STƆDI ATIKUL 43
SIŊ 90 Lɛ Wi De Ɛnkɔrej Wisɛf
Wetin Go Ɛp Wi fɔ Lɛf fɔ Dawt?
“Una mek shɔ ɔf ɔltin.”—1 TƐS. 5:21.
MEN PƆYNT
Tin dɛn we go ɛp wi if wi gɛt dawt dɛn we go ambɔg wi padi biznɛs wit Jiova.
1-2. (a) Wetin na sɔm dawt dɛn we Jiova in savant dɛn kin gɛt? (b) Wetin wi go tɔk bɔt insay dis atikul?
SƆNTƐNDE, wi ɔl kin gɛt dawt a dɛn ilɛk wi yɔŋ ɔ ol. Fɔ ɛgzampul, imajin se wan yɔŋ pɔblisha de wɔnda if Jiova bisin bɔt am. Sɔntɛm dat go mek i nɔ shɔ if i fɔ ivin baptayz. Ɔ tink bɔt wan brɔda we bin disayd fɔ put di Kiŋdɔm fɔs na in layf we i bin yɔŋ bifo i du sɔntin we go mek i gɛt bɔku mɔni. Bɔt naw we i nɔ gɛt bɛtɛ mɔni fɔ kia fɔ in famili, sɔntɛm i go de wɔnda if na di rayt tin i bin disayd fɔ du we i bin yɔŋ. Tink bɔt wan ol sista we nɔ gɛt bɛtɛ trɛnk igen. Sɔntɛm in at pwɛl bikɔs i nɔ ebul du wetin i bin de du trade. Yu dɔn ɛva aks yusɛf kwɛstyɔn dɛn lɛk: ‘Fɔ se Jiova rili de notis mi? Di sakrifays dɛn we a dɔn mek fɔ am rili mek sɛns? A stil ebul wok fɔ Jiova?’
2 If wi nɔ tray fɔ gɛt ansa to dɛn kwɛstyɔn dɛn ya, i go mek wi nɔ gɛt fet pan Jiova ɛn ivin stɔp fɔ wɔship am. Insay dis atikul, wi go si aw Baybul prinsipul dɛn go ɛp wi if wi de dawt se (1) Jiova bisin bɔt wi, (2) if na di rayt tin dɛn wi bin disayd fɔ du fɔ sav Jiova, ɔ (3) if wi stil ebul wok fɔ Jiova.
WETIN GO ƐP WI FƆ LƐF FƆ DAWT?
3. Wetin na wan tin we wi go du we go ɛp wi fɔ lɛf fɔ dawt?
3 Wan tin we wi go du we go ɛp wi fɔ lɛf fɔ dawt na we wi rid Gɔd in Wɔd fɔ fɛn ansa to wi kwɛstyɔn dɛn. If wi du dat, wi padi biznɛs wit Jiova go tayt mɔ ɛn mɔ, wi go bi machɔ Kristian, ɛn wi go ebul fɔ “kɔntinyu fɔ gɛt strɔng fet.”—1 Kɔr. 16:13.
4. Aw wi go “mek shɔ ɔf ɔltin”? (1 Tɛsalonians 5:21)
4 Rid 1 Tɛsalonians 5:21. Notis se di Baybul ɛnkɔrej wi fɔ “mek shɔ ɔf ɔltin.” Aw wi go ebul fɔ du dat? Wi kin mek shɔ se wetin wi biliv na tru we wi kɔmpia am wit wetin di Baybul se. Fɔ ɛgzampul, tink bɔt di yɔŋ pɔblisha we de wɔnda if Gɔd rili valyu am. Fɔ se i fɔ jɔs gri se di we aw i de tink kɔrɛkt? Nɔ, i fɔ “mek shɔ ɔf ɔltin” bay we i tray fɔ ɔndastand aw Jiova de tink bɔt am.
5. Aw wi de “yɛri” Jiova in ansa to wi kwɛstyɔn dɛn?
5 As wi de rid Gɔd in Wɔd, wi de “yɛri” we Jiova de tɔk to wi. Bɔt fɔ mek wi go ebul ɔndastand wetin Jiova tink bɔt wan patikyula kwɛstyɔn, wi nɔ fɔ jɔs rid Gɔd in Wɔd, wi fɔ du pas dat. Wi fɔ rid bɔt tɔpik dɛn na di Baybul we go ɛp wi fɔ gɛt ansa to di patikyula kwɛstyɔn we wi gɛt. Wi kin yuz di tin dɛn we Jiova in ɔganayzeshɔn dɔn gi wi fɔ ɛp wi fɔ ɔndastand di Baybul, fɔ du risach bɔt da tɔpik de. (Prɔv. 2:3-6) As wi de du risach, wi kin pre to Jiova fɔ beg am fɔ ɛp wi fɔ gɛt ansa to wi kwɛstyɔn dɛn. Dɔn, wi fɔ luk fɔ Baybul prinsipul dɛn ɛn infɔmeshɔn we gɛt sɔntin fɔ du wit di we aw wi de fil. Wi go bɛnifit bak we wi rid akawnt dɛn na di Baybul bɔt pipul dɛn we bin fil da sem we de.
6. Aw di mitin dɛn de ɛp wi fɔ lɛf fɔ dawt?
6 Wi de “yɛri” bak we Jiova de tɔk to wi na wi mitin dɛn. If wi de atɛnd di mitin dɛn ɔltɛm, wi go yɛri sɔntin insay tɔk ɔ kɔmɛnt we pɔsin go gi we go ɛp wi fɔ lɛf fɔ dawt. (Prɔv. 27:17) Naw, lɛ wi tɔk bɔt wetin go ɛp wi fɔ gɛt ansa to patikyula kwɛstyɔn dɛn we de mek wi dawt.
WE YU DE DAWT IF JIOVA BISIN BƆT YU
7. Us kwɛstyɔn sɔm pipul dɛn kin aks?
7 Yu dɔn ɛva aks yusɛf dis kwɛstyɔn, ‘Fɔ se Jiova rili de notis mi?’ If yu de fil se yu nɔ impɔtant, yu go tink se i nɔ go ɛva pɔsibul fɔ bi padi to di Wan we mek ɔltin. Sɔntɛm Kiŋ Devid bin tink da sem we de. I bin tink se na wɔndaful tin fɔ mek Jiova bisin bɔt mɔtalman. I bin aks se: “E Jiova, udat na mɔtalman we yu fɔ notis am, ɛn udat na mɔtalman pikin we yu fɔ pe atɛnshɔn to?” (Sam 144:3) Usay yu go fɛn ansa to dis kwɛstyɔn?
8. Akɔdin to 1 Samiɛl 16:6, 7, 10-12, wetin Jiova de notis pan pipul dɛn?
8 Di Baybul tich wi se Jiova de notis di wan dɛn we ɔda pipul dɛn tink se nɔ impɔtant. Fɔ ɛgzampul, Jiova bin sɛn Samiɛl na Jɛsi in os fɔ anɔynt wan pan Jɛsi in bɔypikin dɛn we go bi kiŋ na Izrɛl. Jɛsi bin sho Samiɛl sɛvin pan in et bɔypikin dɛn, bɔt i nɔ bin sho Devid we na bin di las wan. b Bɔt, na Devid Jiova bin pik. (Rid 1 Samiɛl 16:6, 7, 10-12.) Jiova bin si di kayn pɔsin we Devid rili bi. I bin no se dis yɔŋman ya rili lɛk am.
9. Wetin mek yu fɔ biliv se Jiova bisin bɔt yu? (Luk bak di pikchɔ.)
9 Tink bɔt aw Jiova dɔn ɔlrɛdi sho se i de notis yu. I de gi yu di rayt advays we yu nid. (Sam 32:8) Aw i go ebul fɔ du dat if i nɔ sabi yu gud gud wan? (Sam 139:1) We yu fala di advays we Jiova de gi yu ɛn si aw i de ɛp yu, yu go biliv tranga wan se i bisin bɔt yu. (1 Kro. 28:9; Akt 17:26, 27) Jiova de si ɔl di tin dɛn we yu de du fɔ sav am ɛn fɔ obe am. I de si di fayn kwaliti dɛn we yu gɛt ɛn i want fɔ bi yu padi. (Jɛr. 17:10) I want mek yu gri fɔ lɛ i bi yu Padi.—1 Jɔn 4:19.
“If yu luk fɔ [Jiova], i go mek lɛ yu si am.”—1 Kro. 28:9 (Luk na paregraf 9) c
WE YU DE DAWT IF NA DI RAYT TIN DƐN YU BIN DISAYD FƆ DU
10. We wi tink bɔt di tin dɛn we wi bin disayd fɔ du, us kwɛstyɔn dɛn sɔntɛm go kam na wi maynd?
10 Sɔntɛnde, sɔm pipul dɛn kin tink bɔt tin dɛn we dɛn bin disayd fɔ du ɛn wɔnda if na di rayt tin dɛn bin disayd fɔ du. Sɔntɛm dɛn bin disayd fɔ lɛf fayn wok ɔ disayd nɔ fɔ du biznɛs we go mek dɛn gɛt bɔku mɔni bikɔs dɛn want fɔ du mɔ fɔ Jiova. Bɔt sɔntɛm lɔng tɛm dɔn pas frɔm we dɛn bin disayd fɔ du dat. Sɔntɛm dɛn de si pipul dɛn we dɛn sabi we bin disayd fɔ wok fɔ gɛt bɔku mɔni ɛn naw i tan lɛk se dɛn gɛt bɔku mɔni ɛn dɛn de ɛnjɔy dɛn layf. Bikɔs ɔf dis, sɔntɛm dɛn go wɔnda: ‘Fɔ se na di rayt tin a bin disayd fɔ du fɔ mek sakrifays dɛn fɔ Jiova? Ɔ fɔ se dɛn sakrifays dɛn de mek a lɔs ɔda chans dɛn?’
11. Wetin mek di man we rayt Sam 73 in at bin pwɛl?
11 If yu dɔn de tink bɔt dɛn sem kwɛstyɔn dɛn de, tink bɔt aw di man we rayt Sam 73 bin fil. I bin de si we pipul dɛn we nɔ de sav Jiova gɛt wɛlbɔdi, jɛntri, ɛn i bin tan lɛk se dɛn nɔ gɛt wan prɔblɛm. (Sam 73:3-5, 12) We i de si se ɔltin luk fayn fɔ dɛn, dat mek i fil se di sakrifays dɛn we i bin mek fɔ sav Jiova na fɔ natin. I bin de “gɛt prɔblɛm ol de” bikɔs di tin dɛn we i bin de tink bɔt bin de mek in at pwɛl. (Sam 73:13, 14) Wetin i du we i bin de fil dis we?
12. Akɔdin to Sam 73:16-18, wetin bin ɛp di man we rayt dis sam fɔ lɛf fɔ fil bad?
12 Rid Sam 73:16-18. Di man we rayt dis sam bin go na Jiova in tɛmpul. Na de i bin ebul fɔ tink fayn fayn wan. I bin ɔndastand se pan ɔl we i tan lɛk se sɔm pipul dɛn de ɛnjɔy dɛn layf, dɛn nɔ gɛt op fɔ tumara bambay. Dis bin mek in at nɔ pwɛl igen bikɔs i bin no se fɔ sav Jiova na di bɛst tin we pɔsin go ɛva disayd fɔ du. Bikɔs ɔf dat, i bin mek-ɔp in maynd fɔ kɔntinyu fɔ sav Jiova.—Sam 73:23-28.
13. Wetin go ɛp yu fɔ gɛt kolat if yu nɔ shɔ se na di rayt tin dɛn yu bin disayd fɔ du? (Luk bak di pikchɔ.)
13 Jɔs lɛk di man we rayt Sam 73, Gɔd in Wɔd go ɛp yusɛf fɔ gɛt kolat. Aw? Tink bɔt aw di tin dɛn we yu gɛt valyu, lɛk Jiova in blɛsin dɛn, ɛn kɔmpia dɛn to wetin go apin to di wan dɛn we nɔ de sav Jiova we jɔs gɛt di tin dɛn we de na dis wɔl. Sɔntɛm, dɛn go abop pan di tin dɛn we dɛn gɛt na dis wɔl wit ɔl dɛn at bikɔs dɛn nɔ gɛt op fɔ tumara bambay. Bɔt Jiova dɔn prɔmis yu blɛsin dɛn we pas ɛnitin we yu go ɛva ebul imajin. (Sam 145:16) Tink bak bɔt dis: Ɛniwan pan wi fɔ dɔn no wetin fɔ dɔn apin to wi if wi bin disayd fɔ du ɔda tin? Wan tin we wi no na dat: Di wan dɛn we disayd fɔ du tin dɛn bikɔs dɛn lɛk Gɔd ɛn dɛn neba dɛn nɔ go ɛva mis ɛnitin we gud.
Tink bɔt di blɛsin dɛn we Jiova dɔn prɔmis wi (Luk na paregraf 13) d
WE YU DE DAWT IF YU EBUL WOK FƆ JIOVA
14. Wetin mek sɔm pipul dɛn nɔ gɛt kɔnfidɛns? Us kwɛstyɔn sɔntɛm dɛn go tink bɔt?
14 Sɔm pan Jiova in savant dɛn nɔ ebul fɔ du bɔku pan di tin dɛn we dɛn bin de du trade bikɔs dɛn dɔn ol, dɛn gɛt wɛlbɔdi prɔblɛm dɛn, ɔ dɛn gɛt ɔda prɔblɛm dɛn we mek dɛn nɔ ebul du tin dɛn fɔ dɛnsɛf. Dat kin mek dɛn bigin dawt if Jiova valyu dɛn. Sɔntɛm dɛn go aks se, ‘Fɔ se ɛnitin de we a go stil ebul du fɔ Jiova?’
15. Wetin di man we rayt Sam 71 bin biliv tranga wan?
15 Di man we rayt Sam 71 bin de fil da sem we de. I bin pre se: “Nɔ lɛf mi we a nɔ gɛt bɛtɛ trɛnk igen.” (Sam 71:9, 18) Bɔt di man we rayt dis sam bin biliv tranga wan se if i kɔntinyu fɔ sav Gɔd, I go gayd ɛn sɔpɔt am. I bin lan se Jiova gladi fɔ di wan dɛn we de du dɛn bɛst fɔ sav Am pan ɔl we dɛn gɛt prɔblɛm dɛn.—Sam 37:23-25.
16. Wetin ol wan dɛn go ebul du fɔ Jiova? (Sam 92:12-15)
16 If yu na pɔsin we dɔn ol, tink bɔt aw Jiova de si yu. l ebul fɔ ɛp yu fɔ sav am fetful wan pan ɔl we tin dɛn de we yu nɔ go ebul fɔ du. (Rid Sam 92:12-15.) Bifo yu pe atɛnshɔn pan tin dɛn we yu nɔ ebul fɔ du igen, na fɔ pe atɛnshɔn pan tin dɛn we yu ebul fɔ du. Fɔ ɛgzampul, yu kin ebul ɛp ɔda pipul dɛn bay di fayn ɛgzampul we yu de sɛt ɛn we yu de sho se yu bisin bɔt dɛn. Yu kin tɔk bɔt aw Jiova dɔn ɛp yu ɔl dis tɛm ɛn aw yu biliv tranga wan se in prɔmis dɛn go kam tru. Ɛn nɔ ɛva tɛkɛ di gud tin dɛn we go apin we yu pre fɔ ɔda pipul dɛn wit ɔl yu at. (1 Pit. 3:12) Ilɛk wetin de apin to wi, wi ɔl gɛt sɔntin fɔ gi Jiova ɛn ɔda pipul dɛn.
17. Wetin mek wi nɔ fɔ kɔmpia wisɛf wit ɔda pipul dɛn?
17 If yu at pwɛl bikɔs yu nɔ ebul du mɔ fɔ Jiova, gɛt kɔnfidɛns se Jiova valyu ɛnitin we yu ebul du fɔ am. Sɔntɛm yu go want fɔ kɔmpia wetin yu de du wit wetin ɔda pipul dɛn de du. Nɔ du dat! Wetin mek? Na bikɔs Jiova nɔ de kɔmpia wi wit ɔda pipul dɛn. (Gal. 6:4) Fɔ ɛgzampul, Meri bin gi Jizɔs pafyum ɔyl we rili dia. (Jɔn 12:3-5) Bɔt wan po uman we in man bin dɔn day bin gi tu smɔl kɔyn dɛn we nɔ gɛt bɛtɛ valyu as kɔntribyushɔn. (Lyuk 21:1-4) Bɔt Jizɔs bin si dɛn gift dɛn as sɔntin we de sho se dɛn gɛt fet. In Papa Jiova rili valyu ɛnitin we yu ebul du bikɔs yu want fɔ sav am ɛn yu lɛk am, ilɛksɛf yu fil se nɔto bɛtɛ tin.
18. Wetin go ɛp wi fɔ lɛf fɔ dawt? (Luk bak di bɔks we gɛt di taytul, “ Jiova in Wɔd Go Ɛp Yu fɔ Lɛf fɔ Dawt.”)
18 Sɔntɛnde, wi ɔl kin gɛt dawt. Bɔt as wi dɔn lan, di Baybul we na Gɔd in Wɔd go ɛp wi fɔ lɛf fɔ dawt. So du yu bɛst fɔ fɛn ansa to yu kwɛstyɔn dɛn, ɛn dat go ɛp yu fɔ gɛt kɔnfidɛns ɛn lɛf fɔ wɔri. Wan dawt nɔ de se Jiova de notis yu. I gladi fɔ ɔl di sakrifays dɛn we yu de mek ɛn i rɛdi fɔ blɛs yu. Gɛt kɔnfidɛns se Jiova lɛk ɛn bisin bɔt ɔl in savant dɛn we nɔ de kɔmɔt biɛn am.
SIŊ 111 Tin dɛn we De Mek Wi Gladi
a WƆD WE DƐN ƐKSPLEN: Insay dis atikul, wi de tɔk bɔt dawt dɛn we de mek wi nɔ shɔ if Jiova valyu wi ɔ we de mek wi nɔ shɔ if na di rayt tin dɛn wi bin disayd fɔ du. Dɛn dawt dɛn ya nɔto di kayn dawt dɛn we di Baybul tɔk bɔt we de sho se pɔsin nɔ gɛt fet pan Jiova ɛn in prɔmis dɛn.
b Pan ɔl we di Baybul nɔ tɛl wi Devid in ɛgzakt ej we Jiova bin pik am fɔ bi kiŋ, i go bi se in na bin tineja.—Luk di Sɛptɛmba 1, 2011, Wachtawa, pej. 29, par. 2.
