1. Wetin wan enjɛl de tɔk? Wetin dat min fɔ wi?

 IF WAN enjɛl want fɔ tɔk to yu, yu go lisin to wetin i gɛt fɔ se? Wɛl, tide, wan enjɛl de tɔk “to ɔl di neshɔn dɛn, pipul dɛn, trayb dɛn, ɛn pipul dɛn we de tɔk difrɛn difrɛn langwej dɛn.” Wetin i de se? “Fred Gɔd ɛn gi am glori . . . Wɔship di Wan we mek di ɛvin [ɛn] di wɔl.” (Rɛv. 14:​6, 7) Jiova na di wangren tru Gɔd we ɔlman fɔ wɔship. Wi gladi fɔ we i valyu wi ɛn gi wi di chans fɔ wɔship am na in gret spirichwal tɛmpul.

2. Wetin na Jiova in spirichwal tɛmpul? (Luk bak di bɔks we gɛt di taytul “ Wetin I Nɔ Min?”)

² Wetin rili na di spirichwal tɛmpul, ɛn usay wi go fɛn tin dɛn we de tɔk mɔ bɔt am? Di spirichwal tɛmpul nɔto rial bildin. Na Jiova in arenjmɛnt fɔ wɔship am di we aw i want tru di day we Jizɔs day fɔ pe fɔ wi sin. Apɔsul Pɔl bin ɛksplen mɔ bɔt dis insay di lɛta we i bin rayt to di Ibru Kristian dɛn we bin de na Judia insay di fɔstɛm Kristian dɛn tɛm. b

3-4. Wetin mek Pɔl bin rayt lɛta to di Ibru Kristian dɛn we bin de na Judia? Aw i bin ɛp dɛn?

³ Wetin mek Pɔl bin rayt di lɛta to di Ibru Kristian dɛn we bin de na Judia? I go mɔs bi se na fɔ tu men rizin dɛn. Fɔs, fɔ ɛnkɔrej dɛn. Bɔku pan dɛn bin mɛn na di Ju rilijɔn. Sɔntɛm di wan dɛn we bin de bifo na di Ju rilijɔn bin de provok dɛn bikɔs dɛn dɔn bi Kristian. Wetin mek? Na  bikɔs Kristian dɛn nɔ bin gɛt tɛmpul fɔ go wɔship, dɛn nɔ bin gɛt ɔlta we dɛn bin de yuz fɔ mek sakrifays to Gɔd, ɛn dɛn nɔ bin gɛt prist dɛn. Dis bin fɔ dɔn mek Krays in disaypul dɛn at pwɛl ɛn mek dɛn nɔ gɛt fet igen. (Ibru. 2:1; 3:​12, 14) Sɔntɛm sɔm pan dɛn go dɔn ivin tink fɔ go bak na di Ju rilijɔn.

⁴ Sɛkɔn, Pɔl bin mek dɛn Ibru Kristian dɛn de no se dɛn nɔ bin de tray tranga wan fɔ ɔndastand di nyu ɔ dip tin dɛn, we na “ɛvi fud,” we de na Gɔd in Wɔd. (Ibru. 5:​11-14) I klia se sɔm pan dɛn bin stil de fala di Lɔ we Gɔd Bin Gi Mozis. Bɔt Pɔl bin ɛksplen se di sakrifays dɛn we di Lɔ se dɛn fɔ de mek nɔ ebul pul sin kpatakpata. Fɔ da rizin de, dɛn bin put di Lɔ “na kɔna.” So Pɔl bin tich dɛn sɔm dip tin dɛn bɔt Gɔd. I bin mɛmba in kɔmpin Kristian dɛn bɔt “di fayn op” we Jizɔs in sakrifays mek dɛn gɛt we go rili ɛp dɛn fɔ “kam nia Gɔd.”—Ibru. 7:​18, 19.

5. Wetin wi nid fɔ ɔndastand frɔm di Baybul buk we nem Ibruz? Wetin mek?

⁵ Pɔl bin ɛksplen to in Ibru brɔda dɛn wetin mek di we aw dɛn de wɔship Jiova as Kristian dɛn bɛtɛ fa fawe pas di we aw dɛn bin de wɔship am trade na di Ju rilijɔn. Di tin dɛn we bin de insay di Ju rilijɔn na bin jɔs “shado we de sho di tin dɛn we de kam, bɔt di rial tin gɛt fɔ du wit Krays.” (Kol. 2:17) Shado jɔs de sho di shep we sɔntin gɛt; nɔto sɔntin we rial. Semweso, di we aw di Ju pipul dɛn bin de wɔship Gɔd trade na bin shado bikɔs bɛtɛ we fɔ wɔship am bin gɛt fɔ kam. Wi nid fɔ ɔndastand di arenjmɛnt we Jiova dɔn mek fɔ lɛ i go fɔgiv wi sin dɛn so dat wi go ebul fɔ wɔship am di we aw i want. Lɛ wi kɔmpia di “shado” (di we aw di Ju dɛn bin de wɔship trade trade) wit “di rial tin” (di we aw Kristian dɛn de wɔship), lɛk aw dɛn ɛksplen am insay di Baybul buk we nem Ibruz. We wi du dat, wi go ebul ɔndastand di spirichwal tɛmpul gud gud wan ɛn wetin i gɛt fɔ du wit wi.

6. Aw dɛn bin de yuz di tabanakul?

⁶ Di we aw di Ju dɛn bin de wɔship trade trade. Pɔl bin tɔk mɔ bɔt di tabanakul we Mozis bin mek insay di ia 1512 bifo Krays. (Luk di chat we gɛt di taytul  “Di We Aw di Ju dɛn Bin De Wɔship Trade Trade ɛn di We Aw Kristian dɛn De Wɔship.”) Di tabanakul na bin lɛk tɛnt we di Izrɛlayt dɛn bin de go wit ɛnisay we dɛn go. Dɛn bin yuz am fɔ lɛk 500 ia te dɛn bil di tɛmpul na Jerusɛlɛm. (Ɛks. 25:​8, 9; Nɔm. 9:22) Dis “tɛnt” na bin di men ples usay di Izrɛlayt dɛn bin de pre to Gɔd, mek sakrifays dɛn, ɛn wɔship. (Ɛks. 29:​43-46) Bɔt di tabanakul bin tinap bak fɔ sɔntin we bɛtɛ fa fawe we bin gɛt fɔ kam fɔ Kristian dɛn.

7. Ustɛm di spirichwal tɛmpul bi sɔntin we rial?

⁷ Di we aw Kristian dɛn de wɔship. Di tabanakul na bin “shado bɔt di tin dɛn na ɛvin,” ɛn i bin de sho Jiova in gret spirichwal tɛmpul. Pɔl bin tɔk se “dis tɛnt [ɔ, tabanakul] na ɛgzampul we de sho wetin de naw.” (Ibru. 8:5; 9:9) So bay di tɛm we i rayt to di Ibru Kristian dɛn, di spirichwal tɛmpul bin dɔn ɔlrɛdi de. I bigin insay di ia 29 afta Krays. Insay da ia de, Jizɔs bin baptayz, Gɔd bin anɔynt am wit oli spirit, ɛn i bigin fɔ sav as Jiova in “wɔndaful ay prist” na di spirichwal tɛmpul. c—Ibru. 4:14; Atk 10:​37, 38.

8-9. Akɔdin to Ibruz 7:​23-27, wetin na di big difrɛns bitwin di Izrɛlayt dɛn ay prist ɛn di wɔndaful Ay Prist, Jizɔs Krays?

⁸ Di we aw di Ju dɛn bin de wɔship trade trade. Na di ay prist bin gɛt di wok fɔ tɔk to Gɔd fɔ di pipul dɛn. Erɔn, na bin di fɔs ay prist we Jiova bin pik we dɛn bin dɛdiket di tabanakul. Bɔt, as Pɔl bin ɛksplen, “bɔku pipul dɛn dɔn bi prist afta ɔda pipul dɛn bikɔs day mek dɛn nɔ ebul kɔntinyu fɔ bi prist.” d (Rid Ibruz 7:​23-27.) Ɛn bikɔs dɛn ay prist dɛn de nɔ bin pafɛkt, dɛn bin de mek sakrifays dɛn fɔ dɛn yon sin dɛn. Dis na big difrɛns bitwin di Izrɛlayt dɛn ay prist dɛn ɛn di wɔndaful Ay Prist, we na Jizɔs Krays.

⁹ Di we aw Kristian dɛn de wɔship. As wi Ay Prist, Jizɔs Krays na “savant . . . na di rial tɛnt, we nɔto mɔtalman mek, bɔt we Jiova mek.” (Ibru. 8:​1, 2) Pɔl bin ɛksplen se “bikɔs [Jizɔs] de kɔntinyu fɔ liv sote go, nɔbɔdi nɔ go bi prist afta am.” Pɔl bin kɔntinyu fɔ tɔk se Jizɔs “nɔ dɔti, [i] difrɛn frɔm sina dɛn,” ɛn i difrɛn frɔm di ay prist dɛn na Izrɛl, bikɔs “i nɔ nid fɔ de mek sakrifays ɛvride” fɔ in yon sin dɛn. Naw lɛ wi tɔk bɔt di difrɛns bitwin di ɔlta dɛn ɛn di sakrifays dɛn we di Ju dɛn bin de mek trade trade ɛn di wan dɛn we Kristian dɛn de mek tide.

10. Wetin di sakrifays we dɛn bin de mek na di ɔlta we dɛn mek wit kɔpa de sho?

¹⁰ Di we aw di Ju dɛn bin de wɔship trade trade. Kɔpa ɔlta bin de na do na di tabanakul in domɔt usay dɛn bin de mek animal sakrifays dɛn to Jiova. (Ɛks. 27:​1, 2; 40:29) Bɔt dɛn sakrifays dɛn de nɔ bin de mek Gɔd fɔgiv di pipul dɛn fɔ dɛn sin dɛn kpatakpata. (Ibru. 10:​1-4) Di animal dɛn we dɛn bin de sakrifays na di tabanakul bin de sho wan sakrifays we go mek Gɔd fɔgiv mɔtalman dɛn sin dɛn kpatakpata.

11. Us ɔlta Jizɔs bin sakrifays in layf pan? (Ibruz 10:​5-7, 10)

 ¹¹ Di we aw Kristian dɛn de wɔship. Jizɔs bin no se Jiova sɛn am na dis wɔl fɔ gi in layf fɔ mɔtalman as sakrifays fɔ fri wi frɔm sin ɛn day. (Mat. 20:28) So, we Jizɔs bin baptayz, i bin gi insɛf fɔ du wetin Jiova want. (Jɔn 6:38; Gal. 1:4) Di ɔlta we Jizɔs bin sakrifays insɛf pan tinap fɔ wetin Gɔd “want.” Jiova bin want in Pikin fɔ sakrifays in pafɛkt layf as mɔtalman. Jizɔs bin sakrifays in layf “wan tɛm nɔmɔ.” Da sakrifays de go pe fɔ, ɔ kɔba, di wan dɛn we put fet pan Krays dɛn sin dɛn sote go. (Rid Ibruz 10:​5-7, 10.) Naw lɛ wi tɔk bɔt wetin di tin dɛn we bin de insay di tabanakul bin tinap fɔ.

12. Udat go ebul ɛnta na di rum dɛn na di tabanakul?

¹² Di we aw di Ju dɛn bin de wɔship trade trade. Di tabanakul ɛn di tɛmpul dɛn we dɛn bin leta bil na Jerusalɛm bin gɛt di sem tin dɛn insay. Dɛn bin gɛt tu rum dɛn, we na “di Ples we Oli” ɛn “di Ples we Oli Pas Ɔl,” we bin gɛt kɔtin bitwin dɛn. (Ibru. 9:​2-5; Ɛks. 26:​31-33) Di Ples we Oli bin gɛt stand we dɛn kin put lamp we dɛn mek wit gold, ɔlta fɔ bɔn insɛns, ɛn wan tebul fɔ put di shobred. Na di prist dɛn nɔmɔ we dɛn “anɔynt” dɛn bin de alaw fɔ go insay di Ples we Oli fɔ go du dɛn wok dɛn as prist. (Nɔm. 3:​3, 7, 10) Di Ples we Oli Pas Ɔl bin gɛt di  agrimɛnt bɔks we dɛn mek wit gold we de sho se Jiova de wit in pipul dɛn. (Ɛks. 25:​21, 22) Na di ay prist nɔmɔ dɛn bin de alaw fɔ go insay di Ples we Oli Pas Ɔl wantɛm insay di ia, dat na di De fɔ Fɔgiv Sin. (Lɛv. 16:​2, 17) Ɛni ia, i bin de go wit animal in blɔd fɔ mek Jiova fɔgiv in yon sin dɛn ɛn di wan ol neshɔn. As tɛm de go, Jiova bin yuz in oli spirit fɔ mek dɛn no klia wan wetin dɛn difrɛn tin dɛn ya na di tabanakul tinap fɔ.—Ibru. 9:​6-8. e

13. Wetin di Ples we Oli ɛn di Ples we Oli Pas Ɔl na di tabanakul tinap fɔ we i kam to di we aw Kristian dɛn de wɔship?

¹³ Di we aw Kristian dɛn de wɔship. Jiova dɔn anɔynt sɔm pan Krays in disaypul dɛn wit oli spirit, ɛn dɛn de ɛnjɔy spɛshal padi biznɛs wit Jiova. Dɛn 144,000 disaypul dɛn ya go sav as prist na ɛvin wit Jizɔs. (Rɛv. 1:6; 14:1) Di Ples we Oli na di tabanakul tinap fɔ di adɔpt we Gɔd dɔn adɔpt dɛn as in spirichwal pikin dɛn we dɛn stil de na di wɔl. (Rom. 8:​15-17) Di Ples we Oli Pas Ɔl na di tabanakul tinap fɔ ɛvin, usay Jiova de. “Di kɔtin” we de bitwin di Ples we Oli ɛn di Ples we Oli Pas Ɔl tinap fɔ Jizɔs in pafɛkt mɔtalman bɔdi. As lɔng as i bin gɛt mɔtalman bɔdi, i nɔ go ebul go na ɛvin as di wɔndaful Ay Prist fɔ Jiova in spirichwal tɛmpul. We Jizɔs bin gi in mɔtalman bɔdi as sakrifays fɔ ɔl mɔtalman, i bin mek ɔl anɔyntɛd Kristian dɛn gɛt di chans fɔ go na ɛvin. Dɛnsɛf go nid fɔ giv-ɔp dɛn mɔtalman bɔdi fɔ mek dɛn go ebul fɔ go na ɛvin. (Ibru. 10:​19, 20; 1 Kɔr. 15:50) Afta Jizɔs gɛt layf bak, i bin go na di Ples we Oli Pas Ɔl na di spirichwal tɛmpul, usay ɔl di ɔda anɔyntɛd dɛn go jɔyn am as tɛm de go.

14. Akɔdin to Ibruz 9:​12, 24-26, wetin mek di we aw wi de wɔship na Jiova in spirichwal tɛmpul bɛtɛ fa fawe pas di we aw di Ju dɛn bin de wɔship Jiova?

¹⁴ Wi dɔn si klia wan aw Jiova in arenjmɛnt fɔ mek wi go ebul wɔship am di rayt we bɛtɛ fa fawe bikɔs ɔf Jizɔs Krays in day ɛn in wok as ay prist. Di ay prist na Izrɛl bin de ɛnta na di Ples we Oli Pas Ɔl we mɔtalman mek, ɛn i bin de go wit animal we dɛn sakrifays in blɔd, bɔt Jizɔs bin ɛnta “insay ɛvin,” we na di ples we oli pas ɔl, fɔ tinap bifo Jiova. Na de i bin gi in pafɛkt mɔtalman layf fɔ wi “so dat i go yuz di sakrifays we i dɔn sakrifays insɛf fɔ pul sin kɔmɔt.” (Rid Ibruz 9:​12, 24-26.) Na Jizɔs in sakrifays de pul mɔtalman in sin sote go. As wi go kam lan, ilɛk wi op na fɔ go na ɛvin ɔ fɔ de na dis wɔl, wi ɔl go ebul wɔship Jiova na in spirichwal tɛmpul.

15. Udat bin de wok na di tabanakul in kɔmpawnd?

¹⁵ Di we aw di Ju dɛn bin de wɔship trade trade. Di tabanakul bin gɛt wan kɔmpawnd. Na bin big eria we gɛt fɛns rayt rawnd usay di prist dɛn bin de du dɛn wok. Di big ɔlta we dɛn mek wit kɔpa usay dɛn bin de bɔn sakrifays bin de na di kɔmpawnd, ɛn i bin gɛt bol we dɛn mek wit kɔpa, ɛn wata bin de insay di bol we di prist dɛn bin de yuz fɔ klin dɛnsɛf bifo dɛn du dɛn wok. (Ɛks. 30:​17-20; 40:​6-8) Bɔt di tɛmpul dɛn we dɛn bin leta bil, bin gɛt bak kɔmpawnd na do usay di wan dɛn we nɔto prist go tinap ɛn wɔship Gɔd.

16. Udat de wok na di kɔmpawnd dɛn na di spirichwal tɛmpul?

 ¹⁶ Di we aw Kristian dɛn de wɔship. Bifo di anɔyntɛd dɛn we dɔn lɛf go go na ɛvin fɔ wok as prist dɛn wit Jizɔs, dɛn de sav Jiova fetful insay di kɔmpawnd na in spirichwal tɛmpul we de na dis wɔl. Di big bol usay dɛn bin de put wata we bin de na di tabanakul ɛn di tɛmpul dɛn na impɔtant tin we fɔ mɛmba dɛn ɛn ɔl Kristian dɛn se dɛn fɔ kɔntinyu fɔ klin na Jiova in yay. So usay naw, di “bɔku bɔku pipul dɛn,” we kɔntinyu fɔ de biɛn Krays in anɔyntɛd brɔda dɛn de sav Jiova? Apɔsul Jɔn bin si dɛn “tinap bifo di tron,” we fiba di kɔmpawnd we de na do na dis wɔl usay “dɛn de wɔship [Gɔd] de ɛn nɛt na in tɛmpul.” (Rɛv. 7:​9, 13-15) Wi rili gladi we Jiova dɔn gi wi di chans fɔ wɔship am na in gret spirichwal tɛmpul!

17. Us sakrifays dɛn wi gɛt di ɔnɔ fɔ gi Jiova?

¹⁷ Tide ɔl Kristian dɛn gɛt di ɔnɔ fɔ gi Jiova sakrifays dɛn bay we dɛn de yuz dɛn tɛm, trɛnk, ɛn prɔpati dɛn fɔ sav am. Jɔs lɛk aw Pɔl bin tɛl di Ibru Kristian dɛn, wi go ebul “prez Gɔd ɔltɛm . . . bikɔs dat tan lɛk sakrifays; lɛ wi yuz wi mɔt fɔ tɔk bɔt am na pɔblik, dat na, di frut we wi de gi am.” (Ibru. 13:15) Wi go sho se wi valyu di ɔnɔ we wi gɛt fɔ wɔship Jiova bay we wi de du wi bɛst fɔ sav am.

18. Akɔdin to Ibruz 10:​22-25, wetin na sɔm tin dɛn we wi fɔ de du ɔltɛm? Wetin wi nɔ fɔ ɛva fɔgɛt?

¹⁸ Rid Ibruz 10:​22-25. We Pɔl bin de dɔn fɔ rayt in lɛta to di Ibru Kristian dɛn, i bin tɔk bɔt tin dɛn we wi fɔ du ɔltɛm we wi de wɔship Jiova. Dɛn tin dɛn ya na, fɔ pre to Jiova, prich to ɔda pipul dɛn, atɛnd di mitin dɛn, ɛn ɛnkɔrej wi kɔmpin dɛn “mɔ we [wi] de si se [Jiova in] de de kam nia.” We Jɔn bin de dɔn fɔ rayt di Baybul buk we nem Rɛvɛleshɔn, i rayt se Jiova in enjɛl tɔk tu tɛm se: “Wɔship Gɔd!” (Rɛv. 19:10; 22:9) Dis sho se dat rili impɔtant. Lɛ wi nɔ ɛva fɔgɛt di dip tin dɛn we wi dɔn lan bɔt Jiova in gret spirichwal tɛmpul ɛn di ɔnɔ we wi gɛt fɔ wɔship wi gret Gɔd!