1. Aw sɔm pipul dɛn kin fil bɔt di chans fɔ de sote go?

 BƆKU pipul dɛn kin tek tɛm wit wetin dɛn de it ɛn dɛn kin tray fɔ ɛksasayz ɔltɛm so dat dɛn go gɛt wɛlbɔdi. Bɔt pan ɔl dat, dɛn nɔ de ɛkspɛkt fɔ de sote go. To dɛn, i tan lɛk se fɔ de sote go na sɔntin we nɔ pɔsibul ɛn we pɔsin nɔ go want bikɔs ɔf di prɔblɛm dɛn we wi kin gɛt we wi dɔn ol. Bɔt Jizɔs bin tɔk se i pɔsibul fɔ mek mɔtalman dɛn gɛt “layf we go de sote go” na Jɔn 3:16 ɛn 5:24.

2. Wetin Jɔn chapta 6 tɔk bɔt layf we go de sote go? (Jɔn 6:39, 40)

² Wan de, Jizɔs bin pafɔm mirekul fɔ fid wan krawd wit bred ɛn fish. a Dat na bin wɔndaful tin, bɔt na di tin we i tɔk di nɛks de mek pipul dɛn sɔprayz mɔ. Di krawd bin fala am fɔ go na Kepanyɔm, nia di si na Galili, usay i tɛl dɛn se pipul dɛn go gɛt layf bak ɛn de sote go. (Rid Jɔn 6:39, 40.) Tink bɔt wetin dat min fɔ yu padi dɛn ɛn fambul dɛn we dɔn day. Di wɔd dɛn we Jizɔs tɔk sho se bɔku pan di wan dɛn we dɔn day go gɛt layf bak, ɛn yu ɛn di wan dɛn we yu lɛk go ɛnjɔy layf sote go! Bɔt i nɔ izi fɔ bɔku pipul dɛn fɔ ɔndastand  di ɔda tin dɛn we Jizɔs tɔk na Jɔn chapta 6. Lɛ wi tek tɛm tɔk bɔt di wɔd dɛn we Jizɔs tɔk insay da chapta de.

3. Akɔdin to Jɔn 6:51, wetin Jizɔs bin tɔk bɔt insɛf?

³ We Jizɔs yuz bred fɔ fid di krawd na Kepanyɔm, dat go mɔs dɔn mek dɛn tink bɔt di mana we Jiova bin gi dɛn gret gret granpa dɛn. Infakt, di Baybul kɔl da mana de it ɔ bred we “kɔmɔt na ɛvin.” (Sam 105:40; Jɔn 6:31) Jizɔs bin tɔk bɔt tin dɛn we di krawd no bɔt di mana fɔ tich dɛn sɔntin we rili impɔtant. Pan ɔl we di mana na bin gift frɔm Gɔd, di wan dɛn we bin it am bin day as tɛm de go. (Jɔn 6:49). Bɔt, Jizɔs bin kɔl insɛf “di tru tru bred we kɔmɔt na ɛvin,” “Gɔd in bred,” ɛn “di bred we de gi layf.” (Jɔn 6:32, 33, 35) Jizɔs tɔk bɔt wan impɔtant difrɛns bitwin in ɛn di mana. I tɔk se: “Na mi na di bred we gɛt layf ɛn we kɔmɔt na ɛvin kam dɔŋ. Ɛnibɔdi we it dis bred go de sote go.” (Rid Jɔn 6:51.) Dis tin we Jizɔs tɔk bin mek dɛn Ju dɛn de kɔnfyus. Aw Jizɔs go tɔk se na in kam dɔŋ frɔm ɛvin as “di bred” we pas di mana we Gɔd bin pafɔm mirekul fɔ gi dɛn gret gret granpa dɛn? Jizɔs bin tɔk wan intrɛstin tin fɔ mek dɛn ɔndastand wetin i se. I tɛl dɛn se: “Di bred we a de gi na mi bɔdi.” Wetin i bin min we i tɔk dat? I impɔtant fɔ lɛ wi ɔndastand wetin Jizɔs bin min bikɔs di ansa go sho aw wi ɛn di wan dɛn we wi lɛk go gɛt layf we go de sote go. Lɛ wi si wetin Jizɔs bin min.

BRED WE GƐT LAYF ƐN IN BƆDI

4. Wetin mek sɔm pipul dɛn bin shɔk bikɔs ɔf wetin Jizɔs tɔk?

⁴ Sɔm pan di pipul dɛn we bin de lisin to Jizɔs bin shɔk we i tɔk se i go gi in “bɔdi so dat mɔtalman go liv.” Sɔntɛm dɛn bin de tink se i go gi dɛn in rial bɔdi fɔ it. (Jɔn 6:52) Dɔn Jizɔs tɛl dɛn sɔntin we go dɔn mek dɛn rili shɔk, i se: “If una nɔ it mɔtalman Pikin in bɔdi ɛn drink in blɔd, una nɔ gɛt layf insay unasɛf.”​—Jɔn 6:53.

5. Wetin mek wi shɔ se di tin we Jizɔs tɔk nɔ min se pipul dɛn go drink in rial blɔd?

⁵ Insay Noa in tɛm, Gɔd bin tɔk klia wan se mɔtalman nɔ fɔ it blɔd. (Jɛn. 9:3, 4) Leta, Jiova bin tɔk di sem tin insay di Lɔ we i bin gi di Izrɛlayt dɛn. “Dɛn fɔ kil” ɛnibɔdi we it blɔd. (Liv. 7:27, futnot.) Jizɔs bin de obe da Lɔ de. (Mat. 5:17-19) So i nɔ pɔsibul fɔ lɛ Jizɔs tɛl di krawd se dɛn fɔ it in rial bɔdi ɔ drink in blɔd. Bɔt we Jizɔs tɔk dɛn wɔd dɛn ya, i bin de tray fɔ tich di pipul dɛn wetin fɔ du fɔ gɛt “layf we go de sote go.”​—Jɔn 6:54.

6. Aw wi fɔ ɔndastand di wɔd dɛn we Jizɔs tɔk we i se dɛn fɔ it in bɔdi ɛn drink in blɔd?

⁶ Wetin Jizɔs bin de tɔk bɔt? I klia fɔ si se Jizɔs bin yuz dɛn wɔd dɛn de as ɛgzampul we i bin de tɔk to di krawd jɔs lɛk aw i bin du we i tɔk to di Samɛritan uman we i se: “Ɛnibɔdi we drink di wata we a go gi am nɔ go ɛva tɔsti igen, bɔt di wata we a go gi am go tɔn to spriŋ wata insay am we go gi am layf we go de sote go.” (Jɔn 4:7, 14) b Jizɔs  nɔ bin de tɔk se di Samɛritan uman go gɛt layf we go de sote go we i jɔs drink wan patikyula wata. Semweso, i nɔ bin de tɛl di krawd we i bin de tɔk to na Kepanyɔm se dɛn go de sote go if dɛn it in rial bɔdi ɛn drink in blɔd.

DI DIFRƐNS BITWIN DI TU TƐM DƐN WE JIZƆS TƆK BƆT FƆ IT IN BƆDI ƐN DRINK IN BLƆD

7. Wetin sɔm pipul dɛn se bɔt wetin Jizɔs tɔk na Jɔn 6:53?

⁷ Sɔm pipul dɛn na sɔm rilijɔn dɛn se na Jɔn 6:​53, Jizɔs bin de tɔk bɔt wetin pipul dɛn go nid fɔ du di tɛm fɔ di Masta in Ivintɛm It, bikɔs di wɔd dɛn we i yuz da tɛm de fiba di wɔd dɛn we i yuz we i bin de tɔk to di krawd. (Mat. 26:​26-28) Dɛn se ɛnibɔdi we atɛnd di program fɔ di Masta in Ivintɛm It fɔ it di bred ɛn drink di wayn we dɛn kin pas pas. Na so i fɔ bi? I impɔtant fɔ lɛ wi no if na tru dɛn tɔk ɔ nɔto tru dɛn tɔk, bikɔs ɛni ia bɔku bɔku pipul dɛn ɔlsay na di wɔl kin jɔyn wi fɔ di program fɔ mɛmba di Masta in Ivintɛm It. Wi go si di difrɛns bitwin wetin Jizɔs bin tɔk na Jɔn 6:53 ɛn wetin i tɔk di tɛm fɔ di Masta in Ivintɛm It.

8. Wetin na di difrɛns bitwin di tu tɛm dɛn we Jizɔs tɔk dɛn wɔd dɛn ya? (Luk bak di pikchɔ dɛn.)

⁸ Lɛ wi tɔk bɔt tu difrɛns bitwin dɛn tu tɛm dɛn de. Fɔs, ustɛm ɛn usay Jizɔs  bin tɔk di wɔd dɛn we de na Jɔn 6:​53-56? Na Galili insay di ia 32 afta Krays i tɔk dɛn wɔd dɛn ya to bɔku bɔku Ju dɛn. Dat na bin lɛk wan ia bifo i mek di program fɔ di Masta in Ivintɛm It na Jerusɛlɛm. Sɛkɔn, na to udat dɛn i tɔk dɛn wɔd dɛn de? Bɔku pan di pipul dɛn we bin de lisin to am na Galili bin bisin mɔ fɔ gɛt di tin dɛn we dɛn nid we nɔ de te pas fɔ no bɔt Jiova ɔ in Kiŋdɔm. (Jɔn 6:26) Infakt, dɛn lɛf fɔ gɛt fet pan Jizɔs kwik kwik wan we i tɔk sɔntin we dɛn nɔ bin ɔndastand. Ivin sɔm pan in disaypul dɛn bin lɛf fɔ fala am. (Jɔn 6:​14, 36, 42, 60, 64, 66) Dɛn pipul dɛn de bin rili difrɛn frɔm di 11 fetful apɔsul dɛn we bin de wit Jizɔs lɛk wan ia leta we i mek di program fɔ di Masta in Ivintɛm It insay di ia 33 afta Krays. Da tɛm de, na in 11 apɔsul dɛn we nɔ kɔmɔt biɛn am bin de wit am pan ɔl we dɛn nɔ bin rili ɔndastand ɔl di tin dɛn we i bin tich dɛn. In fetful apɔsul dɛn bin biliv se Jizɔs na Gɔd in Pikin we kɔmɔt na ɛvin, dɛn nɔ bin tan lɛk bɔku pan di pipul dɛn na Galili. (Mat. 16:16) I prez dɛn bay we i tɔk se: “Na una dɔn de wit mi we a de sɔfa.” (Lyuk 22:28) Dɛn tu difrɛns dɛn ya nɔmɔ sho se di wɔd dɛn we Jizɔs tɔk na Jɔn 6:53 nɔ de sho wetin fɔ apin pan di program fɔ di Masta in Ivintɛm It. Ɛn mɔ difrɛns de bitwin dɛn tu tɛm dɛn de.

WETIN JIZƆS IN WƆD DƐN MIN FƆ YU?

9. Us grup Jizɔs bin de tɔk bɔt di tɛm fɔ di Masta in Ivintɛm It?

⁹ Di tɛm fɔ di Masta in Ivintɛm It, Jizɔs bin gi in apɔsul dɛn bred we nɔ gɛt yist ɛn tɛl dɛn se di bred tinap fɔ in bɔdi. Dɔn i gi dɛn di wayn ɛn tɔk se i tinap fɔ di “blɔd we mek di agrimɛnt ol wata.” (Mak 14:​22-25; Lyuk 22:20; 1 Kɔr. 11:24) Dis tin we i tɔk rili impɔtant. I bin mek di nyu agrimɛnt wit “di pipul dɛn na [spirichwal] Izrɛl” we go de “na Gɔd in Kiŋdɔm,” i nɔ mek dis agrimɛnt wit ɔlman. (Ibru. 8:​6, 10; 9:15) Di apɔsul dɛn nɔ bin ɔndastand wetin Jizɔs bin min da tɛm de, bɔt i nɔ go te Jiova go anɔynt dɛn wit oli spirit ɛn mek dɛn de pat pan di nyu agrimɛnt so dat dɛn go rul wit Jizɔs na ɛvin.​—Jɔn 14:2, 3.

10. Aw di tin we Jizɔs bin tɔk na Galili difrɛn frɔm wetin i bin tɔk di tɛm fɔ di Masta in Ivintɛm It? (Luk bak di pikchɔ.)

¹⁰ Mɛmba se di tɛm fɔ di Masta in Ivintɛm It, na di “ship dɛn we nɔ bɔku” Jizɔs bin de tɔk to. Di fɔs pipul dɛn we de pat pan dis smɔl grup na in fetful apɔsul dɛn we bin de wit am insay di rum. (Lyuk 12:32) Dɛn ɛn ɔda wan dɛn we go de pat pan da grup de go it di bred ɛn drink di wayn. Na dɛn go de wit Jizɔs na ɛvin. Wetin i bin tɛl in apɔsul dɛn da tɛm de bin difrɛn frɔm wetin i tɛl di krawd na Galili, usay i bin de tɔk bɔt wetin ɔlman fɔ du. Dɛn wɔd dɛn de aplay to bɔku bɔku pipul dɛn.

11. Wetin Jizɔs tɔk na Galili we sho se na bɔku bɔku pipul dɛn i bin de tɔk bɔt?

¹¹ We Jizɔs bin de na Galili insay di ia 32 afta Krays, di pipul dɛn we i bin de tɔk to na Ju dɛn we bin jɔs want lɛ i gi dɛn tin fɔ it. Bɔt Jizɔs bin tray fɔ ɛp dɛn fɔ ɔndastand se sɔntin de we impɔtant pas tin fɔ it. I bin sho wetin  go mek dɛn gɛt layf we go de sote go. Ɛn Jizɔs bin tɔk se di wan dɛn we dɔn day go gɛt layf bak di las de ɛn dɛn go de sote go. I nɔ bin de tɔk bɔt di pipul dɛn we dɛn dɔn pik we nɔ bɔku lɛk aw i bin du leta di tɛm fɔ di Masta in Ivintɛm It. Bifo dat, i bin de tɔk bɔt blɛsin we ɔlman go ebul fɔ gɛt. Infakt, i tɔk se: “Ɛnibɔdi we it dis bred go de sote go . . . Di bred we a de gi na mi bɔdi so dat mɔtalman go liv.”​—Jɔn 6:51. c

12. Wetin wi nid fɔ du fɔ gɛt di bɛnifit dɛn we Jizɔs tɔk bɔt?

¹² Jizɔs nɔ bin tɛl di Ju dɛn na Galili se dis blɛsin go de fɔ ɔlman we dɔn liv na di wɔl ɔ we dɛn go bɔn. Na di wan dɛn nɔmɔ we ‘it dis bred,’ dat na di wan dɛn we sho se dɛn gɛt fet, go bɛnifit. Bɔku Kristian dɛn fil se dɛn go sev if dɛn jɔs gɛt “fet pan [Jizɔs]” ɛn si am as dɛn seviɔ. (Jɔn 6:29, King James Version) Bɔt, sɔm pan di pipul dɛn na di krawd we bin biliv Jizɔs bin lɛf am. Wetin mek?

13. Wetin i min fɔ bi Jizɔs in tru tru disaypul?

¹³ Bɔku pan di pipul dɛn we bin de fala Jizɔs bin rɛdi fɔ fala am wans i de gi dɛn wetin dɛn want. Dɛn bin jɔs want mek Jizɔs pafɔm mirekul fɔ mɛn dɛn, gi dɛn tin fɔ it, ɛn tich dɛn tin dɛn we dɛn lɛk fɔ yɛri. Bɔt Jizɔs bin sho se in tru tru disaypul dɛn go nid fɔ du pas dat. I nɔ bin kam na di wɔl jɔs fɔ gi pipul dɛn wetin dɛn want.  Dɛn bin nid fɔ “kam to” am, we min se dɛn fɔ lisin to am ɛn du ɔl wetin i de tich dɛn.​—Jɔn 5:40; 6:44.

14. Wetin wi nid fɔ du fɔ bɛnifit frɔm Jizɔs in bɔdi ɛn in blɔd?

¹⁴ Jizɔs bin mek di krawd no se dɛn nid fɔ sho se dɛn gɛt fet. Fet pan wetin? Pan di pawa we in bɔdi ɛn in blɔd gɛt fɔ sev pipul dɛn, we i go gɛt fɔ sakrifays. I bin impɔtant fɔ mek dɛn Ju dɛn de gɛt da kayn fet de, ɛn i impɔtant fɔ mek wisɛf gɛt da kayn fet de. (Jɔn 6:40) Fɔ tru, fɔ mek wi bɛnifit frɔm Jizɔs in bɔdi ɛn in blɔd we Jɔn 6:53 tɔk bɔt, wi nid fɔ sho se wi gɛt fet pan in sakrifays. I pɔsibul fɔ mek bɔku bɔku pipul dɛn gɛt dis blɛsin.​—Ɛfi. 1:7.

15-16. Us impɔtant tin dɛn wi lan na Jɔn chapta 6?

¹⁵ Jɔn chapta 6 gɛt bɔku valyu tin dɛn fɔ wi ɛn di wan dɛn we wi lɛk. I mek wi no klia wan se Jizɔs rili lɛk pipul dɛn. We i bin de na Galili, i bin mɛn di wan dɛn we sik, tich pipul dɛn bɔt Gɔd in Kiŋdɔm, ɛn mek shɔ se pipul dɛn gɛt tin fɔ it. (Lyuk 9:11; Jɔn 6:2, 11, 12) Wetin impɔtant pas ɔl na we i tich pipul dɛn se na in na “di bred we de gi layf.”​—Jɔn 6:35, 48.

¹⁶ Di wan dɛn we i kɔl di “ɔda ship” nɔ fɔ it di bred ɛn drink di wayn pan di program fɔ di Masta in Ivintɛm It we wi kin gɛt wan tɛm insay di ia. (Jɔn 10:16) Bɔt dɛn de stil bɛnifit frɔm Jizɔs Krays in bɔdi ɛn in blɔd. Dɛn de bɛnifit we dɛn de sho se dɛn gɛt fet pan di pawa we in sakrifays gɛt fɔ sev dɛn. (Jɔn 6:53) Bɔt di wan dɛn we fɔ it di bred ɛn drink di wayn de sho se dɛn de pat pan di nyu agrimɛnt ɛn dɛn gɛt op fɔ rul na di Kiŋdɔm we de na ɛvin. So ilɛk wi de pat pan di anɔyntɛd ɔ di ɔda ship, i rili impɔtant fɔ mek wi lan bɔt di akawnt na Jɔn chapta 6. I de sho wetin mek i impɔtant fɔ sho se wi gɛt fet, ɛn dat go mek wi gɛt layf we go de sote go.