1. We sista de tink bɔt pɔsin we i fɔ mared to, wetin na sɔm kwɛstyɔn dɛn we i fɔ aks insɛf?

ƆLMAN we na Kristian de ɔnda Jizɔs Krays we na wi pafɛkt lida. Bɔt we uman we na Kristian mared, i go de ɔnda in man we nɔ pafɛkt. Dat nɔ kin izi fɔ du ɔltɛm. So we uman we na Kristian de tink bɔt brɔda we i fɔ mared to, i fɔ aks insɛf dɛn kwɛstyɔn dɛn ya we se: ‘Wetin de sho se dis brɔda go ebul fɔ de oba wi famili di rayt we? Na Jiova de fɔs na in layf? If nɔto so i bi, wetin mek a tink se i go ebul fɔ ɛp mi fɔ kɔntinyu fɔ gɛt tayt padi biznɛs wit Jiova afta we wi mared?’ Dɔn bak, Kristian sista fɔ aks insɛf se: ‘Us kwaliti dɛn a gɛt we go ɛp wi na wi mared-os? Mi na pɔsin we peshɛnt ɛn gɛt fri-an? A gɛt tayt padi biznɛs wit Jiova?’ (Ɛkli. 4:​9, 12) Di tin we go ɛp uman fɔ gɛt gladi-at na in mared-os gɛt fɔ du wit wetin-ɛn-wetin i go disayd bifo i mared.

2. Wetin wi go tɔk bɔt insay dis atikul?

² Bɔku pan wi Kristian sista dɛn de sɛt fayn ɛgzampul bay we dɛn de put dɛnsɛf ɔnda dɛn man. Wi fɔ tɛl dɛn tɛnki fɔ dat! Wi gladi we wi de sav Jiova wit dɛn fetful uman dɛn ya. Insay dis atikul, wi go ansa dɛn tri kwɛstyɔn dɛn ya: (1) Wetin na sɔm prɔblɛm dɛn we wɛf dɛn kin gɛt? (2) Wetin mek wɛf dɛn fɔ disayd se dɛn go put dɛnsɛf ɔnda dɛn man dɛn? (3) Wetin maredman ɛn mareduman dɛn we na Kristian kin lan bɔt aw fɔ put dɛnsɛf ɔnda di wan dɛn we de oba dɛn frɔm Jizɔs, Abigɛl, ɛn Meri we na Jizɔs in mama?

3. Wetin mek pipul dɛn we mared kin gɛt prɔblɛm dɛn na dɛn mared-os?

³ Mared na pafɛkt gift frɔm Gɔd, bɔt mɔtalman nɔ  pafɛkt. (1 Jɔn 1:​8) Na dat mek Gɔd in Wɔd tɛl pipul dɛn we mared se dɛn go gɛt prɔblɛm dɛn we go tan lɛk “prɔblɛm dɛn na dɛn bɔdi.” (1 Kɔr. 7:​28, futnot) Lɛ wi tɔk bɔt sɔm tin dɛn we nɔ kin izi fɔ wɛf dɛn.

4. Wetin kin mek sɔm wɛf dɛn fil se if dɛn put dɛnsɛf ɔnda dɛn man, dat min se dɛn nɔ gɛt wan valyu?

⁴ Sɔntɛm bikɔs ɔf di we aw sɔm uman dɛn mɛn, dɛn go fil se if dɛn put dɛnsɛf ɔnda dɛn man dɛn, dat min se dɛn nɔ gɛt wan valyu. Wan sista we nem Marisol we de na Amɛrika bin se, “Na di say we a mɛn, dɛn bin de tɛl uman dɛn ɔltɛm se dɛn ɛn man dɛn ikwal pan ɔltin. A no se na Jiova dɔn mek maredman dɛn de oba dɛn wɛf dɛn, i want mek wɛf dɛn put dɛnsɛf ɔnda dɛn man dɛn, ɛn i want bak fɔ lɛ wi gɛt di rɛspɛkt we wi fɔ gɛt. Bɔt i nɔ kin izi fɔ lɛ a put misɛf ɔnda mi man bikɔs di wɔl de tich se a nɔ fɔ du dat.”

5. Us we aw sɔm man dɛn de si uman dɛn we nɔ kɔrɛkt?

⁵ Bɔt i kin bi bak se sɔm uman dɛn mared to man dɛn we fil se man dɛn bɛtɛ pas uman dɛn. Wan sista we nem Ivɔn we de na Sawt Amɛrika bin se, “Na wi eria, na man dɛn de it fɔs bifo di uman dɛn it. Dɔn di smɔl galpikin dɛn yon wok na fɔ kuk ɛn klin, bɔt di smɔl bɔypikin dɛn mama ɛn sista dɛn tan lɛk dɛn savant we de fɔ gi dɛn ɔl wetin dɛn nid. Ɛn dɛn kin tɛl di bɔypikin dɛn se na dɛn na di ‘kiŋ na di os.’” Wan sista we nem Yingling we de na Eshia bin se: “Insay mi langwej, wi gɛt wan tɔk we min se uman dɛn nɔ nid fɔ gɛt sɛns ɔ fɔ sabi aw fɔ du tin dɛn. Dɛn jɔs de fɔ du ɔl di os wok dɛn, bɔt dɛn nɔ de alaw dɛn fɔ tɛl dɛn man wetin dɛn tink bɔt sɔntin.” Maredman we de du dis kayn tin de mek layf nɔ izi fɔ in wɛf, i nɔ de falamakata Jizɔs, ɛn i nɔ de mek Jiova gladi bikɔs i de sho se i nɔ gɛt lɔv, ɛn i nɔ de du wetin di Baybul se.—Ɛfi. 5:​28, 29; 1 Pit. 3:​7.

6. Wetin wɛf dɛn fɔ du fɔ lɛ dɛn padi biznɛs wit Jiova go strɔng mɔ ɛn mɔ?

⁶ Lɛk aw wi bin dɔn tɔk na di atikul we de bifo dis wan, Jiova de ɛkspɛkt maredman dɛn we na Kristian fɔ ɛp dɛn famili fɔ kam nia Am, fɔ sho se dɛn bisin bɔt dɛn famili, ɛn fɔ gi dɛn ɔl di tin dɛn we dɛn nid. (1 Tim. 5:​8) Bɔt Kristian wɛf dɛn gɛt fɔ mek tɛm ɛvride fɔ rid di Baybul, tink gud wan bɔt wetin dɛn de rid, ɛn fɔ pre to Jiova wit ɔl dɛn at. Dɛn tin dɛn ya nɔ kin izi fɔ du. Wɛf dɛn kin bizi, so sɔntɛm dɛn go fil se dɛn nɔ gɛt di tɛm ɔ di ɛnaji fɔ du dɛn tin dɛn ya, bɔt i rili impɔtant fɔ lɛ dɛn mek tɛm fɔ du dɛn. Wetin mek? Na bikɔs Jiova want fɔ lɛ ɛni wan pan wi gɛt tayt padi biznɛs wit am ɛn kɔntinyu fɔ bi in padi.—Akt 17:​27.

7. Wetin go mek i izi fɔ lɛ wɛf dɛn put dɛnsɛf ɔnda dɛn man dɛn?

⁷ Wi no se wɛf dɛn kin nid fɔ wok tranga wan fɔ lɛ dɛn put dɛnsɛf ɔnda dɛn man dɛn we nɔ pafɛkt. Bɔt i go izi fɔ lɛ dɛn put dɛnsɛf ɔnda dɛn man lɛk aw Jiova se if dɛn ɔndastand ɛn gri wit di rizin dɛn we mek di Baybul se dɛn fɔ put dɛnsɛf ɔnda dɛn man dɛn.

8. Akɔdin to Ɛfishians 5:​22-24, wetin mek wɛf we na Kristian go disayd se i go put insɛf ɔnda in man?

⁸ Wɛf dɛn we na Kristian kin disayd se dɛn go put dɛnsɛf ɔnda dɛn man bikɔs na dat Jiova tɛl dɛn fɔ du. (Rid Ɛfishians 5:​22-24.) Dɛn trɔst dɛn Papa we de na ɛvin bikɔs dɛn no se i lɛk dɛn, ɛn i nɔ go  tɛl dɛn fɔ du sɔntin we nɔ go bɛnifit dɛn.—Dit. 6:​24; 1 Jɔn 5:​3.

9. Wetin kin apin we wɛf we na Kristian put insɛf ɔnda in man?

⁹ Di wɔl de ɛnkɔrej uman dɛn nɔ fɔ fala wetin Jiova se, ɛn fɔ tink se if dɛn put dɛnsɛf ɔnda dɛn man, dat min se dɛn nɔ gɛt wan valyu. Bɔt wi no se di wan dɛn we want uman dɛn fɔ tink da we de nɔ sabi wi Gɔd we lɛk wi. Jiova nɔ go ɛva tɛl in galpikin dɛn we i lɛk fɔ du sɔntin we go mek i luk lɛk se dɛn nɔ gɛt wan valyu. Sista we de tray tranga wan fɔ put insɛf ɔnda in man lɛk aw Jiova se de ɛp fɔ lɛ pis de na in famili. (Sam 119:​165) In, in man, ɛn in pikin dɛn de bɛnifit frɔm wetin i de du.

10. Us lɛsin dɛn wi kin lan frɔm wetin wan sista we nem Karɔl bin tɔk?

¹⁰ Wɛf we de put insɛf ɔnda in man we nɔ pafɛkt de sho se i lɛk ɛn rɛspɛkt Jiova, we na di wan we dɔn put sɔm pipul dɛn oba ɔda pipul dɛn. Wan sista we nem Karɔl we de na Sawt Amɛrika bin se: “A no se mi man go mek mistek dɛn, bɔt a no bak se na di we aw a trit am we i mek dɛn mistek dɛn de na in go sho if a rili valyu mi padi biznɛs wit Jiova. So a kin tray fɔ put misɛf ɔnda mi man ɔltɛm bikɔs a want fɔ mek mi Papa we de na ɛvin gladi.”

11. Wetin kin ɛp wan sista we nem Aniz fɔ de fɔgiv, ɛn wetin wi kin lan frɔm wetin i tɔk?

¹¹ I nɔ kin izi fɔ lɛ wɛf rɛspɛkt in man ɛn put insɛf ɔnda am if i fil se in man nɔ bisin bɔt aw i de fil ɛn di tin dɛn we i de wɔri bɔt. Bɔt notis wetin wan mared sista we nem Aniz kin du we dat apin. I se: “A kin tray nɔ fɔ vɛks, ɛn a kin mɛmba bak se wi ɔl de mek mistek. Mi gol na fɔ fɔgiv fɔ fri lɛk aw Jiova de du. Ɛn we a kin fɔgiv, a kin ebul fɔ gɛt kolat bak.” (Sam 86:​5) I kin izi fɔ lɛ wɛf we de fɔgiv put insɛf ɔnda in man.

12. Us ɛgzampul dɛn de na di Baybul?

¹² Sɔntɛm, sɔm pipul dɛn go fil se if pɔsin put insɛf ɔnda ɔda pipul dɛn, dat min se i wik. Bɔt dat nɔto tru atɔl. Di Baybul gɛt bɔku ɛgzampul dɛn bɔt pipul  dɛn we bin rili gɛt maynd, bɔt we bin stil put dɛnsɛf ɔnda ɔda pipul dɛn. Lɛ wi si wetin wi kin lan frɔm Jizɔs, Abigɛl, ɛn Meri.

13. Wetin mek Jizɔs de put insɛf ɔnda Jiova? Ɛksplen.

¹³ Jizɔs de ɔnda Jiova, bɔt i nɔ de ɔnda Am bikɔs i nɔ gɛt sɛns ɔ i nɔ sabi du natin. Di simpul ɛn klia we aw Jizɔs bin de tich pipul dɛn sho se i rili gɛt sɛns. (Jɔn 7:​45, 46) Jiova bin no se Jizɔs sabi du bɔku tin dɛn, na dat mek I bin alaw Jizɔs fɔ wok wit am we I bin de mek ɔltin na ɛvin ɛn na dis wɔl. (Prɔv. 8:​30; Ibru. 1:​2-4) Ɛn frɔm we Jizɔs bin gɛt layf bak, Jiova dɔn put am “oba ɔltin na ɛvin ɛn na dis wɔl.” (Mat. 28:​18) Pan ɔl we Jizɔs sabi du bɔku tin dɛn, i kin stil abop pan Jiova fɔ gayd am. Wetin mek? Na bikɔs i lɛk in Papa.—Jɔn 14:​31.

14. Wetin maredman dɛn kin lan frɔm (a) di we aw Jiova de si uman dɛn? (b) wetin Prɔvabs 31 tɔk?

¹⁴ Wetin maredman dɛn kin lan? Jiova nɔ mek wɛf dɛn fɔ put dɛnsɛf ɔnda dɛn man dɛn bikɔs I tink se man dɛn bɛtɛ pas uman dɛn. Jiova dɔn sho dat bay we i pik uman ɛn man dɛn fɔ rul wit Jizɔs. (Gal. 3:​26-29) Jiova dɔn sho se i gɛt kɔnfidɛns pan in Pikin bay we i gi am pawa fɔ du sɔm tin dɛn. Semweso, maredman we gɛt sɛns go gi in wɛf di rayt fɔ du sɔm tin dɛn. We di Baybul de tɔk bɔt gud wɛf, i se i de mek shɔ se ɔltin oke na di os, i de bay ɛn sɛl land, ɛn ivin du biznɛs. (Rid Prɔvabs 31:​15, 16, 18.) In nɔto slev we nɔ gɛt rayt fɔ tɔk wetin i tink bɔt sɔntin. Bifo dat, in man trɔst am ɛn de lisin to wetin i tink bɔt sɔntin. (Rid Prɔvabs 31:​11, 26, 27.) We man de rɛspɛkt in wɛf da kayn we de, in wɛf go gladi fɔ put insɛf ɔnda am.

15. Wetin wɛf dɛn kin lan frɔm Jizɔs in ɛgzampul?

¹⁵ Wetin wɛf dɛn kin lan? Pan ɔl we Jizɔs bin du bɔku wɔndaful tin dɛn, i nɔ de tink se fɔ put insɛf ɔnda Jiova min se i nɔ gɛt wan valyu. (1 Kɔr. 15:​28; Fil. 2:​5, 6) Semweso, gud uman we de falamakata Jizɔs nɔ go fil se if i put insɛf ɔnda in man, dat min se i nɔ gɛt wan valyu. I go sɔpɔt in man, nɔto jɔs bikɔs i lɛk am, bɔt di men rizin na bikɔs i lɛk ɛn de rɛspɛkt Jiova.

16. Akɔdin to Fɔs Samiɛl 25:​3, 23-28, us prɔblɛm dɛn we bin mit Abigɛl? (Luk di pikchɔ na di frɔnt pej.)

¹⁶ Abigɛl bin gɛt wan man we nem Nebal. Na man we bin jɔs de tink bɔt insɛf, i bin prawd, ɛn i nɔ gɛt wan tɛnki. Bɔt pan ɔl dat, Abigɛl nɔ bin de fɛn we fɔ kɔmɔt na di mared-os. I fɔ bin dɔn sɛt in mɔt ɛn alaw Devid ɛn in man dɛn fɔ kil in man. Bifo dat, i bin du ɔl wetin i ebul fɔ protɛkt Nebal ɛn ɔl di pipul dɛn we bin de na dɛn os. Imajin di kayn maynd we Abigɛl bin nid fɔ go mit 400 man dɛn we bin ol tin dɛn fɔ fɛt, ɛn fɔ tɔk to Devid wit rɛspɛkt bɔt di prɔblɛm. I bin ivin rɛdi fɔ tek di blem fɔ wetin in man du. (Rid Fɔs Samiɛl 25:​3, 23-28.) Devid bin kam fɔ no se na Jiova yuz dis uman we gɛt maynd fɔ gi am advays we ɛp am fɔ lɛ i nɔ mek siriɔs mistek.

17. Wetin maredman dɛn kin lan frɔm wetin di Baybul tɔk bɔt Devid ɛn Abigɛl?

¹⁷ Wetin maredman dɛn kin lan? Abigɛl na uman we bin gɛt sɛns. Devid bin sho se i gɛt sɛns bay we i lisin to Abigɛl in advays. Ɛn dat bin ɛp am fɔ lɛ i nɔ kil inosɛnt pipul dɛn. Semweso, maredman we gɛt sɛns go tek tɛm tink bɔt wetin in wɛf tink bifo i disayd fɔ du impɔtant tin.  Sɔntɛm di tin we in wɛf tink go ɛp am fɔ lɛ i nɔ du di rɔŋ tin.

18. Wetin wɛf dɛn kin lan frɔm Abigɛl in ɛgzampul?

¹⁸ Wetin wɛf dɛn kin lan? Wɛf we lɛk ɛn rɛspɛkt Jiova kin ebul fɔ ɛp in famili, ilɛksɛf in man nɔ de sav Jiova ɔ i nɔ de du wetin Jiova se. I nɔ go du sɔntin we di Baybul nɔ gri wit jɔs fɔ mek i kɔmɔt na di mared-os. Bifo dat, we i de rɛspɛkt in man ɛn put insɛf ɔnda am, i go tray fɔ ɛnkɔrej in man fɔ lan bɔt Jiova. (1 Pit. 3:​1, 2) Bɔt ilɛksɛf in man nɔ gri fɔ sav Jiova, Jiova go gladi fɔ no se dis kayn wɛf de put insɛf ɔnda in man ɛn i de biɛn Am.

19. Wetin go mek wɛf nɔ obe in man?

¹⁹ Wɛf we na Kristian we de put insɛf ɔnda in man nɔ go sɔpɔt in man if i tɛl am fɔ du sɔntin we de agens di lɔ ɔ prinsipul dɛn na di Baybul. Fɔ ɛgzampul, wetin sista go du if in man we nɔto Jiova Witnɛs tɛl am fɔ lay, fɔ tif, ɔ fɔ du ɔda tin we Jiova nɔ want? Ɔlman we na Kristian, ivin sista dɛn we mared, fɔ mɛmba se na Jiova Gɔd fɔs dɛn fɔ obe. So if wan sista in man tɛl am fɔ du sɔntin we de agens Baybul prinsipul, i nɔ fɔ gri, ɛn i nɔ fɔ fred as i de tek tɛm ɛksplen wetin mek i nɔ go du wetin in man want am fɔ du.—Akt 5:​29.

20. Aw wi no se Meri bin gɛt tayt padi biznɛs wit Jiova?

²⁰ Meri bin gɛt tayt padi biznɛs wit Jiova. I bin sabi di Skripchɔ dɛn gud gud wan. We Meri bin de tɔk wit Ilizabɛt, we na Jɔn we De Baptayz Pipul Dɛn in mama, i bin kot di Ibru Skripchɔ Dɛn pas 20 tɛm. (Lyuk 1:​46-55) Ɛn tink bɔt dis: Pan ɔl we Meri bin dɔn ɛngej to Josɛf, na Meri fɔs Jiova in enjɛl bin apia to. Di enjɛl bin go fɔs to Meri ɛn tɛl am se i go bɔn Gɔd in Pikin. (Lyuk 1:​26-33) Jiova bin sabi Meri gud gud wan, ɛn i bin gɛt kɔnfidɛns se Meri go lɛk ɛn kia fɔ In Pikin. Ɛn Meri bin kɔntinyu fɔ gɛt tayt padi biznɛs wit Jiova ivin afta we Jizɔs day ɛn gɛt layf bak fɔ go de na ɛvin.—Akt 1:​14.

21. Wetin maredman dɛn kin lan frɔm wetin di Baybul tɔk bɔt Meri?

 ²¹ Wetin maredman dɛn kin lan? Maredman we gɛt sɛns kin gladi fɔ si se in wɛf sabi di Skripchɔ dɛn gud gud wan. I nɔ de fil bad fɔ dat ɔ tink se na in wɛf want fɔ de oba di famili. I no se sista we sabi di Baybul ɛn Baybul prinsipul dɛn gud gud wan kin rili ɛp in famili. Bɔt ilɛksɛf di wɛf lan buk pas in man, na di man gɛt di wok fɔ de bifo fɔ famili wɔship ɛn fɔ du ɔda tin dɛn fɔ wɔship Jiova.—Ɛfi. 6:​4.

22. Wetin wɛf dɛn kin lan frɔm Meri?

²² Wetin wɛf dɛn kin lan? Mareduman fɔ put insɛf ɔnda in man, bɔt stil na in gɛt di wok fɔ du wetin go mek i kɔntinyu fɔ gɛt fet pan Jiova. (Gal. 6:​5) So i fɔ mek tɛm fɔ du in yon pasɔnal stɔdi ɛn fɔ tink gud wan bɔt wetin i de lan. Dat go ɛp am fɔ kɔntinyu fɔ lɛk ɛn rɛspɛkt Jiova ɛn fɔ gladi as i de put insɛf ɔnda in man.

23. Aw wɛf dɛn we de put dɛnsɛf ɔnda dɛn man kin ɛp dɛn famili, di kɔngrigeshɔn, ɛn ivin dɛnsɛf?

²³ Wɛf dɛn we de kɔntinyu fɔ put dɛnsɛf ɔnda dɛn man bikɔs dɛn lɛk Jiova go kɔntinyu fɔ satisfay ɛn gɛt gladi-at pas di wan dɛn we nɔ de gri fɔ put dɛnsɛf ɔnda di wan dɛn we Jiova dɔn put oba dɛn. Dɛn de sɛt fayn ɛgzampul fɔ yɔŋman ɛn yɔŋuman dɛn. Ɛn dɛn de ɛp fɔ lɛ lɔv ɛn pis nɔ jɔs de na dɛn famili, bɔt ivin insay di kɔngrigeshɔn. (Tay. 2:​3-5) Tide, bɔku pan Jiova in fetful savant dɛn na uman dɛn. (Sam 68:​11, NWT) Ilɛksɛf wi na man ɔ uman, wi ɔl go ebul ɛp fɔ mek gladi-at de na di kɔngrigeshɔn. Di nɛks atikul go tɔk bɔt aw wi ɔl go ebul fɔ du dat.