1. Wetin pɔsin fɔ du if i want fɔ tɔk to di kiŋ na Pashia?

IMAJIN se yu de na Pashia trade trade. Yu want fɔ tɔk to di kiŋ bɔt sɔntin, so yu travul go na di siti we nem Shushan usay di kiŋ de. Bɔt yu nɔ go ivin gɛt maynd fɔ go tinap bifo di kiŋ if i nɔ alaw yu. If yu tray fɔ go tɔk to di kiŋ we i nɔ alaw yu, dɛn go kil yu.—Ɛsta 4:​11.

2. Aw Jiova want wi fɔ fil we wi de tɔk to am?

² Wi rili gladi fɔ we Jiova nɔ tan lɛk da kiŋ na Pashia! Jiova gɛt pawa ɛn i impɔtant pas ɛni mɔtalman rula, bɔt pan ɔl dat i de alaw wi fɔ tɔk to am ɛnitɛm. I want wi fɔ fil fri fɔ tɔk to am. Fɔ ɛgzampul, pan ɔl we Jiova gɛt wɔndaful taytul dɛn lɛk Gret Gɔd We Mek Ɔltin, Ɔlmayti, ɛn Masta we De Rul Ɔlman, i still want wi fɔ yuz di kɔmɔn wɔd “Papa” we wi de tɔk to am. (Mat. 6:​9, NWT) Wi rili gladi fɔ no se Jiova want wi fɔ fil lɛk se i de nia wi!

3. Wetin mek wi fɔ kɔl Jiova “Papa”? Wetin wi go tɔk bɔt insay dis atikul?

³ Wi gɛt rayt fɔ kɔl Jiova “Papa” bikɔs na in na di Wan we gi wi layf. (Sam 36:​9) Wi fɔ obe am bikɔs in na wi Papa. If wi du wetin i de tɛl wi fɔ du, wi go ɛnjɔy wɔndaful blɛsin dɛn. (Ibru 12:​9) Dɛn blɛsin dɛn ya na lɛk fɔ gɛt layf we go de sote go na dis wɔl ɔ na ɛvin. Wi de bɛnifit bak rayt naw. Dis atikul go tɔk bɔt aw Jiova de sho se in na Papa we lɛk wi ɛn wetin mek wi fɔ biliv tranga wan se tumara bambay, i nɔ go ɛva lɛf wi. Bɔt fɔs, lɛ wi tɔk bɔt wetin mek wi fɔ biliv tranga wan se wi Papa we de na ɛvin rili lɛk wi ɛn, i bisin bɔt wi.

4. Wetin mek i nɔ izi fɔ sɔm pipul dɛn fɔ si Jiova as dɛn Papa?

⁴ Yu tink se i nɔ izi fɔ yu fɔ si Gɔd as yu Papa? Sɔm pipul dɛn kin tink se Jiova rili pawaful ɛn dat dɔn mek wi nɔ impɔtant to am. Dɛn kin dawt if di Ɔlmayti Gɔd bisin bɔt dɛn. Bɔt wi Papa we lɛk wi nɔ want wi fɔ fil da kayn we de. Na in gi wi layf ɛn i want wi fɔ bi in padi. Afta we di apɔsul Pɔl bin tɔk dɛn tru wɔd dɛn ya, i bin ɛksplen to di pipul dɛn we bin de lisin to am na Atɛns se Jiova “de klos wi ɔl.” (Akt 17:​24-29) Gɔd want wi ɔl fɔ tɔk to am jɔs lɛk aw pikin de tɔk to in mama ɛn papa we lɛk am ɛn bisin bɔt am.

5. Wetin wi lan frɔm wan wi Kristian sista in ɛkspiriɛns?

⁵ I nɔ kin izi fɔ ɔda pipul dɛn fɔ si Jiova as dɛn Papa bikɔs dɛn yon papa we bɔn dɛn nɔ bin sho dɛn bɛtɛ lɔv ɔ nɔ ivin lɛk dɛn ɛn du gud tin dɛn fɔ dɛn. Tink bɔt wetin wan wi Kristian sista bin tɔk. I se: “Mi papa bin de du bad bad tin dɛn. We a bin jɔs bigin fɔ stɔdi di Baybul, i nɔ bin izi fɔ mi fɔ fil se a go go nia wi Papa we de na ɛvin. Bɔt dat ɔl bin chenj afta we a kam fɔ no Jiova.” Yusɛf de fil da kayn we de? If na so i bi, na fɔ biliv tranga wan se as tɛm de go yusɛf go si Jiova as di bɛst Papa.

6. Frɔm wetin de na Matyu 11:​27, wetin na wan pan di we dɛn we Jiova dɔn ɛp wi fɔ lɛ wi si am as wi Papa we lɛk wi?

⁶ Wan we aw Jiova dɔn ɛp wi fɔ si am as wi Papa we lɛk wi, na bay we i mek dɛn rayt di tin dɛn we Jizɔs bin tɔk ɛn du insay di Baybul. (Rid Matyu 11:​27.) Jizɔs we bin rili falamakata in Papa in kwaliti dɛn bin tɔk se: “Ɛnibɔdi we dɔn si mi, dɔn si mi Papa.” (Jɔn 14:​9) Bɔku tɛm, Jizɔs bin de tɔk bɔt di wok we Jiova de du as Papa. Insay di 4 Gɔspɛl dɛn nɔmɔ, Jizɔs yuz di wɔd “Papa” fɔ lɛk 165 tɛm we i de tɔk bɔt Jiova. Wetin mek Jizɔs bin de tɔk bɔku tɛm bɔt Jiova? Wan rizin na fɔ lɛ pipul dɛn biliv tranga wan se Jiova na Papa we rili lɛk wi.—Jɔn 17:​25, 26.

7. Wetin wi lan bɔt Jiova frɔm di we aw i bin trit in Pikin?

⁷ Tink bɔt wetin wi lan bɔt Jiova frɔm di we aw i bin trit in Pikin, Jizɔs. Jiova bin de lisin to Jizɔs in prea ɔltɛm. I nɔ bin jɔs de lisin to Jizɔs in prea dɛn bɔt i bin de ansa dɛn bak. (Jɔn 11:​41, 42) Ilɛk uskayn bad tin dɛn bin de apin to Jizɔs, i bin no se in Papa lɛk am ɛn i de sɔpɔt am.—Lyuk 22:​42, 43.

8. Us we dɛn Jiova bin gi Jizɔs di tin dɛn we i nid?

⁸ Jizɔs bin no se na in Papa gi am layf ɛn na in de gi am bak di tin dɛn we i nid fɔ kɔntinyu fɔ liv. I bin tɔk se: “Na mi Papa we de gi layf . . . , mek misɛf gɛt layf.” (Jɔn 6:​57) Jizɔs bin rili abop pan in Papa, ɛn Jiova bin de gi am wetin i nid so dat i go kɔntinyu fɔ liv. Di tin we impɔtant pas ɔl na dat, Jiova bin ɛp Jizɔs fɔ kɔtinyu fɔ sav am fetful wan.—Mat. 4:​4.

9. Aw Jiova bin sho se in na Papa we rili lɛk Jizɔs ɛn bisin bɔt am?

⁹ As Papa we gɛt lɔv, Jiova bin mek shɔ se Jizɔs no se i de sɔpɔt am. (Mat. 26:​53; Jɔn 8:​16) Pan ɔl we Jiova nɔ bin protɛkt Jizɔs fɔ lɛ bad tin dɛn nɔ apin to am, I bin stil ɛp am fɔ bia wit dɛn. Jizɔs bin no se ɛni bad tin we de apin to am nɔ go apin to am sote go. (Ibru. 12:​2, NWT) Jiova bin  sho se i bisin bɔt Jizɔs bay we i bin de lisin to am, gi am di tin dɛn we i nid, tren am, ɛn sɔpɔt am. (Jɔn 5:​20; 8:​28) Naw, lɛ wi si aw wi Papa we de na ɛvin bisin bɔt wi dɛn sem kayn we dɛn ya.

10. Frɔm wetin de na Sam 66:​19, 20, aw Jiova de sho se i lɛk wi?

¹⁰ Jiova de lisin to wi prea dɛn. (Rid Sam 66:​19, 20.) I nɔ jɔs want wi fɔ pre to am wan wan tɛm ɔ fɔ pre to am fɔ sɔm tin dɛn nɔmɔ, bɔt i want wi fɔ de pre to am ɔltɛm ɛn bɔt ɔltin. (1 Tɛs. 5:​17) Wi kin pre to wi Gɔd ɛnitɛm, ilɛk usay wi de. I nɔ ɛva bizi pasmak fɔ lisin to wi, bifo dat i rɛdi ɔltɛm fɔ lisin to wi prea dɛn. We wi gladi fɔ we Jiova de lisin to wi prea dɛn, dat de mek wi kam nia am. Wan pan di man dɛn we bin rayt di Sam buk bin tɔk se: “A lɛk PAPA GƆD [“Jiova,” NWT] bikɔs i de yɛri mi.”—Sam 116:​1.

11. Aw Jiova de ansa wi prea dɛn?

¹¹ Wi Papa nɔ jɔs de lisin to wi prea dɛn bɔt i de ansa dɛn bak. Di apɔsul Jɔn bin mek wi no se: “Wɛn wi kam bifo Gɔd ɛn aks am fɔ ɛnitin, i go yɛri wi ɛn gi wi, if na dat in want.” (1 Jɔn 5:​14, 15) Na tru se Jiova nɔ go ansa wi prea dɛn lɛk aw wi want. I no wetin gud fɔ wi, so sɔntɛnde in ansa go bi nɔ ɔ i want wi fɔ wet.—2 Kɔr. 12:​7-9, NWT.

12-13. Us we dɛn wi Papa we de na ɛvin de gi wi di tin dɛn we wi nid?

¹² Jiova de gi wi wetin wi nid. I de du wetin i want ɔl papa dɛn fɔ du. (1 Tim. 5:​8) I de gi in pikin dɛn di tin dɛn we dɛn nid so dat dɛn go kɔntinyu fɔ de alayv. I nɔ want wi fɔ wɔri bɔt tin fɔ it, klos fɔ wɛr, ɔ say fɔ de. (Mat. 6:​32, 33; 7:​11) Bikɔs Jiova na Papa we lɛk wi, i dɔn mek shɔ se tumara bambay wi go gɛt ɔl wetin wi nid.

¹³ Di tin we impɔtant pas ɔl na dat, Jiova de gi wi wetin wi nid so dat wi go gɛt tayt padi biznɛs wit am. Insay di Baybul, i dɔn tɛl wi di tru tin dɛn bɔt insɛf, aw i want ɔl wetin i dɔn mek fɔ bi, wetin mek i mek wi, ɛn wetin go apin tumara bambay. I bin sho se i bisin bɔt wi we wi jɔs bigin fɔ lan di trut bay we i yuz wi mama ɛn papa dɛn ɔ ɔda pipul dɛn fɔ tich wi bɔt am. Ɛn i de kɔntinyu fɔ ɛp wi fɔ bi in padi bay we i de yuz di ɛlda dɛn ɛn ɔda machɔ brɔda ɛn sista dɛn na di kɔngrigeshɔn fɔ ɛp wi. Dɔn bak, Jiova de yuz di mitin dɛn fɔ tich wi ɛn wi Kristian brɔda ɛn sista dɛn. Na bay dɛn we dɛn ya ɛn bɔku ɔda we dɛn Jiova de sho se in na papa we rili bisin bɔt wi ɔl.—Sam 32:​8.

14. Wetin mek Jiova de tren wi? Aw i kin du am?

¹⁴ Jiova de tren wi. Wi nɔ pafɛkt lɛk Jizɔs. So fɔ lɛ wi Papa we lɛk wi tren wi, i de kɔrɛkt wi ɛnitɛm we nid de. In Wɔd, di Baybul mɛmba wi se: “Jiova de kɔrɛkt di wan dɛn we i lɛk.” (Ibru. 12:​6, 7, NWT) Jiova de kɔrɛkt wi bɔku we dɛn. Fɔ ɛgzampul, wi kin kam fɔ no se wi nid fɔ chenj di we aw wi de tink ɔ du tin we wi rid sɔntin na di Baybul ɔ yɛri sɔntin na mitin. Ɔ sɔntɛnde, na di ɛlda dɛn kin gi wi di ɛp we wi nid. Ilɛk uskayn we Jiova de kɔrɛkt wi, i de du am ɔltɛm bikɔs i lɛk wi.—Jɛr. 30:​11.

15. Us we dɛn Jiova de protɛkt wi?

¹⁵ Jiova de ɛp wi fɔ bia wit wi prɔblɛm dɛn. Jɔs lɛk aw papa we lɛk in pikin dɛn  kin sɔpɔt dɛn we tin nɔ kin rili izi fɔ dɛn, na so wi Papa we de na ɛvin kin sɔpɔt wi we wi gɛt prɔblɛm dɛn. I kin yuz in oli spirit fɔ protɛkt wi frɔm ɛnitin we go want fɔ pwɛl wi padi biznɛs wit am. (Lyuk 11:​13) Jiova de ɛp wi bak di tɛm we wi at pwɛl. Fɔ ɛgzampul, i dɔn gi wi wɔndaful op. Da op de fɔ tumara bambay de ɛp wi fɔ bia ɛni prɔblɛm dɛn. Tink bɔt dis: Ilɛk us bad tin dɛn apin to wi, wi Papa we lɛk wi go pul ɔl di prɔblɛm dɛn we de mek wi sɔfa. Wi prɔblɛm dɛn nɔ go de sote go, bɔt di tin dɛn we Jiova de gi wi go de sote go.—2 Kɔr. 4:​16-18.

16. Wetin bin apin we Adam nɔ bin obe in Papa we lɛk am?

¹⁶ Wi de si klia wan se Jiova lɛk wi we wi tink bɔt wetin i bin du di tɛm we Adam nɔ bin obe am. Dis tin we Adam bin du bin mek in ɛn in pikin dɛn nɔ de na Jiova in famili igen. (Rom 5:​12; 7:​14) Bɔt Jiova bin du sɔntin fɔ ɛp Adam in pikin dɛn.

17. Wetin Jiova bin du wantɛm wantɛm afta we Adam nɔ bin obe am?

¹⁷ Jiova bin pɔnish Adam, bɔt i bin prɔmis fɔ ɛp Adam in pikin dɛn. I bin prɔmis wantɛm wantɛm se i go briŋ bak mɔtalman dɛn we de obe am na in famili. (Jɛn. 3:​15; Rom 8:​20, 21) Jiova bin mek dis pɔsibul bay we i mek in Pikin we i lɛk we na Jizɔs day fɔ fri wi frɔm sin ɛn day. Dis tin we Jiova bin du sho se i rili lɛk wi.—Jɔn 3:​16.

18. Wetin mek wi fɔ biliv tranga wan se Jiova want wi as in pikin dɛn ilɛksɛf wi bin dɔn lɛf fɔ sav am?

¹⁸ Pan ɔl we wi nɔ pafɛkt, Jiova stil want wi fɔ de na in famili, ɛn i nɔ de ɛva tink se wi na lod. Wi kin disapɔynt am ɔ lɛf am fɔ sɔm tɛm, bɔt i nɔ de ɛva  giv-ɔp pan wi. Jizɔs bin sho aw Jiova rili lɛk in pikin dɛn bay we i bin pul wan stori bɔt di bɔypikin we bin lɔs. (Lyuk 15:​11-32) Di papa na Jizɔs in stori nɔ bin ɛva stɔp fɔ op se in pikin go kam bak. We in bɔypikin bin kam bak, di papa bin rili gladi fɔ wɛlkɔm am. If wi bin dɔn lɛf fɔ sav Jiova bɔt naw wi dɔn ripɛnt, wi fɔ biliv tranga wan se wi Papa we lɛk wi rɛdi fɔ wɛlkɔm wi bak.

19. Aw Jiova go pul di prɔblɛm dɛn we Adam bin dɔn briŋ kam pan wi?

¹⁹ Wi Papa go pul ɔl di prɔblɛm dɛn we Adam bin dɔn briŋ kam pan wi. Afta we Adam nɔ bin obe, Jiova bin disayd fɔ pik 144,000 pipul dɛn na dis wɔl fɔ sav as kiŋ ɛn prist dɛn wit in Pikin na ɛvin. Jizɔs ɛn di wan dɛn we go rul wit am go ɛp ɔl di wan dɛn we de obe fɔ bi pafɛkt pipul dɛn insay di nyu wɔl. Jiova go gi layf we go de sote go to di wan dɛn we go kɔntinyu fɔ obe afta we dɛn go dɔn pas di tɛst we dɛn go tɛst dɛn fɔ di las tɛm. Da tɛm de, wi Papa go gladi fɔ si di wɔl ful-ɔp wit in pafɛkt pikin dɛn. Da tɛm de go rili wɔndaful!

20. Us we dɛn Jiova dɔn sho se i rili lɛk wi? Wetin wi go tɔk bɔt insay di nɛks atikul?

²⁰ Jiova dɔn sho se i rili lɛk wi. In na di bɛst Papa. I de yɛri wi prea dɛn, ɛn i de gi wi di tin dɛn we wi nid fɔ liv ɛn fɔ gɛt tayt padi biznɛs wit am. I de tren wi ɛn sɔpɔt wi. Dɔn bak, i go du wɔndaful tin dɛn fɔ wi tumara bambay. Wi rili gladi fɔ no se wi Papa lɛk wi ɛn i bisin bɔt wi! Wi nɛks atikul go tɔk bɔt we dɛn we wi we na in pikin dɛn go sho se wi gladi fɔ di lɛk we i lɛk wi.