WAN de we tu yɔŋ uman dɛn bin de waka togɛda na wan distrikt we dɛn de du biznɛs insay Bagio Siti na di Filipins, dɛn notis wan pɔblik witnɛsin kat, bɔt dɛn nɔ go nia am. Di sista we nem Ɛlɛn we bin tinap nia di kat bin smayl to dɛn. Di uman dɛn kɔntinyu fɔ go usay dɛn bin de go, bɔt dɛn bin lɛk di we aw Ɛlɛn smayl to dɛn.

Leta, we dɛn bin de insay bɔs de go na os, dɛn si wan big jw.org sayn na wan Kiŋdɔm Ɔl. Dɛn mɛmba se na dɛn sem lɛta dɛn de dɛn bin si na di pɔblik witnɛsin kat. So dɛn ɔl tu kam dɔŋ di bɔs ɛn go chɛk di list we de na di Kiŋdɔm Ɔl get fɔ si ustɛm di difrɛn kɔngrigeshɔn dɛn kin gɛt mitin.

Di tu uman dɛn bin atɛnd di nɛks mitin we wan pan di kɔngrigeshɔn dɛn bin gɛt. Ɛn we dɛn go na di Kiŋdɔm Ɔl, udat dɛn si? Na Ɛlɛn! We dɛn si am, dɛn mɛmba wantɛm wantɛm se na in na di uman we bin smayl to dɛn. Ɛlɛn se: “A bin fred we a si dɛn kam to mi bikɔs a bin fil se sɔntɛm a dɔn du bad tin.” Bɔt di uman dɛn ɛksplen to Ɛlɛn se dɛn kam to am bikɔs dɛn bin dɔn si am na di kat.

Di uman dɛn bin ɛnjɔy di mitin, ɛn dɛn bin lɛk we dɛn bin de wit di brɔda ɛn sista dɛn. We dɛn si di brɔda ɛn sista dɛn de klin di Kiŋdɔm Ɔl afta mitin, dɛn aks if dɛnsɛf kin ɛp fɔ klin. Wan pan di uman dɛn nɔ de na di Filipins igen. Bɔt di ɔda wan bin stat fɔ atɛnd mitin ɛn stɔdi di Baybul, jɔs bikɔs ɔf wan smayl!