Yu dɔn tek tɛm rid Di Wachtawa dɛn fɔ dis ia? Wɛl, si if yu go ebul ansa dɛn kwɛstyɔn dɛn ya:

Us ɛgzampul Jiova dɔn sɛt we i kam to aw fɔ trit uman dɛn?

I de trit dɛn fia wan, ɛn i nɔ lɛk man dɛn pas uman dɛn. Gɔd de lisin to uman dɛn, i bisin bɔt aw dɛn de fil, ɛn di prɔblɛm dɛn we dɛn gɛt. I biliv se dɛn go ebul fɔ du in wok.—w24.01, pej 15 ɛn 16.

Aw wi go aplay di advays we de na Ɛfishians 5:7 we se: “Una nɔ jɔyn dɛn”?

Apɔsul Pɔl bin de wɔn wi nɔ fɔ spɛn tɛm wit pipul dɛn we go mek i nɔ izi fɔ lɛ wi obe Gɔd in lɔ dɛn. Dɛn pipul dɛn de kin bi di wan dɛn we wi de si fes-to-fes ɛn di wan dɛn we wi de spɛn tɛm wit na soshal midia.—w24.03, pej 22 ɛn 23.

Uskayn lay lay stori dɛn wi nid fɔ protɛkt wisɛf agens?

Wi nid fɔ tek tɛm wit stori dɛn frɔm wi padi dɛn we dɛn nɔ chɛk fɔ no if na tru, imel dɛn frɔm pipul dɛn we wi nɔ sabi, ɛn apɔstet dɛn we de mek lɛk se dɛn rili want fɔ no bɔt wi mɛsej.—w24.04, pej 12.

Wetin na di tin dɛn we wi no ɛn di tin dɛn we wi nɔ no bɔt aw Jiova go jɔj Kiŋ Sɔlɔmɔn, di pipul dɛn we bin day na Sɔdɔm ɛn Gomɔra, ɛn di pipul dɛn we bin day pan di Flɔd?

Wi nɔ no if Jiova dɔn disayd fɔ dɔnawe wit dɛn pipul dɛn de sote go. Bɔt wi no se i no ɔltin ɛn i rili gɛt sɔri-at.—w24.05, pej 3 ɛn 4.

Bikɔs Gɔd na “di Rɔk,” us kɔnfidɛns dat de gi wi? (Dyu. 32:4)

Wi kin mek Jiova bi wi ples fɔ ayd. Wi kin abop pan am, i de du di tin dɛn we i dɔn prɔmis ɔltɛm. Ɛn i nɔ de chenj, in kwaliti dɛn ɛn di tin dɛn we i want fɔ du nɔ de chenj.—w24.06, pej 26 to 28.

Wetin go ɛp yu fɔ ajɔst we yu transfa na nyu kɔngrigeshɔn?

Abop pan Jiova, i go ɛp yu jɔs lɛk aw i bin ɛp in savant dɛn trade. Avɔyd fɔ kɔmpia yu ol kɔngrigeshɔn wit yu nyu kɔngrigeshɔn. Jɔyn yu nyu kɔngrigeshɔn fɔ du tin dɛn, ɛn tray fɔ mek nyu padi dɛn.—w24.07, pej 26 to 28.

Us lɛsin dɛn wi lan frɔm di tri parebul dɛn we de na Matyu chapta 25?

Di parebul bɔt di ship ɛn di got dɛn sho wetin mek i impɔtant fɔ mek wi kɔntinyu fɔ fetful ɛn de biɛn Jiova. Di parebul bɔt di vajin dɛn we gɛt sɛns ɛn di vajin dɛn we ful sho se i impɔtant fɔ rɛdi ɛn fɔ de wach. Di parebul bɔt di talɛnt dɛn sho se i impɔtant fɔ de wok tranga wan ɛn nɔ lezi.—w24.09, pej 20 to 24.

Wetin na bin di ayt fɔ di ɔl we bin de na Sɔlɔmɔn in tɛmpul?

Sɔm manyuskript dɛn we bin de trade trade gɛt “120 kyubit” insay 2 Kronikul 3:​4, we min se di ɔl in ayt na bin 53-mita (175-fit). Bɔt ɔda manyuskript dɛn we pipul dɛn biliv gɛt “20 kyubit” we min se in ayt na bin lɛk 9 mita (30 fit). Bikɔs ɔf di we aw di wɔl dɛn tik, i go bi se di ɔl in ayt na bin 20 kyubit.—w24.10, pej 31.

Wetin i min fɔ mek ministerial savant gɛt “wan wɛf”? (1 Tim. 3:12)

I min se na wan uman nɔmɔ i mared to ɛn i nɔ fɔ du mami ɛn dadi biznɛs wit ɔda uman. Dɔn, i nɔ fɔ ɛva mek ɔda uman dɛn fil se i want dɛn.—w24.11, pej 19.

Wetin mek wi go se di wɔd dɛn we Jizɔs tɔk na Jɔn 6:53 nɔto ɛgzampul we de sho wetin fɔ apin pan di program fɔ di Masta in Ivintɛm It?

Jɔn 6:53 tɔk se pipul dɛn fɔ it Jizɔs in bɔdi ɛn drink in blɔd. Jizɔs tɔk dɛn wɔd dɛn ya na Galili insay di ia 32 afta Krays to Ju dɛn we bin stil nid fɔ sho se dɛn gɛt fet pan am. Bɔt na lɛk wan ia leta i mek di program fɔ di Masta in Ivintɛm It na Jerusɛlɛm. Da tɛm de, Jizɔs bin de tɔk to di wan dɛn we go rul wit am na ɛvin.​—w24.12, pej 10 ɛn 11.