WAN dawt nɔ de se yu gladi fɔ di bɔku gift dɛn we Jiova dɔn gi yu ɛn di fridɔm fɔ ɛnjɔy dɛn. Di Baybul mek wi no se wayn na gift we kɔmɔt frɔm Gɔd. I ivin tɔk se: “Fud de mek pɔsin laf, ɛn wayn de mek pɔsin ɛnjɔy layf.” (Ɛkli. 10:​19, NWT; Sam 104:15) Bɔt sɔntɛm yu dɔn notis se sɔm pipul dɛn dɔn gɛt prɔblɛm dɛn bikɔs ɔf rɔm. Dɔn bak, pipul dɛn ɔlsay na di wɔl gɛt difrɛn we aw dɛn de si rɔm. Wetin go ɛp Kristian dɛn fɔ disayd fɔ du di rayt tin we i kam pan fɔ drink rɔm?

Wi fɔ alaw di we aw Gɔd de tink fɔ gayd wi we wi de disayd wetin fɔ du ɛn wi nɔ fɔ alaw di we aw di wan dɛn we de arawnd wi de tink fɔ afɛkt wi. If wi du dat, wi go gɛt gladi-at.

Sɔntɛm yu go dɔn notis se bɔku pipul dɛn na di wɔl de drink rɔm pasmak ɛn dɛn de drink am ɔltɛm. Sɔntɛm, sɔm kin drink fɔ mek dɛn rilaks. Ɔda wan dɛn kin drink fɔ bia wit dɛn prɔblɛm dɛn. Ɛn na sɔm ples dɛn, bɔku pipul dɛn tink se we yu de drink pasmak, dat de sho se yu machɔ ɔ yu na strɔng pɔsin.

As Kristian dɛn, wi Papa we lɛk wi dɔn gi wi fayn advays dɛn. Fɔ ɛgzampul, i dɔn tɛl wi bɔt sɔm pan di bad tin dɛn we go apin to wi if wi de drink pasmak. Sɔntɛm yu go dɔn rid di advays we de na Prɔvabs 23:​29-35 we ɛksplen fayn fayn wan aw pɔsin we dɔn chak kin biev ɛn sɔm pan di prɔblɛm dɛn we i kin gɛt. a Wan ɛlda we nem Daniɛl, we de na Yurop mɛmba aw in layf bin tan lɛk bifo i kam fɔ bi tru Kristian. I tɔk se, “A bin de drink pasmak, ɛn dat mek a bin de disayd fɔ du di rɔng tin dɛn, ɛn bikɔs ɔf dat, bɔku bad tin dɛn bin apin to mi. A stil de fil bad we a tink bɔt di tin dɛn we a bin disayd fɔ du.”

Aw wi go disayd fɔ du tin dɛn we mek sɛns we i kam pan rɔm biznɛs ɛn avɔyd di prɔblɛm dɛn we pɔsin we de drink rɔm pasmak kin gɛt? Wi nid fɔ alaw di we aw Gɔd de tink fɔ gayd wi we i kam pan di tin dɛn we wi de disayd fɔ du.

Lɛ wi tɔk bɔt wetin di Baybul se bɔt rɔm ɛn sɔm pan di rizin dɛn we mek pipul dɛn kin drink rɔm.

Gɔd in Wɔd nɔ tɔk se wi nɔ fɔ drink rɔm. Infakt, di Baybul gri se fɔ drink wayn na sɔntin we de mek wi ɛnjɔy wisɛf. I tɔk se: “Go, gladi we yu de it yu fud, ɛn drink yu wayn wit gladi-at.” (Ɛkli. 9:​7, NWT) Jizɔs ɛn sɔm pan Jiova in savant dɛn bin de drink wayn wan wan tɛm.​—Mat. 26:​27-29; Lyuk 7:34; 1 Tim. 5:23.

Pan ɔl we Gɔd in Wɔd nɔ de agens fɔ drink rɔm, i tɔk klia wan se: “Una nɔ go de drink wayn te una chak.” (Ɛfi. 5:18) Ɛn i ivin tɔk se, “pipul dɛn we de drink te dɛn chak . . . nɔ go gɛt Gɔd in Kiŋdɔm.” (1 Kɔr. 6:10) Fɔ tru, Jiova rili de agens fɔ drink pasmak ɛn fɔ drink te yu chak. So bifo wi falamakata pipul dɛn we de arawnd wi we i kam pan aw fɔ drink rɔm, wi fɔ disayd fɔ du tin dɛn we go mek Gɔd gladi.

Sɔm kin tink se dɛn nɔ go chak ilɛk dɛn drink pasmak. Bɔt dat kin rili bad. Di Skripchɔ dɛn mek wi no klia wan se if ɛnibɔdi “bi slev to bɔku wayn,” dat kin mek i mek siriɔs mistek dɛn we go pwɛl in padi biznɛs wit Jiova. (Tay. 2:3; Prɔv. 20:1) Jizɔs bin ivin advays wi se “tumɔs drink” go mek sɔmbɔdi nɔ ɛnta na Gɔd in nyu wɔl. (Lyuk 21:​34-36)  So wetin go ɛp Kristian dɛn fɔ avɔyd di prɔblɛm dɛn we pɔsin we de drink rɔm pasmak kin gɛt?

Bad tin go apin if wi alaw di kɔlchɔ ɛn di we aw dɛn mɛn wi fɔ afɛkt wetin wi de disayd we i kam pan fɔ drink rɔm. Kristian dɛn want fɔ du wetin Jiova want we i kam pan wetin dɛn fɔ it ɛn drink. Di Baybul mɛmba wi se: “Ilɛksɛf [wi] de it ɔ drink ɔ [wi] de du ɛni ɔda tin, [wi fɔ] du ɔltin fɔ briŋ prez to Gɔd.” (1 Kɔr. 10:31) Dis na kwɛstyɔn dɛn ɛn Baybul prinsipul dɛn fɔ tink bɔt we i kam pan wetin fɔ disayd bɔt rɔm:

A de drink rɔm bikɔs a want mek ɔda pipul dɛn lɛk mi? Ɛksodɔs 23:2 se: “Una nɔ fala ɛni krawd fɔ du bad.” Insay dis vas, Jiova bin de wɔn di Izrɛlayt dɛn nɔ fɔ falamakata pipul dɛn we nɔ de du wetin i want. Dis advays ya fayn fɔ wi bak tide. If wi alaw ɔda pipul dɛn fɔ afɛkt di we aw wi de tink ɛn di tin dɛn we wi de disayd fɔ du we i kam pan rɔm biznɛs, dat go mek smɔl smɔl wi stɔp fɔ liv wi layf di we aw Jiova want ɛn lɔs wi padi biznɛs wit am.​—Rom. 12:2.

A kin drink rɔm bikɔs a want fɔ mek ɔda pipul dɛn tink se a strɔng? Na sɔm kɔlchɔ dɛn, fɔ drink bɔku rɔm ɛn fɔ drink ɔltɛm na sɔntin we kɔmɔn ɛn pipul dɛn nɔ gɛt prɔblɛm wit am. (1 Pit. 4:3) Bɔt notis di fayn advays we de na 1 Kɔrintians 16:13. I se: “Una nɔ slip, una kɔntinyu fɔ gɛt strɔng fet, una go de du tin lɛk man, ɛn una fɔ pawaful.” Fɔ se rɔm go mek pɔsin pawaful? Nɔ, i nɔ go ebul du dat. Bifo dat, i de mek i wik. Rɔm kin mek pɔsin nɔ ebul tink fayn ɔ disayd fɔ du di rayt tin. So fɔ drink rɔm pasmak nɔ de sho se pɔsin strɔng, bifo dat i de sho se in na fulman. We Ayzaya 28:7 de tɔk bɔt pɔsin we dɔn drink rɔm pasmak, i se, i de staga staga ɛn fɔdɔm.

Na Jiova de gi wi di trɛnk we wi nid fɔ du wetin rayt ɛn fɔ mek ‘wi nɔ slip ɛn gɛt strɔng fet.’ (Sam 18:32) Wi kin gɛt dis trɛnk bay we wi tek tɛm avɔyd denja dɛn ɛn disayd nɔ fɔ du tin dɛn we go ambɔg wi padi biznɛs wit Jiova. Jizɔs bin gɛt tayt padi biznɛs wit Jiova, ɛn bɔku pipul dɛn bin rɛspɛkt am bikɔs i bin gɛt maynd ɛn i bin mekɔp in maynd fɔ du wetin rayt.

 A de yuz rɔm fɔ fɔgɛt bɔt mi prɔblɛm dɛn? Wan pan di man dɛn we Gɔd bin yuz fɔ rayt di sam buk rayt se: “We a kin tink bɔt bɔku tin dɛn we kin mek a wɔri, yu [Jiova] kin kɔrej mi ɛn mek a fil fayn.” (Sam 94:19) We yu de wɔri bɔt sɔntin, bifo yu drink rɔm, na fɔ abop pan Jiova fɔ mek i ɛp yu. Wan fayn tin we yu kin du we yu de wɔri na fɔ pre to Jiova bɔku tɛm. Dɔn bak, bɔku pipul dɛn dɔn kam fɔ si se we dɛn aks machɔ Kristian dɛn na di kɔngrigeshɔn fɔ advays, dat kin bɛnifit dɛn. Fɔ tru, we pɔsin de drink rɔm fɔ ɛp am fɔ bia wit in prɔblɛm dɛn, dat de mek i nɔ tink di rayt we ɛn mek i nɔ ebul du wetin rayt. (Osia 4:11) Daniɛl we wi bin dɔn tɔk bɔt, tɔk se: “A bin de wɔri pasmak ɛn a bin de fil gilti. Dat bin mek a bigin drink rɔm fɔ fɔgɛt bɔt mi prɔblɛm dɛn, bɔt mi prɔblɛm dɛn bin jɔs de bɔku, ɛn a bin lɔs mi padi dɛn ɛn pipul dɛn nɔ bin de rɛspɛkt mi igen.” Wetin bin ɛp Daniɛl? I tɔk se: “A kam fɔ si se nɔto rɔm go ebul ɛp mi, na Jiova a bin nid fɔ ɛp mi. Bikɔs Jiova bin ɛp mi, dat bin mek a ebul bia mi prɔblɛm dɛn ɛn sɔlv dɛn.” Di tru na dat, Jiova rɛdi fɔ ɛp wi ɔltɛm ivin if i tan lɛk se wi nɔ gɛt wan op.​—Fil. 4:​6, 7; 1 Pit. 5:7.

If yu na pɔsin we kin drink wan wan tɛm, i go fayn fɔ mek yu tek tɛm tink fɔ si if nid de fɔ mek yu ajɔst di we aw yu de drink. Aks yusɛf dɛn kwɛstyɔn dɛn ya, ‘Mi tayt padi ɔ pɔsin na mi famili dɔn tɔk bɔt di we aw a de drink?’ If na so i bi, sɔntɛm yu dɔn bi pɔsin we dɔn yus to rɔm ɔ yu dɔn gɛt prɔblɛm we yusɛf sɛf nɔ no bɔt. ‘Fɔ se a de drink pas aw a yus fɔ drink?’ Dis kin apin to pɔsin we nɔ yus to rɔm ɛn we nɔ de drink pasmak ɔltɛm, i go bigin fɔ de drink pasmak ɔltɛm ɛn yus to rɔm. ‘Fɔ se i nɔ kin izi fɔ mi if wan ɔ tu dez pas a nɔ drink rɔm?’ If na so i bi, i min se di abit fɔ de drink dɔn de insay yu ɔ yu dɔn bi pɔsin we dɔn yus to rɔm. Sɔntɛm yu go nid dɔktɔ fɔ ɛp yu fɔ sɔlv dis prɔblɛm.

Sɔm Kristian dɛn dɔn disayd se dɛn nɔ go drink rɔm atɔl bikɔs rɔm de kɔz bɔku prɔblɛm dɛn. Ɔda wan dɛn dɔn disayd se dɛn nɔ go drink rɔm bikɔs dɛn nɔ lɛk di tes. If pɔsin  we yu sabi disayd nɔ fɔ drink rɔm, sho se yu na gud pɔsin bay we yu rɛspɛkt wetin i disayd ɛn nɔ mek i fil se na di rɔng tin i disayd fɔ du.

Sɔntɛm yu dɔn disayd se i mek sɛns fɔ ajɔst di we aw yu de drink rɔm. Ɔ sɔntɛm yu dɔn mek lɔ bɔt ɔmɔs tɛm yu de drink rɔm, sɔntɛm na wan tɛm insay di wik ɔ yu kin drink smɔl we una de it. Ɔda pipul dɛn dɔn mek lɔ bɔt di kayn rɔm we dɛn de drink. I kin bi wayn ɔ biya, bɔt dɛn nɔ go drink dɛn ad rɔm dɛn ɔ rɔm dɛn we dɛn miks wit ɔda tin dɛn. If pɔsin dɔn disayd aw i de drink rɔm, dat go mek i nɔ drink pas aw i fɔ drink. Kristian we machɔ nɔ nid fɔ wɔri bɔt wetin ɔda pipul dɛn go tink bɔt am bikɔs ɔf wetin i dɔn disayd fɔ du bɔt rɔm biznɛs ɛn bikɔs i dɔn mekɔp in maynd fɔ du wetin i dɔn disayd.

Wi nid fɔ tink bɔt aw ɔda pipul dɛn de fil we i kam to di tin dɛn we wi de disayd bɔt rɔm biznɛs. Romans 14:21 tɔk se: “I fayn nɔ fɔ it bif ɔ drink wayn ɔ du ɛnitin we go mek yu brɔda nɔ gɛt bɛtɛ fet igen.” Aw wi go fala dis advays? Sho se yu lɛk yu brɔda dɛn. If yu tink se fɔ drink rɔm go mek ɔda pɔsin fil bad, fɔ se lɔv go mek yu disayd nɔ fɔ drink am pan ɔl we yu gɛt rayt fɔ du dat? We yu du dis, yu de sho se yu lɛk ɔda pipul dɛn, yu rɛspɛkt ɛn bisin mɔ bɔt dɛn pas aw yu bisin bɔt yusɛf.​—1 Kɔr. 10:24.

Di gɔvmɛnt sɛf kin mek lɔ dɛn bɔt rɔm. Wan dawt nɔ de se Kristian dɛn go obe dɛn lɔ dɛn de. Di lɔ dɛn we di gɔvmɛnt kin mek, kin sho us ej pɔsin fɔ de bifo i bigin fɔ drink rɔm. Ɔ di lɔ dɛn de stɔp pipul dɛn fɔ drink rɔm we dɛn de drayv ɔ we dɛn de yuz sɔm patikyula mashin dɛn.​—Rom. 13:​1-5.

Jiova dɔn gi wi bɔku wɔndaful gift dɛn, ɛn wan pan dɛn na di fridɔm fɔ disayd aw wi go yuz dɛn gift dɛn de. Wi gɛt di fridɔm fɔ disayd wetin wi go it ɛn drink. So lɛ di tin dɛn we wi de disayd fɔ du sho se wi valyu dis fridɔm ɛn yuz am fɔ mek wi Papa we de na ɛvin gladi.