1-2. Wetin na di bɛst we fɔ rid ɛn stɔdi di Baybul? Gi wan ɛgzampul.

 IMAJIN se yu want fɔ bay os. Wetin yu go want fɔ si bifo yu disayd fɔ bay am? Na jɔs pikchɔ we de sho di frɔnt pat na di os? Wan dawt nɔ de se yu go want fɔ go ɛn si di os, so dat yu go ebul waka rawnd di os, go insay ɛn luk ɔl di rum dɛn, ɛn tek tɛm luk ɔltin we de na di os. Sɔntɛm yu go ivin want fɔ wach di os in plan fɔ si aw dɛn bil am. Fɔ tru, yu go want fɔ wach ɔltin bɔt di os we yu go want fɔ bay.

² Wi kin du di sem tin we wi de rid ɛn stɔdi di Baybul. Wan masta sabi bukman we rayt bɔt di Baybul tɔk se di Baybul tan lɛk “big bildin we rili tɔl ɛn we dɛn bil pan dip fawndeshɔn.” So aw wi go ebul fɔ no gud gud wan wetin de na di Baybul? If yu jɔs rid am kwik kwik wan, na jɔs di men tin dɛn yu go lan, dat na “di pikin pikin tin dɛn bɔt Gɔd in mɛsej frɔm di biginin.” (Ibru. 5:12) Bɔt jɔs lɛk aw yu nid fɔ go insay os fɔ no mɔ bɔt am, na so yu nid fɔ tek tɛm stɔdi di Baybul fɔ mek yu go ɔndastand am gud gud wan. Wan fayn we fɔ stɔdi di Baybul na fɔ si aw di tin dɛn we di Baybul se na wan say kɔnɛkt wit wetin i se ɔdasay. Tray fɔ ɔndastand wetin yu biliv, ɛn tray bak fɔ ɔndastand di rizin dɛn we yu gɛt we mek yu biliv se dɛn tin ya na tru.

3. Wetin apɔsul Pɔl bin ɛnkɔrej in kɔmpin Kristian dɛn fɔ du? Wetin mek? (Ɛfishians 3:​14-19)

³ Fɔ ɔndastand Gɔd in Wɔd gud gud wan, sɔm tin dɛn  de we wi nid fɔ stɔdi gud gud wan. Apɔsul Pɔl bin ɛnkɔrej in Kristian brɔda ɛn sista dɛn fɔ tek tɛm stɔdi Gɔd in Wɔd so dat dɛn go “rili ɔndastand aw di [trut] wayd, lɔng, ay, ɛn dip.” Dɔn, dɛn go ebul “tinap tranga wan” fɔ wetin dɛn biliv. (Rid Ɛfishians 3:​14-19.) Wisɛf nid fɔ du di sem tin. Lɛ wi si aw wi go ebul stɔdi di Baybul gud gud wan fɔ ɔndastand wetin i min.

4. Wetin wi go du fɔ kam nia Jiova? Gi ɛgzampul dɛn.

⁴ As Kristian dɛn, wi nɔ jɔs want fɔ ɔndastand di men tin dɛn we di Baybul de tich. Wi want fɔ lan “ivin di dip tin dɛn bɔt Gɔd,” we di oli spirit go ɛp wi fɔ lan. (1 Kɔr. 2:​9, 10) Yu nɔ tink se i go fayn fɔ stat pasɔnal stɔdi projɛkt we go ɛp yu fɔ kam nia Jiova? Fɔ ɛgzampul, yu kin du risach bɔt aw Jiova sho se i lɛk in savant dɛn trade ɛn aw dat pruv se i lɛk yu bak. Yu kin stɔdi bak bɔt aw Jiova bin want di Izrɛlayt dɛn fɔ wɔship am ɛn kɔmpia dat to aw i want wi fɔ wɔship am tide. Ɔ sɔntɛm yu kin stɔdi gud gud wan bɔt prɔfɛsi dɛn we Jizɔs bin mek kam tru we i bin de na di wɔl.

5. Yu gɛt ɛni tɔpik we yu go lɛk fɔ du risach bɔt as yu pasɔnal stɔdi projɛkt?

⁵ Dɛn bin aks sɔm pipul dɛn we de stɔdi di Baybul gud gud wan bɔt us dip tin dɛn, dɛn go lɛk fɔ stɔdi na Gɔd in Wɔd. Sɔm pan di ansa dɛn we dɛn gi de na di bɔks we gɛt di taytul “ Tɔpik dɛn fɔ Pasɔnal Stɔdi Projɛkt.” Yu go rili gladi we yu stɔdi dɛn tɔpik dɛn de, ɛn di Buk we De Ɛp Jiova Witnɛs dɛn fɔ No bɔt Sɔntin go ɛp yu fɔ stɔdi dɛn tɔpik dɛn de. We yu de stɔdi gud gud wan, dat go ɛp yu fɔ gɛt strɔng fet ɛn ɛp yu fɔ “no bɔt Gɔd.” (Prɔv. 2:​4, 5, NWT) Naw, lɛ wi tɔk bɔt sɔm dip tin dɛn na di Baybul we wi go ebul stɔdi gud gud wan.

6. (a) Wetin na di difrɛns bitwin fɔ plan fɔ du sɔntin ɛn di tin we wi want fɔ du? (b) Wetin mek wi go se wetin Jiova want fɔ du fɔ mɔtalman ɛn di wɔl nɔ go ɛva chenj? (Ɛfishians 3:11)

⁶ Tink bɔt wetin di Baybul se bɔt wetin  Gɔd want fɔ du. We pɔsin plan fɔ du sɔntin, i difrɛn frɔm we i want fɔ du sɔntin. Wi go kɔmpia plan to rod we yu pik we go mek yu rich usay yu de go. Bɔt, if sɔntin blɔk da rod de, sɔntɛm yu nɔ go rich na di ples we yu want fɔ go. Wi go kɔmpia wetin wi want fɔ du to di patikyula ples we wi want fɔ go. Wi no di patikyula ples we wi want fɔ go, bɔt wi kin yuz difrɛn rod dɛn fɔ go de. If wan rod blɔk, wi go ebul yuz ɔda rod. Wi gladi we smɔl smɔl, Jiova dɔn de sho wi na di Baybul “wetin i dɔn disayd fɔ du frɔm trade trade ɛn we i go du sote go.” (Luk di stɔdi not fɔ Ɛfishians 3:11.) Jiova kin pik difrɛn we dɛn fɔ du wetin i want, ɛn i kin ebul du wetin i want ɔltɛm bikɔs i “dɔn mek ɔltin fɔ lɛ wetin i want bi.” (Prɔv. 16:​4, NWT) Ɛn di tin dɛn we Jiova de du go de sote go. Wetin Jiova want fɔ du, ɛn wetin na di tin dɛn we i dɔn ajɔst fɔ mek i go du wetin i want?

7. Afta di fɔs mɔtalman dɛn tɔn dɛn bak pan Jiova, aw i bin ajɔst fɔ mek i go ebul du wetin i want? (Matyu 25:34)

⁷ Gɔd bin tɛl di fɔs mɔtalman dɛn wetin i bin want fɔ dɛn. I bin want dɛn fɔ “bɔn pikin dɛn te [dɛn] bɔku ɛn ful-ɔp di wɔl ɛn mek am fayn, ɛn . . . kɔntrol . . . ɔltin we gɛt layf” na di wɔl. (Jɛn. 1:28) Pan ɔl we Adam ɛn Iv nɔ bin obe Gɔd, ɛn mek sin afɛkt ɔl mɔtalman, dat nɔ go stɔp Jiova fɔ du wetin i want. I bin ajɔst di we aw i go du am. Wantɛm wantɛm, i bin mekɔp in maynd fɔ mek wan Kiŋdɔm na ɛvin we go du wetin i bin want fɔ mɔtalman ɛn di wɔl frɔm di biginin. (Rid Matyu 25:34.) We di tɛm we Jiova dɔn sɛt rich, i bin sɛn in fɔs Bɔypikin fɔ kam na di wɔl fɔ tich pipul dɛn bɔt di Kiŋdɔm ɛn fɔ gi in layf fɔ sev wi frɔm sin ɛn day. Dɔn Jiova bin gi Jizɔs layf bak fɔ go na ɛvin fɔ rul as Kiŋ na Gɔd in Kiŋdɔm. Bɔt mɔ tin dɛn de fɔ lan bɔt wetin Gɔd want fɔ du.

8. (a) Wetin na di Baybul in tim? (b) Akɔdin to Ɛfishians 1:​8-11, wetin bak Jiova go du? (Luk di pikchɔ na di frɔnt pej.)

⁸ Di Baybul in men tim na dat Jiova go pul ɔl di badnem we dɛn dɔn put pan am as i de yuz in Kiŋdɔm we Krays de rul fɔ du wetin i want fɔ di wɔl. Wetin Jiova want fɔ du nɔ de chenj. I dɔn prɔmis se ɔltin go apin jɔs lɛk aw i bin dɔn tɔk. (Ayz. 46:​10, 11; Ibru. 6:​17, 18) As tɛm de go, di wɔl go tɔn to paradays usay Adam ɛn Iv dɛn pikin dɛn we go dɔn pafɛkt ɛn de du wetin rayt go “ɛnjɔy layf sote go.” (Sam 22:​26, NWT) Bɔt nɔto dis nɔmɔ Jiova go du. I go mek bak ɔl in savant dɛn na ɛvin ɛn na di wɔl gɛt wanwɔd. Dɔn ɔlman go obe Jiova as dɛn Rula. (Rid Ɛfishians 1:​8-11.) Yu nɔ kɔle di wɔndaful we aw Jiova de du wetin i want?

9. We wi de rid di Baybul, wetin-ɛn-wetin wi go ebul lan?

⁹ Tink bɔt Jiova in prɔfɛsi na di gadin we bin de na Idɛn, we de na Jɛnɛsis 3:15. b Da prɔfɛsi de bin tɔk bɔt tin dɛn we go apin we go mek wetin Gɔd want bi. Bɔt dɛn tin dɛn de go apin afta lɔng lɔng tɛm. Fɔ ɛgzampul, Gɔd bin tɛl Ebraam se afta bɔku jɛnɛreshɔn dɔn pas, wan pan in pikin dɛn go bi di Krays. (Jɛn. 22:​15-18) Dɔn, insay di ia 33 afta  Krays, Setan bin wund Jizɔs na in fut, jɔs lɛk aw Gɔd bin dɔn tɔk. (Akt 3:​13-15) Di faynal tin we go apin na da prɔfɛsi de we di “pikin” go nyamanyama Setan in ed go stil tek pas 1,000 ia bifo i go apin. (Rɛv. 20:​7-10) Ɛn di Baybul tɔk mɔ bɔt wetin gɛt fɔ apin we di tɛm fɔ lɛ di et we Setan in wɔl ɛn Jiova in ɔganayzeshɔn et dɛnsɛf dɔn.

10. (a) Us tin dɛn go apin jisnɔ? (b) Aw wi go ebul pripia wi maynd ɛn at? (Luk di futnot.)

¹⁰ Tink bɔt dɛn wɔndaful tin dɛn ya we di Baybul se go apin. Fɔs, di neshɔn dɛn go tɔk se “wi dɔn gɛt pis ɛn natin nɔ de fɔ fred!” (1 Tɛs. 5:​2, 3) “Kwik kwik wan,” da big big trɔbul go bigin we di neshɔn dɛn go atak ɔl lay lay rilijɔn. (Rɛv. 17:16) Afta dat, wan wɔndaful tin go apin, wi go si “mɔtalman Pikin de kam na di klawd wit pawa ɛn gret glori.” (Mat. 24:30) Jizɔs go jɔj pipul dɛn, i go put di ship dɛn wansay ɛn put di got dɛn ɔdasay. (Mat. 25:​31-33, 46) Insay da tɛm de, Setan go kɔntinyu fɔ fɛt agens Jiova. Bikɔs i rili et Gɔd in pipul dɛn, i go mek ɔl di neshɔn dɛn kam togɛda, we di Baybul kɔl Gɔg we de na Megɔg, fɔ atak Jiova in pipul dɛn. (Izi. 38:​2, 10, 11) I go rich tɛm we di balans anɔyntɛd dɛn we dɔn lɛf go go na ɛvin fɔ jɔyn Krays ɛn in sojaman dɛn we de na ɛvin fɔ fɛt di wɔ we na Amagɛdɔn, we go dɔn da big big trɔbul. c (Mat. 24:31; Rɛv. 16:​14, 16) Dɔn Krays in Wan Tawzin Ia Rul oba di wɔl go bigin.—Rɛv. 20:6.

11. Wetin di op fɔ gɛt layf sote go min fɔ yu? (Luk bak di pikchɔ.)

¹¹ Naw tink bɔt wetin go apin afta di 1,000 ia. Di Baybul se di Wan we mek wi “dɔn ivin mek [wi] want fɔ de sote go.” (Ɛkli. 3:​11, NWT) Tink bɔt wetin dat min fɔ yu ɛn yu padi biznɛs wit Jiova. Di buk we nem Kam Nia Jiova, pej 319, tɔk dɛn fayn wɔd dɛn ya: “Afta we wi go dɔn liv fɔ wan ɔndrɛd ia, wan tawzin ia, wan  milyɔn ia, ɔ ivin wan bilyɔn ia, wi go dɔn no mɔ bɔt Jiova Gɔd pas wetin wi no naw. Bɔt wi go stil fil lɛk se bɔku ɔda fayn fayn tin dɛn de we wi go nid fɔ lan. . . . Wi go gɛt bɔku wɔndaful tin dɛn fɔ ɛnjɔy tumara bambay we wi go dɔn gɛt layf we go de sote go. Ɛn wan pan di bɛst tin dɛn we wi go de du na fɔ kam nia Jiova.” Rayt naw, as wi de kɔntinyu fɔ stɔdi Gɔd in Wɔd, wetin bak wi go ebul lan mɔ bɔt?

12. Aw wi go ebul luk ɔp na ɛvin? Gi wan ɛgzampul.

¹² Gɔd in Wɔd sho wi smɔl tin bɔt aw i go tan lɛk fɔ de “ɔp” usay Jiova de. (Ayz. 33:5) Di Baybul sho wɔndaful tin dɛn bɔt Jiova ɛn di pat pan in ɔganayzeshɔn we de na ɛvin. (Ayz. 6:​1-4; Dan. 7:​9, 10; Rɛv. 4:​1-6) Fɔ ɛgzampul, wi go ebul rid bɔt di wɔndaful tin dɛn we Izikɛl bin si we “di klawd bin opin ɛn [i] si bɔku vishɔn bɔt PAPA GƆD.”—Izi. 1:1.

13. Akɔdin to Ibruz 4:​14-16, aw yu fil bɔt wetin Jizɔs de du we i de na ɛvin?

¹³ Tink bak bɔt wetin Jizɔs de du fɔ wi we i de ɔp na ɛvin as wi Kiŋ ɛn Ay Prist we gɛt sɔri-at. Na tru am wi de “go bifo Gɔd in tron, di Gɔd we de gi spɛshal gudnɛs” we wi de pre ɛn beg am fɔ sɔri fɔ wi ɛn ɛp wi “di rayt tɛm.” (Rid Ibruz 4:​14-16.) Lɛ wi nɔ ɛva alaw wan de fɔ pas we wi nɔ tink bɔt wetin Jiova ɛn Jizɔs dɔn du ɛn de du fɔ wi we dɛn de na ɛvin. Di lɛk we dɛn lɛk wi fɔ rili tɔch wi at ɛn muv wi fɔ gɛt zil as wi de wɔship Jiova.—2 Kɔr. 5:​14, 15.

14. Wetin na wan pan di bɛst tin dɛn we wi go ebul du fɔ sho se wi gɛt tɛnki fɔ wetin Jiova ɛn Jizɔs dɔn du fɔ wi? (Luk bak di pikchɔ dɛn.)

¹⁴ Wan pan di bɛst we dɛn we wi go sho tɛnki to wi Gɔd ɛn in Pikin na bay we  wi tray fɔ ɛp ɔda pipul dɛn fɔ bi Jiova in Witnɛs ɛn Jizɔs in disaypul dɛn. (Mat. 28:​19, 20) Na dis apɔsul Pɔl bin du fɔ sho se i gladi fɔ wetin Gɔd ɛn Krays du fɔ am. I bin no se wetin Jiova want na fɔ mek “ɔlkayn pipul dɛn sev ɛn no di kɔrɛkt tin bɔt di trut.” (1 Tim. 2:​3, 4) I bin wok tranga wan fɔ du di prichin wok fɔ ɛp di pipul dɛn we i go ebul fɔ ɛp so dat i go “du ɔl wetin [i] ebul fɔ sev sɔm.”—1 Kɔr. 9:​22, 23.

15. Akɔdin to Sam 1:​2, wetin go mek wi gladi?

¹⁵ Di pɔsin we rayt di fɔs sam tɔk se pɔsin we de “ɛnjɔy fɔ rid PAPA GƆD [“Jiova,” NWT] in wɔd” ɛn we “de tink bɔt PAPA GƆD in lɔ de ɛn nɛt” go gladi, ɛn bɛtɛ go fala am. (Sam 1:​1-3) Wan man we nem Josɛf Rotaam we de translet di Baybul bin tɔk bɔt dis skripchɔ na in buk we nem Studies in the Psalms, se pɔsin fɔ “rili want fɔ mek Gɔd gayd am te dat muv am fɔ bigin luk fɔ aw Gɔd go gayd am, stɔdi bɔt aw Gɔd go gayd am, ɛn spɛn lɔng tɛm fɔ tink bɔt aw Gɔd go gayd am.” I tɔk bak se “if wan de pas ɛn pɔsin nɔ rid di Baybul, da de de dɔn west.” Yu go ebul ɛnjɔy fɔ stɔdi di Baybul bay we yu de lan ɔl wetin yu ebul bɔt di bɔku impɔtant tin dɛn we i gɛt ɛn si aw dɛn ɔl kɔnɛkt. Wi go rili gladi we wi stɔdi Gɔd in Wɔd gud gud wan!

16. Wetin wi go tɔk bɔt insay di nɛks atikul?

¹⁶ Di fayn tin dɛn we Jiova de tich wi insay in Wɔd nɔ tu at fɔ wi fɔ ɔndastand. Insay di nɛks atikul, wi go tɔk bɔt wan pan di dip tin dɛn we di Baybul de tich, dat na Jiova in gret spirichwal tɛmpul, we Pɔl bin tɔk bɔt insay di lɛta we i bin rayt to di Ibru Kristian dɛn. Lɛ di stɔdi we wi go stɔdi da tɔpik de mek yu rili gladi.