1. Wetin Jiova go du so dat i go mek wetin i want bi?

JIOVA kin bi ɛnitin fɔ lɛ wetin i want bi. Fɔ ɛgzampul, Jiova dɔn bi Ticha, Pɔsin we de ɛnkɔrej, ɛn Pɔsin we de prich. Dis na sɔm pan di tin dɛn we Jiova dɔn bi fɔ du wetin i want. (Ayz. 48:​17; 2 Kɔr. 7:​6; Gal. 3:​8) Bɔt bɔku tɛm, i de yuz mɔtalman fɔ du wetin i want. (Mat. 24:​14; 28:​19, 20; 2 Kɔr. 1:​3, 4) Jiova kin gi ɛni wan pan wi di sɛns ɛn trɛnk we wi nid so dat wi go bi di kayn pɔsin we i want wi fɔ bi fɔ du wetin i want. Ɔl dis de pat pan wetin Jiova in nem min jɔs lɛk aw sɔm masta sabi bukman dɛn bin tɔk.

2. (a) Wetin mek sɔntɛnde wi kin dawt if Jiova de yuz wi? (b) Wetin wi go tɔk bɔt insay dis atikul?

² Wi ɔl want fɔ mek Jiova yuz wi fɔ du wetin i want, bɔt sɔntɛm sɔm go de dawt if Jiova go yuz dɛn. Wetin mek? Na bikɔs dɛn de fil se dɛn nɔ ebul fɔ du bɔku tin we dɛn want fɔ du bikɔs dɛn dɔn ol, dɛn gɛt difrɛn tin dɛn we de apin to dɛn, ɔ bikɔs nɔto ɔltin dɛn sabi du. Ɔda wan dɛn de fil se dɛn satisfay wit wetin dɛn de du ɛn dɛn nɔ nid fɔ du mɔ pas dat. Insay dis atikul, wi go tɔk bɔt aw Jiova de gi ɛni wan pan wi di tin dɛn we wi nid fɔ du wetin i want. Dɔn, wi go tɔk bɔt sɔm ɛgzampul dɛn na di Baybul we de sho wi aw Jiova bin de gi in savant dɛn di trɛnk we dɛn nid fɔ du wetin i want ilɛksɛf dɛn na man ɔ uman. Wi go tɔk bak bɔt aw wi go alaw Jiova fɔ yuz wi.

3. Frɔm wetin de na Lɛta Fɔ Filipay 2:​13, aw Jiova de mek wi want fɔ du wetin i want?

³ Rid Lɛta Fɔ Filipay 2:​13. * Jiova kin mek wi want fɔ du wetin i want. Aw i kin du dis? Fɔ ɛgzampul, sɔntɛm wi go kam fɔ no se sɔmbɔdi de na wi kɔngrigeshɔn we nid ɛp ɔ ɔda tin de we wi nid fɔ du. Ɔ di ɛlda dɛn go rid lɛta frɔm di branch ɔfis we de tɛl wi se dɛn nid pipul dɛn fɔ ɛp fɔ du sɔntin ɔdasay. Sɔntɛm dat go mek wi aks wisɛf se: ‘Wetin a go du fɔ ɛp?’ Ɔ sɔntɛm dɛn dɔn gi wi wok we nɔ izi fɔ du ɛn wi nɔ no if wi go ebul fɔ du am fayn. Ɔ afta we wi go dɔn rid sɔm vas dɛn na di Baybul, wi go de wɔnda: ‘Aw a go yuz dis say we a dɔn rid fɔ ɛp ɔda pipul dɛn?’ Jiova nɔ de fos wi fɔ du ɛnitin. Bɔt we i si se wi de tink bɔt wetin wi go du, i go mek wi want fɔ du wetin i want ɛn wi go du am.

4. Aw Jiova go gi wi di trɛnk we wi nid fɔ du sɔntin?

⁴ Jiova kin gi wi bak di trɛnk we wi nid fɔ du sɔntin. (Ayz. 40:​29) Aw? I kin gi wi in oli spirit fɔ lɛ wi ebul fɔ du gud gud wan di tin dɛn we wi sabi. (Ɛks. 35:​30-35) Jiova de yuz in ɔganayzeshɔn fɔ tich wi aw fɔ du sɔm patikyula wok dɛn. If yu nɔ shɔ bɔt aw fɔ du ɛni wok we dɛn gi yu, na fɔ aks fɔ lɛ dɛn ɛp yu. Dɔn bak, na fɔ fil fri fɔ aks wi Papa we de na ɛvin fɔ gi yu di trɛnk we yu nid. (2 Kɔr. 4:​7; Lyuk 11:​13) Di Baybul gɛt bɔku ɛgzampul dɛn bɔt aw Jiova bin de gi man ɛn uman dɛn di tin dɛn we dɛn nid fɔ du wetin i want ɛn di trɛnk we dɛn nid fɔ du am. As wi de tɔk bɔt sɔm pan dɛn ɛgzampul dɛn ya, tray fɔ tink bɔt sɔm we dɛn we Jiova go yuz yu fɔ du di sem tin dɛn we dɛn bin du.

5. Wetin wi lan frɔm di tɛm we Jiova yuz Mozis fɔ sev in pipul dɛn?

⁵ Jiova bin mek Mozis bi pɔsin we sev di Izrɛlayt dɛn. Bɔt ustɛm Jiova bin yuz am? Yu tink se na di tɛm we Mozis bin fil se i kwalifay afta we dɛn dɔn “tren [am] lɛkɛ dɛn Ijipt pikin”? (Akt 7:​22-25) Nɔ, Jiova bin yuz Mozis afta we i bin dɔn ɛp am fɔ bi ɔmbul pɔsin ɔ pɔsin we nɔ de vɛks kwik. (Akt 7:​30, 34-36) Jiova bin gi Mozis di maynd fɔ tinap bifo di pawaful kiŋ na Ijipt. (Ɛks. 9:​13-19) Wetin wi lan frɔm di we aw Jiova bin yuz Mozis ɛn di tɛm we i yuz am? Jiova de yuz di wan dɛn we de tray fɔ falamakata di kwaliti dɛn we i gɛt ɛn we de abop pan am fɔ gi dɛn trɛnk.—Fil. 4:​13.

6. Wetin wi lan frɔm di we aw Jiova bin yuz Bazilay fɔ ɛp Kiŋ Devid?

⁶ Lɔng tɛm afta dat, Jiova bin yuz Bazilay fɔ ɛp Kiŋ Devid. Devid ɛn di pipul dɛn bin “taya, aŋri ɛn tɔsti” we dɛn bin de rɔnawe frɔm Devid in pikin, Absalɔm. Bazilay, we bin dɔn ol da tɛm de, ɛn ɔda pipul dɛn bin risk dɛn layf fɔ ɛp Devid ɛn di wan dɛn we bin de wit am. Bazilay nɔ bin tink se Jiova nɔ go yuz am igen bikɔs i dɔn ol. Bifo dat, i yuz wetin i bin gɛt fɔ ɛp Gɔd in savant dɛn. (2 Sam. 17:​27-29) Us lɛsin wi lan frɔm dis? Ilɛk ɔmɔs ia wi ol, Jiova kin yuz wi fɔ ɛp wi kɔmpin Kristian dɛn we nɔ gɛt di tin dɛn we dɛn nid ilɛksɛf dɛn de nia wi ɔ dɛn de fa say. (Prɔv. 3:​27, 28; 19:​17) Ivin if wi nɔ  de wit dɛn fɔ ɛp dɛn, wi kin ebul fɔ gi sɔntin fɔ sɔpɔt di wok we wi de du ɔlsay na di wɔl fɔ ɛp wi brɔda ɛn sista dɛn usay dɛn nid ɛp ɛn di tɛm we dɛn nid am.—2 Kɔr. 8:​14, 15; 9:​11.

7. Aw Jiova bin yuz Simiɔn? Aw dat de ɛnkɔrej wi?

⁷ Jiova bin prɔmis Simiɔn we na wan ol fetful man na Jerusɛlɛm se i go si di Mɛsaya bifo i day. Da prɔmis de we Jiova bin mek to Simiɔn go mɔs dɔn ɛnkɔrej am bikɔs i bin dɔn de wet fɔ di Mɛsaya fɔ lɔng tɛm. Jiova bin blɛs Simiɔn fɔ di fet we i bin gɛt ɛn we i bia wet. Wan de, Jiova in spirit bin dayrɛkt am fɔ go na di tɛmpul. Na de i si Jizɔs in bebi wan, ɛn Jiova bin yuz am fɔ tɔk bɔt wetin gɛt fɔ apin to dis pikin we go bi di Krays. (Lyuk 2:​25-35) Pan ɔl we sɔntɛm Simiɔn nɔ bin de igen fɔ si we Jizɔs de du in prichin wok na dis wɔl, i bin gladi fɔ di chans we i bin gɛt fɔ lɛ Jiova yuz am da kayn we de. Ɛn i go gɛt bɔku blɛsin dɛn tumara bambay. Insay di nyu wɔl, da fetful man de go si aw Jizɔs in rul go bi blɛsin to ɔl mɔtalman na dis wɔl. (Jɛn. 22:​18) Wi bak go gladi fɔ ɛni chans we Jiova gi wi fɔ du sɔntin na in savis.

8. Aw Jiova kin yuz wi lɛk aw i bin yuz Banabas?

⁸ Insay di fɔstɛm Kristian dɛn tɛm, wan fri-an man we nem Josɛf bin rɛdi fɔ lɛ Jiova yuz am. (Akt 4:​36, 37) I go bi se na bikɔs Josɛf bin sabi fɔ ɛnkɔrej ɔda pipul dɛn mek di apɔsul dɛn bin kɔl am Banabas we min “Pɔsin we de kɔrej ɔda pipul” dɛn. Fɔ ɛgzampul, afta we Sɔl bin bi Kristian, bɔku brɔda dɛn bin de fred fɔ go nia am bikɔs i bin de mek di wan dɛn we biliv pan Jizɔs sɔfa. Bɔt Banabas bin ɛnkɔrej ɛn ɛp Sɔl, ɛn i go bi se Sɔl bin rili gladi fɔ dat. (Akt 9:​21, 26-28) Leta, di ɛlda dɛn we bin de na Jerusɛlɛm bin si se nid de fɔ ɛnkɔrej di brɔda dɛn we de na fa fa say lɛk Antiɔk we de na Siria. Udat dɛn bin sɛn? Na Banabas! Na di rayt tin dɛn bin disayd fɔ du. Di Baybul tɛl wi se Banabas bin ɛnkɔrej dɛn ɛn “tɛl dɛn mek dɛn fala di Masta wit ɔl dɛn at.” (Akt 11:​22-24) Semweso tide, Jiova de ɛp wi ɔl fɔ ɛnkɔrej wi brɔda ɛn sista dɛn. Fɔ ɛgzampul, i go yuz wi fɔ ɛnkɔrej di wan dɛn we dɛn pɔsin we dɛn lɛk dɔn day. Ɔ i go ɛp wi fɔ go fɛn ɔ fɔ kɔl sɔmbɔdi we sik ɔ tɔk fayn to pɔsin we in at pwɛl. Yu go alaw Jiova fɔ yuz yu jɔs lɛk aw i bin yuz Banabas?—1 Tɛs. 5:​14.

9. Wetin wi lan frɔm di we aw Jiova bin ɛp wan brɔda we nem Vesili fɔ bi machɔ ɛlda?

⁹ Jiova bin ɛp wan brɔda we nem Vesili fɔ bi machɔ ɛlda. Dɛn bin pik Vesili fɔ bi ɛlda di tɛm we i ol 26 ia, bɔt i bin de fred se i nɔ kwalifay fɔ ɛp di brɔda ɛn sista dɛn na di kɔngrigeshɔn, mɔ di wan dɛn we gɛt prɔblɛm dɛn. Bɔt machɔ ɛlda dɛn bin tren am ɛn di Kingdom Ministry School bak bin ɛp am. Vesili bin tray tranga wan fɔ go bifo. Fɔ ɛgzampul, i bin sɛt sɔm smɔl smɔl gol dɛn we i fɔ du. As i bin de du ɛni wan pan dɛn gol dɛn de, i bin de gɛt kɔnfidɛns mɔ ɛn mɔ. I bin tɔk se: “Di tin dɛn we bin de mek a fred dɛn tɛm dɛn de de mek a gladi naw. We Jiova de ɛp mi fɔ fɛn di rayt skripchɔ fɔ ɛnkɔrej mi brɔda ɛn sista dɛn na di kɔngrigeshɔn, dat de mek a satisfay.” Brɔda dɛn, if una falamakata Vesili ɛn gri fɔ lɛ Jiova yuz una, i go mek una ebul du mɔ wok insay di kɔngrigeshɔn.

10. Wetin Abigɛl bin du? Us lɛsin yu lan frɔm in ɛgzampul?

¹⁰ Devid ɛn di fetful man dɛn we bin de wit am bin de rɔnawe frɔm Kiŋ Sɔl, ɛn dɛn bin nid ɛp. Devid in man dɛn bin aks wan Izrɛlayt man we nem Nebal fɔ gi dɛn smɔl tin fɔ it. Dɛn bin fil fri fɔ aks Nebal bikɔs dɛn bin de protɛkt in ship dɛn na di ɛmti land usay pɔsin nɔ go ebul fɔ liv. Bɔt Nebal we bin jɔs bisin bɔt insɛf nɔ bin gri fɔ gi dɛn ɛnitin. Devid bin vɛks bad bad wan ɛn i bin want fɔ kil Nebal ɛn ɔl di man dɛn we de na in os. (1 Sam. 25:​3-13, 22) Bɔt Nebal in wɛf, Abigɛl, bin rili gɛt sɛns jɔs lɛk aw i bin fayn. I bin sho se i gɛt maynd fɔ go fɔdɔm bifo Devid in fut ɛn beg am fɔ lɛ i nɔ gɛt blɔd na in ed bay we i go kil Nebal ɛn in man dɛn. I bin tek tɛm advays Devid fɔ lɛf ɔltin na Jiova in an. Di ɔmbul wɔd dɛn we Abigɛl bin tɛl Devid ɛn di sɛns tin dɛn we i bin du bin rili tɔch Devid in at. Devid bin kam fɔ gri se na Jiova bin sɛn Abigɛl. (1 Sam. 25:​23-28, 32-34) Abigɛl bin dɔn gɛt kwaliti dɛn we mek Jiova bin ebul fɔ yuz am. Semweso, Jiova kin yuz sista dɛn we de tek tɛm tɔk ɛn du tin wit sɛns fɔ ɛp dɛn famili ɛn ɔda brɔda ɛn sista dɛn na di kɔngrigeshɔn.—Prɔv. 24:​3; Tay. 2:​3-5.

11. Wetin Shalɔm in galpikin dɛn bin du? Udat dɛn de falamakata dɛn tide?

¹¹ Lɔng tɛm afta dat, Shalɔm in galpikin dɛn bin de wit di wan dɛn we Jiova bin yuz fɔ bil bak di wɔl dɛn na Jerusɛlɛm. (Nɛi. 2:​20; 3:​12) Pan ɔl we dɛn papa na bin prins, Shalɔm in galpikin dɛn bin rɛdi fɔ du wok we nɔ bin izi fɔ du. (Nɛi. 4:​15-18) Dɛn nɔ bin tan lɛk di bigman dɛn we kɔmɔt na Tɛkoa, we “nɔ bin gri” fɔ put dɛnsɛf dɔŋ fɔ du di wok. (Nɛi. 3:​5) Jɔs imajin aw Shalɔm in galpikin dɛn bin gladi we dɛn bin dɔn fɔ bil di wɔl dɛn insay 52 dez! (Nɛi. 6:​15) Tide, wi gɛt sista dɛn we rɛdi ɛn gladi fɔ ɛp fɔ du sɔm patikyula wok dɛn fɔ sav Jiova, lɛk fɔ bil say dɛn fɔ wɔship Jiova ɛn fɔ mek di say dɛn we dɔn pwɛl. Di tin dɛn we dɛn ebul fɔ du, dɛn zil, ɛn we dɛn de kɔntinyu fɔ de biɛn Jiova de mek di wok go bifo.

12. Aw Jiova kin yuz wi jɔs lɛk aw i bin yuz Tabita?

¹² Jiova bin ɛp Tabita fɔ “de du gud” ɛn fɔ “de ɛp dɛn po pipul,” mɔ di wan dɛn we dɛn man dɔn day. (Akt 9:​36) Bikɔs i bin fri-an ɛn de du gud, bɔku pipul dɛn bin de kray we i day. Bɔt dɛn bin rili gladi we di apɔsul Pita bin gi am layf bak. (Akt 9:​39-41) Wetin yu lan frɔm Tabita? Ilɛksɛf yu yɔŋ ɔ yu ol, yu na man ɔ uman, wi ɔl kin ebul du sɔntin fɔ ɛp wi brɔda ɛn sista dɛn.—Ibru 13:​16.

13. Aw Jiova bin yuz wan sista we nem Rut? Wetin di sista bin tɔk?

¹³ Wan sista we de shem we nem Rut bin want fɔ bi mishɔnari. We i bin smɔl, i bin de rɔsh wit zil fɔ go frɔm os-to-os fɔ gi trakt dɛn to pipul dɛn. I bin tɔk se: “A bin de rili ɛnjɔy dis wok.” Bɔt fɔ tɔk to pipul dɛn na dɛn domɔt bɔt Gɔd in Kiŋdɔm nɔ bin rili izi fɔ am. Pan ɔl we Rut bin de shem, i bin bi rɛgyula payɔnia we i bin ol 18 ia. Insay 1946, i bin atɛnd di Watchtower Bible School of Gilead ɛn leta bin sav as mishɔnari na Away ɛn Jepan. Jiova bin yuz am fɔ rili du di prichin wok na dɛn kɔntri dɛn de. Afta Rut dɔn de prich fɔ lɛk 80 ia, i bin tɔk se: “Jiova dɔn rili gi mi trɛnk. I dɔn ɛp mi fɔ lɛf fɔ shem. A biliv tranga wan se Jiova kin yuz ɛnibɔdi we abop pan am.”

14. Frɔm wetin de na Lɛta fɔ Kɔlɔse 1:​29 (NW), wetin wi fɔ du if wi want fɔ lɛ Jiova yuz wi?

¹⁴ Fɔ lɔng lɔng tɛm naw, Jiova dɔn de yuz in savant dɛn difrɛn difrɛn we dɛn fɔ lɛ wetin i want bi. Wetin i go mek yu bi? Ɔl dat lɛf to aw yu rɛdi fɔ wok tranga wan. (Rid Lɛta fɔ Kɔlɔse 1:​29, NW.) If yu rɛdi fɔ lɛ Jiova yuz yu, i go mek yu bi pɔsin we gɛt zil fɔ prich, pɔsin we sabi tich, pɔsin we sabi ɛnkɔrej ɔda pipul dɛn, pɔsin we sabi wok, pɔsin we de ɛp in padi dɛn, ɔ ɛni ɔda tin we i go want yu fɔ bi fɔ lɛ wetin i want bi.

15. Frɔm wetin de na Fɔs Lɛta To Timoti 4:​12, 15, wetin yɔŋ brɔda dɛn fɔ beg Jiova fɔ ɛp dɛn fɔ du?

¹⁵ We una dɛn yɔŋ brɔda dɛn we de tɔn bigman? Bɔku nid de fɔ man dɛn we gɛt ɛnaji fɔ bi ministerial savant dɛn. Na bɔku kɔngrigeshɔn dɛn di ɛlda dɛn bɔku pas di ministerial savant dɛn. Sɔm pan una dɛn yɔŋ brɔda dɛn go rɛdi fɔ gɛt mɔ wok fɔ du na di kɔngrigeshɔn? Sɔntɛnde, sɔm brɔda dɛn kin se, “A jɔs want fɔ bi pɔblisha nɔmɔ.” If na da we de yu de fil, beg Jiova fɔ ɛp yu fɔ lɛ yu want fɔ bi ministerial savant ɛn fɔ lɛ i gi yu di trɛnk fɔ du ɛnitin we yu ebul fɔ du fɔ sav am. (Ɛkli. 12:​1) Wi nid yu ɛp!—Rid Fɔs Lɛta To Timoti 4:​12, 15.

16. Wetin wi fɔ aks Jiova fɔ? Wetin mek?

¹⁶ Jiova kin mek yu bi ɛnitin we i want yu fɔ bi fɔ du wetin i want. So na fɔ aks am fɔ mek i ɛp yu fɔ want fɔ du in wok, dɔn aks am fɔ mek i gi yu di trɛnk we yu nid. Ilɛksɛf yu yɔŋ ɔ yu ol, na fɔ yuz yu tɛm, ɛnaji, ɛn ɔda tin dɛn we yu gɛt fɔ ɔnɔ Jiova rayt naw. (Ɛkli. 9:​10) We dɛn gi yu di chans fɔ wok mɔ fɔ Jiova, nɔ dinay kwik kwik wan bikɔs yu tink se yu nɔ go ebul fɔ du am. Na wɔndaful chans wi ɔl gɛt fɔ du wetin wi ebul fɔ mek wi Papa gɛt di ɔnɔ we i fit fɔ gɛt!