1-2. Aw mama ɛn papa dɛn fɔ fil we dɛn pikin aks kwɛstyɔn dɛn bɔt Gɔd ɛn di Baybul?

 BƆKU pipul dɛn go gri se mama ɛn papa dɛn gɛt bɔku wok fɔ mɛn dɛn pikin dɛn. If yu na mama ɔ papa we gɛt smɔl pikin, wi want fɔ tɛl yu tɛnki fɔ di tranga wok we yu de du fɔ ɛp am fɔ gɛt fet. (Dyu. 6:6, 7) As yu pikin de big, sɔntɛm i go bigin aks yu impɔtant kwɛstyɔn dɛn bɔt wetin wi biliv, lɛk wetin mek di Baybul de tich se i bad fɔ du sɔm tin dɛn.

² Fɔs, sɔntɛm di kwɛstyɔn dɛn we yu pikin de aks go mek yu wɔri. Sɔntɛm yu go ivin fil se yu pikin de aks dɛn kwɛstyɔn dɛn de bikɔs i nɔ gɛt bɛtɛ fet. Bɔt di tru na dat, we pikin dɛn de big, dɛn nid fɔ aks kwɛstyɔn dɛn so dat dɛn go gɛt strɔng fet. (1 Kɔr. 13:11) So yu nɔ nid fɔ fred. Yu fɔ si di kwɛstyɔn dɛn we yu pikin de aks bɔt wetin wi biliv as chans fɔ ɛp am fɔ ebul tink gud gud wan.

3. Wetin wi go tɔk bɔt insay dis atikul?

³ Insay dis atikul, wi go tɔk bɔt aw mama ɛn papa dɛn go ɛp dɛn pikin ɔ pikin dɛn (1) fɔ gɛt fet pan Gɔd, (2) fɔ ɔndastand wetin mek i fayn fɔ obe di lɔ dɛn we de na di Baybul bɔt wetin rayt ɛn rɔng, ɛn (3) fɔ tɔk bɔt wetin dɛn biliv. As wi de du dat, wi go tɔk bak bɔt wetin mek i fayn we pikin dɛn de aks kwɛstyɔn dɛn ɛn sɔm tin dɛn we mama ɛn papa dɛn go du wit dɛn pikin dɛn we go gi dɛn chans fɔ tɔk bɔt wetin dɛn biliv as Kristian.

ƐP YU PIKIN FƆ GƐT STRƆNG FET PAN GƆD ƐN DI BAYBUL

4. Us kwɛstyɔn dɛn pikin dɛn kin aks? Wetin mek?

⁴ Mama ɛn papa dɛn we na Kristian no se dɛn pikin nɔ  go gɛt fet pan Gɔd jɔs bikɔs dɛn gɛt fet. We dɛn bɔn yu, yu nɔ bin gɛt fet pan Jiova. Na di sem tin wit yu pikin. As tɛm de go, yu pikin go aks kwɛstyɔn dɛn lɛk: ‘Aw a no se Gɔd de? Fɔ se a fɔ rili biliv wetin di Baybul se?’ Infakt, di Baybul ɛnkɔrej wi fɔ “de tink” ɛn “mek shɔ ɔf ɔltin.” (Rom. 12:1; 1 Tɛs. 5:21) Bɔt aw yu go ebul ɛp yu pikin fɔ gɛt strɔng fet?

5. Wetin mama ɛn papa dɛn go du fɔ ɛp dɛn pikin fɔ biliv di Baybul? (Romans 12:2)

⁵ Ɛnkɔrej yu pikin fɔ pruv to insɛf se wetin di Baybul de tich na tru. (Rid Romans 12:2.) We yu pikin aks kwɛstyɔn dɛn, yuz da chans de fɔ sho am aw fɔ yuz di tin dɛn we wi kin yuz fɔ du risach, lɛk di Watch Tower Publications Index ɛn di Risach Gayd fɔ Jiova Witnɛs Dɛn fɔ fɛn di ansa dɛn. Insay di Risach Gayd fɔ Jiova Witnɛs Dɛn, i kin luk fɔ di tɔpik we se “The Bible,” ɛn ɔnda da tɔpik de i kin luk di say we se “Inspired by God” fɔ fɛn pruf we de sho se di Baybul nɔto jɔs gud buk we sɔm man dɛn rayt, bɔt na “Gɔd in wɔd.” (1 Tɛs. 2:13) Fɔ ɛgzampul, i kin du risach na wi pɔblikeshɔn dɛn fɔ lan mɔ bɔt di Asirian siti we na Ninivɛ we bin de trade trade. Trade, sɔm pipul dɛn we de tɔk agens di Baybul bin tɔk se no siti nɔ ɛva de we dɛn kɔl Ninivɛ. Bɔt arawnd di ia 1850, sɔm masta sabi bukman dɛn bin fɛn dis siti ɔnda ɔnda di grɔn, we pruv se wetin di Baybul tɔk na tru. (Zɛf. 2:13-15) Fɔ lan mɔ bɔt aw di dɔnawe we dɛn bin dɔnawe wit Ninivɛ bin mek Baybul prɔfɛsi kam tru, i kin rid di atikul we gɛt di taytul “Yu Bin No?” insay di Novɛmba 2021 Wachtawa. We yu pikin kɔmpia wetin i de lan frɔm wi pɔblikeshɔn dɛn wit wetin i de lan frɔm ɛnsayklopidia ɛn ɔda buk dɛn we pipul dɛn trɔst, i go gɛt gud rizin fɔ gɛt mɔ fet pan wetin di Baybul de tich.

6. Aw mama ɛn papa dɛn go ɛp dɛn pikin fɔ pruv se wetin di Baybul de tich kɔrɛkt? Gi wan ɛgzampul. (Luk bak di pikchɔ.)

⁶ Ɛp yu pikin fɔ tink bɔt wetin mek di tin dɛn we di Baybul de tich kɔrɛkt. Mama ɛn papa dɛn gɛt difrɛn chans dɛn we dɛn go yuz fɔ tɔk wit dɛn pikin bɔt di Baybul ɔ bɔt wetin mek dɛn biliv Gɔd. Dɛn kin gɛt dɛn chans dɛn de we dɛn go waka na myuziɔm, gadin, ɔ na Jiova Witnɛs dɛn Branch ɔfis usay tin dɛn de we pipul dɛn kin go wach. Fɔ ɛgzampul, we una go waka na myuziɔm, yu kin sho yu pikin sɔntin na di myuziɔm ɔ wetin bin dɔn apin trade we gɛt sɔntin fɔ du wit di Baybul. Dat go ɛp am fɔ biliv tranga wan se  wetin di Baybul de tɔk na tru. Yu pikin no se Gɔd in nem de pan wan ston we dɛn kɔl di Moabayt Ston we dɔn de fɔ 3,000 ia? Di orijinal Moabayt Ston de na wan myuziɔm na Frans. Dɔn bak, sɔntin we dɛn mek lɛk di Moabayt Ston de na Jiova Witnɛs dɛn Wɔl Ɛdkwata insay Wɔwik, na Amɛrika, na di say we dɛn kɔl “The Bible and the Divine Name,” usay tin dɛn de we pipul dɛn kin go wach. Di Moabayt Ston sho se Kiŋ Misha na Moab bin tɔn agens Izrɛl. Dat gri wit wetin di Baybul se. (2 Kiŋ 3:​4, 5) We yu pikin si fɔ insɛf tin dɛn we de sho se wetin di Baybul tɔk na tru ɛn dɛn kɔrɛkt, dat go mek in fet strɔng mɔ ɛn mɔ.—Luk bak 2 Kronikul 9:6.

7-8. (a) Wetin wi go lan frɔm aw di tin dɛn we Gɔd mek fayn ɛn di fayn dizayn we dɛn gɛt? Gi wan ɛgzampul. (Luk bak di pikchɔ.) (b) Us kwɛstyɔn dɛn go ɛp yu pikin fɔ biliv se Pɔsin de we mek ɔltin?

⁷ Ɛnkɔrej yu pikin fɔ tink bɔt di fayn fayn tin dɛn we Jiova dɔn mek. We una de waka na vilej eria dɛn ɔ una de wok na gadin, ɛp yu pikin fɔ si di fayn dizayn dɛn we di tin dɛn we Gɔd mek gɛt. Wetin mek? Na bikɔs dɛn dizayn dɛn ya de sho se pɔsin de we gɛt sɛns we mek dɛn. Bɔku pan di tin dɛn we Gɔd mek gɛt rawnd rawnd shep dɛn we dɛn de kɔl spiral patan. Sayɛntist dɛn dɔn stɔdi dɛn shep dɛn ya fɔ lɔng tɛm. Wan sayɛntist we nem Nikola Famɛli tɔk se we yu kɔnt di rawnd rawnd shep dɛn we de pan wan patikyula tin we Gɔd mek, yu go si se di patan fɔ di nɔmba dɛn na di sem. Dɛn kɔl dɛn nɔmba dɛn ya di Fibonachi sikwɛns. Wi go ebul si dɛn rawnd rawnd patan dɛn ya pan bɔku tin dɛn, lɛk di shep we di galaksi dɛn, sishɛl dɛn, lif dɛn, ɛn sɔnflawa dɛn gɛt. a

⁸ As yu pikin de lan mɔ bɔt sayɛns na skul, i go kam fɔ no se lɔ dɛn de we de kɔntrol di shep we bɔku tin dɛn gɛt. Fɔ ɛgzampul, bɔku tik dɛn gɛt wan patikyula we aw dɛn de gro. Di trɔnk we na di big pat pan di tik de gro ɛn pul limb dɛn, di limb dɛn de gro ɛn pul branch dɛn, ɛn di branch dɛn de gro ɛn pul ɔda smɔl smɔl branch dɛn we dɛn kɔl twig. Dɛn kɔl dis kayn patan fraktal. Dɛn patan dɛn ya de bak pan ɔda tin dɛn we wi de si arawnd wi. Bɔt udat mek dɛn fayn patan dɛn ya? I go bi se di mɔ we yu pikin de tink bɔt dɛn kwɛstyɔn dɛn ya, na di mɔ i go biliv tranga wan se na Gɔd mek ɔltin. (Ibru. 3:4) As yu pikin de big, yu kin aks am dis kwɛstyɔn, “If na Gɔd mek wi, yu nɔ tink se i mek sɛns fɔ mek i gi wi lɔ dɛn we  go gayd wi so dat wi go gɛt gladi-at?” Dɔn yu kin tɛl am se dɛn lɔ dɛn de, de na di Baybul.

ƐP YU PIKIN FƆ ƆNDASTAND WETIN MEK I FAYN FƆ OBE DI LƆ DƐN WE DE NA DI BAYBUL BƆT WETIN RAYT ƐN RƆNG

9. Wetin kin mek yu pikin aks kwɛstyɔn dɛn bɔt sɔm lɔ dɛn we de na di Baybul?

⁹ If yu pikin aks kwɛstyɔn dɛn bɔt wetin mek wi de obe sɔm lɔ dɛn na di Baybul, tray fɔ ɔndastand di rizin we mek i de aks dɛn kwɛstyɔn dɛn de. Fɔ se i de aks bikɔs i nɔ biliv se wetin di Baybul de tich na tru? Ɔ fɔ se i jɔs de aks bikɔs i nɔ no aw fɔ ɛksplen wetin i biliv? Ilɛk wetin na di rizin, yu kin ɛp yu pikin fɔ ɔndastand wetin mek i fayn fɔ lɛ wi obe Jiova in lɔ dɛn. Yu go ebul du dat we yu stɔdi di Ɛnjɔy Layf Sote Go! buk wit am. b

10. Aw yu go ɛp yu pikin fɔ tink bɔt in yon padi biznɛs wit Jiova?

¹⁰ Ɛp yu pikin fɔ valyu in padi biznɛs wit Jiova. We yu ɛn yu pikin de stɔdi di Baybul, yuz di kwɛstyɔn ɛn ɛgzampul dɛn we de na di Ɛnjɔy Layf Sote Go! buk fɔ ɔndastand aw i de fil bɔt difrɛn tin dɛn. (Prɔv. 20:5) Fɔ ɛgzampul, lɛsin 8 kɔmpia Jiova to padi we bisin bɔt wi, we de gi wi advays dɛn we de protɛkt ɛn bɛnifit wi. Afta una dɔn tɔk bɔt 1 Jɔn 5:​3, yu kin aks am dis kwɛstyɔn: “Bikɔs yu dɔn no se Jiova na da kayn gud Padi de, aw wi fɔ si di tin dɛn we i de tɛl wi fɔ du?” Sɔntɛm yu go tink se dat na simpul kwɛstyɔn, bɔt we yu aks yu pikin da kwɛstyɔn de yu go ɛp am fɔ ɔndastand se Jiova de gi wi lɔ dɛn bikɔs I lɛk wi.—Ayz. 48:​17, 18.

11. Aw yu go ɛp yu pikin fɔ ɔndastand wetin mek i fayn fɔ aplay Baybul prinsipul dɛn? (Prɔvabs 2:​10, 11)

¹¹ Tɔk to am bɔt aw wi de bɛnifit we wi de aplay Baybul prinsipul dɛn. We una de rid di Baybul ɔ di deli tɛks togɛda, una tɔk bɔt aw Baybul prinsipul dɛn dɔn ɛp una famili. Fɔ ɛgzampul, yu pikin ɔndastand se pɔsin de bɛnifit we i de wok tranga wan ɛn we i ɔnɛs? (Ibru. 13:18) Yu kin ɛp am bak fɔ ɔndastand se we wi de fala di advays dɛn we de na di Baybul, i de ɛp wi fɔ gɛt wɛlbɔdi ɛn gladi-at. (Prɔv. 14:​29, 30) We una de tɔk bɔt dɛn prinsipul dɛn de, dat go mɔs mek yu pikin gladi mɔ fɔ fala di advays dɛn we de na di Baybul.—Rid Prɔvabs 2:​10, 11.

12. Aw wan papa de ɛp in bɔypikin fɔ ɔndastand di bɛnifit we pɔsin go gɛt we i de fala Baybul prinsipul dɛn?

¹² Wan papa we de na Frans we nem Stiv tɔk bɔt aw in ɛn in wɛf de ɛp dɛn bɔypikin we na tineja we nem Itan fɔ ɔndastand se na bikɔs Jiova lɛk wi na dat mek i gi wi lɔ dɛn. Dɛn tɔk se: “Wi kin aks am kwɛstyɔn dɛn lɛk, ‘Wetin mek Jiova want lɛ wi rɛspɛkt dis prinsipul? Aw dis prinsipul de sho se i lɛk wi? Wetin go apin if yu nɔ fala da prinsipul de?’” We dɛn kin tɔk to Itan dis we, dat dɔn ɛp am fɔ biliv tranga wan se wetin Jiova de tɔk na tru. Stiv kɔntinyu fɔ tɔk se, “Wi gol na fɔ ɛp Itan fɔ si se di sɛns we de na di Baybul pas mɔtalman sɛns fa fawe.”

13. Aw mama ɛn papa dɛn go tren dɛn pikin fɔ fala Baybul prinsipul dɛn? Gi wan ɛgzampul.

¹³ Tren yu pikin fɔ aplay Baybul prinsipul dɛn. Wan chans we yu go gɛt fɔ tren yu pikin na we dɛn gi am buk fɔ rid as pat pan in skul wok. Sɔntɛm di buk go mek i tan lɛk se i fayn fɔ falamakata di pipul dɛn we de du mami ɛn dadi biznɛs di we  aw Gɔd nɔ want ɔ we de vɛks ɛn fɛt. Yu kin ɛnkɔrej yu pikin fɔ tink bɔt aw Jiova de fil we pipul dɛn de du dɛn kayn tin dɛn de. (Prɔv. 22:​24, 25; 1 Kɔr. 15:33; Fil. 4:8) Dat go ɛp am fɔ ebul prich to in ticha ɛn skulmet dɛn we dɛn de aks am kwɛstyɔn bɔt wetin i tink bɔt di buk.

TICH YU PIKIN AW FƆ TƆK BƆT WETIN I BILIV

14. Us sɔbjɛkt nɔ kin izi fɔ tɔk bɔt fɔ pikin we na Kristian? Wetin mek?

¹⁴ Sɔntɛnde, pikin dɛn we na Kristian kin fred fɔ tɔk bɔt wetin dɛn biliv. Sɔntɛm dɛn go fred fɔ tɔk we dɛn de tich dɛn bɔt ɛvolushɔn. Wetin mek? Dɛn ticha dɛn kin tɔk bɔt ɛvolushɔn lɛk se na tru tru tin. If yu na mama ɔ papa, aw yu go ɛp yu pikin fɔ gɛt kɔnfidɛns fɔ tinap tranga wan fɔ wetin i biliv?

15. Wetin go ɛp pikin we na Kristian fɔ gɛt mɔ kɔnfidɛns pan wetin i biliv?

¹⁵ Ɛp yu pikin fɔ gɛt mɔ kɔnfidɛns pan wetin i biliv. Yu pikin nɔ fɔ shem bikɔs i biliv se pɔsin de we mek ɔltin. (2 Tim. 1:8) Wetin mek? Di tru na dat, bɔku sayɛntist dɛn bak ɔndastand se layf nɔ jɔs apia lɛk dat ɔ jɔs kam bay chans. Dɛn sayɛntist dɛn ya de si klia pruf we de sho se pɔsin de we gɛt sɛns we go mɔs dɔn mek ɔl di tin dɛn we gɛt layf we nɔ izi fɔ ɔndastand. Bikɔs ɔf dat, dɛn nɔ biliv di tichin bɔt ɛvolushɔn we dɛn de tich na bɔku skul dɛn na di wɔl. Wan tin we go ɛp yu pikin fɔ gɛt fet ɛn maynd mɔ ɛn mɔ, na we i tink gud gud wan bɔt di rizin dɛn we mek ɔda brɔda ɛn sista dɛn biliv se Pɔsin de we mek ɔltin. c

16. Aw mama ɛn papa dɛn go ɛp dɛn pikin fɔ ɛksplen wetin mek i biliv se Pɔsin de we mek ɔltin? (1 Pita 3:15) (Luk bak di pikchɔ.)

¹⁶ Ɛp yu pikin fɔ mek i go ebul ɛksplen wetin mek i biliv se Pɔsin de we mek ɔltin. (Rid 1 Pita 3:15.) Wan ɔda tin we una kin du we go ɛp una pikin na we una tɔk bɔt di atikul dɛn we de na jw.org na di siriz “Young People Ask—Creation or Evolution?”(Pat 2, Pat 3 ɛn Pat 4). Dɔn una tɔk bɔt di pɔynt we yu pikin tink se go fayn mɔ fɔ yuz fɔ ɛp ɔda pipul dɛn fɔ ɔndastand di tru bɔt di Pɔsin we mek ɔltin. Ɛp am fɔ mɛmba se i nɔ nid fɔ agyu wit in skulmet dɛn. Ɛnkɔrej am fɔ ɛksplen wetin i biliv simpul wan ɛn di  kayn we we go mek pɔsin tink ɛn ɔndastand if dɛn gri fɔ lisin to am. Fɔ ɛgzampul, sɔntɛm wan pan in skulmet dɛn go se: “Na wetin nɔmɔ a de si a de biliv, ɛn a nɔ wande si Gɔd.” Pikin we na Kristian go ansa se: “Imajin se yu de waka na fɔrɛst we de fa frɔm usay pipul dɛn de ɛn yu si fayn wata wɛl. Wetin yu go tink? If ɔdinari wata wɛl de sho klia wan se pɔsin de we gɛt sɛns we mek am, yu nɔ tink se pɔsin de we mek di wan ol wɔl?”

17. Aw mama ɛn papa dɛn go ɛnkɔrej dɛn pikin fɔ luk fɔ chans dɛn fɔ tɛl ɔda pipul dɛn bɔt di tru tin dɛn we de na di Baybul? Gi ɛgzampul.

¹⁷ Ɛnkɔrej yu pikin fɔ luk fɔ chans dɛn fɔ tɛl ɔda pipul dɛn bɔt di tru tin dɛn we de na di Baybul. (Rom. 10:10) Yu kin kɔmpia di tray we i de tray fɔ tɛl ɔda pipul dɛn bɔt wetin i biliv to we pikin de lan fɔ waka. Fɔs, di pikin de lan fɔ tinap, afta dat, i go bigin fɔ waka smɔl smɔl. Semweso, pikin we na Kristian kin bigin bay we i yuz simpul we dɛn fɔ tɛl ɔda pipul dɛn wetin i biliv. Fɔ ɛgzampul, i kin aks in skulmet se: “Yu no se bɔku tɛm injinia dɛn kin falamakata di dizayn dɛn we di tin dɛn we de na di wɔl gɛt? Mek a sho yu wan fayn vidio.” Afta i dɔn sho wan vidio frɔm di siriz Was It Designed? i kin aks se: “If sayɛntist de gɛt prez fɔ dizayn we ɔlrɛdi de, yu nɔ tink se pɔsin de we fɔ gɛt prez fɔ di orijinal dizayn?” Sɔntɛm da simpul we de fɔ tich go ɛp yɔŋ pɔsin fɔ want fɔ lan mɔ.

KƆNTINYU FƆ ƐP YU PIKIN FƆ GƐT STRƆNG FET

18. Aw mama ɛn papa dɛn go kɔntinyu fɔ ɛp dɛn pikin fɔ gɛt strɔng fet pan Gɔd?

¹⁸ Wi de na wɔl we bɔku pipul dɛn nɔ gɛt fet pan Jiova. (2 Pit. 3:3) So mama ɛn papa dɛn, as una de stɔdi di Baybul wit una pikin, una ɛnkɔrej am fɔ stɔdi bɔt tɔpik dɛn we go ɛnkɔrej am fɔ gɛt rɛspɛkt fɔ Gɔd in Wɔd ɛn in lɔ dɛn. Una tɔk bɔt di wɔndaful tin dɛn we Jiova mek fɔ ɛp am fɔ tink gud gud. Ɛp am fɔ ɔndastand di wɔndaful Baybul prɔfɛsi dɛn we dɔn ɔlrɛdi kam tru. Ɛn wetin impɔtant pas ɔl, na fɔ de pre wit una pikin ɛn pre fɔ am. We una du dat, una go gɛt kɔnfidɛns se Jiova go blɛs di tranga wok we una de du fɔ ɛp una pikin fɔ gɛt strɔng fet pan am.—2 Kro. 15:7.