We Jiova bin tɛl mɔtalman fɔ “ful-ɔp di wɔl ɛn mek am fayn,” i bin sho se as tɛm de go di wan ol wɔl go bi Paradays. (Jɛn. 1:​28, NWT) Di wan dɛn we go de sote go, go nid fɔ obe da sem lɔ de. Di wɔl nɔ go bi Paradays frɔm di biginin bikɔs di gadin we bin de na Idɛn nɔ de igen. Jɔs afta Amagɛdɔn, wi go gɛt bɔku wok fɔ du fɔ klin di say dɛn na di wɔl we dɔn pwɛl. Dat go bi bɔku wok fɔ du.

Dis mek wi mɛmba di wok we di Izrɛlayt dɛn bin gɛt fɔ du we dɛn kɔmɔt na Babilɔn. Nɔbɔdi nɔ bin de na dɛn land fɔ 70 ia. Bɔt Ayzaya bin tɔk se wit Jiova in ɛp, dɛn go ebul fɔ mek di land fayn bak. Di prɔfɛsi bin se: “I go mek in dray ɛn ɛmti ples tan lɛk Idɛn, in ɛmti ples we pɔsin nɔ go ebul tap, go tan lɛk PAPA GƆD [“Jiova,” NWT] in gadin.” (Ayz. 51:​3) Jiova bin ɛp di Izrɛlayt dɛn fɔ mek dɛn land fayn bak. Semweso, wit Jiova in blɛsin, di wan  dɛn we go gɛt di wɔl go ebul mek di wɔl bi Paradays. Ɛn tin dɛn de we yu go ebul fɔ du naw fɔ sho se yu want fɔ ɛp fɔ mek di wɔl bi Paradays.

Wan we we yu go du dat na we yu du yu bɛst fɔ kɔntinyu fɔ mek yu os nit ɛn klin, ivin if yu neba dɛn nɔ klin. Yu kin ɛp bak fɔ klin ɛn kia fɔ una Kiŋdɔm Ɔl ɛn Asɛmbli Ɔl. If yu gɛt chans, yu kin aplay bak fɔ ɛp wit di dizasta rilif wok. Dat de sho se yu go lɛk fɔ ɛp yu brɔda ɛn sista dɛn we nid ɛp. Aks yusɛf, ‘A go ebul lan sɔntin we a go yuz if Jiova alaw mi fɔ de na di wɔl sote go?’

Jɔs afta Jizɔs bin gi layf bak to Jayrɔs in galpikin, i bin se mek dɛn gi am tin fɔ it. (Mak 5:​42, 43) Sɔntɛm nɔto bin tranga wok fɔ kia fɔ da 12 ia ol titi de. Bɔt tink bɔt di bɔku wok we wi gɛt fɔ du we Jizɔs go mek in prɔmis kam tru we se “ɔl di wan dɛn we de na di grev dɛn we Gɔd de mɛmba go yɛri di Pikin in vɔys ɛn kɔmɔt na do.” (Jɔn 5:​28, 29) Pan ɔl we di Baybul nɔ tɛl wi bɔku tin, wi go ebul imajin se di wan dɛn we go gɛt layf bak go nid ɛp fɔ gɛt tin fɔ it, say fɔ de, ɛn klos fɔ wɛr. Yu go ebul sho ivin naw se yu want fɔ rɛdi fɔ ɛp? Tink bɔt dɛn kwɛstyɔn dɛn ya.

We dɛn mek anawnsmɛnt se di sakit ovasia de kam na una kɔngrigeshɔn, yu kin gi yu nem fɔ invayt am fɔ kam na yu os fɔ it? We spɛshal ful-taym savant dɛn asaynmɛnt chenj, dɛn stɔp fɔ wok na Bɛtɛl, ɛn dɛn sɛn dɛn na yu kɔngrigeshɔn ɔ we sakit ovasia in travul wok ɛnd, yu go gri fɔ ɛp bay we yu go ɛp dɛn fɔ fɛn ples fɔ de? If dɛn go gɛt kɔnvɛnshɔn ɔ spɛshal kɔnvɛnshɔn na yu eria, yu go vɔlɔntia fɔ wok bifo ɔ afta di kɔnvɛnshɔn ɔ fɔ de fɔ wɛlkɔm di wan dɛn we de kam?

Bikɔs ɔf wetin de na Akt 24:​15, wi de ɛkspɛkt se bɔku bɔku pipul dɛn go gɛt layf bak. Bɔku pan dɛn go bi di wan dɛn we nɔ bin gɛt chans trade fɔ lan bɔt Jiova. Bɔt dɛn go gɛt da chans de afta dɛn gɛt layf bak. a Gɔd in savant dɛn we fetful ɛn gɛt ɛkspiriɛns go ɛp fɔ tich dɛn. (Ayz. 11:​9) Wan sista we nem Shalɔt we dɔn prich na Yurop, Sawt Amɛrika, ɛn Afrika de wet fɔ da tɛm de. I gladi fɔ tɔk se: “A de wet fɔ di tɛm we a go tich di pipul dɛn we go gɛt layf bak. We a rid bɔt pipul dɛn we bin dɔn de trade, bɔku tɛm a kin tink: ‘If dis pɔsin bin no Jiova, in layf bin fɔ difrɛn.’ A de wet fɔ di tɛm we a go tɛl di wan dɛn we go gɛt layf bak bɔt Jiova ɛn aw dɛn layf go bɛtɛ if dɛn sav am.”

Ivin Jiova in fetful savant dɛn we bin dɔn de bifo Jizɔs kam na di wɔl go gɛt bɔku tin fɔ lan. Jɔs imajin aw wi go rili gladi ɛn di ɔnɔ we wi go gɛt fɔ ɛksplen to Daniɛl aw in prɔfɛsi dɛn we i bin dɔn rayt bɔt ɛn we i nɔ bin ɔndastand, bin kam tru. (Dan. 12:​8) Ɔ tink bɔt aw wi go ɛp Rut ɛn Naomi fɔ lan se wan pan dɛn pikin dɛn na di Mɛsaya. Wi go ɛnjɔy fɔ tich pipul dɛn ɔlsay na di wɔl, ɛn di tin dɛn we de ambɔg wi tide na dis wikɛd wɔl nɔ go de igen.

Wetin yu go du naw so dat yu go rɛdi fɔ ɛp fɔ tich di wan dɛn we go gɛt layf bak? Wan we aw yu go du dat na we yu du yu bɛst fɔ bi gud ticha ɛn bay we yu de prich ɔltɛm. (Mat. 24:​14) Ivin if yu nɔ ebul fɔ prich di we aw yu want naw bikɔs yu dɔn ol ɔ bikɔs ɔf ɔda rizin dɛn, yu go sho se yu rɛdi fɔ tich di wan dɛn we go gɛt layf bak we yu de du yu bɛst fɔ du di prichin wok naw.

I gud fɔ tink bɔt dɛn impɔtant kwɛstyɔn dɛn ya: Yu rili de wet fɔ di tɛm we yu go gɛt di wɔl? Yu rili de wet fɔ di tɛm we yu go ɛp fɔ mek di wɔl ɛn fɔ ɛp ɛn tich di wan dɛn we go gɛt layf bak? Yu go sho se yu rɛdi fɔ de sote go na di wɔl bay we yu de ɛp fɔ du wok dɛn we tan lɛk di wok dɛn we yu go du di tɛm we yu go gɛt di wɔl.