1. Aw Jiova in pipul dɛn bin ɔganayz insay di fɔstɛm Kristian dɛn tɛm?

 ƐNITƐM Jiova gi in pipul dɛn wok fɔ du, i de ɛkspɛkt se dɛn fɔ du am di kayn we we de sho se dɛn ɔganayz. (1 Kɔr. 14:33) Fɔ ɛgzampul, Gɔd want mek pipul dɛn yɛri di gud nyuz ɔlsay na di wɔl. (Mat. 24:14) Jiova dɔn put Jizɔs bifo fɔ du dis wok ɛn Jizɔs dɔn mek shɔ se wi de du di wok di kayn we we de sho se wi ɔganayz. Insay di fɔstɛm Kristian dɛn tɛm we dɛn bin de stat nyu kɔngrigeshɔn dɛn na difrɛn say dɛn, dɛn bin pik ɛlda dɛn fɔ dayrɛkt ɛn de bifo di pipul dɛn. (Akt 14:23) Insay Jerusɛlɛm, na di apɔsul dɛn ɛn sɔm ɛlda dɛn we bin de na di gɔvnin bɔdi bin de disayd patikyula tin dɛn we di kɔngrigeshɔn dɛn fɔ fala. (Akt 15:2; 16:4) Bikɔs di brɔda ɛn sista dɛn bin de obe di tin dɛn we dɛn bin de dayrɛkt dɛn fɔ du, “di kɔngrigeshɔn dɛn kɔntinyu fɔ gɛt fet mɔ ɛn mɔ ɛn bɔku pipul dɛn bin de jɔyn dɛn.”​—Akt 16:5.

2. Frɔm 1919, aw Jiova dɔn de gayd in pipul dɛn ɛn gi dɛn spirichwal it?

² Tide bak, Jiova de kɔntinyu fɔ ɔganayz in pipul dɛn. Frɔm 1919, Jizɔs dɔn de yuz sɔm anɔyntɛd man dɛn we nɔ bɔku fɔ ɔganayz di prichin wok ɛn gi spirichwal it to in disaypul dɛn. a (Lyuk 12:42) Wan dawt nɔ de se Jiova de blɛs di wok we dɛn man dɛn ya de du.​—Ayz. 60:22; 65:13, 14.

3-4. (a) Gi ɛgzampul we de sho aw wi de bɛnifit bikɔs wi ɔganayz. (b) Wetin wi go tɔk bɔt insay dis atikul?

³ Wi nɔ fɔ dɔn ebul du di wok we Jizɔs tɛl wi fɔ du if wi nɔ bin ɔganayz. (Mat. 28:19, 20) Fɔ ɛgzampul, if di brɔda  dɛn nɔ bin ɔganayz wi fɔ prich na ɔl di eria dɛn na wi kɔngrigeshɔn tɛritri, ɔlman bin fɔ prich ɛnisay we i want. Sɔntɛm difrɛn pɔblisha dɛn go prich na wan tɛritri bɔku tɛm ɛn nɔ prich na di ɔda tɛritri dɛn. Yu ebul fɔ tink bɔt ɔda we dɛn aw wi de bɛnifit bikɔs wi ɔganayz?

⁴ Jɔs lɛk aw Jizɔs bin ɔganayz in disaypul dɛn we i bin de na dis wɔl, na so i de kɔntinyu fɔ ɔganayz Gɔd in pipul dɛn bak tide. Insay dis atikul, wi go tɔk bɔt di ɛgzampul we Jizɔs bin sɛt ɛn aw wi ɔganayzeshɔn de fala da ɛgzampul de. Wi go tɔk bak bɔt aw wi go sho se wi gɛt kɔnfidɛns pan Jiova in ɔganayzeshɔn.

WI ƆGANAYZESHƆN DE FALA JIZƆS IN ƐGZAMPUL

5. Us we wi ɔganayzeshɔn de fala Jizɔs in ɛgzampul? (Jɔn 8:28)

⁵ Jizɔs bin lan frɔm in Papa we de na ɛvin bɔt wetin fɔ du ɛn wetin fɔ se. Jiova in ɔganayzeshɔn de fala Jizɔs in ɛgzampul bay we dɛn de yuz Gɔd in Wɔd fɔ ɛp wi fɔ no wetin rayt ɛn wetin rɔng, ɛn fɔ advays wi bɔt aw fɔ liv wi layf. (Rid Jɔn 8:28; 2 Tim. 3:16, 17) Dɛn kin mɛmba wi ɔltɛm fɔ rid Gɔd in Wɔd ɛn aplay wetin wi de lan. Aw wi de bɛnifit we wi fala dis advays?

6. Us impɔtant we wi de bɛnifit we wi yuz di pɔblikeshɔn dɛn fɔ stɔdi di Baybul?

⁶ Wi kin rili bɛnifit we wi de yuz wi pɔblikeshɔn dɛn fɔ stɔdi di Baybul. Fɔ ɛgzampul, wi kin ebul fɔ kɔmpia wetin di Baybul de tich wit di dayrɛkshɔn we di ɔganayzeshɔn de gi wi. We wi yuz wi pɔblikeshɔn dɛn fɔ stɔdi di Baybul, wi de si se di dayrɛkshɔn we di ɔganayzeshɔn de gi wi kɔmɔt frɔm di Baybul, ɛn dat de mek wi gɛt mɔ kɔnfidɛns pan Jiova in ɔganayzeshɔn.​—Rom. 12:2.

7. Us mɛsej Jizɔs bin de prich? Aw Jiova in ɔganayzeshɔn de fala in ɛgzampul?

⁷ Jizɔs bin prich bɔt “di gud nyuz bɔt Gɔd in Kiŋdɔm.” (Lyuk 4:43, 44) Jizɔs bin tɛl in disaypul dɛn bak fɔ prich bɔt di Kiŋdɔm. (Lyuk 9:1, 2; 10:8, 9) Tide, ɔl di wan dɛn we de na Jiova in ɔganayzeshɔn de prich di mɛsej bɔt di Kiŋdɔm, ilɛk usay dɛn de ɔ di kayn wok we dɛn de du na di ɔganayzeshɔn.

8. Us ɔnɔ wi gɛt?

⁸ Na big big ɔnɔ wi gɛt fɔ tɛl ɔda pipul dɛn di tru bɔt Gɔd in Kiŋdɔm! Nɔto ɔlman gɛt da ɔnɔ de. Fɔ ɛgzampul, we Jizɔs bin de na dis wɔl, i nɔ bin alaw dimɔn dɛn fɔ tɔk bɔt am. (Lyuk 4:41) Tide, bifo pɔsin stat fɔ prich wit Jiova in pipul dɛn, i fɔ kwalifay fɔs fɔ du dat. Wi kin sho se wi gladi fɔ di ɔnɔ we wi gɛt fɔ prich bay we wi de prich ɛnisay we wi de ɛn ɛnitɛm wi gɛt chans. Wi want fɔ bi lɛk Jizɔs, so wi de du wi bɛst fɔ prich to ɔda pipul dɛn ɛn tich dɛn di trut.​—Mat. 13:3, 23; 1 Kɔr. 3:6.

9. Aw di ɔganayzeshɔn de mek pipul dɛn no Gɔd in nem?

⁹ Jizɔs bin mek pipul dɛn no Gɔd in nem. We Jizɔs bin de pre to in Papa we de na ɛvin, i tɔk se: “A dɔn mek dɛn no yu nem.” (Jɔn 17:26) Jiova in ɔganayzeshɔn de fala Jizɔs in ɛgzampul bay we dɛn de du ɔl wetin dɛn ebul fɔ ɛp ɔda pipul dɛn fɔ no bɔt Gɔd in nem. Di ɔganayzeshɔn dɔn yuz di Nyu Wɔl Transleshɔn fɔ di Oli Skprichɔ Dɛn fɔ du dat. Dis Baybul dɔn put Gɔd in nem bak na di say dɛn we i bin de insay di orijinal langwej dɛn we dɛn bin rayt am. I pas 270 langwej dɛn we dɛn dɔn translet di wan ol Baybul ɔ sɔm pat pan am. Insay  Apɛndiks A4 ɛn A5 na di Inglish Stɔdi Baybul, yu go lan mɔ bɔt wetin mek dɛn put Gɔd in nem bak usay i bin de ɛn aw dɛn bin du dat. Apɛndiks C, we de na di Inglish Stɔdi Baybul gi mɔ pruf we sho se Gɔd in nem fɔ de na di Kristian Grik Skripchɔ Dɛn 237 tɛm.

10. Wetin yu lan frɔm wetin wan uman we de na Miyanma bin tɔk?

¹⁰ Jɔs lɛk Jizɔs, wi want fɔ ɛp bɔku pipul dɛn fɔ no Gɔd in nem. We wan uman we ol 67 ia we de na Miyanma lan bɔt Gɔd in nem, i bin kray ɛn tɔk se: “Dis na di fɔs tɛm we a dɔn yɛri se Gɔd in nem na Jiova. . . . Una dɔn tich mi di tin we impɔtant pas ɔl we a go ɛva lan.” Dis ɛkspiriɛns sho se we pipul dɛn kin lan bɔt Gɔd in nem, dat kin rili tɔch dɛn at.

KƆNTINYU FƆ SHO SE YU GƐT KƆNFIDƐNS PAN WI ƆGANAYZESHƆN

11. Aw ɛlda dɛn go sho se dɛn gɛt kɔnfindɛns pan Jiova in ɔganayzeshɔn? (Luk bak di pikchɔ.)

¹¹ Wetin na wan we we ɛlda dɛn go sho se dɛn gɛt kɔnfidɛns pan Gɔd in ɔganayzeshɔn? We di ɔganayzeshɔn de gi dayrɛkshɔn, di ɛlda dɛn nid fɔ tek tɛm rid di dayrɛkshɔn ɛn du ɔl wetin dɛn ebul fɔ fala am. Fɔ ɛgzampul, dɛn nɔ kin jɔs tɛl dɛn aw fɔ du di difrɛn pat dɛn na di mitin dɛn ɛn aw fɔ pre fɔ di kɔngirgeshɔn, bɔt dɛn kin tɛl dɛn bak aw fɔ kia fɔ Krays in ship dɛn. We di ɛlda dɛn fala ɔl di dayrɛkshɔn dɛn we di ɔganayzeshɔn de gi dɛn, di brɔda ɛn sista dɛn de fil se Jiova lɛk dɛn ɛn i de kia fɔ dɛn.

12. (a) Wetin mek wi fɔ du wetin di wan dɛn we de bifo de tɛl wi fɔ du? (Ibruz 13:7, 17) (b) Wetin mek wi fɔ pe atɛnshɔn to di fayn kwaliti dɛn we di wan dɛn we de bifo gɛt?

¹² We di ɛlda dɛn tɛl wi wetin fɔ du, wi fɔ rɛdi fɔ du am. We wi du dat, wi de mek i izi fɔ mek di wan dɛn we de bifo du dɛn wok. Di Baybul ɛnkɔrej wi fɔ obe ɛn rɛdi fɔ du wetin di wan dɛn we de bifo de tɛl wi fɔ du. (Rid Ibruz 13:7, 17.) Sɔntɛnde, i nɔ kin izi fɔ du dat. Wetin mek? Na bikɔs dɛn man dɛn ya nɔ pafɛkt. Bɔt if wi pe atɛnshɔn pan dɛn bad abit dɛn ɛn nɔ pe atɛnshɔn pan dɛn gud abit dɛn, i go tan lɛk se wi de ɛp wi ɛnimi dɛn. Wetin mek wi se so? Wi ɛnimi dɛn want mek wi dawt if na dis ɔganayzeshɔn Gɔd de yuz fɔ gayd wi. So if wi nɔ de tink di rayt we bɔt di ɛlda dɛn, sɔntɛm wi go ivin stat fɔ tink di rɔng we bɔt di ɔganayzeshɔn ɛn nɔ gɛt kɔnfidɛns pan am igen. Us patikyula tin dɛn wi go du we go ɛp wi fɔ si ɛn avɔyd di lay lay tin dɛn we wi ɛnimi dɛn de tɔk?

NƆ ALAW ƆDA PIPUL DƐN FƆ MEK YU NƆ KƆNTINYU FƆ GƐT KƆNFIDƐNS PAN DI ƆGANAYZESHƆN

13. Aw Gɔd in ɛnimi dɛn de tray fɔ mek wi fil se Jiova in ɔganayzeshɔn bad?

¹³ Gɔd in ɛnimi dɛn de tray fɔ mek di gud tin dɛn we in ɔganayzeshɔn de du tan lɛk bad tin dɛn. Fɔ ɛgzampul, di Baybul dɔn tich wi se Jiova want mek wi klin wi bɔdi ɔltɛm, liv klin layf, ɛn wɔship am di we aw i want. I dɔn tɔk se ɛnibɔdi we de du bad tin dɛn ɛn we nɔ gri fɔ chenj di we aw i de biev nɔ fɔ kɔntinyu fɔ de na di kɔngrigeshɔn. (1 Kɔr. 5:11-13; 6:9, 10) Wi de obe da kɔmand de we kɔmɔt na di Baybul. Bɔt bikɔs wi de obe dis kɔmand, di wan dɛn we de agens wi kin tray fɔ mek wi fil se wi nɔ lɛk ɔda pipul dɛn, dɛn kin mek wi fil se wi de kɔndɛm dɛn, ɛn wi nɔ lɛk pipul dɛn we difrɛn frɔm wi.

14. Udat de biɛn di lay lay stori dɛn we dɛn de tɔk bɔt di ɔganayzeshɔn?

¹⁴ Tray fɔ ɔndastand udat rili de atak di  ɔganayzeshɔn. Na Setan de biɛn di lay lay stori dɛn we dɛn de tɔk bɔt di ɔganayzeshɔn. In na “di papa pan lay.” (Jɔn 8:44; Jɛn. 3:1-5) So wi fɔ ɛkspɛkt se Setan go yuz di wan dɛn we de sɔpɔt am fɔ prɛd lay lay stori dɛn bɔt Jiova in ɔganayzeshɔn. Na di sem tin i bin du insay di fɔstɛm Kristian dɛn tɛm.

15. Wetin di wan dɛn we bin de bifo pan Gɔd biznɛs bin du to Jizɔs ɛn in disaypul dɛn?

¹⁵ Pan ɔl we Gɔd in Pikin Jizɔs bin pafɛkt ɛn i bin de pafɔm wɔndaful mirekul dɛn, Setan bin yuz sɔm pipul dɛn fɔ tɔk lay lay tin dɛn bɔt am. Fɔ ɛgzampul, di wan dɛn we bin de bifo pan Gɔd biznɛs bin tɛl pipul dɛn se na “di rula fɔ di dimɔn dɛn” de gi Jizɔs pawa fɔ pul dimɔn dɛn pan pipul dɛn. (Mak 3:22) We dɛn bin de jɔj Jizɔs, di wan dɛn we bin de bifo pan Gɔd biznɛs bin lay pan am se i tɔk bad bɔt Gɔd, ɛn dɛn mek di pipul dɛn tɔk se dɛn fɔ kil am. (Mat. 27:20) Leta, we Krays in disaypul dɛn bin de prich di gud nyuz, di wan dɛn we bin de agens dɛn “mek di pipul dɛn . . . vɛks ɛn pɔyzin dɛn maynd” so dat dɛn go mek di Kristian dɛn sɔfa. (Akt 14:2, 19) We di Disɛmba 1, 1998 Wachtawa de tɔk bɔt wetin de na Akt 14:2, i bin ɛksplen se: “Di wan dɛn we bin de sɔpɔt Setan nɔ bin de gri fɔ lisin to di mɛsej we di Kristian dɛn bin de prich. Dɛn bin tɔk bad bad tin dɛn bak bɔt di Kristian dɛn so dat pipul dɛn go et dɛn ɛn nɔ lisin to dɛn.”

16. Wetin wi fɔ mɛmba if wi yɛri lay lay stori dɛn?

¹⁶ Setan de kɔntinyu fɔ tɔk lay lay tin dɛn tide. I stil “de ful di wan ol wɔl.” (Rɛv. 12:9) If yu yɛri bad tin dɛn bɔt di ɔganayzeshɔn ɔ bɔt di brɔda dɛn we de bifo, mɛmba aw Gɔd in ɛnimi dɛn bin trit  Jizɔs ɛn in disaypul dɛn insay di fɔstɛm Kristian dɛn tɛm. Jizɔs bin tɔk se pipul dɛn go de agens di wan dɛn we de sav Jiova ɛn dɛn go tɔk lay lay tin dɛn bɔt dɛn. Ɛn na dis de apin tide. (Mat. 5:11, 12) Dɛn nɔ go ful wi wit lay lay stori dɛn if wi mɛmba di wan we de biɛn dɛn stori dɛn de, ɛn du sɔntin wantɛm wantɛm. Wetin wi fɔ du?

17. Wetin wi go du fɔ mek dɛn nɔ ful wi wit lay lay stori dɛn? (2 Timoti 1:13) (Luk bak di bɔks we gɛt di taytul “ Wetin Yu Fɔ Du We Yu Yɛri Lay Lay Stori Dɛn?”)

¹⁷ Nɔ lisin to lay lay stori dɛn. Apɔsul Pɔl bin tɔk klia wan wetin wi fɔ du we wi yɛri lay lay stori dɛn. I bin tɛl Timoti fɔ “tɛl sɔm pipul dɛn mek dɛn nɔ . . . pe atɛnshɔn to dɛn lay lay stori dɛn,” ɛn dɛn nɔ fɔ “lisin to lay lay stori dɛn we nɔ de sho rɛspɛkt fɔ Gɔd.” (1 Tim. 1:3, 4; 4:7) Tink bɔt dis ɛgzampul: sɔntɛm smɔl pikin go tek dɔti tin na grɔn ɛn put am na in mɔt, bɔt big pɔsin nɔ go ɛva du dat bikɔs i no se i go sik if i du dat. Semweso, wi nɔ de lisin to lay lay stori dɛn bikɔs wi no udat de biɛn dɛn. Bifo dat, na di “gud wɔd” dɛn bɔt di trut nɔmɔ wi de lisin to.​—Rid 2 Timoti 1:13.

18. Aw wi go sho se wi gɛt kɔnfidɛns pan Jiova in ɔganayzeshɔn?

¹⁸ Na jɔs tri we dɛn aw Gɔd in ɔganayzeshɔn de fala Jizɔs wi dɔn tɔk bɔt. As yu de stɔdi di Baybul, tray fɔ si ɔda we dɛn aw di ɔganayzeshɔn de fala Jizɔs in ɛgzampul. Ɛp ɔda pipul dɛn na yu kɔngrigeshɔn fɔ gɛt mɔ kɔnfidɛns pan di ɔganayzeshɔn. Ɛn kɔntinyu fɔ sho se yu gɛt kɔnfidɛns pan di ɔganayzeshɔn bay we yu de sav Jiova fetful wan ɛn kɔntinyu fɔ de na di ɔganayzeshɔn we i de yuz fɔ du wetin i want. (Sams 37:28) Lɛ wi ɔl kɔntinyu fɔ sho se wi valyu di ɔnɔ we wi gɛt fɔ de pat pan Jiova in pipul dɛn we gɛt lɔv ɛn we nɔ de kɔmɔt biɛn am.