Afta 1920, mi mama ɛn papa dɛn bin tek di trut, dat na bifo dɛn mared. Na 1939 dɛn bɔn mi. We mi na bin smɔl pikin na Ingland, a bin de atɛnd mitin wit mi mama ɛn papa, ɛn leta a jɔyn di Theocratic Ministry School. Te tide, a stil de mɛmba aw a bin klem pantap bɔks so dat a go gɛt ayt fɔ tinap na di spika stan ɛn gi mi fɔs tɔk. A bin ol siks ia, ɛn a bin rili de fred we a de wach di big wan dɛn we sidɔm na di ɔdiɛns.

Mi papa bin tayp smɔl tin na kad we a fɔ yuz we a go fil savis. A bin ol et ia di fɔs tɛm we mi wangren go fɔ prich. A bin rili gladi we di pɔsin we a mit bin rid wetin de na di kad, ɛn wantɛm wantɛm i gri fɔ tek di buk we nem “Let God Be True”! A rɔn go dɔŋ di strit to mi papa ɛn tɛl am. Di prichin wok ɛn di mitin dɛn bin mek a gladi, ɛn dɛn ɛp mi bak fɔ mek a want fɔ sav Jiova na di fultaym savis.

A bin kam fɔ lɛk di Baybul mɔ ɛn mɔ afta we mi papa bigin fɔ ɔda di Wachtawa dɛn fɔ mi. A bin rili gladi fɔ rid di Wachtawa dɛn ɔl we dɛn ɔda fɔ mi. Dat bin ɛp mi fɔ abop pan Jiova mɔ ɛn gi mi layf to am.

Mi ɛn mi famili bin atɛnd di Theocracy’s Increase Asɛmbli na Nyu Yɔk, we dɛn bin gɛt insay 1950. Tɔsde Ɔgɔst 3, di tim fɔ da de de na “Missionary Day.” Da de de, na Brɔda Kari Baba we bin leta sav as Gɔvnin Bɔdi mɛmba bin gi di baptizim tɔk. Afta we i aks wi we de baptayz di tu kwɛstyɔn dɛn we i de dɔn fɔ gi in tɔk,  a tinap ɛn se, “Yɛs!” A bin ol 11 ia, bɔt a bin no se na impɔtant tin a dɔn du so. Bɔt a bin de fred fɔ go na di wata bikɔs a nɔ bin dɔn lan fɔ swim yet. Mi ɔnkul go wit mi na di wata ɛn tɛl mi se ɔltin go fayn. Fɔ tru, i bin dɔn kwik kwik wan ɛn mi fut nɔ tɔch na grɔn sɛf. Dɛn es mi gi to wan ɔda brɔda we baptayz mi, ɛn wan ɔda wan pul mi kɔmɔt na di wata. Frɔm da de de we a du da impɔtant tin de, Jiova dɔn kɔntinyu fɔ mek mi we klia.

We a dɔn skul, a bin want fɔ bi payɔnia, bɔt mi ticha dɛn bin de ɛnkɔrej mi fɔ go yunivasiti. A bin du wetin dɛn se ɛn go yunivasiti; bɔt a kam fɔ no se a nɔ go ebul fɔ de na di trut ɛn pe atɛnshɔn pan mi buk biznɛs di sɛm tɛm, so a bin disayd fɔ lɛf yunivasiti. A pre to Jiova bɔt dat, ɛn a rayt lɛta to mi ticha dɛn ɛn tek tɛm ɛksplen se a go lɛf yunivasiti we mi fɔs ia dɔn. Bikɔs a abop pan Jiova, wantɛm wantɛm a bigin fɔ payɔnia.

Insay Julay 1957, a bigin mi fultaym savis na wan tɔŋ we dɛn kɔl Wɛlinbɔrɔ. A aks di brɔda dɛn na Lɔndɔn Bɛtɛl fɔ mek dɛn go sho mi wan payɔnia brɔda we gɛt ɛkspiriɛns we a go jɔyn. Brɔda Bat Vezi tich mi bɔku tin dɛn. I bin gɛt zil fɔ prich, ɛn i ɛp mi fɔ mek a gɛt fayn shɛdul fɔ prich. Na mi, Brɔda Vezi, ɛn siks ol sista dɛn bin de na di kɔngrigeshɔn. We a bin de pripia fɔ di mitin ɛn tek pat pan di mitin dɛn, dat dɔn mek a abop pan Jiova, ɛn i ɛp mi bak fɔ tɔk bɔt mi fet.

Dɛn put mi na prizin fɔ shɔt tɛm bikɔs a nɔ gri fɔ jɔyn di ami. Afta dat, a mit wan spɛshal payɔnia sista we nem Babra. Wi mared insay 1959, ɛn wi bin rɛdi fɔ go ɛnisay we dɛn sɛn wi. Fɔs, dɛn sɛn wi na Lankashia we de na di nɔt pat na Ingland. Dɔn insay Janwari 1961, dɛn invayt mi fɔ atɛnd di Kiŋdɔm Ministri Skul na Lɔndɔn Bɛtɛl fɔ wan mɔnt. We di kɔz dɔn, a bin sɔprayz we dɛn tɛl mi se a go bigin fɔ du di sakit wok. Fɔ tu wiks, wan ɛkspiriɛns sakit ovasia bin de tren mi na Bamingam, ɛn dɛn bin alaw Babra fɔ jɔyn mi. Afta dat, wi go na wi asaynmɛnt bak na Lankashia ɛn Chɛshia.

Insay Ɔgɔst 1962, we wi bin go ɔlide, di branch ɔfis sɛn lɛta to wi. Na fɔm dɛn bin de insay di lɛta fɔ atɛnd di Giliad Skul. Afta we mi ɛn Babra pre bɔt dat, wi fil di fɔm dɛn ɛn kɛr am go kwik kwik wan lɛk aw di branch ɔfis se fɔ du. Afta fayv mɔnt, wi go na Bruklin we de na Nyu Yɔk fɔ atɛnd di Giliad klas we mek 38, dat na tɛn mɔnt kɔz fɔ stɔdi di Baybul.

Na Giliad Skul, wi lan bɔku tin dɛn bɔt Gɔd in Wɔd, in ɔganayzeshɔn, ɛn wi brɔda ɛn sista dɛn we de ɔlsay na di wɔl. Pan ɔl  we a bin ol 24 ia ɛn mi wɛf bin ol 23 ia, wi bin lan bɔku tin dɛn frɔm di ɔda studɛnt dɛn na wi klas. A bin de gladi ɛvride we dɛn bin de aks mi fɔ wok wit Brɔda Frɛd Rɔsk, we na wan pan wi instrɔktɔ dɛn. Wan impɔtant tin we a lan frɔm am na fɔ yuz di Baybul fɔ advays di brɔda ɛn sista dɛn. Di wan dɛn we bin de tich wi na ɛkspiriɛns brɔda dɛn lɛk Netan Nɔ, Frɛdrik Franz, ɛn Kal Klayn. Wi bin lan bɔku tin frɔm Brɔda A. H. Makmilan in ɔmbul ɛgzampul. I bin ɛp wi fɔ si aw Jiova bin de gayd in pipul dɛn di tɛm we prɔblɛm bin mit dɛn insay 1914 to 1919.

We di kɔz bin want fɔ dɔn, Brɔda Nɔ tɛl mi ɛn Babra se dɛn de sɛn wi na Burundi we de na Afrika. Wantɛm wantɛm, wi go na di Bɛtɛl laybri ɛn luk di Yearbook fɔ no ɔmɔs pɔblisha dɛn bin de na Burundi da tɛm de. Wi sɔprayz fɔ no se no pɔblisha nɔ bin de de da tɛm de. So wi bin no se wi de go na ples we dɛn nɔ prich yet, ɛn wi de go na Afrika we wi nɔ no natin bɔt. Wi bin rili wɔri! Bɔt afta we wi pre, wi nɔ bin wɔri igen.

Na wi nyu asaynmɛnt, ɔltin bin difrɛn frɔm wetin wi bin sabi. Di wɛda, di kɔlchɔ, ɛn di langwej bin difrɛn. Naw wi fɔ tray fɔ sabi tɔk Frɛnch. Wi bin nid ples bak fɔ de. Afta tu dez we wi rich na Burundi, wan pan wi Giliad klasmet we nem Ari Anɔt bin kam fɛn wi as i bin de go bak na in asaynmɛnt na Zambia. I ɛp wi fɔ fɛn ples fɔ de, ɛn da ples de kam fɔ bi wi fɔs mishɔnari om. Bɔt i nɔ tu te, di gɔvmɛnt ɔfisa dɛn we nɔ bin no ɛnitin bɔt Jiova Witnɛs dɛn bin stat fɔ sho se dɛn de agens wi. As wi bigin fɔ ɛnjɔy wi asaynmɛnt so, di gɔvmɛnt ɔfisa dɛn tɛl wi se wi nɔ go ebul fɔ de na Burundi we wi nɔ gɛt wok pamit. I sɔri fɔ no se wi bin kɔmɔt na Burundi ɛn go na Yuganda.

Bikɔs wi bin abop pan Jiova, dat ɛp wi fɔ lɛ wi nɔ fred fɔ go Yuganda we wi nɔ gɛt visa. Wan brɔda we kɔmɔt na Kanada we bin de sav na wan pat na Yuganda usay dɛn bin nid mɔ pipul dɛn fɔ prich bin tɔk to wan imigreshɔn ɔfisa fɔ wi, ɛn dɛn gi wi  sɔm mɔnt fɔ mek wi go ebul fɔ gɛt pamit fɔ de na Yuganda. So dat bin ɛp wi fɔ no se Jiova de wit wi.

Di tin dɛn we bin de apin na Yuganda bin rili difrɛn frɔm wetin bin de apin na Burundi. Dɛn bin dɔn de prich na Yuganda, pan ɔl we na 28 Jiova Witnɛs dɛn nɔmɔ bin de na da kɔntri de. Wi bin fɛn bɔku pipul dɛn we de tɔk Inglish na da tɛritri de. I nɔ bin tu te, wi kam fɔ no se if wi rili want fɔ ɛp di wan dɛn we want fɔ lan bɔt Jiova, wi fɔ lan wan pan di bɔku langwej dɛn we dɛn de tɔk. Wi bigin fɔ prich na wan eria we dɛn de kɔl Kampala, usay bɔku pipul dɛn de tɔk di Luganda langwej, so wi bin disayd fɔ pe atɛnshɔn pan da langwej de. I bin tek sɔm ia fɔ mek wi go ebul fɔ sabi tɔk da langwej de gud gud wan, bɔt dat bin ɛp wi fɔ mek wi ebul fɔ du wi prichin wok fayn fayn wan. Dat mek wi ebul fɔ ɔndastand wetin wi Baybul studɛnt dɛn nid fɔ mek dɛn go gɛt tayt padi biznɛs wit Jiova. We wi Baybul studɛnt dɛn kam fɔ no se wi rili want fɔ ɛp dɛn, dat mek dɛn nɔ ayd ɛnitin pan wi, ɛn dɛn bin ebul tɛl wi aw dɛn de fil bɔt wetin dɛn bin de lan.

Wi bin gladi mɔ fɔ mit pipul dɛn we de put dɛnsɛf dɔŋ ɛn we want fɔ lan bɔt di tru tin dɛn na di Baybul we wi bigin fɔ du di sakit wok ɔlsay na di kɔntri. Di branch ɔfis na Kenya bin aks wi fɔ de fɛn ples dɛn fɔ spɛshal payɔnia dɛn we go kam ɛn bigin fɔ prich na dɛn eria dɛn de. Bɔku tɛm, pipul dɛn we nɔ wande tɔk to Jiova Witnɛs dɛn bin de du gud to wi. Dɛn bin de ɛp wi wit tin fɔ it ɛn say fɔ de.

Wan ɔda tɛm, a bin travul fɔ tu dez insay tren frɔm Kampala go na wan tɔŋ na Kenya we nem Mumbasa. Ɛn frɔm de, a bin tek ship fɔ go na Seshɛls we na wan ayland we de na di Indian Oshɔn. Leta, frɔm 1965 to 1972, a bin de go na Seshɛls fast fast, ɛn Babra bin de go wit mi. Fɔs, na jɔs tu pɔblisha dɛn bin de de, ɛn leta dɛn bi grup we tɔn to kɔngrigeshɔn. A bin travul go na Ɛritrea, Itiopia, ɛn Sudan fɔ go fɛn wi brɔda dɛn.

Tin bin chenj kwik kwik wan na Yuganda. Di sojaman dɛn ovatro di gɔvmɛnt. Di bad bad tin dɛn we bin apin mek a mɛmba se i mek sɛns fɔ obe wetin di Baybul se: “Una gi Siza wetin na Siza in yon.” (Mak 12:​17) Wan tɛm, dɛn bin se lɛ ɔl di fɔrina dɛn we de liv na Yuganda go rɛjista na di polis steshɔn we de nia dɛn os. Wi bin du dat wantɛm wantɛm. Afta sɔm dez, we mi ɛn wan ɔda mishɔnari bin de drayv na Kampala, sikrit polisman dɛn bin kam mit wi. Wi bin de rili fred. Dɛn bin se wi na spay dɛn, ɛn dɛn kɛr wi go na di men polis steshɔn usay wi ɛksplen tɛl dɛn se wi na pisful mishɔnari dɛn. Wi tɛl dɛn se wi bin dɔn rɛjista, bɔt dɛn nɔ lisin wi sɛf. Dɛn arɛst wi ɛn kɛr wi go na di polis steshɔn we de nia di mishɔnari om. Wi bin gladi we di polisman we no se wi dɔn rɛjista, si wi ɛn mek lɛ dɛn lɛf wi.

Dɛn tɛm dɛn de, i nɔ bin izi fɔ krɔs di sojaman dɛn chɛkpɔynt dɛn, mɔ if i bi se di sojaman dɛn we stɔp wi bin dɔn drink  pasmak. Wi bin de pre ɔltɛm, ɛn wi at kin kol we dɛn bin de alaw wi fɔ pas saful wan. Bɔt insay 1973, dɛn bin tɛl ɔl di mishɔnari dɛn fɔ kɔmɔt na Yuganda.

Dɛn chenj wi asaynmɛnt bak, dis tɛm na Ayvri Kost wi go. Dis na bin big chenj fɔ wi. Wi bin gɛt fɔ yus to nyu kɔlchɔ, wi bigin fɔ tɔk Frɛnch bak ɔltɛm, ɛn tray fɔ yus to di mishɔnari dɛn we kɔmɔt na difrɛn kɔntri dɛn. Bɔt we wi si ɔmbul pipul dɛn we gɛt klinat de gladi fɔ lan di tru, wi bin si am se na Jiova de dayrɛkt di prichin wok. Mi ɛn Babra kam fɔ si se bikɔs wi abop pan Jiova, i bin mek wi we klia.

I nɔ tu te, wi bin kam fɔ no se Babra gɛt kansa. Bɔku tɛm, wi bin de go bak usay wi kɔmɔt fɔ mek wi go gɛt tritmɛnt. Bɔt insay 1983, wi kam fɔ no se wi nɔ go ebul fɔ sav igen na Afrika. Dis tin we bin apin nɔ bin mek wi gladi.

Babra in sik bin wɔs we wi bin de na Lɔndɔn Bɛtɛl, ɛn i nɔ tu te, i bin day. Di Bɛtɛl famili bin rili sɔpɔt wi. Wan brɔda ɛn in wɛf bin ɛp mi fɔ ajɔst ɛn kɔntinyu fɔ abop pan Jiova. Leta, a mit wan sista we de kɔmyut na Bɛtɛl we na bin spɛshal payɔnia, ɛn we rili lɛk Jiova. Mi ɛn da sista de we nem An bin mared insay 1989. Ɛn frɔm da tɛm de, wi dɔn de sav na Lɔndɔn Bɛtɛl.

Frɔm 1995 to 2018, a ɛnjɔy fɔ sav as wɔl ɛdkwata rɛprizɛntetiv (we dɛn bin de kɔl zon ovasia trade). A bin go na ɔlmost 60 difrɛn kɔntri dɛn. Insay ɛniwan pan dɛn asaynmɛnt dɛn de, a si aw Jiova de blɛs in savant dɛn we gɛt difrɛn prɔblɛm dɛn.

Dis asaynmɛnt bin mek a go bak na Afrika insay 2017. A bin gladi fɔ kɛr An go na Burundi, ɛn wi ɔl tu bin sɔprayz fɔ si aw plɛnti pipul dɛn dɔn kam na di trut. Na di strit usay a bin de prich frɔm os-to-os insay 1964, na de dɛn bil fayn fayn Bɛtɛl om. Ɛn naw, i dɔn pas 15,500 pɔblisha dɛn we de na di kɔntri.

A bin gladi pasmak we a si se Ayvri Kost na wan pan di kɔntri dɛn we a fɔ go insay 2018. We wi rich na di kapital siti we nem Abijan, i bin tan lɛk se a dɔn rich na mi om. We a bin de luk di list usay di brɔda dɛn we de wok na Bɛtɛl dɛn tɛlifon nɔmba dɛn de, a bin kam fɔ no se di brɔda we de nia di gɛst rum usay wi bin de na brɔda we a sabi. In nem na Sosu. A mɛmba se in na bin siti ovasia di tɛm we a bin de na Abijan. Bɔt nɔto bin in, na bin in pikin, insɛf nem Sosu.

Jiova dɔn du wetin i prɔmis. Pan ɔl dɛn prɔblɛm dɛn ya we dɔn mit mi, a dɔn kam fɔ rili no se we wi put wi op pan Jiova, i de mek wi we klia. Naw wi rili want fɔ kɔntinyu fɔ sav Jiova, ɛn wi no se bɛtɛ go de fɔ wi tumara bambay.—Prɔv. 4:​18.