1. Ɛksplen wetin bin apin we Jizɔs bin pafɔm in fɔs mirekul.

 IMAJIN wetin bin apin we Jizɔs bin stat in prichin wok insay di ia 29. Dɛn bin invayt Jizɔs ɛn in mama, Meri, wit sɔm pan in disaypul dɛn na wan mared pati na Kena, we na wan vilej we de na di nɔt pat na Jizɔs in om-tɔŋ na Nazarɛt. Meri na bin padi to di famili, ɛn i go bi se i bin de ɛp fɔ kia fɔ di pipul dɛn we dɛn invayt. Bɔt we di mared pati bin de ɔn, sɔntin bin apin we bin fɔ mek di famili ɛn di pipul dɛn we mared bin fɔ shem bad bad wan. Di wayn bin dɔn dɔn. b Sɔntɛm di pipul dɛn we bin atɛnd di program bin pas di pipul dɛn we dɛn invayt. Meri bin go to in pikin kwik kwik wan ɛn tɛl am se: “Dɛn nɔ gɛt wayn.” (Jɔn 2:​1-3) Wetin Jizɔs bin du? I du sɔntin we rili wɔndaful. I pafɔm mirekul ɛn tɔn wata to “fayn wayn.”—Jɔn 2:​9, 10.

2-3. (a) Aw Jizɔs bin yuz in pawa fɔ pafɔm mirekul dɛn? (b) Aw wi go bɛnifit we wi tɔk bɔt di mirekul dɛn we Jizɔs bin pafɔm?

² Jizɔs bin pafɔm bɔku ɔda mirekul dɛn we i bin de du in prichin wok. c I bin yuz in pawa fɔ pafɔm mirekul fɔ ɛp bɔku bɔku pipul dɛn. Fɔ ɛgzampul, di tɛm we i pafɔm tu pan in mirekul dɛn usay i fid 5,000 man dɛn ɛn leta  4,000 man dɛn, i go bi se i bin fid pas 27,000 pipul dɛn if wi ad di uman ɛn di pikin dɛn we bin de bak. (Mat. 14:​15-21; 15:​32-38) Ɔl tu dɛn tɛm dɛn de, Jizɔs bin mɛn bak bɔku pipul dɛn we sik. (Mat. 14:​14; 15:​30, 31) Imajin aw di krawd go dɔn sɔprayz we Jizɔs bin pafɔm mirekul fɔ mɛn ɛn fid dɛn.

³ Wi kin lan bɔku tin frɔm Jizɔs in mirekul dɛn tide. Insay dis atikul, wi go tɔk bɔt sɔm lɛsin dɛn we dɛn mirekul dɛn de go tich wi we go ɛp wi fɔ gɛt strɔng fet. Dɔn wi go tɔk bɔt aw wi go falamakata di ɔmbul we Jizɔs bin ɔmbul ɛn di sɔri-at we i bin gɛt we i bin de pafɔm mirekul dɛn.

4. Udat Jizɔs in mirekul dɛn de tich wi bɔt we go ɛp wi fɔ gɛt strɔng fet?

⁴ Di mirekul dɛn we Jizɔs bin pafɔm de tich wi lɛsin dɛn bɔt in ɛn in Papa we go ɛp wi fɔ gɛt strɔng fet. Dis na bikɔs na Jiova gi am di pawa fɔ pafɔm dɛn mirekul dɛn de. Akt 10:​38 tɛl wi se: “Gɔd anɔynt am [Jizɔs] wit oli spirit ɛn pawa, ɛn i bin de go ɔlsay na di land de du gud tin dɛn ɛn mɛn di wan dɛn we di Debul bin de mek sɔfa, bikɔs Gɔd bin de wit am.” Mɛmba bak se Jizɔs bin de falamakata di we aw in Papa de tink ɛn fil pan ɔltin we i bin de se ɛn du pafɛkt wan, ivin di mirekul dɛn we i bin de pafɔm. (Jɔn 14:​9) Lɛ wi tɔk bɔt tri lɛsin dɛn we wi go lan frɔm di mirekul dɛn we Jizɔs bin pafɔm.

5. Wetin bin muv Jizɔs fɔ pafɔm mirekul dɛn? (Matyu 20:​30-34)

⁵ Fɔs, Jizɔs ɛn in Papa rili lɛk wi. We Jizɔs bin de na di wɔl, i bin sho se i rili lɛk pipul dɛn bay we i bin de yuz in pawa fɔ pafɔm mirekul fɔ ɛp di wan dɛn we bin de sɔfa. Wan tɛm, tu blaynman dɛn bin beg am fɔ ɛp dɛn. (Rid Matyu 20:​30-34.) Notis se Jizɔs bin ‘sɔri fɔ dɛn,’ ɛn i bin mɛn dɛn. Di Grik vab we dɛn yuz fɔ translet di wɔd dɛn ‘sɔri fɔ dɛn,’ min di kayn sɔri-at we pɔsin de fil insay insay in bɔdi. Da kayn sɔri-at de, we na wan we aw Jizɔs bin de sho se i lɛk pipul dɛn, bin muv am bak fɔ fid di wan dɛn we bin angri ɛn mɛn wan man we bin gɛt lɛprɔsi. (Mat. 15:​32; Mak 1:​41) Wi shɔ se Jiova we na di Gɔd we “rili gɛt sɔri-at,” ɛn in Pikin rili lɛk wi, ɛn dɛn de fil am we dɛn de si wi de sɔfa. (Lyuk 1:​78; 1 Pit. 5:​7) Dɛn rili want fɔ pul ɔl di prɔblɛm dɛn we de mek wi sɔfa.

6. Uskayn pawa Gɔd dɔn gi Jizɔs?

⁶ Sɛkɔn, Gɔd dɔn gi Jizɔs di pawa fɔ sɔlv ɔl mɔtalman prɔblɛm dɛn. Di mirekul dɛn we Jizɔs bin de pafɔm sho se i gɛt pawa fɔ sɔlv ɔl di prɔblɛm dɛn we wi nɔ go ɛva ebul fɔ sɔlv bay wisɛf. Fɔ ɛgzampul, i gɛt di pawa fɔ fri wi frɔm di men tin we de mek wi gɛt prɔblɛm, we na di sin we wi gɛt frɔm wi fɔs mama ɛn papa ɛn ɔl di tin dɛn we de apin to wi bikɔs ɔf sin, lɛk sik ɛn day. (Mat. 9:​1-6; Rom. 5:​12, 18, 19) In mirekul dɛn bin pruv se i go ebul mɛn “ɔlkayn” sik ɛn ivin gi layf bak to di wan dɛn we dɔn day. (Mat. 4:​23; Jɔn 11:​43, 44) Dɔn bak, i gɛt di pawa fɔ kɔntrol big big briz ɛn fri pipul dɛn frɔm wikɛd spirit dɛn. (Mak 4:​37-39; Lyuk 8:​2) Wi rili gladi fɔ no se Jiova dɔn gi in Pikin da kayn pawa de!

7-8. (a) Us kɔnfidɛns Jizɔs in mirekul dɛn gi wi? (b) Us mirekul yu rili want fɔ si na di nyu wɔl?

 ⁷ Tɔd, wi go ebul gɛt kɔnfidɛns se ɔl di gud tin dɛn we Gɔd dɔn prɔmis se go apin ɔnda in Kiŋdɔm go kam tru. Di mirekul dɛn we Jizɔs bin pafɔm we i bin de na di wɔl de tich wi bɔt wetin i go du ɔlsay na di wɔl bikɔs in na di Kiŋ na Gɔd in Kiŋdɔm. Tink bɔt di blɛsin dɛn we wi go ɛnjɔy jisnɔ we Krays go de rul ɔlsay na di wɔl. Wi go ɛnjɔy pafɛkt wɛlbɔdi, bikɔs i go pul ɔlkayn sik ɛn difrɛn prɔblɛm dɛn we pipul dɛn gɛt na dɛn bɔdi. (Ayz. 33:​24; 35:​5, 6; Rɛv. 21:​3, 4) Wi nɔ go ɛva angri ɔ sɔfa bikɔs ɔf nachɔral dizasta. (Ayz. 25:​6; Mak 4:​41) Wi go gladi pasmak we wi go wɛlkɔm bak di wan dɛn we wi lɛk we de na “di grev dɛn we Gɔd de mɛmba.” (Jɔn 5:​28, 29) Us mirekul yu rili want fɔ si na di nyu wɔl?

⁸ We Jizɔs bin de pafɔm mirekul dɛn, i bin sho se in na pɔsin we rili ɔmbul ɛn we gɛt sɔri-at, we na kwaliti dɛn we wi fɔ falamakata. Lɛ wi tɔk bɔt tu ɛgzampul dɛn. Wi go stat wit di akawnt we de tɔk bɔt di mared pati na Kena.

9. Wetin Jizɔs bin du na di mared pati? (Jɔn 2:​6-10)

⁹ Rid Jɔn 2:​6-10. We di wayn bin dɔn na di mared pati, yu tink se Jizɔs bin nid fɔ du ɛnitin bɔt dat? Nɔ. No prɔfɛsi nɔ tɔk se di Mɛsaya go pafɔm mirekul fɔ  mek wayn. Bɔt jɔs imajin aw yu go fil if di drink dɔn na yu mared pati. I go bi se Jizɔs bin sɔri fɔ di famili, mɔ di ɔkɔ ɛn di yawo, ɛn i nɔ bin want fɔ mek dɛn shem. So i bin pafɔm di mirekul we wi tɔk bɔt na di biginin na dis atikul. I bin tɔn wata, we na lɛk 390 lita (ɔ 103 galɔn) to wayn we fayn pas ɔl. Sɔntɛm i bin mek da bɔku bɔku wayn de so dat sɔm go lɛf we dɛn go yuz leta ɔ dɛn go ivin sɛl am fɔ ɛp di maredman ɛn in wɛf wit sɔm mɔni. Wan dawt nɔ de se di man ɛn di uman we jɔs mared bin rili gladi.

10. Wetin na sɔm impɔtant tin dɛn we de insay Jɔn chapta 2? (Luk bak di pikchɔ.)

¹⁰ Lɛ wi tɔk bɔt sɔm impɔtant tin dɛn we de insay Jɔn chapta 2. Yu notis se nɔto Jizɔs bin ful-ɔp di kɔntena dɛn wit wata? Bikɔs i nɔ bin want mek pipul dɛn pe atɛnshɔn to am, i bin tɛl di savant dɛn fɔ ful-ɔp di kɔntena dɛn. (Vas 6, 7) Ɛn afta Jizɔs tɔn di wata to wayn, i nɔ kɛr am go to di man we de in chaj ɔf di pati. Bifo dat, i bin tɛl di savant dɛn fɔ du dat. (Vas 8) Jizɔs nɔ bin tek wan kɔp wayn, ol am bifo di pipul dɛn we dɛn invayt, ɛn bost se, ‘Una tes sɔm pan di wayn we a jɔs dɔn mek!’

11. Wetin wi lan frɔm Jizɔs in mirekul?

¹¹ Wetin wi lan frɔm Jizɔs in mirekul we i bin tɔn wata to wayn? Wi lan se wi fɔ bi pɔsin we ɔmbul. Jizɔs nɔ bin bost bɔt di mirekul we i bin pafɔm; infakt, i nɔ ɛva bost bɔt ɛnitin we i bin du. Bifo dat, i bin ɔmbul insɛf, ɛn i bin de gi in Papa di glori ɛn prez ɔltɛm. (Jɔn 5:​19, 30; 8:​28) If wi falamakata Jizɔs bay we wi kɔntinyu fɔ put wisɛf dɔŋ, wi nɔ go bost bɔt ɛnitin we wi du. Ilɛk wetin wi du na Jiova in savis, lɛ wi nɔ bost bɔt wisɛf, bɔt lɛ wi bost bɔt wi wɔndaful Gɔd, bikɔs na big ɔnɔ wi gɛt fɔ sav am. (Jɛr. 9:​23, 24) Lɛ wi gi am di prez we i fit fɔ gɛt. Wi nɔ go ɛva ebul du ɛni gud tin if Jiova nɔ ɛp wi.—1 Kɔr. 1:​26-31.

12. Wetin na wan ɔda we fɔ falamakata Jizɔs fɔ bi pɔsin we ɔmbul? Gi wan ɛgzampul.

¹² Lɛ wi tɔk bɔt wan ɔda we fɔ falamakata Jizɔs fɔ bi pɔsin we ɔmbul. Tink bɔt dis ɛgzampul: Wan ɛlda spɛn bɔku tɛm fɔ ɛp wan yɔŋ ministerial savant fɔ pripia in fɔs pɔblik tɔk. Bikɔs di ɛlda bin ɛp am, di yɔŋ brɔda ebul gi fayn tɔk we di kɔngrigeshɔn ɛnjɔy. Afta di mitin, sɔmbɔdi go mit di ɛlda ɛn tɔk se: ‘Brɔda So-ɛn-so gi fayn tɔk, nɔto so?’ Yu tink se di ɛlda nid fɔ se: ‘Yɛs, bɔt a bin spɛn bɔku tɛm fɔ ɛp am’? Ɔ i fɔ ɔmbul insɛf ɛn se: ‘Yɛs, i gi fayn tɔk. A gladi fɔ am’? If wi na pɔsin we ɔmbul, wi nɔ fɔ se paopa dɛn fɔ prez wi fɔ di gud tin dɛn we wi du fɔ ɔda pipul dɛn. Wi satisfay bikɔs wi no se Jiova de si wi ɛn valyu wetin wi de du. (Luk Matyu 6:​2-4; Ibru. 13:​16) Fɔ tru, wi de mek Jiova gladi we wi falamakata Jizɔs fɔ bi pɔsin we ɔmbul.—1 Pit. 5:​6.

13. Wetin Jizɔs bin si nia di siti we nem Nen? Wetin i bin du bɔt dat? (Lyuk 7:​11-15)

¹³ Rid Lyuk 7:​11-15. Tink bɔt wetin bin apin we Jizɔs bin dɔn du in prichin wok fɔ lɛk tu ia. I bin travul go na Nen, we na siti na Galili we nɔ de fa frɔm Shunɛm, usay prɔfɛt Ilaysha bin gi layf bak to wan uman in bɔypikin, lɛk 900 ia bifo da tɛm de. (2 Kiŋ 4:​32-37) We Jizɔs bin de go nia di get, i si se pipul dɛn de kɔmɔt na di siti fɔ go bɛr pɔsin. Dis tin bin rili sɔri, bikɔs wan uman we in man bin  dɔn day dɔn lɔs in wangren pikin. Bɔt nɔto di mama we in at pwɛl wangren bin de; bɔku pipul dɛn we kɔmɔt na di siti bin de wit am. Jizɔs bin stɔp dɛn ɛn du sɔntin we wɔndaful fɔ dis mama we in at pwɛl; Jizɔs bin gi layf bak to di uman in bɔypikin. Dis na di fɔs pɔsin pan di tri pipul dɛn we Jizɔs bin gi layf bak we dɛn tɔk bɔt na di Gɔspɛl dɛn.

14. Wetin na sɔm impɔtant tin dɛn we de insay Lyuk chapta 7? (Luk bak di pikchɔ.)

¹⁴ Lɛ wi tɔk bɔt sɔm impɔtant tin dɛn insay di akawnt we de na Lyuk chapta 7. Yu notis se Jizɔs bin “si” di mama we in at bin rili pwɛl, dɔn “i sɔri fɔ am”? (Vas 13) Sɔntɛm Jizɔs bin si we di uman de kray as i de waka nia in bɔypikin in dedebɔdi, ɛn i sɔri fɔ am. Jizɔs nɔ bin jɔs fil sɔri fɔ di mama; i bin sho se i de sɔri fɔ am. Wan dawt nɔ de se i bin tɔk to di uman fayn ɛn tɛl am se: “Lɛf fɔ kray.” Dɔn i du sɔntin fɔ ɛp am. I bin gi layf bak to di uman in pikin ɛn “gi am to in mama.”—Vas 14, 15.

15. Wetin wi lan frɔm Jizɔs in mirekul?

¹⁵ Wetin wi lan frɔm di mirekul we Jizɔs bin pafɔm fɔ gi layf bak to di uman we in man bin dɔn day in bɔypikin? Wi lan se wi nid fɔ sho sɔri-at to di wan dɛn we dɛn at pwɛl. Wi nɔ ebul gi layf bak to pɔsin we dɔn day, lɛk aw Jizɔs bin du. Bɔt, jɔs lɛk Jizɔs, wi go ebul sho sɔri-at to di wan dɛn we dɛn at pwɛl, bay we wi de tek tɛm wach wetin de apin to dɛn. Wi go sho sɔri-at to pipul dɛn bay we wi go se ɔ du wetin wi ebul fɔ ɛp ɛn kɔrej dɛn. d (Prɔv. 17:​17, NWT; 2 Kɔr. 1:​3, 4; 1 Pit. 3:​8) Ivin di simpul wɔd dɛn we wi go tɔk ɛn di smɔl tin dɛn we wi go du go rili ɛnkɔrej dɛn.

16. Akɔdin to wetin de na di pikchɔ, wetin yu lan frɔm di ɛkspiriɛns bɔt wan mama we in pikin bin jɔs day?

¹⁶ Lɛ wi tɔk bɔt wan ɛkspiriɛns. Sɔm ia we dɔn pas, wan sista bin notis wan mama we bin de kray as dɛn bin de siŋ  wan siŋ na Kiŋdɔm Ɔl. Di siŋ bin de tɔk bɔt di op fɔ gɛt layf bak, ɛn da mama de in yɔŋ galpikin bin jɔs dɔn day. We di sista notis dis, kwik kwik wan i go to di mama, put in an rawnd am, ɛn siŋ wit am te di siŋ dɔn. Leta, di mama tɔk se: “A bin kam fɔ lɛk di brɔda ɛn sista dɛn mɔ ɛn mɔ.” I bin rili gladi we i go di mitin. I tɔk se: “Na Kiŋdɔm Ɔl wi de gɛt di ɛp we wi nid.” Wi shɔ se Jiova de notis ɛn valyu ivin di smɔl smɔl tin dɛn we wi de du fɔ sho sɔri-at to di wan dɛn we pɔsin we dɛn lɛk dɔn day, we dɛn “at rili pwɛl.”—Sam 34:​18, NWT.

17. Wetin wi dɔn lan insay dis atikul?

¹⁷ Wi fet go strɔng mɔ ɛn mɔ we wi stɔdi di akawnt dɛn na di Baybul bɔt di mirekul dɛn we Jizɔs bin pafɔm. Dɛn de tich wi se Jiova ɛn Jizɔs rili lɛk wi, Jizɔs gɛt di pawa fɔ sɔlv ɔl wi prɔblɛm dɛn, ɛn wi fɔ gɛt kɔnfidɛns se Gɔd in Kiŋdɔm go mek ɔl wetin i dɔn prɔmis kam tru jisnɔ. As wi de stɔdi dɛn akawnt dɛn de, wi fɔ tink bɔt we dɛn we wi go falamakata Jizɔs in kwaliti dɛn. Yu nɔ tink se i go fayn fɔ arenj tɛm fɔ du pasɔnal stɔdi projɛkt ɔ Famili Wɔship we go ɛp yu fɔ lan bɔt ɔda mirekul dɛn we Jizɔs bin pafɔm? Si us lɛsin dɛn yu go lan ɛn tɛl ɔda pipul dɛn bɔt wetin yu lan. Yu go ebul fɔ tɔk bɔku tin dɛn we go ɛnkɔrej ɔda pipul dɛn we yu du dat.—Rom. 1:​11, 12.

18. Wetin wi go tɔk bɔt insay di nɛks atikul?

¹⁸ Akɔdin to wetin di Baybul tɛl wi, Jizɔs bin pafɔm di tɔd ɛn las mirekul fɔ gi layf bak to pɔsin, arawnd di tɛm we in prichin wok fɔ dɔn. Bɔt dis wan bin difrɛn bikɔs i bin gi layf bak to in padi we i lɛk, ɛn di we aw i apin bin difrɛn. Us lɛsin wi lan frɔm da mirekul de? Ɛn aw wi go gɛt mɔ fet se di wan dɛn we dɔn day go gɛt layf bak? Wi go tɔk bɔt dɛn kwɛstyɔn dɛn de insay di nɛks atikul.