1. Us valyu bred gɛt insay di Baybul?

 BRED na bin wan pan di men it dɛn we bɔku pipul dɛn bin de it insay di tɛm we dɛn bin de rayt di Baybul. (Jɛn. 14:18; Lyuk 4:4) Infakt, bikɔs bred bin rili impɔtant, sɔntɛnde di Baybul kin yuz “bred” we i de tɔk bɔt it. (Mat. 6:11, futnot; Akt 20:7, stɔdi not) Jizɔs bin yuz bred fɔ pafɔm tu pan in mirekul dɛn. (Mat. 16:9, 10) Wan pan dɛn mirekul dɛn de, de na Jɔn chapta 6. As wi de tɔk bɔt dis akawnt, wi go luk fɔ lɛsin dɛn we wi kin aplay tide.

2. Wetin bin apin we mek pipul dɛn bin nid tin fɔ it?

² Afta Jizɔs in apɔsul dɛn dɔn fɔ prich, dɛn yuz bot fɔ krɔs di Si na Galili wit Jizɔs fɔ mek dɛn rɛst. (Mak 6:7, 30-32; Lyuk 9:10) Dɛn bin go na wan kwayɛt ples we de nia Bɛtseda. Bɔt i nɔ te, bɔku pipul dɛn go mit dɛn de. Jizɔs nɔ bin mek lɛk se i nɔ si dɛn. I bin tek tɛm tich dɛn bɔt di Kiŋdɔm ɛn mɛn di wan dɛn we sik. We di ples de dak, di disaypul dɛn bigin fɔ tink bɔt aw dɛn pipul dɛn de go gɛt tin fɔ it. Sɔntɛm, sɔm pan dɛn bin gɛt tin fɔ it, bɔt bɔku pan dɛn bin nid fɔ go na di vilej dɛn fɔ bay tin fɔ it. (Mat. 14:15; Jɔn 6:4, 5) Wetin Jizɔs go du?

JIZƆS PAFƆM MIREKUL FƆ GI PIPUL DƐN BRED FƆ IT

3. Wetin Jizɔs bin tɛl in apɔsul dɛn fɔ du fɔ di krawd? (Luk bak di pikchɔ na di pej.)

³ Jizɔs bin tɛl in apɔsul dɛn se: “Dɛn nɔ nid fɔ go, una gi dɛn sɔntin fɔ it.” (Mat. 14:16) Dat na bin prɔblɛm bikɔs na bin lɛk 5,000 man dɛn bin de de. Ɛn if dɛn ad di  uman dɛn ɛn di pikin dɛn, sɔntɛm na bin lɛk 15,000 pipul dɛn, dɛn bin nid fɔ fid. (Mat. 14:21) Andru tɔk se: “Luk wan smɔl bɔbɔ we gɛt fayv bali bred ɛn tu smɔl fish. Bɔt wetin dis go du fɔ dɛn bɔku pipul ya?” (Jɔn 6:9) Bali bred na bred we po pipul dɛn ɛn ɔda pipul dɛn bin de it, ɛn sɔntɛm di smɔl fish na fish we dɛn bin dɔn put sɔl pan ɛn dray. Bɔt yu tink se di bred ɛn fish we di bɔbɔ bin gɛt go du fɔ fid da kayn krawd de?

4. Wetin wi go lan frɔm Jɔn 6:11-13? (Luk bak di pikchɔ dɛn.)

⁴ Bikɔs Jizɔs bin want fɔ du gud to di pipul dɛn, i bin tɛl dɛn fɔ sidɔm na di gras bay grup. (Mak 6:39, 40; rid Jɔn 6:​11-13.) Wi rid se Jizɔs bin tɛl in Papa tɛnki fɔ di bred ɛn di fish. Na di rayt tin Jizɔs bin du bikɔs na Gɔd gi dɛn tin fɔ it. I impɔtant fɔ mek wi falamakata Jizɔs in ɛgzampul bay we wi de pre bifo wi it, ilɛk na wi wangren de ɔ wi de wit ɔda pipul dɛn. Jizɔs bin mek dɛn sheb di it ɛn di pipul dɛn bin it ɛn satisfay. Sɔm pan di it bin ivin lɛf ɛn Jizɔs nɔ bin want mek i west. So i mek dɛn gɛda di wan we bin lɛf so dat dɛn go yuz am leta. Jizɔs nɔ bin de west tin dɛn. Dis na fayn ɛgzampul we wisɛf fɔ falamakata. If yu na mama ɔ papa, i go fayn fɔ mek yu stɔdi dis akawnt wit yu pikin dɛn ɛn tɔk bɔt di lɛsin dɛn we dɛn go lan bɔt prea, fɔ du gud, ɛn fɔ gɛt fri-an.

5. Wetin di pipul dɛn bin want fɔ du afta dɛn si di wɔndaful tin dɛn we Jizɔs du da de de? Wetin Jizɔs bin du?

⁵ Di pipul dɛn bin kɔle di we aw Jizɔs bin de tich ɛn di mirekul dɛn we i bin  de pafɔm. Bikɔs dɛn bin no se Mozis bin dɔn prɔmis se Gɔd go mek dɛn gɛt wan spɛshal prɔfɛt, sɔntɛm dɛn bin de wɔnda, ‘Fɔ se na Jizɔs na di prɔfɛt?’ (Dyu. 18:15-18) If na so i bi, i go bi di bɛst pɔsin fɔ rul dɛn ɛn sɔntɛm, i go mek di wan ol neshɔn gɛt tin fɔ it. Bikɔs ɔf dat, di pipul dɛn bin want fɔ “ol [Jizɔs] fɔ mek am kiŋ.” (Jɔn 6:14, 15) If Jizɔs bin alaw dat fɔ apin, i bin fɔ dɔn put an pan pɔlitiks. I bin du dat? Nɔ. Di Baybul tɛl wi se Jizɔs nɔ bin westɛm fɔ “kɔmɔt de ɛn go na di mawntin.” So pan ɔl we di pipul dɛn bin de prɛzhɔ am, i nɔ bin put an pan pɔlitiks. Dis na fayn lɛsin fɔ wi!

6. Aw wi go sho se wi want fɔ falamakata Jizɔs in ɛgzampul? (Luk bak di pikchɔ.)

⁶ As wi ɔl no, pipul dɛn nɔ go tɛl wi fɔ pafɔm mirekul fɔ gi dɛn bɔku bred, ɔ fɔ mɛn di wan dɛn we sik; ɛn dɛn nɔ go tray fɔ mek wi kiŋ ɔ rula. Bɔt sɔntɛm, dɛn go ɛnkɔrej wi fɔ put an pan pɔlitiks bay we wi vot ɔ tɔk fayn tin dɛn bɔt pɔsin we dɛn tink se go mek tin bɛtɛ. Bɔt Jizɔs in ɛgzampul klia. I nɔ bin gri fɔ put an pan pɔlitiks, ɛn leta i bin ivin tɔk se: “Mi Kiŋdɔm nɔ de na dis wɔl.” (Jɔn 17:14; 18:36) I go fayn fɔ mek Kristian dɛn tide falamakata di we aw Jizɔs bin de tink ɛn du tin. Wi de sɔpɔt da Kiŋdɔm de, prich bɔt am, ɛn pre fɔ am. (Mat. 6:10) Lɛ wi go bak to di akawnt  bɔt di mirekul we Jizɔs bin pafɔm fɔ gi di krawd bred ɛn si wetin bak wi kin lan.

“LƐSIN FRƆM DI MIREKUL WE JIZƆS BIN PAFƆM WIT DI BRED DƐN”

7. Wetin Jizɔs ɛn di apɔsul dɛn bin du? (Jɔn 6:16-20)

⁷ Afta Jizɔs bin dɔn fid di krawd, in ɛn in apɔsul dɛn bin kɔmɔt na di eria ɛn yuz bot fɔ go bak na Kepanyɔm. I bin go na di mawntin fɔ mek di pipul dɛn nɔ go mek am kiŋ bay fos. (Rid Jɔn 6:​16-20.) As di apɔsul dɛn de go, big big briz bigin fɔ blo ɛn briŋ big big swɛlin dɛn. Dɔn Jizɔs waka pantap di wata fɔ go to dɛn. Ɛn i tɛl apɔsul Pita fɔ mek insɛf waka pantap di wata. (Mat. 14:22-31) As Jizɔs go insay di bot, di briz stɔp fɔ blo. Di disaypul dɛn bin kɔle ɛn dat mek dɛn tɔk se: “Yu na Gɔd in Pikin fɔ tru.” a (Mat. 14:33) Bɔt stil, dɛn nɔ bin ebul fɔ ɔndastand aw dis mirekul gɛt sɔntin fɔ du wit di mirekul we Jizɔs bin dɔn pafɔm fɔ fid di krawd. Notis wetin Mak bin rayt bɔt dis tin we bin apin. I se: “[Di apɔsul dɛn] rili sɔprayz, bikɔs dɛn nɔ lan lɛsin frɔm di mirekul we Jizɔs bin pafɔm wit di bred dɛn. Dɛn nɔ bin stil ɔndastand yet.” (Mak 6:50-52) Fɔ tru, dɛn nɔ bin ebul ɔndastand di kayn pawa we Jiova dɔn gi Jizɔs fɔ pafɔm mirekul dɛn. Bɔt i nɔ te, Jizɔs insɛf sɛf bin tɔk bɔt di mirekul bɔt di bred ɛn i tich wi ɔda lɛsin.

8-9. Wetin mek di krawd bin de luk fɔ Jizɔs? (Jɔn 6:26, 27)

⁸ Di krawd we Jizɔs fid bin de pe atɛnshɔn pan tin fɔ it ɛn wetin dɛn want. Wetin mek wi se so? Di nɛks de, dɛn si se Jizɔs ɛn in apɔsul dɛn dɔn go. So di krawd bin tek bot dɛn we kɔmɔt na Taybirias ɛn go na Kepanyɔm fɔ go fɛn Jizɔs. (Jɔn 6:22-24) Fɔ se dɛn du dat bikɔs dɛn bin want fɔ yɛri di mɛsej bɔt di Kiŋdɔm? Nɔ. Di men tin we dɛn bin de tink bɔt na fɔ gɛt tin fɔ it. Aw wi no dat?

⁹ Notis wetin bin apin we di krawd si Jizɔs nia Kepanyɔm. Jizɔs bin tɛl dɛn se di men rizin we mek dɛn bin de luk fɔ am na fɔ gɛt tin fɔ it. I tɔk se, dɛn “it di bred dɛn ɛn bɛlful” wit “it we de pwɛl.” I bin tɛl dɛn fɔ wok fɔ “it we nɔ de pwɛl ɛn we go gi layf we go de sote go.” (Rid Jɔn 6:26, 27.) Jizɔs bin tɔk se in Papa go gi dɛn da kayn it de. We di pipul dɛn yɛri se it de we go mek dɛn gɛt layf we go de sote go, dat go mɔs dɔn mek dɛn sɔprayz! Uskayn it go mek pipul dɛn gɛt layf we go de sote go, ɛn aw di pipul dɛn we bin de lisin to Jizɔs go gɛt am?

10. Wetin di pipul dɛn bin nid fɔ du fɔ “gɛt layf we go de sote go”?

¹⁰ I tan lɛk se dɛn Ju dɛn de bin fil se dɛn nid fɔ du sɔntin ɔ wok dɛn fɔ gɛt da kayn it de. Sɔntɛm dɛn bin de tink bɔt di tin dɛn we di Lɔ we Gɔd Bin Gi Mozis bin se dɛn fɔ du. Bɔt Jizɔs bin tɛl dɛn se: “Una go du Gɔd in wok bay we una sho se una gɛt fet pan di wan we i sɛn.” (Jɔn 6:28, 29) Fɔ mek dɛn go “gɛt layf we go de sote go,” dɛn fɔ sho se dɛn gɛt fet pan di pɔsin we Gɔd sɛn. Infakt, bifo dis tɛm Jizɔs bin dɔn tɔk bɔt dat. (Jɔn 3:16-18, 36) Ɛn leta, Jizɔs bin gɛt mɔ tin dɛn fɔ se bɔt aw fɔ gɛt layf we go de sote go.​—Jɔn 17:3.

11. Aw di Ju dɛn bin sho se dɛn bin stil de pe atɛnshɔn fɔ gɛt tin fɔ it? (Sam 78:24, 25)

 ¹¹ Dɛn Ju dɛn de nɔ bin gri fɔ lisin to di nyu tin dɛn we Jizɔs bin de tich bɔt “Gɔd in wok.” Dɛn bin aks am se: “Us mirekul dɛn yu go pafɔm as sayn so dat wi go si am ɛn biliv yu?” (Jɔn 6:30) Dɛn tɔk se dɛn gret gret granpa dɛn insay Mozis in tɛm bin gɛt mana we wi go kɔmpia to bred. (Nɛi. 9:15; rid Sam 78:​24, 25.) Dis sho klia wan se na tin fɔ it nɔmɔ dɛn bin stil de pe atɛnshɔn pan. Dɛn nɔ bin ivin aks Jizɔs fɔ ɛksplen di nɛks tin we i bin tɔk bɔt “di tru tru bred we kɔmɔt na ɛvin” we bin tan lɛk mana we de gi layf we kɔmɔt na ɛvin. (Jɔn 6:32) Bikɔs dɛn bin jɔs pe atɛnshɔn fɔ gɛt tin fɔ it, dɛn nɔ bin ebul fɔ ɔndastand di tru tin dɛn we Jizɔs bin de tray fɔ tich dɛn. Wetin wi lan frɔm dis akawnt?

DI MEN TIN WE WI FƆ PE ATƐNSHƆN PAN

12. Aw Jizɔs bin sho di tin we impɔtant pas ɔl?

¹² Dis na di men lɛsin we wi lan na Jɔn chapta 6. Di men tin we wi fɔ pe atɛnshɔn pan na fɔ obe Gɔd ɛn tray fɔ gɛt tayt padi biznɛs wit am. Mɛmba se we Setan bin tɛmt Jizɔs, Jizɔs bin sho se fɔ obe Jiova impɔtant pas tin fɔ it. (Mat. 4:3, 4) Ɛn we i bin de prich ɔp wan mawntin, i bin tɔk mɔ bɔt wetin mek i impɔtant fɔ gɛt tayt padi biznɛs wit Jiova. (Mat. 5:3) So i go fayn fɔ mek wi aks wisɛf dis kwɛstyɔn, ‘Fɔ se di we aw a de liv mi layf de sho se fɔ gɛt tayt padi biznɛs wit Jiova impɔtant to mi pas fɔ gɛt di tin dɛn we a want?’

13. (a) Wetin mek i nɔ bad fɔ ɛnjɔy it? (b) Us wɔnin wi fɔ pe atɛnshɔn pan? (1 Kɔrintians 10:6, 7, 11)

¹³ I nɔ bad fɔ mek wi pre fɔ di tin dɛn we wi nid ɛn fɔ ɛnjɔy dɛn tin dɛn de. (Lyuk 11:3) We wi de wok tranga wan fɔ gɛt tin “fɔ it [ɛn] drink,” dat de mek wi gladi ɛn na “frɔm di tru Gɔd i kɔmɔt.” (Ɛkli. 2:24; 8:15; Jems 1:17) Bɔt wi fɔ tek tɛm mek di tin dɛn we wi nid nɔ bi di tin dɛn we impɔtant pas ɔl na wi layf. Apɔsul Pɔl bin tɔk bɔt dis we i bin de rayt to di Kristian dɛn. I bin tɔk bɔt di bad ɛgzampul we di Izrɛlayt dɛn sɛt we dɛn bin de na di wildanɛs ɛn wetin dɛn bin du na Mawnt Saynay. I bin wɔn Kristian dɛn fɔ mek dɛn “nɔ go want bad tin dɛn, jɔs lɛk aw [di Izrɛlayt dɛn] bin want bad tin dɛn.” (Rid 1 Kɔrintians 10:6, 7, 11.) Di Izrɛlayt dɛn bin alaw di want we dɛn bin want tin fɔ it fɔ mek ivin di tin dɛn we Jiova bin pafɔm mirekul fɔ gi dɛn tan lɛk “bad tin dɛn.” (Nɔm. 11:4-6, 31-34) Ɛn we dɛn bin de wɔship di kaw pikin we dɛn mek, dɛn bin it, drink, ɛn ɛnjɔy dɛnsɛf. (Ɛks. 32:4-6) Pɔl bin tɔk bɔt dɛn ɛgzampul fɔ wɔn di Kristian dɛn we bin de bifo di tɛm we dɛn dɔnawe wit Jerusɛlɛm insay di ia 70 afta Krays. Wisɛf de nia di tɛm we dis wɔl go dɔn, so i go fayn fɔ mek wi rili pe atɛnshɔn to Pɔl in advays.

14. Wetin di Baybul tɔk bɔt tin fɔ it insay di nyu wɔl?

¹⁴ We Jizɔs bin de tɔk bɔt “di it we wi nid fɔ dis de,” i bin tich wi bak fɔ pre fɔ mek wetin Gɔd want “bi na dis wɔl lɛk aw i de bi na ɛvin.” (Mat. 6:9-11) Wetin dat mek yu tink bɔt? Di Baybul tɔk se wan pan di tin dɛn we Gɔd want na fɔ mek fayn tin dɛn fɔ it de na di wɔl.  Akɔdin to wetin Ayzaya 25:6-8 tɔk, wi go ɛnjɔy bɔku fayn it dɛn ɔnda Jiova in Kiŋdɔm. Sam 72:16 tɔk se: “Bɔku bɔku it go de na di wɔl; ɛn dɛn go pasmak pantap di mawntin dɛn.” Yu de wet fɔ da tɛm de we yu go kuk it we yu lɛk ɔ kuk sɔntin we yu nɔ wande kuk yet? Yu go ɛnjɔy bak di tin dɛn we yu go plant na yu vayn gadin dɛn. (Ayz. 65:21, 22) Ɛn ɔlman we go de na di wɔl da tɛm de go ɛnjɔy dɛn wɔndaful tin dɛn de.

15. Wetin di wan dɛn we go gɛt layf bak go lan? (Jɔn 6:35)

¹⁵ Rid Jɔn 6:35. Wetin go apin to di wan dɛn we it di bred ɛn fish we Jizɔs bin gi dɛn? Di tɛm we pipul dɛn go gɛt layf bak, sɔntɛm yu go si sɔm pan dɛn. Ilɛksɛf dɛn nɔ bin sho se dɛn gɛt fet pan Jizɔs, sɔntɛm dɛn go gɛt layf bak. (Jɔn 5:28, 29) Dɛn pipul dɛn de go lan bɔt wetin Jizɔs bin min we i se: “Na mi na di bred we de gi layf. Ɛnibɔdi we kam to mi nɔ go angri igen, ɛn ɛnibɔdi we sho se i gɛt fet pan mi nɔ go tɔsti igen.” Dɛn go nid fɔ gɛt fet pan di prayz we Jizɔs bin pe fɔ bay wi bak ɛn biliv se i bin day fɔ dɛn. Da tɛm de, arenjmɛnt go de fɔ tich di wan dɛn we dɔn gɛt layf bak ɛn ɛni pikin we dɛn go bɔn da tɛm de bɔt Jiova ɛn wetin i want. Wi go rili gladi fɔ ɛp fɔ tich pipul dɛn da tɛm de! Di gladi-at we wi go gɛt we wi de ɛp ɔda pipul dɛn fɔ gɛt tayt padi biznɛs wit Jiova go pas di gladi-at we wi go gɛt we wi de it na di nyu wɔl.

16. Wetin wi go tɔk bɔt insay di nɛks atikul?

¹⁶ Wi dɔn tɔk smɔl bɔt di akawnt na Jɔn chapta 6, bɔt Jizɔs bin gɛt mɔ tin dɛn fɔ tich bɔt “layf we go de sote go.” Di Ju dɛn bin nid fɔ pe atɛnshɔn to wetin Jizɔs bin de tich dɛn ɛn wisɛf nid fɔ du di sem tin. Wi go kɔntinyu fɔ tɔk bɔt Jɔn chapta 6 insay di nɛks atikul.