STƆDI ATIKUL 49
Wi Go De Sote Go
“Di gift we Gɔd de gi na layf we go de sote go.”—ROM. 6:23.
SIŊ 147 Gɔd Dɔn Prɔmis Wi Layf we Go De Sote Go
WETIN WI GO LAN? a
1. We wi tink gud wan bɔt Jiova in prɔmis fɔ gi wi layf we go de sote go, aw dat de afɛkt wi?
JIOVA prɔmis se di wan dɛn we de obe am go gɛt “layf we go de sote go.” (Rom. 6:23) We wi tink gud wan bɔt wetin Jiova de gi wi, dat de mek wi lɛk am mɔ ɛn mɔ. Tink bɔt dis: Wi Papa we de na ɛvin so lɛk wi dat wi nɔ go ɛva kɔmɔt nia am.
2. Aw di prɔmis fɔ gɛt layf we go de sote go de ɛp wi?
2 Di prɔmis we Gɔd dɔn prɔmis fɔ gi wi layf we go de sote go de ɛp wi fɔ bia di prɔblɛm dɛn we de mit wi naw. Ilɛk wi ɛnimi dɛn trɛtin fɔ kil wi, wi nɔ go stɔp fɔ sav Jiova. Wetin mek? Wan rizin na bikɔs wi no se if wi fetful to Jiova te wi day, i go gi wi layf bak, ɛn wi go gɛt di op se wi nɔ go day igen. (Jɔn 5:28, 29; 1 Kɔr. 15:55-58; Ibru. 2:15) Wetin mek wi shɔ se i pɔsibul fɔ mek wi de sote go? Lɛ wi tɔk bɔt dɛn rizin dɛn ya.
JIOVA DE SOTE GO
3. Wetin mek wi shɔ se Jiova ebul mek wi de sote go? (Sam 102:12, 24, 27)
3 Wi no se Jiova ebul mek wi de sote go bikɔs na in de gi layf, ɛn i de sote go. (Sam 36:9) Notis sɔm Baybul vas dɛn we pruv se Jiova bin dɔn de frɔm tɛm ɛn i go kɔntinyu fɔ de ɔltɛm. Sam 90:2 tɔk se Jiova ‘bin dɔn de ɛn i go stil de sote go.’ Sam 102 tɔk sɔntin we fiba dat. (Rid Sam 102:12, 24, 27.) Ɛn prɔfɛt Abakɔk rayt bɔt wi Papa we de na ɛvin se: “E Jiova, yu nɔ dɔn de frɔm trade trade? E mi Gɔd, mi Oli Wan, yu nɔ de day.”—Aba. 1:12, NWT.
4. Yu tink se wi fɔ wɔri if wi nɔ ɔndastand di aydia fɔ se Jiova dɔn de frɔm tɛm? Ɛksplen.
4 Fɔ se i nɔ izi fɔ mek yu ɔndastand di aydia se Jiova na di Gɔd we ‘bin dɔn de frɔm tɛm ɛn we de sote go’? (Ayz. 40:28) Nɔto yu wan de fil da we de. Ilayu bin tɔk bɔt Gɔd se: “Nɔbɔdi nɔ go ebul no aw lɔŋ i dɔn de.” (Job 36:26) Bɔt jɔs bikɔs wi nɔ ɔndastand sɔntin nɔ min se nɔto tru. Fɔ ɛgzampul, pan ɔl we sɔntɛm wi nɔ ɔndastand gud gud wan aw layt de wok, fɔ se dat min se layt nɔ de? Nɔ, i nɔ min dat. Semweso, as mɔtalman, sɔntɛm wi nɔ go ɛva ɔndastand gud gud wan aw i pɔsibul se Jiova dɔn de frɔm tɛm ɛn i go de sote go. Bɔt dis nɔ min se Gɔd nɔ go de sote go. Di tru bɔt di Wan we mek wi nɔ gɛt ɛnitin fɔ du wit wetin wi ebul ɔndastand ɔ wetin wi nɔ ebul ɔndastand bɔt am. (Rom. 11:33-36) Ɛn i bin dɔn de bifo i mek ɛnitin na di wɔl, ivin di san ɛn sta dɛn. Jiova mek wi no se na in “mek di wɔl wit in pawa,” ɛn i bin dɔn de bifo i ‘mek di klawd.’ (Jɛr. 51:15; Akt 17:24) Us ɔda rizin de we mek wi shɔ se i pɔsibul fɔ mek wi de sote go?
JIOVA MEK WI FƆ DE SOTE GO
5. Us op di fɔs man ɛn uman bin gɛt?
5 Ɔl di tin dɛn we gɛt layf we Jiova mek na di wɔl go day as tɛm de go, na mɔtalman nɔmɔ i nɔ mek fɔ day. Na dɛn nɔmɔ i gi di op fɔ se dɛn nɔ go ɛva day. Bɔt Jiova bin wɔn Adam se: “Yu nɔ fɔ it pan di ‘Sɛns tik,’ bikɔs if yu it pan am, da sem de de, yu go day.” (Jɛn. 2:17) If Adam ɛn Iv bin obe Jiova, dɛn nɔ bin fɔ dɔn day. I mek sɛns fɔ biliv se as tɛm de go, Jiova bin fɔ dɔn alaw dɛn fɔ it frɔm di “Layf tik.” Dis bin fɔ dɔn mek dɛn shɔ se dɛn go gɛt “layf we go de sote go.” b—Jɛn. 3:22.
6-7. (a) Wetin sho bak se Jiova nɔ mek mɔtalman fɔ day? (b) Wetin yu lɛk we yu go want fɔ du na Paradays? (Luk di pikchɔ dɛn.)
6 I intrɛstin fɔ no se sɔm sayɛnsman dɛn dɔn kam fɔ no se wi bren ebul fɔ kip bɔku infɔmeshɔn pas wetin wi ebul fɔ lan di tɛm we wi de alayv. Insay 2010, wan atikul na wan jɔnal tɔk se wi bren ebul fɔ kip infɔmeshɔn we ikwal to vidio we dɛn rɛkɔd fɔ tri milyɔn awa. Wi go tek pas 300 ia fɔ wach da vidio de. Ɛn sɔntɛm i go bi se wi bren ebul fɔ kip mɔ infɔmeshɔn pas dat. Bɔt dis sho se Jiova mek wi bren fɔ kip mɔ infɔmeshɔn pas wetin wi ebul fɔ lan insay jɔs 70 ɔ 80 ia.—Sam 90:10.
7 Jiova mek wi bak di kayn we we go mek wi want fɔ de sote go. Di Baybul tɔk bɔt mɔtalman se Gɔd dɔn “mek dɛn want fɔ de sote go.” (Ɛkli. 3:11, NWT) Dat na wan rizin we mek wi de si day as ɛnimi. (1 Kɔr. 15:26) If wi sik siriɔs wan, fɔ se wi go jɔs wet fɔ day ɛn nɔ du natin? Nɔ. Bɔku tɛm, wi kin go to dɔktɔ, ɛn sɔntɛm wi go tek mɛrɛsin fɔ mɛn di sik. Infakt, wi de du ɔl wetin wi ebul fɔ mek wi nɔ day. Ɛn we pɔsin we wi lɛk day, ilɛk da pɔsin de yɔŋ ɔ ol, wi at kin rili pwɛl, ɛn wi de fil da pen de fɔ lɔng tɛm. (Jɔn 11:32, 33) Wi go kɔntinyu fɔ lan sote go ɛn wi go rili want fɔ de sote go bikɔs na so di Wan we lɛk wi, mek wi. Wi shɔ se i go mek i pɔsibul fɔ mek wi de sote go. Bɔt wi ivin gɛt mɔ rizin dɛn fɔ biliv se wi go ebul fɔ de sote go. Naw, wi de kam tɔk bɔt wetin Jiova bin dɔn du trade ɛn wetin i de du naw we pruv se wetin i bin want nɔ chenj.
Bikɔs wi gɛt op fɔ gɛt layf we go de sote go, wi de ɛnjɔy fɔ imajin di tin dɛn we wi go ebul fɔ du tumara bambay (Luk na paregraf 7) c
WETIN JIOVA BIN WANT NƆ CHENJ
8. Wetin Ayzaya 55:11 tich wi bɔt wetin Jiova want fɔ wi?
8 Pan ɔl we Adam ɛn Iv bin sin ɛn mek dɛn pikin dɛn de day, Jiova nɔ chenj in maynd bɔt wetin i want fɔ du. (Rid Ayzaya 55:11.) I stil want mek mɔtalman dɛn we fetful de sote go. Wi no dat bikɔs ɔf di tin dɛn we Jiova dɔn se ɛn du fɔ mek wetin i want bi.
9. Wetin Gɔd dɔn prɔmis? (Daniɛl 12:2, 13)
9 Jiova dɔn prɔmis se i go gi layf bak to di wan dɛn we dɔn day ɛn gi dɛn chans fɔ de sote go. (Akt 24:15; Tay. 1:1, 2) Job we na bin fetful man bin biliv tranga wan se Jiova rili want fɔ gi layf to di wan dɛn we dɔn day. (Job 14:14, 15) Prɔfɛt Daniɛl bin no se mɔtalman go gɛt layf bak ɛn gɛt di chans fɔ de sote go. (Sam 37:29; rid Daniɛl 12:2, 13.) Di Ju dɛn bak we bin de insay Jizɔs in tɛm bin no se Jiova go gi in fetful savant dɛn “layf we go de sote go.” (Lyuk 10:25; 18:18) Jizɔs bin de tɔk bɔt dis prɔmis bɔku tɛm, ɛn in Papa bin gi am layf bak.—Mat. 19:29; 22:31, 32; Lyuk 18:30; Jɔn 11:25.
We Ilayja bin gi layf bak, wetin dat mek yu biliv? (Luk na paregraf 10)
10. We pipul dɛn bin gɛt layf bak trade, wetin dat pruv? (Luk di pikchɔ.)
10 Na Jiova de gi layf, ɛn i gɛt di pawa fɔ gi layf bak to pipul dɛn. I bin gi prɔfɛt Ilayja pawa fɔ gi layf bak to wan uman we bin de na Zarɛfat, we in man bin dɔn day, in bɔypikin. (1 Kiŋ 17:21-23) Leta, Gɔd bin ɛp prɔfɛt Ilaysha fɔ gi layf bak to wan Shunamayt uman in pikin. (2 Kiŋ 4:18-20, 34-37) Dɛn pipul dɛn de we bin gɛt layf bak ɛn ɔda wan dɛn pruv se Jiova gɛt di pawa fɔ gi layf bak to pipul dɛn. We Jizɔs bin de na di wɔl, i bin pruv se in Papa dɔn gi am da pawa de. (Jɔn 11:23-25, 43, 44) Naw, Jizɔs de na ɛvin, ɛn Gɔd dɔn “put [am] oba ɔltin na ɛvin ɛn na dis wɔl.” So i go du wetin i dɔn prɔmis fɔ se “ɔl di wan dɛn we de na di grev dɛn we Gɔd de mɛmba” go gɛt layf bak ɛn gɛt op fɔ de sote go.—Mat. 28:18; Jɔn 5:25-29.
11. Aw di day we Jizɔs day mek i pɔsibul fɔ lɛ wi de sote go?
11 Wetin mek Jiova bin alaw in Pikin we i rili lɛk fɔ sɔfa te i day? Jizɔs bin gi di ansa to da kwɛstyɔn de we i bin tɔk se: “Gɔd rili lɛk di wɔl, na dat mek i gi in wangren Pikin we insɛf sɛf mek, so dat ɛnibɔdi we sho se i gɛt fet pan am Gɔd nɔ go dɔnawe wit am, bɔt i go gɛt layf we go de sote go.” (Jɔn 3:16) We Jiova bin mek in Bɔypikin kam day fɔ wi sin dɛn, dat mek i pɔsibul fɔ mek wi gɛt layf we go de sote go. (Mat. 20:28) Apɔsul Pɔl bin ɛksplen dis impɔtant pat bɔt wetin Gɔd want fɔ du we i rayt se: “Ɛnti na wan man briŋ day, na wan man bak go mek di wan dɛn we dɔn day gɛt layf bak. Jɔs lɛk aw Adam mek ɔlman de day, na so bak di Krays go mek ɔlman gɛt layf.”—1 Kɔr. 15:21, 22.
12. Aw di Kiŋdɔm go ɛp fɔ mek wetin Jiova want fɔ wi bi?
12 Jizɔs bin tich in disaypul dɛn fɔ pre fɔ mek Gɔd in Kiŋdɔm kam ɛn fɔ mek wetin Gɔd want bi na di wɔl. (Mat. 6:9, 10) Wan pan di tin dɛn we Gɔd want na fɔ mek mɔtalman de sote go na di wɔl. Fɔ mek dat go apin, Jiova dɔn pik in Pikin fɔ bi di Kiŋ na in Kiŋdɔm. Gɔd dɔn de gɛda 144,000 pipul dɛn frɔm di wɔl, fɔ wok wit Jizɔs fɔ mek wetin Gɔd want bi.—Rɛv. 5:9, 10.
13. Wetin Jiova de du naw? Wetin yu fɔ du?
13 Naw, Jiova de gɛda “bɔku bɔku pipul dɛn.” I de tren dɛn fɔ no aw fɔ liv ɔnda in Kiŋdɔm. (Rɛv. 7:9, 10; Jems 2:8) Pan ɔl we pipul dɛn na di wɔl tide nɔ gɛt wanwɔd bikɔs dɛn et dɛnsɛf ɛn dɛn de fɛt wɔ, di “bɔku bɔku pipul dɛn” we Jiova de tren de wok tranga wan fɔ avɔyd ɛnitin we go mek dɛn nɔ lɛk dɛnsɛf. Dɛn de sho bay wetin dɛn de du fɔ se dɛn de nak nak dɛn sɔd fɔ mek tin fɔ yuz na fam. (Mayk. 4:3) Dɛn nɔ de put an pan wɔ we de mek bɔku pipul dɛn day. Bifo dat, dɛn de ɛp pipul dɛn fɔ fɛn “di rial layf” bay we dɛn de tich dɛn bɔt di tru Gɔd ɛn wetin i want. (1 Tim. 6:19) Sɔntɛm dɛn famili dɛn go de agens dɛn ɔ sɔntɛm dɛn nɔ go gɛt mɔni bikɔs dɛn de sɔpɔt Gɔd in Kiŋdɔm, bɔt Jiova de mek shɔ se dɛn gɛt di tin dɛn we dɛn nid. (Mat. 6:25, 30-33; Lyuk 18:29, 30) Dɛn tin dɛn ya we de apin ɛp wi fɔ no se Gɔd in Kiŋdɔm rial, ɛn i go kɔntinyu fɔ mek wetin Jiova want bi.
TUMARA BAMBAY GO FAYN
14-15. Aw di prɔmis we Jiova dɔn prɔmis fɔ pul day sote go, go faynali apin?
14 Naw, Jizɔs na di Kiŋ na Gɔd in Kiŋdɔm na ɛvin, ɛn i go du ɔl di tin dɛn we Jiova dɔn prɔmis. (2 Kɔr. 1:20) Frɔm 1914, Jizɔs dɔn de put in ɛnimi dɛn ɔnda in fut. (Sam 110:1, 2) I nɔ go te igen, in ɛn di wan dɛn we go jɔyn am fɔ rul go dɔnawe wit ɔl di wikɛd pipul dɛn.—Rɛv. 6:2.
15 Insay di Wan Tawzin Ia we Krays Go De Rul, i go gi layf bak to di wan dɛn we dɔn day ɛn i go ɛp di wan dɛn we de obe Jiova fɔ pafɛkt. Afta di las tɛst, di wan dɛn we Jiova go jɔj as pipul dɛn we de du wetin rayt “go gɛt di land [ɔ wɔl], ɛn dɛn go de de sote go.” (Sam 37:10, 11, 29) Wi go gladi we “di las ɛnimi, we na day, nɔ go de igen.”—1 Kɔr. 15:26.
16. Wetin fɔ bi wi men rizin fɔ sav Jiova?
16 As wi dɔn lan insay dis atikul, wi op fɔ de sote go kɔmɔt na Gɔd in Wɔd. Da op de go ɛp wi fɔ kɔntinyu fɔ de biɛn Jiova insay dis las dez we tin nɔ rili izi. Bɔt wi nɔ fɔ du tin dɛn we go mek Jiova gladi jɔs bikɔs wi want fɔ de sote go. Di men rizin we mek wi de kɔntinyu fɔ de biɛn Jiova ɛn Jizɔs na bikɔs wi rili lɛk dɛn. (2 Kɔr. 5:14, 15) Na da lɔv de, de muv wi fɔ falamakata dɛn ɛn prich to ɔda pipul dɛn bɔt wi op. (Rom. 10:13-15) We wi lan fɔ bi pipul dɛn we nɔ jɔs bisin bɔt wisɛf ɛn we fri-an, wi go bi di kayn pipul dɛn we Jiova want as in padi dɛn sote go.—Ibru. 13:16.
17. Wetin wi ɔl nid fɔ disayd? (Matyu 7:13, 14)
17 Fɔ se wi go bi wan pan di pipul dɛn we go gɛt layf we go de sote go? Wɛl, Jiova dɔn gi wi da chans de. Naw, wi nid fɔ disayd if wi go kɔntinyu fɔ waka na di rod we go mek wi gɛt layf. (Rid Matyu 7:13, 14.) Aw layf go tan lɛk we wi go de sote go? Wi go tɔk bɔt di ansa to da kwɛstyɔn de insay di nɛks atikul.
SIŊ 141 Layf Na Wɔndaful Gift
a Yu de wet fɔ di tɛm we yu go de sote go? Jiova dɔn prɔmis wi se tɛm go kam we wi nɔ go ɛva wɔri se wi go day. Dis atikul go tɔk bɔt sɔm pan di rizin dɛn we mek wi fɔ biliv tranga wan se Jiova go du wetin i dɔn prɔmis.
b Rid di bɔks we gɛt di taytul, “ Wetin ‘Sote Go’ Min Insay di Baybul?”
c SMƆL TIN BƆT DI PIKCHƆ: Wan ol brɔda de imajin sɔm pan di tin dɛn we i go ɛnjɔy fɔ du sote go tumara bambay.
