1. Wetin Jiova want wi fɔ du?

 WAN pan di tin dɛn we kin mek maredman ɛn in wɛf rili gladi na we dɛn bɔn pikin we gɛt wɛlbɔdi. Bɔt pan ɔl we mama ɛn papa go rili lɛk dɛn pikin we dɛn jɔs bɔn, dɛn nɔ go want mek i kɔntinyu fɔ bi pikin. Infakt, dɛn go rili wɔri if di pikin nɔ de gro. Semweso, Jiova kin gladi we wi stat fɔ du tin dɛn we go mek wi bi Jizɔs in disaypul, bɔt I nɔ want mek wi kɔntinyu fɔ bi spirichwal pikin dɛn. (1 Kɔr. 3:1) Bifo dat, i tɛl wi fɔ mek wi bi Kristian dɛn we “machɔ.”​—1 Kɔr. 14:20.

2. Wetin wi go tɔk bɔt insay dis atikul?

² Wetin i min fɔ bi machɔ Kristian? Wetin go ɛp wi fɔ bi machɔ Kristian? We wi stɔdi di dip tin dɛn na di Baybul, aw dat go ɛp wi fɔ bi machɔ Kristian? Ɛn wetin mek wi nɔ fɔ tink se bikɔs wi dɔn ɔlrɛdi bi machɔ Kristian wi nɔ nid fɔ kɔntinyu fɔ du tin dɛn we go mek wi padi biznɛs wit Jiova tayt mɔ ɛn mɔ? Wi go tɔk bɔt di ansa to dɛn kwɛstyɔn dɛn ya insay dis atikul.

WETIN I MIN FƆ BI MACHƆ KRISTIAN?

3. Wetin i min fɔ bi machɔ Kristian?

³ Insay di Baybul, di Grik wɔd we dɛn translet fɔ “machɔ” kin min bak “big pɔsin.” a (1 Kɔr. 2:6.) Jɔs lɛk aw yɔŋbebi de kɔntinyu fɔ gro te i big, na so wisɛf fɔ kɔntinyu fɔ mek wi padi biznɛs wit Jiova tayt mɔ ɛn mɔ. Na dat go mek wi bi machɔ Kristian dɛn. As wi ɔl no, ivin afta wi dɔn bi  machɔ Kristian wi nɔ fɔ ɛva stɔp fɔ go bifo pan wi padi biznɛs wit Jiova. (1 Tim. 4:15) Wi ɔl ɛn ivin di yɔŋ wan dɛn go ebul fɔ bi machɔ Kristian. Bɔt wetin de sho se pɔsin dɔn bi machɔ Kristian?

4. Wetin de sho se pɔsin na machɔ Kristian?

⁴ Machɔ Kristian na pɔsin we de obe ɔl Gɔd in lɔ dɛn, i nɔ de pik-ɛn-chuz di wan dɛn we i fɔ obe. As wi ɔl no, bikɔs i nɔ pafɛkt, i go de mek mistek dɛn. Bɔt stil, ɛvride i go tink ɛn du tin di we aw Gɔd want. I gɛt di nyu abit dɛn ɛn i go kɔntinyu fɔ tray tranga wan fɔ mek di we aw i de tink gri wit di we aw Gɔd de tink. (Ɛfi. 4:22-24) I dɔn lan fɔ disayd fɔ du di rayt tin dɛn bay we i de tink bɔt Jiova in lɔ ɛn prinsipul dɛn. So i nɔ nid bɔku lɔ dɛn fɔ sho am wetin fɔ du. We i disayd fɔ du sɔntin, i go tray tranga wan fɔ du wetin i dɔn disayd.​—1 Kɔr. 9:26, 27.

5. Us bad tin dɛn go apin to pɔsin we nɔ machɔ? (Ɛfishians 4:14, 15)

⁵ Bɔt i izi fɔ mek dɛn yuz “trik,” ɛn “kɔni we fɔ ful” Kristian we nɔ machɔ. Sɔntɛm i go biliv lay lay nyuz dɛn, rumɔ, ɛn lay lay stori dɛn na soshal midia ɔ sɔntɛm pɔsin we na apɔstet go ful am. b (Rid Ɛfishians 4:14, 15.) Sɔntɛm i go de jɛlɔs ɔda pipul dɛn, mek plaba, vɛks kwik, ɔ du di rɔng tin we sɔntin tɛmt am.​—1 Kɔr. 3:3.

6. Wetin mek wi go kɔmpia di tin dɛn we pɔsin de du fɔ bi machɔ Kristian to we pikin de gro? (Luk bak di pikchɔ.)

⁶ As wi bin dɔn tɔk, di Baybul kɔmpia di tin dɛn we pɔsin de du fɔ bi machɔ Kristian to we pikin de gro te i big. Bɔku tin dɛn de we pikin nɔ no, so i nid big pɔsin fɔ protɛkt ɛn gayd am. Fɔ ɛgzampul, mama go tɛl in smɔl galpikin fɔ ol in an we dɛn de krɔs strit. Sɔntɛm as di pikin de gro in mama go alaw am fɔ krɔs fɔ insɛf, bɔt i go mɛmba am fɔ chɛk fɔ mek shɔ se no motoka nɔ de pas bifo i krɔs. We di pikin dɔn big, i go no aw fɔ avɔyd dɛn kayn denja dɛn de fɔ insɛf. Jɔs lɛk aw pikin dɛn nid big pipul dɛn fɔ ɛp dɛn fɔ avɔyd denja, na so bɔku tɛm Kristian dɛn we nɔ machɔ kin nid machɔ Kristian dɛn fɔ ɛp dɛn fɔ avɔyd ɛnitin we go  ambɔg dɛn padi biznɛs wit Jiova ɛn fɔ disayd fɔ du di rayt tin dɛn. Bɔt we machɔ Kristian dɛn de disayd fɔ du sɔntin, dɛn kin tink bɔt Baybul prinsipul dɛn fɔ ɛp dɛn fɔ no aw Jiova de tink bɔt wetin dɛn want fɔ disayd ɛn du wetin di Baybul se.

7. Fɔ se machɔ Kristian dɛn nid ɔda pipul dɛn fɔ ɛp dɛn?

⁷ Fɔ se machɔ Kristian nɔ nid ɛnibɔdi fɔ ɛp am atɔl? Nɔ. Sɔntɛnde, machɔ Kristian dɛn bak kin aks ɔda pipul dɛn fɔ ɛp dɛn. Bɔt pɔsin we nɔ machɔ go want mek ɔda pipul dɛn tɛl am wetin fɔ du ɔ fɔ disayd fɔ am. Di difrɛns na dat, we machɔ Kristian de aks pipul dɛn we gɛt sɛns ɛn ɛkspiriɛns pas am fɔ ɛp, i no se na in gɛt di wok fɔ disayd fɔ insɛf ɛn na in go “tot in yon lod.”—Gal. 6:5.

8. Us we dɛn machɔ Kristian dɛn difrɛn?

⁸ Jɔs lɛk aw big pipul dɛn difrɛn pan ayt, bɔdi, ɛn ɔda tin dɛn, na so ɔl machɔ Kristian dɛn gɛt difrɛn kwaliti dɛn. Fɔ ɛgzampul, sɔntɛm sɔm go rili gɛt sɛns, ɔda wan dɛn go rili gɛt maynd, sɔntɛm sɔm go rili gɛt fri-an, ɛn ɔda wan dɛn go rili gɛt sɔri-at. Dɔn bak, we di sem tin apin to tu machɔ Kristian dɛn, sɔntɛm dɛn ɔltu go disayd fɔ du difrɛn tin dɛn, bɔt wetin dɛn disayd fɔ du go gri wit wetin di Baybul se. Bɔku tɛm dis kin apin we Kristian dɛn fɔ disayd fɔ du sɔntin we gɛt fɔ du wit dɛn kɔnshɛns. So dɛn nɔ de jɔj ɔda pipul dɛn if wetin dɛn disayd fɔ du difrɛn frɔm dɛn yon. Bifo dat, dɛn de pe atɛnshɔn to wetin dɛn go du fɔ mek dɛn kɔntinyu fɔ gɛt wanwɔd.​—Rom. 14:10; 1 Kɔr. 1:10.

WETIN GO ƐP WI FƆ BI MACHƆ KRISTIAN?

9. Fɔ se wi go bi machɔ Kristian wantɛm wantɛm? Ɛksplen.

⁹ As tɛm de go, pikin kin gro ɛn bi big pɔsin ilɛk i nɔ du natin. Bɔt nɔbɔdi nɔ go ebul bi machɔ Kristian if i nɔ du natin. Fɔ ɛgzampul, di brɔda ɛn sista dɛn we bin de na Kɔrint bin lisin to di gud nyuz, baptayz, gɛt oli spirit, ɛn bɛnifit frɔm di tin dɛn we apɔsul Pɔl bin tich dɛn. (Akt 18:8-11) Bɔt, afta sɔm ia we dɛn dɔn baptayz, sɔm pan dɛn nɔ bin stil machɔ. (1 Kɔr. 3:2) Wetin wi go du fɔ lɛ dis kayn tin nɔ apin to wi?

10. Wetin wi nid fɔ du fɔ bi machɔ Kristian? (Jud 20)

¹⁰ Fɔ lɛ wi go bi machɔ Kristian, wi nid fɔ want fɔ bi machɔ Kristian. Di wan dɛn we “et ɛkspiriɛns,” ɛn we nɔ want fɔ kɔntinyu fɔ go bifo pan dɛn padi biznɛs wit Gɔd nɔ go ɛva bi machɔ Kristian. (Prɔv. 1:22) Wi nɔ want fɔ tan lɛk di pipul dɛn we stil abop pan dɛn mama ɛn papa fɔ disayd fɔ dɛn wetin fɔ du pan ɔl we dɛn dɔn big. Bifo dat, wi want fɔ si am se na wi gɛt di wok fɔ kɔntinyu fɔ go bifo pan wi padi biznɛs wit Jiova. (Rid Jud 20.) If yu stil de tray fɔ bi machɔ Kristian, pre to Jiova fɔ mek i go ɛp yu fɔ lɛ yu “want fɔ du sɔntin ɛn gi [yu] di pawa fɔ du am.”​—Fil. 2:13.

11. Wetin Jiova dɔn gi wi fɔ ɛp wi fɔ bi machɔ Kristian? (Ɛfishians 4:11-13)

¹¹ Jiova nɔ de ɛkspɛkt wi fɔ bi machɔ Kristian bay wisɛf. I de yuz di wan dɛn we i dɔn pik fɔ bi shɛpad ɛn ticha dɛn na di kɔngrigeshɔn fɔ ɛp wi ɔl te wi “machɔ,” dat min se, “te wi rili machɔ lɛk Krays.” (Rid Ɛfishians 4:11-13.) Jiova de gi wi bak in oli spirit fɔ ɛp wi fɔ “no aw Krays de tink.” (1 Kɔr. 2:14-16) Dɔn bak, Gɔd mek dɛn rayt di 4 Gɔspɛl dɛn fɔ ɛp wi fɔ no aw Jizɔs bin de tink ɛn du tin we i bin de na di wɔl. Yu go ebul fɔ bi machɔ Kristian we yu de falamakata  di we aw Jizɔs bin de tink ɛn du tin.

WE WI DE STƆDI DI DIP TIN DƐN NA DI BAYBUL, AW DAT GO ƐP WI FƆ BI MACHƆ KRISTIAN?

12. Wetin na “di tichin dɛn we wi fɔs lan bɔt Krays”?

¹² Fɔ mek wi go bi machɔ Kristian, wi nɔ fɔ jɔs biliv “di tichin dɛn we wi fɔs lan bɔt Krays,” dat na di men Kristian tichin dɛn. Ɛgzampul bɔt dɛn kayn tichin dɛn de na fɔ ripɛnt, gɛt fet, baptayz, ɛn di tichin fɔ se di wan dɛn we dɔn day go gɛt layf bak. (Ibru. 6:1, 2) Dis na sɔm pan di men tichin dɛn we tru Kristian dɛn fɔ biliv. Na dis mek we apɔsul Pita bin de prich to di pipul dɛn insay Pɛntikɔst, i bin tɔk bɔt dɛn tin dɛn ya. (Akt 2:32-35, 38) Wi nid fɔ biliv dɛn men tichin dɛn ya fɔ mek wi go ebul bi Krays in disaypul dɛn. Fɔ ɛgzampul, Pɔl bin sho se if wi nɔ biliv se di wan dɛn we dɔn day go gɛt layf bak, wi nɔ go se wi na tru Kristian dɛn. (1 Kɔr. 15:12-14) Bɔt, wi nɔ fɔ jɔs satisfay wit dɛn men tin dɛn ya so we di Baybul de tich.

13. Wetin wi fɔ du fɔ mek wi go bɛnifit frɔm di ɛvi spirichwal fud we Ibruz 5:14 tɔk bɔt? (Luk bak di pikchɔ.)

¹³ Di difrɛns bitwin di men tichin dɛn ɛn ɛvi spirichwal fud na dat, ɛvi spirichwal fud nɔ jɔs gɛt fɔ du wit Jiova in lɔ dɛn, bɔt i gɛt fɔ du wit in prinsipul dɛn we de ɛp wi fɔ ɔndastand di we aw i de tink. Fɔ bɛnifit frɔm da fud de, wi fɔ stɔdi Gɔd in Wɔd, tink gud gud wan bɔt am, ɛn tek tɛm aplay wetin wi de lan. We wi du dat, wi de tren wisɛf fɔ disayd fɔ du tin dɛn we de mek Jiova gladi. c​—Rid Ibruz 5:14.

14. Aw Pɔl bin ɛp di Kristian dɛn na Kɔrint fɔ bi machɔ Kristian dɛn?

¹⁴ Bɔku tɛm, i nɔ kin izi fɔ Kristian dɛn we nɔ machɔ fɔ disayd fɔ du di rayt tin we no patikyula lɔ nɔ de na di Baybul bɔt wetin dɛn want fɔ du. If lɔ nɔ de na di Baybul we tɔk bɔt dat, sɔntɛm sɔm go fil se dɛn kin du ɛnitin we dɛn want. Ɔda wan dɛn go aks fɔ lɔ we dɛn nɔ nid lɔ. Fɔ ɛgzampul, i tan lɛk se di Kristian dɛn na Kɔrint bin aks Pɔl fɔ mek lɔ if dɛn fɔ it  fud we dɛn sakrifays to aydɔl. Bifo Pɔl tɛl dɛn wetin fɔ du, i bin mek dɛn no se ɔlman gɛt “rayt” fɔ disayd wetin i go du akɔdin to in kɔnshɛns. I tɔk bɔt Baybul prinsipul dɛn we go ɛp dɛn fɔ disayd nɔ fɔ du sɔntin we go ambɔg dɛn kɔnshɛns ɔ ɔda pipul dɛn. (1 Kɔr. 8:4, 7-9) So Pɔl bin de tich di Kristian dɛn na Kɔrint fɔ yuz di Baybul fɔ tren dɛn maynd fɔ disayd fɔ du tin dɛn, ɛn fɔ mek dɛn nɔ abop pan ɔda pipul dɛn fɔ disayd fɔ dɛn, ɔ fɔ jɔs luk fɔ lɔ dɛn. I bin tray fɔ ɛp dɛn fɔ bi machɔ Kristian dɛn we i du dat.

15. Aw Pɔl bin ɛp di Ibru Kristian dɛn fɔ go bifo pan dɛn padi biznɛs wit Jiova?

¹⁵ Wi lan impɔtant lɛsin frɔm wetin Pɔl bin rayt to di Ibru Kristian dɛn. Sɔm pan dɛn nɔ bin kɔntinyu fɔ go bifo pan dɛn padi biznɛs wit Jiova. Dɛn bin “nid milk bak, nɔto ɛvi [spirichwal] fud.” (Ibru. 5:12) Dɛn nɔ bin de lan ɛn aplay di nyu tin dɛn we Jiova bin de yuz di kɔngrigeshɔn fɔ tich dɛn. (Prɔv. 4:18) Fɔ ɛgzampul, bɔku Kristian dɛn we na bin Ju bin stil de fala di Lɔ we Gɔd Bin Gi Mozis pan ɔl we i bin dɔn pas 30 ia we Krays in sakrifays ɛnd da Lɔ de. (Rom. 10:4; Tay. 1:10) Da 30 ia de na bin bɔku tɛm fɔ ɛp di Ju Kristian dɛn fɔ ajɔst di we aw dɛn bin de tink! So Pɔl bin de ɛp dɛn fɔ aplay di dip tin dɛn we i bin de tich dɛn. Leta, i bin ɛp dɛn fɔ si se di nyu arenjmɛnt we Jiova dɔn mek fɔ wɔship am tru Jizɔs, bɛtɛ fa fawe. I bin ɛp dɛn bak fɔ gɛt maynd fɔ kɔntinyu fɔ prich pan ɔl we ɔda Ju pipul dɛn bin de agens dɛn.​—Ibru. 10:19-23.

WETIN MEK WI NID FƆ KƆNTINYU FƆ WOK TRANGA WAN FƆ MEK WI PADI BIZNƐS WIT JIOVA TAYT MƆ ƐN MƆ?

16. Apat frɔm we wi dɔn bi machɔ Kristian, wetin bak wi nid fɔ du?

¹⁶ Wi nɔ fɔ jɔs wok fɔ bi machɔ Kristian, bɔt wi fɔ wok tranga wan bak fɔ kɔntinyu fɔ bi machɔ Kristian. So wi fɔ tek tɛm lɛ wi nɔ tink se bikɔs wi na machɔ Kristian, wi nɔ nid fɔ kɔntinyu fɔ mek wi padi biznɛs wit Jiova tayt mɔ ɛn mɔ. (1 Kɔr. 10:12) Wi fɔ “de chɛk” wisɛf fɔ mek shɔ se wi de kɔntinyu fɔ go bifo pan wi padi biznɛs wit Jiova.​—2 Kɔr. 13:5.

17. Aw di lɛta we Pɔl bin rayt to di Kristian dɛn na Kolose sho se wi nid fɔ kɔntinyu fɔ bi machɔ Kristian?

 ¹⁷ Insay di lɛta we Pɔl bin rayt to di Kristian dɛn na Kolose, i bin sho bak wetin mek wi nid fɔ kɔntinyu fɔ bi machɔ Kristian. Pan ɔl we di Kristian dɛn na Kolose bin dɔn bi machɔ Kristian dɛn, Pɔl bin tɛl dɛn fɔ rili tek tɛm so dat dɛn nɔ go alaw di we aw pipul dɛn we nɔ de sav Jiova de tink fɔ ful dɛn. (Kol. 2:6-10) Ɛn Ɛpafras we bin rili sabi di brɔda ɛn sista dɛn na di kɔngrigeshɔn bin de pre fɔ dɛn fɔ mek dɛn “kɔntinyu fɔ tinap tranga wan,” ɔ bi machɔ Kristian. (Kol. 4:12) Wetin wi lan frɔm dis? Pɔl ɛn Ɛpafras bin ɔndastand se fɔ mek wi kɔntinyu fɔ bi machɔ Kristian, wi nid fɔ wok tranga wan ɛn wi nid Gɔd in ɛp. Dɛn bin want mek di Kristian dɛn na Kolose kɔntinyu fɔ bi machɔ Kristian dɛn ilɛk uskayn prɔblɛm dɛn bin de mit dɛn.

18. Wetin sɔntɛm go apin to machɔ Kristian? (Luk bak di pikchɔ.)

¹⁸ Pɔl bin wɔn di Ibru Kristian dɛn se i pɔsibul fɔ lɛ machɔ Kristian lɔs di chans fɔ gɛt tayt padi biznɛs wit Gɔd sote go. I pɔsibul fɔ mek Kristian mekɔp in maynd nɔ fɔ obe Jiova, ɛn nɔ gri fɔ ripɛnt ɛn mek Gɔd fɔgiv am. Di gud tin na dat dis nɔ bin apin to di Ibru Kristian dɛn. (Ibru. 6:4-9) Wetin wi go se bɔt Kristian dɛn tide we inaktiv ɔ we bin disfɛloship bɔt we ripɛnt leta? Bikɔs dɛn bin put dɛnsɛf dɔŋ ɛn ripɛnt, dat sho se dɛn difrɛn frɔm di wan dɛn we Pɔl bin rayt bɔt. Bɔt we dɛn kam bak, dɛn nid di ɛp we Jiova de gi. (Izi. 34:15, 16) Sɔntɛm di ɛlda dɛn go arenj fɔ mek wan brɔda ɔ sista we gɛt ɛkspiriɛns ɛp dɛn fɔ gɛt tayt padi biznɛs bak wit Jiova.

19. Us gol wi fɔ gɛt?

¹⁹ If yu de wok tranga wan fɔ bi machɔ Kristian, yu go ebul fɔ rich yu gol! Kɔntinyu fɔ lan bɔt di dip tin dɛn na di Baybul ɛn lan fɔ tink di we aw Jiova de tink. Ɛn if yu dɔn ɔlrɛdi bi machɔ Kristian, du ɔl wetin yu ebul fɔ kɔntinyu fɔ bi machɔ Kristian naw ɛn sote go.