1. Wetin mek wi go se Ebraam bin gɛt gud rizin fɔ gɛt op?

 JIOVA bin prɔmis in padi Ebraam se i go gɛt bɔypikin ɛn ɔl di neshɔn dɛn na di wɔl go gɛt blɛsin bikɔs ɔf am. (Jɛn. 15:5; 22:18) Bikɔs Ebraam bin rili gɛt fet pan Gɔd, i bin biliv tranga wan se Gɔd in prɔmis go mɔs kam tru. Bɔt, we Ebraam bin ol 100 ia ɛn in wɛf bin ol 90 ia, dɛn stil nɔ bin gɛt pikin. (Jɛn. 21:​1-7) Bɔt di Baybul se, “di op we [Ebraam] bin gɛt mek i gɛt fet se i go bi papa fɔ bɔku neshɔn dɛn, jɔs lɛk aw dɛn bin dɔn se.” (Rom. 4:18) Ɛn Ebraam bin gɛt wetin i bin op fɔ. I bi papa to di pikin we i bin de wet fɔ, we na Ayzak. Wetin mek Ebraam bin biliv tranga wan se Jiova go du wetin i dɔn prɔmis?

2. Wetin mek Ebraam bin biliv tranga wan se Jiova in prɔmis go kam tru?

² Bikɔs Ebraam bin rili sabi Jiova, “i bin rili biliv se Gɔd ebul fɔ du wetin i dɔn prɔmis.” (Rom. 4:21) Jiova bin gladi fɔ Ebraam, ɛn bikɔs Ebraam bin gɛt fet pan Jiova, dat bin mek i si am as pɔsin we de du wetin rayt. (Jems 2:23) Lɛk aw Romans 4:18 tɔk, Ebraam bin gɛt fet ɛn op. Naw lɛ wi tɔk bɔt wetin apɔsul Pɔl tɔk bɔt op insay Romans chapta 5.

3. Wetin Pɔl ɛksplen bɔt op?

 ³ Pɔl bin ɛksplen wetin mek wi fɔ biliv tranga wan se “wi go mɔs gɛt wetin wi op fɔ.” (Rom. 5:5) I ɛp wi bak fɔ no wetin go mek wi op strɔng mɔ ɛn mɔ. As wi de tɔk bɔt di tin dɛn we Pɔl tɔk na Romans 5:​1-5, tink bɔt aw yu op fɔ tumara bambay dɔn strɔng mɔ ɛn mɔ as tɛm de go. Di tin we wi go tɔk bɔt go ɛp yu bak fɔ no aw yu go mek yu op strɔng pas aw i de so naw. Lɛ wi tɔk fɔs bɔt wi wɔndaful op we Pɔl se go mɔs kam tru.

4. Wetin Pɔl tɔk bɔt na Romans 5:​1, 2?

⁴ Rid Romans 5:​1, 2. Pɔl bin rayt dɛn wɔd dɛn de to di kɔngrigeshɔn na Rom. Di brɔda ɛn sista dɛn we bin de na da kɔngrigeshɔn de bin dɔn lan bɔt Jiova ɛn Jizɔs. Dɛn bin dɔn sho se dɛn gɛt fet ɛn dɛn bin dɔn bi Kristian dɛn. So “Gɔd dɔn tɔk se [dɛn] na pipul dɛn we de du wetin rayt bikɔs [dɛn] gɛt fet,” ɛn i bin anɔynt dɛn wit oli spirit. Fɔ tru, dɛn bin gɛt wɔndaful op we dɛn bin biliv se go kam tru.

5. Us op anɔyntɛd Kristian dɛn gɛt?

⁵ Pɔl bin leta rayt to di anɔyntɛd Kristian dɛn na Ɛfisɔs bɔt di op we Gɔd bin dɔn gi dɛn. Da op de na di “blɛsin dɛn we [Gɔd] dɔn prɔmis di oli wan dɛn.” (Ɛfi. 1:18) Ɛn Pɔl bin sho di Kristian dɛn na Kolose usay dɛn go gɛt wetin dɛn op fɔ. I bin se dɛn de “op fɔ gɛt di tin we Gɔd dɔn kip fɔ [dɛn] na ɛvin.” (Kol. 1:​4, 5) So di tin we di anɔyntɛd Kristian dɛn de op fɔ na fɔ gɛt layf we go de sote go na ɛvin, usay dɛn go rul wit Krays.​—1 Tɛs. 4:​13-17; Rɛv. 20:6.

6. Wetin wan anɔyntɛd brɔda tɔk bɔt in op?

⁶ Anɔyntɛd Kristian dɛn rili valyu da op de we dɛn gɛt. Wan pan dɛn we nem Brɔda Frɛdrik Franz, tɔk bɔt aw i de fil.  I se: “Wi shɔ se wi op go kam tru ɛn wi ɔl we de pat pan di 144,000 pipul dɛn go gɛt wetin Gɔd dɔn prɔmis wi. Wi blɛsin go bɛtɛ fa fawe pas aw wi de tink.” Afta Brɔda Franz bin dɔn sav Gɔd fetful wan fɔ lɔng tɛm, i tɔk insay di ia 1991 se: “[Wi] stil valyu wi op. . . . Di mɔ we wi de wet fɔ am na di mɔ wi de gladi fɔ wetin wi de wet fɔ. Wi rɛdi fɔ wet fɔ am, ivin if i pas wan milyɔn ia. A valyu wi op naw pas ɛni ɔda tɛm.”

7-8. Us op bɔku pan Jiova in savant dɛn gɛt? (Romans 8:​20, 21)

⁷ Bɔku pipul dɛn we de wɔship Jiova tide gɛt difrɛn op. Na di op we Ebraam bin gɛt, we na layf we go de sote go na dis wɔl ɔnda Gɔd in Kiŋdɔm. (Ibru. 11:​8-10, 13) Pɔl bin rayt bɔt di wɔndaful tin dɛn we gɛt fɔ apin to di wan dɛn we gɛt da op de. (Rid Romans 8:​20, 21.) Wetin yu bin lɛk bɔt dis op di fɔstɛm we yu lan bɔt am na di Baybul? Na we yu mɛmba se tɛm go kam we yu go pafɛkt ɛn yu nɔ go sin igen? Ɔ yu bin gladi fɔ lan se di wan dɛn we yu lɛk we dɔn day go gɛt layf bak na Paradays na dis wɔl? Dis mek yu gɛt bɔku tin dɛn we yu de wet fɔ “bikɔs ɔf yu op.”

⁸ Ilɛk wi de op fɔ ɛnjɔy layf sote go na ɛvin ɔ na dis wɔl, wi gɛt wɔndaful op we de mek wi gladi. Ɛn wi go biliv mɔ ɛn mɔ se wi go gɛt wetin wi op fɔ. Di ɔda tin we Pɔl rayt de ɛp wi fɔ no aw dat go apin. Lɛ wi tɔk bɔt wetin i rayt bɔt wi op. We wi du dat, wi go ebul fɔ biliv mɔ ɛn mɔ se wi go gɛt wetin wi op fɔ.

9-10. Frɔm wetin bin apin to apɔsul Pɔl, wetin Kristian dɛn fɔ ɛkspɛkt? (Romans 5:3) (Luk bak di pikchɔ dɛn.)

⁹ Rid Romans 5:3. Notis se Pɔl bin tɔk se we wi sɔfa, dat go mek wi op strɔng mɔ ɛn mɔ. Sɔntɛm wi go sɔprayz fɔ no bɔt dis. Bɔt, ɔlman we na Krays in disaypul fɔ ɛkspɛkt se prɔblɛm go mit  am. Tink bɔt Pɔl in ɛgzampul. I bin tɛl di Kristian dɛn na Tɛsalonayka se: “We wi bin de wit una, wi bin de tɛl una bifo tɛm se wi go sɔfa, ɛn na dat dɔn apin.” (1 Tɛs. 3:4) Ɛn i bin rayt to di Kristian dɛn na Kɔrint se: “Wi want mek una no bɔt di prɔblɛm dɛn we mit wi . . . Wi nɔ bin ivin shɔ if wi go kɔntinyu fɔ liv.”—2 Kɔr. 1:8; 11:​23-27.

¹⁰ Kristian dɛn bak tide fɔ ɛkspɛkt se prɔblɛm go mit dɛn. (2 Tim. 3:12) Pipul dɛn dɔn mek yu sɔfa bikɔs yu put fet pan Jizɔs ɛn bi in disaypul? I go bi se yu padi ɛn fambul dɛn bin provok yu. Sɔntɛm dɛn go dɔn ivin trit yu bad. Prɔblɛm dɔn mit yu na yu wokples bikɔs yu dɔn mekɔp yu maynd fɔ ɔnɛs pan ɔltin? (Ibru. 13:18) Di gɔvmɛnt de agens yu bikɔs yu prich to ɔda pipul dɛn bɔt yu op? Ilɛk uskayn prɔblɛm go mit wi, Pɔl se wi fɔ gladi. Wetin mek?

11. Wetin mek wi nid fɔ mekɔp wi maynd fɔ bia ɛni prɔblɛm?

¹¹ Wi go ebul gɛt gladi-at ilɛksɛf wi de sɔfa, bikɔs wi no se dis go ɛp wi fɔ gɛt wan impɔtant kwaliti. Romans 5:3 se, “prɔblɛm de mek wi bia.” Ɔlman we na Kristian go gɛt prɔblɛm. So wi ɔl nid fɔ mekɔp wi maynd fɔ bia ɛni prɔblɛm we go mit wi. Na we wi du dat wi go ebul fɔ gɛt di blɛsin we wi de op fɔ. Wi nɔ want fɔ bi lɛk di wan dɛn we Jizɔs bin de tink bɔt we i tɔk bɔt sid dɛn we fɔdɔm na say we rɔk dɛn de. Fɔs, dɛn bin gladi fɔ yɛri di mɛsej, bɔt we “prɔblɛm kam ɔ pipul dɛn mek [dɛn] sɔfa,” dɛn stɔp fɔ biliv wetin dɛn dɔn lan. (Mat. 13:​5, 6, 20, 21) Na tru se we wi gɛt prɔblɛm dɛn ɔ we pipul dɛn de agens wi, dat nɔto tin we de mek wi gladi, bɔt we wi bia dɛn prɔblɛm dɛn ya ɛn kɔntinyu fɔ sav Jiova, dat go bɛnifit wi. Aw wi go bɛnifit?

12. Aw wi go bɛnifit we wi bia prɔblɛm dɛn?

¹² Di disaypul Jems bin tɔk bɔt di bɛnifit dɛn we wi go gɛt we wi bia prɔblɛm dɛn. I bin se: “Una alaw di bia we una de kɔntinyu fɔ bia fɔ tren una gud gud wan, so dat una go kɔmplit ɛn gud pan ɔltin ɛn gɛt ɔltin.” (Jems 1:​2-4) So Jems tɔk se di bia we wi de bia gɛt wok we i de du. I de ɛp wi fɔ bi pɔsin we rili peshɛnt, gɛt mɔ fet, ɛn abop pan Gɔd mɔ ɛn mɔ. Bɔt wan ɔda impɔtant we de we wi go bɛnifit we wi bia prɔblɛm dɛn.

13-14. Wetin kin apin we wi bia prɔblɛm dɛn? Aw dat kin afɛkt wi op? (Romans 5:4)

¹³ Rid Romans 5:4. Pɔl bin tɔk se we wi bia, dat de mek “Gɔd gladi” fɔ wi. Di bia we yu de bia de mek Jiova gladi. Bɔt dis nɔ min se Jiova gladi fɔ si we yu de sɔfa. Na yu i gladi fɔ. I de rili ɛnkɔrej wi fɔ no se Jiova de gladi we wi bia!—Sam 5:12.

¹⁴ Mɛmba se Ebraam bin gɛt prɔblɛm dɛn ɛn Jiova bin gladi fɔ am we i bia dɛn. Jiova bin si am as In padi ɛn as pɔsin we de du wetin rayt. (Jɛn. 15:6; Rom. 4:​13, 22) Wisɛf go ebul mek Jiova si wi as in padi ɛn pɔsin we de du wetin rayt. Gɔd nɔ de gladi fɔ wi bikɔs ɔf ɔmɔs wok wi de du ɔ usay wi de wok fɔ am. Bɔt Jiova kin gladi fɔ wi we wi bia prɔblɛm dɛn ɛn kɔntinyu fɔ sav am fetful wan. Ɛn ilɛk wetin de apin to wi, ɔmɔs ia wi ol, ɔ wetin wi sabi du, wi ɔl ebul fɔ bia. Yu gɛt prɔblɛm rayt naw we yu de bia fetful wan? If na so i bi,  mɛmba se yu de mek Jiova gladi. We wi mɛmba se Gɔd gladi fɔ wi, dat de ɛp wi fɔ biliv mɔ ɛn mɔ se wi go gɛt di tin dɛn we wi op fɔ.

15. Us ɔda pɔynt Pɔl tɔk bɔt? Wetin mek dis go mek sɔm pipul dɛn kɔnfyus?

¹⁵ Lɛk aw Pɔl bin ɛksplen, Jiova kin gladi fɔ wi we wi kɔntinyu fɔ bia prɔblɛm dɛn ɛn sav am fetful wan. Notis wetin Pɔl bin tɔk. I se: “We Gɔd gladi fɔ wi, dat de mek wi gɛt op, ɛn wi go mɔs gɛt wetin wi op fɔ.” (Rom. 5:​4, 5) Sɔntɛm dis tin we Pɔl tɔk go mek sɔm pipul dɛn kɔnfyus. Wetin mek? Na bikɔs insay Romans 5:​2, Pɔl bin tɔk se di Kristian dɛn na Rom bin dɔn ɔlrɛdi gɛt op, we na di “op fɔ gɛt Gɔd in glori.” So pɔsin go want fɔ aks se, ‘If dɛn Kristian dɛn de ɔlrɛdi gɛt op, wetin mek Pɔl tɔk bak bɔt op?’

16. Aw pɔsin kin bigin fɔ gɛt op? (Luk bak di pikchɔ dɛn.)

¹⁶ Wi go ebul fɔ ɔndastand wetin Pɔl min we wi mɛmba se op na sɔntin we de gro. Fɔ ɛgzampul: Yu mɛmba wetin bin apin di fɔstɛm we yu yɛri bɔt di wɔndaful op we de na Gɔd in Wɔd? Sɔntɛm da tɛm de yu bin tink se di op fɔ de na Paradays na dis wɔl sote go nɔto tin we go apin. Bɔt di mɔ yu kam fɔ sabi Jiova ɛn in prɔmis dɛn na di Baybul, na di mɔ yu biliv se dis prɔmis go kam tru.

17. Aw yu op go kɔntinyu fɔ gro afta yu gi yu layf to Jiova ɛn baptayz?

¹⁷ Ivin afta we yu dɔn gi yu layf to Jiova ɛn baptayz, yu dɔn kam fɔ no Jiova ɛn lɛk am mɔ ɛn mɔ. Dat dɔn mek yu biliv tranga wan se di tin dɛn we yu de op fɔ go kam tru. (Ibru. 5:13–6:1) I go mɔs bi se di tin dɛn we Romans 5:​2-4 tɔk bin apin to yu. Yu bin gɛt difrɛn prɔblɛm dɛn, bɔt yu bin ebul bia dɛn ɛn kam fɔ  no se Gɔd gladi fɔ yu. Bikɔs yu no se Gɔd gladi fɔ yu, yu gɛt mɔ rizin fɔ biliv se yu go gɛt di tin dɛn we i dɔn prɔmis. Yu op dɔn strɔng pas aw i bin de trade. I dɔn rial to yu mɔ ɛn mɔ, ɛn yu rili valyu am. I de afɛkt yu naw pas trade, i de afɛkt ɔltin bɔt yu layf ɛn chenj di we aw yu de trit yu famili, aw yu de disayd fɔ du tin dɛn, ɛn ivin aw yu de yuz yu taym.

18. Us garanti Jiova gi wi?

¹⁸ Apɔsul Pɔl tɔk bɔt wan ɔda impɔtant tin bɔt di op we yu go gɛt afta yu kam fɔ no se Gɔd gladi fɔ yu. Pɔl mek yu no se di tin we yu de op fɔ go kam tru. Wetin mek yu fɔ biliv dis? Pɔl bin rayt bɔt dis garanti we Gɔd dɔn gi wi. I se: “Wi go mɔs gɛt wetin wi op fɔ; bikɔs Gɔd dɔn yuz in oli spirit we i gi wi fɔ sho se i lɛk wi.” (Rom. 5:5) Yu gɛt gud rizin fɔ biliv tranga wan se yu go gɛt wetin yu op fɔ.

19. We i kam to yu op, wetin yu shɔ bɔt?

¹⁹ Tink bɔt di prɔmis we Jiova bin mek to Ebraam ɛn aw I bin gladi fɔ am ɛn si am as In padi. Ebraam bin gɛt wetin i op fɔ. Di Baybul se: “Afta Ebraam dɔn peshɛnt, dis tin we Gɔd prɔmis am apin.” (Ibru. 6:15; 11:​9, 18; Rom. 4:​20-22) Gɔd nɔ bin disapɔynt am. Yusɛf fɔ biliv tranga wan se if yu kɔntinyu fɔ sav Jiova fetful wan, yu go gɛt wetin yu op fɔ. Di tin we yu op fɔ go mɔs apin; na tin we fɔ mek yu gladi, Jiova nɔ go disapɔynt yu! (Rom. 12:12) Pɔl bin rayt se: “Lɛ di Gɔd we de gi op mek una rili gɛt gladi-at ɛn pis, bikɔs una abop pan am, so dat di oli spirit in pawa go mek una rili gɛt op.”—Rom. 15:13.