A bɔn insay 1955. Na tri bɔypikin dɛn mi mama ɛn papa bɔn ɛn mi na di las wan. A mɛn nia di sawt pat na Finland, na wan siti we dɛn de kɔl naw Vanta.

Mi mama baptayz as wan pan Jiova Witnɛs dɛn shɔt tɛm bifo i bɔn mi. Bɔt mi papa bin de agens di trut ɛn i nɔ bin de alaw mi mama fɔ tich wi ɔ ivin go wit wi na mitin. So we mi papa nɔ kin de, mi mama bin de tich wi di men tin dɛn we di Baybul de tich.

Frɔm we a bin smɔl, a bin mekɔp mi maynd se a go obe Jiova ɔltɛm. Fɔ ɛgzampul, we a bin ol sɛvin ia, mi ticha bin vɛks pan mi bad bad wan bikɔs a nɔ gri fɔ it verilättyjä (Finnish blɔd pankek). So i kwis mi mɔt wit wan an fɔ opin am ɛn i tray fɔ put di pankek na mi mɔt wit di ɔda an. Bɔt a bin ebul fɔ push in an ɛn di pankek fɔdɔm.

Mi papa bin day we a ol 12 ia. Afta dat, a stat fɔ go di mitin dɛn. Di brɔda ɛn sista dɛn bin rili sho se dɛn bisin bɔt mi, ɛn dis bin ɛp mi fɔ kam nia Jiova mɔ ɛn mɔ. A bin stat fɔ rid di Baybul ɛvride ɛn stɔdi wi pɔblikeshɔn dɛn gud gud wan. Bikɔs a bin de du dat, a bin ebul fɔ baptayz we a ol 14 ia insay Ɔgɔst 8, 1969.

 A stat fɔ rɛgyula payɔnia jɔs afta a dɔn skul. Insay shɔt tɛm, a bin muf go na Piɛlavɛsi we na wan siti we de midul Finland usay dɛn bin nid mɔ pipul dɛn fɔ prich.

Na Piɛlavɛsi a bin mit di uman we go bi mi wɛf, we nem Saka. A bin lɛk am bikɔs i bin ɔmbul ɛn i bin lɛk Jiova. I nɔ bin de tray fɔ mek ɔlman sabi am ɔ fɔ gɛt prɔpati dɛn. Wi tu bin rili want fɔ yuz ɔl wi tɛm fɔ sav Jiova, ɛn wi bin rɛdi fɔ du ɛni wok we dɛn gi wi. Wi bin mared insay Mach 23, 1974. Wi bin disayd nɔ fɔ go fɔ wi ɔnimun, so wi go na Katula usay dɛn nid mɔ pipul dɛn fɔ prich bɔt di Kiŋdɔm pas Piɛlavɛsi.

Frɔm we wi mared, Jiova dɔn sho se i go gi wi wetin wi nid if wi put di Kiŋdɔm fɔs na wi layf. (Mat. 6:33) Fɔ ɛgzampul, we wi bin de na Katula, wi nɔ bin gɛt motoka. Fɔs, na baysikul wi bin de yuz fɔ go ɔlsay. Bɔt insay winta, di ples bin de kol pasmak. Wi bin nid motoka fɔ prich na wi kɔngrigeshɔn tɛritri we bin rili big. Bɔt wi nɔ bin gɛt mɔni fɔ bay motoka.

Mi big brɔda bin kam fɛn wi di tɛm we wi nɔ bin de ɛkspɛkt. I bin gi wi in motoka. I bin dɔn pe inshɔrans fɔ am. So wi bin jɔs nid fɔ bay fyuɛl. Afta dat, wi bin gɛt di motoka we wi nid.

Jiova bin sho se i dɔn tek di wok fɔ kia fɔ di tin dɛn we wi nid. Wi yon wok na bin fɔ put di Kiŋdɔm fɔs na wi layf.

We wi bin de atɛnd di Payɔnia Savis Skul insay 1978, Raimo Kuɔkanɛn, a we na bin wan pan wi instrɔktɔ dɛn, bin ɛnkɔrej wi fɔ aplay fɔ Giliad Skul. So wi bin stat fɔ lan Inglish fɔ mek wi go kwalifay fɔ go di skul. Bɔt insay 1980, dɛn bin invayt wi fɔ go wok na di branch ɔfis na Finland bifo wi aplay fɔ di skul. Da tɛm de Bɛtɛlayt dɛn nɔ bin de aplay fɔ go Giliad. Bɔt wi bin want fɔ sav Jiova usay i want wi fɔ sav am, nɔto usay wi fil se wi fɔ sav am. So wi bin gri fɔ go wok na Bɛtɛl. Bɔt wi bin stil kɔntinyu fɔ lan Inglish ɛn tink se sɔntɛm wi go gɛt chans fɔ aplay fɔ go Giliad.

 Afta sɔm ia, di Gɔvnin Bɔdi bin tɔk se Bɛtɛlayt dɛn kin aplay fɔ go Giliad. Wi bin fil di fɔm wantɛm wantɛm, bɔt nɔto bikɔs wi nɔ bin gladi fɔ de na Bɛtɛl. Wi bin gladi fɔ wok na Bɛtɛl! Wi bin jɔs want fɔ rɛdi wisɛf fɔ go usay dɛn nid mɔ pipul dɛn if wi kwalifay fɔ du dat. Dɛn bin gri fɔ mek wi go na Giliad ɛn wi bin gradyuet frɔm di 79 klas insay Sɛptɛmba 1985. Na Kolombia dɛn bin sɛn wi.

Na di branch ɔfis fɔs dɛn sɛn wi fɔ wok we wi go na Kolombia. A bin tray fɔ du di wok we dɛn gi mi na Bɛtɛl fayn, bɔt afta wi wok fɔ wan ia, a bin fil se wi nid fɔ chenj wi asaynmɛnt. So fɔ di fɔs ɛn las tɛm, a bin tɛl dɛn se a want difrɛn asaynmɛnt. Afta dat, dɛn bin sɛn wi as mishɔnari dɛn na Nɛiva siti, we de na Uila.

Di prichin wok na sɔntin we a lɛk fɔ du. We a nɔ bin mared yet we a de payɔnia na Finland, sɔntɛnde a kin stat fɔ prich ali mɔnin te ivintɛm. Naw we wi jɔs mared mi ɛn Saka kin spɛnd lɔng tɛm fɔ prich. We wi de prich na say dɛn we de fa frɔm usay wi de, sɔntɛnde wi kin slip insay wi motoka. Dis kin mek wi ridyus di tɛm we wi de travul ɛn i de mek wi stat fɔ prich kwik di ɔda de.

As mishɔnari dɛn, wi stil gɛt di sem zil we wi bin gɛt fɔ du di prichin wok lɛk trade. Wi kɔngrigeshɔn bin go bifo ɛn wi brɔda ɛn sista dɛn na Kolombia bin gɛt rɛspɛkt, dɛn bin de sho lɔv, ɛn dɛn bin gɛt tɛnki.

Tɔŋ dɛn bin de nia Nɛiva usay wi bin de, usay Jiova Witnɛs dɛn nɔ bin de. A bin de tink bɔt aw di gud nyuz go rich na dɛn eria dɛn de. Bɔt bikɔs fɛt-fɛt bin de na dɛn eria dɛn de, i nɔ bin sef fɔ mek pɔsin we nɔ kɔmɔt na dɛn tɔŋ dɛn de, go de. So a bin pre fɔ mek wan pan di pipul dɛn we de na dɛn tɔŋ dɛn de bi Jiova Witnɛs. A bin tink se da pɔsin de fɔ de na Nɛiva fɔ mek i lan di trut. So a bin pre bak fɔ mek di pɔsin bi machɔ Kristian jɔs afta i baptayz ɛn go na in om-tɔŋ fɔ prich di gud nyuz. A fɔ dɔn no se di we aw Jiova de du tin bɛtɛ fa fa we pas aw a de tink.

Shɔt tɛm afta dat, a stat fɔ stɔdi di Baybul wit wan yɔŋman we nem Fanando Gɔnzalɛz. I bin de na Algɛsiras, we na wan pan di tɔŋ dɛn usay Jiova Witnɛs dɛn nɔ de. Fanando bin de travul pas 50 kilomita (30 mayl) fɔ go wok na Nɛiva. I bin de pripia gud gud wan fɔ in stɔdi ɛn i stat fɔ atɛnd ɔl di mitin dɛn wantɛm wantɛm. Frɔm di fɔs wik we i bigin fɔ stɔdi, i bin de gɛda pipul dɛn na in om-tɔŋ ɛn tich dɛn wetin i dɔn lan na di Baybul.

Fanando bin baptayz insay Janwari 1990, siks mɔnt afta i stat fɔ stɔdi. Afta dat, i bin stat fɔ rɛgyula payɔnia. Bikɔs pɔsin we de na Algɛsiras dɔn bi Jiova Witnɛs, naw i bin sef fɔ mek di branch ɔfis sɛn spɛshal payɔnia dɛn na di eria. Insay Fɛbwari 1992, dɛn bin mek wan kɔngrigeshɔn na da tɔŋ de.

 Fɔ se Fanando bin jɔs de prich na in om-tɔŋ? Nɔ! Afta i mared, in ɛn in wɛf go na San Visɛnte dɛl Kaguan, wan ɔda tɔŋ usay no Jiova Witnɛs nɔ bin de. Dɛn bin ɛp fɔ mek wan kɔngrigeshɔn de. In 2002, dɛn bin apɔynt Fanando as sakit ovasia, ɛn in ɛn in wɛf Ɔlga de stil du di sakit wok.

Frɔm dis ɛkspiriɛns, a lan se i fayn fɔ pre bɔt patikyula tin dɛn we gɛt fɔ du wit wi asaynmɛnt. Jiova ebul du tin dɛn we wi nɔ ebul du. Afta ɔl, na in gɛt di avɛst wok, nɔto wi.​—Mat. 9:38.

Insay 1990, dɛn bin sɛn wi fɔ du sakit wok. Di fɔs say we wi bin du wi sakit wok na di kapital siti na Bogota. Wi bin de fred se wi nɔ go ebul fɔ du wi wok fayn. Mi ɛn mi wɛf na ɔdinari pipul dɛn ɛn wi nɔ bin gɛt ɛni spɛshal talɛnt. Ɛn wi nɔ yus fɔ de na siti usay bɔku pipul dɛn de. Bɔt Jiova bin mek in prɔmis we de na Filipians 2:13 kam tru: “Gɔd de gi una trɛnk, na in de mek una want fɔ du sɔntin ɛn gi una di pawa fɔ du am.”

Leta, dɛn bin sɛn wi fɔ du sakit wok na Mɛdɛlin di siti we a bin tɔk bɔt we a bigin di stori. Di pipul dɛn we bin de de bin yus fɔ si we pipul dɛn de fɛt-fɛt na strit, so i nɔ bin de ambɔg dɛn igen. Fɔ ɛgzampul, wan tɛm we a bin de kɔndɔkt Baybul stɔdi, sɔm pipul dɛn stat fɔ shut dɛnsɛf na do. A bin want ledɔm na grɔn, bɔt mi Baybul stɔdi bin kɔntinyu fɔ rid di paregraf lɛk se natin nɔ apin. We i dɔn fɔ rid, i go na do. Afta shɔt tɛm i kam bak wit tu smɔl pikin dɛn ɛn tɔk saful wan se, “A sɔri, bɔt a bin nid fɔ go tek mi pikin dɛn.”

Ɔda tɛm dɛn de we wi layf bin de pan denja. Wan tɛm, we wi bin de prich frɔm os to os, mi wɛf rɔn kam to mi ɛn i bin de rili fred. I tɛl mi se wan man bin want fɔ shɔt am. Dat bin rili mek a fred. Bɔt leta, wi kam fɔ no se nɔto Saka dɛn bin want fɔ shut, na pɔsin we bin de pas nia am dɛn bin de tray fɔ shut.

As tɛm de go, wi nɔ bin de fred tumɔs igen. Di we aw di brɔda ɛn sista dɛn bin gɛt maynd we dɛn bin de bia wit dɛn prɔblɛm dɛn de ɛn ɔda wan dɛn we wɔs pas dɛn bin ɛnkɔrej wi. Dat bin mek wi tink se if Jiova de ɛp dɛn, i go ɛp wisɛf. Wi bin de fala di advays dɛn we di ɛlda dɛn we de na di tɔŋ dɛn bin de gi wi ɔltɛm, wi bin de tek tɛm, ɛn wi bin de lɛf ɔltin na Jiova in an.

Na tru se sɔntɛnde, tin dɛn nɔ bin bad lɛk aw wi bin de tink. Wande, a bin de na wan os ɛn i bin tan lɛk se tu uman dɛn bin de kɔs dɛnsɛf na do. A nɔ bin want fɔ wach we pipul dɛn de mek plaba, bɔt di pɔsin we a bin go prich to bin tɛl mi fɔ kam na di viranda. Dɔn a kam fɔ si se di nɔys we a bin de yɛri na bitwin tu parɔt dɛn we bin de falamakata dɛn neba dɛn.

Insay 1997, dɛn bin pik mi fɔ bi wan pan di instrɔktɔ dɛn na di Ministerial  Training School. b A kin gladi ɔltɛm fɔ atɛnd tiokratik skul dɛn, bɔt a nɔ bin de ɛva imajin se a go gɛt di privilɛj fɔ bi wan pan di ticha dɛn.

Leta, a bin sav as distrit ovasia. We da arenjmɛnt de bin dɔn, a bin kɔntinyu fɔ du di sakit wok. So i dɔn pas 30 ia naw we a de ɛnjɔy fɔ sav as instrɔktɔ ɛn sakit ovasia. Dɛn asaynmɛnt dɛn de dɔn mek a gɛt bɔku blɛsin dɛn. Bɔt tin nɔ bin izi fɔ wi ɔltɛm. Lɛ a ɛksplen wetin mek a tɔk so.

Mi na pɔsin we strit. Dis bin ɛp mi fɔ bia wit bɔku prɔblɛm dɛn we nɔ bin izi. Bɔt sɔntɛnde, a bin de du tin pasmak we a bin de tray fɔ kɔrɛkt tin dɛn we bin de apin na di kɔngrigeshɔn dɛn. Wan tɛm, a bin tɛl sɔm pipul dɛn fɔ sho lɔv ɛn nɔ fɔ de pin pan dɛn kɔmpin dɛn. Bɔt misɛf nɔ bin de sho se a gɛt dɛn kwaliti dɛn de da tɛm de.—Rom. 7:​21-23.

Sɔntɛnde, mi at bin de pwɛl pasmak bikɔs ɔf di mistek dɛn we a bin de mek. (Rom. 7:24) Wan tɛm, a pre to Jiova se i go bɛtɛ fɔ mek a lɛf mi mishɔnari wok ɛn go bak na Finland. Da ivintɛm de, a bin atɛnd di mitin. Di ɛnkɔrejmɛnt we a bin gɛt mek a biliv se a fɔ kɔntinyu wit mi asaynmɛnt ɛn kɔntinyu fɔ kɔrɛkt mi mistek dɛn. Te tide, a kin gladi we a tink bɔt aw Jiova bin ansa da prea de. Dɔn bak, a rili gladi fɔ di we aw Jiova bin ɛp mi fɔ lɛf mi bad abit dɛn.

Mi ɛn Saka rili gladi fɔ di privilɛj we Jiova gi wi fɔ yuz bɔku pan wi layf na ful-taym savis. A gladi bak fɔ we Jiova gi mi wɛf we lɛk mi ɛn we fetful to mi ɔl dis tɛm.

I nɔ go te igen, a go rich 70 ia ɛn a go lɛf di privilɛj we a gɛt fɔ wok as instrɔktɔ ɛn sakit ovasia. Bɔt mi at nɔ de pwɛl bikɔs ɔf dis. Wetin mek? Na bikɔs a biliv tranga wan se di tin we kin mek Jiova gɛt ɔnɔ na we wi put wisɛf dɔŋ we wi de sav am, prez am wit ɔl wi at, lɛk am, ɛn sho se wi gɛt tɛnki fɔ ɔl di tin dɛn we i dɔn du fɔ wi. (Mayk. 6:8; Mak 12:32-34) Wi nɔ nid fɔ gɛt impɔtant asaynmɛnt fɔ mek wi go ɔnɔ Jiova.

We a tink bɔt di asaynmɛnt dɛn we a dɔn gɛt, a dɔn si se a nɔ bin gɛt dɛn asaynmɛnt dɛn de bikɔs a bin bɛtɛ pas ɔda pipul dɛn ɔ bikɔs a bin sabi du wan patikyula tin. Nɔto dat na di rizin! Bɔt Jiova bin gi mi dɛn asaynmɛnt dɛn de bikɔs ɔf in spɛshal gudnɛs. I bin gi mi dɛn privilɛj dɛn de pan ɔl we a gɛt say dɛn we a wik. A no se di wangren rizin we mek a ebul du ɔl dɛn wok dɛn de na bikɔs Jiova ɛp mi. We i du dis, i sho in pawa di say dɛn we a wik.​—2 Kɔr. 12:9.