1. Aw wan bɔbɔ bin tɔk bɔt in op fɔ gɛt layf bak?

 WAN bɔbɔ we nem Matyu gɛt siriɔs wɛlbɔdi prɔblɛm, ɛn i nid fɔ du bɔku ɔpreshɔn dɛn. We i bin ol sɛvin ia, in ɛn in famili bin de wach wan JW Brɔdkastin^® program. We di program bin de dɔn, dɛn ple wan myuzik vidio we bin de tɔk bɔt fɔ wɛlkɔm di wan dɛn we dɔn day. b Afta di program dɔn, Matyu go mit in mama ɛn papa, i ol dɛn an, ɛn tɛl dɛn se: “Mama, Papa, una si? Ilɛksɛf a day, a go wek we Jiova go gi mi layf bak. Una wet fɔ mi; ɔltin go oke.” Yu ebul imajin aw da mama ɛn papa de go dɔn fil we dɛn kam fɔ no se dɛn pikin biliv tranga wan se i go gɛt layf bak?

2-3. Wetin mek i fayn fɔ tink bɔt di prɔmis fɔ se pipul dɛn go gɛt layf bak?

² Frɔm tɛm to tɛm, i go fayn fɔ mek wi ɔl de tink bɔt di Baybul in prɔmis fɔ se pipul dɛn go gɛt layf bak tumara bambay. (Jɔn 5:​28, 29) Wetin mek? Na bikɔs wi nɔ no ustɛm wi go sik siriɔs wan ɔ ustɛm pɔsin we wi lɛk go day. (Ɛkli. 9:​11, NWT; Jems 4:​13, 14) Wi op fɔ gɛt layf bak go ɛp wi fɔ bia dɛn kayn prɔblɛm dɛn de. (1 Tɛs. 4:​13) Di Baybul ɛp wi fɔ no se wi Papa we de na ɛvin sabi wi gud gud wan, ɛn i rili lɛk wi. (Lyuk 12:​7) Fɔ lɛ Jiova go ebul mek wi bak wit di sem abit we wi gɛt ɛn mek wi ebul mɛmba di tin dɛn we wi bin sabi trade, dat min se i rili sabi wi. Jiova lɛk wi pasmak, ɛn i dɔn mek am pɔsibul fɔ lɛ wi de sote go. Ilɛksɛf wi day, i go gi wi layf bak.

³ Insay dis atikul, wi go tɔk fɔs bɔt wetin mek wi fɔ biliv di prɔmis we se pipul dɛn go gɛt layf bak. Dɔn wi go tɔk  bɔt di Baybul akawnt we gɛt di wɔd dɛn usay wi tim skripchɔ kɔmɔt, we se: “Yu brɔda go gɛt layf bak.” Dis akawnt go ɛp wi fɔ gɛt mɔ fet. (Jɔn 11:​23) Di las tin we wi go lan na aw wi go ebul mek di op fɔ se pipul dɛn go gɛt layf bak mɔ rial to wi.

4. Fɔ mek wi biliv prɔmis, wetin wi fɔ biliv tranga wan? Gi wan ɛgzampul.

⁴ Fɔ mek wi biliv prɔmis, wi fɔ biliv tranga wan se di pɔsin we mek di prɔmis want fɔ du wetin i se, ɛn i gɛt di pawa, ɔ i ebul fɔ du am. Fɔ ɛgzampul: Imajin se yu os damej bad bad wan bikɔs ɔf ebi briz we blo. Wan yu padi kam to yu ɛn prɔmis yu se, ‘A go ɛp yu fɔ bil yu os bak.’ Yu padi min wetin i tɔk, ɛn yu biliv tranga wan se i want fɔ ɛp yu. If in na pɔsin we sabi bil ɛn i gɛt di tul dɛn we i nid, yu no bak se i ebul fɔ ɛp yu. So yu biliv in prɔmis. Wetin wi go se bɔt Gɔd in prɔmis fɔ gi layf bak to pipul dɛn? Fɔ se i rili want fɔ du wetin i dɔn prɔmis ɛn i gɛt di pawa fɔ du am?

5-6. Wetin mek wi shɔ se Jiova want fɔ gi layf bak to di wan dɛn we dɔn day?

⁵ Fɔ se Jiova want fɔ gi layf bak to di wan dɛn we dɔn day? Wan dawt nɔ de se i want fɔ du dat. I bin dayrɛkt sɔm man dɛn we rayt di Baybul fɔ rayt in prɔmis fɔ se pipul dɛn go gɛt layf bak tumara bambay. (Ayz. 26:​19, NWT; Osia 13:​14, NWT; Rɛv. 20:​11-13) Ɛn Jiova de du wetin i prɔmis ɔltɛm. (Jɔs. 23:​14) Infakt, Jiova rili want fɔ gi layf bak to di wan dɛn we dɔn day. Wetin mek wi se so?

⁶ Tink bɔt wetin Job bin tɔk. I bin shɔ se ilɛksɛf i day, Jiova go want fɔ mek i gɛt layf bak. (Job 14:​14, 15) Na di sem we Jiova de fil bɔt ɔl in savant dɛn we dɔn day. I rili want fɔ gi dɛn layf bak so dat dɛn go gladi ɛn gɛt wɛlbɔdi. Bɔt aw Jiova de fil bɔt ɔl di pipul dɛn we dɔn day ɛn we nɔ bin gɛt chans fɔ lan di tru bɔt am? Wi Gɔd we gɛt lɔv want fɔ mek dɛnsɛf gɛt layf bak. (Akt 24:​15) I want fɔ mek dɛn gɛt di chans fɔ bi in padi ɛn de sote go na dis wɔl. (Jɔn 3:​16) Wi dɔn si klia wan se Jiova want fɔ gi layf bak to di wan dɛn we dɔn day.

7-8. Wetin mek wi shɔ se Jiova gɛt di pawa fɔ gi layf bak to di wan dɛn we dɔn day?

⁷ Fɔ se Jiova gɛt di pawa fɔ gi layf bak to di wan dɛn we dɔn day? Yɛs, i rili gɛt pawa fɔ du dat! Na in na “di Ɔlmayti.” (Rɛv. 1:​8) So i gɛt di pawa fɔ dɔnawe wit ɛni ɛnimi, ivin day. (1 Kɔr. 15:​26) Dis tin we wi no de ɛp wi fɔ gɛt trɛnk ɛn kɔrej. Tink bɔt Sista Ɛma Anɔld in ɛkspiriɛns. Tin dɛn bin apin to in ɛn in famili insay Wɔl Wɔ II we bin rili tɛst dɛn fet. Pipul dɛn we in galpikin lɛk bin day na Nazi kɔnsɛntreshɔn kamp dɛn, so fɔ mek i go ɛnkɔrej am, i tɛl am se: “If pipul dɛn we dɔn day nɔ go ɛva gɛt layf bak, dat min se wi ɛnimi we na day strɔng pas Gɔd. Bɔt nɔto so i bi.” Wan dawt nɔ de se natin nɔ de we strɔng pas Jiova! Di ɔlmayti Gɔd we mek layf gɛt pawa fɔ gi layf bak to di wan dɛn we dɔn day.

⁸ Wan ɔda rizin we mek wi no se Gɔd ebul fɔ gi layf bak to di wan dɛn we dɔn day na bikɔs i nɔ de ɛva fɔgɛt sɔntin. I de kɔl ɔl di sta dɛn bay dɛn nem. (Ayz. 40:​26) Dɔn bak, i de mɛmba di wan dɛn we dɔn day. (Job 14:​13; Lyuk 20:​37, 38) I izi fɔ lɛ i mɛmba ɔltin bɔt di wan dɛn we i go gi layf bak, dat na tin dɛn lɛk aw dɛn bin luk lɛk, di abit dɛn  we dɛn bin gɛt, di tin dɛn we apin na dɛn layf, ɛn di tin dɛn we de na dɛn maynd.

9. Wetin mek yu biliv Jiova in prɔmis fɔ gi layf bak to pipul dɛn tumara bambay?

⁹ Wi dɔn si klia wan se wi fɔ biliv Jiova in prɔmis fɔ gi layf bak to pipul dɛn tumara bambay bikɔs wi no se i want fɔ du wetin i dɔn prɔmis ɛn i gɛt di pawa fɔ du am. Tink bak bɔt wan ɔda rizin we fɔ mek wi biliv Gɔd in prɔmis fɔ se pipul dɛn go gɛt layf bak: Jiova dɔn ɔlrɛdi gi layf bak to pipul dɛn we dɔn day. Insay di tɛm we dɛn bin de rayt di Baybul, i bin mek Jizɔs ɛn sɔm fetful man dɛn gɛt di pawa fɔ gi layf bak to di wan dɛn we dɔn day. Lɛ wi tɔk bɔt wan pan di tɛm dɛn we Jizɔs bin gi layf bak to pɔsin we dɔn day, akɔdin to wetin de na Jɔn chapta 11.

10. Wetin bin apin we Jizɔs bin de prich oba di Jɔdan? Wetin i bin du? (Jɔn 11:​1-3)

¹⁰ Rid Jɔn 11:​1-3. Imajin wetin bin apin na Bɛtani we di ia 32 bin want fɔ dɔn. Jizɔs bin gɛt tayt padi dɛn na dis vilej, we na Lazarɔs ɛn in tu sista dɛn we nem Meri ɛn Mata. (Lyuk 10:​38-42) Bɔt Lazarɔs bin sik, ɛn in sista dɛn bin de wɔri. Dɛn sɛn mɛsej to Jizɔs, bɔt Jizɔs bin de oba say na di Jɔdan, so i go nid fɔ waka fɔ lɛk tu dez fɔ rich na Bɛtani. (Jɔn 10:​40) I sɔri fɔ no se Lazarɔs bin day arawnd di tɛm we di mɛsenja dɛn rich to Jizɔs. Pan ɔl we Jizɔs bin no se i nɔ te yet we in padi day, i bin kɔntinyu fɔ de na di Jɔdan fɔ tu dez mɔ, ɛn afta dat i go na Bɛtani. So bay di tɛm we Jizɔs rich, Lazarɔs bin dɔn day fɔ 4 dez. Jizɔs bin plan fɔ du sɔntin we go bɛnifit in padi dɛn ɛn mek Gɔd gɛt prez.—Jɔn 11:​4, 6, 11, 17.

11. Wetin dis akawnt tich wi bɔt padi biznɛs?

¹¹ Dis akawnt tich wi sɔntin bɔt padi biznɛs. Tink bɔt dis: We Meri ɛn Mata bin sɛn mɛsej to Jizɔs, dɛn nɔ bin aks am fɔ kam na Bɛtani. Dɛn bin jɔs tɛl am se in gud padi nɔ wɛl. (Jɔn 11:​3) We Lazarɔs day, Jizɔs bin fɔ dɔn gi am layf bak ilɛk i de fa say. Bɔt Jizɔs bin disayd fɔ go na Bɛtani fɔ de wit in padi dɛn we na Meri ɛn Mata. Yu gɛt padi we rɛdi fɔ ɛp yu ilɛk yu nɔ aks am? If na so i bi, dat min se yu go ebul fɔ abop pan am fɔ ɛp yu “di tɛm we prɔblɛm go kam.” (Prɔv. 17:​17, NWT) Lɛk Jizɔs, i go fayn fɔ lɛ wi bi dis kayn padi to ɔda pipul dɛn. Lɛ wi kɔntinyu fɔ tɔk bɔt di akawnt ɛn si wetin bin apin nɛks.

12. Wetin Jizɔs prɔmis Mata? Wetin mek in prɔmis nɔto ɛmti prɔmis? (Jɔn 11:​23-26)

¹² Rid Jɔn 11:​23-26. Mata bin kam fɔ no se Jizɔs dɔn rich nia Bɛtani. So i rɔsh go mit Jizɔs ɛn tɛl am se: “Masta, if yu bin de na ya, mi brɔda nɔ bin fɔ day.” (Jɔn 11:​21) Na tru se Jizɔs bin fɔ dɔn mɛn Lazarɔs. Bɔt i bin want fɔ du sɔntin we wɔndaful pas dat. I prɔmis Mata se: “Yu brɔda go gɛt layf bak.” I bin gi Mata  ɔda rizin fɔ biliv in prɔmis bay we i se: “Na mi de gi layf bak ɛn na mi na di layf.” Fɔ tru, Jiova bin dɔn gi Jizɔs di pawa fɔ gi layf bak to di wan dɛn we dɔn day. Bifo dis tɛm, Jizɔs bin dɔn gi layf bak to wan yɔŋ titi jɔs afta i day, ɛn i bin dɔn gi layf bak to wan yɔŋman shɔt tɛm afta i day. (Lyuk 7:​11-15; 8:​49-55) Bɔt fɔ se i go ebul gi layf bak to pɔsin we dɔn day fɔ 4 dez ɛn we in bɔdi dɔn bigin fɔ rɔtin?

13. Akɔdin to Jɔn 11:​32-35, wetin Jizɔs bin du we i si Meri ɛn ɔda pipul dɛn de kray? (Luk bak di pikchɔ.)

¹³ Rid Jɔn 11:​32-35. Imajin wetin bin apin nɛks. Meri, we na Lazarɔs in ɔda sista bin go mit Jizɔs. Insɛf tɔk wetin in sista bin tɔk. I se: “Masta, if yu bin de na ya, mi brɔda nɔ bin fɔ day.” In ɛn ɔda pipul dɛn at bin rili pwɛl. We Jizɔs si ɛn yɛri dɛn de kray, i bin rili fil am. Bikɔs Jizɔs rili lɛk in padi dɛn, insɛf bin kray. I ɔndastand se wi kin rili fil am we pɔsin we wi lɛk day. Wan dawt nɔ de se i bin rili want fɔ du sɔntin we go mek in padi dɛn lɛf fɔ kray.

14. Wetin wi lan bɔt Jiova frɔm wetin Jizɔs bin du we i si Meri de kray?

¹⁴ Di tin we Jizɔs du we i si Meri de kray de tich wi se Jiova na Gɔd we rili gɛt sɔri-at. Wetin mek wi se so? Lɛk aw wi bin tɔk na di atikul bifo dis wan, Jizɔs de falamakata di we aw in Papa de tink ɛn fil pafɛkt wan. (Jɔn 12:​45) So we wi rid se Jizɔs bin rili fil am ɛn i kray we i si in padi dɛn de kray, dat min se Jiova sɛf de rili fil am we i de si wi de kray bikɔs wi at pwɛl. (Sam 56:​8) Dis de mek yu rili want fɔ kam nia wi Gɔd we gɛt sɔri-at, nɔto so?

15. Akɔdin to wetin de na Jɔn 11:​41-44, wetin bin apin na Lazarɔs in grev? (Luk bak di pikchɔ.)

¹⁵ Rid Jɔn 11:​41-44. Jizɔs rich na di grev usay dɛn bɛr Lazarɔs, ɛn i tɛl dɛn fɔ pul di ston we bin de bifo di grev. Mata nɔ bin gri fɔs, ɛn i tɔk se di bɔdi go dɔn smɛl bay da tɛm de. Jizɔs ansa am se: “A nɔ bin tɛl yu se if yu biliv yu go si Gɔd in glori?” (Jɔn 11:​39, 40) Jizɔs es in ed ɛn pre bifo di pipul dɛn. I bin want fɔ mek  Jiova gɛt ɔl di prez fɔ wetin de kam apin. Dɔn Jizɔs ala lawd wan se: “Lazarɔs, kam na do!” Ɛn Lazarɔs waka kɔmɔt insay di grev! Jizɔs bin jɔs dɔn du sɔntin we sɔm pipul dɛn bin fil se nɔ go pɔsibul.—Luk di stɔdi not fɔ Jɔn 11:​17.

16. Aw di akawnt na Jɔn chapta 11 de mek wi gɛt mɔ fet pan di op fɔ se pipul dɛn go gɛt layf bak?

¹⁶ Di akawnt na Jɔn chapta 11 de mek wi gɛt mɔ fet pan di op fɔ se pipul dɛn go gɛt layf bak. Aw? Mɛmba wetin Jizɔs bin prɔmis Mata. I se: “Yu brɔda go gɛt layf bak.” (Jɔn 11:​23) Jɔs lɛk in Papa, Jizɔs bin rili want fɔ gi am layf bak, ɛn i gɛt di pawa fɔ du wetin i dɔn prɔmis. Di kray we i bin kray sho se i rili want fɔ gi layf bak to pipul dɛn we dɔn day ɛn fɔ pul di pwɛlat we day de mek pipul dɛn gɛt. Ɛn we Lazarɔs bin waka kɔmɔt na di grev, Jizɔs bin pruv bak se i gɛt di pawa fɔ gi layf bak to pɔsin we dɔn day. Dɔn bak, tink bɔt wetin Jizɔs bin mɛmba Mata. I se: “A nɔ bin tɛl yu se if yu biliv yu go si Gɔd in glori?” (Jɔn 11:​40) Wi gɛt gud rizin dɛn fɔ biliv se Gɔd in prɔmis fɔ gi layf bak to di wan dɛn we dɔn day go kam tru. Bɔt wetin wi go du fɔ mek dis op rial to wi mɔ ɛn mɔ?

17. Wetin wi fɔ mɛmba we wi de rid Baybul akawnt dɛn bɔt pipul dɛn we bin gɛt layf bak?

¹⁷ Rid ɛn tink gud wan bɔt pipul dɛn we bin gɛt layf bak trade. Di Baybul tɔk bɔt et pipul dɛn we bin gɛt layf bak na di wɔl. c Yu nɔ tink se i go fayn fɔ tek tɛm stɔdi ɛniwan pan dɛn akawnt dɛn de? We yu de du dat, mɛmba se dɛn man, uman, ɛn pikin dɛn ya na bin rial pipul dɛn. Luk fɔ lɛsin dɛn we yu go lan. Tink bɔt aw ɛniwan pan di ɛgzampul dɛn de sho se Gɔd want fɔ gi layf bak to di wan dɛn we dɔn day ɛn i gɛt pawa fɔ du am. Ɛn mek shɔ se yu tek tɛm stɔdi bɔt di layf we Jizɔs  bin gɛt bak, we bin impɔtant pas ɔl di ɔda wan dɛn. Mɛmba se bɔku pipul dɛn bin si Jizɔs we i gɛt layf bak, ɛn dis de mek wi gɛt gud rizin fɔ gɛt fet se pipul dɛn go gɛt layf bak tumara bambay.—1 Kɔr. 15:​3-6, 20-22.

18. Aw yu go yuz wi siŋ dɛn we de tɔk bɔt di op fɔ gɛt layf bak gud gud wan? (Luk bak di futnot.)

¹⁸ Go de yuz “Gɔd siŋ dɛn” we de tɔk bɔt di op fɔ gɛt layf bak. d (Ɛfi. 5:​19) Dɛn siŋ dɛn ya de mek di op fɔ gɛt layf bak rial to wi mɔ ɛn mɔ, ɛn dɛn de ɛp wi fɔ gɛt mɔ fet pan dis wɔndaful op. Go de lisin to dɛn, lan aw fɔ siŋ dɛn, ɛn we una gɛt famili wɔship, una tɔk bɔt wetin di wɔd dɛn min. Kram di wɔd dɛn, ɛn tink gud wan bɔt dɛn so dat dɛn go tɔch yu at ɛn ɛp yu fɔ gɛt mɔ fet. We yu du dat, if yu gɛt prɔblɛm we go put yu layf pan denja ɔ if pɔsin we yu lɛk day, Jiova in spirit go ɛp yu fɔ mɛmba dɛn siŋ dɛn ya, ɛn dɛn go ɛp yu fɔ gɛt kɔrej ɛn trɛnk.

19. Wetin na sɔm tin dɛn we wi kin imajin bɔt di tɛm we pipul dɛn go gɛt layf bak? (Rid di bɔks we gɛt di taytul “ Wetin Yu Go Aks Dɛn?”)

¹⁹ Imajin yusɛf na Paradays. Jiova mek wi di kayn we we wi ebul fɔ imajin se wi de na di nyu wɔl. Wan sista ɛksplen se: “Bikɔs a kin yuz bɔku tɛm fɔ imajin se a de na di nyu wɔl, dat de mek i tan lɛk se a ebul fɔ smɛl di flawa dɛn we de gro na Paradays.” Imajin aw i go tan lɛk fɔ mit fetful man ɛn uman dɛn we di Baybul tɔk bɔt. Udat yu go rili want fɔ si? Us kwɛstyɔn dɛn yu go aks da pɔsin de? Imajin bak aw i go tan lɛk fɔ mit di wan dɛn we yu lɛk we bin dɔn day. Tink bɔt di fɔs wɔd dɛn we yu go tɛl dɛn, di we aw yu go ɔg dɛn, ɛn aw yu go rili gladi fɔ si dɛn.

20. Wetin wi fɔ mekɔp wi maynd fɔ du?

²⁰ Wi rili gladi we Jiova dɔn prɔmis wi se di wan dɛn we dɔn day go gɛt layf bak. Wi shɔ se dis prɔmis go kam tru bikɔs Jiova want fɔ gi dɛn layf bak ɛn i gɛt di pawa fɔ du am. Lɛ wi mekɔp wi maynd fɔ kɔntinyu fɔ gɛt fet pan dis wɔndaful op. We wi du dat, wi go kam nia wi Gɔd mɔ ɛn mɔ, bikɔs i dɔn prɔmis ɛniwan pan wi se, ‘Di wan dɛn we yu lɛk go gɛt layf bak!’