1. Aw 2 Kɔrintians 3:​1-3 de ɛp wi fɔ gladi fɔ di wok we wi gɛt fɔ ɛp pipul dɛn fɔ stɔdi di Baybul te dɛn baptayz? (Luk di pikchɔ na di frɔnt pej.)

AW YU kin fil we yu si pɔsin we bin stɔdi di Baybul na yu kɔngrigeshɔn de baptayz? Fɔ tru, dat kin mek yu rili gladi. (Mat. 28:​19) Ɛn if na yu bin stɔdi wit da pɔsin de, yu kin gladi pasmak we yu si am de baptayz. (1 Tɛs. 2:​19, 20) Di wan dɛn we kin jɔs baptayz tan lɛk fayn “lɛta . . . we de tɔk fayn bɔt” di wan dɛn we stɔdi dɛn ɛn di wan ol kɔngrigeshɔn.—Rid 2 Kɔrintians 3:​1-3.

2. (a) Us impɔtant kwɛstyɔn wi fɔ tink bɔt? Wetin mek? (b) Wetin na Baybul stɔdi? (Rid di futnot.)

² I rili fayn fɔ si se insay di las 4 ia we dɔn pas, na lɛk 10,000,000 Baybul stɔdi dɛn * wi kin kɔndɔkt ɛni mɔnt ɔlsay na di wɔl. Ɛn insay dɛn 4 ia dɛn de, na lɛk 280,000 pipul dɛn bin baptayz ɛni ia as Jiova Witnɛs ɛn kam fɔ bi Jizɔs Krays in nyu disaypul dɛn. Aw wi go ebul ɛp dɛn bɔku bɔku Baybul studɛnt dɛn ya fɔ baptayz? Jiova de stil gi pipul dɛn di chans fɔ bi in Witnɛs dɛn. So wisɛf nɔ fɔ westɛm fɔ du ɔl wetin wi ebul fɔ ɛp dɛn fɔ baptayz. Bɛtɛ tɛm nɔ lɛf igen!—1 Kɔr. 7:​29a; 1 Pit. 4:​7.

3. Wetin wi go tɔk bɔt insay dis atikul we go ɛp wi as wi de kɔndɔkt Baybul stɔdi?

³ Bikɔs i rili impɔtant fɔ lɛ wi mek disaypul dɛn naw, di Gɔvnin Bɔdi bin aks branch ɔfis dɛn fɔ no wetin wi go  du fɔ ɛp wi Baybul studɛnt dɛn te dɛn baptayz. Insay dis atikul ɛn di nɛks wan, wi go si wetin wi kin lan frɔm di wan dɛn we gɛt ɛkspiriɛns lɛk payɔnia dɛn, mishɔnari dɛn, ɛn sakit ovasia dɛn. * (Prɔv. 11:​14; 15:​22) Dɛn bin tɔk bɔt wetin Baybul ticha ɛn dɛn studɛnt dɛn go du fɔ mek di Baybul stɔdi go bɛnifit di studɛnt. Insay dis atikul, wi go tɔk bɔt fayv tin dɛn we ɛni Baybul studɛnt nid fɔ du so dat i go mek chenj dɛn we go ɛp am fɔ baptayz.

4. Wetin wi fɔ no bɔt di Baybul stɔdi dɛn we wi de kɔndɔkt na pipul dɛn domɔt?

⁴ Bɔku pan wi brɔda ɛn sista dɛn de stɔdi di Baybul wit pipul dɛn na dɛn domɔt. Pan ɔl we dis na fayn we fɔ ɛp pɔsin fɔ mek i go want fɔ no mɔ bɔt di Baybul, na smɔl tɛm bɔku brɔda ɛn sista dɛn kin yuz fɔ tɔk to dɛn pipul dɛn ya, ɛn sɔntɛm dɛn nɔ kin ivin du am ɛvri wik. Fɔ lɛ sɔm brɔda ɛn sista dɛn ɛp pɔsin we want fɔ no mɔ, sɔm kin aks am fɔ in fon nɔmba so dat dɛn go kɔl di pɔsin ɔ sɛn mɛsej to am fɔ jɔs tɔk smɔl bɔt di Baybul. Dɛn kin kɔntinyu fɔ tɔk to pɔsin da we de fɔ sɔm mɔnt, ɛn i nɔ kin bi Baybul stɔdi we de go bifo. Yu tink se ɛni studɛnt go rili go bifo pan in stɔdi, gi in layf to Jiova, ɛn baptayz if na jɔs smɔl tɛm ɛn ɛnaji i de yuz fɔ stɔdi Gɔd in Wɔd? I nɔ go izi fɔ lɛ dat bi.

5. Wetin Jizɔs tɔk na Lyuk 14:​27-33 we wi go yuz fɔ ɛp wi Baybul studɛnt dɛn?

⁵ Wantɛm, Jizɔs bin yuz wan ɛgzampul fɔ tɔk bɔt wetin pɔsin fɔ du if i want fɔ bi in disaypul. I bin tɔk bɔt pɔsin we want fɔ bil tawa ɛn kiŋ we want fɔ go fɛt wɔ. Jizɔs bin se di pɔsin we want fɔ bil fɔ “sidɔm fɔs ɛn chɛk ɔmɔs i gɛt fɔ spɛn” fɔ bil di tawa dɔn, ɛn di kiŋ fɔ “sidɔm fɔs ɛn lisin to advays” fɔ si if in sojaman dɛn go ebul du wetin dɛn plan. (Rid Lyuk 14:​27-33.) Semweso, Jizɔs bin no se pɔsin we want fɔ bi in disaypul fɔ tek tɛm tink bɔt wetin i go nid fɔ du fɔ lɛ i fala am. Na dat mek wi nid fɔ ɛnkɔrej wi Baybul studɛnt dɛn fɔ stɔdi wit wi ɛvri wik. Aw wi go du dat?

6. Wetin wi go tray fɔ du fɔ lɛ wi Baybul studɛnt dɛn go bifo pan dɛn stɔdi?

⁶ Di fɔs tin we yu kin du na fɔ ad pan di tɛm we yu kin yuz fɔ stɔdi di  pɔsin na in domɔt. Sɔntɛm yu kin yuz pas wan skripchɔ ɛnitɛm we yu go fɔ tɔk wit di pɔsin. Afta we di pɔsin go dɔn yus to di lɔng tɛm we yu kin spɛn wit am, aks am if say de we una go sidɔm ɛn kɔntinyu di tɔk. Di ansa we di pɔsin gi yu go sho if di Baybul stɔdi impɔtant to am. Fɔ lɛ yu ɛp am fɔ go bifo pan in stɔdi, sɔntɛm yu go ivin aks am if i go want fɔ de stɔdi tu tɛm insay di wik. Bɔt wi nɔ fɔ jɔs stɔdi wan ɔ tu tɛm ɛvri wik.

7. Aw di ticha go pripia gud gud wan fɔ ɛni Baybul stɔdi we i go kɔndɔkt?

⁷ As di ticha, yu nid fɔ pripia gud gud wan fɔ ɛni Baybul stɔdi we yu gɛt fɔ kɔndɔkt. Yu kin bigin bay we yu de rid wetin una gɛt fɔ stɔdi ɛn rid di skripchɔ dɛn. Tray fɔ ɔndastand di men pɔynt dɛn gud gud wan. Tink bɔt di taytul na di lɛsin, di sɔbɛdin dɛn, di kwɛstyɔn dɛn, di “rid” skripchɔ dɛn, di pikchɔ dɛn, ɛn ɛni fim we go ɛp fɔ ɛksplen wetin una gɛt fɔ stɔdi. Dɔn tink gud gud wan bɔt aw yu go ɛksplen wetin una gɛt fɔ stɔdi simpul ɛn klia wan fɔ ɛp yu Baybul studɛnt fɔ ɔndastand di tin dɛn we i de lan ɛn du dɛn.—Nɛi. 8:​8; Prɔv. 15:​28a.

8. We wi de pre fɔ wi Baybul studɛnt dɛn, wetin di wɔd dɛn we apɔsul Pɔl tɔk na Koloshians 1:​9, 10 de tich wi?

⁸ We yu de pripia fɔ di stɔdi, pre to Jiova bɔt yu studɛnt ɛn di tin dɛn we i nid. Aks Jiova fɔ ɛp yu fɔ yuz di Baybul fɔ tich di pɔsin di kayn we we go tɔch in at. (Rid Koloshians 1:​9, 10.) Aks yusɛf if ɛnitin de we go at fɔ lɛ yu studɛnt ɔndastand ɔ gri wit. Mɛmba se yu gol na fɔ ɛp am te i baptayz.

9. Aw di ticha go ɛp di studɛnt fɔ pripia fɔ in stɔdi? Ɛksplen.

⁹ Wi de op se we wi de stɔdi wi Baybul studɛnt dɛn ɔltɛm, dat go ɛp dɛn fɔ sho se dɛn gladi fɔ ɔl wetin Jiova ɛn Jizɔs dɔn du fɔ dɛn, ɛn dɛn go want fɔ lan mɔ. (Mat. 5:​3, 6) Fɔ lɛ di studɛnt go bɛnifit frɔm di stɔdi, i fɔ rili pe atɛnshɔn pan wetin i de lan. Fɔ lɛ yu go ɛp am fɔ du dat, tɛl am wetin mek i rili impɔtant fɔ lɛ i de pripia fɔ ɛni stɔdi bay we i de rid di lɛsin bifo tɛm ɛn tink bɔt aw i go du wetin i de lan. Aw yu go  ɛp am fɔ pripia? Pripia wan lɛsin wit yu studɛnt fɔ sho am aw fɔ du am. * Sho am aw fɔ fɛn di dayrɛkt ansa to di kwɛstyɔn dɛn, ɛn tɛl am se i go ebul mɛmba di ansa we i jɔs ɔndalayn di men wɔd dɛn. Dɔn aks am fɔ ansa di kwɛstyɔn insay in yon wɔd dɛn. We i du dat, yu go ebul no if i de ɔndastand wetin i de lan. Bɔt wan ɔda tin de we yu kin ɛnkɔrej yu studɛnt fɔ du.

10. Wetin mek i impɔtant fɔ rid di Baybul ɛvride? Wetin wi Baybul studɛnt nid fɔ du fɔ lɛ i bɛnifit frɔm in Baybul ridin?

¹⁰ Apat frɔm we di studɛnt de stɔdi wit in ticha ɛvri wik, i go bɛnifit if i de du sɔm tin dɛn fɔ insɛf ɛvride. I impɔtant fɔ lɛ i de lisin to Jiova ɛn tɔk to am. I go lisin to Gɔd bay we i de rid di Baybul ɛvride. (Jɔs. 1:​8; Sam 1:​1-3) Sho am aw fɔ yuz di “Baybul Ridin Shɛdul” we de na jw.org * we i go ebul fɔ print. Fɔ lɛ i go rili bɛnifit frɔm in Baybul ridin, ɛnkɔrej am fɔ tink gud wan bɔt wetin di Baybul de tich am bɔt Jiova, ɛn ɛnkɔrej am bak fɔ tink bɔt aw i go du wetin i de lan.—Akt 17:​11; Jems 1:​25.

11. Aw wi Baybul studɛnt go lan fɔ pre fayn fayn wan? Wetin mek i impɔtant fɔ lɛ i pre to Jiova ɔltɛm?

¹¹ Ɛnkɔrej yu studɛnt fɔ tɔk to Jiova bay we i de pre ɛvride. Pre frɔm yu at ɛnitɛm we una de stat ɛn dɔn una stɔdi, ɛn pre fɔ yu studɛnt we yu de du dat. As i de lisin to yu prea dɛn, i go lan se insɛf fɔ pre frɔm in at, ɛn i fɔ pre to Jiova Gɔd insay Jizɔs Krays in nem. (Mat. 6:​9; Jɔn 15:​16) Imajin aw yu studɛnt go kam nia Gɔd mɔ ɛn mɔ we i de rid di Baybul ɛvride (dat min se i de lisin to Jiova) ɛn we i de pre (dat min se i de tɔk to Jiova)! (Jems 4:​8) If yu studɛnt de du dɛn tin ya ɛvride, i go ɛp am fɔ go bifo pan in stɔdi, gi in layf to Jiova, ɛn baptayz. Wetin bak go ɛp am?

12. Aw Baybul ticha go ɛp in studɛnt fɔ gɛt tayt padi biznɛs wit Jiova?

¹² Wi want wi studɛnt dɛn fɔ lan bɔt Jiova. Bɔt di tin dɛn we i de lan fɔ tɔch in at so dat i go gladi fɔ du wetin  i de lan. Jizɔs bin tich pipul dɛn bɔku tin dɛn we nɔ bin at fɔ ɔndastand, ɛn dɛn bin lɛk wetin dɛn de lan frɔm am. Bɔt di ɔda rizin we mek pipul dɛn bin de fala am na bikɔs di tin dɛn we i bin de tich bin de tɔch dɛn at. (Lyuk 24:​15, 27, 32) Yu studɛnt nid fɔ si Jiova as rial Pɔsin, as pɔsin we i go ebul fɔ go nia, ɛn as in Papa, in Gɔd, ɛn in Padi. (Sam 25:​4, 5) We una de stɔdi, ɛp am fɔ si di fayn fayn kwaliti dɛn we wi Gɔd gɛt. (Ɛks. 34:​5, 6; 1 Pit. 5:​6, 7) Ilɛk us tɔpik una de tɔk bɔt, ɛp am fɔ no di kayn Pɔsin we Jiova bi. Ɛp di studɛnt fɔ sho se i gladi fɔ Jiova in fayn kwaliti dɛn lɛk in lɔv, in sɔri-at, ɛn we i de du gud. Jizɔs bin se “di lɔ we pas ɔl” ɛn we “na di fɔs wan,” na di wan we se “lɛk Jiova we na yu Gɔd.” (Mat. 22:​37, 38) Tray fɔ ɛp yu studɛnt fɔ lɛk Jiova.

13. Gi wan ɛgzampul bɔt aw fɔ ɛp wi studɛnt fɔ lan bɔt Jiova in fayn kwaliti dɛn.

¹³ We yu de tɔk wit yu studɛnt, tɛl am wetin mek yu lɛk Jiova. Sɔntɛm dis go ɛp yu studɛnt fɔ no se insɛf nid fɔ bi Jiova in padi ɛn lan fɔ lɛk am. (Sam 73:​28) Fɔ ɛgzampul, ɛni sɛntɛns de na wan skripchɔ ɔ buk we wi de yuz fɔ stɔdi pɔsin, we tɔk bɔt Jiova in lɔv, in sɛns, in jɔstis, ɛn in pawa we tɔch yu at? Tɛl yu studɛnt bɔt am, ɛn mek i no se dis na wan pan di rizin dɛn we mek yu lɛk wi Papa we de na ɛvin. Wan ɔda tin de we ɛni Baybul studɛnt nid fɔ du fɔ lɛ i go baptayz.

14. Wetin Ibruz 10:​24, 25 tɛl wi bɔt wi mitin dɛn we go ɛp wi Baybul studɛnt fɔ go bifo pan in stɔdi?

¹⁴ Wi ɔl want fɔ mek wi Baybul studɛnt dɛn baptayz. Wan impɔtant tin we wi go du fɔ ɛp dɛn na we wi de ɛnkɔrej dɛn fɔ atɛnd di mitin dɛn. Baybul ticha dɛn we gɛt ɛkspiriɛns se di studɛnt dɛn we stat fɔ atɛnd mitin insay shɔt tɛm we dɛn bigin fɔ stɔdi, kin go bifo pas di ɔda wan dɛn. (Sam 111:​1) Sɔm ticha dɛn kin tɛl dɛn studɛnt dɛn se fɔ lɛ dɛn ɔndastand di Baybul fayn fayn wan, dɛn nid fɔ atɛnd di mitin dɛn. Rid Ibruz 10:​24, 25 wit yu studɛnt, ɛn tɛl am aw i go bɛnifit we i atɛnd di mitin dɛn. Mek i wach di fim we nem Wetin Kin Apin na Kiŋdɔm Ɔl? * Ɛp yu studɛnt  fɔ mekɔp in maynd se i nɔ go mis ɛni mitin.

15. Wetin wi go du fɔ ɛnkɔrej wi studɛnt fɔ atɛnd di mitin dɛn ɔltɛm?

¹⁵ Wetin yu go du if yu studɛnt nɔ bigin atɛnd mitin yet, ɔ if i nɔ de atɛnd ɔltɛm? Tɛl am bɔt sɔntin we yu lan na mitin dis biɛn tɛm; tɔk am wit zil. We i si aw yu de fil bɔt di mitin, sɔntɛm dat go ɛnkɔrej am fɔ atɛnd di mitin pas we yu jɔs de invayt am fɔ atɛnd. Gi am di Wachtawa ɔ Wi Kristian Layf ɛn Prichin Wok Mitin Buk we wi de yuz na mitin da wik de. Sho am wetin wi go tɔk bɔt na di nɛks mitin, ɛn aks am us pat i go lɛk fɔ no mɔ bɔt. Di tin dɛn we yu studɛnt go si ɛn yɛri na in fɔs mitin go bɛtɛ fa fawe pas ɛni ɔda tin we i go dɔn ɛva si ɛn yɛri na ɛni ɔda program we i atɛnd na ɔda rilijɔn. (1 Kɔr. 14:​24, 25) I go mit pipul dɛn we de sɛt gud ɛgzampul we i go ebul falamakata, ɛn we go ɛp am te i baptayz.

16. Wetin wi nid fɔ kɔndɔkt Baybul stɔdi wit pipul dɛn te dɛn baptayz? Wetin wi go lan na di nɛks atikul?

¹⁶ Aw wi go kɔndɔkt Baybul stɔdi wit pipul dɛn te dɛn baptayz? Wi kin ɛp ɛni wan pan wi studɛnt dɛn fɔ sho se di stɔdi rili impɔtant to am bay we wi ɛnkɔrej am fɔ stɔdi ɛvri wik ɛn pripia fɔ ɛni stɔdi. Wi want fɔ ɛnkɔrej am bak fɔ tɔk to Jiova ɛn lisin to am ɛvride ɛn fɔ gɛt tayt padi biznɛs wit Am. Wi want fɔ ɛnkɔrej di studɛnt fɔ atɛnd di mitin dɛn. (Luk di bɔks we de na pej 12 we de sho  wetin Baybul studɛnt dɛn fɔ du) Bɔt, akɔdin to wetin wi go lan na di nɛks atikul, fayv mɔ tin dɛn de we Baybul ticha dɛn fɔ du fɔ ɛp dɛn studɛnt dɛn fɔ baptayz.