Wetin Mek Wi Nɔ De Fɛt Wɔ pan ɔl we di Izrɛlayt dɛn Trade Bin De Fɛt Wɔ?
WE DƐN bin de fɛt Wɔl Wɔ II, wan Nazi ɔfisa bin ala pan sɔm Jiova Witnɛs dɛn se: “If ɛniwan pan una nɔ gri fɔ fɛt agens Frans ɔ Ingland, una ɔl go day!” Pan ɔl we Nazi sojaman dɛn we bin ol wɛpɔn bin tinap nia wi brɔda dɛn, nɔn pan dɛn nɔ gri fɔ go agens Jiova in lɔ. Dɛn bin sho se dɛn rili gɛt maynd! Dis na fayn ɛgzampul we de sho aw Jiova Witnɛs dɛn de si wɔ. Wi nɔ de gri fɔ fɛt di wɔ dɛn we dɛn kin fɛt na dis wɔl. Pan ɔl we pipul dɛn kin trɛtin fɔ kil wi, wi nɔ de gri fɔ put an pan di wɔ dɛn na dis wɔl.
Bɔt nɔto ɔlman we se in na Kristian gri wit di we aw Jiova Witnɛs dɛn de si wɔ. Bɔku pan dɛn biliv se Kristian dɛn fɔ fɛt fɔ dɛn kɔntri. Dɛn kin se: ‘If di Izrɛlayt dɛn we na bin Gɔd in pipul dɛn trade bin de fɛt wɔ, wetin mek Kristian dɛn nɔ fɔ fɛt wɔ tide?’ Aw yu go ansa? Wɛl, yu kin ɛksplen se di Izrɛlayt dɛn tɛm rili difrɛn frɔm Gɔd in pipul dɛn tɛm tide. Lɛ wi tɔk bɔt fayv tin dɛn we mek wi difrɛn.
1. GƆD IN PIPUL DƐN ƆL BIN DE NA WANGREN NESHƆN
Trade, na wangren neshɔn Jiova bin pik fɔ bi in pipul dɛn, dat na di Izrɛlayt dɛn. I bin de kɔl dɛn in “spɛshal prɔpati pan ɔl di pipul dɛn na di wɔl.” (Ɛks. 19:5, NWT) Dɔn bak, Gɔd bin gi dɛn wan patikyula say we dɛn fɔ de. So we Gɔd bin tɛl di Izrɛlayt dɛn fɔ go fɛt ɔda neshɔn dɛn, dɛn nɔ bin de fɛt ɔ kil dɛn kɔmpin dɛn we bin de wɔship Jiova. *
Tide, di wan dɛn we de wɔship Jiova di rayt we de na “ɔl di neshɔn dɛn, trayb dɛn, pipul dɛn, ɛn dɛn de tɔk difrɛn langwej dɛn.” (Rɛv. 7:9) So if Gɔd in pipul dɛn miks pan wɔ, dat min se dɛn go fɛt ɛn ivin kil dɛn kɔmpin dɛn we de wɔship Jiova.
2. NA JIOVA BIN DE TƐL DI IZRƐLAYT DƐN FƆ GO FƐT WƆ
Trade, na Jiova bin de disayd ustɛm ɛn wetin mek di Izrɛlayt dɛn fɔ go fɛt wɔ. Fɔ ɛgzampul, Gɔd bin tɛl di Izrɛlayt dɛn fɔ fɛt so dat dɛn go mek di jɔjmɛnt we i dɔn pas pan di Kenanayt dɛn apin. Ɔlman bin no se di Kenanayt dɛn bin de wɔship dimɔn dɛn, dɛn bin de du mami ɛn dadi biznɛs di we aw Gɔd nɔ want ɛn liv dɔti layf, dɔn bak dɛn bin de sakrifays pikin dɛn. Jiova bin tɛl di Izrɛlayt dɛn fɔ dɔnawe wit dɛn pipul dɛn ya we bin de du dɛn wikɛd tin dɛn de na di Prɔmis Land, so dat di Izrɛlayt dɛnsɛf nɔ go du dɛn bad tin dɛn de. (Lɛv. 18:24, 25) Afta di Izrɛlayt dɛn bin dɔn go de na di Prɔmis Land, tɛm dɛn bin de we Gɔd bin de tɛl dɛn fɔ go fɛt wɔ so dat dɛn go protɛkt di Izrɛlayt dɛn frɔm dɛn ɛnimi dɛn. (2 Sam. 5:17-25) Bɔt Jiova nɔ bin ɛva alaw di Izrɛlayt dɛn fɔ disayd fɔ dɛnsɛf se dɛn de go fɛt wɔ. Ɛnitɛm we dɛn disayd fɔ go fɛt wɔ fɔ dɛnsɛf, na bad tin dɛn bin de apin.—Nɔm. 14:41-45; 2 Kro. 35:20-24.
Tide, Jiova nɔ de tɛl mɔtalman fɔ go fɛt wɔ. Neshɔn dɛn de fɛt fɔ wetin mɔtalman want, nɔto wetin Gɔd want. Dɛn kin stat wɔ bikɔs dɛn want fɔ kɔntrol mɔ kɔntri dɛn, dɛn want bɔku mɔni, ɔ bikɔs ɔf pɔlitiks biznɛs. Bɔt wetin wi go se bɔt di wan dɛn we se dɛn de fɛt fɔ Gɔd so dat dɛn go protɛkt dɛn rilijɔn ɔ dɛn go kil Gɔd in ɛnimi dɛn? Jiova go protɛkt di wan dɛn we de wɔship am di rayt we ɛn dɔnawe wit in ɛnimi dɛn insay di wɔ we i go fɛt tumara bambay, we na Amagɛdɔn. (Rɛv. 16:14, 16) Insay da wɔ de, na enjɛl dɛn nɔmɔ go bi Gɔd in sojaman dɛn, nɔto di pipul dɛn we de wɔship am na dis wɔl.—Rɛv. 19:11-15.
3. DI IZRƐLAYT DƐN NƆ BIN DE KIL DI WAN DƐN WE SHO SE DƐN GƐT FET PAN JIOVA
We pipul dɛn de fɛt wɔ tide, fɔ se dɛn kin avɔyd fɔ kil di fetful wan dɛn lɛk aw Jiova bin mek dɛn nɔ kil Reab ɛn in famili we di Izrɛlayt dɛn bin go fɛt agens Jɛriko?
Trade, di Izrɛlayt sojaman dɛn bin de sɔri fɔ di wan dɛn we sho se dɛn gɛt fet pan Gɔd, ɛn dɛn bin jɔs de kil di wan dɛn we Jiova dɔn disayd se dɛn fɔ kil. Lɛ wi tɔk bɔt tu ɛgzampul dɛn. Pan ɔl we Jiova bin se di Izrɛlayt dɛn fɔ dɔnawe wit Jɛriko, dɛn nɔ bin kil Reab ɛn in famili bikɔs ɔf di fet we Reab bin gɛt pan Jiova. (Jɔs. 2:9-16; 6:16, 17) Leta, dɛn nɔ bin kil di Gibiɔnayt dɛn afta di Gibiɔnayt dɛn bin sho se dɛn de fred Gɔd.—Jɔs. 9:3-9, 17-19.
Tide, di wan dɛn we kin fɛt wɔ kin kil pipul dɛn we gɛt fet. Ɛn sɔntɛnde, dɛn kin ivin kil di wan dɛn we nɔto sojaman dɛn.
4. DI IZRƐLAYT DƐN BIN GƐT FƆ FALA GƆD IN LƆ DƐN BƆT WƆ
Trade, Jiova bin sho di Izrɛlayt sojaman dɛn wetin-ɛn-wetin dɛn fɔ du we dɛn go fɛt wɔ, ɛn i bin ɛkspɛkt dɛn fɔ fala wetin i tɛl dɛn. Fɔ ɛgzampul, tɛm dɛn bin de we Gɔd bin tɛl dɛn fɔ “tɛl di pipul dɛn wetin dɛn fɔ du lɛ dɛn nɔ go atak dɛn fɔs.” (Dit. 20:10) Dɔn bak, Jiova bin ɛkspɛkt di Izrɛlayt sojaman dɛn fɔ mek shɔ se dɛn bɔdi ɛn dɛn kamp klin. (Dit. 23:9-14) Bɔku tɛm, di sojaman dɛn na di ɔda neshɔn dɛn bin de rep uman dɛn we de na neshɔn dɛn we dɛn dɔn win pan fɛt, bɔt Jiova bin tɛl di Izrɛlayt dɛn se dɛn nɔ fɔ du dat. Infakt, na pas te wan mɔnt dɔn pas afta dɛn kapchɔ siti, na in dɛn fɔ mared uman we dɛn kapchɔ.—Dit. 21:10-13.
Tide, bɔku kɔntri dɛn kin mek agrimɛnt se dɛn go fala sɔm patikyula lɔ dɛn we dɛn de fɛt wɔ. Pan ɔl we dɛn kin mek dɛn agrimɛnt dɛn ya fɔ protɛkt di wan dɛn we nɔto sojaman dɛn, i sɔri fɔ no se bɔku tɛm dɛn kin go agens di lɔ dɛn we dɛn de mek.
5. GƆD BIN FƐT FƆ IN NESHƆN
Fɔ se Gɔd de fɛt fɔ ɛni neshɔn tide lɛk aw i bin fɛt fɔ Izrɛl na Jɛriko?
Trade, Jiova bin de fɛt fɔ di Izrɛlayt dɛn, ɛn bɔku tɛm i bin de pafɔm mirekul fɔ lɛ dɛn win di wɔ. Fɔ ɛgzampul, aw Jiova bin ɛp di Izrɛlayt dɛn fɔ win di pipul dɛn na Jɛriko? Jiova bin tɛl di Izrɛlayt dɛn fɔ “ala lawd lawd wan ɛn di wɔl . . . fɔdɔm flat wan na grɔn,” so i bin izi fɔ lɛ dɛn kapchɔ di siti. (Jɔs. 6:20) Ɛn aw dɛn bin ebul fɔ win di fɛt agens di Amɔrayt dɛn? “PAPA GƆD [“Jiova,” NWT] mek big big ston dɛn de kɔmɔt ɔp fɔdɔm pan dɛn . . . Di wan dɛn we di ston dɛn kil bin plɛnti pas di wan dɛn we di Izrɛlayt dɛn bin kil.”—Jɔs. 10:6-11.
Tide, Jiova nɔ de fɛt fɔ ɛni neshɔn we de na di wɔl. In Kiŋdɔm, we gɛt Jizɔs as Kiŋ, “nɔ de na dis wɔl.” (Jɔn 18:36) Bɔt na Setan de oba ɔl di mɔtalman gɔvmɛnt dɛn we de na di wɔl. Di wikɛd tin dɛn we dɛn de du we dɛn de fɛt wɔ, de sho di kayn wikɛd pɔsin we Setan bi.—Lyuk 4:5, 6; 1 Jɔn 5:19.
TRU KRISTIAN DƐN DE TRAY FƆ MEK PIS
Lɛk aw wi dɔn si, di tɛm we wi de naw rili difrɛn frɔm di Izrɛlayt dɛn we bin de trade dɛn tɛm. Bɔt nɔto dɛn difrɛns dɛn ya nɔmɔ na di rizin we mek wi nɔ de fɛt wɔ. Ɔda rizin dɛn de. Fɔ ɛgzampul, Gɔd bin dɔn tɔk se insay di las dez, di wan dɛn we i de tich nɔ go “lan fɔ fɛt wɔ igen.” So if dɛn nɔ de lan fɔ fɛt wɔ, dat min se dɛn nɔ go tek pat pan wɔ. (Ayz. 2:2-4, NWT) Dɔn bak, Krays bin dɔn se in disaypul dɛn “nɔ tan lɛk di pipul dɛn na di wɔl”; dɛn nɔ go put an pan wɔ.—Jɔn 15:19.
Krays bin ɛnkɔrej in disaypul dɛn bak fɔ du pas dat. I bin tɛl dɛn nɔ fɔ de biev di kayn we we go mek dɛn de kip grɔj, vɛks, ɛn fɛt wɔ. (Mat. 5:21, 22) Dɔn bak, i bin tɛl in disaypul dɛn fɔ bi pipul dɛn we de “mek pis” ɛn fɔ lɛk dɛn ɛnimi dɛn.—Mat. 5:9, 44.
Aw wi go ebul fɔ du dis? I go mɔs bi se wi nɔ want fɔ fɛt wɔ, bɔt fɔ se wi gɛt bad tin dɛn na wi at we go kɔz prɔblɛm ɔ skata pipul dɛn na di kɔngrigeshɔn? If na so i bi, lɛ wi kɔntinyu fɔ tray tranga wan fɔ pul dɛn bad filin dɛn de kɔmɔt na wi at.—Jems 4:1, 11.
Bifo wi miks pan di wɔ dɛn we pipul dɛn de fɛt na di wɔl, wi de tray tranga wan fɔ mek pis ɛn lɔv de bitwin wisɛf. (Jɔn 13:34, 35) Lɛ wi mekɔp wi maynd fɔ kɔntinyu fɔ nyutral as wi de wet fɔ di tɛm we Jiova go mek wɔ nɔ de igen igen.—Sam 46:9.
^ Sɔntɛnde, sɔm trayb dɛn na Izrɛl bin de fɛt agens ɔda trayb dɛn, pan ɔl we Jiova nɔ bin want dɛn fɔ du dat. (1 Kiŋ 12:24) Bɔt wan wantɛm, Jiova bin de gri fɔ lɛ dɛn fɛt dɛn wɔ dɛn ya bikɔs sɔm trayb dɛn bin dɔn tɔn dɛn bak pan am ɔ dɛn bin dɔn kɔmit siriɔs sin dɛn.—Jɔj 20:3-35; 2 Kro. 13:3-18; 25:14-22; 28:1-8.
You May Also Like
KWƐSTYƆN DƐN WE PIPUL DƐN KIN AKS ƆLTƐM
Wetin Mek Jiova Witnɛs dɛn Nɔ De Fɛt Wɔ?
Ɔlsay na di wɔl, pipul dɛn nɔ Jiova Witnɛs dɛn as pipul dɛn we nɔ de gri fɔ fɛt wɔ. Lan wetin mek wi nɔ de du dat.
