Insay da ia de, di ɔganayzeshɔn bin mek sɔm chenj dɛn we bin ɛp di Baybul Studɛnt dɛn fɔ gɛt wanwɔd. Di Wach Tawa bin bigin fɔ mek kɔmɛnt dɛn we de ɛksplen di skripchɔ we dɛn kin yuz na dɛn Prea, Prez, ɛn Tɛstimɔni mitin we dɛn bin de gɛt insay di wik. Dɔn bak, di Baybul Studɛnt dɛn bin mek kalɛnda we de sho us skripchɔ dɛn go yuz ɛni wik ɛn di siŋ we dɛn go siŋ we dɛn de du dɛn pasɔnal stɔdi ɛn famili wɔship.

Na dɛn mitin dɛn de, di Baybul Studɛnt dɛn bin de tɔk bɔt dɛn “tɛstimɔni dɛn” na fil savis, tɔk bɔt wetin mek dɛn de tɛl Jiova tɛnki, siŋ, ɔ ivin pre. Iva Bani we bin baptayz insay 1923 we i bin ol 15 ia, tɔk se: “If yu want fɔ gi tɛstimɔni, yu go tinap ɛn bigin se sɔntin lɛk, ‘A want fɔ tɛl di Masta tɛnki fɔ ɔl di gud tin dɛn we i dɔn du fɔ mi.’” Sɔm brɔda dɛn bin lɛk fɔ gi tɛstimɔni. Sista Bani kɔntinyu fɔ tɔk se: “Brɔda Gɔdwin we bin dɔn ol bin gɛt bɔku tin dɛn fɔ tɛl di Masta tɛnki fɔ. Bɔt we in wɛf bin si se di brɔda we de kɔndɔkt di mitin dɔn bigin wɔri, i kin drɔ in man in kot smɔl, ɛn in man go stɔp fɔ tɔk ɛn go sidɔm.”

Wantɛm insay di mɔnt, ɔl di kɔngrigeshɔn dɛn bin de gɛt spɛshal Prea, Prez, ɛn Tɛstimɔni Mitin. Di Epril 1, 1923 Wach Tawa tɔk bɔt dis mitin se: “Af pat pan di mitin na fɔ gi kɔmɛnt ɛn ɛkspiriɛns dɛn bɔt di savis wok ɛn fɔ ɛnkɔrej di wokman dɛn. . . . Wi biliv se dis fayn mitin go mek wi brɔda ɛn sista dɛn gɛt wanwɔd mɔ ɛn mɔ.”

Chals Matin, we bin ol 19 ia, we bin de wok na di klas (pɔblisha na di kɔngrigeshɔn) we de na Vankuva, insay Kanada, bin rili bɛnifit frɔm dɛn mitin dɛn ya. I bin tɔk se: “Na di mitin fɔs a lan wetin fɔ se we a bin de prich frɔm os to os. Bɔku tɛm, pɔsin go tɔk bɔt ɛkspiriɛns we i gɛt we i bin de prich frɔm os to os. Dis bin ɛp mi fɔ no wetin fɔ se ɛn aw fɔ ansa pipul dɛn we de tɔk agens wi.”

Di brɔda ɛn sista dɛn bin de gɛt wanwɔd bak mɔ ɛn mɔ we dɛn bin de go fil savis. Di Epril 1, 1923, Wach Tawa bin tɔk se: “Fɔ mek wi ɔl go gɛt wanwɔd pan di sem wok . . . , Tyusde, Me 1, 1923, na di de we wi dɔn pik  fɔ fil savis. Afta dat, ɛni fɔs Tyusde insay ɛni mɔnt, go bi fil savis de . . . Ɔlman na di kɔngrigeshɔn fɔ ɛp fɔ du di wok.”

Ivin yɔŋ Baybul Studɛnt dɛn bin de ɛp fɔ du dis wok. Ezɛl Bɔfɔd, we bin jɔs ol 16 ia da tɛm de, tɔk se: “Di Bulɛtin bin gɛt ɛgzampul dɛn bɔt wetin fɔ se we wi de prich to pipul dɛn (we fiba di ɛgzampul dɛn we wi gɛt naw) so dat wi go ebul lan fɔ prich. a A bin de wok wit Granpa ɛn a bin de du ɔl dɛn wok dɛn ya wit zil.” Bɔt, Sista Bɔfɔd bin sɔprayz bikɔs ɔf aw wan brɔda bin fil bɔt di we aw i de prich. I tɔk se: “Wan ol brɔda bin tɔk se a nɔ fɔ tɔk to pipul dɛn. Da tɛm de, sɔm brɔda ɛn sista dɛn nɔ bin ɔndastand se ɔl Baybul Studɛnt dɛn, ivin ‘yɔŋ man ɛn uman dɛn,’ fɔ jɔyn fɔ prez di Wan we mek wi.” (Sam 148:​12, 13) Bɔt Sista Bɔfɔd bin kɔntinyu fɔ prich. Leta, i bin atɛnd di sɛkɔn klas fɔ Giliad Skul ɛn i bin go sav as mishɔnari na Panama. As tɛm de go, dɛn brɔda dɛn de bin ajɔst di we aw dɛn bin de biev to yɔŋ wan dɛn na fil savis.

Kɔnvɛnshɔn dɛn bak bin mek di brɔda ɛn sista dɛn gɛt wanwɔd mɔ ɛn mɔ. Insay bɔku pan dɛn kɔnvɛnshɔn dɛn ya, dɛn bin de tɔk bɔt fil savis de dɛn, lɛk di wan we dɛn bin gɛt na Winipɛg insay Kanada. Insay Mach 31, dis kɔnvɛnshɔn bin gɛt wan tɔk we bin gɛt di taytul “Special Bombardment of Winnipeg,” ɛn dɛn bin ɛnkɔrej ɔl di wan dɛn we bin atɛnd di kɔnvɛnshɔn fɔ prich na da siti de. Wi bin ebul fɔ prich to bɔku pipul dɛn insay dɛn spɛshal de dɛn ya we wi bin de prich, ɛn wi bin gɛt gud rizɔlt. Insay Ɔgɔst 5, na bin lɛk 7,000 pipul dɛn bin atɛnd di ɔda kɔnvɛnshɔn we wi bin gɛt na Winipɛg. Da tɛm de, pan ɔl di kɔnvɛnshɔn dɛn we wi bin de gɛt na Kanada, dis nɔmba bin pas dɛn ɔl.

Dɛn bin gɛt di kɔnvɛnshɔn we impɔtant pas ɔl di ɔda kɔnvɛnshɔn dɛn we Jiova in pipul dɛn bin dɔn de gɛt insay Ɔgɔst 18 to 26, 1923 na Lɔs Anjɛlis, insay Kalifonia. Insay di wik dɛn bifo di kɔnvɛnshɔn, dɛn bin  de yuz nyuzpepa dɛn fɔ tɔk bɔt di program, ɛn di Baybul Studɛnt dɛn bin gi pas 500,000 anbil dɛn. Dɛn bin gɛt bana dɛn fɔ anawns di kɔnvɛnshɔn na motoka dɛn we dɛn de rɔn as transpɔt ɛn prayvet motoka dɛn.

Wan Satide, Ɔgɔst 25, Brɔda Rutafɔd bin gi wan tɔk we gɛt di tim, “Ship ɛn Got Dɛn,” ɛn i bin sho klia wan se di “ship dɛn” na ɔl di wan dɛn we rili sho se dɛn want fɔ gɛt layf we go de sote go na Paradays na dis wɔl. I bin gi bak wan tɔk ɛn rid sɔntin we dɛn fɔ mekɔp dɛn maynd fɔ du we dɛn kɔl “Wɔnin.” Dis tin ya we i bin rid bin kɔndɛm lay lay rilijɔn dɛn, ɛn i bin ɛnkɔrej di wan dɛn we rili want fɔ lan di tru bɔt Gɔd fɔ kɔmɔt na “Babilɔn di Gret.” (Rɛv. 18:​2, 4) Leta, Baybul Studɛnt dɛn we bin gɛt zil ɔlsay na di wɔl bin sheb sheb bɔku bɔku kɔpi dɛn we bin gɛt dis tin ya we dɛn disayd.

Di las de fɔ di kɔnvɛnshɔn, i bin pas 30,000 pipul dɛn we bin yɛri we Brɔda Rutafɔd de gi di las pɔblik tɔk we gɛt di taytul, “All Nations Marching to Armageddon, but Millions Now Living Will Never Die.” Bikɔs di Baybul Studɛnt dɛn bin de ɛkspɛkt bɔku bɔku pipul dɛn, dɛn bin rɛnt wan big stediɔm na Lɔs Anjɛlis we dɛn bin jɔs bil. Fɔ mek shɔ se ɔlman yɛri, di brɔda dɛn bin yuz di lawdspika dɛn we de na di stediɔm, we na bin nyu tɛknɔlɔji da tɛm de. Bɔku ɔda pipul dɛn bin yɛri di program na redio.

Insay di ia 1923, sɔntin bin apin we bin mek di prichin wok rili go bifo na Afrika, Yurop, India, ɛn Sawt Amɛrika. A. J. Josɛf we bin de na India bin de kia fɔ in wɛf ɛn siks pikin dɛn, ɛn i bin de ɛp fɔ mek pɔblikeshɔn dɛn insay di Indi, Tamil, Telugu, ɛn Udu langwej dɛn.

Alfrɛd Josɛf ɛn Lionad Blakman we na Baybul Studɛnt dɛn we bin de na Salon bin rayt to di wɔl ɛdkwata na Bruklin insay Nyu Yɔk fɔ aks dɛn fɔ ɛp. Dɛn bin riplay dɛn Epril 14, 1923. Alfrɛd tɔk se: “Wan Satide nɛt, a bin gɛt fon kɔl we a nɔ bin de ɛkspɛkt.” I bin yɛri wan lawd vɔys we aks am se, “Na yu bin rayt to di Wach Tawa Sosayti fɔ aks fɔ pipul dɛn fɔ prich?” Alfrɛd bin riplay se, “Yɛs.” Wiliam R. Brawn tɛl am se, “Wɛl, na mi dɛn dɔn sɛn.” In ɛn in wɛf Antonia, ɛn dɛn galpikin dɛn Luwiz ɛn Lusi bin jɔs kɔmɔt na di Karebian da de de. I nɔ bin te bifo di brɔda dɛn si Brɔda Brawn ɛn in famili.

 Alfrɛd kɔntinyu fɔ tɔk se: “Di nɛks mɔnin, mi ɛn Lionad bin de tɔk bɔt di Baybul lɛk aw wi bin dɔn de du ɛni wik. Jɔs lɛk dat, wi si wan tɔl man na di domɔt. Na bin Brɔda Brawn. I bin so gɛt zil fɔ di trut dat i bin want fɔ gi pɔblik tɔk di nɛks de.” I nɔ bin ivin rich wan mɔnt we Brɔda Brawn gi ɔl di pɔblikeshɔn dɛn we i bin kam wit. Jɔs afta dat, i bin gɛt lɛk 5,000 buk dɛn, ɛn i nɔ tu te nid bin de fɔ mɔ buk dɛn. Bɔt dɛn nɔ bin sabi Brɔda Brawn as pɔsin we de sɛl buk dɛn. Insay ɔl di ia dɛn we i dɔn sav Jiova wit zil, i bin de yuz di Skripchɔ dɛn ɔltɛm insay in tɔk dɛn, ɛn na dis bin mek pipul dɛn bigin kɔl am Baybul Brawn.

Insay Jamani, di brɔda dɛn bin disayd fɔ kɔmɔt na di branch ɔfis we bin de na Bamɛn bikɔs i bin tu smɔl. Dɔn bak, dɛn bin dɔn yɛri se i nɔ go tu te di Frɛnch ami go atak di siti. Di Baybul Studɛnt dɛn bin fɛn wan bildin na Magdɔbɔg we bin tan lɛk fayn ples fɔ print wi pɔblikeshɔn dɛn. Di brɔda dɛn bin dɔn fɔ pak di tin we dɛn bin de yuz fɔ print ɛn ɔda tin dɛn ɛn muv go na di nyu Bɛtɛl na Magdɔbɔg insay Jun 19. Afta di de we dɛn mek wɔl ɛdkwata no se dɛn dɔn dɔn fɔ muf, na da sem de de nyuzpepa dɛn anawns se Frans dɔn kapchɔ Bamɛn. Di brɔda dɛn bin tɛl Jiova tɛnki fɔ we i protɛkt dɛn ɛn ɛp dɛn.

Insay Brazil, Jɔj Yɔŋ, we dɔn travul difrɛn say dɛn fɔ prich di gud nyuz bin mek nyu branch ɛn bigin fɔ print Di Wach Tawa insay Pɔtyugiz. Insay shɔt tɛm, i bin gi pas 7,000 smɔl buk ɛn magazin dɛn. Sera Fagɔsin bin rili gladi we brɔda Yɔŋ go fɛn dɛn famili. I bin dɔn de rid Di Wach Tawa frɔm 1899, bɔt i nɔ bin ɛva gɛt di chans fɔ baptayz. Sɔm mɔnt leta, Sista Fagɔsin ɛn in 4 pikin dɛn bin baptayz.

We di ia bin want fɔ dɔn, di Disɛmba 15, 1923 Wach Tawa tɔk bɔt aw di chenj dɛn na di mitin dɛn, di prichin wok, ɛn di kɔnvɛnshɔn bin afɛkt di Baybul Studɛnt dɛn. I tɔk se: “I izi fɔ si se di kɔngrigeshɔn dɛn . . . gɛt strɔng fet . . . Lɛ wi rɛdi fɔ du mɔ wok ɛn kɔntinyu fɔ sav Gɔd wit zil ɛn gladi-at insay 1924.”

Di ia 1924 na bin fayn ia bak fɔ di Baybul Studɛnt dɛn. Di brɔda dɛn na Bɛtɛl bin dɔn de wok fɔ sɔm mɔnt na wan land na Statin Ayland we bin de nia di ɛdkwata na Bruklin. Dɛn bin dɔn fɔ bil di nyu ples dɛn we di ia 1924 bin jɔs bigin, ɛn dɛn bin ɛp fɔ lɛ di brɔda dɛn gɛt wanwɔd ɛn prich di gud nyuz difrɛn we dɛn we nɔ bin pɔsibul bifo dis tɛm.