Dɛn bɔn mi insay 1927 na wan smɔl tɔŋ nia Chikago, Ilinɔy insay Amɛrika. Na fayv pikin dɛn mi Mama ɛn Papa bɔn. Dɛn nem dɛn na Jɛta, Dɔn, mi, Kal, ɛn Jɔy. Wi ɔl bin mek-ɔp wi maynd fɔ yuz ɔl wi layf fɔ sav Jiova. Jɛta bin atɛnd di sɛkɔn klas na Giliad insay 1943. Insay 1944 Dɔn bin go na Bɛtɛl we de na Bruklin insay Nyu Yɔk, Kal bin go insay 1947, ɛn Jɔy bin go insay 1951. Dɛn fayn ɛgzampul, ɛn mi mama ɛn papa dɛn fayn ɛgzampul bin rili ɛp mi.

Mi Mama ɛn Papa bin de rid di Baybul ɛn dɛn bin lɛk Gɔd, so dɛn tich wisɛf fɔ lɛk Gɔd. Bɔt papa nɔ bin gɛt rɛspɛkt fɔ di chɔch dɛn igen afta i wok as soja na Yurɔp insay Wɔl Wɔ I. Mama bin tɛl Gɔd tɛnki we papa kam bak na os alayv. So i bin tɛl am se: “Kal, lɛ wi go na chɔch lɛk aw wi bin de du.” Papa tɛl am se: “A go go lɛf yu de, bɔt a nɔ de go insay di chɔch.” Mama aks am se: “Wetin mek yu se so?” Papa ansa am se: “Insay di tɛm fɔ di wɔ, sɔm bigman dɛn pan Gɔd biznɛs we bin de na di sem rilijɔn bin blɛs di soja dɛn we bin de fɛt agens dɛnsɛf ɛn dɛn wɛpɔn dɛn! Fɔ se Gɔd bin de sɔpɔt di tu grup dɛn?”

Wan de, we Mama bin de na chɔch, tu Jiova Witnɛs dɛn bin kam na wi os. Dɛn bin gi Papa tu buk dɛn we nem Light, ɛn dɛn buk dɛn de bin de tɔk bɔt di Baybul buk we nem Rɛvɛleshɔn. Papa bin want fɔ no mɔ ɛn i bin tek di buk dɛn. As mama si di buk dɛn so, i bigin fɔ rid dɛn. Wan de, i rid na nyuzpepa se dɛn de invayt pipul dɛn we go want lɛ dɛn yuz di buk dɛn we nem Light fɔ stɔdi di Baybul wit dɛn. I bin disayd fɔ go. We i rich de, na wan mami opin di domɔt. Mama sho am wan pan di buk dɛn ɛn aks am se, “Na ya una de stɔdi dis buk?” Dɔn di mami tɔk se, “Yɛs, kam insay.” Di ɔda wik Mama bin go wit wi, ɛn afta dat wi bin de go ɔltɛm.

Na wan pan di mitin dɛn, di wan we bin de kɔndɔkt tɛl mi fɔ rid Sam 144:15 we se di wan dɛn we de wɔship Jiova gɛt gladi-at. Da  vas de bin rili ɛnkɔrej mi jɔs lɛk aw 1 Timoti 1:11 we tɔk se Jiova na “di Gɔd we gladi,” ɛn Ɛfishians 5:1 we se wi fɔ “falamakata Gɔd” bin ɛnkɔrej mi. Dis bin mek a no se a fɔ gladi we a de sav di Wan we mek mi ɛn a fɔ tɛl am tɛnki fɔ di ɔnɔ we a gɛt fɔ sav am. Na dɛn tu tin dɛn ya a dɔn de tray fɔ du.

Di kɔngrigeshɔn we bin de nia wi bin de na Chikago we de 32 kilomita (20 mayl) frɔm usay wi bin de. Pan ɔl we di rod bin fa, wi bin de atɛnd ɛn a bin de ɔndastand di Baybul mɔ. A mɛmba wan tɛm we di kɔndɔktɔ kɔl Jɛta fɔ kɔmɛnt. We a de lisin to am a tɔk se: ‘A bin sabi di ansa. A bin fɔ dɔn es mi an ɔp fɔ kɔmɛnt.’ So a bigin fɔ pripia ɛn mek mi yon kɔmɛnt dɛn. Ɛn wetin impɔtant mɔ na dat, mi padi biznɛs wit Jiova bin de go bifo jɔs lɛk mi brɔda ɛn sista dɛn. A baptayz insay 1941.

A stil de mɛmba di kɔnvɛnshɔn we wi bin gɛt insay 1942 na Klivland, insay Oayo. I pas 50 difrɛn say dɛn na Amɛrika we bin yuz tɛlifon fɔ jɔyn di program. Wi famili ɛn ɔda famili dɛn bin de na tɛnt dɛn nia usay di kɔnvɛnshɔn bin de. Dɛn bin stil de fɛt Wɔl Wɔ II ɛn dɛn bin de mek Jiova Witnɛs dɛn sɔfa mɔ ɛn mɔ. We ivintɛm rich, a bin si sɔm brɔda dɛn pak dɛn motoka dɛn ɛn dɛn tɔn di motoka dɛn bak to di kamp usay wi bin de. Dɛn ɔl bin gri se pɔsin fɔ de insay ɛniwan pan di motoka dɛn we go de wach te doklin. If pipul dɛn kam atak wi, di brɔda dɛn fɔ put dɛn motoka layt ɔn fɔ blayn di pipul dɛn we kam atak wi ɛn blo di ɔn dɛn bak. Dɔn di ɔda wan dɛn go rɔn fɔ kam ɛp. A tɛl misɛf se, ‘Jiova in pipul dɛn rili rɛdi fɔ ɔltin!’ So bikɔs a nɔ bin de fred, a slip fayn ɛn no bad tin nɔ bin apin.

Afta sɔm ia dɔn pas we a tink bɔt wetin bin apin na da kɔnvɛnshɔn de, a kam fɔ si se mi mama nɔ bin fred atɔl ɛn i nɔ bin wɔri bɔt ɛnitin. I bin abop pan Jiova ɛn in ɔganayzeshɔn wit ɔl in at. A nɔ go ɛva fɔgɛt di fayn ɛgzampul we i bin sɛt.

Mama bin bigin fɔ rɛgyula payɔnia shɔt tɛm bifo da kɔnvɛnshɔn de. So i bin rili pe atɛnshɔn to di tɔk dɛn bɔt ful-taym savis. We wi bin de go na os, i tɔk se, “A go lɛk fɔ kɔntinyu fɔ payɔnia, bɔt a nɔ go ebul du dat ɛn kia fɔ di os fayn fayn wan.” Dɔn i aks wi if wi go ebul fɔ ɛp am. Wi bin gri, so i gi wi ɔl wan ɔ tu rum dɛn fɔ klin bifo wi it na mɔnin. We wi go skul, i kin chɛk if ɔlsay klin ɛn i kin go fil savis afta dat. Na bin bizi uman, bɔt i bin de kia fɔ wi ɔltɛm. We wi kin kam na os lɔnch tɛm ɔ afta skul, wi kin mit am na os ɔltɛm. Wan wan tɛm, wi kin go wit am na fil savis we wi kɔmɔt skul ɛn dat bin ɛp wi fɔ ɔndastand wetin i min fɔ payɔnia.

A bin ol 16 ia we a bigin payɔnia. Pan ɔl we Papa nɔ bin dɔn bi Witnɛs yet, i bin want fɔ no aw mi prichin wok de go. Wan ivintɛm, a tɛl am se pan ɔl we a dɔn de wok tranga wan, a nɔ stil si pɔsin yet we want fɔ stɔdi di Baybul. Afta a wet smɔl, a aks am se, “Yu go gri fɔ lɛ a stɔdi di Baybul wit yu?” Afta i tink bɔt am smɔl i tɔk se, “A nɔ tink se gud  rizin de we fɔ mek a nɔ gri.” So di fɔs pɔsin we a stɔdi di Baybul wit na mi papa. Dat na bin big ɔnɔ!

Wi bin stɔdi di buk we nem “The Truth Shall Make You Free.” As wi stɔdi de go bifo, a kam fɔ si se Papa bin de ɛp mi fɔ bi gud studɛnt ɛn ticha. Fɔ ɛgzampul, wan ivintɛm afta wi rid wan paregraf papa se: “A dɔn si wetin di buk se, bɔt aw yu no se wetin di buk tɔk na tru?” A nɔ bin ebul fɔ ansa da kwɛstyɔn de so a tɛl am se, “A nɔ ebul ansa da kwɛstyɔn rayt naw, bɔt di nɛks tɛm we wi de stɔdi, a go dɔn gɛt di ansa.” Ɛn a bin du dat. A bin fɛn sɔm vas dɛn we sɔpɔt di pɔynt dɛn we wi bin de tɔk bɔt. Afta dat, a bigin fɔ pripia gud gud wan fɔ wi stɔdi ɛn dat bin ɛp mi fɔ lan fɔ du risach. Dat bin ɛp mi bak fɔ sabi di Baybul mɔ ɛn i bin ɛp mi papa bak. I bin de aplay wetin i de lan ɛn i baptayz insay 1952.

A kɔmɔt na os we a bin ol 17 ia. Jɛta a bi mishɔnari, ɛn Dɔn bi Bɛtɛlayt. Dɛn ɔltu bin lɛk dɛn asaynmɛnt ɛn dat bin rili ɛnkɔrej mi. So a bin aplay fɔ wok na Bɛtɛl ɛn fɔ go Giliad Skul ɛn lɛf ɔltin na Jiova in an. Wetin bin apin afta dat? Dɛn bin invayt mi fɔ wok na Bɛtɛl insay 1946.

Insay di ia dɛn we dɔn pas, a dɔn gɛt bɔku difrɛn asaynmɛnt dɛn na Bɛtɛl ɛn dat dɔn mek a ebul lan bɔku tin dɛn. A dɔn wok na Bɛtɛl fɔ 75 ia, ɛn insay dɛn tɛm dɛn de, a dɔn lan aw fɔ mek buk dɛn ɛn du akawntin. A bin lan bak aw fɔ bay tin dɛn we dɛn nid na Bɛtɛl ɛn aw fɔ ship impɔtant tin dɛn na ɔda ples dɛn. Wetin pas ɔl dɛn tin dɛn ya na di spirichwal program dɛn we wi kin gɛt na Bɛtɛl, lɛk di mɔnin wɔship ɛn Bɛtɛl lɛkchɔ dɛn we a kin rili ɛnjɔy.

A bin lan sɔntin bak frɔm mi smɔl brɔda Kal, we bin kam na Bɛtɛl insay 1947. In na bin gud studɛnt ɛn i bin sabi tich fayn fayn wan. Wan tɛm, a bin aks am fɔ ɛp mi wit wan tɔk we a bin fɔ gi. A bin tɛl am se a gɛt bɔku infɔmeshɔn fɔ di tɔk bɔt a nɔ no aw fɔ yuz dɛn. I ɛp mi fɔ no aw fɔ sɔlv mi prɔblɛm bay we i aks mi wan kwɛstyɔn. I aks mi se, “Joɛl, wetin na di tim fɔ yu tɔk?” Wantɛm wantɛm, a ɔndastand wetin i bin de tray fɔ tɛl mi. A bin jɔs nid fɔ yuz di infɔmeshɔn we a nid ɛn fɔgɛt bɔt di balans. A nɔ ɛva fɔgɛt da lɛsin de.

 Fɔ lɛ wi gladi we wi de wok na Bɛtɛl, wi fɔ du wi bɛst na di prichin wok. Ɛn we wi de prich, wi kin gɛt fayn ɛkspiriɛns dɛn we kin ɛnkɔrej wi. Wan ɛkspiriɛns we a mɛmba gud gud wan na di wan we bin apin wan ivintɛm na Brɔnks insay Nyu Yɔk Siti. Mi ɛn wan brɔda bin go fɛn wan uman we dɛn bin gi Di Watchtower ɛn di Awake! Wi tɛl am se, “Dis ivintɛm, wi de ɛp pipul dɛn fɔ lan bɔt sɔm fayn tin dɛn na di Baybul we go rili ɛnkɔrej dɛn.” Di uman tɔk se, “If na di Baybul una de tɔk bɔt, una kam insay.” Wi bin rid ɛn tɔk bɔt bɔku skripchɔ dɛn we tɔk bɔt Gɔd in Kiŋdɔm ɛn di nyu wɔl we gɛt fɔ kam. Wan dawt nɔ de se i bin lɛk wetin i lan bikɔs i bin invayt bɔku pan in padi dɛn fɔ jɔyn wi di ɔda wik. Leta, in ɛn in man bin bigin fɔ sav Jiova.

A bin dɔn de luk fɔ pɔsin fɔ mared fɔ 10 ia bifo a mit mi wɛf. Wetin bin ɛp mi fɔ fɛn gud wɛf? A bin pre ɛn tink gud wan bɔt dis kwɛstyɔn: ‘Wetin a go want fɔ du afta wi mared?’

Afta di kɔnvɛnshɔn na Yanki Stediɔm insay 1953, a mit wan sista we nem Meri Anyɔl. Na in ɛn Jɛta atɛnd di sɛkɔn klas na Giliad, ɛn Meri ɛn mi sista bin de du di mishɔnari wok togɛda. Meri bin gladi fɔ tɛl mi bɔt in mishɔnari asaynmɛnt na di Karebian ɛn di Baybul stɔdi dɛn we i dɔn kɔndɔkt insay di ia dɛn we dɔn pas. As wi de sabi wisɛf, wi kam fɔ no se wi gɛt di sem gol fɔ sav Jiova ful-taym. Wi bin kɔntinyu fɔ lɛk wisɛf mɔ ɛn mɔ ɛn wi bin mared insay Epril 1955. Meri bin sho se in na gift frɔm Jiova bɔku we dɛn ɛn i bin de sɛt fayn ɛgzampul. I bin gladi fɔ du ɛni asaynmɛnt we dɛn gi am. I bin de wok tranga wan, du tin dɛn we de sho se i kia fɔ ɔda pipul dɛn, ɛn put di Kiŋdɔm fɔs na in layf ɔltɛm. (Mat. 6:33) Wi bin du di sakit wok fɔ tri ia, ɛn insay 1958, dɛn bin invayt wi fɔ go wok na Bɛtɛl.

A bin lan bɔku tin frɔm Meri. Fɔ ɛgzampul, we wi jɔs mared, wi disayd fɔ du wi Baybul ridin togɛda ɛn wi bin de rid 15 vas dɛn ɛvride. Afta wi dɔn rid sɔm vas dɛn, wi go kɔmɛnt bɔt dɛn ɛn tɔk bɔt aw wi go aplay dɛn. Bɔku tɛm, Meri bin de tɛl mi bɔt di tin dɛn we i lan na Giliad ɔ we in na bin mishɔnari. Di tin dɛn we Meri bin de tɛl mi bin ɛp mi fɔ impruv di tɔk dɛn we a bin de gi ɛn fɔ no aw fɔ ɛnkɔrej sista dɛn.—Prɔv. 25:11.

Mi wɛf Meri we a rili lɛk day 2013. A de rili wet fɔ di tɛm we a go si am na di nyu wɔl! Bɔt te da tɛm de, a dɔn mek-ɔp mi maynd fɔ kɔntinyu fɔ lan ɛn abop pan Jiova wit ɔl mi at. (Prɔv. 3:​5, 6) A kin gɛt kɔrej ɛn gladi-at we a de tink bɔt wetin Jiova in pipul dɛn go du na di nyu wɔl. Wan dawt nɔ de se wan pan dɛn tin dɛn de go bi fɔ lan nyu tin dɛn frɔm wi Ticha we Pas Ɔl Ɔda Ticha dɛn ɛn lan nyu tin dɛn bɔt am! Fɔ tru, a nɔ ebul tɛl am tɛnki fɔ di tin dɛn we i dɔn tich mi ɛn fɔ di bɔku we dɛn we i dɔn sho mi in spɛshal gudnɛs.