Nɔ, di Baybul nɔ tɔk dat, ɛn ivin istri nɔ sho se pipul dɛn bin de du dat.

Di we aw dis vas de insay bɔku Baybul dɛn dɔn mek sɔm pipul dɛn tink se insay Pɔl in tɛm, pipul dɛn bin de baptayz fɔ di wan dɛn we dɔn day. Fɔ ɛgzampul, wan Baybul tɔk se: “If na tru dɛn de tɔk we dɛn se Gɔd nɔ de mek dɛn wan we dɔn day rayz frɔm dɛn grev, wetin mek pipul de go baptayz fɔ dɛn wan we dɔn day?”—Krio Fɔs Oli Baybul.

Bɔt notis wetin tu masta sabi bukman dɛn we stɔdi bɔt di Baybul se. Dɔktɔ Grɛgri Lɔkwud bin tɔk se: “No pruf nɔ de na di Baybul ɔ istri fɔ sho se ɛnibɔdi bin baptayz fɔ dayman.” Semweso, Profɛsɔ Gɔdɔn D. Fi bin rayt se: “No ɛgzampul nɔ de na di Baybul ɔ na istri fɔ sho se dɛn bin de baptayz da kayn we de.” I tɔk se: “Dɛn nɔ bin ɛva tɔk bɔt dat na di N[yu] T[ɛstamɛnt] ɛn natin nɔ de fɔ sho se di fɔstɛm Kristian dɛn bin ɛva du dat. Ɔ natin nɔ de fɔ sho se di chɔch dɛn we dɛn bin mek jɔs afta di apɔsul dɛn day bin de du dat.”

Jizɔs bin tɛl di wan dɛn we de fala am se: “Una go ɛn mek pipul dɛn bi mi disaypul na ɔl di neshɔn dɛn. Una baptayz dɛn. . . . Una tich dɛn fɔ du ɔl di tin dɛn we a dɔn tɛl una.” (Mat. 28:​19, 20) Bifo pɔsin go baptayz ɛn bi disaypul, i nid fɔ lan bɔt Jiova ɛn in Pikin, biliv dɛn, ɛn obe dɛn. Pɔsin we dɔn day ɛn de na di grev nɔ go ebul fɔ du dat, ɛn Kristian we de alayv nɔ go ebul fɔ du dat fɔ am.—Ɛkli. 9:​5, 10; Jɔn 4:​1; 1 Kɔr. 1:​14-16.

So wetin Pɔl bin min?

Sɔm pipul dɛn na Kɔrint bin de tɔk se di wan dɛn we dɔn day nɔ go gɛt layf bak. (1 Kɔr. 15:​12) Pɔl bin sho se di we aw dɛn de tink nɔ kɔrɛkt. Aw i du dat? I bin tɔk se ‘ɛvride day bin de kam in we.’ Bɔt i bin stil de alayv. I ɛksplen se in layf bin de pan denja, bɔt i bin gɛt kɔnfidɛns fɔ se afta we i day, i go gɛt layf bak as pawaful spirit jɔs lɛk Jizɔs.—1 Kɔr. 15:​30-32, 42-44.

Di Kristian dɛn na Kɔrint bin nid fɔ no se fɔ bi anɔyntɛd Kristian min se dɛn go gɛt prɔblɛm dɛn ɛvride ɛn day bifo dɛn go gɛt layf bak. Fɔ “baptayz insay Krays Jizɔs” min fɔ “baptayz insay in day.” (Rom. 6:​3) Dis min se jɔs lɛk Jizɔs, dɛn go gɛt prɔblɛm dɛn ɛn day so dat dɛn go gɛt layf bak fɔ de na ɛvin.

Afta tu ia we Jizɔs bin baptayz insay wata, i bin tɛl tu pan in apɔsul dɛn se: “Una go baptayz di we aw dɛn de baptayz mi.” (Mak 10:​38, 39) Da tɛm de we Jizɔs de tɔk, i nɔ bin de baptayz insay wata. So we Jizɔs tɔk dat, i bin min se di fetful we i fetful to Gɔd go mek i day. Pɔl bin rayt se anɔyntɛd Kristian dɛn go “sɔfa togɛda, [so dat dɛn] go gɛt glori togɛda.” (Rom. 8:​16, 17; 2 Kɔr. 4:​17) So dɛnsɛf go nid fɔ day so dat dɛn go gɛt layf bak fɔ de na ɛvin.

So di rayt we fɔ translet wetin Pɔl bin tɔk na: “If nɔto dat, wetin di wan dɛn we de baptayz fɔ mek dɛn day go du? If di wan dɛn we dɔn day nɔ go gɛt layf igen, wetin mek dɛn de baptayz fɔ mek dɛn day?”