1. Wetin na di bɛst tin we ɛnibɔdi go disayd fɔ du?

BƆKU tɛm, di tin dɛn we mama ɛn papa dɛn kin disayd fɔ du kin afɛkt dɛn pikin dɛn fɔ lɔng tɛm. If mama ɛn papa dɛn nɔ disayd fɔ du di rayt tin, dɛn go mek prɔblɛm mit dɛn pikin dɛn. Bɔt if dɛn disayd fɔ du di rayt tin, dɛn go ɛp dɛn pikin dɛn fɔ gɛt gladi-at. Bɔt di pikin dɛn bak fɔ disayd fɔ du di rayt tin. Di bɛst tin we ɛnibɔdi go disayd fɔ du na fɔ sav Jiova we na wi Papa we lɛk wi we de na ɛvin.—Sam 73:​28.

2. Wetin na di gud tin dɛn we Jizɔs ɛn in mama ɛn papa bin disayd fɔ du?

² Jizɔs in mama ɛn papa bin dɔn mekɔp dɛn maynd fɔ ɛp dɛn pikin dɛn fɔ sav Jiova, ɛn di tin dɛn we dɛn bin de disayd fɔ du bin de sho se na dat bin impɔtant to dɛn pas ɛni ɔda tin. (Lyuk 2:​40, 41, 52) Jizɔs insɛf bin disayd fɔ du gud tin dɛn we bin ɛp am fɔ du wetin Jiova want am fɔ du. (Mat. 4:​1-10) Jizɔs bin gro ɔp fɔ bi man we gud, we nɔ de kɔmɔt biɛn pipul dɛn, ɛn we gɛt maynd. Ɛni mama ɔ papa we lɛk Jiova go gladi fɔ gɛt pikin lɛk am.

3. Us kwɛstyɔn dɛn wi go ansa insay dis atikul?

³ Insay dis atikul, wi go ansa dɛn kwɛstyɔn dɛn ya we se: Wetin na di gud tin dɛn we Jiova bin disayd fɔ du fɔ Jizɔs? Wetin mama ɛn papa dɛn we na Kristian go lan frɔm wetin Jizɔs in mama ɛn papa bin disayd fɔ du? Ɛn wetin pikin dɛn kin lan frɔm di tin dɛn we Jizɔs bin disayd fɔ du?

4. Us impɔtant tin we Jiova bin disayd fɔ du fɔ in Pikin?

⁴ Jiova bin pik di bɛst mama ɛn papa fɔ Jizɔs. (Mat. 1:​18-23; Lyuk 1:​26-38) Di tin dɛn we Meri bin tɔk we dɛn rayt na di Baybul de sho se i bin rili lɛk Jiova ɛn in Wɔd.  (Lyuk 1:​46-55) Ɛn di we aw Josɛf bin du wetin Jiova tɛl am bin sho se i bin lɛk Gɔd ɛn i bin want fɔ du wetin Gɔd want.—Mat. 1:​24.

5-6. Wetin Jiova bin alaw fɔ apin to Jizɔs?

⁵ Mɛmba se Jiova nɔ bin pik pipul dɛn we jɛntri fɔ bi Jizɔs in mama ɛn papa. Di sakrifays we Josɛf ɛn Meri bin mek afta we dɛn bɔn Jizɔs bin sho se dɛn po. (Lyuk 2:​24) Sɔntɛm Josɛf bin gɛt wan smɔl kapɛntri shɔp nia in os na Nazarɛt usay i bin de wok as kapɛnta. I go bi se dɛn bin de liv simpul layf, mɔ we sɔntɛm dɛn bin gɛt lɛk sɛvin pikin dɛn.—Mat. 13:​55, 56.

⁶ Jiova bin protɛkt Jizɔs frɔm sɔm bad tin dɛn, bɔt I nɔ bin protɛkt am frɔm ɔl di prɔblɛm dɛn we bin mit am. (Mat. 2:​13-15) Fɔ ɛgzampul, sɔm pan Jizɔs in fambul dɛn nɔ bin biliv am. Imajin aw Jizɔs go dɔn fil bad we tɛm bin de we sɔm pan in fambul dɛn nɔ bin biliv se in na di Mɛsaya. (Mak 3:​21; Jɔn 7:​5) I go mɔs bi se Jizɔs bin stil yɔŋ we Josɛf day, ɛn i go dɔn rili fil am we dat apin. Dat go dɔn min se na Jizɔs we na di fɔs bɔypikin go dɔn tek ova di famili biznɛs. (Mak 6:​3) As Jizɔs de big, i bin lan aw fɔ kia fɔ in famili. I go mɔs bi se i bin nid fɔ wok tranga wan fɔ sɔpɔt dɛn, so i bin no wetin i min fɔ lɛ pɔsin taya afta we i dɔn wok ol de.

7. (a) Us kwɛstyɔn dɛn go ɛp maredman ɛn mareduman we dɛn de mɛn dɛn pikin dɛn? (b) Aw Prɔvabs 2:​1-6 go ɛp mama ɛn papa dɛn fɔ mɛn dɛn pikin dɛn?

⁷ If una na maredman ɛn mareduman we go want fɔ bɔn pikin dɛn, una aks unasɛf dɛn kwɛstyɔn dɛn ya: ‘Wi na ɔmbul pipul dɛn we lɛk Jiova ɛn in Wɔd? Wi tink se Jiova go pik wi fɔ kia fɔ pikin we na wɔndaful gift?’ (Sam 127:​3, 4, NWT) If yu dɔn ɔlrɛdi gɛt pikin dɛn, aks yusɛf dis kwɛstyɔn: ‘A de ɛp mi pikin dɛn fɔ no se i rili fayn fɔ wok tranga wan?’ (Ɛkli. 3:​12, 13) ‘A de du mi bɛst fɔ protɛkt mi pikin dɛn frɔm di bad tin dɛn we de na Setan in wɔl?’ (Prɔv. 22:​3) I nɔ pɔsibul fɔ mek yu protɛkt yu pikin dɛn frɔm ɔl di prɔblɛm dɛn we go mit dɛn. Bɔt yu go ebul fɔ pripia dɛn fɔ di prɔblɛm dɛn we go mit dɛn bay we yu de kɔntinyu fɔ sho lɔv to dɛn we yu de tich dɛn bɔt aw  dɛn fɔ abop pan di Baybul fɔ advays. (Rid Prɔvabs 2:​1-6.) Fɔ ɛgzampul, if wan pan una fambul dɛn lɛf fɔ sav Jiova, yuz di Baybul fɔ ɛp yu pikin dɛn fɔ no wetin mek i impɔtant fɔ mek dɛn kɔntinyu fɔ de biɛn Jiova. (Sam 31:​23) Ɔ if pɔsin we una lɛk day, sho yu pikin dɛn aw fɔ yuz Gɔd in Wɔd fɔ bia aw dɛn de fil ɛn fɔ gɛt pis.—2 Kɔr. 1:​3, 4; 2 Tim. 3:​16.

8. Akɔdin to Ditarɔnɔmi 6:​6, 7, wetin Josɛf ɛn Meri bin nid fɔ du?

⁸ Josɛf ɛn Meri bin ɛp Jizɔs fɔ gro ɔp as pɔsin we de mek Gɔd gladi bikɔs dɛn bin de du wetin Jiova bin tɛl mama ɛn papa dɛn fɔ du. (Rid Ditarɔnɔmi 6:​6, 7.) Josɛf ɛn Meri bin rili lɛk Jiova, ɛn di tin we bin impɔtant to dɛn pas ɛni ɔda tin na fɔ ɛp dɛn pikin dɛn sɛf fɔ lɛk Jiova.

9. Us impɔtant tin we Josɛf ɛn Meri bin disayd fɔ du?

⁹ Josɛf ɛn Meri bin disayd se dɛn go kɔntinyu fɔ wɔship Jiova ɔltɛm wit dɛn pikin dɛn. Wi nɔ gɛt wan dawt fɔ se ɛni wik dɛn bin de atɛnd di mitin dɛn we dɛn bin de gɛt na di sinagɔg we bin de na Nazarɛt, ɛn dɛn bin de go na Jerusɛlɛm fɔ di Pasova ɛni ia. (Lyuk 2:​41; 4:​16) Sɔntɛm dɛn bin de yuz di tɛm we dɛn kin de na rod fɔ go na Jerusɛlɛm fɔ tich Jizɔs wit in brɔda ɛn sista dɛn bɔt wetin bin apin to Jiova in pipul dɛn. Dɔn bak, i go bi se as dɛn de go, dɛn bin de go waka na sɔm ples we dɛn bin dɔn lan bɔt na di Skripchɔ dɛn. As Josɛf ɛn Meri bin de gɛt mɔ pikin dɛn, i go bi se i nɔ bin izi fɔ mek dɛn de go fɔ wɔship Jiova ɔltɛm. Bɔt Jiova bin blɛs dɛn fɔ we dɛn du dat. Bikɔs dɛn bin put dɛn wɔship to Jiova fɔs na dɛn layf, dat bin mek dɛn famili kɔntinyu fɔ de nia Jiova.

10. Us lɛsin dɛn we mama ɛn papa dɛn we na Kristian kin lan frɔm Josɛf ɛn Meri?

¹⁰ Wetin mama ɛn papa dɛn we lɛk Gɔd go lan frɔm Josɛf ɛn Meri? Wan impɔtant tin we yu fɔ lan na dat di tin dɛn we yu de tɔk ɛn du fɔ sho yu pikin dɛn se yu rili lɛk Jiova. Mɛmba se di bɛst gift we yu go gi dɛn na we yu ɛp dɛn fɔ lɛk Jiova. Ɛn wan pan di impɔtant lɛsin dɛn  we yu go tich dɛn na we yu ɛp dɛn fɔ no se dɛn fɔ de stɔdi di Baybul, pre, ɛn go fil savis ɔltɛm. (1 Tim. 6:​6) Na tru se yu fɔ mek yu pikin dɛn gɛt tin fɔ it, klos fɔ wɛr, say fɔ de, ɛn gi dɛn ɔda tin dɛn we dɛn nid. (1 Tim. 5:​8) Bɔt mɛmba se na yu pikin dɛn tayt padi biznɛs wit Jiova go mek dɛn sev di tɛm we Setan in wɔl go dɔn ɛn we Gɔd go kam wit in nyu wɔl, nɔto di mɔni ɔ prɔpati we dɛn gɛt. *—Izi. 7:​19; 1 Tim. 4:​8.

11. (a) Aw di advays we de na 1 Timoti 6:​17-19 go ɛp mama ɛn papa dɛn fɔ disayd fɔ du di rayt tin we dɛn de mɛn dɛn pikin dɛn? (b) Us gol dɛn we yu famili kin tink bɔt? Us blɛsin dɛn una go gɛt? (Luk di bɔks we se “ Us Gol dɛn Yu Go Want fɔ Sɛt?”)

¹¹ Wi kin rili gladi fɔ si mama ɛn papa dɛn we na Kristian de disayd fɔ du tin dɛn we go ɛp dɛn pikin dɛn fɔ kam nia Jiova. Dɛn kin wɔship Jiova togɛda ɔltɛm. Dɛn kin atɛnd mitin ɛn kɔnvɛnshɔn, ɛn dɛn kin tek pat na di prichin wok. Sɔm famili dɛn kin ivin go prich na tɛritri we brɔda ɛn sista dɛn nɔ kin go prich ɔltɛm. Ɔda famili dɛn kin go waka na Bɛtɛl ɔ ɛp fɔ bil say dɛn we Jiova in ɔganayzeshɔn kin yuz. Dɛn famili dɛn ya kin spɛn mɔni fɔ du dɛn tin dɛn de, ɛn i go bi se i nɔ kin izi fɔ mek dɛn du dɛn. Bɔt Jiova go gi dɛn bɔku blɛsin dɛn fɔ wetin dɛn de du. (Rid 1 Timoti 6:​17-19.) Bɔku tɛm, di pikin dɛn we kin mɛn na dɛn kayn famili dɛn ya kin kɔntinyu fɔ du dɛn gud tin dɛn ya we dɛn big, ɛn dɛn nɔ kin gɛt wan rigrɛt. *—Prɔv. 10:​22, NWT.

12. Wetin Jizɔs bin nid fɔ du as i de gro ɔp?

¹² Jizɔs in Papa we de na ɛvin kin disayd fɔ du di rayt tin ɔltɛm, ɛn ivin in mama ɛn papa we bin de na dis wɔl bin de disayd fɔ du di rayt tin dɛn. Bɔt we Jizɔs bin de gro ɔp, insɛf bin nid fɔ disayd wetin i go du. (Gal. 6:​5) Jɔs lɛk aw wi gɛt di fridɔm fɔ disayd wetin wi want fɔ du, na so Jizɔs insɛf bin gɛt fridɔm fɔ disayd wetin i want fɔ du. I bin lɛf to am fɔ disayd fɔ tink bɔt insɛf nɔmɔ ɛn nɔ du wetin Gɔd want. Bɔt i nɔ du dat, bifo dat, i bin disayd se i go du wetin go mek i kɔntinyu fɔ gɛt tayt padi biznɛs wit Jiova. (Jɔn 8:​29) Aw in ɛgzampul go ɛp pikin tide?

13. Us impɔtant tin we Jizɔs bin disayd fɔ du we i bin stil smɔl?

¹³ We Jizɔs na bin smɔl bɔbɔ, i bin disayd se i go obe in mama ɛn papa. I nɔ ɛva mek trangayes pan dɛn bikɔs i bin fil se i sabi pas dɛn. Bifo dat, “i kɔntinyu fɔ  put insɛf ɔnda dɛn.” (Lyuk 2:​51) Jizɔs bin du in bɛst fɔ du ɔl wetin i fɔ du as di fɔs bɔypikin. I bin tray tranga wan fɔ lan kapɛnta wok frɔm Josɛf, so dat insɛf go ɛp fɔ sɔpɔt in famili.

14. Aw wi no se Jizɔs bin de stɔdi Gɔd in Wɔd gud gud wan?

¹⁴ I go mɔs bi se Jizɔs in mama ɛn papa bin tɛl am bɔt di mirekul we Gɔd pafɔm fɔ mek dɛn bɔn am, ɛn tɛl am bak bɔt wetin Gɔd in mɛsenja dɛn bin dɔn tɔk bɔt am. (Lyuk 2:​8-19, 25-38) Bɔt Jizɔs nɔ bin jɔs satisfay wit wetin dɛn tɛl am, i bin stɔdi di Skripchɔ dɛn fɔ insɛf. Aw wi no se Jizɔs bin de stɔdi Gɔd in Wɔd gud gud wan? Wi no dis bikɔs we i bin stil smɔl, di ticha dɛn na Jerusɛlɛm bin “rili sɔprayz we dɛn si di we aw i ɔndastand ɛn di we aw i de ansa.” (Lyuk 2:​46, 47) Ɛn bay di tɛm we Jizɔs bin ol 12 ia, i bin dɔn ɔlrɛdi pruv to insɛf se Jiova na in Papa.—Lyuk 2:​42, 43, 49.

15. Aw Jizɔs bin sho se i bin dɔn disayd fɔ du wetin Jiova want?

¹⁵ We Jizɔs bin kam fɔ no wetin Jiova want am fɔ du, i bin disayd se i go du wetin Jiova want. (Jɔn 6:​38) I bin no se bɔku pipul dɛn go et am. Pan ɔl we i nɔ bin want fɔ mek dat apin, i bin stil disayd se i go obe Jiova. We Jizɔs bin baptayz insay di ia 29, di tin we bin impɔtant to am pas ɛni ɔda tin na fɔ du wetin Jiova want. (Ibru. 10:​5-7) Ɛn ivin we Jizɔs bin de day na di tik we i bin de sɔfa pan, i kɔntinyu fɔ du wetin in Papa want.—Jɔn 19:​30.

16. Wetin na wan lɛsin we pikin dɛn kin lan frɔm Jizɔs?

¹⁶ Obe yu mama ɛn papa. Yu mama ɛn papa nɔ pafɛkt jɔs lɛk aw Josɛf ɛn Meri nɔ bin pafɛkt. Bɔt Jiova dɔn gi yu mama ɛn papa di wok fɔ protɛkt yu, tren yu, ɛn gayd yu. If yu lisin to dɛn advays ɛn obe dɛn, “tin go fayn fɔ yu.”—Ɛfi. 6:​1-4.

17. Akɔdin to Jɔshwa 24:​15, wetin pikin dɛn go nid fɔ disayd fɔ dɛnsɛf?

¹⁷ Pik udat yu go sav. Yu nid fɔ pruv to yusɛf di kayn Gɔd we Jiova bi, wetin i want, ɛn aw yu go du wetin i want. (Rom. 12:​2) We yu du dat, yu go ebul fɔ disayd se yu go sav Jiova, ɛn dat na di tin we impɔtant pas ɛni ɔda tin we yu go  disayd fɔ du. (Rid Jɔshwa 24:​15; Ɛkli. 12:​1) If yu kɔntinyu fɔ rid ɛn stɔdi di Baybul ɔltɛm, dat go mek yu kɔntinyu fɔ lɛk Jiova, ɛn yu go gɛt mɔ fet pan am.

18. Wetin na wan tin we pikin dɛn fɔ disayd fɔ du? Wetin go apin we dɛn du dat?

¹⁸ Disayd se yu go put wetin Jiova want fɔs na yu layf. Setan in wɔl de mek wi fil se wi go gladi if wi yuz wetin wi sabi du fɔ bɛnifit wisɛf. Bɔt wi no se di wan dɛn we de fɛt fɔ gɛt bɔku mɔni ɛn prɔpati kin gi dɛnsɛf “pen ɔlsay na dɛn bɔdi.” (1 Tim. 6:​9, 10) Bɔt if yu lisin to Jiova ɛn disayd se yu go put wetin i want fɔs na yu layf, yu go gɛt tru tru gladi-at ɛn “yu go du tin wit sɛns.”—Jɔs. 1:​8, NWT.

19. Wetin mama ɛn papa dɛn fɔ mɛmba?

¹⁹ Mama ɛn papa dɛn, una du una bɛst fɔ ɛp una pikin dɛn fɔ sav Jiova. Abop pan am, ɛn i go ɛp yu fɔ du di rayt tin. (Prɔv. 3:​5, 6) Mɛmba se di tin dɛn we yu de du go afɛkt yu pikin dɛn mɔ pas wetin yu de tɔk. So disayd fɔ du di tin dɛn we go ɛp yu pikin dɛn fɔ mek Jiova gladi.

20. Us blɛsin dɛn we pikin dɛn go gɛt if dɛn disayd fɔ sav Jiova?

²⁰ Pikin dɛn, una mama ɛn papa dɛn go ɛp una fɔ du di rayt tin. Bɔt i lɛf to una fɔ disayd fɔ du di rayt tin fɔ mek Gɔd gladi. So falamakata Jizɔs ɛn disayd fɔ sav yu Papa we lɛk yu we de na ɛvin. If yu du dat, yu go gɛt bɔku tin dɛn fɔ du, yu layf go gɛt minin, ɛn yu go ebul fɔ ɛnjɔy yu layf naw. (1 Tim. 4:​16) Ɛn tumara bambay, yu go liv di bɛst layf!