Wetin mek jɔs bifo Jizɔs day, i kot di wɔd dɛn we Devid tɔk na Sam 22:​1?

Jɔs bifo Jizɔs day, i bin tɔk di wɔd dɛn we de na Matyu 27:​46. I se: “Mi Gɔd, mi Gɔd, wetin mek yu dɔn lɛf mi?” We Jizɔs tɔk dɛn wɔd dɛn ya, i bin de mek di tin we Devid tɔk na Sam 22:​1 kam tru. (Mak 15:​34) I nɔ go kɔrɛkt fɔ lɛ wi se Jizɔs kot dɛn wɔd dɛn de bikɔs in at bin pwɛl ɔ i bin dɔn stɔp fɔ gɛt fet pan Gɔd fɔ sɔm tɛm. Jizɔs bin rili ɔndastand di rizin we mek i fɔ day, ɛn i bin rɛdi fɔ du am. (Mat. 16:​21; 20:​28) Dɔn bak, i bin no se di tɛm we i de day, Jiova go nid fɔ stɔp fɔ protɛkt am. (Job 1:​10) Jiova bin du dat so dat Jizɔs go pruv se i go kɔntinyu fɔ sav am fetful wan ilɛk uskayn we i go sɔfa bifo i day.—Mak 14:​35, 36.

So wetin mek Jizɔs bin tɔk di wɔd dɛn we de na dis sam? Pan ɔl we wi nɔ shɔ, lɛ wi tɔk bɔt sɔm rizin dɛn we go dɔn mek Jizɔs tɔk dɛn wɔd dɛn de. *

We Jizɔs tɔk dɛn wɔd dɛn ya, i go bi se i bin de tray fɔ sho se Jiova nɔ go stɔp am fɔ mek i nɔ day. Jizɔs bin nid fɔ pe di prayz fɔ fri mɔtalman, ɛn Jiova nɔ bin ɛp am. In na bin mɔtalman, ɛn i bin nid fɔ day so dat i go “tes day fɔ ɔlman.”—Ibru. 2:​9.

We Jizɔs kot dis vas we de na dis sam, i go bi se i bin want lɛ ɔda pipul dɛn tink bɔt wetin di wan ol sam se. Trade, i bin  kɔmɔn fɔ lɛ Ju pipul dɛn kram bɔku pan di sam dɛn. So we dɛn yɛri wan vas we kɔmɔt na wan sam, i go izi fɔ lɛ dɛn tink bɔt wetin di wan ol sam se. If na dat Jizɔs bin want fɔ du, dat min se i go dɔn ɛp in disaypul dɛn we na Ju fɔ mɛmba di prɔfɛsi dɛn we de na dis sam, we tɔk bɔt di tin dɛn we go apin bifo i day. (Sam. 22:​7, 8, 15, 16, 18, 24) Dɔn bak, di las vas dɛn na di sam prez Jiova, ɛn i tɔk se in na di Kiŋ we de oba di wan ol wɔl.—Sam 22:​27-31.

I go bi se Jizɔs kot dɛn wɔd ya we Devid tɔk fɔ sho se i inosɛnt. Jɔs bifo Jizɔs day, di Sanɛndrin bin mek wan kɔt kes agens am we dɛn nɔ bin gɛt rayt fɔ mek, ɛn dɛn bin se di kraym we i gilti fɔ na we i de tɔk bad bɔt Gɔd. (Mat. 26:​65, 66) Na let na nɛt dɛn bin gɛda fɔ tɔk da kes de kwik kwik wan, ɛn dɛn nɔ bin du am akɔdin to wetin di lɔ se. (Mat. 26:​59; Mak 14:​56-59) So we Jizɔs bin se, “Mi Gɔd, mi Gɔd, wetin mek yu dɔn lɛf mi?” i go bi se i bin de tray fɔ tɔk se i nɔ du ɛni bad tin we fɔ mek dɛn kil am.

I go bi se Jizɔs bin de mɛmba pipul dɛn se pan ɔl we Jiova bin alaw Devid we na di man we rayt dis sam fɔ sɔfa, i nɔ min se Jiova nɔ bin gladi wit Devid igen. Dis kwɛstyɔn we Devid aks nɔ min se i nɔ bin gɛt fet pan Gɔd igen. Afta we i aks di kwɛstyɔn, i bin tɔk se i biliv tranga wan se Jiova ebul sev in pipul dɛn, ɛn Jiova bin kɔntinyu fɔ blɛs am. (Sam. 22:​23, 24, 27) Semweso, pan ɔl we Jizɔs we na “Devid in Pikin” bin sɔfa na di tik we dɛn nel am, dat nɔ min se Jiova nɔ bin gladi wit Jizɔs igen.—Mat. 21:​9.

I go bi se Jizɔs bin de tɔk bɔt aw i rili fil am we Jiova stɔp fɔ protɛkt am so dat i go pruv se i de waka tret wan wit Gɔd. Jiova nɔ bin ɛva want fɔ lɛ in Pikin sɔfa ɛn day, bɔt Jizɔs bin gɛt fɔ du dat afta we Adam ɛn Iv tɔn dɛn bak pan Jiova. Jizɔs nɔ bin du ɛni bad tin, bɔt i bin nid fɔ sɔfa ɛn day so dat i go ansa di kwɛstyɔn dɛn we Setan bin dɔn aks, ɛn i go pe di prayz fɔ bay bak wetin mɔtalman bin dɔn lɔs. (Mak 8:​31; 1 Pit. 2:​21-24) Di wangren tin we go mek Jizɔs ebul fɔ du dis na we Jiova stɔp fɔ protɛkt am fɔ di fɔs tɛm na in layf.

I go bi se Jizɔs bin de tray fɔ ɛp in disaypul dɛn fɔ pe atɛnshɔn pan di rizin we mek Jiova alaw am fɔ day da kayn we de. * Jizɔs bin no se we i day as kriminal pan tik we i sɔfa pan, dat go mek bɔku pipul dɛn lɛf fɔ put fet pan am. (1 Kɔr. 1:​23) If in disaypul dɛn pe atɛnshɔn pan di rial rizin we mek i day, dɛn go ɔndastand wetin mek i bin rili impɔtant fɔ lɛ i day. (Gal. 3:​13, 14) Ɛn we dɛn ɔndastand dat, dɛn go kam fɔ si se i nɔ day bikɔs in na kriminal, bɔt na fɔ sev dɛn.

Ilɛk wetin na di rizin we mek Jizɔs kot dɛn wɔd dɛn de, i bin no se di day we i day pan tik we i sɔfa pan bin mek i du wetin Gɔd want am fɔ du. Jɔs afta we Jizɔs kot dis sam, i bin se: “I dɔn dɔn.” (Jɔn 19:​30; Lyuk 22:​37) Bikɔs Jiova bin stɔp fɔ protɛkt Jizɔs fɔ sɔm tɛm, dat bin mek Jizɔs du ɔl wetin Jiova bin sɛn am fɔ kam du na dis wɔl. Dɔn bak, i bin mek i ebul fɔ du ɔl wetin dɛn rayt bɔt am “na Mozis in Lɔ ɛn di Prɔfɛt dɛn ɛn na di Sam dɛn.”—Lyuk 24:​44.