1. Wetin Gɔd in savant dɛn ɔl want fɔ du? Wetin mek? (Luk di pikchɔ na di frɔnt pej.)

JIZƆS KRAYS bin tɛl in disaypul dɛn fɔ “go ɔlɔbɔt na di wɔl ɛn mek di pipul dɛn bi [in] lanin bɔy dɛn.” (Mat. 28:​19) Gɔd in fetful savant dɛn ɔl want fɔ lan aw dɛn go “du ɔl wetin pɔsin we de wok fɔ Gɔd fɔ du,” dat na fɔ du di prichin wok we dɛn dɔn tɛl dɛn fɔ du. (2 Tim. 4:​5) Dis wok rili impɔtant, i gɛt mɔ valyu, ɛn i rili ɔjɛnt pas ɛni ɔda wok na layf. Bɔt i nɔ kin izi fɔ wi fɔ spɛn mɔ tɛm pan di prichin wok lɛk aw wi want.

2. Us prɔblɛm dɛn wi kin gɛt we mek i nɔ izi fɔ wi fɔ du ɔl wetin wi ebul fɔ sav Jiova?

² Ɔda impɔtant tin dɛn de we kin tek wi tɛm ɛn ɛnaji. I go bi se insay di de, wi de wok fɔ lɔng tɛm na wi wokples jɔs fɔ gɛt mɔni fɔ di tin dɛn we wi ɛn wi famili nid. I nɔ kin izi fɔ wi fɔ kia fɔ ɔl di tin dɛn we wi famili nid, ɔ sɔntɛm wi kin sik, wi at kin pwɛl ɔ wi kin gɛt prɔblɛm dɛn wit wi wɛlbɔdi bikɔs wi de ol. Aw wi go du ɔl wetin wi ebul fɔ sav Jiova as wi de bia wit dɛn kayn prɔblɛm dɛn ya?

3. Frɔm wetin Jizɔs tɔk na Matyu 13:​23, wetin sɔm pan in disaypul dɛn we de prich bɔt di Kiŋdɔm nɔ go ebul fɔ du?

³ Wi at nɔ fɔ pwɛl if wi prɔblɛm dɛn de mek wi nɔ de spɛn bɛtɛ tɛm fɔ du mɔ fɔ sav Jiova. Jizɔs bin no se nɔto wi ɔl go ebul fɔ du di sem tin pan di prichin wok. (Rid Matyu 13:​23.) Jiova rili valyu ɔl wetin wi de du wans wi de du wi bɛst. (Ibru 6:​10-12) Bɔt wi kin fil se wetin de apin to wi go mek wi gɛt chans fɔ du mɔ. Insay dis atikul, wi go tɔk bɔt aw wi go put di prichin wok fɔs na wi layf, liv simpul layf, ɛn lan aw fɔ prich ɛn tich gud gud wan.  Fɔs, wetin i min fɔ du ɔl wetin wi ebul fɔ sav Jiova wit ɔl wi at?

4. Wetin i min fɔ sav Jiova wit ɔl wi at?

⁴ Fɔ lɛ wi du ɔl wetin wi ebul fɔ sav Jiova, min se wi fɔ du ɔl wi bɛst fɔ prich ɛn tich ɔda pipul dɛn bɔt Gɔd in Kiŋdɔm. Bɔt i nɔ min di tɛm we wi de yuz fɔ prich nɔmɔ. Di rizin we mek wi de prich rili impɔtant to Jiova. Bikɔs wi lɛk Jiova ɛn wi neba dɛn, na dat mek wi de tray tranga wan fɔ du ɔl wetin wi ebul fɔ sav Am. * (Mak 12:​30, 31 NW; Kɔl. 3:​23 NW) Fɔ sav Gɔd wit ɔl wi at min fɔ du ɔl wetin wi ebul fɔ yuz wi trɛnk ɛn ɛnaji fɔ sav am. We wi no se na big big ɔnɔ wi gɛt fɔ du di prichin wok, dat go ɛp wi fɔ du ɔl wetin wi ebul fɔ tɛl bɔku pipul dɛn di gud nyuz.

5-6. Gi wan ɛgzampul bɔt aw pɔsin we nɔ gɛt bɛtɛ tɛm go put di prichin wok fɔs na in layf.

⁵ Imajin wan yɔŋman we lɛk fɔ ple futbɔl. I kin gladi fɔ ple bɔl ɛnitɛm we i gɛt di chans. As tɛm de go i jɔyn wan lokal tim. Bɔt i nɔ ebul fɔ kia fɔ insɛf wit di mɔni we i de gɛt. So i de wok na wan big shɔp frɔm Mɔnde to Frayde. Pan ɔl we i de spɛn bɔku pan in tɛm na di shɔp, in at stil de pan futbɔl. I want fɔ lan fɔ sabi aw fɔ ple bɔl gud gud wan so dat dɛn go tek am fɔ de ple bɔl ɔltɛm. Bɔt pan ɔl dat, i de ɛnjɔy fɔ ple bɔl ɛnitɛm we i gɛt di chans, ilɛk na fɔ shɔt tɛm.

⁶ Semweso, i go bi se yu nɔ gɛt bɛtɛ tɛm fɔ du di prichin wok lɛk aw yu want. Bɔt stil na dat yu lɛk fɔ du. Yu de tray tranga wan fɔ du ɔl wetin yu ebul fɔ lɛ di gud nyuz tɔch pipul dɛn at. Bikɔs yu gɛt plɛnti tin dɛn fɔ du, yu go de tink aw yu go mek di prichin wok bi di tin we impɔtant pas ɔl na yu layf.

7-8. Aw wi go falamakata Jizɔs we i kam pan di we aw wi de du di prichin wok?

⁷ Jizɔs bin sɛt di bɛst ɛgzampul we i kam pan di we aw i bin de du di prichin  wok. Di tin we bin impɔtant pas ɔl na Jizɔs in layf na fɔ tɔk bɔt Gɔd in Kiŋdɔm. (Jɔn 4:​34, 35) I bin de waka go fa fa say dɛn fɔ prich to bɔku bɔku pipul dɛn. Jizɔs bin de luk ɔltɛm fɔ we dɛn fɔ tɔk to pipul dɛn na dɛn os ɔ ɛnisay we i mit dɛn. Jizɔs bin put di prichin wok fɔs na in layf.

⁸ Wi kin falamakata Krays bay we wi de luk fɔ we dɛn fɔ tɔk to pipul dɛn bɔt di gud nyuz ɛnitɛm ɛn ɛnisay we wi mit dɛn. Wi rɛdi fɔ sakrifays ɛnitin fɔ du di prichin wok. (Mak 6:​31-34; 1 Pit. 2:​21, NW) Sɔm brɔda ɛn sista dɛn na di kɔngrigeshɔn ebul fɔ sav as spɛshal payɔnia, rɛgyula payɔnia, ɔ ɔgzilari payɔnia. Sɔm dɔn lan fɔ tɔk ɔda langwej ɔ muf go na say dɛn usay dɛn nid mɔ pɔblisha dɛn fɔ prich. Bɔt di wan dɛn we de du di prichin wok mɔ na pɔblisha dɛn we nɔ ebul fɔ payɔnia, bɔt we de stil tray fɔ du wetin dɛn ebul. Ilɛk wi de du bɔku na di prichin wok ɔ na smɔl nɔmɔ wi ebul fɔ du, Jiova nɔ de aks wi fɔ du mɔ pas wetin wi ebul fɔ du. I want wi ɔl fɔ ɛnjɔy fɔ sav am as wi de prich di “gud nyuz bɔt di Gɔd we gladi ɔltɛm.”—1 Tim. 1:​11, NW; Dit. 30:​11.

9. (a) Aw Pɔl bin put di prichin wok fɔs na in layf pan ɔl we i bin de du ɔda wok fɔ sɔpɔt insɛf? (b) Frɔm wetin wi rid na Di Apɔsul Dɛn Wok [Akt] 28:​16, 30, 31, aw Pɔl bin fil we i kam pan di we aw i bin de du di prichin wok?

⁹ Di apɔsul Pɔl bin sɛt fayn ɛgzampul bay we i bin put di prichin wok fɔs na in layf. We i bin de na Kɔrint di sɛkɔn tɛm we i bin de du in mishɔnari wok, i nɔ bin gɛt bɛtɛ mɔni ɛn i bin gɛt fɔ wok fɔ sɔm tɛm de mek tɛnt dɛn. Bɔt Pɔl nɔ bin tek di tɛnt wok as tin we impɔtant pas ɔl na in layf. I bin de du dis wok fɔ sɔpɔt insɛf pan di prichin wok so dat i go ebul fɔ prich di gud nyuz to di pipul dɛn na Kɔrint ɛn i ‘nɔ bin de aks dɛn fɔ pe am.’ (2 Kɔr. 11:​7) Pan ɔl we Pɔl bin gɛt fɔ du sɔm wok fɔ sɔpɔt insɛf, i bin kɔntinyu fɔ put di prichin wok fɔs na in layf, ɛn i bin de prich ɛni Sabat de. Afta we tin bin bɛtɛ fɔ am, Pɔl bin ebul fɔ pe mɔ atɛnshɔn pan di prichin wok. I bin de “tek ɔl in tɛm de tɛl pipul wetin Jizɔs se, ɛn ɛksplen gud se Jizɔs na di Mɛsaya.” (Akt 18:​3-5; 2 Kɔr. 11:​9) Leta, we dɛn bin arɛst Pɔl na in os insay Rome fɔ tu ia, i bin de prich to di wan dɛn we bin de kam fɛn am ɛn rayt lɛta dɛn. (Rid Akt 28:​16, 30, 31.) Pɔl bin mekɔp in maynd fɔ put di prichin wok fɔs na in layf ɛn nɔ alaw ɛnitin fɔ pul in maynd pan am. I bin rayt se: “We Gɔd dɔn . . . , gi wi dis wok ya fɔ du, wi nɔ go gri mek ɛnitin mek wi at pwɛl.” (2 Kɔr. 4:​1) Jɔs lɛk Pɔl, wisɛf kin mek di prichin wok bi di tin we impɔtant pas ɔl na wi layf ivin if wi de spɛn mɔ tɛm fɔ du ɔda wok fɔ sɔpɔt wisɛf.

10-11. Aw wi go ebul fɔ prich gud gud wan pan ɔl we wi gɛt wɛlbɔdi prɔblɛm?

¹⁰ If wi nɔ ebul fɔ go frɔm os to os fɔ prich bikɔs wi dɔn de ol ɔ wi gɛt wɛlbɔdi prɔblɛm, wi kin stil ɛnjɔy fɔ prich ɔda we dɛn. Di fɔstɛm Kristian dɛn bin de prich to pipul dɛn ɛnisay we dɛn de. Dɛn bin de prich ɛnitɛm ɛn ɛnisay we dɛn si pipul dɛn ilɛk na frɔm os to os ɔ “na ples we pipul kin gɛda.” (Akt 17:​17; 20:​20) If wi nɔ ebul fɔ waka bɛtɛ, wi kin sidɔm na say usay bɔku pipul dɛn kin de ɛn prich to di wan dɛn we de pas. Ɔ wi kin ebul fɔ prich to pipul dɛn ɔda say apat frɔm os to os, wi kin rayt lɛta, ɔ yuz fon fɔ prich to pipul dɛn. Bɔku pɔblisha dɛn we nɔ ebul  fɔ prich frɔm os to os dɔn gladi fɔ yuz dɛn we ya fɔ prich.

¹¹ Pan ɔl we wi go gɛt wɛlbɔdi prɔblɛm, wi kin stil ebul fɔ du di prichin wok gud gud wan. Tink bak bɔt di apɔsul Pɔl in ɛgzampul. I tɔk se: “A ebul fɔ du ɔltin bikɔs sɔmbɔdi de we de gi mi pawa.” (Fil. 4:​13, NW) Wantɛm, we Pɔl bin de du in mishɔnari wok, i bin sik so i bin nid da pawa de. I bin ɛksplen to di brɔda dɛn na Galeshya se: “Di fɔs tɛm we a kam to una, na di sik we a bin sik bin mek a gɛt di chans fɔ tɛl una di Gud Nyuz bɔt Jizɔs Krays.” (Gal. 4:​13) Semweso, yu wɛlbɔdi prɔblɛm kin gi yu di chans fɔ prich di gud nyuz to ɔda pipul dɛn lɛk dɔktɔ dɛn, nɔs dɛn, ɛn ɔda wan dɛn we de ɛp fɔ kia fɔ yu. Bɔku pan dɛn pipul dɛn ya kin de na dɛn wokples di tɛm we pɔblisha dɛn kin go na dɛn os fɔ prich to dɛn.

12. Wetin i min fɔ liv simpul layf?

¹² Jizɔs bin tɔk se: “Di yay tan lɛkɛ lamp na di bɔdi. If di yay dɛn gud [ɔ simpul], ɔl di bɔdi go gɛt layt.” (Mat. 6:​22) Wetin Jizɔs bin min? I bin min se wi nid fɔ liv simpul layf ɔ pe atɛnshɔn pan wi gol ɛn nɔ alaw natin fɔ pul wi maynd kɔmɔt pan am. Jizɔs insɛf bin sɛt di ɛgzampul bay we i bin pe atɛnshɔn pan di prichin wok, ɛn i bin tich in disaypul dɛn fɔ pe atɛnshɔn pan di Kiŋdɔm ɛn fɔ sav Jiova. Wi kin falamakata Jizɔs bay we wi de put di prichin wok fɔs na wi layf.—Mat. 6:​33.

13. Wetin go ɛp wi fɔ pe atɛnshɔn mɔ pan di prichin wok?

 ¹³ Wan we we wi kin pe atɛnshɔn pan di prichin wok na bay we wi de liv simpul layf so dat wi go ɛp ɔda pipul dɛn fɔ lan bɔt Jiova ɛn lɛk am. * Fɔ ɛgzampul, yu tink se yu go ebul fɔ ajɔst di tɛm we yu de spɛn fɔ du ɔda wok fɔ sɔpɔt yusɛf so dat yu go spɛn mɔ tɛm na di prichin wok insay di wik? Yu tink se yu kin ridyus di tɛm we yu de yuz fɔ ɛnjɔy yusɛf if dat de tek mɔ pan yu tɛm?

14. Aw wan brɔda ɛn in wɛf bin ajɔst dɛn tɛm so dat dɛn go spɛn mɔ tɛm fɔ prich?

¹⁴ Na dis wan ɛlda we nem Ɛlayas ɛn in wɛf bin du. Ɛlayas bin ɛksplen se: “Wi nɔ bin ebul fɔ payɔnia wantɛm wantɛm, bɔt wi bin de du tin dɛn we go mek wi spɛn mɔ tɛm pan di prichin wok. So wi bin de du smɔl smɔl tin dɛn we go mek wi spɛn mɔ tɛm fɔ prich. Fɔ ɛgzampul, wi bin stɔp fɔ de spɛn bɔku mɔni. Wi bin kam fɔ no bak se wi de spɛn bɔku tɛm fɔ ɛnjɔy wisɛf so wi bin ridyus di tɛm. Ɛn wi bin aks wi bɔsman dɛn fɔ chenj di tɛm we wi bin de wok so dat wi go gɛt mɔ tɛm fɔ prich. Dat bin mek wi ebul fɔ de prich ivintɛm, kɔndɔkt mɔ Baybul stɔdi dɛn, ɛn fɔ ivin prich insay di wik tu tɛm ɛni mɔnt. Wi rili de ɛnjɔy am!”

15-16. Frɔm wetin de na Fɔs Lɛta To Timoti 4:​13, 15, aw wi go kɔntinyu fɔ go bifo pan di prichin wok ɛn sabi prich fayn fayn wan? (Luk bak di bɔks we gɛt di taytul “ Gol dɛn we Go Ɛp Mi fɔ Du di Prichin Wok Fayn Fayn Wan.”)

¹⁵ Wan ɔda we aw wi go du di prichin wok gud gud wan na bay we wi du tin dɛn  we go mek wi sabi prich fayn wan. Pipul dɛn we kin du sɔm kayn wok dɛn kin gɛt mɔ trenin so dat dɛn go lan aw fɔ du di wok fayn fayn wan. Na di sem tin bak wit pipul dɛn we de prich bɔt di Kiŋdɔm. Wi nid fɔ kɔntinyu fɔ lan mɔ tin dɛn we go ɛp wi fɔ sabi prich gud gud wan.—Prɔv. 1:​5; rid Fɔs Lɛta To Timoti 4:​13, 15.

¹⁶ Aw wi go kɔntinyu fɔ go bifo pan di prichin wok? Na bay we wi de tek tɛm lisin to di advays dɛn we wi de gɛt na wi Layf ɛn Prichin Wok Mitin. Dis mitin kin ɛp wi fɔ gɛt fayn fayn trenin dɛn we de ɛp wi fɔ go bifo pan di prichin wok ɛn fɔ sabi prich gud gud wan. Fɔ ɛgzampul, we di chiaman de gi advays to di studɛnt dɛn we dɔn du dɛn pat na di mitin, wi kin lan tin dɛn we de ɛp wi fɔ go bifo pan di prichin wok. Wi kin fala dɛn advays dɛn de di nɛks tɛm we wi de prich di gud nyuz to pɔsin. Wi kin aks wi fil savis grup ovasia fɔ ɛp wi ɔ wok wit am na fil savis ɔ wi kin wok wit ɔda machɔ pɔblisha, payɔnia, ɔ di sakit ovasia. As wi de sabi aw fɔ yuz ɛni wan pan di tul dɛn we de na di Tichin Tulbɔks, wi go de ɛnjɔy fɔ prich ɛn tich mɔ ɛn mɔ.

17. Aw yu go fil we yu du di prichin wok fayn fayn wan?

¹⁷ Na big big ɔnɔ wi gɛt fɔ lɛ Jiova alaw wi fɔ wok wit am. (1 Kɔr. 3:​9) We yu “mek shɔ ɔf di tin dɛn we rili impɔtant” ɛn pe atɛnshɔn pan di prichin wok, yu go “gladi we yu de sav PAPA GƆD [“Jiova,” NW].” (Fil. 1:​10, NW; Sam 100:​2) As wan pan Jiova in savant dɛn, yu fɔ biliv tranga wan se i go gi yu di pawa we yu nid fɔ du mɔ pan di prichin wok ilɛk uskayn prɔblɛm dɛn yu gɛt ɔ tin dɛn we de mek yu nɔ de ebul fɔ prich mɔ. (2 Kɔr. 4:​1, 7; 6:​4) Ilɛksɛf yu gɛt mɔ tɛm fɔ prich ɔ yu nɔ gɛt bɛtɛ tɛm, yu stil “gɛt rizin fɔ gladi” we yu de du di prichin wok wit ɔl yu at. (Gal. 6:​4, NW) We yu de du di prichin wok fayn fayn wan, yu de sho se yu lɛk Jiova ɛn yu kɔmpin mɔtalman. Di Baybul se: “If yu de du [dis] ɔltɛm yu go sev yusɛf ɛn ɔl dɛn wan we de lisin to yu.”—1 Tim. 4:​16.