1. Bɔku tɛm, aw Jiova kin ansa in savant dɛn prea dɛn?

 YU BIN ɛva no se i pɔsibul fɔ lɛ Jiova yuz yu fɔ ansa pɔsin in prea? Yu go ebul fɔ ɛp ilɛk yu na ɛlda, ministerial savant, payɔnia, ɔ pɔblisha na di kɔngrigeshɔn. Yu go ebul fɔ ɛp bak ilɛk yu yɔŋ ɔ ol ɔ ilɛk yu na brɔda ɔ sista. We pɔsin we lɛk Jiova de pre to am fɔ ɛp, bɔku tɛm wi Gɔd kin yuz di ɛlda dɛn ɛn ɔda wan dɛn we na in fetful savant dɛn fɔ “rili kɔrej” da pɔsin de. (Kol. 4:​11) Wi kin rili gladi fɔ wok fɔ Jiova ɛn wi brɔda ɛn sista dɛn da we de! Wi go ebul fɔ ɛp ɛn kɔrej wi brɔda ɛn sista dɛn we sik we de prɛd de, we dizasta apin, ɔ we dɛn de mek dɛn sɔfa.

2. Wetin mek i nɔ kin izi fɔ ɛp ɔda pipul dɛn di tɛm we sik de prɛd?

² We sik we de prɛd de, dat kin mek i nɔ izi fɔ lɛ wi ɛp ɔda pipul dɛn. Fɔ ɛgzampul, sɔntɛm wi go want fɔ go fɛn wi padi dɛn, bɔt i nɔ kin sef fɔ du dat. Sɔntɛm wi go want fɔ mek di wan dɛn we nɔ gɛt bɛtɛ mɔni kam jɔyn wi na wi os fɔ it togɛda, bɔt dat sɛf nɔ kin pɔsibul. I go bi se wi want fɔ ɛp ɔda pipul dɛn, bɔt dat nɔ kin izi if wi yon famili dɛnsɛf sik ɔ dɛn gɛt mɔni prɔblɛm. Bɔt stil, wi want fɔ ɛp wi brɔda ɛn sista dɛn, ɛn Jiova kin gladi we wi de du ɔl wetin wi ebul fɔ ɛp dɛn. (Prɔv. 3:​27, NWT; 19:​17) Wetin wi go ebul fɔ du?

3. Wetin wi lan frɔm di ɛlda dɛn na Dezi in kɔngrigeshɔn? (Jɛrimaya 23:​4)

³ Wetin ɛlda dɛn go ebul fɔ du? If yu na ɛlda, tray fɔ no di ship dɛn gud gud wan. (Rid Jɛrimaya 23:​4.) Dezi, we na wan sista we wi bin dɔn tɔk bɔt na di atikul bifo dis wan, tɔk se, “Trade, di ɛlda dɛn na mi fil savis grup bin de wok wit mi ɛn ɔda brɔda ɛn sista dɛn ɔltɛm, ɛn dɛn bin de jɔyn  wi we wi bin de spɛn tɛm togɛda.” b Dis bin mek i izi fɔ lɛ dɛn ɛlda dɛn ya ebul fɔ ɛp Dezi afta di COVID-19 pandɛmik bin stat ɛn we di sik bin kil sɔm pan in fambul dɛn.

4. Wetin mek di ɛlda dɛn bin ebul fɔ ɛp Dezi? Wetin na di lɛsin?

⁴ Dezi ɛksplen se, “Bikɔs di ɛlda dɛn bin dɔn ɔlrɛdi bi mi padi, i izi fɔ mek a tɛl dɛn aw a de fil ɛn wetin de mek a wɔri.” Wetin na di lɛsin fɔ ɛlda dɛn? Una sho se una bisin bɔt di brɔda ɛn sista dɛn bifo prɔblɛm stat. Bi padi to dɛn. If sik we de prɛd de mek yu nɔ ebul fɔ go fɛn dɛn, tray fɔ yuz ɔda we dɛn fɔ tɔk to dɛn. Dezi tɔk se: “Sɔntɛnde, insay wangren de, difrɛn difrɛn ɛlda dɛn bin de kɔl mi ɔ sɛn mɛsej to mi. Di skripchɔ dɛn we dɛn bin de rid bin rili tɔch mi at, pan ɔl we a bin sabi dɛn skripchɔ dɛn de gud gud wan.”

5. Aw ɛlda dɛn go ebul fɔ no wetin di brɔda ɛn sista dɛn nid ɛn ɛp dɛn?

⁵ Wan we aw yu go ebul fɔ no wetin yu brɔda ɛn sista dɛn nid na we yu de aks dɛn kwɛstyɔn dɛn we nɔ go mek dɛn shem. (Prɔv. 20:​5) Yu tink se dɛn gɛt it we go du fɔ dɛn, mɛrɛsin, ɛn ɔda tin dɛn? Fɔ se i pɔsibul se dɛn go lɔs dɛn wok ɔ sɔntɛm dɛn nɔ go gɛt bɛtɛ mɔni fɔ pe dɛn rɛnt? Fɔ se dɛn nid ɛp fɔ aplay fɔ sɔntin we di gɔvmɛnt de gi pipul dɛn? Dezi in kɔmpin Kristian dɛn bin ɛp am wit di tin dɛn we i nid. Bɔt na we di ɛlda dɛn bin de sho se dɛn lɛk am ɛn we dɛn bin de yuz di Baybul fɔ ɛnkɔrej am, na dat bin rili ɛp am di tɛm we i bin gɛt in prɔblɛm dɛn. I tɔk se: “Di ɛlda dɛn bin de pre wit mi. Pan ɔl we a nɔ mɛmba ɔl wetin dɛn bin de tɔk, a mɛmba aw a bin de fil. I tan lɛk se Jiova bin de tɛl mi se, ‘Nɔto yu wangren de.’”—Ayz. 41:​10, 13.

6. Wetin bɔku pan wi na di kɔngrigeshɔn go ebul fɔ du fɔ ɛp ɔda pipul dɛn? (Luk di pikchɔ.)

⁶ Wetin ɔda pipul dɛn go ebul fɔ du? Wi no se na di ɛlda dɛn fɔ de bifo fɔ kia fɔ di brɔda ɛn sista dɛn na di kɔngrigeshɔn. Bɔt Jiova want fɔ mek wi ɔl ɛnkɔrej ɛn ɛp ɔda pipul dɛn. (Gal. 6:​10) Ilɛksɛf na smɔl tin wi du fɔ sho se wi lɛk pɔsin we sik, dat kin rili ɛnkɔrej am. Sɔntɛm wan smɔl pikin go ebul fɔ sɛn kad ɔ drɔ sɔntin fɔ ɛnkɔrej wan brɔda. I go bi se wan yɔŋ brɔda ɔ sista go ebul fɔ go bay bay ɔ du ɔda tin dɛn fɔ wan sista. Ɔ ɔda wan dɛn na di kɔngrigeshɔn kin ebul fɔ kuk fɔ pɔsin we  sik ɛn go lɛf am na in os. As wi no, di tɛm we sik we de prɛd de, ɔlman na di kɔngrigeshɔn kin nid ɛnkɔrejmɛnt. Sɔntɛm we mitin dɔn, wi go ebul de fɔ sɔm tɛm fɔ tɔk to di brɔda ɛn sista dɛn, ilɛksɛf na fes-to-fes ɔ tru vidio kɔnfrɛns. Ɛn di ɛlda dɛnsɛf nid ɛnkɔrejmɛnt. Sɔm brɔda ɛn sista dɛn kin rayt smɔl tin fɔ tɛl di ɛlda dɛn tɛnki bikɔs dɛn kin rili bizi di tɛm we sik we de prɛd de. I rili fayn fɔ lɛ wi du wetin wi ebul fɔ “kɔntinyu fɔ ɛnkɔrej [wi] kɔmpin dɛn ɛn ɛp [wi] kɔmpin dɛn fɔ tinap tranga wan”!—1 Tɛs. 5:​11.

7. Us prɔblɛm dɛn kin mit pipul dɛn we dizasta apin?

⁷ Dizasta kin ambɔg pɔsin in layf insay shɔt tɛm. Pipul dɛn kin lɔs dɛn prɔpati, dɛn os, ɔ ivin di wan dɛn we dɛn lɛk. Wi Kristian brɔda ɛn sista dɛnsɛf kin gɛt dɛn kayn prɔblɛm dɛn ya. Wetin wi go ebul du fɔ ɛp dɛn?

8. Wetin di ɛlda dɛn ɛn di wan dɛn we de oba dɛn famili fɔ du bifo dizasta apin?

⁸ Wetin ɛlda dɛn go ebul fɔ du? Ɛlda dɛn, una ɛp una brɔda ɛn sista dɛn fɔ rɛdi bifo dizasta apin. Mek shɔ se ɔlman na di kɔngrigeshɔn no wetin-ɛn-wetin dɛn go nid fɔ du fɔ mek dɛn go sef ɛn fɔ mek dɛn go ebul tɔk wit di ɛlda dɛn. Magrɛt, we wi bin dɔn tɔk bɔt na di atikul bifo dis wan, bin se: “Wi ɛlda dɛn bin du wan lokal nid pat usay dɛn wɔn wi se i pɔsibul se big big faya go kech na wi eria. Dɛn tɛl wi se if di wan dɛn we gɛt pawa tɛl wi fɔ lɛf wi os dɛn ɔ if sɔntin apin we go put wi layf pan denja, wi fɔ lɛf wantɛm wantɛm.” Di brɔda dɛn bin gi da infɔmeshɔn de di rayt tɛm, bikɔs big big faya bin kech fayv wiks leta. We una de du famili wɔship, di wan dɛn we de oba di famili fɔ tɔk bɔt wetin ɔlman na di famili go du. If yu ɛn yu pikin dɛn dɔn rɛdi, i go mɔs bi se una nɔ go wɔri di tɛm we dizasta go apin.

9. Aw ɛlda dɛn go ebul fɔ ɛp bifo dizasta apin ɛn afta i apin?

⁹ If yu na fil savis grup ovasia, mek shɔ se yu gɛt ɔlman we de na yu fil savis grup dɛn kɔrɛkt fon nɔmba ɛn adrɛs, ɛn mek shɔ se yu du dis bifo dizasta apin. Mek list we yu go de chɛk as tɛm de go fɔ mek shɔ se ɔltin we de de stil kɔrɛkt. Dɔn we dizasta apin, yu go ebul fɔ kɔl ɔl di pɔblisha dɛn fɔ no wetin dɛn nid. Sɛn dis infɔmeshɔn to di kɔdinetɔ fɔ di ɛlda dɛn wantɛm wantɛm, ɛn insɛf go tɔk to di sakit ovasia. We dɛn brɔda dɛn ya de wok togɛda, dat go mek dɛn ɛp di brɔda ɛn sista dɛn di bɛst we aw dɛn go ebul. Afta di faya, Magrɛt in sakit ovasia nɔ bin slip fɔ 36 awa, bikɔs i bin de ɔganayz di ɛlda dɛn fɔ mek dɛn go ebul fɔ kɔl ɛn kia fɔ di 450 brɔda ɛn sista dɛn we bin gɛt fɔ lɛf dɛn os dɛn. (2 Kɔr. 11:​27) So, dɛn bin ebul fɔ kia fɔ ɔlman we bin nid say fɔ de.

10. Wetin mek i impɔtant fɔ mek ɛlda dɛn sho di brɔda ɛn sista dɛn se dɛn bisin bɔt dɛn? (Jɔn 21:​15)

¹⁰ Na di ɛlda dɛn gɛt di wok fɔ yuz di Baybul fɔ ɛnkɔrej di brɔda ɛn sista dɛn ɛn fɔ ɛp di wan dɛn we dɛn at pwɛl. (1 Pit. 5:​2) We dizasta apin, di fɔs tin we ɛlda dɛn fɔ du na fɔ mek shɔ se ɔl di brɔda ɛn sista dɛn sef ɛn dɛn gɛt tin fɔ it, klos fɔ wɛr, ɛn say fɔ de. Bɔt lɔng tɛm afta di dizasta kin dɔn apin, di brɔda ɛn sista dɛn go stil nid ɛnkɔrejmɛnt frɔm di Baybul, ɛn dɛn go stil nid fɔ no se di brɔda dɛn bisin bɔt dɛn. (Rid Jɔn 21:​15.) Arɔld, we na Branch Kɔmiti mɛmba we dɔn mit bɔku brɔda ɛn sista dɛn we dizasta dɔn afɛkt, bin tɔk se: “I kin tek tɛm fɔ lɛ dɛn  fɔgɛt bɔt wetin apin. I go bi se dɛn go stat fɔ liv nɔmal layf bak, bɔt dɛn kin stil de mɛmba pɔsin we dɛn lɛk we dɔn day, sɔntin we dɛn bin valyu we dɛn dɔn lɔs, ɔ di tɛm we dɛn layf bin de pan denja. Ɔl dɛn tin dɛn ya we dɛn kin mɛmba kin mek dɛn at pwɛl bak. Dis kayn we aw dɛn de fil nɔ min se dɛn nɔ gɛt fet, bɔt na jɔs nɔmal tin we kin apin to pipul dɛn.”

11. Us ɔda tin dɛn famili dɛn go nid?

¹¹ Ɛlda dɛn kin mɛmba di advays we se fɔ “kray wit di wan dɛn we de kray.” (Rom. 12:​15) Di ɛlda dɛn nid fɔ ɛp di wan dɛn we dizasta dɔn afɛkt fɔ no se Jiova ɛn di brɔda ɛn sista dɛn stil lɛk dɛn. Ɛlda dɛn go ɛp famili dɛn fɔ kɔntinyu fɔ du tin dɛn lɛk fɔ pre, stɔdi, atɛnd mitin, ɛn du di prichin wok. Dɔn bak, di ɛlda dɛn go ɛnkɔrej mama ɛn papa dɛn fɔ ɛp dɛn pikin dɛn fɔ pe atɛnshɔn pan tin dɛn we dizasta nɔ go ebul fɔ pwɛl. Mama ɛn papa dɛn, una mɛmba una pikin dɛn se Jiova nɔ go ɛva stɔp fɔ bi dɛn Padi, ɛn i go ɛp dɛn ɔltɛm. Ɛn mek shɔ se una ɛksplen to dɛn se dɛn gɛt brɔda ɛn sista dɛn ɔlsay na di wɔl we rɛdi fɔ ɛp dɛn.—1 Pit. 2:​17.

12. Wetin ɔda pipul dɛn go du fɔ ɛp we dizasta apin? (Luk di pikchɔ.)

¹² Wetin ɔda pipul dɛn go ebul fɔ du? If dizasta apin nia yu, aks di ɛlda dɛn aw yu go ebul fɔ ɛp. Sɔntɛm yu go ebul fɔ mek di wan dɛn we dɔn kɔmɔt na dɛn os ɔ di wan dɛn we kam ɛp wit di dizasta rilif wok de na yu os fɔ sɔm tɛm. Ɛn sɔntɛm i go bi se yu go ebul fɔ go wit it ɔ ɔda tin dɛn to di pɔblisha dɛn we nid dɛn. Yu go stil ebul fɔ ɛp ilɛk dizasta apin fa say. Aw? Na bay we yu de pre fɔ di wan dɛn we di dizasta dɔn afɛkt. (2 Kɔr. 1:​8-11) Yu go ebul ɛp wit di rilif wok bay we yu de gi mɔni fɔ sɔpɔt di wɔlwayd wɔk. (2 Kɔr. 8:​2-5) If yu go ebul fɔ go ɛp na say we dizasta dɔn apin, aks di ɛlda dɛn wetin yu go du fɔ ɛp. If dɛn tɛl yu fɔ go ɛp di brɔda ɛn sista dɛn, sɔntɛm dɛn go gi yu trenin so dat yu go ebul gi dɛn di ɛp we dɛn nid.

13. Us prɔblɛm dɛn wi brɔda ɛn sista dɛn kin gɛt na kɔntri dɛn usay dɛn dɔn ban wi wok?

¹³ Layf nɔ kin izi fɔ wi brɔda ɛn sista dɛn we de na kɔntri usay dɛn dɔn ban wi wok. Di brɔda ɛn sista dɛn we kin de na dɛn  kɔntri dɛn de kin stil gɛt mɔni prɔblɛm, dɛn kin sik, ɛn pipul dɛn we dɛn lɛk kin day. Bɔt bikɔs dɛn dɔn ban di wok, sɔntɛm di ɛlda dɛn nɔ go ebul fɔ go fɛn ɔ tɔk wit di wan dɛn we nid ɛnkɔrejmɛnt. Na dat bin apin to Andre, we wi bin tɔk bɔt na di atikul bifo dis wan. Wan sista na in fil savis grup bin de gɛt mɔni prɔblɛm. Dɔn i bin gɛt motoka aksidɛnt. I bin nid fɔ du bɔku ɔpreshɔn dɛn, ɛn i nɔ bin ebul fɔ go wok. Pan ɔl we dɛn bin dɔn ban di wok ɛn di pandɛmik bin de, di brɔda dɛn bin du wetin dɛn ebul fɔ ɛp di sista, ɛn Jiova bin de si wetin bin de apin.

14. Aw ɛlda dɛn go sɛt fayn ɛgzampul bay we dɛn de abop pan Jiova?

¹⁴ Wetin ɛlda dɛn go ebul fɔ du? Andre bin pre ɛn du wetin i bin ebul fɔ du. Aw Jiova bin ansa in prea? I bin yuz brɔda ɛn sista dɛn we bin gɛt mɔ fridɔm fɔ gi di sista di ɛp we i nid. Sɔm pan dɛn bin de go wit di sista na ɔspitul, ɛn ɔda wan dɛn bin gi am mɔni. Jiova bin yuz dɛn fɔ ɛp am, ɛn i bin mek shɔ se di brɔda ɛn sista dɛn na di kɔngrigeshɔn bin ebul fɔ gi di sista wetin i nid. (Ibru. 13:​16) Ɛlda dɛn, if una de na say we dɛn dɔn ban wi wok, una aks ɔda pipul dɛn fɔ ɛp una. (Jɛr. 36:​5, 6) Pantap dat, una abop pan Jiova. I go ɛp una fɔ kia fɔ wi brɔda ɛn sista dɛn.

15. Aw wi go kɔntinyu fɔ gɛt wanwɔd we pipul dɛn de mek wi sɔfa?

¹⁵ Wetin ɔda pipul dɛn go ebul fɔ du? We wi de ɔnda ban, sɔntɛm dat go mek na smɔl smɔl grup dɛn wi ɛn wi brɔda ɛn sista dɛn go de mit. So i rili impɔtant naw pas ɛni ɔda tɛm fɔ lɛ wi kɔntinyu fɔ gɛt pis wit wi brɔda ɛn sista dɛn. Na Setan wi fɔ fɛt, nɔto wi kɔmpin Kristian dɛn. Nɔ pe atɛnshɔn pan yu brɔda ɛn sista dɛn mistek dɛn, ɛn tray fɔ sɛtul ɛni cham-mɔt we una gɛt kwik kwik wan. (Prɔv. 19:​11; Ɛfi. 4:​26) Rɛdi ɔltɛm fɔ ɛp ɔda pipul dɛn. (Tay. 3:​14) Bikɔs ɔda pipul dɛn bin ɛp di sista we bin nid ɛp, dat bin rili bɛnifit dɛn fil savis grup. Dɛn bin kam fɔ lɛk dɛnsɛf mɔ ɛn mɔ, jɔs lɛk famili.—Sam 133:​1.

16. Akɔdin to Koloshians 4:​3, 18, aw wi go ebul fɔ ɛp wi brɔda ɛn sista dɛn we pipul dɛn de mek dɛn sɔfa?

¹⁶ Bɔku pan wi brɔda ɛn sista dɛn de sav Jiova pan ɔl we di gɔvmɛnt dɔn ban dɛn wok. Sɔm pan dɛn de na prizin bikɔs ɔf wetin dɛn biliv. Wi kin pre fɔ dɛn ɛn dɛn famili. Wi kin pre bak fɔ di wan dɛn we de  sho se dɛn gɛt maynd fɔ sɔpɔt wi brɔda ɛn sista dɛn we de na prizin pan ɔl we dat go mek dɛn arɛst dɛnsɛf. Dɛn de ɛnkɔrej dɛn brɔda ɛn sista dɛn ya fɔ kɔntinyu fɔ abop pan Jiova, dɛn de gi dɛn di tin dɛn we dɛn nid, ɛn tɔk fɔ dɛn na kɔt. c (Rid Koloshians 4:​3, 18.) Nɔ ɛva fɔgɛt se yu prea go ɛp ɔl dɛn brɔda ɛn sista dɛn de!—2 Tɛs. 3:​1, 2; 1 Tim. 2:​1, 2.

17. Aw yu go ebul fɔ rɛdi naw fɔ di tɛm we pipul dɛn go mek una sɔfa?

¹⁷ Yu ɛn yu famili go ebul fɔ rɛdi naw fɔ di tɛm we pipul dɛn go mek una sɔfa. (Akt 14:​22) Nɔ tray fɔ imajin ɔl di bad tin dɛn we go apin to una. Bifo dat, tray fɔ gɛt tayt padi biznɛs wit Jiova ɛn ɛp yu pikin dɛn fɔ du di sem tin. If tɛm dɛn de we yu kin wɔri, na fɔ tɛl Gɔd ɔl wetin de na yu at. (Sam 62:​7, 8) Yu ɛn yu famili fɔ tɔk bɔt di rizin dɛn we mek una fɔ abop pan am. d Jɔs lɛk aw i fayn we yu ɛn yu pikin dɛn de rɛdi fɔ di tɛm we dizasta go apin, na so i fayn bak fɔ ɛp yu pikin dɛn fɔ rɛdi fɔ di tɛm we pipul dɛn go mek dɛn sɔfa. Dat go ɛp dɛn fɔ gɛt maynd ɛn nɔ wɔri bikɔs yu dɔn tich dɛn fɔ abop pan Jiova.

18. Wetin go apin to wi tumara bambay?

¹⁸ Di pis we Gɔd de gi de protɛkt wi. (Fil. 4:​6, 7) Jiova de yuz dis pis fɔ ɛp wi mek wi nɔ wɔri ilɛk wi de sɔfa bikɔs sik we de prɛd de, dizasta dɛn de apin, ɛn pipul dɛn de mek wi sɔfa. I de yuz di ɛlda dɛn we de wok tranga wan fɔ kia fɔ wi. Ɛn i de gi wi ɔl di chans fɔ ɛp wi kɔmpin dɛn. Di pis we wi de ɛnjɔy naw go rɛdi wi fɔ mɔ prɔblɛm dɛn we go kam tumara bambay, ivin di “big big trɔbul.” (Mat. 24:​21) Da tɛm de, wi go nid fɔ kɔntinyu fɔ gɛt pis ɛn ɛp ɔda pipul dɛn fɔ du di sem tin. Bɔt afta da big big trɔbul, wi nɔ go gɛt siriɔs prɔblɛm dɛn igen we go mek wi wɔri. Wi go ɛnjɔy wetin Jiova bin want mek wi ɛnjɔy frɔm trade, dat na tru tru pis we go de sote go.—Ayz. 26:​3, 4.