1-2. Wetin wi nid fɔ du as wi de wet fɔ di nyu wɔl?

 WI RILI gladi fɔ Jiova in prɔmis fɔ mek dis wɔl ya so nyu, usay pipul dɛn we de du wetin rayt go de. (2 Pit. 3:​13) Pan ɔl we wi nɔ no ustɛm di nyu wɔl go kam, di tin dɛn we wi de si de apin na di wɔl de sho se wi nɔ gɛt fɔ wet fɔ lɔng tɛm.—Mat. 24:​32-34, 36; Akt 1:​7.

² Rayt naw, ilɛk aw lɔng wi dɔn de na di trut, wi ɔl nid fɔ kɔntinyu fɔ tray tranga wan fɔ gɛt mɔ fet pan da prɔmis de. Wetin mek? Na bikɔs ivin if pɔsin gɛt strɔng fet, i pɔsibul fɔ mek in fet wik. Infakt, we pɔsin nɔ gɛt fet, apɔsul Pɔl kɔl dat “di sin we de tangul wi izi wan.” (Ibru. 12:​1) Fɔ mek wi fet nɔ go wik, wi nid fɔ de tink gud gud wan ɔltɛm bɔt di tin dɛn we de pruv se di nyu wɔl nɔ de fa igen.—Ibru. 11:​1.

3. Wetin wi go tɔk bɔt insay dis atikul?

³ Insay dis atikul, wi go tɔk bɔt tri tin dɛn we go ɛp wi fɔ gɛt mɔ fet pan Jiova in prɔmis fɔ mek di nyu wɔl: (1) bay we wi de tink gud wan bɔt Jizɔs in day, (2) bay we wi de tink bɔt Jiova in pawa, ɛn (3) bay we wi de spɛn tɛm fɔ du tin dɛn we go ɛp fɔ mek wi padi biznɛs wit Jiova tayt mɔ ɛn mɔ. Dɔn wi go tɔk bɔt aw di tin we Jiova bin tɛl Abakɔk go ɛp wi fɔ gɛt mɔ fet tide. Bɔt fɔs, lɛ wi tɔk bɔt sɔm tin dɛn we sɔntɛm de apin to wi rayt naw we mek wi nid strɔng fet pan di prɔmis fɔ se nyu wɔl de kam.

 TIN DƐN WE DE APIN WE MEK WI NID STRƆNG FET

4. Wi nid strɔng fet fɔ disayd fɔ du wetin?

⁴ Ɛvride, tin dɛn de we wi de disayd fɔ du we mek wi nid strɔng fet. Fɔ ɛgzampul, wi kin disayd fɔ du tin dɛn we gɛt fɔ du wit udat dɛn wi fɔ gɛt as padi, tin dɛn fɔ ɛnjɔy wisɛf, fɔ lan buk, udat wi fɔ mared, fɔ bɔn pikin, ɛn us wok fɔ du. I fayn fɔ mek wi aks wisɛf, ‘Di tin dɛn we a de disayd fɔ du de sho se a biliv tranga wan se i nɔ go te igen dis wɔl go dɔn ɛn wi go gɛt Gɔd in nyu wɔl? Ɔ a de disayd fɔ du di sem tin dɛn we pipul dɛn we nɔ biliv se dɛn go ebul de sote go de du?’ (Mat. 6:​19, 20; Lyuk 12:​16-21) Wi go disayd fɔ du di bɛst tin dɛn if wi gɛt mɔ fet se di nyu wɔl de kam jisnɔ.

5-6. Wetin mek wi nid strɔng fet di tɛm dɛn we wi gɛt prɔblɛm? Gi wan ɛgzampul.

⁵ Prɔblɛm dɛn kin mit wi bak we mek wi nid fɔ gɛt strɔng fet. Sɔntɛm, pipul dɛn go mek wi sɔfa, wi go gɛt siriɔs wɛlbɔdi prɔblɛm, ɔ ɔda tin dɛn we go mek wi at pwɛl. Fɔs, sɔntɛm wi go fil se wi ebul fɔ bia wi prɔblɛm. Bɔt bɔku tɛm, dɛn kayn prɔblɛm dɛn ya kin de fɔ lɔng tɛm, so wi go nid strɔng fet fɔ mek wi ebul bia ɛn kɔntinyu fɔ sav Jiova wit gladi-at.—Rom. 12:​12; 1 Pit. 1:​6, 7.

⁶ We wi gɛt prɔblɛm, sɔntɛm wi go fil se Jiova in nyu wɔl nɔ go ɛva kam. Fɔ se dat min se wi nɔ gɛt bɛtɛ fet? Nɔto dat i min. Tink bɔt dis ɛgzampul. We ren de kam ebi ebi wan, sɔntɛm wi go tink se di san nɔ go kɔmɔt. Bɔt di san kin kɔmɔt. Semweso, we wi at rili pwɛl, sɔntɛm wi go fil se di nyu wɔl nɔ go ɛva kam. Bɔt if wi gɛt strɔng fet, wi no se Gɔd in prɔmis dɛn go kam tru. (Sam 94:​3, 14, 15; Ibru. 6:​17-19) We wi gɛt da kɔnfidɛns de, wi go kɔntinyu fɔ put wi wɔship to Jiova fɔs na wi layf.

7. Uskayn we pipul dɛn de tink we wi nid fɔ avɔyd?

⁷ Wi nid fɔ gɛt strɔng fet bak fɔ mek wi go ebul du di prichin wok. Bɔku pipul dɛn we wi kin prich to kin fil se di “gud nyuz” bɔt Gɔd in nyu wɔl we de kam na jɔs stori. (Mat. 24:​14; Izi. 33:​32) Wi fɔ tek tɛm mek wi nɔ ɛva dawt wetin Jiova de tich wi, lɛk dɛn pipul dɛn de. Fɔ mek dat nɔ go apin, wi fɔ kɔntinyu fɔ gɛt mɔ fet. Lɛ wi tɔk bɔt tri tin dɛn we go ɛp wi fɔ du dat.

GO DE TINK BƆT DI DAY WE JIZƆS BIN DAY

8-9. We wi tek tɛm tink bɔt Jizɔs in day, aw i go ɛp fɔ mek wi fet strɔng mɔ ɛn mɔ?

⁸ Wan tin we go ɛp wi fɔ gɛt mɔ fet na we wi de tink bɔt di day we Jizɔs bin day. Di day we Jizɔs bin day ɛp wi fɔ no se Gɔd in prɔmis dɛn go kam tru. We wi tek tɛm tink bɔt di rizin we mek Jizɔs bin day, ɛn di sakrifays we Jiova bin mek, wi go gɛt fet mɔ ɛn mɔ se Gɔd in prɔmis dɛn fɔ se wi go de sote go na wɔl we bɛtɛ pas dis wan go kam tru. Wetin mek wi se so?

⁹ Wɛl, wetin-ɛn-wetin bin apin fɔ mek Jizɔs gi in layf as prayz fɔ fri mɔtalman? Jiova bin sɛn in fɔs Pikin we i rili lɛk, we na in tayt padi, frɔm ɛvin so dat dɛn go bɔn am na di wɔl as pafɛkt mɔtalman. We Jizɔs bin de na di wɔl, i bia ɔlkayn prɔblɛm dɛn. Dɔn i bin sɔfa ɛn day penful wan. Na big big prayz Jiova bin pe! Wi Gɔd we lɛk wi nɔ bin fɔ dɔn ɛva alaw in Pikin fɔ sɔfa ɛn day jɔs fɔ mek wi ɛnjɔy layf fɔ shɔt tɛm. (Jɔn 3:​16; 1 Pit. 1:​18, 19) Bikɔs Jiova mek in Pikin we i rili  lɛk day fɔ ɛp wi, I go mek shɔ se wi ebul de sote go insay di nyu wɔl.

TINK BƆT JIOVA IN PAWA

10. Akɔdin to Ɛfishians 3:​20, wetin Jiova ebul fɔ du?

¹⁰ Di sɛkɔn tin we go ɛp fɔ mek wi fet strɔng mɔ ɛn mɔ na we wi tink bɔt Jiova in pawa. I gɛt di pawa fɔ du ɔl di tin dɛn we i de prɔmis fɔ du. Bɔku pipul dɛn tide go fil se fɔ gɛt layf we go de sote go insay nyu wɔl na sɔntin we nɔ pɔsibul fɔ wi. Bɔt bɔku tɛm, Jiova de prɔmis tin dɛn we mɔtalman nɔ go ɛva ebul fɔ du. Afta ɔl, na in na di Ɔlmayti Gɔd. (Job 42:​2; Mak 10:​27) So wi nɔ sɔprayz we i de prɔmis wi wɔndaful tin dɛn.—Rid Ɛfishians 3:​20.

11.Gi wan ɛgzampul bɔt wan pan Jiova in wɔndaful prɔmis dɛn. (Rid di bɔks we gɛt di taytul “ Sɔm Wɔndaful Prɔmis dɛn we Bin Kam Tru.”)

¹¹ Tink bɔt sɔm tin dɛn we Jiova bin prɔmis fɔ du fɔ in pipul dɛn trade, we tan lɛk i nɔ pɔsibul fɔ apin. I bin tɛl Ebraam ɛn Sera se dɛn go bɔn bɔypikin pan ɔl we dɛn dɔn ol. (Jɛn. 17:​15-17) I bin tɛl Ebraam bak se I go gi in pikin dɛn di land we na Kenan. Fɔ lɔng tɛm we Ebraam in pikin dɛn, we na di Izrɛlayt dɛn, na bin slev na Ijipt, i go mɔs bi se dɛn bin de tink se da prɔmis de nɔ go ɛva kam tru. Bɔt i bin kam tru. Leta, Jiova bin tɛl Ilizabɛt we bin dɔn ol se i go bɔn pikin. I bin tɛl Meri bak we na bin vajin se i go bɔn In yon Bɔypikin. Dis go mek di prɔmis we Jiova bin dɔn mek fɔ lɔng lɔng tɛm na di gadin we bin de na Idɛn kam tru!—Jɛn. 3:​15.

12. Wetin Jɔshwa 23:​14 ɛn Ayzaya 55:​10, 11 ɛp wi fɔ no bɔt Jiova in pawa?

¹² We wi tink bɔt ɔl di prɔmis dɛn we Jiova bin mek ɛn aw i bin mek dɛn kam tru, dat de ɛp wi fɔ ɔndastand se i rili gɛt pawa. Dɔn, wi fet pan in prɔmis fɔ mek di wɔl nyu go strɔng mɔ ɛn mɔ. (Rid Jɔshwa 23:​14; Ayzaya 55:​10, 11.) Dat dɔn mek wi ebul ɛp pipul dɛn fɔ ɔndastand se di prɔmis fɔ se Gɔd go mek di wɔl nyu nɔto drim, nɔto sɔntin we nɔ rial. Jiova insɛf dɔn tɔk bɔt in prɔmis fɔ mek nyu ɛvin ɛn nyu wɔl se: “Dɛn wɔd ya na tru ɛn pɔsin kin abop pan dɛn.”—Rɛv. 21:​1, 5.

DU TIN DƐN WE GO ƐP YU FƆ KAM NIA JIOVA MƆ ƐM MƆ

13. Aw di mitin dɛn go ɛp fɔ mek wi fet strɔng mɔ ɛn mɔ? Ɛksplen.

¹³ Di tɔd tin we go ɛp wi fɔ gɛt mɔ fet na we wi de spɛn tɛm fɔ du tin dɛn we go mek wi kam nia Jiova mɔ ɛn mɔ. Fɔ ɛgzampul, tink bɔt aw wi de bɛnifit we wi atɛnd di mitin dɛn. Wan sista we nem Ana, we dɔn sav difrɛn say dɛn na ful-taym savis, tɔk se: “Di mitin dɛn de ɛp fɔ mek mi fet strɔng mɔ ɛn mɔ. Ivin if di spika nɔ sabi fɔ tich bɛtɛ ɔ nɔ se ɛnitin we nyu, bɔku tɛm a kin yɛri sɔntin we de ɛp mi fɔ ɔndastand Baybul trut mɔ ɛn mɔ, ɛn dat de ɛp fɔ mek a gɛt mɔ fet.” b Wi fet go strɔng bak we wi lisin to di fayn kɔmɛnt dɛn we wi brɔda ɛn sista dɛn de mek na mitin.—Rom. 1:​11, 12; 10:​17.

14. Aw di prichin wok de ɛp fɔ mek wi gɛt mɔ fet?

¹⁴ Wi fet go strɔng mɔ ɛn mɔ bak we wi de du di prichin wok. (Ibru. 10:​23) Wan sista we nem Babra, we dɔn de sav Jiova fɔ di pas 70 ia tɔk se: “A de si di prichin wok ɔltɛm as sɔntin we de ɛp mi fɔ gɛt mɔ fet. Di mɔ a de tɔk to ɔda pipul  dɛn bɔt Jiova in wɔndaful prɔmis dɛn, na di mɔ mi fet de kɔntinyu fɔ strɔng.”

15. Aw pasɔnal stɔdi de ɛp fɔ mek wi gɛt mɔ fet? (Luk bak di pikchɔ dɛn.)

¹⁵ Wan ɔda tin we de ɛp wi fɔ gɛt mɔ fet na pasɔnal stɔdi. Wan sista we nem Suzan tɔk se we i de plan ustɛm fɔ stɔdi, dat de ɛp am. I se: “Sɔnde, a de stɔdi di Wachtawa fɔ di nɛks wik. Mɔnde ɛn Tyusde, a de pripia fɔ di mitin insay di wik. Dɔn di balans de dɛn, a de du mi pasɔnal stɔdi.” Bikɔs Suzan de fala in shɛdul fɔ stɔdi ɔltɛm, dat dɔn ɛp am fɔ kɔntinyu fɔ gɛt strɔng fet. Wan sista we nem Ayrin we dɔn de wok na wɔl ɛdkwata fɔ lɔng tɛm tɔk se we i de stɔdi bɔt Baybul prɔfɛsi, dat dɔn ɛp am fɔ gɛt strɔng fet. I se: “A kin kɔle we a si aw Jiova in prɔfɛsi dɛn ɔl de kam tru.” c

“I GO MƆS BI”

16. Wetin mek di garanti we Jiova bin gi Abakɔk gɛt minin fɔ wi tide? (Ibruz 10:​36, 37)

¹⁶ I dɔn te we sɔm pan Jiova in savant dɛn dɔn de wet fɔ mek dis wɔl dɔn. Sɔm pipul dɛn tink se di ɛnd bin fɔ dɔn kam lɔng lɔng tɛm. Jiova no aw in savant dɛn de fil. Infakt, i bin ɛp Abakɔk fɔ no se: “Di tɛm go kam we dis vishɔn go apin, i go apin jisnɔ ɛn i nɔ go fel. Ilɛksɛf i de dile, kɔntinyu fɔ wet fɔ am! Bikɔs i go mɔs bi. I nɔ go let!” (Aba. 2:​3, NWT) Fɔ se na Abakɔk nɔmɔ Gɔd bin gi da garanti de? Ɔ fɔ se In wɔd dɛn gɛt minin fɔ wi tide? Jiova bin tɛl apɔsul Pɔl fɔ aplay dɛn wɔd dɛn de to Kristian dɛn, we de rili wet fɔ di nyu wɔl. (Rid Ibruz 10:​36, 37.) So wi shɔ se ivin if wi tink se Jiova in prɔmis fɔ sev wi dɔn tek lɔng tɛm, “i go mɔs bi. I nɔ go let!”

17. Aw wan sista bin aplay di advays we Jiova bin gi Abakɔk?

¹⁷ Bɔku pan Jiova in savant dɛn dɔn  aplay Jiova in advays fɔ “kɔntinyu fɔ wet,” ɛn sɔm dɔn de du am fɔ lɔng tɛm. Fɔ ɛgzampul, wan sista we nem Luis, bigin fɔ sav Jiova insay 1939. I tɔk se: “Da tɛm de, a bin tink se Amagɛdɔn go kam bifo a dɔn sɛkɔndari skul. Bɔt dat nɔ bin apin. Ɔl di tɛm dɛn we dɔn pas we a de rid akawnt dɛn na di Baybul bɔt pipul dɛn we bin wet fɔ mek Jiova du di tin dɛn we i dɔn prɔmis, dat dɔn ɛp mi fɔ wet fɔ mek Jiova go du di tin dɛn we i dɔn prɔmis. A kin rid bɔt Noa, Ebraam, Josɛf, ɛn ɔda pipul dɛn we bin gɛt fɔ wet fɔ lɔng tɛm bifo dɛn gɛt di blɛsin dɛn we Jiova bin prɔmis dɛn. Bikɔs a biliv ɔltɛm se di prɔmis dɛn go kam tru, dat dɔn ɛp mi ɛn ɔda pipul dɛn fɔ biliv tranga wan se di nyu wɔl nɔ rili de fa igen.” Bɔku ɔda pipul dɛn we dɔn de sav Jiova fɔ lɔng tɛm gri wit dat!

18. We wi tek tɛm wach di tin dɛn we Gɔd mek, aw dat de ɛp wi fɔ gɛt strɔng fet se di nyu wɔl go kam?

¹⁸ Na tru se di nyu wɔl nɔ kam yet. Bɔt, notis sɔm tin dɛn we ɔlrɛdi de na di wɔl, lɛk di sta dɛn, di stik dɛn, di animal dɛn, ɛn yu kɔmpin mɔtalman dɛn. Nɔbɔdi nɔ go tɔk se ɔl dɛn tin ya nɔ rial, pan ɔl we tɛm dɛn bin de we dɛn nɔ bin de. Di wan rizin we mek dɛn de na di wɔl na bikɔs Jiova mek dɛn. (Jɛn. 1:​1, 26, 27) Wi Gɔd dɔn prɔmis bak se i go mek wan nyu wɔl. I go du wetin i dɔn prɔmis. Insay di nyu wɔl, pipul dɛn go gɛt layf we go de sote go wit pafɛkt wɛlbɔdi. Wi shɔ se di nyu wɔl go kam di tɛm we Gɔd dɔn pik.—Ayz. 65:​17; Rɛv. 21:​3, 4.

19. Wetin yu go du fɔ mek yu fet strɔng mɔ ɛn mɔ?

¹⁹ Rayt naw, du ɔl wetin yu ebul fɔ mek yu fet strɔng mɔ ɛn mɔ. Sho ɔltɛm se yu gladi fɔ Jizɔs in day. Go de tink bɔt Jiova in pawa. Du tin dɛn we go ɛp yu fɔ kam nia Jiova mɔ ɛn mɔ. We yu du dat, yu go de wit “di wan dɛn we bin bɛnifit frɔm di prɔmis dɛn bikɔs dɛn gɛt fet ɛn dɛn peshɛnt.”—Ibru. 6:​11, 12; Rom. 5:​5.