1. Us op Jiova dɔn gi wi?

 JIOVA dɔn gi wi wɔndaful op fɔ gɛt layf we go de sote go. Sɔm de op fɔ de sote go na ɛvin as spirit we nɔ de day. (1 Kɔr. 15:​50, 53) Bɔt, bɔku de op fɔ liv na dis wɔl sote go wit pafɛkt wɛlbɔdi ɛn gladi-at. (Rɛv. 21:​3, 4) Ilɛk wi op na fɔ de sote go na ɛvin ɔ na dis wɔl, wi op na sɔntin we rili valyu to wi.

2. Wetin na di rizin we mek wi gɛt op? Wetin mek wi se so?

² Akɔdin to aw dɛn yuz di wɔd “op” na di Baybul, i min fɔ “biliv tranga wan se gud tin dɛn go apin.” Wi op fɔ tumara bambay garanti bikɔs na frɔm Jiova i kɔmɔt. (Rom. 15:​13) Wi no wetin i dɔn prɔmis, ɛn wi no se i de du wetin i dɔn prɔmis ɔltɛm. (Nɔm. 23:​19) Wi biliv tranga wan se Jiova want fɔ du ɔl wetin i dɔn prɔmis, ɛn i gɛt di pawa fɔ du am. So wi op nɔto sɔntin we wi jɔs de imajin ɔ sɔntin we wi want fɔ apin. Wi gɛt op bikɔs wi biliv pan sɔntin we rial.

3. Wetin wi go tɔk bɔt insay dis atikul? (Sam 27:​14, NWT)

³ Wi Papa we de na ɛvin lɛk wi, ɛn i want mek wi abop pan am. (Rid Sam 27:​14, NWT.) We wi rili biliv Jiova ɛn nɔ gɛt wan dawt se wetin wi op fɔ go apin, wi go ebul fɔ bia prɔblɛm dɛn ɛn gɛt maynd ɛn gladi ilɛk wi gɛt prɔblɛm. Lɛ wi tɔk bɔt aw wi op de protɛkt wi. Fɔs, wi go tɔk bɔt aw op tan lɛk ankɔ ɛn aw i tan lɛk ɛlmɛt. Dɔn wi go  tɔk bɔt aw wi go mek wi op kɔntinyu fɔ strɔng mɔ ɛn mɔ.

4. Aw op tan lɛk ankɔ? (Ibruz 6:​19)

⁴ Insay Pɔl in lɛta to di Ibru Kristian dɛn, i bin kɔmpia wi op to ankɔ. (Rid Ibruz 6:​19.) Bɔku tɛm Pɔl bin de travul na si, so i bin no se dɛn kin yuz ankɔ fɔ ol di ship fɔ mek wata nɔ kɛr am go. Wantɛm, in na bin pasenja na wan ship we big big briz bigin fɔ blo. We di briz bin de blo, i bin si we di man dɛn we bin de wok na di ship sɛn ankɔ dɛn insay di wata fɔ protɛkt di ship fɔ mek i nɔ go usay di rɔk dɛn de we go mek i pwɛl. (Akt 27:​29, 39-41) Jɔs lɛk aw ankɔ de ol ship fɔ mek wata nɔ kɛr am go, na so wi op de ɛp wi fɔ kɔntinyu fɔ de nia Jiova so dat wi nɔ go kɔmɔt nia am we wi gɛt prɔblɛm dɛn we tan lɛk big big briz. Wi op de mek wi nɔ wɔri we wi gɛt prɔblɛm dɛn bikɔs wi biliv tranga wan se tin go bɛtɛ tumara bambay. Mɛmba, Jizɔs bin wɔn wi se, pipul dɛn go mek wi sɔfa. (Jɔn 15:​20) So we wi de tink gud gud wan bɔt wetin Jiova dɔn prɔmis wi fɔ tumara bambay, dat go ɛp wi fɔ kɔntinyu fɔ sav am.

5. Aw op bin ɛp Jizɔs fɔ kɔntinyu fɔ fetful we i bin gɛt fɔ day?

⁵ Tink bɔt aw op bin ɛp Jizɔs fɔ kɔntinyu fɔ fetful pan ɔl we i bin no se i go sɔfa te i day. Di de fɔ Pɛntikɔst 33 afta Krays, apɔsul Pita bin kot wan prɔfɛsi we de na Sam we tɔk fayn wan bɔt wetin Jizɔs bin shɔ bɔt. Da prɔfɛsi de se: “A go gɛt op, bikɔs yu nɔ go lɛf mi na di Grev, ɛn yu nɔ go alaw di wan we nɔ de kɔmɔt biɛn yu fɔ rɔtin. . . . Yu go mek a gladi pasmak bifo yu.” (Akt 2:​25-28; Sam 16:​8-11) Pan ɔl we Jizɔs bin no se i go day, i bin gɛt strɔng op se Gɔd go gi am layf bak, ɛn i go gladi fɔ jɔyn in Papa bak na ɛvin.—Ibru. 12:​2, 3.

6. Wetin wan brɔda bin se bɔt op?

⁶ Wi Kristian op dɔn ɛp bɔku pan wi brɔda ɛn sista dɛn fɔ bia. Tink bɔt Lionad Chin in ɛgzampul, we na fetful brɔda we bin de na Ingland. Insay di Fɔs Wɔl Wɔ, dɛn bin put am na prizin bikɔs i nɔ bin gri fɔ jɔyn soja. Fɔ tu mɔnt, dɛn bin lɔk am na say we na in wan bin de ɛn dɛn bin de fos am fɔ du tranga wok. Leta i bin rayt se: “Di tin we bin apin to mi bin ɛp mi fɔ no aw op impɔtant fɔ mek wi go ebul fɔ bia. Wi gɛt Jizɔs, di apɔsul dɛn, ɛn di prɔfɛt dɛn ɛgzampul dɛn, dɔn bak wi gɛt wɔndaful prɔmis dɛn na di Baybul. Ɔl dis de gi wi big big op fɔ tumara bambay ɛn ɛp wi fɔ bia.” Op bin tan lɛk ankɔ fɔ Lionad, ɛn i go tan lɛk ankɔ fɔ wi bak.

7. Aw prɔblɛm dɛn de ɛp fɔ mek wi op strɔng mɔ ɛn mɔ? (Romans 5:​3-5; Jems 1:​12)

⁷ Wi op de strɔng mɔ ɛn mɔ we wi bia prɔblɛm dɛn ɛn si aw Jiova de ɛp ɛn gladi fɔ wi. (Rid Romans 5:​3-5; Jems 1:​12.) So naw wi op dɔn strɔng pas aw i bin de we wi lan di trut fɔ di fɔs tɛm. Setan want mek wi giv-ɔp we prɔblɛm dɛn mit wi, bɔt wit Jiova in ɛp wi go ebul fɔ bia ɛni prɔblɛm we mit wi.

8. Aw op tan lɛk ɛlmɛt? (1 Tɛsalonians 5:​8)

⁸ Di Baybul kɔmpia wi op bak to ɛlmɛt. (Rid 1 Tɛsalonians 5:​8.) Sojaman kin wɛr ɛlmɛt fɔ protɛkt in ed. Bikɔs wi de fɛt agens Setan, wi nid fɔ protɛkt wi maynd frɔm Setan in atak dɛn. I de yuz bɔku difrɛn tin dɛn fɔ tɛmt wi so dat i go ambɔg di we aw wi de tink. Jɔs lɛk aw  ɛlmɛt de protɛkt sojaman in ed, na so wi op de protɛkt di we aw wi de tink so dat wi go kɔntinyu fɔ fetful to Jiova.

9. Wetin go apin to pipul dɛn if dɛn nɔ gɛt op?

⁹ Wi op fɔ gɛt layf we go de sote go de ɛp wi fɔ disayd fɔ du di rayt tin. Bɔt if wi nɔ gɛt bɛtɛ op igen ɛn alaw wisɛf fɔ de tink bɔt tin dɛn we di bɔdi want, wi go fɔgɛt bɔt wi op fɔ gɛt layf we go de sote go. Tink bɔt sɔm Kristian dɛn we bin de insay Kɔrint. Dɛn nɔ bin gɛt fet igen pan wan impɔtant prɔmis we Gɔd bin mek, we na fɔ gi layf bak to di wan dɛn we dɔn day. (1 Kɔr. 15:​12) Pɔl bin rayt se di wan dɛn we nɔ biliv se pɔsin we dɔn day go gɛt layf bak go tray fɔ satisfay wetin dɛn want nɔmɔ. (1 Kɔr. 15:​32) Tide, bɔku pipul dɛn we nɔ gɛt op pan Gɔd in prɔmis dɛn de du ɛnitin we dɛn ebul fɔ mek dɛn gladi fɔ shɔt tɛm. Bɔt wi difrɛn bikɔs wi put wi op pan di prɔmis dɛn we Gɔd dɔn mek fɔ tumara bambay. Wi op tan lɛk ɛlmɛt we de protɛkt di we aw wi de tink ɛn ɛp wi fɔ mek wi nɔ tink bɔt wisɛf nɔmɔ, we go ambɔg wi padi biznɛs wit Jiova.—1 Kɔr. 15:​33, 34.

10. Aw wi op de protɛkt wi fɔ mek wi nɔ tink di rɔng we?

¹⁰ Wi op we tan lɛk ɛlmɛt de protɛkt wi bak fɔ mek wi nɔ tink se wi nɔ go ɛva ebul fɔ mek Jiova gladi. Fɔ ɛgzampul, sɔntɛm sɔm go tink se: ‘A nɔ go ɛva bi wan pan di wan dɛn we go gɛt layf we go de sote go. Mi nɔto gud pɔsin. A nɔ go ɛva ebul fɔ du wetin Gɔd want mi fɔ du.’ Mɛmba se Job in lay lay padi we na Ɛlifaz bin tɛl Job da sem kayn tin de. Ɛlifaz bin se: “Udat na mɔtalman we yu go se klin na PAPA GƆD [in] yay? I kɔntinyu fɔ tɔk se: “PAPA GƆD nɔ biliv nɔn pan di wan dɛn we de wok fɔ am, di wan dɛnsɛf we de na di ɛvin dɛn nɔ klin nain yay.” (Job 15:​14, 15) Dat na big big lay! Mɛmba se na Setan want yu fɔ tink da we de. I no se if yu kɔntinyu fɔ tink da we de, yu nɔ go gɛt op igen. So, nɔ pe atɛnshɔn pan dɛn kayn lay dɛn de, bɔt pe atɛnshɔn pan Jiova in prɔmis dɛn. Nɔ ɛva dawt se i want yu fɔ gɛt layf we go de sote go ɛn i go ɛp yu fɔ gɛt am.—1 Tim. 2:​3, 4.

11. Wetin mek wi fɔ peshɛnt as wi de wet fɔ mek Gɔd du di tin dɛn we i dɔn prɔmis?

¹¹ I nɔ kin izi ɔltɛm fɔ mek wi kɔntinyu fɔ gɛt strɔng op. Sɔntɛm wi nɔ go kɔntinyu fɔ peshɛnt wet fɔ Gɔd fɔ mek i go du di tin dɛn we i dɔn prɔmis. Bɔt, Jiova na Gɔd we de ɔltɛm, ɛn di we aw i de si tɛm difrɛn frɔm aw wi de si am. (2 Pit. 3:​8, 9) I go du ɔl di tin dɛn we i dɔn prɔmis di bɛst we, bɔt sɔntɛm i nɔ go du am di tɛm we wi de ɛkspɛkt am fɔ du am. Wetin go ɛp wi fɔ kɔntinyu fɔ gɛt strɔng op as wi de peshɛnt wet fɔ mek Gɔd du ɔl di tin dɛn we i dɔn prɔmis?—Jems 5:​7, 8.

12. Akɔdin to Ibruz 11:​1, 6, wetin op gɛt fɔ du wit fet?

¹² Wi go kɔntinyu fɔ gɛt strɔng op if wi kɔntinyu fɔ de nia Jiova, di wan we go mek wetin wi op fɔ kam tru. Infakt, fɔ mek wi go gɛt op, wi fɔ gɛt fet se Gɔd de ɛn na in “de pe di wan dɛn we de luk fɔ am wit ɔl dɛn at.” (Rid Ibruz 11:​1, 6.) Di mɔ we Jiova rial to wi, na di mɔ wi go gɛt kɔnfidɛns se i go du ɔl di tin dɛn we i dɔn prɔmis. Lɛ wi tɔk bɔt sɔm tin dɛn we go ɛp wi fɔ gɛt tayt padi biznɛs wit Jiova ɛn ɛp wi fɔ kɔntinyu fɔ gɛt strɔng op.

13. Aw wi go ebul kam nia Gɔd?

¹³ Pre to Jiova, ɛn rid in Wɔd. Pan ɔl we  wi nɔ de si Jiova, wi go ebul fɔ kam nia am. Wi kin tɔk to am we wi pre to am ɛn gɛt kɔnfidɛns se i go lisin to wi. (Jɛr. 29:​11, 12) Wi go ebul lisin to Gɔd we wi rid in Wɔd ɛn tink gud wan bɔt am. As wi de rid bɔt aw Jiova bin bisin bɔt di wan dɛn we nɔ bin kɔmɔt biɛn am trade, wi op go strɔng mɔ ɛn mɔ. Dɛn rayt ɔltin we de na Gɔd in Wɔd “fɔ tich wi, so dat di bia we wi de bia ɛn di kɔrej we di Skripchɔ dɛn de kɔrej wi go mek wi gɛt op.”—Rom. 15:​4.

14. Wetin mek i fayn fɔ tink bɔt wetin Jiova bin dɔn du fɔ ɔda pipul dɛn?

¹⁴ Tink gud wan bɔt aw Jiova dɔn du di tin dɛn we i bin prɔmis. Tink bɔt wetin Gɔd bin du fɔ Ebraam ɛn Sera. Dɛn bin dɔn rili ol fɔ bɔn pikin dɛn. Bɔt stil, Gɔd bin prɔmis dɛn se dɛn go bɔn pikin. (Jɛn. 18:​10) Wetin Ebraam bin du? Di Baybul se: “I [bin] gɛt fet se i go bi papa fɔ bɔku neshɔn dɛn.” (Rom. 4:​18) Pan ɔl we Ebraam nɔ bin no aw Gɔd go du wetin i dɔn prɔmis, i bin gɛt kɔnfidɛns se Jiova go du wetin I dɔn prɔmis. Gɔd nɔ bin disapɔynt da fetful man de. (Rom. 4:​19-21) Dɛn kayn stori dɛn de, de tich wi se wi fɔ biliv se Jiova go du di tin dɛn we i dɔn prɔmis ɔltɛm, ivin if i tan lɛk se i nɔ pɔsibul.

15. Wetin mek wi fɔ tink bɔt wetin Gɔd dɔn du fɔ wi?

¹⁵ Tink bɔt wetin Jiova dɔn du fɔ yu. Tink bɔt aw yu dɔn ɔlrɛdi bɛnifit frɔm di prɔmis dɛn we de na Gɔd in Wɔd we dɔn kam tru. Fɔ ɛgzampul, Jizɔs bin prɔmis se in Papa go gi yu di tin dɛn we yu nid fɔ liv. (Mat. 6:​32, 33) Jizɔs mek yu no bak se Jiova go gi yu oli spirit we yu aks fɔ am. (Lyuk 11:​13) Jiova dɔn kip dɛn prɔmis dɛn de. Sɔntɛm, yu go ebul tink bɔt  ɔda tin dɛn we i dɔn prɔmis yu we i dɔn du fɔ yu. Fɔ ɛgzampul, i prɔmis fɔ fɔgiv yu, fɔ kɔrej yu, ɛn fɔ gi yu tin dɛn we go ɛp yu fɔ gɛt tayt padi biznɛs wit am. (Mat. 6:​14; 24:​45; 2 Kɔr. 1:​3) We yu tink gud wan bɔt wetin Gɔd dɔn ɔlrɛdi du fɔ yu, yu op go strɔng mɔ ɛn mɔ pan wetin i go du fɔ yu tumara bambay.

16. Wetin mek op na gift we rili valyu?

¹⁶ Wi op fɔ gɛt layf we go de sote go na gift frɔm Gɔd we rili valyu. Wi de wet fɔ si we da wɔndaful prɔmis de go kam tru. Wi op tan lɛk ankɔ we de ɛp wi fɔ tinap tranga wan we wi gɛt prɔblɛm dɛn, we pipul dɛn de mek wi sɔfa, ɛn ivin we day mit wi. I tan lɛk ɛlmɛt we de protɛkt di we aw wi de tink so dat wi go avɔyd fɔ tink bɔt tin dɛn we bad ɛn kɔntinyu fɔ tink bɔt tin dɛn we gud. Dis op we di Baybul tɛl wi bɔt de ɛp wi fɔ no Gɔd mɔ ɛn mɔ ɛn sho wi aw i rili lɛk wi. Wi de rili bɛnifit we wi kɔntinyu fɔ mek wi op strɔng mɔ ɛn mɔ.

17. Wetin mek wi op de mek wi gladi?

¹⁷ Insay apɔsul Pɔl in lɛta to di Kristian dɛn na Rom, i bin ɛnkɔrej wi se: “Una gladi fɔ di op we una gɛt.” (Rom. 12:​12) Pɔl bin gladi bikɔs i bin shɔ se if i kɔntinyu fɔ fetful, i go gɛt layf we go de sote go na ɛvin. Wisɛf go gladi fɔ di op we wi gɛt bikɔs wi shɔ se Jiova go du di tin dɛn we i dɔn prɔmis. Wan pan di man dɛn we rayt di sam buk bin rayt se, ‘di pɔsin we abop pan PAPA GƆD [Jiova, NWT] we na in Gɔd, gɛt gladi-at, in na PAPA GƆD we yu kin abop pan.’—Sam 146:​5, 6.