Wan de, wan sista na Nyu Ziland bin wach di vidio we gɛt di taytul, “Have . . . Concern for One Another,” we tɔk bɔt aw Jiova nɔ jɔs de fil sɔri fɔ pipul dɛn, bɔt i de sho bak se i de sɔri fɔ dɛn. (Ayz. 63:​7-9) I bin disayd fɔ du wetin i lan bay we i luk fɔ we dɛn fɔ ɛp pɔsin we nid ɛp. Leta da sem de de we i go bay bay, i mit wan uman we nɔ gɛt say fɔ de ɛn disayd fɔ bay fɔ am tin fɔ it. Di uman bin gri fɔ mek i bay fɔ am di it. We di sista kam wit di it, i bin yuz da chans de fɔ prich to di uman ɛn sho am di trakt we nem, Wi Go Ɛva Lɛf fɔ Sɔfa?

Di uman bigin fɔ kray. I bin tɛl di sista se dɛn mɛn am as Jiova Witnɛs bɔt i dɔn lɛf di trut fɔ lɔng tɛm. Bɔt dis biɛn tɛm, i bin dɔn de pre to Jiova fɔ ɛp am fɔ kam bak to am. Di sista bin gi di uman Baybul ɛn mek arenjmɛnt fɔ stɔdi am, ɛn di uman bin gri fɔ stɔdi di Baybul. a

Lɛk Jiova, wisɛf go ebul sho sɔri-at to pipul dɛn, wi fambul dɛn, ɛn wi brɔda ɛn sista dɛn na di kɔngrigeshɔn. Ɛn wi go sho se wi gɛt sɔri-at bay we wi luk fɔ we dɛn fɔ prich to ɔda pipul dɛn.