1-2. Wetin bin apin we tu pan Jizɔs in disaypul dɛn bin de go na Ɛmeɔs?

 NA NAYSAN 16, insay di ia 33 afta Krays. Jizɔs in disaypul dɛn at pwɛl ɛn dɛn de fred. Tu pan dɛn bin kɔmɔt na Jerusɛlɛm de go na Ɛmeɔs, we na wan vilej we de lɛk 11 kilomita (7 mayl) frɔm Jerusɛlɛm. Dɛn at rili pwɛl bikɔs dɛn jɔs dɔn kil Jizɔs we dɛn bin de fala. Dɛn bin de op se di Mɛsaya go du wɔndaful tin dɛn fɔ di Ju pipul dɛn, bɔt naw i dɔn day. Bɔt sɔntin go apin we go rili sɔprayz dɛn man dɛn ya.

² Wan strenja mit dɛn na rod ɛn jɔyn dɛn fɔ waka. Di disaypul dɛn tɔk bɔt aw dɛn at pwɛl bikɔs ɔf wetin apin to Jizɔs. Dɔn di strenja bigin fɔ tɔk bɔt tin dɛn we dɛn nɔ go ɛva fɔgɛt. We i bigin fɔ tɔk bɔt wetin mek di Mɛsaya bin nid fɔ sɔfa ɛn day, “i bigin frɔm Mozis ɛn ɔl di Prɔfɛt dɛn.” We di tri man dɛn rich na Ɛmeɔs, di strenja tɛl dɛn se in na Jizɔs we dɔn gɛt layf bak! Imajin di kayn gladi-at we di disaypul dɛn bin gɛt we dɛn no se di Mɛsaya de alayv!​—Lyuk 24:13-35.

3-4. Wetin bin apin to Jizɔs in disaypul dɛn? Wetin wi go lan insay dis atikul? (Akt 1:3)

³ Insay di las 40 dez we Jizɔs bin de na di wɔl, i apia to in disaypul dɛn bɔku tɛm. (Rid Akt 1:3.) Insay da tɛm de, Jizɔs in disaypul dɛn we bin gɛt pwɛlat ɛn we bin de fred,  bin gladi, gɛt kɔnfidɛns, ɛn maynd fɔ prich ɛn tich bɔt di Kiŋdɔm. a

⁴ Wi go bɛnifit we wi lan bɔt wetin Jizɔs bin du insay da tɛm de. Insay dis atikul, wi go si aw Jizɔs bin yuz dis tɛm fɔ (1) ɛnkɔrej in disaypul dɛn, (2) ɛp dɛn fɔ ɔndastand di Skripchɔ dɛn gud gud wan ɛn (3) tren dɛn ɛn gi dɛn mɔ wok. Ɛniwan pan dɛn pɔynt dɛn ya go ɛp wi fɔ si aw wi go falamakata Jizɔs in ɛgzampul.

ƐNKƆREJ ƆDA PIPUL DƐN

5. Wetin mek Jizɔs in disaypul dɛn bin nid ɛnkɔrejmɛnt?

⁵ Jizɔs in disaypul dɛn bin nid ɛnkɔrejmɛnt. Wetin mek? Sɔm pan dɛn bin dɔn lɛf dɛn os dɛn, famili dɛn, ɛn biznɛs dɛn fɔ de wit Jizɔs. (Mat. 19:27) Dɛn nɔ bin de trit ɔda disaypul dɛn fayn bikɔs dɛn disayd fɔ fala Jizɔs. (Jɔn 9:22) Dɛn mek dɛn sakrifays dɛn ya bikɔs dɛn bin biliv se Jizɔs na di Mɛsaya we bin fɔ kam. (Mat. 16:16) Bɔt we dɛn kil Jizɔs, dɛn at bin rili pwɛl ɛn i bin tan lɛk se dɛn nɔ gɛt ɛni op igen.

6. Wetin Jizɔs bin du afta i gɛt layf bak?

⁶ Jizɔs bin ɔndastand se i nɔmal fɔ mek in disaypul dɛn at pwɛl bikɔs ɔf in day, ɛn i bin no se di rizin we mek dɛn at pwɛl nɔto bikɔs dɛn nɔ bin gɛt fet. So di sem de we i gɛt layf bak, i bigin fɔ ɛnkɔrej in padi dɛn. Fɔ ɛgzampul, Jizɔs bin apia to Meri Magdalin we i bin de kray na in di grev. (Jɔn 20:11, 16) I apia bak to di tu disaypul dɛn we wi tɔk bɔt we dis atikul bigin. Ɛn i bin apia to apɔsul Pita. (Lyuk 24:34) Wetin wi go lan frɔm Jizɔs in ɛgzampul? Lɛ wi tɔk bɔt wetin bin apin di fɔs tɛm we i apia to Meri Magdalin.

7. Akɔdin to Jɔn 20:​11-16, wetin Jizɔs bin si Meri de du ali mɔnin Naysan 16? Wetin dat bin mek i du? (Luk bak di pikchɔ.)

⁷ Rid Jɔn 20:11-16. Ali mɔnin Naysan 16, sɔm uman dɛn bin go na di ples usay dɛn bin bɛr Jizɔs. (Lyuk 24:1, 10) Lɛ wi tɔk bɔt wan pan di uman dɛn we na Meri Magdalin. We Meri go na di grev,  i bin mit di grev ɛmti. So i bin rɔn go tɛl Pita ɛn Jɔn, ɛn dɛn rɔn go na di grev ɛn Meri bin fala dɛn. Afta dɛn mek shɔ se di grev ɛmti, Pita ɛn Jɔn go bak na os. Bɔt Meri nɔ bin go. I bin lɛf na di grev de kray. I nɔ bin no se Jizɔs bin de wach am. Jizɔs bin si we dis fetful uman de kray ɛn dat bin rili tɔch in at. So i apia to Meri ɛn du simpul tin we bin rili ɛnkɔrej am. I bin tɔk to am ɛn gi am wan impɔtant wok fɔ du, we na fɔ tɛl in brɔda dɛn se i dɔn gɛt layf bak.​—Jɔn 20:17, 18.

8. Aw wi go falamakata Jizɔs?

⁸ Aw wi go falamakata Jizɔs? Wi kin du dat we wi tray tranga wan fɔ ɛp wi brɔda ɛn sista dɛn fɔ kɔntinyu fɔ sav Jiova if wi no se dɛn gɛt prɔblɛm ɛn tek tɛm tɔk fayn to dɛn jɔs lɛk aw Jizɔs bin du. Lɛ wi tɔk bɔt wan sista we nem Joslin in ɛkspiriɛns, we in sista bin day pan bad bad aksidɛnt. I tɔk se: “Mi at bin rili pwɛl fɔ lɔng tɛm.” Bɔt wan brɔda ɛn in wɛf bin invayt am na dɛn os, dɛn tek tɛm lisin to am ɛn ɛp am fɔ no se i valyu na Gɔd in yay. Joslin tɔk se: “A bin fil lɛk se Jiova bin yuz dɛn fɔ pul mi kɔmɔt na si we dak ɛn rɔf, ɛn put mi insay bot we go sev mi. Dɛn bin ɛp mi fɔ gladi fɔ kɔntinyu fɔ sav Jiova bak.” Wisɛf go ebul fɔ ɛnkɔrej ɔda pipul dɛn we wi tek tɛm lisin to dɛn we dɛn de tɛl wi aw dɛn de fil ɛn we wi tek tɛm tɔk fayn to dɛn fɔ mek dɛn go kɔntinyu fɔ sav Gɔd.​—Rom. 12:15.

ƐP ƆDA PIPUL DƐN FƆ ƆNDASTAND GƆD IN WƆD GUD GUD WAN

9. Us prɔblɛm Jizɔs in disaypul dɛn bin gɛt? Aw Jizɔs bin ɛp dɛn?

⁹ Jizɔs in disaypul dɛn bin biliv Gɔd in Wɔd ɛn dɛn bin de tray tranga wan fɔ aplay am na dɛn layf. (Jɔn 17:6) Bɔt dɛn bin kɔnfyus bikɔs Jizɔs day as kriminal. Jizɔs bin no se dɛn nɔ bin de dawt bikɔs dɛn nɔ gɛt bɛtɛ fet, bɔt na bikɔs dɛn nɔ bin ɔndastand di Skripchɔ dɛn gud gud wan. (Lyuk 9:44, 45; Jɔn 20:9) So i bin ɛp dɛn fɔ ɔndastand di Skripchɔ dɛn gud gud wan. Lɛ wi tɔk bɔt aw i bin du dat we i bin apia to tu pan in disaypul dɛn we dɛn bin de go na Ɛmeɔs.

10. Aw Jizɔs bin ɛp in disaypul dɛn fɔ biliv se in na di Mɛsaya? (Lyuk 24:​18-27)

¹⁰ Rid Lyuk 24:18-27. Notis se Jizɔs nɔ bin tɛl di man dɛn udat i bi wantɛm wantɛm. Bifo dat, na kwɛstyɔn dɛn i bin aks. Wetin mek? Sɔntɛm na bikɔs i bin want mek dɛn tɔk bɔt aw dɛn bin de fil ɛn wetin bin de na dɛn maynd. Ɛn na dat dɛn bin du. Dɛn tɛl am se dɛn bin de ɛkspɛkt se Jizɔs go sev di Izrɛlayt dɛn frɔm di Roman pipul dɛn we bin de sɔprɛs dɛn. Afta dɛn dɔn tɔk bɔt aw dɛn de fil, Jizɔs bin yuz di Skripchɔ dɛn fɔ ɛp dɛn fɔ ɔndastand wetin dɔn apin. b Leta da sem ivintɛm de, Jizɔs bi spɛn tɛm wit di ɔda disaypul dɛn fɔ ɛp dɛn fɔ ɔndastand dɛn tru tin dɛn ya. (Lyuk 24:​33-48) Wetin wi kin lan frɔm dis akawnt?

11-12. (a) Wetin wi go lan frɔm di we aw Jizɔs bin tich di tru tin dɛn na di Baybul? (Luk bak di pikchɔ dɛn.) (b) Aw di pɔsin we bin de stɔdi Nɔte bin ɛp am?

¹¹ Aw wi go falamakata Jizɔs? Fɔs, we wi de tich wi Baybul studɛnt dɛn, wi fɔ aks dɛn di rayt kwɛstyɔn dɛn we go ɛp dɛn fɔ tɔk bɔt aw dɛn de fil ɛn wetin de na dɛn maynd. (Prɔv. 20:5) We yu ɔndastand aw dɛn de fil, sho dɛn aw fɔ fɛn Baybul vas dɛn we go ɛp dɛn wit dɛn prɔblɛm. Nɔ tɛl  dɛn wetin fɔ du. Bifo dat, na fɔ ɛp dɛn fɔ ɔndastand di Skripchɔ dɛn gud gud wan ɛn si aw dɛn kin aplay Baybul prinsipul dɛn na dɛn layf. Lɛ wi tɔk bɔt wan brɔda we de Gana we nem Nɔte in ɛkspiriɛns.

¹² Nɔte bin bigin fɔ stɔdi di Baybul we i ol 16 ia. Bɔt shɔt tɛm afta i bigin fɔ stɔdi, in famili tɔn agens am. Wetin bin ɛp am fɔ kɔntinyu fɔ stɔdi di Baybul? Di pɔsin we bin de stɔdi am bin yuz Matyu chapta 10 fɔ ɛksplen se pipul dɛn go mek tru Kristian dɛn sɔfa. Nɔte tɔk se: “So we dɛn bigin fɔ mek a sɔfa, dat bin mek a biliv se a dɔn fɛn di trut.” In ticha bin ɛp am bak fɔ ɔndastand Matyu 10:16 fɔ lɛ i tek tɛm mek i nɔ gɛt prɔblɛm wit in famili ɛn sho rɛspɛkt we i de tɔk bɔt wetin i biliv na os. Afta Nɔte baptayz, i bin want fɔ payɔnia bɔt in papa bin want mek i go yunivasiti. Bifo Nɔte in Baybul ticha tɛl am wetin fɔ du, i bin yuz kwɛstyɔn dɛn fɔ no wetin de na in maynd ɛn ɛp am fɔ tink bɔt Baybul prinsipul dɛn we go ɛp am fɔ disayd fɔ du di rayt tin. Wetin bin apin afta dat? Nɔte bin disayd fɔ bigin payɔnia, so in papa drɛb am kɔmɔt na in os. Aw Nɔte fil bɔt wetin bin apin to am? I tɔk se: “A biliv tranga wan se na di rayt tin a bin disayd fɔ du.” We wisɛf tek tɛm fɔ ɛp ɔda pipul dɛn fɔ ɔndastand di Skripchɔ dɛn gud gud wan, wi go ɛp dɛn fɔ gɛt strɔng fet ɛn kɔntinyu fɔ sav Jiova.​—Ɛfi. 3:16-19.

TREN BRƆDA DƐN FƆ KWALIFAY FƆ BI ‘MAN DƐN WE NA GIFT’

13. Wetin Jizɔs du fɔ mek shɔ se pipul dɛn kɔntinyu fɔ du in Papa in wok? (Ɛfishians 4:8)

¹³ We Jizɔs bin de na di wɔl, i bin du ɔl di wok dɛn we in Papa bin tɛl am fɔ du fayn fayn wan. (Jɔn 17:4) Bɔt Jizɔs nɔ bin de tink lɛk aw ɔda pipul dɛn kin tink se, ‘If yu want mek sɔntin kɔmɔt fayn, na yu fɔ du am fɔ yusɛf.’ Insay di tri ɛn af ia we i bin de du di prichin wok, i bin tren ɔda pipul dɛn fɔ du am. Bifo Jizɔs go bak na ɛvin, i bin gi in disaypul dɛn di wok fɔ kia fɔ Jiova in ship dɛn we i valyu ɛn fɔ de bifo fɔ prich ɛn tich, ɛn sɔntɛm sɔm pan dɛn bin de bitwin 20 to 29 ia. (Rid Ɛfishians 4:8.) Aw Jizɔs bin yuz di las 40 dez dɛn we i bin de na di wɔl fɔ ɛp  dɛn man dɛn ya we bin dɔn mek-ɔp dɛn maynd fɔ sav Jiova, we nɔ bin kɔmɔt biɛn am, ɛn we de wok tranga wan fɔ kwalifay fɔ bi ‘man dɛn we na gift’?​—Luk di stɔdi not fɔ Ɛfishians 4:8.

14. Aw Jizɔs bin ɛp in disaypul dɛn fɔ bi machɔ Kristian insay di las 40 dez we i bin de na di wɔl? (Luk bak di pikchɔ.)

¹⁴ Jizɔs bin kɔrɛkt in disaypul dɛn, bɔt i du am di kayn we we sho se i lɛk dɛn. Fɔ ɛgzampul, i bin notis se sɔm pan dɛn gɛt di abit fɔ de dawt, so i bin kɔrɛkt dɛn. (Lyuk 24:25-27; Jɔn 20:27) I bin ɛp dɛn fɔ ɔndastand se dɛn fɔ pe atɛnshɔn mɔ fɔ kia fɔ Jiova in ship dɛn pas fɔ pe atɛnshɔn fɔ fɛn mɔni. (Jɔn 21:15) I bin mɛmba dɛn nɔ fɔ pe tumɔs atɛnshɔn pan di wok dɛn we ɔda pipul dɛn de gɛt we dɛn de sav Jiova. (Jɔn 21:20-22) Ɛn Jizɔs bin kɔrɛkt in disaypul dɛn bikɔs dɛn bin gɛt sɔm aydia dɛn bɔt di Kiŋdɔm we nɔ bin kɔrɛkt, ɛn ɛp dɛn fɔ pe atɛnshɔn fɔ prich di gud nyuz. (Akt 1:​6-8) Wetin ɛlda dɛn kin lan frɔm Jizɔs?

15-16. (a) Aw ɛlda dɛn go falamakata Jizɔs? Ɛksplen. (b) Aw Patrik bin bɛnifit we dɛn kɔrɛkt am?

¹⁵ Aw ɛlda dɛn go falamakata Jizɔs? Dɛn fɔ tren ɛn ɛp brɔda dɛn, ivin di wan dɛn we yɔŋ fɔ kwalifay fɔ du mɔ wok dɛn na di kɔngrigeshɔn. c Ɛlda dɛn nɔ de ɛkspɛkt se di wan dɛn we dɛn de tren fɔ pafɛkt. Dɛn fɔ gi fayn advays to dɛn yɔŋ brɔda dɛn ya fɔ mek dɛn gɛt ɛkspiriɛns ɛn si wetin mek dɛn fɔ put dɛnsɛf dɔŋ, bi pɔsin we fetful, ɛn rɛdi fɔ wok fɔ ɔda pipul dɛn.​—1 Tim. 3:1; 2 Tim. 2:2; 1 Pit. 5:5.

¹⁶ Lɛ wi tɔk bɔt aw wan brɔda we nem Patrik bin bɛnifit we dɛn kɔrɛkt am. We i bin yɔŋ, i bin gɛt di abit fɔ tɔk ash wan ɛn du tin dɛn we nɔ fayn ivin to sista dɛn. Bɔt wan machɔ ɛlda bin notis se Patrik nid fɔ mek chenj dɛn ɛn i bin kɔrɛkt am, bɔt i bin tek tɛm du am. Patrik tɔk se: “A gladi we i bin du dat, mi at bin pwɛl we  a bin de si ɔda brɔda dɛn de gɛt wok dɛn na di kɔngrigeshɔn we a bin want. Bɔt di ɛlda in advays bin ɛp mi fɔ si se a fɔ put misɛf dɔŋ ɛn wok fɔ mi brɔda ɛn sista dɛn ɛn nɔ pe atɛnshɔn fɔ gɛt privilɛj dɛn na di kɔngrigeshɔn.” Bikɔs Patrik fala di advays, dɛn bin pik am fɔ bi ɛlda we i ol 23 ia.​—Prɔv. 27:9.

17. Aw Jizɔs bin sho se i trɔst in disaypul dɛn?

¹⁷ Jizɔs nɔ bin jɔs gi in disaypul dɛn di wok fɔ prich, bɔt i bin gi dɛn bak di wok fɔ tich. (Luk di stɔdi not fɔ Matyu 28:20 “teaching them.”) Sɔntɛm di disaypul dɛn go dɔn fil se dɛn nɔ kwalifay fɔ du da wok de. Bɔt Jizɔs nɔ bin gɛt wan dawt se dɛn go ebul fɔ du di wok, ɛn i bin mek dɛn no dat. Fɔ sho se Jizɔs gɛt kɔnfidɛns pan dɛn, i bin tɔk se: “Jɔs lɛk aw di Papa sɛn mi, misɛf de sɛn una.”​—Jɔn 20:21.

18. Aw ɛlda dɛn go falamakata Jizɔs?

¹⁸ Aw ɛlda dɛn go falamakata Jizɔs? Ɛlda dɛn we gɛt ɛkspiriɛns de gi ɔda pipul dɛn wok fɔ du. (Fil. 2:​19-22) Fɔ ɛgzampul, ɛlda dɛn kin aks yɔŋ wan dɛn fɔ ɛp fɔ klin ɛn mek di say dɛn we dɔn pwɛl na di Kiŋdɔm Ɔl. Ɛlda dɛn kin gi brɔda dɛn wok fɔ du, tren dɛn fɔ du di wok, ɛn biliv se dɛn go ebul fɔ du di wok. Wan nyu ɛlda we nem Matyu tɔk se i rili gladi we ɛlda dɛn we gɛt ɛkspiriɛns kin tren am gud gud wan fɔ du wok dɛn na di kɔngrigeshɔn ɛn biliv se i go ebul fɔ dɔn dɛn. I tɔk se: “We a bin de mek mistek, dɛn bin de ɛp mi fɔ si aw a go lan frɔm dɛn mistek dɛn de ɛn sabi fɔ du mi wok fayn fayn wan.” d

19. Wetin wi fɔ mek-ɔp wi maynd fɔ du?

¹⁹ Jizɔs bin yuz di las 40 dez we i bin de na di wɔl fɔ ɛnkɔrej, tich, ɛn tren ɔda pipul dɛn. So lɛ wi mek-ɔp wi maynd fɔ fala in ɛgzampul gud gud wan. (1 Pit. 2:21) I go ɛp wi fɔ du dat. Afta ɔl, i dɔn prɔmis wi se: “A de wit una ɔltɛm te di tɛm want fɔ dɔn.”​—Mat. 28:20.