1-2. Wetin bin apin bifo Jizɔs tɔk in las wɔd dɛn?

NA BIN Naysan 14 insay di ia 33. Dɛn bin lay pan Jizɔs ɛn jɔj am se i gilti fɔ kraym we i nɔ kɔmit. Afta dat, dɛn bin stat fɔ provok am, du bad tin dɛn to am, ɛn dɛn nel am na di tik we i sɔfa pan. Dɛn bin dɔn nel in an ɛn in fut dɛn, so i bin de fil pen ɛnitɛm we i blo ɛn ɛnitɛm we i tɔk. Bɔt i jɔs gɛt fɔ tɔk, bikɔs i gɛt impɔtant tin dɛn fɔ se.

² Lɛ wi tɔk bɔt di tin dɛn we Jizɔs bin tɔk we i bin de day na di tik we i sɔfa pan, ɛn lɛ wi si di lɛsin dɛn we wi kin lan frɔm dɛn tin dɛn de. So, lɛ wi “lisin to am.”—Mat. 17:​5.

3. Udat dɛn i go mɔs bi se Jizɔs bin de tɔk bɔt we i bin se: “Papa, fɔgiv dɛn”?

³ Wetin Jizɔs bin se? Afta we dɛn bin dɔn nel Jizɔs na di tik we i sɔfa pan, i bin pre to in Papa ɛn se: “Papa, fɔgiv dɛn.” Udat dɛn Jizɔs bin want lɛ in Papa fɔgiv? Di nɛks wɔd dɛn we Jizɔs tɔk ɛp wi fɔ no udat dɛn i bin de tɔk bɔt. I bin se: “Dɛn nɔ no wetin dɛn de du.” (Lyuk 23:​33, 34) I go mɔs bi se Jizɔs bin de tɔk bɔt di Roman sojaman dɛn we bin nel in an ɛn in fut dɛn. Dɛn sojaman dɛn de nɔ bin no udat i rili bi. I go bi bak se i bin de tink bɔt sɔm pan di pipul dɛn we bin dɔn se dɛn fɔ kil am, bɔt we go leta sho se dɛn gɛt fet pan am. (Akt 2:​36-38) Jizɔs nɔ bin alaw di sɔfa we dɛn mek i sɔfa fɔ mek i vɛks ɔ kip grɔj na in at fɔ dɛn. (1 Pit. 2:​23) Bifo dat, i aks Jiova lɛ i fɔgiv di wan dɛn we kil am.

4. Wetin wi go lan frɔm di we aw Jizɔs bin rɛdi fɔ fɔgiv di wan dɛn we de agens am?

 ⁴ Wetin wi go lan frɔm di wɔd dɛn we Jizɔs tɔk? Lɛk Jizɔs, wisɛf fɔ rɛdi fɔ fɔgiv ɔda pipul dɛn. (Kol. 3:​13) Sɔntɛm, wi fambul dɛn ɛn ɔda pipul dɛn go de agens wi bikɔs dɛn nɔ ɔndastand di tin dɛn we wi biliv ɛn di we aw wi de liv wi layf. I go bi se dɛn go lay pan wi, molɛs wi bifo ɔda pipul dɛn, pwɛl pwɛl wi buk ɛn magazin dɛn, ɔ ivin trɛtin wi se dɛn go du wi bad. Bifo wi kip grɔj na wi at fɔ di wan dɛn we de agens wi, wi kin beg Jiova lɛ i ɛp dɛn so dat dɛnsɛf go lan di tru bɔt am. (Mat. 5:​44, 45) Sɔntɛnde, i nɔ kin izi fɔ lɛ wi fɔgiv dɛn, mɔ if i bi se dɛn dɔn du bad bad tin dɛn to wi. Bɔt if wi alaw wisɛf fɔ vɛks ɛn kip grɔj na wi at, wi go de ambɔg wisɛf. Wan sista bin se: “A dɔn kam fɔ no se a nɔ de fɔgiv ɔda pipul dɛn bikɔs a fil se wetin dɛn du kɔrɛkt, ɔ a de alaw dɛn fɔ tek advantej pan mi. A de fɔgiv dɛn bikɔs a dɔn disayd se a nɔ go kip grɔj na mi at.” (Sam 37:​8) We wi disayd se wi go fɔgiv ɔda pipul dɛn, i min se wi nɔ de alaw di bad tin dɛn we apin to wi fɔ mek wi kɔntinyu fɔ fil bad ɛn vɛks.—Ɛfi. 4:​31, 32.

5. Wetin Jizɔs bin prɔmis wan pan di kriminal dɛn we dɛn bin kil nia am? Wetin mek i mek da prɔmis de?

⁵ Wetin Jizɔs bin se? Di tɛm we dɛn bin nel Jizɔs pan di tik we i sɔfa pan, ɔda tu kriminal dɛn bin de de wit am. Fɔs, dɛn ɔl tu bin jɔyn fɔ provok am. (Mat. 27:​44) Bɔt leta, wan pan dɛn bin lɛf fɔ provok am. I bin kam fɔ si se Jizɔs nɔ bin du “ɛni bad tin.” (Lyuk 23:​40, 41) Dɔn bak, i bin kam fɔ biliv se Jizɔs go gɛt layf bak, ɛn i go rul as kiŋ wan de. I tɛl am se: “Jizɔs, mɛmba mi we yu go na yu Kiŋdɔm.” (Lyuk 23:​42) Dis man bin rili sho se i gɛt fet. Jizɔs ansa ɛn se: “Fɔ tru, a de tɛl yu tide se yu go de wit mi [nɔto di Kiŋdɔm, bɔt] na Paradays.” (Lyuk 23:​43) We Jizɔs bin de mek dis prɔmis, i bin de tɔk to di man insɛf sɛf bay we i yuz wɔd dɛn lɛk “a,” “yu,” ɛn “mi.” Bikɔs Jizɔs no se in Papa gɛt sɔri-at, i bin tɔk wɔd dɛn we gi op to dis kriminal we de day.—Sam 103:​8.

6. Wetin wi lan frɔm di wɔd dɛn we Jizɔs bin tɛl di kriminal?

⁶ Wetin wi go lan frɔm di wɔd dɛn we Jizɔs tɔk? Jizɔs rili fiba in Papa. (Ibru. 1:​3) Jiova rili want fɔ fɔgiv wi ɛn sho wi sɔri-at. Bɔt if wi want fɔ lɛ i du dat, wi fɔ sho se wi rili sɔri fɔ di bad tin dɛn we wi bin dɔn du trade, ɛn wi fɔ rili sho se wi gɛt fet pan Jizɔs Krays in sakrifays. (1 Jɔn 1:​7) I at fɔ lɛ sɔm pipul dɛn biliv se Jiova go fɔgiv dɛn fɔ di mistek dɛn we dɛn bin dɔn mek trade. If na so yu kin fil, mɛmba se jɔs bifo Jizɔs day, i sho sɔri-at to di kriminal we jɔs bigin sho fet pan am. If Jiova sho sɔri-at fɔ da kriminal de, yu nɔ tink se i go sho sɔri-at fɔ in savant dɛn we de tray dɛn bɛst fɔ obe am?—Sam 51:​1; 1 Jɔn 2:​1, 2.

7. Akɔdin to Jɔn 19:​26, 27, wetin Jizɔs bin tɛl Meri ɛn Jɔn? Wetin mek i tɔk dɛn wɔd dɛn ya?

⁷ Wetin Jizɔs bin se? (Rid Jɔn 19:​26, 27.) Jizɔs bin bisin bɔt in mama, ɛn i go mɔs bi se in mama in man bin dɔn day da tɛm de. Sɔntɛm in brɔda ɛn sista dɛn go ebul fɔ gi Meri tin fɔ it, say fɔ de, klos fɔ wɛr, ɛn ɔda tin dɛn we i nid. Bɔt udat go  ɛp am fɔ kɔntinyu fɔ gɛt tayt padi biznɛs wit Jiova? Natin nɔ de we sho wi se in brɔda dɛn bin dɔn bi in disaypul dɛn bay da tɛm de. Bɔt, Jɔn na bin fetful apɔsul ɛn wan pan Jizɔs in tayt padi dɛn. Ɛn Jizɔs bin de si di wan dɛn we dɛn ɔl bin de wɔship Jiova as in famili. (Mat. 12:​46-50) So bikɔs Jizɔs lɛk Meri ɛn i bisin bɔt am, i bin tɛl Jɔn fɔ kia fɔ Meri. I du dis bikɔs i no se Jɔn go ebul ɛp Meri fɔ kɔntinyu fɔ gɛt tayt padi biznɛs wit Jiova. Jizɔs bin tɛl in mama se: “Luk yu pikin!” Ɛn i tɛl Jɔn se: “Luk yu mama!” So frɔm da de de, Jɔn bin tan lɛk pikin to Meri, ɛn i bin de kia fɔ Meri lɛk se in na in mama. Jizɔs bin sho se i rili lɛk  Meri we bin dɔn kia fɔ am frɔm we i bɔn ɛn we bin tinap nia am we i de day.

8. Wetin wi go lan frɔm di wɔd dɛn we Jizɔs bin tɔk to Meri ɛn Jɔn?

⁸ Wetin wi go lan frɔm di wɔd dɛn we Jizɔs tɔk? Di padi biznɛs we wi gɛt wit wi Kristian brɔda ɛn sista dɛn kin tayt pas di wan we wi kin gɛt wit wi fambul dɛn. Sɔntɛm wi fambul dɛn go de agens wi, ɔ dɛn go ivin se dɛn nɔ want natin fɔ du wit wi. Bɔt jɔs lɛk aw Jizɔs bin prɔmis, we wi kɔntinyu fɔ de nia Jiova ɛn In ɔganayzeshɔn, wi go gɛt di tin dɛn we wi dɔn lɔs “pas 100 tɛm.” Wi go gɛt bɔku pipul dɛn we go bi wi bɔypikin dɛn, wi galpikin dɛn, wi mama, ɔ wi papa dɛn we wi lɛk. (Mak 10:​29, 30) Aw yu de fil we yu si se yu gɛt brɔda ɛn sista dɛn na di kɔngrigeshɔn we gɛt wanwɔd bikɔs dɛn gɛt fet ɛn lɔv fɔ Jiova ɛn dɛn kɔmpin dɛn?—Kol. 3:​14; 1 Pit. 2:​17.

9. Wetin wi go lan frɔm di wɔd dɛn we Jizɔs tɔk na Matyu 27:​46?

⁹ Wetin Jizɔs bin se? Shɔt tɛm bifo Jizɔs day, i bin se: “Mi Gɔd, mi Gɔd, wetin mek yu dɔn lɛf mi?” (Mat. 27:​46) Di Baybul nɔ tɛl wi wetin mek Jizɔs bin tɔk dɛn wɔd dɛn ya. Bɔt lɛ wi tɔk bɔt wetin wi go lan frɔm dɛn wɔd dɛn de. Wan tin we wi lan na dat we Jizɔs bin tɔk dɛn wɔd dɛn de, i bin de mek di prɔfɛsi we de na Sam 22:​1 * kam tru. Dɔn bak, dɛn wɔd dɛn de mek wi no klia wan se Jiova nɔ bin de protɛkt in Pikin fɔ mek “natin” nɔ du am. (Job 1:​10) Jizɔs bin ɔndastand se in Papa bin de alaw in ɛnimi dɛn fɔ rili tɛst in fet te i day. Dɛn nɔ ɛva tɛst ɛni ɔda mɔtalman in fet rich di we aw dɛn tɛst Jizɔs in fet. Dɔn bak, dɛn wɔd dɛn de sho se Jizɔs nɔ bin dɔn kɔmit ɛni kraym we fɔ mek dɛn kil am.

10. Us lɛsin dɛn wi go lan frɔm di wɔd dɛn we Jizɔs tɔk to in Papa?

¹⁰ Wetin wi go lan frɔm di wɔd dɛn we Jizɔs tɔk? Wan lɛsin we wi lan na dat wi nɔ fɔ ɛkspɛkt se Jiova go protɛkt wi frɔm ɔl di prɔblɛm dɛn we go tɛst wi fet. Jɔs lɛk aw dɛn bin tɛst Jizɔs te i day, wisɛf fɔ rɛdi fɔ sho se wi go kɔntinyu fɔ sav Jiova fetful wan ilɛksɛf wi day. (Mat. 16:​24, 25) Bɔt wi biliv tranga wan se Gɔd nɔ go alaw tɛst we wi nɔ ebul fɔ bia fɔ mit wi. (1 Kɔr. 10:​13) Wan ɔda lɛsin we wi lan na dat, jɔs lɛk Jizɔs, wisɛf go sɔfa fɔ sɔntin we wi nɔ du. (1 Pit. 2:​19, 20) Nɔto se na bikɔs wi du bad tin mek pipul dɛn de agens wi. Bɔt dɛn de agens wi bikɔs wi nɔ tan lɛk di pipul dɛn na di wɔl, ɛn wi de tɔk bɔt di tru. (Jɔn 17:​14; 1 Pit. 4:​15, 16) Jizɔs bin ɔndastand wetin mek Jiova alaw am fɔ sɔfa. Bɔt tɛm dɛn de we sɔm pan Jiova in fetful savant dɛn bin de wɔnda wetin mek Jiova alaw sɔm tin dɛn fɔ apin. (Aba. 1:​3) Wi Gɔd we peshɛnt ɛn we gɛt sɔri-at no se dɛn in savant dɛn ya stil gɛt fet, dɛn jɔs nid di kɔrej we in wan go ebul fɔ gi dɛn.—2 Kɔr. 1:​3, 4.

11. Wetin mek Jizɔs bin tɔk di wɔd dɛn we de na Jɔn 19:​28?

¹¹ Wetin Jizɔs bin se? (Rid Jɔn 19:​28.) Wetin mek Jizɔs bin se: “A tɔsti”? I du dat “fɔ mek wetin di skripchɔ bin dɔn tɔk apin.” Da prɔfɛsi de, de na Sam  22:​15 we se: “A nɔ gɛt nɔn trɛnk igen ɔl mi trɛnk dɔn dɔn, a jɛs tan lɛkɛ broko broko kɔntri pɔt we pɔsin nɔ go yuz igen.” Dɔn bak, i go mɔs bi se afta ɔl di sɔfa we Jizɔs bin dɔn sɔfa, lɛk we dɛn bin nel am na di tik we mek i bin de fil siriɔs pen, i go dɔn rili tɔsti. I bin nid fɔ lɛ dɛn ɛp am fɔ drink wata.

12. We Jizɔs bin se, “A tɔsti”, wetin dat de tich wi?

¹² Wetin wi go lan frɔm di wɔd dɛn we Jizɔs tɔk? Jizɔs nɔ bin tink se if i tɔk bɔt aw i de fil, dat min se i wik, ɛn wisɛf nɔ fɔ fil da we de. Sɔm pan wi nɔ lɛk fɔ aks fɔ ɛp frɔm ɔda pipul dɛn. Bɔt if wi nid ɛp, wi nɔ fɔ shem fɔ aks ɔda pipul dɛn fɔ ɛp wi. Fɔ ɛgzampul, if wi dɔn ol ɔ wi nɔ gɛt bɛtɛ wɛlbɔdi, sɔntɛm wi go nid fɔ aks wi padi fɔ gi wi lift we wi go want fɔ go baybay ɔ we wi go want fɔ go ɔspitul. If wi gɛt pwɛlat, sɔntɛm wi go nid fɔ aks wan ɛlda ɔ wan machɔ brɔda ɔ sista we na wi padi fɔ lisin to wi we wi de tɔk ɔ fɔ “kɔrej” wi. (Prɔv. 12:​25) Lɛ wi mɛmba se wi brɔda ɛn sista dɛn lɛk wi, ɛn dɛn want fɔ ɛp wi “di tɛm dɛn we prɔblɛm kin de.” (Prɔv. 17:​17, NWT) Bɔt dɛn nɔ ebul fɔ no wetin wi de tink bɔt ɔ aw wi de fil. So sɔntɛm, if wi nɔ tɛl dɛn se wi nid ɛp, dɛn nɔ go no se dɛn fɔ ɛp wi.

13. We Jizɔs kɔntinyu fɔ waka tret wan wit Gɔd te i day, wetin dat bin mek i ebul du?

¹³ Wetin Jizɔs bin se? Insay Naysan 14, arawnd tri oklɔk aftanun, Jizɔs bin tɔk lawd wan se: “I dɔn dɔn!” (Jɔn 19:​30) Dɛn wɔd dɛn de we Jizɔs tɔk tich wi se jɔs bifo i day, i bin no se i dɔn du ɔl wetin Jiova want am fɔ du. Bikɔs Jizɔs bin kɔntinyu fɔ waka tret wan wit Gɔd te i day, i bin ebul fɔ du bɔku tin dɛn. Fɔs, i pruv se Setan na layman. Jizɔs bin sho se pɔsin we pafɛkt go ebul fɔ waka tret wan wit Gɔd ilɛk wetin Setan du am. Sɛkɔn, Jizɔs bin gi in layf as prayz fɔ fri wi. Bikɔs i sakrifays in layf, i mek am pɔsibul fɔ lɛ mɔtalman dɛn we nɔ pafɛkt gɛt tayt padi biznɛs wit Gɔd ɛn gɛt op fɔ de sote go. Tɔd, Jizɔs bin pruv se Jiova de rul di rayt we, ɛn i pul di badnem we in Papa bin gɛt.

14. Aw wi fɔ liv wi layf ɛvride? Ɛksplen.

¹⁴ Wetin wi go lan frɔm di wɔd dɛn we Jizɔs tɔk? Wi fɔ mekɔp wi maynd se wi go kɔntinyu fɔ waka tret wan wit Gɔd ɛvride. Tink bɔt wetin wan brɔda we nem Makswɛl Frɛnd bin tɔk; in na bin instrɔktɔ na di Watchtower Bible School of Gilead. We Brɔda Frɛnd bin de gi wan tɔk na wan intanashɔnal asɛmbli, i bin tɔk bɔt fɔ fetful to Jiova, ɛn i se: “If yu ebul du ɔ se sɔntin tide, nɔ push am fɔ tumara. Yu shɔ se yu go ebul si tumara? Ɛvride, liv yu layf lɛk se na di las chans dande yu gɛt fɔ sho se yu fit fɔ gɛt layf sote go.” Lɛ wi ɔl liv wi layf ɛvride lɛk se dis na di las chans we wi gɛt fɔ waka tret wan wit Gɔd. Ɛn we wi du dat, ilɛksɛf wi day, wi go ebul fɔ se, “Jiova, a dɔn du mi bɛst fɔ waka tret wan wit yu, fɔ pruv se Setan na layman, fɔ pul badnem pan yu, ɛn fɔ sɔpɔt yu rayt fɔ rul.”

15. Akɔdin to Lyuk 23:​46, wetin Jizɔs bin shɔ bɔt?

¹⁵ Wetin Jizɔs bin se? (Rid Lyuk 23:​46.) Bikɔs Jizɔs bin gɛt kɔnfidɛns pan in Papa, i bin se: “Papa, a de lɛf mi spirit na yu an.” Jizɔs bin no se di layf  we i go gɛt leta de na Jiova in an, ɛn i bin shɔ se in Papa go mɛmba am.

16. Wetin yu lan frɔm wan 15 ia ol brɔda in ɛkspiriɛns?

¹⁶ Wetin wi go lan frɔm di wɔd dɛn we Jizɔs tɔk? Yu fɔ rɛdi fɔ put yu layf na Jiova in an. Fɔ lɛ yu du dat, yu fɔ “trɔs PAPA GƆD [“Jiova,” NWT] wit ɔl yu at.” (Prɔv. 3:​5) Tink bɔt wan 15 ia ol brɔda we nem Jɔshwa we bin gɛt wan bad bad sik. I nɔ bin gri fɔ tek ɛni tritmɛnt we go mek i pwɛl Gɔd in lɔ. Shɔt tɛm bifo i day, i tɛl in mama se: “Mama, a de na Jiova in an. . . . Wan tin we a biliv tranga wan na dat Jiova go gi mi layf bak. I no wetin de na mi at, ɛn a rili lɛk am.” * Wi ɔl fɔ aks wisɛf dis kwɛstyɔn we se, ‘If sɔntin tɛst mi fet we go mek a day, a go put mi layf na Jiova in an ɛn biliv tranga wan se i go mɛmba mi?’

17-18. Us lɛsin dɛn wi dɔn lan? (Luk bak di bɔks we gɛt di taytul, “ Wetin Wi Lan Frɔm di Las Wɔd dɛn we Jizɔs Tɔk?”)

¹⁷ Wi kin lan impɔtant lɛsin dɛn frɔm di las wɔd dɛn we Jizɔs tɔk. Dɛn wɔd dɛn de de mɛmba wi se wi fɔ fɔgiv ɔda pipul dɛn ɛn biliv tranga wan se Jiova go fɔgiv wi. Wi gɛt bɔku brɔda ɛn sista dɛn na di kɔngrigeshɔn we rɛdi fɔ ɛp wi. Bɔt we wi nid ɛp, wi fɔ aks dɛn fɔ ɛp wi. Wi no se Jiova go ɛp wi fɔ bia ɛni prɔblɛm we go mit wi. Ɛn wi dɔn si se i impɔtant fɔ lɛ wi liv wi layf ɛvride lɛk se na di las de dande we wi gɛt fɔ pruv se wi de waka tret wan wit Gɔd. Ɛn wi gɛt kɔnfidɛns se wi layf sef na Jiova in an.

¹⁸ Wi dɔn rili si se wi kin lan bɔku tin dɛn frɔm di wɔd dɛn we Jizɔs tɔk we i bin de day na di tik. If wi du dɛn tin dɛn ya we wi dɔn lan, wi go sho se wi de obe Jiova we i tɛl wi bɔt in Pikin se: “Una lisin to am.”—Mat. 17:​5.