1. Us kwɛstyɔn wi go aks we wi tink bɔt Ebraam in fet?

 PAN ɔl we bɔku pipul dɛn dɔn yɛri bɔt Ebraam, bɔku pan dɛn nɔ no bɛtɛ tin bɔt am. Bɔt nɔto so i bi fɔ yu. Yu no bɔku tin bɔt am. Fɔ ɛgzampul, yu no se di Baybul kɔl am di “papa fɔ ɔl di wan dɛn we gɛt fet.” (Rom. 4:11) Bɔt sɔntɛm yu go de wɔnda, ‘A go ebul falamakata Ebraam ɛn gɛt di kayn fet we i bin gɛt?’ Yɛs, yu go ebul.

2. Wetin mek i impɔtant fɔ stɔdi Ebraam in ɛgzampul? (Jems 2:​22, 23)

² Wan we aw wi go ebul gɛt fet lɛk Ebraam na we wi stɔdi in ɛgzampul. Ebraam bin de du wetin Gɔd tɛl am ɔltɛm. I bin go de na wan kɔntri we de fa frɔm usay i bin de, i liv na tɛnt fɔ lɔng tɛm, ɛn i bin rɛdi fɔ sakrifays in pikin we i rili lɛk, we na Ayzak. Dɛn tin dɛn de we Ebraam du bin sho se i gɛt strɔng fet. Bikɔs Ebraam bin gɛt fet ɛn i bin de du gud tin dɛn, dat bin mek Gɔd gladi fɔ am ɛn bi in padi. (Rid Jems 2:​22, 23.) Jiova want fɔ mek wi ɔl, ivin yu fɔ ɛnjɔy dɛn sem blɛsin dɛn de. Na dat mek i yuz Pɔl ɛn Jems we na tu pan di man dɛn we rayt di Baybul fɔ tɔk bɔt Ebraam in ɛgzampul. Wi go tɔk bɔt wetin Romans chapta 4 ɛn Jems chapta 2 tɔk bɔt Ebraam. Pɔl ɛn Jems tɔk sɔntin bɔt Ebraam we rili impɔtant.

3. Us men skripchɔ Pɔl ɛn Jems bin kot?

 ³ Pɔl ɛn Jems kot Jɛnɛsis 15:​6, we se: “[Ebraam] put fet pan Jiova, ɛn I bin si am as pɔsin we de du wetin rayt.” (NWT) We Jiova gladi fɔ pɔsin, I de si am as pɔsin we de du wetin rayt ɔ we nɔ gɛt blem. I rili wɔndaful fɔ no se Gɔd de si mɔtalman as pipul dɛn we nɔ gɛt blem pan ɔl we wi nɔ pafɛkt ɛn wi de sin. I go mɔs bi se yu want mek Gɔd si yu as da kayn pɔsin de, ɛn i pɔsibul fɔ mek dat apin. Fɔ lɛ wi no aw wi go ebul bi pɔsin we de du wetin rayt, wi nid fɔ ɔndastand wetin mek Jiova se Ebraam na bin da kayn pɔsin de.

4. Wetin de mek mɔtalman dɛn nɔ bi pipul dɛn we de du wetin rayt?

⁴ Insay Pɔl in lɛta we i bin rayt to di Kristian dɛn na Rom, i bin se ɔlman dɔn sin. (Rom. 3:23) So wetin mek Gɔd go gladi wit wi ɛn se wi na pipul dɛn we de du wetin rayt? Pɔl bin yuz Ebraam in ɛgzampul fɔ ɛp ɔl tru Kristian dɛn fɔ ansa da kwɛstyɔn de.

5. Wetin mek Jiova bin se Ebraam na pɔsin we de du wetin rayt? (Romans 4:​2-4)

⁵ Na di tɛm we Ebraam bin de na Kenan nain Jiova kɔl am pɔsin we de du wetin rayt. Wetin mek Jiova bin se Ebraam de du wetin rayt? Fɔ se na bikɔs Ebraam bin de obe di Lɔ we Gɔd Bin Gi Mozis? Nɔ, nɔto dat. (Rom. 4:13) Gɔd bin gi di Lɔ to di Izrɛlayt dɛn 400 ia afta we i bin se Ebraam de du wetin rayt. So wetin mek Gɔd bin se Ebraam de du wetin rayt? Bikɔs Ebraam bin gɛt fet, Jiova bin sho am in spɛshal gudnɛs ɛn kɔl am pɔsin we de du wetin rayt.​—Rid Romans 4:​2-4.

6. Aw pɔsin we na sina go bi pɔsin we de du wetin rayt na Jiova in yay?

⁶ Pɔl bin se we pɔsin gɛt fet pan Gɔd, “in fet go mek Gɔd tek am as pɔsin we de du wetin rayt.” (Rom. 4:5) Pɔl tɔk bak se: “I jɔs tan lɛk wetin Devid insɛf bin tɔk bɔt di gladi-at we sɔmbɔdi kin gɛt we Gɔd tek am as pɔsin we de du wetin rayt, pan ɔl we i nɔ du sɔntin. I se: ‘Di wan dɛn we Gɔd dɔn sɔri fɔ, fɔ di bad tin dɛn we dɛn du, ɛn di wan dɛn we Gɔd dɔn fɔgiv fɔ dɛn sin, gɛt gladi-at.’” (Rom. 4:​6-8; Sam 32:​1, 2) If pɔsin we gɛt fet pan Gɔd kɔmit sin, Gɔd de fɔgiv am. I de fɔgiv di pɔsin fɔ ɔl wetin i dɔn du ɛn i nɔ de mɛmba di sin igen. I de si da kayn pɔsin de as pɔsin we nɔ gɛt blem ɛn we de du wetin rayt bikɔs ɔf in fet.

7. Wetin mek Gɔd bin si in fetful savant dɛn as pipul dɛn we de du wetin rayt?

⁷ Pan ɔl we Gɔd bin se Ebraam, Devid, ɛn in ɔda fetful savant dɛn na pipul dɛn we bin de du wetin rayt, dɛn bin stil de sin bikɔs dɛn nɔ pafɛkt. Bɔt bikɔs ɔf di fet we dɛn bin gɛt, Gɔd bin si dɛn as pipul dɛn we nɔ gɛt blem mɔ we i kɔmpia dɛn to di wan dɛn we nɔ de wɔship am. (Ɛfi. 2:12) Pɔl tɔk klia wan na in lɛta se fɔ mek wi go ebul bi Gɔd in padi, wi nid fɔ gɛt fet. Ebraam ɛn Devid na bin Jiova in padi dɛn bikɔs dɛn bin gɛt fet pan am. Wisɛf go ebul bi Gɔd in padi if wi gɛt fet.

8-9. ?Wetin sɔm pipul dɛn tink bɔt wetin Pɔl ɛn Jems bin rayt we nɔ kɔrɛkt? Wetin mek dɛn tink da we de?

⁸ Fɔ lɔng tɛm naw, bigman dɛn pan Gɔd biznɛs dɔn de agyu bɔt wetin fet gɛt fɔ du wit di tin dɛn we wi de du. Sɔm pan dɛn de tich se fɔ lɛ yu sev, yu jɔs nid fɔ  biliv pan Jizɔs Krays we na wi Masta. Sɔntɛm yu go dɔn yɛri we dɛn de se, “Jɔs biliv Jizɔs ɛn yu go sev.” Sɔm dɔn ivin tɔk se na dat Pɔl bin tich bikɔs i tɔk se: “Gɔd tek am as pɔsin we de du wetin rayt, pan ɔl we i nɔ du sɔntin.” (Rom. 4:6) Bɔt, ɔda wan dɛn kin se yu go ebul “sev yusɛf” we yu go na say dɛn we di chɔch de si as ples dɛn we oli ɛn we yu de du gud tin dɛn. Fɔ pruv se wetin dɛn de tɔk kɔrɛkt, sɔntɛm dɛn go kot Jems 2:24 we se: “Pɔsin de du wetin rayt bikɔs ɔf di tin dɛn we i de du, nɔto jɔs bikɔs i gɛt fet.”

⁹ Bikɔs ɔf dɛn difrɛn tin dɛn ya we pipul dɛn biliv, sɔm masta sabi bukman dɛn we stɔdi bɔt di Baybul tɔk se, Pɔl ɛn Jems nɔ gri wit dɛnsɛf we i kam to wetin pɔsin fɔ du fɔ mek Gɔd gladi. Sɔm pan dɛn de se Pɔl bin biliv se ilɛk pɔsin nɔ du natin, wans i gɛt fet, Gɔd de stil si am as pɔsin we de du wetin rayt. Dɔn, dɛn se Jems in tich se fɔ mek wi go ebul mek Gɔd gladi, wi nid fɔ du gud tin dɛn. Wan masta sabi bukman we stɔdi bɔt di Baybul se: “Jems nɔ bin ɔndastand wetin mek Pɔl bin de se pɔsin jɔs nid fɔ gɛt fet fɔ mek i [bi pɔsin we de du wetin rayt] ɛn Jems nɔ bin gri wit wetin Pɔl ɛskplen.” Bɔt na Jiova bin dayrɛkt Pɔl ɛn Jems fɔ rayt di tin dɛn we dɛn bin rayt. (2 Tim. 3:16) So dat min se simpul we de fɔ ɔndastand di tin dɛn we dɛn ɔl tu bin tɔk. Wi go ebul fɔ ɔndastand wetin dɛn tɔk bay we wi tink bɔt di ɔda tin dɛn we dɛn rayt insay dɛn lɛta dɛn.

10. Us men tin Pɔl bin de tɔk bɔt? (Romans 3:​21, 28) (Luk bak di pikchɔ.)

¹⁰ Wetin Pɔl bin de tɔk bɔt na Romans 3  ɛn 4? Di men tin we i bin de tɔk bɔt na fɔ obe di “Lɔ” we Gɔd bin gi Mozis na Mawnt Saynay. (Rid Romans 3:​21, 28.) I tan lɛk se sɔm Ju Kristian dɛn insay Pɔl in tɛm bin stil biliv se dɛn fɔ obe di Lɔ we Gɔd Bin Gi Mozis. So Pɔl bin yuz Ebraam in ɛgzampul fɔ pruv se wi go ebul du wetin rayt na Gɔd in yay ilɛk wi nɔ obe di “Lɔ.” Wi go bi pɔsin we de du wetin rayt if wi gɛt fet. I rili fayn fɔ no dis bikɔs i de ɛp wi fɔ gɛt kɔnfidɛns se wi go ebul bi Gɔd in padi. Wi go ebul fɔ mek Gɔd gladi fɔ wi if wi gɛt fet pan In ɛn Krays.

11. Uskayn gud wok dɛn Jems bin de tɔk bɔt?

¹¹ Di tin dɛn we Jems chapta 2 tɔk bɔt nɔ gɛt fɔ du wit fɔ obe di “Lɔ” lɛk aw Pɔl bin tɔk. Jems bin de tɔk bɔt di tin dɛn we Kristian dɛn de du ɛvride. Dɛn kayn tin dɛn de de sho if pɔsin we na Kristian rili gɛt fet pan Gɔd ɔ i nɔ gɛt fet pan am. Lɛ wi tɔk bɔt tu ɛgzampul dɛn we Jems yuz.

12. Aw Jems bin ɛksplen wetin fet gɛt fɔ du wit di gud tin dɛn we wi de du? (Luk bak di pikchɔ.)

¹² Insay di fɔs ɛgzampul, Jems tɔk se Kristian dɛn nid fɔ trit ɔlman fia wan. I bin ɛksplen dis pɔynt bay we i tɔk bɔt pɔsin we bin trit wan jɛntriman fayn, bɔt i nɔ trit wan poman fayn. Jems bin tɔk se da kayn pɔsin de go tɔk se i gɛt fet bɔt di tin dɛn we i de du de sho se i nɔ gɛt fet. (Jems 2:​1-5, 9) Insay di ɔda ɛgzampul, Jems tɔk bɔt ‘pɔsin we si in brɔda ɔ sista we nɔ gɛt klos ɛn bɛtɛ tin fɔ it’ bɔt i nɔ ɛp am. Ilɛksɛf da pɔsin de se i gɛt fet, na fɔ natin i de tɔk am bikɔs di tin dɛn we i de du nɔ de sho se i gɛt fet. Lɛk aw Jems rayt, “if pɔsin gɛt fet bɔt i nɔ de du natin, in fet dɔn day.”—Jems 2:​14-17.

13. Us ɛgzampul Jems gi fɔ tɔk bɔt aw wi go sho se wi gɛt fet? (Jems 2:​25, 26)

 ¹³ Jems bin yuz Reab as gud ɛgzampul fɔ tɔk bɔt pɔsin we du tin dɛn we sho se i gɛt fet. (Rid Jems 2:​25, 26.) Reab bin dɔn yɛri bɔt Jiova ɛn i bin no se Jiova de sɔpɔt di Izrɛlayt dɛn. (Jɔs. 2:​9-11) So i bin du tin dɛn we sho se i gɛt fet bay we i protɛkt tu Izrɛlayt man dɛn we dɛn layf bin de pan denja. Dis bin mek Gɔd si dis uman as pɔsin we de du wetin rayt jɔs lɛk Ebraam pan ɔl we i nɔ pafɛkt ɛn in nɔto Izrɛlayt. Di ɛgzampul we Reab sɛt ɛp wi fɔ no se i rili impɔtant fɔ du tin dɛn we de sho se wi gɛt fet.

14. Aw di tin dɛn we Pɔl rayt gri wit di tin dɛn we Jems rayt?

¹⁴ So Pɔl ɛn Jems bin de tɔk bɔt fet ɛn di tin dɛn we pɔsin de du fɔ sho se i gɛt fet tu difrɛn we. Pɔl bin de tɛl di Ju Kristian dɛn se dɛn nɔ go ɛva ebul fɔ mek Jiova gladi if dɛn jɔs de obe di Lɔ we Gɔd Bin Gi Mozis. Jems bin de tɔk se ɔlman we na Kristian nid fɔ sho se i gɛt fet bay we i de du gud to ɔda pipul dɛn.

15. Wetin na sɔm tin dɛn we wi go du fɔ sho se wi gɛt fet? (Luk bak di pikchɔ dɛn.)

¹⁵ Jiova nɔ de se if wi want fɔ bi pɔsin we de du wetin rayt, wi fɔ du ɔl di tin dɛn we Ebraam bin du. Infakt, bɔku tin dɛn de we wi go ebul du fɔ sho se wi gɛt fet. Wi kin wɛlkɔm di nyu wan dɛn we de kam na wi kɔngrigeshɔn, ɛp wi brɔda ɛn sista dɛn we rili nid ɛp, ɛn du gud to wi fambul dɛn, ɔl dis na tin dɛn we Gɔd want mek wi du ɛn i go blɛs wi fɔ dat. (Rom. 15:7; 1 Tim. 5:​4, 8; 1 Jɔn 3:18) Wan fayn tin we wi go du fɔ sho se wi gɛt fet na we wi de  prich di gud nyuz wit zil. (1 Tim. 4:16) Wi ɔl go ebul fɔ du tin dɛn we de sho se wi gɛt fet se Jiova in prɔmis dɛn go kam tru ɛn di we aw i de du tin rayt ɔltɛm. If wi du dat, wi go biliv tranga wan se Gɔd go si wi as pipul dɛn we de du wetin rayt ɛn i go kɔl wi in padi dɛn.

16. Wetin op bin gɛt fɔ du wit di fet we Ebraam bin gɛt?

¹⁶ Insay Romans chapta 4, wi lan ɔda impɔtant lɛsin frɔm Ebraam. Insay da chapta de, wi lan se i rili impɔtant fɔ lɛ wi gɛt op. Jiova bin prɔmis Ebraam se i go yuz am fɔ blɛs “bɔku neshɔn dɛn.” Tink bɔt di kayn wɔndaful op we Ebraam bin gɛt! (Jɛn. 12:3; 15:5; 17:4; Rom. 4:17) Bɔt ivin we Ebraam bin dɔn rich 100 ia ɛn Sera bin dɔn ol 90 ia, dɛn nɔ bin stil bɔn di pikin yet. To mɔtalman, i bin tan lɛk se i nɔ go pɔsibul fɔ mek Ebraam ɛn Sera gɛt pikin. Da tin de we bin apin nɔ bin rili izi fɔ Ebraam. Di Baybul se: “Di op we i bin gɛt mek i gɛt fet se i go bi papa fɔ bɔku neshɔn dɛn.” (Rom. 4:​18, 19) Ebraam bin gɛt wetin i bin de op fɔ. I bin bi papa to Ayzak we na di pikin we i bin dɔn de op fɔ gɛt.​—Rom. 4:​20-22.

17. Aw wi no se wi go ebul bi Gɔd in padi dɛn we de du wetin rayt?

¹⁷ Wi go ebul fɔ mek Gɔd gladi ɛn bi in padi we wi de du wetin rayt jɔs lɛk Ebraam. Infakt Pɔl bin tɔk bɔt dat we i rayt se: “Nɔto fɔ [Ebraam] in sek nɔmɔ dɛn rayt se ‘Gɔd tek am as pɔsin we de du wetin rayt,’ bɔt na fɔ wi yon sek bak, dat na fɔ wi we Gɔd go tek as pipul dɛn we de du wetin rayt, bikɔs wi biliv pan In we gi wi Masta Jizɔs layf bak.” (Rom. 4:​23, 24) Lɛk Ebraam, wi nid fɔ gɛt fet, du gud tin dɛn, ɛn gɛt op. Pɔl bin kɔntinyu fɔ tɔk bɔt wi op na Romans chapta 5, na dis wi go tɔk bɔt insay di nɛks atikul.