1. Aw sɔm pipul dɛn de fil bɔt di prichin wok? (Luk bak di pikchɔ.)

 AS JIOVA in pipul dɛn, wi de prich bikɔs wi lɛk wi Papa we de na ɛvin ɛn wi want fɔ ɛp pipul dɛn fɔ lan bɔt am. Bɔku pɔblisha dɛn de rili ɛnjɔy fɔ du di prichin wok. Bɔt ɔda pɔblisha dɛn nɔ de ɛnjɔy fɔ du am. Wetin mek? Sɔntɛm sɔm de rili shem ɛn fil se dɛn nɔ go ebul fɔ tich fayn. Sɔm pipul dɛn nɔ lɛk fɔ go na pipul dɛn os we dɛn nɔ invayt dɛn. Sɔntɛm sɔm go fred se pipul dɛn nɔ go lisin to dɛn. Sɔm nɔ want fɔ mek ɔda pipul dɛn vɛks. So pan ɔl we dɛn brɔda ɛn sista dɛn ya rili lɛk Jiova, i nɔ kin izi fɔ dɛn fɔ go mit pipul dɛn ɛn prich di gud nyuz to dɛn. Bɔt dɛn no se dis wok rili impɔtant ɛn dɛn de tray fɔ prich ɔltɛm. Jiova rili gladi fɔ dɛn!

2. If i nɔ izi fɔ yu fɔ gɛt gladi-at we yu de du di prichin wok, wetin mek yu at nɔ fɔ pwɛl?

² Fɔ se i nɔ kin izi sɔntɛnde fɔ mek yu gɛt gladi-at we yu de prich bikɔs yu de fil dɛn we dɛn de? If na so i bi, mek yu at nɔ pwɛl. Di kɔnfidɛns we yu nɔ gɛt de sho se yu ɔmbul ɛn yu nɔ want mek dɛn pe tumɔs atɛnshɔn pan yu, ɛn i de sho bak se yu nɔ want fɔ agyu wit pipul dɛn. Ɛn nɔbɔdi nɔ go want fɔ mek pɔsin vɛks pan am, mɔ if  i de tray fɔ du gud to di pɔsin. Yu Papa we de na ɛvin no bɔt dɛn prɔblɛm dɛn de ɛn i want fɔ gi yu di ɛp we yu nid. (Ayz. 41:13) Insay dis atikul, wi go tɔk bɔt fayv tin dɛn we go ɛp wi fɔ no wetin fɔ du we wi de fil dɛn we dɛn de ɛn aw wi go ebul fɔ gɛt gladi-at we wi de prich.

LƐ GƆD IN WƆD ƐP YU FƆ GƐT TRƐNK

3. Wetin bin ɛp prɔfɛt Jɛrimaya fɔ prich to ɔda pipul dɛn?

³ Frɔm trade, di mɛsej we Gɔd de gi dɔn de ɛp in savant dɛn fɔ ebul du di tranga wok we dɛn gɛt. Lɛ wi tɔk bɔt prɔfɛt Jɛrimaya in ɛgzampul. I bin de fred we Jiova bin gi am di wok fɔ prich. Jɛrimaya bin tɔk se: “A nɔ no aw fɔ tɔk, bikɔs mi na bɔbɔ.” (Jɛr. 1:6) Wetin bin ɛp am fɔ gɛt maynd fɔ prich? Na Gɔd in wɔd bin gi am di trɛnk we i nid fɔ prich. I bin tɔk se: “I bin tan lɛk faya we de bɔn insay mi bon dɛn, ɛn a bin taya fɔ kip am insay de.” (Jɛr. 20:8, 9) Pan ɔl we di pipul dɛn we Jɛrimaya bin de prich to nɔ bin de lisin, di mɛsej we i gɛt bin gi am di trɛnk we i nid fɔ kɔntinyu fɔ du in wok.

4. Wetin go apin we wi rid Gɔd in Wɔd ɛn tink gud gud wan bɔt am? (Koloshians 1:9, 10)

⁴ Kristian dɛn de gɛt di trɛnk we dɛn nid we dɛn rid Gɔd in Wɔd di Baybul. We apɔsul Pɔl bin de rayt to di kɔngrigeshɔn na Kolose, i bin tɔk se we dɛn lan di tru tin dɛn, dat go mek dɛn “waka di we aw Jiova want” ɛn kɔntinyu “fɔ du ɔlkayn gud wok.” (Rid Koloshians 1:9, 10.) Wan pan dɛn gud wok dɛn de, na fɔ prich di gud nyuz. So we wi rid Gɔd in Wɔd ɛn tink gud gud wan bɔt am, dat go mek wi gɛt strɔng fet pan Jiova ɛn wi go si klia wan se fɔ prich di gud nyuz bɔt di Kiŋdɔm na tin we rili impɔtant.

5. Aw yu go bɛnifit mɔ we yu de rid ɛn stɔdi di Baybul?

⁵ Fɔ mek wi go rili bɛnifit frɔm Gɔd in Wɔd, wi fɔ tek tɛm rid, stɔdi, ɛn tink gud gud wan bɔt am. Nɔ rɔsh. If yu si vas we yu nɔ ɔndastand, nɔ jomp am. Bifo dat, yuz di Watch Tower Publications Index ɔ di Risach Gayd fɔ Jiova Witnɛs Dɛn fɔ ɛp yu fɔ ɔndastand da vas de. If yu tek yu tɛm fɔ stɔdi, dat go mek yu gɛt strɔng fet ɛn biliv se di tin dɛn we de insay Gɔd in Wɔd na tru. (1 Tɛs. 5:21) Di mɔ we yu biliv se di tin dɛn we de insay Gɔd in  Wɔd na tru, na di mɔ yu go ɛnjɔy fɔ tɛl ɔda pipul dɛn bɔt wetin yu dɔn lan.

PRIPIA FAYN BIFO YU GO PRICH

6. Wetin mek yu fɔ pripia fayn bifo yu go prich?

⁶ If yu pripia fayn fɔ go prich, i go izi fɔ mek yu tɔk to pipul dɛn. Jizɔs bin ɛp in disaypul dɛn fɔ pripia bifo i sɛn dɛn fɔ go prich. (Lyuk 10:1-11) Bikɔs di disaypul dɛn du wetin Jizɔs tɛl dɛn, dɛn bin gladi bikɔs ɔf wetin dɛn bin ebul fɔ du.​—Lyuk 10:17.

7. Aw wi go pripia fɔ prich? (Luk bak di pikchɔ.)

⁷ Aw wi go pripia fɔ prich? I go fayn fɔ mek wi tink bɔt wetin wi go want fɔ tɔk ɛn aw wi go tɔk am insay wi yon wɔd dɛn. I go fayn bak fɔ mek wi tink bɔt tin dɛn we pipul dɛn we de na wi tɛritri go tɔk ɛn tray fɔ tink bɔt aw wi go ansa dɛn. Dɔn we wi mit pipul dɛn, wi fɔ tray fɔ rilaks, smayl, ɛn tɔk fayn to dɛn.

8. Aw Kristian dɛn tan lɛk di kɔtri pɔt we apɔsul Pɔl tɔk bɔt na in ɛgzampul?

⁸ We apɔsul Pɔl de tɔk bɔt di wok we wi gɛt fɔ prich, i bin se: “Wi gɛt dis valyu tin insay kɔntri pɔt dɛn.” (2 Kɔr. 4:7) Wetin na dis valyu tin? Na di wok we wi de du fɔ prich di gud nyuz bɔt di Kiŋdɔm we go sev pipul dɛn layf. (2 Kɔr. 4:1) Wetin di kɔtri pɔt dɛn tinap fɔ? Dɛn tinap fɔ Gɔd in savant dɛn we de tɛl ɔda pipul dɛn bɔt di gud nyuz. Insay Pɔl in tɛm, pipul dɛn we bin de du biznɛs bin de yuz kɔntri pɔt dɛn fɔ put valyu tin dɛn lɛk it, wayn, ɛn mɔni fɔ go wit dɛn difrɛn say dɛn. Semweso, Jiova dɔn gi wi mɛsej we valyu we na di gud nyuz. Wit Jiova in ɛp, wi go gɛt di trɛnk we wi nid fɔ tɛl pipul dɛn di gud nyuz.

PRE FƆ MEK YU GƐT MAYND

9. Wetin go ɛp wi fɔ lɛf fɔ fred mɔtalman ɔ fɔ fred se dɛn nɔ go lisin to wi? (Luk bak di pikchɔ.)

⁹ Sɔntɛnde, wi kin fred mɔtalman ɔ fred se dɛn nɔ go lisin to wi mɛsej. Wetin go ɛp wi fɔ lɛf fɔ fred? Tink bɔt wetin di apɔsul dɛn bin pre fɔ afta dɛn tɛl dɛn fɔ stɔp fɔ prich. Bifo dɛn fred, dɛn pre to Jiova fɔ ɛp dɛn fɔ “kɔntinyu fɔ gɛt maynd fɔ tɔk bɔt [in] wɔd.” Jiova bin ansa dɛn prea wantɛm wantɛm. (Akt 4: 18, 29, 31) If sɔntɛnde wisɛf kin fred mɔtalman, wi want fɔ pre to Jiova fɔ ɛp wi. Pre to Jiova fɔ mek i ɛp yu fɔ lɛf fɔ fred mɔtalman ɛn sho se yu lɛk pipul dɛn.

10. Aw Jiova de ɛp wi fɔ kɔntinyu fɔ bi in Witnɛs dɛn? (Ayzaya 43:10-12)

¹⁰ Jiova dɔn pik wi fɔ bi in Witnɛs dɛn ɛn i dɔn prɔmis fɔ ɛp wi fɔ gɛt maynd. (Rid Ayzaya 43:10-12.) Lɛ wi tɔk bɔt 4 we dɛn aw i de du am. Fɔs, Jizɔs de wit wi ɛnitɛm we wi de prich di gud nyuz. (Mat. 28:18-20) Sɛkɔn, Jiova dɔn pik enjɛl dɛn fɔ ɛp wi. (Rɛv. 14:6) Tɔd, Jiova dɔn gi wi in oli spirit fɔ ɛp wi fɔ mɛmba di tin dɛn we wi dɔn lan. (Jɔn 14:25, 26) Nɔmba 4, Jiova dɔn gi wi brɔda ɛn sista dɛn fɔ wok wit. Wi gɛt ɔl wetin wi nid fɔ kɔntinyu fɔ prich bikɔs wi gɛt Jiova ɛn wi brɔda ɛn sista dɛn fɔ sɔpɔt wi.

RƐDI FƆ AJƆST ƐN TINK DI RAYT WE

11. Aw yu go ebul fɔ prich to mɔ pipul dɛn? (Luk bak di pikchɔ.)

¹¹ Yu at kin pwɛl we yu nɔ de mit bɔku pipul dɛn na os? Yu nɔ tink se i go fayn fɔ aks yusɛf dɛn kwɛstyɔn dɛn ya: ‘Usay di pipul dɛn na mi tɛritri de rayt naw?’ (Akt 16:13) ‘Dɛn de na wokples ɔ dɛn dɔn go bay bay?’ If na so i bi, yu tink se yu go ebul fɔ prich to mɔ pipul dɛn we yu du strit witnɛsin? Wan brɔda we nem Jɔshwa tɔk se, “A dɔn gɛt bɔku chans dɛn fɔ prich we a de waka na dɛn shop dɛn ɛn ɔda pɔblik ples dɛn.” In ɛn in wɛf Brijɛkt dɔn ebul bak fɔ prich to bɔku pipul dɛn na dɛn os dɛn we dɛn kin go ivintɛm ɛn Sɔnde aftanun dɛn.—Ɛfi. 5:15, 16.

12. Aw wi go no wetin pipul dɛn biliv ɛn wetin dɛn want fɔ no bɔt?

¹² If pɔsin sho se i nɔ want fɔ lisin to di mɛsej, tray fɔ no wetin i biliv ɛn wetin i go want fɔ no bɔt. Jɔshwa ɛn Brijɛkt bin de yuz di kwɛstyɔn we de na di frɔnt pej na wan trakt fɔ stat fɔ tɔk to pɔsin. Fɔ ɛgzampul, we dɛn de yuz di trakt we gɛt di taytul Aw Yu Si di Baybul? dɛn de se: “Sɔm pipul dɛn fil se di Baybul na buk we kɔmɔt frɔm Gɔd, bɔt ɔda pipul dɛn nɔ tink so. Wetin yu tink?” Bɔku  tɛm, dɛn kwɛstyɔn dɛn ya kin mek dɛn gɛt chans fɔ bigin tɔk to di pɔsin.

13. Wetin mek wi go se di prichin wok de go bifo ilɛksɛf pipul dɛn nɔ lisin to wi? (Prɔvabs 27:11)

¹³ Ilɛksɛf pipul dɛn nɔ lisin to wi we wi de prich, wi go stil rich wi gol. Wetin mek? Na bikɔs wi dɔn du wetin Jiova ɛn in Pikin want wi fɔ du we na fɔ prich. (Akt 10:42) Ilɛksɛf wi nɔ si pipul dɛn fɔ prich to ɔ di wan dɛn we rɛdi fɔ lisin to wi, wi go stil gladi bikɔs wi no se wi dɔn du wetin wi Papa we de na ɛvin want wi fɔ du.​—Rid Prɔvabs 27:11.

14. Wetin mek wi go gladi we ɔda pɔblisha fɛn pɔsin na di tɛritri we want fɔ lan mɔ?

¹⁴ Wi go gladi bak we ɔda pɔblisha fɛn pɔsin na di tɛritri we want fɔ lan mɔ. Di Wachtawa kɔmpia di wok we wi de du to we pipul dɛn de fɛn pikin we dɔn lɔs. Bɔku pipul dɛn go luk fɔ am ɛn dɛn go luk difrɛn difrɛn say dɛn. We dɛn fɛn di pikin, nɔto di pɔsin nɔmɔ we fɛn am go gladi, bɔt ɔlman go gladi. Semweso, ɔlman na di kɔngrigeshɔn de ɛp fɔ mek pipul dɛn bi Jizɔs in disaypul. Ɔlman na di kɔngrigeshɔn nid fɔ wok na di tɛritri, ɛn wi ɔl de gladi we wan pɔsin stat fɔ atɛnd mitin.

PE ATƐNSHƆN PAN DI LƐK WE YU LƐK JIOVA ƐN YU NEBA

15. We wi aplay wetin de na Matyu 22:37-39, aw dat go ɛp wi fɔ gɛt mɔ zil fɔ prich? (Luk bak na di frɔnt pej.)

¹⁵ Wi go gɛt mɔ zil fɔ du di prichin wok we wi pe atɛnshɔn to di lɛk we wi lɛk Jiova ɛn wi neba dɛn. (Rid Matyu 22:37-39.) Jɔs tink bɔt aw Jiova de rili gladi we i de si se wi de du di wok ɛn aw pipul dɛn kin gladi we dɛn stat fɔ stɔdi di Baybul! Tink bak bɔt di chans we dɛn go gɛt fɔ gɛt layf we go de sote go, if dɛn lisin to wi mɛsej.—Jɔn 6:40; 1 Tim. 4:16.

16. Aw wi go gɛt gladi-at fɔ du wi prichin wok we wi nɔ ebul kɔmɔt na wi os? Gi ɛgzampul dɛn.

¹⁶ Ɛni rizin de we mek yu nɔ ebul kɔmɔt na yu os? If na so i bi, pe atɛnshɔn pan wetin yu ebul fɔ du fɔ sho se yu lɛk Jiova ɛn yu neba dɛn. Insay di COVID-19 pandɛmik, Samiɛl ɛn Denia nɔ bin ebul fɔ kɔmɔt na dɛn os. Insay da tɛm de we tin nɔ bin izi, dɛn bin de yuz fon fɔ  prich, rayt lɛta dɛn, ɛn kɔndɔkt Baybul stɔdi dɛn na Zum ɔltɛm. Samiɛl bin de prich to di wan dɛn we bin de na di klinik usay dɛn bin de trit am fɔ kansa. I tɔk se: “We wi gɛt prɔblɛm dɛn, i kin mek wi wɔri, taya, ɛn i kin tɛst di fet we wi gɛt. So wi nid fɔ tray fɔ gɛt gladi-at we wi de sav Jiova.” Insay dɛn tɛm dɛn de, Denia bin fɔdɔm ɛn i nɔ bin ebul fɔ kɔmɔt na bed fɔ tri mɔnt. Dɔn i bin nid fɔ yuz wilchia fɔ siks mɔnt. I tɔk se: “A tray fɔ du ɔl wetin a ebul fɔ du. A bin ebul fɔ prich to di nɔs we bin de kam fɛn mi ɛn di wan dɛn we de kam fɔ lɛf tin dɛn na os. A bin ebul fɔ tɔk bak to wan uman na tɛlifon we de wok na wan kɔmni we de sɛl tin dɛn we dɛn de yuz na ɔspitul.” Di tin dɛn we bin de apin to Samiɛl ɛn Denia bin mek dɛn nɔ ebul fɔ du ɔl wetin dɛn bin want, bɔt dɛn bin du wetin dɛn ebul ɛn dɛn bin gladi fɔ dat.

17. Aw yu go rili bɛnifit frɔm di tin dɛn we wi dɔn tɔk bɔt na dis atikul?

¹⁷ Tray fɔ aplay ɔl di fayv tin dɛn we wi dɔn tɔk bɔt na dis atikul. Ɛniwan pan dɛn tan lɛk di difrɛn tin dɛn we wi kin yuz fɔ kuk wan patikyula it. We wi put ɔltin togɛda, i de mek di it swit. We wi du ɔl di tin dɛn we wi dɔn tɔk bɔt, i go ɛp wi fɔ gɛt mɔ gladi-at we wi de prich.