1920—Wan Ɔndrɛd Ia we Dɔn Pas
FRƆM we di ia 1920 bin stat, Jiova in pipul dɛn bin gɛt zil fɔ du di wok we dɛn gɛt. Di iatɛks we dɛn bin pik fɔ 1920 bin se: “Na PAPA GƆD de gi mi trɛnk ɛn a de siŋ to am.”—Sam 118:14, King James Version.
Jiova bin gi trɛnk to dɛn brɔda ɛn sista dɛn ya we bin rili want fɔ prich. Insay da ia de, di kɔlpɔta ɔ payɔnia dɛn bin ad frɔm 225 to 350. Ɛn fɔ di fɔs tɛm, i bin pas 8,000 klas wɔka ɔ pɔblisha dɛn we bin sɛn dɛn fil savis ripɔt na di ɛdkwata. Jiova bin blɛs dɛn bay we i mek fayn tin apin.
DƐN SHO SE DƐN RILI GƐT ZIL
Insay Mach 21, 1920, Josɛf F. Rutafɔd, we bin de ɔganayz di wok we di Baybul Studɛnt dɛn bin de du da tɛm de, bin gi wan tɔk we gɛt di taytul, “Millions Now Living Will Never Die.” Di Baybul Studɛnt dɛn bin tray fɔ invayt ɔlman we go want fɔ yɛri dis tɔk. Dɛn rɛnt wan pan di big tiyata dɛn insay Nyu Yɔk Siti, ɛn sheb lɛk 320,000 inviteshɔn dɛn.
Nyuzpepa advatizmɛnt fɔ di tɔk we gɛt di taytul “Millions Now Living Will Never Die”
Di pipul dɛn we bin kam bin bɔku pas di wan dɛn we dɛn bin de ɛkspɛkt se go kam. Di tiyata bin jɔs du fɔ 5,000 pipul dɛn, so 7,000 pan di pipul dɛn we bin go nɔ bin ebul fɔ go insay. Di Wach Tawa bin se “dis mitin na bin wan pan di bɛst mitin dɛn we di Intanashɔnal Baybul Studɛnt dɛn bin ɛva gɛt.”
So bɔku pipul dɛn bin kam fɔ sabi di Baybul Studɛnt dɛn fɔ we dɛn de tɔk se “millions now living will never die.” Da tɛm de, di brɔda ɛn sista dɛn nɔ bin no se dɛn fɔ prich di mɛsej bɔt di Kiŋdɔm ɔlsay na di wɔl ɛn fɔ lɔng tɛm. Bɔt stil, dɛn bin rili gɛt zil. Ayda Omstɛd, we bin stat fɔ atɛnd mitin insay 1902 bin se: “Wi bin no se bɔku blɛsin de na rod fɔ mɔtalman, so wi nɔ bin lɛf fɔ prich dis gud nyuz to di wan dɛn we wi bin de mit na fil savis.”
DƐN BIN DE MEK DƐN BUK ƐN MAGAZIN DƐN FƆ DƐNSƐF
Di brɔda dɛn na Bɛtɛl bin stat fɔ print sɔm buk ɛn magazin dɛn fɔ dɛnsɛf, so dat pipul dɛn go gɛt di tin dɛn we go ɛp dɛn fɔ kam nia Jiova. Dɛn bin bay di mashin dɛn we dɛn nid ɛn put dɛn insay wan bildin we dɛn bin rɛnt na 35 Matul Avɛnyu, insay Bruklin, Nyu Yɔk, ɛn dis ples nɔ bin de fa frɔm di Bɛtɛl.
Lio Pɛl ɛn Wɔlta Kɛsla bin stat fɔ wok na Bɛtɛl insay Janwari 1920. Wɔlta bin se: “We wi rich, di ovasia fɔ di printri bin luk wi ɛn se, ‘Una gɛt wan ɛn af awa fɔ wok bifo wi go fɔ lɔnch.’ I bin tɛl wi fɔ kam wit katun dɛn we gɛt buk dɛn we bin de na di ɔndasela.”
Lio mɛmba wetin apin di nɛks de. I se: “Na bin wi wok fɔ was di wɔl dɛn na di fɔs flɔ na di bildin. Dis na di wok we dɔti pas ɔl di wok dɛn we a bin dɔn ɛva du. Bɔt na Jiova in wok, so a bin gladi fɔ du am.”
Di printin mashin we dɛn bin yuz fɔ print Di Wach Tawa
Insay shɔt tɛm, brɔda dɛn we bin rili gɛt zil bin stat fɔ print Di Wach Tawa. Dɛn bin print 60,000 Wach Tawa dɛn fɔ Fɛbwari 1, 1920 na di printin mashin we bin de na di sɛkɔn flɔ. Di brɔda dɛn bin put wan printin mashin na di ɔndasela we dɛn bin de kɔl di Battleship. Dɔn bak, dɛn bin stat fɔ print The Golden Age, ɛn dɛn bin stat wit di wan fɔ Epril 14, 1920. Wi si klia wan se Jiova bin blɛs di wok we di brɔda dɛn bin gladi fɔ du.
“Na Jiova in wok, so a bin gladi fɔ du am”
LƐ WI MEK PIS DE
Jiova in fetful pipul dɛn bin gladi fɔ gɛt wanwɔd bak as dɛn de wɔship Jiova wit dɛn brɔda dɛn. Bɔt sɔm Baybul Studɛnt dɛn bin dɔn lɛf di ɔganayzeshɔn di tɛm we prɔblɛm bin de frɔm 1917 to 1919. Wetin dɛn bin du fɔ ɛp dɛn?
Di Wach Tawa fɔ Epril 1, 1920, bin gɛt wan atikul we gɛt di taytul, “Let Us Dwell in Peace.” Fɔ ɛnkɔrej dɛn, di atikul bin se: “Wi shɔ se ɔl di wan dɛn we want fɔ obe Jiova go fɔgɛt bɔt di mistek dɛn we dɛn bin dɔn mek, ɛn jɔyn Jiova in pipul dɛn fɔ du In wok wit wanwɔd.”
Dɛn wɔd dɛn de bin rili ɛnkɔrej bɔku pan dɛn. Wan maredman ɛn in wɛf bin rayt se: “Wi gri se wi bin dɔn mek mistek insay dɛn ia dɛn ya we dɔn pas bay we wi nɔ bin de du di prichin wok. . . . Wi op se wi nɔ go alaw dat fɔ apin igen.” Dɛn brɔda ɛn sista dɛn ya we bin dɔn stat fɔ du di prichin wok bak bin gɛt bɔku wok fɔ du.
DƐN BIN SHEB SHEB DI “ZG”
Insay Jun 21, 1920, di Baybul Studɛnt dɛn bin stat fɔ sheb sheb di “ZG,” we na di buk we nem The Finished Mystery. * Dɛn bin dɔn kip bɔku pan dɛn buk dɛn de di tɛm we dɛn bin ban di buk insay 1918.
Dɛn bin invayt ɔl di klas wɔka dɛn, nɔto jɔs di kɔlpɔta dɛn nɔmɔ fɔ sheb sheb dis buk. “Ɔlman we kɔnsikret [ɔ baptayz] na ɛni kɔngrigeshɔn we ebul fɔ du dis wok fɔ gladi fɔ du am. Ɔlman in moto fɔ bi: Mi wok na fɔ sheb sheb di ZG buk.” Ɛdmɔn Upa bin se na di fɔstɛm dis we bɔku pipul dɛn prich frɔm os-to-os. I tɔk bak se “Na naw wi rili bigin fɔ ɔndastand wetin-ɛn-wetin wi nid fɔ du fɔ mek di prichin wok rich fa fa say dɛn.”
DƐN BIN ƆGANAYZ DI WOK BAK NA YUROP
Bikɔs ɔf Wɔl Wɔ I, i nɔ bin izi fɔ mek dɛn tɔk wit Baybul Studɛnt dɛn we bin de na ɔda kɔntri dɛn, bɔt Brɔda Rutafɔd bin want fɔ ɛnkɔrej dɛn brɔda dɛn de ɛn ɔganayz di prichin wok bak. So Ɔgɔst 12, 1920, in ɛn 4 ɔda brɔda dɛn bin travul fɔ go na Ingland ɛn bɔku ɔda kɔntri dɛn.
We Brɔda Rutafɔd bin go na Ijipt
We Brɔda Rutafɔd bin go na Ingland, di Baybul Studɛnt dɛn bin mek tri kɔnvɛnshɔn dɛn ɛn 12 pɔblik mitin dɛn. Na lɛk 50,000 pipul dɛn bin atɛnd. We dɛn bin rayt na Di Wach Tawa bɔt di program, dɛn bin se: “Di brɔda dɛn bin gɛt ɛnkɔrejmɛnt. Dɛn bin ebul fɔ spɛn tɛm wit ɔda brɔda ɛn sista dɛn ɛn wok wit dɛn, ɛn dat bin mek dɛn gladi.” We Brɔda Rutafɔd bin go na Paris, i bin gi di tɔk bak we gɛt di taytul, “Millions Now Living Will Never Die.” We di tɔk bigin, di ɔl bin ful-ɔp. Tri ɔndrɛd pipul dɛn bin aks fɔ no mɔ.
Posta we de advatayz di tɔk we Brɔda Rutafɔd bin gi na Rɔyal Albat Ɔl insay Lɔndɔn
Insay di ɔda wik dɛn, sɔm brɔda dɛn bin go na Atɛns, Kayro, ɛn Jerusɛlɛm. Fɔ mek dɛn go kɔntinyu fɔ ɛp di wan dɛn we want fɔ no mɔ na dɛn say dɛn de, Brɔda Rutafɔd bin mek stɔ fɔ kip buk ɛn magazin dɛn na wan tɔŋ we nem Ramala we de nia Jerusɛlɛm. Dɔn i bin go bak na Yurop ɛn mek di Central European Office ɛn arenj fɔ mek dɛn go de print buk ɛn magazin dɛn de.
DƐN BIN TƆK BƆT DI BAD WE AW DƐN BIN TRIT SƆM BAYBUL STUDƐNT DƐN
Insay Sɛptɛmba 1920, di Baybul Studɛnt dɛn bin rilis The Golden Age No. 27. Dis na bin spɛshal magazin we de tɔk bɔt di bad bad tin dɛn we dɛn bin de du to di Baybul Studɛnt dɛn insay 1918. Dɛn bin de yuz di Battleship we wi bin dɔn tɔk bɔt fɔ print dis magazin, ɛn dɛn bin print pas 4 milyɔn kɔpi dɛn.
Di pikchɔ we di polis dɛn bin snap Ɛma Matin
Di wan dɛn we bin rid da magazin de bin kam fɔ no wetin bin apin to Ɛma Matin. Sista Matin na bin kɔlpɔta na San Banadino, Kalifonia. Insay Mach 17, 1918, in ɛn tri brɔda dɛn we na E. Hamm, E. J. Sonnenburg, ɛn E. A. Stevens, bin atɛnd wan mitin fɔ Baybul Studɛnt dɛn.
Wan man we bin atɛnd nɔ bin go fɔ lan bɔt di Baybul. Di man bin leta tɔk se: “Na wan lɔya bin sɛn mi fɔ go dis mitin ɛn fɛn ɛvidɛns.” Dis man bin fɛn di “ɛvidɛns” we i bin de luk fɔ, dat na The Finished Mystery. Afta sɔm dez, dɛn bin arɛst Sista Matin ɛn di tri brɔda dɛn. Dɛn bin arɛst dɛn bikɔs dɛn se dɛn bin de sheb buk we di gɔvmɛnt bin dɔn ban.
Dɛn se Ɛma ɛn di brɔda dɛn bin gilti ɛn dɛn sɛntɛns dɛn na prizin fɔ tri ia. Insay Me 17, 1920, dɛn stat dɛn prizin sɛntɛns bikɔs di kɔt nɔ bin gri fɔ chenj di sɛntɛns pan ɔl we dɛn bin dɔn beg dɛn bɔku tɛm. Bɔt i nɔ tu te, gud tin bin apin fɔ dɛn.
Insay Jun 20, 1920, Brɔda Rutafɔd bin tɔk bɔt Sista Matin ɛn di tri brɔda dɛn ɛkspiriɛns na wan kɔnvɛnshɔn na San Fransisko. Di ɔdiɛns bin sɔprayz we dɛn yɛri bɔt di we aw dɛn bin trit dɛn, ɛn dɛn bin gri fɔ sɛn mɛsej to di prɛsidɛnt na Amɛrika. Dɛn bin rayt se: “Di arɛst we dɛn arɛst Misis Matin nɔ fia. Na shemful tin di polis dɛn du we dɛn yuz dɛn pawa fɔ sɛt trap fɔ Misis Matin ɛn mek kes agens am so dat dɛn go sɛn am na prizin.”
Di nɛks de, Prɛsidɛnt Wudro Wilsin bin mek dɛn pul Sista Matin ɛn di tri brɔda dɛn na prizin. Dɛn kes bin dɔn dɔn.
Bay di tɛm we 1920 de dɔn, di Baybul Studɛnt dɛn bin kam fɔ no se bɔku tin dɛn bin dɔn apin we bin mek dɛn gladi. Dɛn bin kɔntinyu fɔ du mɔ wok na di ɛdkwata, ɛn di Baybul Studɛnt dɛn bin kɔntinyu fɔ prich wit zil se na Gɔd in Kiŋdɔm nɔmɔ go pul mɔtalman pan prɔblɛm. (Mat. 24:14) Di nɛks ia, 1921, go bi ia we dɛn go ivin du di prichin wok pas aw dɛn bin dɔn de du am.
^ par. 18 The Finished Mystery na bin di nɔmba sɛvin vɔlyum fɔ di buk we nem Studies in the Scriptures. Di “ZG” buk bin gɛt pepa kɔba we dɛn bin print as di Mach 1, 1918, Wach Tawa. “Z” tinap fɔ Zion’s Watch Tower, ɛn “G,” we na di nɔmba sɛvin lɛta insay di Inglish alfabɛt, tinap fɔ vɔlyum sɛvin.
