren we fiba ays blɔk. Bikɔs di ren we fiba ays blɔk go kam di nɛks de, yu tink se Gɔd bin gi dɛn tɛm fɔ fɛn ples fɔ ayd ɛn sev di tɛm we di ren we fiba ays blɔk go kam? Di Baybul tɔk se: “Sɔm pan di kiŋ in ɔfisa dɛn biliv wetin PAPA GƆD [“Jiova,” NW] se, sɛn go pul dɛn animal dɛn ɛn dɛn slev dɛn kɔmɔt na dɛn fam ɛn kɛr dɛn go na sef ples wantɛm. Bɔt di ɔda wan dɛn jɛs nɔ bisin bɔt wetin PAPA GƆD [“Jiova,” NW] se so dɛn lɛf dɛn animal dɛn ɛn dɛn slev dɛn na dɛn fam.” (Ɛks. 9:​18-21) Fɔ tru, Jiova bin gi dɛn tɛm fɔ du sɔntin, na dat mek di wan dɛn we lisin nɔ bin sɔfa lɛk di ɔda wan dɛn.

Jiova bin wɔn bak Fɛro ɛn in pipul dɛn bifo di nɔmba tɛn bad bad tin bin apin. Bɔt dɛn sho se dɛn nɔ gɛt sɛns bay we dɛn nɔ gri fɔ lisin to di wɔnin. (Ɛks. 4:​22, 23) Dat bin mek dɛn fɔs bɔypikin dɛn day. I rili sɔri! (Ɛks. 11:​4-10; 12:​29) Fɔ se dɛn fɔ bin ebul lisin to di wɔnin bifo tɛm? Yɛs! Mozis bin wɔn di  Izrɛlayt dɛn wantɛm wantɛm bɔt di nɔmba tɛn bad bad tin we gɛt fɔ apin ɛn i bin tɛl dɛn bak wetin dɛn go du fɔ sev dɛn famili. (Ɛks. 12:​21-28) Ɔmɔs pipul dɛn bin lisin to di wɔnin we Mozis bin gi? Akɔdin to sɔm ripɔt, dɛn se na tri milyɔn pipul dɛn, we na bin Izrɛlayt dɛn ɛn “bɔku pipul dɛn” we nɔto bin Izrɛlayt dɛn ɛn Ijipshian dɛn bin sev ɛn kɔmɔt na Ijipt we Gɔd bin briŋ jɔjmɛnt pan di Ijipshian dɛn.—Ɛks. 12:​38.

Dɛn ɛgzampul dɛn ya de sho se ɔltɛm Jiova de mek shɔ se i gi bɔku tɛm to pipul dɛn fɔ lisin to in wɔnin dɛn. (Dit. 32:​4) Wetin mek Gɔd bin de du dat? Di apɔsul Pita bin tɔk se Jiova “nɔ want fɔ dɔnawe wit ɛnibɔdi, i want mek ɔlman ripɛnt.” (2 Pit. 3:​9, NW) Fɔ tru, Gɔd bisin bɔt pipul dɛn. I want dɛn fɔ chenj ɛn du wetin i want bifo in jɔjmɛnt go kam.—Ayz. 48:​17, 18; Rom 2:​4.

Tide bak, ɔlman fɔ lisin to wan impɔtant mɛsej we Gɔd in pipul dɛn de gi ɔlsay na di wɔl. We Jizɔs bin de na dis wɔl, i bin tɔk se dɛn go dɔnawe wit dis wikɛd wɔl insay di ‘big big trɔbul’ we gɛt fɔ kam. (Mat. 24:​21) We i bin de tɔk bɔt dis jɔjmɛnt we gɛt fɔ kam, i bin tɛl in disaypul dɛn bɔt tin dɛn we go apin we go sho se di tɛm dɔn de nia. Jizɔs bin tɔk bɔt impɔtant tin dɛn we wi de si de apin ɔlsay na di wɔl.—Mat. 24:​3-12; Lyuk 21:​10-13.

Frɔm wetin de na da prɔfɛsi de, Jiova de tɛl ɔlman fɔ disayd fɔ sav am ɛn obe am. I want mek di pipul dɛn we de obe am ɛnjɔy bɛtɛ layf naw ɛn gɛt blɛsin tumara bambay na di nyu wɔl. (2 Pit. 3:​13) Jiova want fɔ ɛp pipul dɛn fɔ gɛt fet pan di tin dɛn we i dɔn prɔmis. I de ɛp dɛn fɔ du dat bay we i gi dɛn mɛsej we go sev dɛn layf. Dis mɛsej na di “gud nyuz” bɔt in Kiŋdɔm we Jizɔs bin dɔn tɔk se dɛn go prich “na di wan ol wɔl so dat ɔl di neshɔn dɛn go gɛt chans fɔ yɛri.” (Mat. 24:​14, NW) Gɔd dɔn ɔganayz in pipul dɛn we de wɔship am di rayt we fɔ tɔk bɔt in mɛsej ɔ fɔ prich bɔt am na lɛk 240 kɔntri dɛn. Jiova want mek bɔku pipul dɛn lisin to in wɔnin ɛn sev di tɛm we di “tinada” we i go yuz fɔ jɔj di rayt we go kam.—Zɛf. 1:​14, 15; 2:​2, 3.

Di impɔtant tin we wi fɔ tink bɔt, nɔto if Jiova de gi tɛm ɛn chans to pipul dɛn fɔ obe in wɔnin dɛn. Di tin dɛn we wi dɔn tɔk bɔt sho se i de du dat ɔltɛm. Bifo dat, di impɔtant kwɛstyɔn na: Pipul dɛn go obe Gɔd in wɔnin we dɛn stil gɛt tɛm fɔ du dat? So lɛ wi we na Gɔd in mɛsenja dɛn kɔntinyu fɔ ɛp bɔku bɔku pipul dɛn fɔ sev di tɛm we dis wɔl go dɔn.