1. Wetin wi ɔl fɔ du?

IF YU sik ɔ yu taya, yu go want fɔ rɔn res we at fɔ rɔn? Sɔntɛm yu nɔ go want fɔ du dat. Bɔt di apɔsul Pɔl bin se ɔl Kristian dɛn de rɔn res. (Ibru 12:​1) So ilɛk wi yɔŋ ɔ wi ol, wi gɛt trɛnk ɔ wi dɔn taya, wi fɔ bia te to di ɛnd if wi want fɔ gɛt di prayz we Jiova de gi.—Mat. 24:​13.

2. Frɔm wetin de na 2 Timoti 4:​7, 8, (NWT), wetin mek Pɔl bin gɛt maynd fɔ tɔk?

² Pɔl bin gɛt maynd fɔ tɔk se “a dɔn rɔn di res dɔn.” (Rid 2 Timoti 4:​7, 8, NWT.) Bɔt us patikyula res Pɔl bin de tɔk bɔt?

3. Wetin na di res we Pɔl bin tɔk bɔt?

³ Sɔntɛnde, we Pɔl kin want fɔ tich impɔtant lɛsin dɛn, i bin de rayt bɔt sɔm tin dɛn we dɛn bin de du pan di gem dɛn na Gris. (1 Kɔr. 9:​25-27; 2 Tim. 2:​5) Bɔku tɛm, i bin de kɔmpia di we aw Kristian dɛn fɔ liv dɛn layf to rɔn res. (1 Kɔr. 9:​24; Gal. 2:​2, [NWT]; Fil. 2:​16) Pɔsin de bigin rɔn dis “res” we i gi insɛf to Jiova ɛn baptayz. (1 Pit. 3:​21) I de dɔn di res we Jiova gi am di prayz we na layf we go de sote go.—Mat. 25:​31-34, 46; 2 Tim. 4:​8, NWT.

4. Wetin wi go tɔk bɔt insay dis atikul?

⁴ Aw di we aw Kristian dɛn de liv dɛn layf fiba lɛk we pipul dɛn de rɔn lɔng res? Bɔku tin dɛn de we mek dɛn fiba. Lɛ wi tɔk bɔt tri pan dɛn. Fɔs, wi nid fɔ rɔn na di rayt len; sɛkɔn, wi fɔ pe atɛnshɔn to di say we di res de dɔn; ɛn tɔd, wi fɔ kɔntinyu fɔ rɔn ilɛksɛf wi gɛt prɔblɛm dɛn.

5. Aw wi fɔ liv wi layf? Wetin mek?

⁵ Fɔ mek di wan dɛn we de rɔn kwalifay fɔ gɛt di prayz, dɛn fɔ rɔn na di rayt len. Semweso, if wi want fɔ gɛt di prayz we na layf we go de sote go, wi fɔ liv di we aw Kristian dɛn fɔ liv. (Akt 20:​24; 1 Pit. 2:​21) Bɔt Setan ɛn di wan dɛn we de fala in ɛgzampul want wi fɔ liv difrɛn we; dɛn want mek wi “jɔyn dɛn igen fɔ liv bad layf.” (1 Pit. 4:​4) Dɛn de provok wi fɔ di we aw wi de liv ɛn dɛn de tɔk se di we aw dɛn de liv bɛtɛ pas wi, bikɔs i de mek dɛn gɛt fridɔm. Bɔt na lay dɛn de lay.—2 Pit. 2:​19.

6. Wetin wi lan frɔm Brayan in ɛgzampul?

⁶ Ɛnibɔdi we de liv in layf lɛk pipul dɛn na Setan in wɔl kin kam fɔ si se da layf de we i disayd fɔ liv nɔ de mek i fri, bifo dat i de mek i bi slev. (Rom 6:​16) Tink bɔt Brayan in ɛgzampul. In mama ɛn papa bin ɛnkɔrej am fɔ liv in layf lɛk Kristian. Bɔt we i bin de arawnd 13 to 19 ia, i nɔ bin shɔ se da layf de go mek i gladi. So Brayan bin disayd fɔ liv lɛk pipul dɛn na Setan in wɔl. I bin se: “A nɔ bin no se di fridɔm we a bin want go mek a ɛnd-ɔp fɔ du bad bad tin dɛn. As tɛm de go, a bigin fɔ tek drɔgs, drink rɔm, ɛn liv fri layf. Afta sɔm tɛm, a bin bigin fɔ tek dɛn strɔng strɔng drɔgs dɛn ɛn a bin bi slev to bɔku pan dɛn. . . . A bin bigin fɔ sɛl drɔgs dɛn fɔ mek a gɛt mɔni fɔ de sɔpɔt misɛf.” Smɔl smɔl, Brayan bin disayd fɔ liv in layf di we aw Jiova want. I bin chenj ɛn i baptayz insay 2001. I rili gladi naw we i de liv in layf lɛk Kristian. *

7. Akɔdin to Matyu 7:​13, 14, (NWT), us tu rod dɛn de bifo wi?

⁷ I rili impɔtant fɔ mek wi disayd fɔ waka na di rayt rod. Setan want lɛ wi ɔl lɛf fɔ rɔn na di smɔl rod we “go mek pɔsin ɛnd-ɔp fɔ gɛt layf,” bɔt i want mek wi waka na di big rod usay bɔku pipul dɛn na di wɔl de waka. Bɔku pipul dɛn sabi da rod de ɛn i izi fɔ waka de. Bɔt i “go mek pɔsin ɛnd-ɔp fɔ day.” (Rid Matyu 7:​13, 14, NWT.) Fɔ mek wi go kɔntinyu fɔ waka na di rayt rod ɛn nɔ alaw natin fɔ pul wi de, wi fɔ abop pan Jiova ɛn lisin to am.

8. If pɔsin we de rɔn fɔdɔm, wetin i fɔ du?

⁸ Di wan dɛn we de rɔn pan lɔng res kin de wach di rod we de bifo dɛn fɔ  mek natin nɔ mek dɛn fɔdɔm. Bɔt stil sɔntɛnde, dɛn kɔmpin we dɛn ɔl de rɔn go mek dɛn fɔdɔm, ɔ sɔntɛm dɛn mas sɔntin we go mek dɛn fɔdɔm. If dɛn fɔdɔm, dɛn kin grap bak ɛn kɔntinyu fɔ rɔn. Dɛn nɔ kin pe atɛnshɔn pan di tin we kin mek dɛn fɔdɔm, bɔt dɛn de pe atɛnshɔn to di say we di res fɔ dɔn ɛn di prayz we dɛn go win.

9. Wetin wi fɔ du if sɔntin ambɔg wi we wi de rɔn?

⁹ Insay di res we wi de rɔn, wi kin fɔdɔm bɔku tɛm bay we wi de mek mistek dɛn pan wetin wi de tɔk ɔ wetin wi de du. Ɔ wi kɔmpin dɛn we wi ɔl de rɔn kin du tin dɛn we kin mek wi fil bad. Wi nɔ fɔ sɔprayz if dat apin. Wi ɔl nɔ pafɛkt, ɛn wi ɔl de rɔn na di sem smɔl rod fɔ mek wi gɛt layf. So wi go mɔs “jam” wisɛf wan wantɛm. Pɔl bin tɔk se sɔntɛnde wi kin mek ɔda pipul dɛn gɛt ‘rizin fɔ vɛks.’ (Kol. 3:​13) Bɔt wi nɔ fɔ pe atɛnshɔn pan di tin we mek wi fɔdɔm, bifo dat wi fɔ pe atɛnshɔn pan di prayz we de bifo wi. If wi fɔdɔm lɛ wi grap bak ɛn kɔntinyu fɔ rɔn. If wi vɛks ɛn wi nɔ kɔntinyu fɔ rɔn, wi nɔ go krɔs di layn usay di res fɔ dɔn ɛn wi nɔ go win di prayz. Apat frɔm dat, i go bi se na wi go ambɔg ɔda pipul dɛn we de tray fɔ rɔn na di smɔl rod fɔ gɛt layf.

10. Wetin wi go du fɔ mek wi nɔ “tan lɛk ston” we de mek wi brɔda ɛn sista dɛn fɔdɔm?

¹⁰ Wan ɔda we we wi go avɔyd fɔ “tan lɛk ston” we de mek wi brɔda ɛn sista dɛn fɔdɔm, na we wi alaw dɛn fɔ du wetin dɛn want ɛn nɔ fos dɛn fɔ du wetin wi want. (Rom 14:​13, 19-21; 1 Kɔr. 8:​9, 13, NWT) If wi du dat i go mek wi nɔ tan lɛk pipul dɛn we de rɔn pan kɔmpitishɔn. Bikɔs dɛn de rɔn agens dɛnsɛf ɛn ɛni wan pan dɛn de fɛt fɔ gɛt di prayz fɔ insɛf. Dɛn jɔs de tink bɔt wetin go ɛp dɛn fɔ win di res. So dɛn go de tray fɔ push dɛn kɔmpin dɛn fɔ lɛ dɛn rɔn go bifo. Bɔt wi nɔ de pan kɔmpitishɔn. (Gal. 5:​26; 6:​4) Di men tin we wi de pe atɛnshɔn pan na fɔ ɛp bɔku pipul dɛn fɔ jɔyn wi fɔ krɔs di layn usay di res de dɔn ɛn gɛt di prayz we na  layf we go de sote go. So wi de tray fɔ fala Pɔl in advays we i bin se, “una nɔ fɔ jɛs de mɛmba unasɛf nɔmɔ, una fɔ de mɛmba ɔda pipul.”—Fil. 2:​4.

11. Wetin pɔsin we de rɔn kin pe atɛnshɔn pan? Wetin mek?

¹¹ Pipul dɛn we de rɔn de luk di rod we de bifo dɛn, apat frɔm dat dɛn kin pe atɛnshɔn bak to di say we di res fɔ dɔn. Ilɛksɛf dɛn nɔ de si usay di res fɔ dɔn, dɛn go de imajin se dɛn dɔn krɔs di say usay di res fɔ dɔn, ɛn dɛn de gi dɛn di prayz. As dɛn de tink bɔt di prayz, dat de mek dɛn kɔntinyu fɔ gɛt zil.

12. Wetin Jiova dɔn prɔmis wi?

¹² If wi dɔn di res we wi de rɔn, Jiova dɔn prɔmis fɔ gi wi wan fayn prayz we na layf we go sote go na ɛvin ɔ na dis wɔl. Di Baybul tɔk bɔt di prayz, so dat wi go ebul fɔ imajin aw wi layf go tan lɛk. Di mɔ we wi de tink bɔt wetin Jiova dɔn prɔmis wi tumara bambay, dat go mek wi kɔntinyu fɔ gɛt zil ɛn nɔ alaw ɛnitin fɔ mek wi fɔdɔm ɛn nɔ grap igen.

13. Wetin wi gɛt we ɔda rɔnman dɛn nɔ gɛt?

¹³ Di rɔnman dɛn pan di Grik gem dɛn bin nid fɔ bia wit prɔblɛm dɛn, lɛk we dɛn taya ɛn we dɛn gɛt pen. Bɔt dɛn bin nid fɔ abop pan dɛn trenin ɛn di trɛnk we dɛn gɛt. Wi fiba lɛk dɛn rɔnman dɛn de, bikɔs wisɛf de gɛt trenin fɔ di res we wi de rɔn. Bɔt wi pas di ɔda rɔnman dɛn, bikɔs Jiova de gi wi trɛnk ɛn i nɔ gɛt say usay in pawa stɔp. If wi abop pan Jiova, i dɔn prɔmis se i nɔ go jɔs tren wi bɔt i go mek wi strɔng.—1 Pit. 5:​10.

14. Aw Sɛkɛn Lɛta Fɔ Kɔrint 12:​9, 10 de ɛp wi fɔ bia wit wi prɔblɛm dɛn?

¹⁴ Pɔl bin gɛt fɔ bia wit bɔku tin dɛn we nɔ izi. Apat frɔm we dɛn bin de tɔk bad bɔt am ɛn mek i sɔfa, sɔntɛnde i bin de fil wik ɛn i bin gɛt fɔ bia wit wetin i kɔl “chukchuk na [in] bɔdi.” (2 Kɔr. 12:​7, NWT) I nɔ bin si dɛn tin dɛn de as rizin fɔ mek i lɛf fɔ sav Jiova, bifo dat i bin si am as chans fɔ abop pan am. (Rid Sɛkɛn Lɛta Fɔ Kɔrint 12:​9, 10.) Bikɔs Pɔl bin de abop pan Jiova, i bin ɛp am pan ɔl in prɔblɛm dɛn.

15. Wetin go apin if wi falamakata Pɔl?

¹⁵ Sɔntɛm, dɛn go tɛl wi bad wɔd ɔ mek wi sɔfa bikɔs ɔf wetin wi biliv. I go bi bak se wi gɛt fɔ bia bikɔs wi nɔ gɛt bɛtɛ wɛlbɔdi ɔ wi taya. Bɔt if wi falamakata Pɔl, wi go si ɛni wan pan dɛn prɔblɛm dɛn de as chans fɔ si di we aw Jiova de sɔpɔt wi.

16. Wetin yu go du if yu nɔ gɛt bɛtɛ wɛlbɔdi?

¹⁶ Yu ledɔm na bed, ɔ yu sidɔm na wilchia? Yu ni dɛn de at, ɔ yu gɛt yay prɔblɛm? If na so i bi, yu tink se yu go ebul fɔ rɔn wit di wan dɛn we yɔŋ ɛn di wan dɛn we gɛt wɛlbɔdi? Yɛs, yu go ebul! Bɔku brɔda ɛn sista dɛn we dɔn ol ɛn we nɔ gɛt bɛtɛ wɛlbɔdi de rɔn na di rod fɔ layf. Dɛn nɔ go ebul fɔ du dis wok wit dɛn yon trɛnk. Bɔt dɛn de gɛt trɛnk frɔm Jiova bay we dɛn de lisin to mitin pat dɛn we dɛn bin dɔn rɔd fɔ dɛn. Ɛn dɛn de du di prichin wok bay we dɛn de tɔk to dɔktɔ dɛn, nɔs dɛn, ɛn dɛn fambul dɛn.

17. Aw Jiova de fil bɔt di wan dɛn we nɔ gɛt bɛtɛ wɛlbɔdi?

¹⁷ Lɛ yu at nɔ pwɛl if yu nɔ ebul du ɔl wetin yu want fɔ du fɔ Jiova, ɛn nɔ fil  se yu nɔ go ebul fɔ bia te dis wɔl dɔn. Jiova lɛk yu bikɔs ɔf ɔl di tin dɛn we yu dɔn du fɔ am ɛn bikɔs yu gɛt fet pan am. Yu nid am fɔ ɛp yu naw pas ɛni ɔda tɛm, ɛn i nɔ go lɛf yu. (Sam 9:​10) Bifo dat, i go kɔntinyu fɔ kam nia yu. Notis wetin wan sista we nɔ bin gɛt bɛtɛ wɛlbɔdi bin se: “As mi bɔdi de mɔna mi, a bin kam fɔ notis se a nɔ bin de gɛt bɛtɛ chans fɔ tɔk to ɔda pipul dɛn bɔt di Baybul. Bɔt a no se ivin di smɔl we a de du de mek Jiova gladi ɛn i de mek misɛf gladi.” We yu at pwɛl, mɛmba se nɔto yu wan de. Tink bɔt Pɔl in ɛgzampul ɛn tink bɔt di fayn wɔd dɛn we i bin tɔk we i se: “A kin gladi we a kin wik, . . . we a kin wik, na da tɛm de a kin pawaful.”—2 Kɔr. 12:​10, NWT.

18. Wetin nɔ kin rili izi fɔ sɔm brɔda ɛn sista dɛn?

¹⁸ Sɔm ɔda wan dɛn we de rɔn na di res fɔ layf gɛt ɔda prɔblɛm. Dɛn gɛt prɔblɛm dɛn we ɔda pipul dɛn nɔ de si ɛn nɔ kin ɔndastand. Fɔ ɛgzampul, dɛn gɛt fɔ bia we dɛn at pwɛl pasmak ɔ we dɛn gɛt tin dɛn we de mek dɛn wɔri. Wetin mek tin nɔ kin rili izi fɔ dɛn kayn brɔda ɛn sista dɛn ya? Na bikɔs we pɔsin in an brok ɔ i sidɔm na wilchia, ɔlman de si am ɛn dɛn go want fɔ ɛp am. Bɔt di wan dɛn we gɛt fɔ bia wit di we aw dɛn de fil ɔ we gɛt ed prɔblɛm nɔ kin luk lɛk pipul dɛn we de sɔfa. Bɔt dɛn de fil di sem we jɔs lɛk aw di wan dɛn we dɛn an ɔ dɛn fut brok, de fil. Bɔt bikɔs ɔda pipul dɛn nɔ de si di we aw dɛn de fil dat kin mek dɛn nɔ sho dɛn lɔv ɛn kia fɔ dɛn.

19. Wetin wi lan frɔm Mɛfiboshɛt in ɛgzampul?

¹⁹ If yu na pɔsin we nɔ ebul fɔ du ɔl wetin yu want fɔ du ɛn yu fil se ɔda pipul dɛn nɔ ɔndastand yu, Mɛfiboshɛt in ɛgzampul go ɛnkɔrej yu. (2 Sam. 4:​4) Mɛfiboshɛt nɔ bin ebul fɔ waka, ɛn Kiŋ Devid nɔ bin tink di rayt we bɔt am. Nɔto Mɛfiboshɛt bin mek dɛn prɔblɛm dɛn de apin to am. Bɔt in at nɔ bin pwɛl fɔ dat; i bin gladi fɔ di fayn tin dɛn we bin dɔn apin na in layf. I bin gladi fɔ ɔl di gud tin dɛn we Devid bin dɔn du fɔ am. (2 Sam. 9:​6-10) So we Devid nɔ bin tink di rayt we bɔt am, Mɛfiboshɛt bin ɔndastand ɔl wetin bin apin. I nɔ bin alaw Devid in mistek fɔ mek i fil bad. Ɛn i nɔ bin blem Jiova fɔ wetin Devid bin du. Mɛfiboshɛt bin pe atɛnshɔn pan wetin i go du fɔ sɔpɔt di kiŋ we Jiova dɔn  pik. (2 Sam. 16:​1-4; 19:​24-30) Jiova bin mek dɛn rayt Mɛfiboshɛt in fayn ɛgzampul na di Baybul, so dat wi go lan frɔm am.—Rom. 15:​4.

20. Aw wɔri kin afɛkt sɔm pipul dɛn? Bɔt wetin dɛn fɔ shɔ bɔt?

²⁰ Bikɔs sɔm brɔda ɛn sista dɛn kin gɛt tin dɛn we kin mek dɛn wɔri, dat dɔn mek sɔm pan dɛn de fred ɛn de tink bɔt wetin de apin to dɛn. I nɔ kin izi fɔ dɛn fɔ de wit bɔku pipul dɛn, bɔt dɛn kin kɔntinyu fɔ atɛnd di mitin dɛn, asɛmbli dɛn, ɛn kɔnvɛnshɔn dɛn. I nɔ kin izi fɔ dɛn bak fɔ tɔk to strenja dɛn, bɔt dɛn kin tɔk to ɔda pipul dɛn we dɛn de prich. If na dat de apin to yu, no se nɔto yu wangren dat de apin to. Bɔku ɔda pipul dɛn de fil di sem we lɛk yu. Mɛmba se Jiova gladi fɔ di tray we yu de tray tanga wan fɔ sav am. Di giv-ɔp we yu nɔ giv-ɔp de sho se i de blɛs yu ɛn i de gi yu di trɛnk we yu nid.  * (Fil. 4:​6, 7; 1 Pit. 5:​7) If yu de sav Jiova pan ɔl we yu de bia wit wɛlbɔdi prɔblɛm ɔ yu na pɔsin we nɔ ebul fɔ du ɔl wetin yu want fɔ du, na fɔ no se Jiova gladi fɔ wetin yu ebul fɔ du.

21. Wetin Jiova go ɛp wi ɔl ebul fɔ du?

²¹ Wi gladi fɔ no se difrɛns de bitwin di res we pipul dɛn kin rɔn ɛn di wan we Pɔl bin tɔk bɔt. Di res we pipul dɛn bin de rɔn insay di tɛm we dɛn bin de rayt di Baybul, na wangren pɔsin bin de win di prayz. Bɔt ɛnibɔdi we bia fɔ rɔn di res we Kristian dɛn de rɔn, go gɛt di prayz we na layf we go de sote go. (Jɔn 3:​16) Ɔl di wan dɛn we de rɔn pan res fɔ rili gɛt wɛlbɔdi, if nɔto dat dɛn nɔ go ebul fɔ win di res. Bɔt bɔku pan wi nɔ gɛt bɛtɛ wɛlbɔdi, bɔt wi de bia. (2 Kɔr. 4:​16) Wi ɔl go dɔn fɔ rɔn di res, wans na Jiova de ɛp wi!