Yu dɔn tek tɛm rid Di Wachtawa dɛn fɔ dis ia? Wɛl, si if yu go ebul ansa dɛn kwɛstyɔn dɛn ya:

Wetin i min fɔ “chenj di we aw [wi] de tink”? (Rom. 12:2)

I min se wi nɔ fɔ jɔs du wan ɔ tu gud tin dɛn. Bɔt wi fɔ tek tɛm chɛk udat wi bi insay ɛn mek ɛni chenj we wi nid fɔ mek so dat wi go obe Jiova in lɔ dɛn di bɛst we aw wi ebul.​—w23.01, pej 8 ɛn 9.

Aw wi go tink di rayt we we wi de wach aw tin dɛn de apin na di wɔl?

Wi rili want fɔ no bɔt di tin dɛn we de apin na di wɔl naw ɛn wi want fɔ no aw dɛn de mek Baybul prɔfɛsi kam tru. Bifo wi bigin de gɛs, we go ambɔg wi wanwɔd, i go fayn fɔ mek di tin dɛn we wi de tɔk kɔmɔt na Jiova in ɔganayzeshɔn. (1 Kɔr. 1:10)—w23.02, pej 16.

Aw Jizɔs in baptizim difrɛn frɔm in disaypul dɛn yon?

Jizɔs nɔ bin nid fɔ gi in layf to Gɔd lɛk aw wi de du bikɔs i bin bɔn na neshɔn we bin dɔn gi dɛn layf to Jiova. I nɔ bin nid fɔ ripɛnt bikɔs ɔf sin, bikɔs in na man we bin pafɛkt ɛn i nɔ wande sin.​—w23.03, pej 5.

Aw wi go ɛp ɔda pipul dɛn fɔ gi kɔmɛnt na mitin?

Wan tin we wi kin du na fɔ gi shɔt kɔmɛnt, so dat tɛm go de fɔ mek ɔda pipul dɛnsɛf gi kɔmɛnt. Avɔyd fɔ tɔk bɔt bɔku pɔynt dɛn. If yu tɔk bɔt ɔltin we de na di paregraf, bɛtɛ tin nɔ go de fɔ lɛ ɔda pipul dɛn tɔk bɔt.​—w23.04, pej 23.

Wetin “di Oli Rod” we de na Ayzaya 35:8 min?

Fɔs, dis men rod na bin di rod we di Izrɛlayt dɛn bin de yuz fɔ travul frɔm Babilɔn fɔ go na dɛn om-tɔŋ. Wetin wi go se bɔt di “Oli Rod” insay wi yon tɛm? Lɔng tɛm bifo di ia 1919, sɔm man dɛn bin du impɔtant wok fɔ rɛdi dis rod. Wan pan di tin dɛn we dɛn bin du na fɔ translet ɛn print Baybul dɛn. Gɔd in pipul dɛn nid fɔ kɔntinyu fɔ de na “di Oli Rod” bikɔs i go ɛp dɛn fɔ kɔntinyu fɔ wɔship Jiova naw ɛn tumara bambay we di Kiŋdɔm go briŋ wɔndaful blɛsin dɛn na di wɔl.​—w23.05, pej 15 to 19.

Us advays Prɔvabs chapta 9 gi we gɛt fɔ du wit tu uman dɛn?

Prɔvabs tɔk bɔt di “uman we ful” in inviteshɔn we go mek pɔsin ɛnd-ɔp na “di Grev.” I kɔmpia bak tru tru “sɛns” to ɔda uman, ɛn in inviteshɔn de mek pɔsin de sote go ɛn “waka na di rod we go mek pɔsin ɔndastand.” (Prɔv. 9:​1, 6, 13, 18)—w23.06, pej 22 to 24.

Aw Gɔd bin sho se i ɔmbul ɛn i nɔ de pin pan sɔntin we i kam pan di we aw i bin trit Lɔt?

Jiova bin tɛl Lɔt fɔ kɔmɔt na Sɔdɔm ɛn rɔn go na di eria usay mawntin dɛn de. We Lɔt beg fɔ mek in ɛn in famili go na Zoa, Gɔd bin alaw am fɔ du wetin i want.​—w23.07, pej 21.

Wetin mareduman go du if in man gɛt di abit fɔ de wach rud rud pikchɔ ɔ fim dɛn?

I fɔ mɛmba se i nɔ fɔ blem insɛf. I fɔ pe atɛnshɔn pan in padi biznɛs wit Gɔd ɛn tink gud gud wan bɔt Baybul akawnt dɛn we de tɔk bɔt uman dɛn we dɛn at bin pwɛl, we bin tɔn to Jiova fɔ kɔrej dɛn. I go ebul ɛp in man fɔ avɔyd say dɛn we go tɛmt am.​—w23.08, pej 14 to 17.

We pɔsin aks wi kwɛstyɔn bɔt di tin dɛn we wi biliv, aw wi go sho se wi na pɔsin we de ɔndastand ɛn we de tek tɛm du tin?

I fayn fɔ mek wi si in kwɛstyɔn as sɔntin we go ɛp wi fɔ no wetin i de tink ɔ wetin impɔtant to am. Dis go ɛp wi fɔ tek tɛm ansa am fayn.​—w23.09, pej 17.

Wetin wi lan frɔm Meri bɔt wetin wi fɔ du fɔ gɛt ɛnkɔrejmɛnt?

Meri bin gɛt ɛnkɔrejmɛnt frɔm ɔda pipul dɛn we i kam fɔ no se na in go bɔn di Mɛsaya. Gebrɛl ɛn Ilizabɛt bin gi Meri di ɛnkɔrejmɛnt we i bin nid. Wisɛf go gɛt ɛnkɔrejmɛnt frɔm wi kɔmpin Kristian dɛn.​—w23.10, pej 15.

Aw Jiova kin ansa wi prea dɛn?

Jiova prɔmis fɔ lisin to wi prea dɛn ɛn fɔ tink bɔt aw wetin wi want gɛt sɔntin fɔ du wit wetin in want. (Jɛr. 29:12) Sɔntɛm i go ansa di sem prea dɛn difrɛn we dɛn, bɔt i go sɔpɔt wi ɔltɛm.​—w23.11, pej 21 ɛn 22.

Romans 5:2 tɔk bɔt “op,” bɔt wetin mek dɛn tɔk bɔt am bak na vas 4?

We pɔsin yɛri di gud nyuz fɔ di fɔstɛm, i go gɛt di op fɔ ɛnjɔy layf insay Paradays na dis wɔl. Bɔt as i de gɛt prɔblɛm dɛn, ebul bia dɛn, ɛn kam fɔ no se Gɔd gladi fɔ am, in op de strɔng mɔ ɛn mɔ, ɛn i de biliv se i go gɛt wetin i op fɔ.​—w23.12, pej 12 ɛn 13.