1. Wetin mek na Jiova in wangren wi fɔ wɔship?

NA Jiova in wangren wi fɔ wɔship bikɔs na in na di Wan we mek wi ɛn gi wi layf. (Rɛv. 4:​11, NW) Bɔt tin dɛn de we de mek i nɔ izi fɔ wi. Pan ɔl we wi lɛk ɛn rɛspɛkt Jiova, ɔda tin dɛn kin rili impɔtant to wi we kin mek wi nɔ lɛk Jiova ɛn wɔship in wangren lɛk aw wi fɔ du. Wi nid fɔ ɔndastand aw dat kin apin. Fɔs, lɛ wi tɔk bɔt wetin i min fɔ wɔship Jiova in wangren.

2. Frɔm wetin de na Ɛksodɔs 34:​14, wetin wi go du if wi rili lɛk fɔ wɔship Jiova?

² Insay di Baybul, fɔ lɛk fɔ wɔship Gɔd min fɔ lɛk am wit ɔl wi at. We wi rili lɛk Jiova wit ɔl wi at, na in wangren wi go wɔship. Wi nɔ go alaw ɛnibɔdi ɔ ɛnitin fɔ tek in ples na wi at.—Rid Ɛksodɔs 34:​14.

3. Us gud rizin dɛn wi gɛt fɔ lɛk Jiova?

³ Wi gɛt gud rizin dɛn fɔ lɛk Jiova. Wetin mek? Wi lɛk am bikɔs ɔf di tru tin dɛn we wi dɔn lan bɔt am. Wi de kɔle di fayn fayn kwaliti dɛn we i gɛt. Wi no wetin Jiova lɛk ɛn wetin i nɔ lɛk ɛn wi de fil di sem we aw i de fil. Wi no wetin i want fɔ mɔtalman ɛn wi de sɔpɔt wetin i want. Na big big ɔnɔ wi gɛt fɔ we i alaw wi fɔ bi in padi. (Sam 25:​14, NW) Ɔl di tin dɛn we wi de lan bɔt di Wan we mek wi de mek wi kam nia am mɔ ɛn mɔ.—Jems 4:​8.

4. (a) Wetin Setan de yuz fɔ mek wi nɔ lɛk Jiova wit ɔl wi at? (b) Wetin wi go tɔk bɔt insay dis atikul?

 ⁴ Na Setan de kɔntrol dis wɔl, ɛn i de yuz di tin dɛn we de na di wɔl fɔ mek wetin wi want rili impɔtant to wi ɛn i de mek i nɔ izi fɔ wi fɔ stɔp fɔ du di bad tin dɛn we wi kin want fɔ du. (Ɛfi. 2:​1-3; 1 Jɔn 5:​19) Setan want wi fɔ lɛk ɔda tin dɛn bak so dat wi nɔ go lɛk Jiova in wangren. Lɛ wi tɔk bɔt tu we dɛn aw Setan kin du dis. Fɔs, i kin tɛmt wi fɔ mek wi lɛk mɔni, ɛn sɛkɔn, i kin tray fɔ mek wi pik di tin dɛn we nɔ fayn fɔ ɛnjɔy wisɛf.

5. Wetin mek wi fɔ tek tɛm fɔ lɛ wi nɔ bigin fɔ lɛk mɔni?

⁵ Wi ɔl want fɔ gɛt bɔku tin fɔ it, fayn klos fɔ wɛr, ɛn fayn say fɔ de. Bɔt wi fɔ tek tɛm mek wi nɔ stat fɔ lɛk mɔni. Bɔku pipul dɛn we de na Setan in wɔl “lɛk mɔni” ɛn di tin dɛn we mɔni kin mek dɛn gɛt. (2 Tim. 3:​2, NW) Jizɔs bin no se in disaypul dɛn go bigin fɔ lɛk mɔni. So i bin tɛl dɛn se: “Nɔbɔdi nɔ go bi slev to tu masta di sem tɛm. If i bi so, i go lɛk wan masta, i nɔ go lɛk di ɔda wan. I go wok gud fɔ wan masta, bɔt i nɔ go wok gud fɔ di ɔda wan. Una nɔ go de du Gɔd wok ɛn bi slev to mɔni, di sem tɛm.” (Mat. 6:​24) Pɔsin we de wɔship Jiova dɔn i de spɛn bɔku pan in tɛm ɛn ɛnaji fɔ tray fɔ gɛt jɛntri na dis wɔl, de wok fɔ tu masta dɛn. I nɔ go ebul fɔ rili lɛk Jiova wit ɔl in at.

6. Us lɛsin wi lan frɔm di wɔd dɛn we Jizɔs bin tɔk to di Kristian dɛn na Laodisya?

⁶ Insay di fɔstɛm Kristian dɛn tɛm, di brɔda ɛn sista dɛn we bin de na di kɔngrigeshɔn na Laodisya bin de bost se: ‘A jɛntri, di tin dɛn we a gɛt, dɔn plɛnti, ɛn natin nɔ de we a fɔ gɛt we a nɔ gɛt.’  Bɔt Jiova ɛn Jizɔs bin de si dɛn se dɛn ‘po, dɛn sɔri, dɛn nekɛd ɛn dɛn blayn.’ We Jizɔs bin advays dɛn, i nɔ bin du dat bikɔs dɛn jɛntri, bɔt na bikɔs dɛn bin lɛk mɔni pasmak ɛn dat bin de pwɛl dɛn padi biznɛs wit Jiova. (Rɛv. 3:​14-17) If wi notis se wi dɔn bigin fɔ lɛk mɔni, wi fɔ tray kwik kwik wan fɔ kɔrɛkt di we aw wi de tink. (1 Tim. 6:​7, 8) If wi nɔ du dat, wi go stat fɔ lɛk ɔda tin dɛn bak ɛn Jiova nɔ go gladi fɔ wi wɔship. I want lɛ wi wɔship in wangren. (Dit. 4:​24) Aw mɔni go bi di tin we impɔtant pas ɔl na wi layf?

7-9. Wetin yu lan frɔm wan ɛlda we nem Devid in ɛkspiriɛns?

⁷ Lɛ wi tɔk bɔt wan ɛlda we nem Devid we de na Amɛrika in ɛgzampul. Dis brɔda bin tɔk bɔt insɛf se in na man we de wok tranga wan. Di kɔmni we i de wok fɔ bin promot am ɛn dɛn bin de pe am bɔku mɔni. Dɛn bin de si Devid as wan pan di pipul dɛn we sabi fɔ du da kayn wok de pas ɔlman na di kɔntri. Devid bin tɔk se: “Dɛn tɛm dɛn de, a bin de si am se na Jiova de blɛs mi fɔ go bifo pan mi wok.” Bɔt fɔ se na Jiova bin de blɛs am?

⁸ As tɛm de go, Devid bin bigin fɔ si sayn dɛn we de sho se in wok bin de ambɔg in padi biznɛs wit Jiova. I bin tɔk se: “A bin kam fɔ si se a de tink bɔt di prɔblɛm dɛn na mi wokples ivin we a de na mitin ɛn we a de prich. A bin de gɛt bɔku mɔni, bɔt stil a bin de gɛt bɔku strɛs, ɛn mi ɛn mi wɛf bin stat fɔ gɛt prɔblɛm.”

⁹ Devid bin kam fɔ no se i nid fɔ disayd wetin impɔtant to am pas ɔl. I bin tɔk se: “A bin gɛt fɔ disayd di rayt tin fɔ kɔrɛkt mi prɔblɛm.” Devid bin want fɔ ajɔst di tɛm we i dɔn plan fɔ wok, ɛn i bin tɛl in  bɔsman bɔt wetin i want fɔ du. Wetin bin apin? Devid bin lɔs in wok! Wetin i bin du? I bin tɔk se: “Di nɛks de, a bin fil di fɔm fɔ sav as ɔgzilari payɔnia fɔ lɔng tɛm.” Fɔ lɛ dɛn go ebul fɔ sɔpɔt dɛnsɛf, Devid ɛn in wɛf bin stat fɔ de klin fɔ pipul dɛn. Afta sɔm tɛm, i bigin fɔ rɛgyula payɔnia, ɛn leta in wɛf bin jɔyn am pan di payɔnia wok. Dis brɔda ɛn in wɛf bin disayd fɔ du wok we bɔku pipul dɛn nɔ go want fɔ du. Bɔt di wok we dɛn bin de du nɔto in na bin di tin we impɔtant to dɛn. Pan ɔl we dɛn nɔ bin de gɛt bɔku mɔni lɛk aw dɛn bin de gɛt trade, ɛni mɔnt dɛn bin de gɛt jɔs wetin dɛn nid fɔ pe fɔ di tin dɛn we dɛn nid. Dɛn bin want fɔ put Jiova fɔs na dɛn layf, ɛn dɛn dɔn kam fɔ si se Jiova de kia fɔ di wan dɛn we de put in Kiŋdɔm fɔs na dɛn layf.—Mat. 6:​31-33.

10. Aw wi go protɛkt wi at?

¹⁰ Ilɛksɛf wi po ɔ wi jɛntri, wi nid fɔ protɛkt wi at. Aw wi go du dat? Na bay we wi tray tranga wan nɔ fɔ lɛk mɔni. Dɔn, wi nɔ fɔ alaw di wok we wi de du fɔ bi di tin we impɔtant to wi pas wi savis to Jiova. Aw yu go no se yu dɔn bigin fɔ lɛk mɔni? Yu kin aks yusɛf dɛn kwɛstyɔn dɛn ya: ‘A de tink bɔku tɛm bɔt mi wok we a kin de na mitin ɔ we a de prich? A de wɔri ɔltɛm if a go gɛt bɔku mɔni tumara bambay? Mɔni ɛn prɔpati de briŋ prɔblɛm na mi mared os? A go rɛdi fɔ du wok we ɔda pipul dɛn nɔ go want fɔ du fɔ mek a gɛt mɔ tɛm fɔ sav Jiova?’ (1 Tim. 6:​9-12) We wi de tink bɔt dɛn kwɛstyɔn dɛn ya, wi fɔ mɛmba se Jiova lɛk wi ɛn i prɔmis di wan dɛn we de wɔship am wit ɔl dɛn at se: “A nɔ go lɛf yu, a go de wit yu ɔltɛm fɔ ɛp yu.” Na dat mek di apɔsul Pɔl bin rayt se: “Una nɔ put ɔl una at pan kɔpɔ ɔltɛm.”—Ibru 13:​5, 6.

11. Aw di tin dɛn we wi kin yuz fɔ ɛnjɔy wisɛf kin afɛkt wi?

¹¹ Jiova want wi fɔ ɛnjɔy wi layf, ɛn di tin dɛn we wi de yuz fɔ ɛnjɔy wisɛf kin ɛp wi fɔ du dat. Infakt Gɔd in Wɔd tɛl wi se “di bɛst tin fɔ mɔtalman fɔ du, na fɔ it [,] drink ɛn ɛnjɔy wetin i dɔn wok fɔ.” (Ɛkli. 2:​24) Bɔt bɔku pan di tin dɛn we de na di wɔl we wi de yuz fɔ ɛnjɔy wisɛf kin afɛkt wi bad we dɛn. I kin mek pipul dɛn nɔ de liv klin layf, i kin mek dɛn stat fɔ gri  wit sɔm tin dɛn ɔ ivin lɛk di tin dɛn we Gɔd et.

12. Frɔm wetin de na Fɔs Lɛta fɔ Kɔrint 10:​21, 22 (NW), wetin mek wi fɔ tek tɛm pik di tin dɛn we wi de yuz fɔ ɛnjɔy wisɛf?

¹² Wi want fɔ wɔship Jiova in wangren, so wi nɔ want fɔ it na “Jiova in tebul” ɛn de it bak na “di dimɔn dɛn tebul.” (Rid Fɔs Lɛta fɔ Kɔrint 10:​21, 22, NW.) We wi de it wit pɔsin na sayn fɔ sho se wi na padi. If di tin dɛn we wi de pik fɔ ɛnjɔy wisɛf gɛt fɔ du wit fɛt fɛt, dɛbul biznɛs, mami ɛn dadi biznɛs di we aw Gɔd nɔ want, ɔ ɔda bad we dɛn we wi kin want fɔ biev ɛn du tin dɛn, wi de sho se wi de it wit Gɔd in ɛnimi dɛn it we dɛn dɔn mek. Dat go mek wi ambɔg wisɛf ɛn pwɛl wi padi biznɛs wit Jiova.

13-14. Frɔm wetin de na Jems 1:​14, 15, wetin mek wi fɔ tek tɛm pik di tin dɛn we wi de yuz fɔ ɛnjɔy wisɛf? Gi wan ɛgzampul.

¹³ Lɛ wi tɔk bɔt sɔm patikyula we dɛn we de sho aw di tin dɛn we wi de yuz fɔ ɛnjɔy wisɛf wit tan lɛk it. We wi de it, wi kin pik di tin dɛn we wi de put na wi mɔt. Bɔt we wi swɛla di it dɔn, wi nɔ go ebul fɔ disayd aw di it go afɛkt wi bɔdi. Gud it go mek wi gɛt wɛlbɔdi bɔt it we nɔ fayn de mek wi sik. Wi nɔ go notis wetin de apin wantɛm wantɛm, bɔt as tɛm de go wi go bigin si aw i de afɛkt wi.

¹⁴ Semweso, we wi pik di tin dɛn we wi de yuz fɔ ɛnjɔy wisɛf, wi go ebul fɔ kɔntrol wetin wi de put na wi maynd. Afta dat, di tin dɛn we wi dɔn pik fɔ ɛnjɔy wisɛf kin stat fɔ afɛkt di we aw wi de tink ɛn fil. We wi pik gud tin dɛn fɔ ɛnjɔy wisɛf i kin mek wi fil fayn, bɔt if wi pik tin dɛn we nɔ fayn dat kin ambɔg wi. (Rid Jems 1:​14, 15.) Wi nɔ go notis di we aw di rɔŋ tin dɛn we wi kin pik fɔ ɛnjɔy wisɛf kin afɛkt wi wantɛm wantɛm, bɔt as tɛm de go wi go bigin si aw i de afɛkt wi. Na dat mek di Baybul wɔn wi se: “Una nɔ mek unasɛf ful se una kin ful Gɔd. Na wetin una plant, una go gɛt. Jɛs lɛkɛ wɛn fama kin plant sid, i kin gɛt wetin i plant. Semweso, wɛn pɔsin du bad tin we in at gi am fɔ du, Gɔd go pɔnish di pɔsin.” (Gal. 6:​7, 8) I rili impɔtant fɔ lɛ wi avɔyd ɔl di tin dɛn we wi de yuz fɔ ɛnjɔy wisɛf we wi no se na tin dɛn we Jiova et!—Sam 97:​10.

15. Us gift Jiova dɔn gi wi fɔ ɛnjɔy?

¹⁵ Bɔku pan Jiova in pipul dɛn kin ɛnjɔy fɔ wach JW TV^®, we na wi fayn tɛlivishɔn steshɔn na di Intanɛt. Wan sista we nem Marilin bin tɔk se: “JW TV dɔn ɛp mi fɔ gɛt gladi-at, ɛn a kin wach ɔl wetin de de bikɔs i gud fɔ mi. We mi at kin pwɛl ɔ we a de mi wan, a kin luk fɔ tɔk ɔ mɔnin wɔship program we a go wach we go ɛnkɔrej mi. Dat de mek a fil lɛk se a de nia Jiova ɛn in ɔganayzeshɔn. Di JW TV we dɛn mek dɔn rili chenj mi layf.” Yu de bɛnifit frɔm di gift we Jiova dɔn gi wi? JW TV gɛt nyu program dɛn we dɛn de mek ɛni mɔnt, ɛn i gɛt odio dɛn fɔ lisin to, fim dɛn fɔ wach, ɛn siŋ dɛn we kin ɛnkɔrej wi.

16-17. Wetin mek wi fɔ tek tɛm fɔ kɔntrol di tɛm we wi de spɛn fɔ ɛnjɔy wisɛf? Aw wi go ebul fɔ du dat?

¹⁶ Wi fɔ tek tɛm wit wetin wi de pik fɔ ɛnjɔy wisɛf, ɛn ɔmɔs tɛm wi de spɛn pan dɛn tin dɛn de. If wi nɔ du dat, wi go spɛn bɔku tɛm fɔ ɛnjɔy wisɛf pas di tɛm we wi de spɛn fɔ wɔship Jiova. I nɔ izi fɔ bɔku pipul dɛn fɔ kɔntrol di tɛm we dɛn de spɛn fɔ ɛnjɔy dɛnsɛf. Wan sista we nem Abigɛl we ol 18 ia bin tɔk se: “We a kin wach TV, dat de ɛp mi fɔ rilaks  afta we a dɔn wok ol de. Bɔt if a nɔ tek tɛm, a kin spɛn bɔku tɛm de wach TV.” Wan yɔŋ brɔda we nem Samiɛl bin tɔk se: “Sɔntɛnde a kin wach bɔku shɔt shɔt fim dɛn na di Intanɛt. A kin stat fɔ wach jɔs wan fim, ɛn bifo a de no, tri ɔ 4 awa dɔn pas.”

¹⁷ Aw yu go kɔntrol ɔmɔs tɛm yu de spɛn fɔ ɛnjɔy yusɛf? Di fɔs tin we yu fɔ du na fɔ tray fɔ no ɔmɔs tɛm yu de rili spɛn fɔ ɛnjɔy yusɛf. Yu nɔ tink se i go fayn fɔ rayt ɔmɔs tɛm yu de spɛn insay wan wik? Rayt na kalɛnda ɔmɔs awa yu de spɛn fɔ wach TV, luk fɔ tin dɛn na di Intanɛt, ɛn ɔmɔs tɛm yu de spɛn fɔ ple gem dɛn na yu fon ɔ tablɛt. If yu si se yu de spɛn bɔku pan yu tɛm fɔ ɛnjɔy yusɛf, na fɔ tray fɔ sɛt tɛm fɔ di tin dɛn we yu de du. Sɛt tɛm fɔ du di tin dɛn we impɔtant fɔs, dɔn sɛt tɛm we yu go yuz fɔ ɛnjɔy yusɛf. Dɔn afta dat, pre to Jiova ɛn aks am fɔ ɛp yu fɔ du wetin yu dɔn plan. Dat go mek yu gɛt di tɛm ɛn trɛnk we yu nid fɔ du yu pasɔnal stɔdi, famili wɔship, fɔ atɛnd di mitin dɛn, ɛn fɔ sav Jiova bay we yu de du di prichin wok. Yu go ɛnjɔy bak di tɛm we yu de spɛn fɔ ɛnjɔy yusɛf mɔ bikɔs yu de put Jiova fɔs.

18-19. Aw wi go sho se na Jiova in wangren wi de wɔship?

¹⁸ Afta we di apɔsul Pita dɔn fɔ rayt bɔt Setan in wɔl in dɔn wan ɛn di nyu wɔl we gɛt fɔ kam, i bin tɔk se: “Mi padi dɛn we a lɛk, we una de wet fɔ dis nyu ɛvin ɛn dis nyu wɔl ya, una fɔ tray mek Gɔd nɔ fɛn ɛni fɔlt na una layf ɛn una go gɛt kol at fɔseka dat.” (2 Pit. 3:​14) We wi obe da advays ɛn du wi bɛst fɔ kɔntinyu fɔ liv wi layf ɛn wɔship Jiova di we aw i want, wi go sho se na in wan wi de wɔship.

¹⁹ Setan ɛn di pipul dɛn na di wɔl go kɔntinyu fɔ de mek wi put ɔda tin dɛn fɔs na wi layf ɛn nɔ put Jiova fɔs na wi layf. (Lyuk 4:​13) Bɔt pan ɔl di prɔblɛm dɛn we wi go gɛt, wi nɔ go alaw ɛnibɔdi ɔ ɛnitin fɔ tek Jiova in ples na wi at. Wi dɔn mekɔp wi maynd fɔ gi Jiova wetin in wangren fit fɔ gɛt, dat na fɔ wɔship in wangren!